ამირან ჩაფიძის ტბა

საკუთარი ტბა ეზოში და პირობა, რომელსაც ასრულებ, ანუ არ შეგშურდეს, ამირან!

2695
(განახლებულია 19:12 26.06.2020)
ეს ამბავი იმის კიდევ ერთი დასტურია, რომ შეუძლებელი არაფერია. სურვილის შემთხვევაში შეიძლება საკუთარ ეზოში ლამაზი ტბა შექმნა, ამ ტბაში თევზები გაუშვა, მის გარშემო ბაღი მოაშენო, მერე ტბაზე საკუთარი ხელით შეკრული ტივი ჩაუშვა და წყალზე პატარა ბეწვის ხიდიც გადაჭიმო...

თავიდან ახლობლები, ცოტა არ იყოს, სკეპტიკურად უყურებდნენ ოჯახის უფროსის ჩანაფიქრს, მაგრამ შემდეგ თავადაც ჩაერთვნენ ამ „ავანტიურაში“.

დღეს თბილისში, ე.წ. აფრიკის რაიონში ბევრმა იცის ადგილი, სახელად „ამირანის ტბა“, მისი შექმნის ისტორია კი ალბათ ყველასთვის არ არის ცნობილი.

ამირან ჩაფიძე კომუნისტების დროს წლების მანძილზე მაღალ თანამდებობებზე მუშაობდა, მაგრამ მისი პერსონა პარტიული ფუნქციონერის სტერეოტიპულ პორტრეტში ვერ ჯდებოდა. ამის მიზეზი მარტივი იყო – არ თაკილობდა შრომას და შემოქმედებითი ფანტაზიის ნაკლებობასაც არ უჩიოდა. ერთ დღესაც ეს თვისებები თვალნათლივ და აშკარად აისახა საკუთარი კარ-მიდამოს არასაბჭოურად მოწყობაში...

ამირან ჩაფიძე
photo: courtesy of Teona Gogniashvili
ამირან ჩაფიძე

- ბატონო ამირან, ადრე თუ წარმოიდგენდით, რომ ტბის მფლობელი გახდებოდით?

- თავიდან ასეთ რამეს ვერც წარმოვიდგენდი, ეს იდეა გვიან გაჩნდა. ბავშვობა თერჯოლაში, ულამაზეს სოფელ ჩხარში გავატარე. შრომა შემაყვარა მამამ, რომელიც ასევე მშრომელი კაცი იყო. რა მახსენდება, იცით? – უფრო გვიან, როცა სტუდენტი ვიყავი, ნაქირავებში ვცხოვრობდი. ერთხელ სტუმრად მივედი ისეთ ოჯახში, სადაც ძალიან განსხვავებული, ლამაზი გარემო დამხვდა. აი, მაშინ გულში გავიფიქრე, არ შეგშურდეს, ამირან, მოვა დრო და ასეთი რამ შენც გექნება–მეთქი. გავიდა დრო და საკუთარ თავს ავუსრულე რა პირობაც მაშინ მივეცი. ეს საქმე ბოლო ხუთია წელია რაც დავიწყე და აქ ყველაფერი საკუთარი ხელით მაქვს გაკეთებული.

შვილებთან ერთად ტბაზე
შვილებთან ერთად ტბაზე

- როცა თანამდებობის პირი იყავით, კომუნისტების დროს, ალბათ ასეთ ტბაზე ვერც იოცნებებდით...

- რას ამბობთ, მაშინ ასეთი რამ „უშრომელ შემოსავლად“ ითვლებოდა. არადა, ეს თუ უშრომელია!.. ამას სჭირდება შრომა თუ სჭირდება.

- სემირამიდას ბაღები გამახსენდა, თქვენს მეუღლეს ხომ არ მიუძღვენით ეს ადგილი?

- კი, ბატონო, სინამდვილეში მას მივუძღვენი, რადგან მარტო საკუთარი ენთუზიაზმით ვერაფერს გავხდებოდი, მეუღლე რომ არ დამდგომოდა გვერდში. როცა მეუღლე რამეს გიწონებს, სტიმული გეძლევა და მაშინ ყველაფერს აკეთებ.

ამირან ჩაფიძის ეზო
photo: courtesy of Teona Gogniashvili
ამირან ჩაფიძის ეზო

- მეუღლეს მიუძღვენით, მაგრამ ტბას საკუთარი სახელი დაარქვით?

- სინამდვილეში ასეა: ამირანის ტბა და მედეას ბაღი. მართალია, აბრაზე არ მაქვს მითითებული, მაგრამ მერე მაგასაც მივაწერ.

- ეს ტბა აქ ხელოვნურად დააგუბეთ?

- ეს წყალი აქ ბუნებრივადაა, რადგან ჩემს ეზოში მიწიდან ამოდის, მე მიმართულებას ვაძლევ. როცა ეს ადგილი თავიდან ვნახე, მაშინვე ვიფიქრე, რომ შეიძლებოდა ამ წყლის ხარჯზე აქ ასეთი ტბა გამეკეთებინა. ეს წყალი რომ არ იყოს, აქ ეს ადგილი საინტერესო არც იქნებოდა. წყალი სიცოცხლეა და ძალიან მიყვარს.

ტივი ტბაზე
photo: courtesy of Teona Gogniashvili
ტივი ტბაზე

- შემთხვევით ჰოროსკოპით წყლის ნიშანი ხომ არ ხართ?

- არა, მაგრამ ვერძი ვარ და „ცხოვრებას რქებით ვაწვები“. სხვათა შორის, ამ ტბაში თევზი – საზანი და კობრი მაქვს გაშვებული და მრავლდებიან, ასე რომ, აქ ვთევზაობთ კიდეც. დეკორაცია, რასაც ხედავთ, ჩემი ხელით არის გაკეთებული, ხშირად მომაქვს ძველი ნივთები, რომელსაც ხელს შევავლებ, განვაახლებ და მათი საშუალებით მიდამოს ვალამაზებ.

ამირან ჩაფიძის ტბა
photo: courtesy of Teona Gogniashvili
ამირან ჩაფიძის ტბა

- ეს ტივიც თქვენ შეკარით?

- ახლობლები დამეხმარნენ. რადგან ტბა გაჩნდა, ამან თავისთავად „მოითხოვა“ ტივი, ამიტომ არ დავაყოვნეთ. ბუტაფორია არ გეგონოთ, ამით ტბაში გავდივართ. ტივის გარდა საჭირო იყო ტბის მეორე მხარეს გადასვლა და ამიტომ ეს პატარა ლამაზი ხიდიც მერე გაჩნდა.

ამირან ჩაფიძის ტბა, ხიდზე მისი შვილი და შვილიშვილი
photo: courtesy of Teona Gogniashvili
ამირან ჩაფიძის ტბა, ხიდზე მისი შვილი და შვილიშვილი

- ტბის თავზე, ვხედავ, მავთულია გადაჭიმული...

- ამაზე, თუ ექსტრემალი ხარ, შეგიძლია დაეკიდო და ტბის გადავლით ქვემოთ დაეშვა. საშიში ნამდვილად არ არის, მაგრამ სპორტული აზარტი უნდა გქონდეს, აქ რომ ჩამოსრიალდე. სხვათა შორის, ჩემს შვილიშვილს უყვარს ტბაზე დაშვება. ის სპორტსმენია, კალათბურთელი. როცა გაიზრდება, ოცნებობს, რომ NBA-ში გამოვიდეს. იმედია, მერე საქართველოში დაბრუნდება, რადგან ამაზე კარგ ქვეყანას საცხოვრებლად მაინც ვერსად ნახავს.

ამირან ჩაფიძის ტბა
photo: courtesy of Teona Gogniashvili
ამირან ჩაფიძის ტბა

- სტუმრიანობას მიჩვეული იქნებით...

- ბევრი უცხოელი მყოლია. ადრე გერმანელი მამა-შვილი ამოვიდა. ცოტა გვიანი იყო და გზა რომ ჩაბნელებული ნახეს, ცოტა არ იყოს, შეშინებიათ. მძღოლისთვის უკითხავთ, ეს სად მოგყავართ, ხომ არ გვაყაჩაღებენო. აქ რომ მოვიდნენ, ჩემი მეუღლე გამოეგება, აქაურობა განათებული დახვდა და კაცმა შვებით ამოსუნთქა. ერთხელ ახლობელმა დუბაიდან ჩამოსული კაცი მოიყვანა. როცა ეს ტბა ნახა, გადაირია – აქ მინდა ცხოვრებაო. იმ დროს ვიღაცამ დაურეკა, ამან მიახალა – სად ვარ და სამოთხეშიო. ისინი ბუნებრივად ლამაზ ადგილს აფასებენ, მით უფრო, თუ მას ადამიანის ხელიც ეტყობა.

ამირან ჩაფიძის ეზო
photo: courtesy of Teona Gogniashvili
ამირან ჩაფიძის ეზო

- დღეს მთელი ოჯახი აქ ცხოვრობთ, შთამომავლობას არაჩვეულებრივ მემკვიდრეობას უტოვებთ...

- სხვადასხვა ასაკის ადამიანები ერთ დიდ ოჯახად, მეგობრულად ვცხოვრობთ. მიხარია, რომ მოსწონთ აქაურობა. სულ ვფიქრობ, რატომ ჰყავს ჩვენს ქვეყანას ამდენი ემიგრანტი საკუთარ სამშობლოშიც თუ შეიძლება, რომ თავი კარგად იგრძნო, თუ შრომა არ გეზარება. მომავალში ბევრი რამ მაქვს ჩაფიქრებული და მჯერა, ყველაფერი გამომივა.

ამირან ჩაფიძის ტბა
photo: courtesy of Teona Gogniashvili
ამირან ჩაფიძის ტბა

- ბატონო ამირან, დაახლოებით ვხვდები, რას მიპასუხებთ, მაგრამ მაინც, რა არის ბედნიერება?

- ბედნიერებაა, როცა ყველაფერი შენი ხელით გაქვს გაკეთებული და შექმნილი, როცა შრომის ნაყოფს საკუთარ თვალით ხედავ და ეს სხვებსაც სიამოვნებას ანიჭებს, ესაა ბედნიერებაა...

 

2695
ქეთევან ქარჩავა

როგორ აქციო ჰობი შემოსავლის წყაროდ: ხავერდის დახვეწილი ჩანთები ქეთევან ქარჩავასგან

709
(განახლებულია 20:02 10.07.2020)
ბევრ ადამიანს აქვს ჰობი, რომელიც ხელსაქმეს უკავშირდება. ზოგს ქარგვა იზიდავს, ზოგს ქსოვა, ზოგს კერვა. ბევრი ახერხებს თავისი გატაცება შემოსავლის წყაროდ აქციოს.

ქეთევან ქარჩავა პროფესიით ისტორიკოსია, თუმცა პროფესიით არასოდეს უმუშავია. ყოველთვის სურდა საკუთარი საქმე ჰქონოდა. გზა, რომლიც ქალბატონმა ქეთევანმა დიასახლისობიდან დღემდე გაიარა, არ იყო მარტივი. დღეს უკვე საკუთარი ბიზნესი აქვს. ხავერდისგან ულამაზეს ჩანთებს ქმნის, რომელსაც თავისივე ხელით დიდი რუდუნებით ქარგავს.

ქეთევან ქარჩავა
photo: courtesy of Ketevan Karchava
ქეთევან ქარჩავა

- პროფესიით ისტორიკოსი ვარ, თუმცა ჩემი პროფესიით არასოდეს მიმუშავია, ვიყავი უბრალოდ დიასახლისი. ვერ ვიტყვი, რომ ამ გადაწყვეტილებით კმაყოფილი ვიყავი, რადგან მუდმივად ვცდილობდი შემევსო ის დანაკლისი, რასაც პროფესიულად ვერ რეალიზება იწვევდა. კითხვა მიყვარდა ბავშვობიდან და ბევრს ვკითხულობდი, ვეძებდი სხვადასხვა გატაცებებს, მებაღეობაც კი ვცადე სახლის პირობებში. კერვა, ხატვა, თექაზე მუშაობა, თუმცა ეს გატაცებები ხანგრძლივი არ აღმოჩნდა. მიუხედავად ამისა ყველა მათგანმა გარკვეული კვალი დატოვა ჩემი გემოვნებისა და თვითრწმენის ჩამოყალიბებაში.

შვილების გაზრდის მერე უფრო მწვავედ ვიგრძენი, რომ რაღაც მჭირდებოდა, რაც ჩემს, როგორც დიასახლისის ცხოვრებას უფრო საინტერესოს გახდიდა. ამავე დროს საკუთარ თავს დავუმტკიცებდი, რომ ნებისმიერ ასაკში შესაძლებელია შენი ცხოვრება გახადო უფრო საინტერესო და ნაყოფიერი.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ვინ იყო ადამიანი, ვინც ამ პერიოდის განმავლობაში სტიმულს და მოტივაციას გაძლევდათ, გვერდით გედგათ და ყველაზე მეტად გამხნევებდათ?

- მთელი ამ თვითძიების პროცესს ჩემი მეუღლე, ძალიან წარმატებული იურისტი, ინტერესით, ცოტა იუმორით, მაგრამ საკმაოდ გაგებით ეკიდებოდა, რაც არ იყო მარტივი ამ გადმოსახედიდან. ჩემი ინტერესები და გატაცებები ელვის სისწრაფით იცვლებოდა, რაც საკმაო დისკომფორტს იწვევდა ოჯახში. ჩემი მეუღლეა ის ადამიანი, რომელიც დღემდე მხარს უჭერს ყველა ჩემს წამოწყებას და იდეას. ინსპირაციის წყარო კი ჩემი ქალიშვილია, რომელსაც ბავშობიდან დღემდე ნებით თუ ძალით ვარგებ ჩემ მიერ შექმნილ სამოსს თუ აქსესუარებს.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- როგორი იყო თქვენი პირველი ნაბიჯები ამ სფეროში?

- დაახლოებით 2015 წელს შევქმენი ონლაინ-გვერდი „ფეისბუქზე“. მაშინ ვმუშაობდი თექაზე, ფაქტიურად ამ დროიდან გარდაიქმნა ჰობი საქმიანობად. მიმიწვიეს რამდენიმე ჯგუფურ გამოფენაზე საქართველოში და საზღვარგარეთ, ინტერვიუ მთხოვა რამდენიმე ტელეარხმა, გაიყიდა ბევრი ნამუშევარი, შემომთავაზეს ტრადიციული რეწვის ასოციაციის წევრობა.  ამ ყველაფერმა დიდი გავლენა მოახდინა ჩემზე, როგორც თვითნასწავლ შემოქმედზე. ასევე მინდა ვთქვა, ყველაზე მასტიმულირებელი იყო ადამიანების აღტაცება ჩემი ნამუშევრებით. გარკვეული დროის მერე თექის ჩანთაზე ამოქარგვა დავიწყე, ქარგვამ ძალიან გამიტაცა. შემდეგ ქსოვილზე ვცადე და დღემდე მხოლოდ ქარგვით და კერვით ვარ დაკავებული. გასაკუთრებით ხავერდზე მომწონს ქარგვა, რადგან თვითონ ეს ქსოვილი განსაკუთრებულად ლამაზი და შესახებად სასიამოვნოა.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ხავერდზე მუშაობა რთული არ არის?

- მასზე საკმაოდ რთულია მუშაობა და ესკიზის გადატანა, ამიტომ პირდაპირ ვქარგავ და არასოდეს ვიცი რა იქნება საბოლოო შედეგი, ასე უფრო საინტერესოა ჩემთვის. აქვე მინდა აღვნიშნო, ბებიას უყვარდა ქარგვა. მახსოვს, ბავშვობაში ძალიან ლამაზი საზეიმო კაბა მომიქარგა, მამიდაც ქარგავდა და კერავს დღემდე, მეც ალბათ მათგან გამომყვა ხელსაქმის სიყვარული.

ხელნაკეთი ჩანთა
photo: courtesy of Ketevan Karchava
ხელნაკეთი ჩანთა

- როგორ ფიქრობთ, რით არის თქვენი ჩანთები გამორჩეული, როგორ დაიპყარით ამდენი ქალბატონის გული?

- ჩემი ჩანთები ვინტაჟური სტილისაა. ასე მგონია, მე-19 საუკუნის ვიქტორიანული სული ცოცხლდება მათში. აქ ალბათ გავლენას ახდენს ჩემი სიყვარული ისტორიისადმი. ასევე მიყვარს ბუნება, ყვავილები, ყველაფერი, რაც ცოცხალია და სუნთქავს. ვფიქრობ, რაც იზიდავს ქალბატონებს ჩემ მიერ შექმნილ აქსესუარებში, არის ცოტაოდენი რომანტიზმი, ფერთა გამა, ყვავილების სილამაზე და, რა თქმა უნდა, ხარისხი.

ასევე მინდა ვთქვა, ყველა ნივთი იქმნება დიდი სიყვარულით და გულმოდგინებით, ყველა მათგანი გამორჩეულია ინდივიდუალიზმით, რადგან არ კეთდება შაბლონით. მე მათში ვქარგავ ჩემი სულის ნაწილს და ამიტომაც ვფიქრობ, რომ ყველა ჩემ მიერ შექმნილი აქსესუარი ჰყვება ამბავს. ხანდახან მიჭირს კიდევაც მათთან განშორება.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ყველაზე დიდი მოთხოვნა როგორი სტილის ჩანთებზეა?

- ვერ გეტყვით, რადგან რასაც ვაკეთებ, თითქმის ყველაფერი იყიდება. ხანდახან რომელიღაც მოდელის გამეორებას მთხოვენ, თუმცა იდენტურის გაკეთება შეუძლებელია. ძირითადად მენდობიან და მაძლევენ შემოქმედებით თავისუფლებას. ასეთი დამკვეთების მიმართ საოცრად კეთილგანწყობილი ვხდები და ნამუშევარიც შესაბამისი გამოდის.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ჩანთების გარდა სხვა აქსესუარებასაც ამზადებთ?

- დიახ, ჩანთების გარდა ამ ეტაპზე ვაკეთებ მოქარგულ გულსაკიდებს, საყელოებს, თმის რკალებს, ყაბალახებს და შარფებს.

- სამომავლოდ რა გეგმები გაქვთ?

- წინასწარ ამის პროგნოზირება რთულია, თუმცა მომხმარებელს ვპირდები საინტერესო და ხარისხიან ნამუშევრებს. ზოგადად, გადაწყვეტილებებს სწრაფად ვიღებ. ცვლილებები არ მაშინებს. ამ ეტაპზე ვმუშაობ ინტერნეტ–გაყიდვების გაზრდაზე და ამიტომაც ვგეგმავ სოციალურ ქსელებში მეტად გააქტიურებას. ასევე ჩემი სამომავლო გეგმაა უცხოეთის ბაზარზე ნამუშევრების გატანა.

709
შეყვარებულები

ქალი ქორწინებამდე პროვოკატორია, ქორწინების შემდეგ...

389
(განახლებულია 16:48 09.07.2020)
უცოლო მამაკაცმა ერთმნიშვნელოვნად უფრო მეტი იცის ქალების შესახებ, ვიდრე ცოლიანმა. სხვაგვარად ისიც უკვე ცოლიანი იქნებოდა...

აზრების ფოიერვერკი" წარმოგიდგენთ ჰენრი ლუის მენკენის მოსაზრებებს.

ჰენრი ლუის მენკენი (Henry Louis Mencken, 1880-1956) ამერიკელი ჟურნალისტი, ესეისტი, სატირიკოსი; როგორც ფრენსის სკოტ ფიცჯერალდმა აღნიშნა, „ადამიანი, რომელმაც ამერიკული ლიტერატურისთვის ყველაზე მეტი გააკეთა".

თუ ვინმეს მართლა უყვარდი და გიღალატა, იცოდე, იგი ამას უშენოდ ვერ შეძლებდა…>>

ჰენრი ლუის მენკენმა დაამთავრა ზოგადსაგანმანათლებლო სკოლა „ბალტიმორის პოლიტექნიკური ინსტიტუტი". ეწეოდა ჟურნალისტურ მოღვაწეობას, ხოლო ლიტერატურულ მოღვაწეობას – ძირითადად მეოცე საუკუნის პირველ ოცწლეულში. მისი მთავარი ნაშრომებია: „ჯორჯ ბერნარდ შოუ. პიესები", „წინასიტყვაობათა წიგნი", „ცრურწმენები", „შენიშვნები დემოკრატიის შესახებ".

მან თავი გამოიჩინა, როგორც ბრწყინვალე ჟურნალისტმა და დააარსა ჟურნალი „ამერიკენ მერკური". ის ცნობილია, როგორც „ბალტიმორელი ბრძენი“ (Sage of Baltimore), ასევე „ბალტიმორის ანტიქრისტე". ის მეოცე საუკუნის პირველი ნახევრის ერთ-ერთ ყველაზე გავლენიან მწერლად მიიჩნევა.

რაც არ უნდა ბედნიერი იყოს ქალი ქორწინებაში, მაინც ყოველთვის კმაყოფილებით ამჩნევს, რომ არიან ამ ქვეყნად მამაკაცები, რომლებიც ისურვებდნენ, რომ ის გათხოვილი არ ყოფილიყო...

უცოლო მამაკაცმა ერთმნიშვნელოვნად უფრო მეტი იცის ქალების შესახებ, ვიდრე ცოლიანმა. სხვაგვარად ისიც უკვე ცოლიანი იქნებოდა.

ძნელი დასაჯერებელია, რომ ადამიანი სიმართლეს გეუბნებათ, როცა იცით, რომ თქვენ მის ადგილზე მოიტყუებოდით.

სიყვარული – წამება, უსიყვარულობა – სიკვდილი>>

მამაკაცი ეძებს ისეთ ვინმეს, რომლის წინაშეც მას სიამაყე შეუძლია. ქალი ეძებს მხარს, რომელსაც მიეყრდნობა...

როცა ქალი ქმარს სიტყვაზე ენდობა, ის ეჭვის საბაბს იძლევა.

უსამართლობის გადატანა შედარებით ადვილია. რაც ნამდვილად გვაყენებს ტკივილს - ეს სამართლიანობაა.

სიყვარული - ეს წარმოსახვის გამარჯვებაა გონებაზე.

მამაკაცი თავისი ბუნებით პოლიგამიურია. ერთი ქალი მისით ყოველთვის მანიპულირებს, ხოლო მეორე – კისერზე აზის.

სიყვარულში ბედნიერების უდიდესი საიდუმლოა – გიხაროდეს, რომ მასზე სხვა დაქორწინდა.

იდეალისტი – ეს არის ადამიანი, რომელიც, როცა აღმოაჩენს, რომ ვარდს კომბოსტოზე უკეთესი არომატი აქვს, მიდის დასკვნამდე, რომ ვარდისგან უკეთესი სუპი გაკეთდება.

მამაკაცები ბევრად უკეთესად ცხოვრობენ, ვიდრე ქალები. პირველ რიგში, ისინი გვიან ირთავენ ცოლს; მეორეც – ადრე კვდებიან.

სიყვარული – არა რაოდენობა, არამედ ხარისხი, რომელიც არ იზომება>>

ერთადერთი ნამდვილად ბედნიერი ადამიანები – ეს გათხოვილი ქალები და უცოლო მამაკაცები არიან.

ქალებს არ უყვართ მორცხვი მამაკაცები. კატებს არ უყვართ ფრთხილი თაგვები.

ქალები და მამაკაცები ერთ საკითხში თანხმდებიან: ორივენი არ ენდობიან ქალებს.

წარსულის წინაშე თავი დახარე, მომავლის წინაშე – სახელოები აიკაპიწე.

საყვარელი – მსხვერპლი ნომერი ორი.

ფსიქოთერაპია – ესაა მეცნიერება, რომელიც ამბობს, რომ პაციენტი, დიდი ალბათობით, გამოჯანმრთელდება, მაგრამ სამუდამოდ დარჩება ჩამოყალიბებული იდიოტი.

ქველმოქმედება და პატრიოტიზმი – მთავარი თვისებებია ამერიკელისა, რომელსაც რამის გაყიდვა სურს.

პატარძალი საკურთხეველთან: „როგორც იქნა! როგორც იქნა!“. სიძე: „უკვე ძალიან გვიანია! ძალიან გვიანი!“

ქალი ქორწინებამდე – პროვოკატორია; ქორწინების შემდეგ – ჟანდარმი.

მთელი ფილოსოფია, არსებითად, მიდის იმ აზრამდე, რომ ერთი ფილოსოფოსი ცდილობს დაამტკიცოს, რომ ყველა დანარჩენი ფილოსოფოსი სახედარია. ის, ჩვეულებრივ, ამას ახერხებს, უფრო მეტიც, ის დამაჯერებლად ამტკიცებს, რომ თვითონაც სახედარია.

შენთან ერთად. შენ წინააღმდეგ. უშენოდ...>>

რა ცოტაა საჭირო იმისთვის, რომ ცხოვრება აუტანელი გახადო! კენჭი ფეხსაცმელში, ტარაკანი მაკარონში, ქალის სიცილი!

ქმრები არასდროს ხდებიან კარგი; ისინი, უბრალოდ, გამოცდილებას იძენენ.

ჯენტლმენი – ესაა ადამიანი, რომელიც სიმართლეს ასიდან სულ ცოტა ოცდაათ შემთხვევაში ლაპარაკობს.

ყოველ წესიერ ადამიანს რცხვენია იმ მთავრობისა, რომლის მმართველობის დროსაც ცხოვრობს.

უცოლო – ეს ისაა, რომელსაც უნდა ცოლის შერთვა და თან, ამავე დროს, უხარია, რომ უცოლოა.

დემოკრატია – თეორია, რომლის შესაბამისად ორი ქურდი მოიპარავს ნაკლებს, ვიდრე ერთი; სამი – ნაკლებს, ვიდრე ორი; ოთხი – სამზე ნაკლებს და ასე, უსასრულობამდე.

სინდისი შინაგანი ხმაა, რომელიც გვაფრთხილებს, რომ ვიღაც გვითვალთვალებს.

სიმართლე ისეთი რამაა, რომელსაც, ასე თუ ისე, ვინმეს დისკრედიტირება შეუძლია...

გაზეთი – საშუალება, რომ უვიცი ადამიანები მეტად უვიცნი გახდნენ, ხოლო შეშლილნი – უფრო შეშლილნი.

იმედი – შეუძლებლის პათოლოგიური რწმენაა.

რატომ თხოვდება ქალი მეორედ და რატომ ქორწინდება მეორედ მამაკაცი>>

ჯოჯოხეთი – ადგილი, სადაც ათ მცნებას კანონი დევნის.

მამაკაცი შეიძლება სულელი იყოს, მაგრამ ამის თაობაზე ეჭვი არ ეპარებოდეს – მაგრამ მხოლოდ იმ შემთხვევაში, თუ უცოლოა.

ქმარი – ესაა ადამიანი, რომელსაც სულ თვალი უნდა ადევნო; კისრის ზომა – 16, საყელოს – 15,5.

ეჭვიანობა – თვალსაზრისი, რომლის თანახმად, ცუდი გემოვნებით მხოლოდ თქვენ არ გამოირჩევით.

მსახიობი – ადამიანი, რომელსაც ხის ფეხი უფრო უშლის ხელს, ვიდრე ხის თავი.

დემოკრატია – ესაა მეცნიერება და ხელოვნება, მართო მაიმუნების გალიისგან შემდგარი ცირკი.

დემოკრატია – ეს მხოლოდ ოცნებაა: ის ზღაპრული არკადიის, სანტა კლაუსისა და სამოთხის გვერდით დგას.

უზენაესი – კომედიანტი, რომლის მაყურებელს სიცილისა ეშინია.

ძალაუფლება – ღმერთისგან, იერარქია – ძალაუფლებისგან.

პურიტანობა – შიში, რომ ვიღაც სადღაც შეიძლება ბედნიერი იყოს.

კანონიერი, ნაკურთხი მრუშობა და წუთებად აკინძული ცხოვრება>>

ცუდად იფიქრო მოყვასზე – ცოდვაა, მაგრამ არა მგონია, რომ შეცდომა იყოს.

უცოლოებს ხანდახან სინდისი ქენჯნის. ცოლიანებს ამისთვის ცოლები ჰყავთ. „მე ჩემი ქმრის სინდისი ვარ“.

389
თემები:
აზრების ფოიერვერკი: ცნობილი ადამიანების ბრძნული გამონათქვამები
დაკავება

ზუგდიდში „ტყის ძმების“ ლიდერის შვილი ნარკოდანაშაულზე დააკავეს

0
დაკავებულის პირადი, ავტომანქანის და საცხოვრებელი სახლის ჩხრეკისას ამოღებულია ნარკოტიკული საშუალებები - „მეტადონი” და „ლირიკა”. ასევე ამოღებულია დაკავებულის პირადი ავტომანქანა, 6785 აშშ დოლარი და 500 ევრო.

თბილისი, 12 ივლისი – Sputnik. „ტყის ძმების“ ყოფილი ლიდერის დათო შენგელიას შვილის, 38 წლის დადუ შენგელიას დაკავებასთან დაკავშირებით შსს განცხადებას ავრცელებს.

სპეცოპერაცია ზუგდიდში დღეს რამდენიმე საათს მიმდინარეობდა.

სამართალდამცველებმა მოსამართლის განჩინების საფუძველზე ჩატარებული საგამოძიებო მოქმედებების შედეგად შენგელია ნარკოტიკული საშუალების უკანონო შეძენა-შენახვის ბრალდებით დააკავეს.

სამართალდამცველებმა, დაკავებულის პირადი, ავტომანქანის და საცხოვრებელი სახლის ჩხრეკისას, ნარკოტიკული საშუალებები - „მეტადონი” და „ლირიკა” ამოიღეს.

ასევე, ნივთმტკიცების სახით ამოღებულია დაკავებულის პირადი ავტომანქანა, 6785 აშშ დოლარი და 500 ევრო.

ნარკოტიკული საშუალების უკანონო შეძენა-შენახვის ფაქტზე გამოძიება საქართველოს სისხლის სამართლის კოდექსის 260-ე მუხლით მიმდინარეობს.

0
თემები:
კრიმინალი საქართველოში