ავთო ვაშაძე

იურისტი, გრაფიკოს-დიზაინერი და ბლოგერი, ანუ უბრალოდ გრაფი სენ ჟერმენი

629
(განახლებულია 19:04 27.03.2020)
როდესაც ადამიანი ნიჭიერია და შრომაც არ ეზარება, მარტო ერთ პროფესიას და საქმეს არ ან, სულაც, ვერ სჯერდება...

ჩვენი რესპონდენტის შეთხვევაშიც ასეა. ის ჯანდაცვის სამინისტროს თანამშრომელი, პროფესიით იურისტი ავთო ვაშაძე გახლავთ. თავისი ბლოგის საშუალებით მკითხველს ჩვენი ისტორიის, გამორჩეული პიროვნებების ცხოვრების საინტერესო ფურცლებს საინტერესოდ ახსენებს და აცნობს. დიზაინ-გრაფიკოსობით გატაცება მან მეორე პროფესიად აქცია და ისტორიულ-საარქივო ფოტოებს პროფესიონალურ დონეზე აახლებს და აფერადებს. საკუთარ ბლოგსაც ასე დაარქვა – „ისტორია ფერებით“, რომლის საშუალებით მისმა 15 ათასმა ხელმომწერმა უკვე 100-ზე მეტი ასეთი ფოტო-ამბავი გაიცნო...

ავთო ვაშაძის გაფერადებული ფოტო
ავთო ვაშაძის გაფერადებული ფოტო

ერთ-ერთი ასეთი ამბავი სოციალურ ქსელებში დღემდე პოპულარულია.

„მე, ბებია, ილიკო და ილარიონი" ახლა რომ დაწერილიყო:

- ჩიგოგიძე!

- ონლაინ ვარ, მასწავლებელო!

- კალანდაძე!

- აგერ ვანათებ მასწავლებელო!

- სიხარულიძე!

- ვინდოუსი აქვს გადასაყენებელი, მასწავლებელო, და ჭყონიამ, ცენტერაძემ, ბურჭულაძემ, ქორიძემ, ნინიძემ და ღლონტმა თიმ ვიუერი ჩაურთეს.

- მთელი კლასი ვერ ჩაერთეთ? – იკითხა გულჩვილმა მასწავლებელმა.

- სერვერზე თიმ მემბერისთვის ფრი სფეისი აღარ დარჩა, თორემ ჩავერთვებოდით.

– ვაშალომიძე, ვაშალომიძე, ვა-შა-ლო-მი-ძე! – ყვირის მასწავლებელი და მაუსს ხაოზე ურტყამს.

– აქ ვანთივარ, პატივცემულო მასწავლებელო!

– მასეთი ნათება და ოფლაინ ყოფნა ერთი და იგივეა!

– ონლაინ-ოფლაინ, საკითხავი, აი, ეს არის!“

ნოდარ დუმბაძის რომანის ერთი ეპიზოდის მოდერნიზებულ ვერსიას ავტორმა ბოლოს, ყოველი (პრევენციული) შემთხვევისთვის, ასე მიაწერა: „ვინცხამ უწყაროოდ მომპაროს, ვინდოუსი ვერ გადააყენოს ცხრა თაობაში“.

ავთო ვაშაძე
ავთო ვაშაძე

- ბატონო ავთო, თქვენი ხუმრობა „ონლაინ გაკვეთილზე“ რაღაც წინასწარმეტყველური აღმოჩნდა...

- ასე გამოვიდა, დღეს სკოლები „ონლაინ გაკვეთილებზე“ გადავიდა, ასე რომ, თუ ამ ეპიზოდზე ადრე ეცინებოდათ, ახლა სიცილთან ერთად ხალხი დაფიქრდა, რადგან უკვე რეალურად ხდება ასე. როცა ეს ტექსტი დავდე და დილის თათბირის მერე, ერთ საათში შევედი ინტერნეტში, აღმოჩნდა, რომ ის უფრო მეტს მოეწონა, ვიდრე მოველოდი. ჩემს ბლოგზე ნოდარ დუმბაძესთან დაკავშირებული სტატუსი და ხუმრობაც დავურთე მწერლის ფოტოს, რომელიც მანამდე რამდენჯერმე მქონდა დადებული, ოღონდ შედარებით სერიოზული ტექსტით. მერე უცებ, რატომღაც გადავწყვიტე, რომ რომანიდან „მე, ბებია, ილიკო და ილარიონი“ ეს ეპიზოპდი ამ ფორმით დამეწერა. ეს ტექსტი დაიწერა ჩემი ბლოგისთვის „ისტორია ფერებით“. შეიძლება ითქვას, რომ მოყვარული გრაფიკული დიზაინერი ვარ. ჯერ მხოლოდ გაფერადებულ ფოტოებს ვაქვეყნებ, ანუ როგორი იყო მანამდე და გაფერადებით როგორი გახდა. შემდეგ კი იმავე ფოტოებს, მეტი ინტერესისთვის, თემატური ტექსტებით ვაფორმებ. ამ საქმეს თავიდანვე დიდი გამოხმაურება მოჰყვა.

ავთო ვაშაძე
ავთო ვაშაძე

- რა სახის ფოტოებს აფერადებთ და როგორ?

- ძველი, ისტორიული, შავ-თეთრი ფოტოების რესტავრაციას და მის გაფერადებას ვახდენ. როცა ხალხმა გაიგო ჩემი გატაცების შესახებ, ბევრი დამიკავშირდა და თავისი წინაპრების ფოტოების რესტავრაცია–გაფერადება მთხოვა. პატრიოტული სულისკვეთების ხალხიც მირეკავს ხოლმე და ისტორიული ფოტოების გაფერადებას მიკვეთავს. აი, მათთვის უფასოდ ვაკეთებ, აბა, ილიას და აკაკის ფოტოების დამუშავებაში ვინმეს ფულს როგორ გამოვართმევ?! როცა აღფრთოვანების პირველი ტალღა ჩაცხრა, გადავწყვიტე, რომ ამ ფოტოებისთვის სხვა მნიშვნელობაც მიმეცა და ილუსტრაციისთვის ტექსტიც დამერთო. თავიდან ეს წმინდა ბიოგრაფიული ხასიათის იყო, ან რომელიმე ცნობილ პიროვნებაზე საინტერესო მოსაზრება ან ამბავი. ზოგჯერ ასეთი ამბავი სახალისო, ვიღაცის ცხოვრებაში მომხდარი კურიოზი იყო. მოკლედ, ასე სინქრონულად ვუშვებდი ტექსტს და ფოტოს. სიმართლე გითხრათ, როცა მეგონა, რომ ესა თუ ის ამბავი ყველამ იცის, ირკვეოდა, რომ ხშირად ხალხს მასზე წარმოდგენაც არ ჰქონია.

ავთო ვაშაძის გაფერადებული ფოტო
ავთო ვაშაძის გაფერადებული ფოტო

- გრაფი სენ ჟერმენი რატომ დაირქვით?
- გრაფი სენ ჟერმენი უფრო მეტად იდეაა, ვიდრე ადამიანი. მომწონს მის შესახებ არსებული ისტორიები. ნებისმიერი ჩვენგანი შეიძლება იყოს გრაფი სენ ჟერმენი, შეიძლება, სულაც პირადად ვიცნობთ, ან ჩვენი წინაპარი იყო, ან ჩვენ ვიქნებით მისი წინაპარი.
მისი სახელი არ მიეკუთვნება ცალსახად რომელიმე ეპოქას და საზოგადოებას, ზუსტად არავინ იცის ვინ იყო, საიდან მოვიდა, საერთოდ არსებობდა თუ არა. ლიტერატურის ნაყოფია თუ რამდენიმე რეალური ადამიანის გაერთიანებული სახე, საიდუმლოებით მოცული პერსონაჟია, ერთდროულად მრავალ ეპოქაში, დროსა და სოციუმში რომ ცხოვრობდა და ყოველთვის იცხოვრებს ჩვენ შორის, სანამ ლეგენდები იარსებებს...

ავთო ვაშაძის გაფერადებული ფოტო
ავთო ვაშაძის გაფერადებული ფოტო

- ისევ ფოტოებს რომ დავუბრუნდეთ, სად ეძებთ ასეთ გასაფერადებელ ფოტოებს?

- ეს ფოტომასალა ძირითადად საარქივოა, მაგრამ მერე ინტერნეტშია ატვირთული, ამიტომ მათი ხარისხი უკვე გაფუჭებულია. უკვე
შავ-თეთრი ფოტოების დიდი მარაგი მაქვს და თავისუფალ დროს მათ ნელ-ნელა ვამუშავებ. პირველი, ვისი ფოტოთიც ჩემი გვერდი დავიწყე, გალაკტიონი იყო, მაგრამ მაშინ გრაფიკული დიზაინი კარგად არ ვიცოდი და არ გამომივიდა. როცა ავითვისე, აღმოჩნდა, რომ არც ისე ადვილი საქმე ყოფილა. რაღაც პერიოდი შევეშვი, მერე ბევრი წვალების მერე ისევ მივუბრუნდი. ძალიან შრომატევიადია. ჩათვალეთ, რომ თითოეული ფოტო თავიდან იხატება. საშუალო სირთულის ფოტოს, რომელზეც ერთი ადამიანია გამოსახული, შეიძლება 3-4 საათიც დასჭირდეს.

ავთო ვაშაძის გაფერადებული ფოტო
ავთო ვაშაძის გაფერადებული ფოტო

- ანუ დღეს იურისტობის გარდა მეორე პროფესიაც გაქვთ რეზერვში...

- კიდევ სხვა ბევრი მაქვს. ისეთ გარემოში ვცხოვრობთ, რომ ვცდილობ ბევრი რამ ავითვისო. ზოგი გამომდის, ზოგი არა.

ავთო ვაშაძის გაფერადებული ფოტო
ავთო ვაშაძის გაფერადებული ფოტო

- საკუთარი ბებია-ბაბუის ფოტო თუ გაქვთ გაფერადებული?

- რა თქმა უნდა. სხვათა შორის, ბაბუას ფოტო ძალიან გვიან გავაკეთე. იმიტომ რომ როცა თავიდან დავიწყე ეს საქმე, საკმარისად კარგად არ ვიცოდი. თუმცა ხალხს მაშინაც მოსწონდა, რადგან ახალი ხილი იყო და, როგორც ირკვევა, ქართულ რეალობაში არ არის ისეთი გრაფიკოსი-დიზაინერი, რომელიც ამ მიმართულებით მუშაობს, თან ამ საქმეს კარგად და ხარისხიანად აკეთებს.

ავთო ვაშაძის გაფერადებული ფოტო
ავთო ვაშაძის გაფერადებული ფოტო

- ახლანდელი „დავირუსებული აწმყოს“ ფონზე, მგონი, ახლანდელ დროსაც სჭირდება ერთგვარი გაფერადება...

- ცხოვრების გაფერადება შესაძლებელია კი არა, აუცილებელიცაა. მიუხედავად იმისა, რომ ახლანდელ გარემოში საკმაოდ ბევრი ხელოვნური ფერია, ყველაფერს მაინც გასდევს შავ-თეთრი ფონი. ამიტომ საჭიროა, რომ ერთმანეთს არ გავუხეთქოთ გული ცუდი ამბებით. ის ფაქტი, რომ თქვენც ჩემი სახალისო ტექსტის გამო დამიკავშირდით, იმის მაუწყებელია, რომ მე მკითხველს არ ვაშინებ და არ ვამძიმებ.

ჩვენი საუბარი ნოდარ დუმბაძით დავიწყეთ და მისით დავამთავრებ: ადამიანებმა არ უნდა დავივიწყოთ მის მიერ აღმოჩენილი მარადისობის კანონი და ერთმანეთს ცხოვრება გავუადვილოთ, რადგან „ადამიანის სული გაცილებით მძიმეა, ვიდრე მისი სხეული და ერთ ადამიანს მისი ტარება არ შეუძლია“...

 

629
საზოგადოება

რატომ არ მოსწონთ ქალებს გენიოსების წიგნები

49
(განახლებულია 16:46 04.06.2020)
ბელადს, რომელიც თავის ხალხს სისხლითა და ოფლით აშინებს, უფრო დიდი ნდობა აქვს, ვიდრე პოლიტიკოსს, რომელიც ხალხს კეთილდღეობასა და აყვავებას ჰპირდება...

აზრების ფოიერვერკი“ წარმოგიდგენთ ჯორჯ ორუელის გამონათქვამებს.

ჯორჯ ორუელი
ჯორჯ ორუელი

ჯორჯ ორუელი (George Orwell, 1903–1950) – ბრიტანელი მწერალი და პუბლიცისტი. მისი ნამდვილი სახელია ერიკ ართურ ბლერი. ორუელის უმნიშვნელოვანესი ნაწარმოებებია რომანი „1984“ და იგავი „ცხოველების ფერმა“. ორუელია ავტორი ტერმინისა „ცივი ომი“, რომელმაც შემდგომში ფართო გამოყენება ჰპოვა.

·        ადამიანები, რომლებიც ხმას აძლევენ წარუმატებლებს, ქურდებს, მოღალატეებსა და თაღლითებს, მათი მსხვერპლი არ არიან. ისინი თანამონაწილეები არიან.

·        ნორმალურ ადამიანს ძალაუფლება არ სურს, შესაბამისად, ძალაუფლება ყოველთვის არანორმალურების ხელშია.

·        სოციალიზმის (ისევე, როგორც ქრისტიანობის) ყველაზე უარესი რეკლამა მისი მიმდევრებია.

·        გენიოსის უტყუარი ნიშანი: მისი წიგნები ქალებს არ მოსწონთ.

·        თუ ცხოვრების მთავარი მიზანი არა განვლილი წლების რაოდენობა, არამედ ღირსება და პატიოსნებაა, მაშინ რა განსხვავებაა, როდის მოკვდები?

თავისუფლება გზის ბოლოსაა, მანამდეა მოთმინების გზა>>

·        თავისუფლება – ესაა უფლება ელაპარაკო ადამიანებს ის, რისი მოსმენაც მათ არ სურთ.

·        ყველა ცხოველი თანასწორია, მაგრამ ზოგი ცხოველი უფრო თანასწორია, ვიდრე სხვები.

·        ომი – ეს მშვიდობაა. თავისუფლება – მონობაა. არცოდნა – ძალა.

·        ათიდან ცხრა შემთხვევაში რევოლუციონერი – ესაა მთამსვლელი ბომბით ჯიბეში.

·        ადამიანი ერთადერთი არსებაა, რომელიც მოიხმარს და არაფერს აწარმოებს.

·        პატრიოტიზმი თავისი ბუნებით არ არის აგრესიული არც სამხედრო და არც კულტურული გაგებით. ნაციონალიზმი კი ძალაუფლებისადმი მისწრაფებისგან განუყოფელია.

·        სანამ ფიქრს არ ისწავლიან, არ აჯანყდებიან, მაგრამ მანამ, სანამ არ აჯანყდებიან, ფიქრს ვერ ისწავლიან.

·        რაც უფრო შორდება საზოგადოება სიმართლეს, მით უფრო ვერ იტანს მათ, ვინც სიმართლეს ლაპარაკობს.

·        ომის დამთავრების უსწრაფესი ხერხი მისი წაგებაა.

·        ის, ვინც წარსულს მართავს, მართავს მომავალს. ის, ვინც აწმყოს მართავს, მართავს წარსულს.

·        ბელადი, რომელიც თავის ხალხს სისხლით, მძიმე შრომით, ცრემლითა და ოფლით აშინებს, უფრო დიდი ნდობით სარგებლობს, ვიდრე პოლიტიკოსი, რომელიც ხალხს კეთილდრეობასა და აყვავებას ჰპირდება.

ბედნიერება ფრთებით მოდის, მაგრამ ყავარჯნებით მიდის>>

·        სერიოზულ სპორტს არაფერი აქვს საერთო პატიოსან თამაშთან. სერიოზული სპორტი – ესაა ომი, მინუს მკვლელობა.

·        თითოეული თაობა თავს მიიჩნევს წინა თაობაზე უფრო ჭკვიანად და მომდევნო თაობაზე უფრო ბრძენად.

·        კარგი წიგნი ამბობს იმას, რაც ისედაც ცნობილია.

·        რევოლუციონერების უმრავლესობა პოტენციური კონსერვატორები არიან.

·        ყოველ ნაციონალისტს არ შორდება ფიქრი, რომ წარსულის შეცვლა შეიძლება და უნდა შეიცვალოს.

·        როდესაც ომს ბოლო არ უჩანს, ის უკვე აღარ არის საშიში.

·        ომის მთელი პროპაგანდა, ყვირილი, ტყუილი და სიძულვილი უცვლელად მოდის იმ ადამიანებისგან, რომლებიც არ იბრძვიან.

·        რეპრესიების მიზანი რეპრესიებია. წამების მიზანი – წამება. ხელისუფლების მიზანი – ძალაუფლება.

·        იერარქიული საზოგადოება შესაძლებელია მხოლოდ სიღატაკისა და უცოდინრობის საფუძველზე.

·        ადამიანები მშიერი მუცლით არასდროს ვარდებიან სასოწარკვეთილებაში. მათ არც კი იციან, ეს რა არის...

49
თემები:
აზრების ფოიერვერკი: ცნობილი ადამიანების ბრძნული გამონათქვამები
თეა თავაძე

ქართველი ექიმი, რომელიც სტამბულში ქალებს ჰიპნოზით ამშობიარებს

1014
(განახლებულია 22:48 03.06.2020)
ჩვენი რუბრიკა „ქართველები უცხოეთში“ ამჯერად თურქეთში მცხოვრებ წარმატებულ ქართველ ექიმს თეა თავაძეს გაგაცნობთ.

ქართველი ექიმი სტამბულის ერთ-ერთ კერძო სამედიცინო უნივერსიტეტის მეან-გინეკოლოგიური კლინიკის წამყვანი სპეციალისტია. ის ურთულეს გინეკოლოგიურ ოპერაციებს ატარებს და იმავე კლინიკაში წყალში მშობიარობის განყოფილების დამაარსებელიც გახლავთ. ამავე სფეროში კოლეგებთან ერთად მუშაობს ისეთ ინოვაციურ მეთოდზე, როგორიცაა ჰიპნოზით მშობიარობა. ფლობს რადიოლოგიისა და ფსიქოთერაპიის სერტიფიკატებს.

თავის დროზე დიპლომი დაიცვა ისეთ თემაზე, როგორიცაა ვაგინალური ექოსკოპიის როლი ადრეული ორსულობის პერიოდში, რაც შემდგომ წიგნის სახით გამოიცა. დღეს კლინიკაში (Atlas Üniversitesi Edicine hospital) მუშაობის პარალელურად ლექციებსაც კითხულობს.

თეა თავაძე
თეა თავაძე

- ქალბატონო თეა, როგორ და როდის აღმოჩნდა ქართველი მედიკოსი თურქეთის სამედიცინო სფეროში?

- თურქეთში ჩამოსვლამდე, 1998 წელს საქართველოში პეტრე შოთაძის სამედიცინო აკადემია დავამთავრე. თურქეთში ჩემი ჩამოსვლა დეიდაჩემის ნესტან სოფაძის რჩევით მოხდა. იმ პერიოდში დეიდა თურქეთის ერთ-ერთ კონსერვატორიაში მუსიკის პედაგოგად მოღვაწეობდა. სწორედ მისგან გავიგე, რომ იმ პერიოდში თურქეთსა და საქართველოს შორის სტუდენტური გაცვლითი პროგრამები მოქმედებდა. ექვსი თვის მანძილზე თურქ სტუდენტებთან ერთად კლინიკაში ვიყავი და მონაწილეობას ვიღებდი პრაქტიკულ სამუშაოებში.

თეა თავაძე სამუშაო გარემოში
თეა თავაძე სამუშაო გარემოში

- რამ მოახდინა თქვენზე მაშინ შთაბეჭდილება?

- იმ ექვსი თვის განმავლობაში ჩემზე ძალიან დიდი შთაბეჭდილება მოახდინა თურქეთის სამედიცინო განათლების დონემ. გადავწყვიტე, რომ ისევ დავბრუნებულიყავი სტამბულში და მაგისტრატურაში აქ ჩამებარებინა. ძალიან დიდი შრომისა და გამოცდების ჩაბარების შემდეგ (რისთვისაც სამი წელი დამჭირდა) მარმარის სახელობის სამედიცინო უნივერსიტეტში მოვხვდი მეან-გინეკოლოგის სპეციალობაზე, სადაც ექვსი წელი ვისწავლე და ერთ-ერთი წარმატებული სპეციალისტი ვიყავი.

ექიმი თეა თავაძე პაციენტთან ერთად
ექიმი თეა თავაძე პაციენტთან ერთად

- ამ ეტაპზე რა სახის კვლევებზე გიწევთ მუშაობა?

- ვაწარმოებ გარკვეულ კვლევებს და ვახორციელებ ფიზიოლოგიურ მშობიარობას პირველი, მეორე და მესამე საკეისროს შემდეგ, რომელიც ძალიან რთული პროცესია. მოგეხსენებათ, თურქული ტრადიციები მრავალშვილიანობის მომხრეა, საკეისრო კვეთა კი მრავალშვილიანობას, ასე თუ ისე, აფერხებს. მე, როგორც ერთ-ერთი მეან-გინეკოლოგიური კლინიკის ხელმძღვანელი, რთულ მშობიარობებს ვუწევ მეთვალყურეობას. გარდა იმისა, რომ მეან-გინეკოლოგი ვარ, დამატებით ვფლობ რადიოლოგიისა და ფსიქოთერაპიის სერტიფიკატებს, რომელსაც მხოლოდ ჩემ სპეციალობაში ვიყენებ.

თეა თავაძე
თეა თავაძე

- თურქეთში ისეთ უჩვეულო და უნიკალურ მეთოდზე მუშაობთ, როგორიცაა ჰიპნოზით მშობიარობა, როგორ ხდება მსგავსი რამ?

- ჰიპნოზი ბერძნული სიტყვაა და ნიშნავს ძილს, ცნობიერების შეცვლილ მდგომარეობას, რომელიც ხასიათდება ღრმა მოდუნებით, შთაგონებისადმი მიმღებლობით, აღქმნის, მეხსიერების, მოტივაციის და თვითკონტროლის ცვლილებებით. ჰიპნოზში მყოფი პაციენტი გარეგნულად ძილის მაგვარ მდგომარეობაში იმყოფება, თუმცა პაციენტი თავისუფლად გამოხატავს ემოციას – ტირის, ყვირის, შეკითხვებზე თავისუფლად გცემს პასუხს. ისინი გრძნობენ, რომ მათი ქცევა ყოველგვარი ცნობიერი განზრახვისა და ძალისხმევის გარეშე ხორციელდება. მოკლედ რომ ვთქვათ, ორსულობის პერიოდში შთაგონების მეშვეობით ვახერხებთ პაციენტის ქვეცნობიერის კონტროლს, რომელიც მშობიარობის პერიოდში ექიმის მითითებებს ექვემდებარება.

თეა თავაძე ოჯახურ გარემოში
თეა თავაძე ოჯახურ გარემოში

- რამდენად უსაფრთხოა ეს მეთოდი?

- ჰიპნოზით მშობიარობა სრულიად უსაფრთხო მეთოდია, რომელიც საერთოდ არ მოქმედებს პაციენტის ჯანმრთელობაზე. მშობიარობის შემდეგ პაციენტი რამდენიმე წამში გარკვეული მითითების შემდეგ ისევ უბრუნდება ჩვეულებრივ მდგომარეობას. ეს ახალი ტენდენციაა თურქეთში და ჩვენი უნივერსიტეტი ჯერჯერობით მხოლოდ მეორე იქნება, სადაც ჰოპნოზით მშობიარობა განხორციელდება.

თეა თავაძე
თეა თავაძე

- ვიცი, რომ დისერტაციაზეც მუშაობთ, რა თემას ეხება თქვენი ნაშრომი?

- ამჟამად საერთაშორისო კლინიკის თანამშრომლებთან ერთად ვმუშაობ თემაზე, რომელიც ეხება ორსულობამდე და ორსულობის დროს მიღებული ფსიქოლოგიური ტრავმების შედეგებს მშობიარობის პერიოდში.

თეა თავაძე
თეა თავაძე

- თქვენი მეუღლე თურქეთელი ქართველების შთამომავალია, ალბათ ამანაც განაპირობა ამ ქვეყანაში თქვენი ოჯახის საბოლოოდ დამკვიდრება...

- ჩემი მეუღლე ქემალ იემი (iyem), ირემაძე წარმოშობით მაჭახელადანაა. დედამთილი მარიამ ქავთარაძეა, მამამთილი ნევზათ ირემაძე გარდაცვლილია. იმ პერიოდში თურქეთში არასტაბილური ეკონომიკური მდგომარეობის გამო მეუღლის მშობლები საცხოვრებლად გადავიდნენ ბელგიაში, სადაც ჩემი მეუღლე დაიბადა და გაიზარდა. იქ ცხოვრობდნენ ოცი წლის განმავლობაში, მიიღეს ბელგიის მოქალაქეობა, მაგრამ შემდეგ საცხოვრებლად ისევ სტამბულში გადავიდნენ. შემდეგ ჩემმა მეუღლემ დაიწყო თურქეთსა და საქართველოს შორის წარმატებული ბიზნეს-საქმიანობა, რის გამოც ორმაგი მოქალაქეობა მიენიჭა, ჩემს ორივე შვილსაც ორმაგი მოქალაქეობა აქვს.

თეა თავაძე ოჯახთან ერთად
თეა თავაძე ოჯახთან ერთად

- საქართველოში რამდენად ხშირად ჩამოდიხართ და სამომავლოდ საქმიანობის აქ გაგრძელებას თუ აპირებთ?

- რაც შეეხება საქართველოში ჩემს მუშაობას, მიუხედავად იმისა, რომ წამყვანი კლინიკებიდან სერიოზული შემოთავაზებები მქონდა, ჯერჯერობით არ ვაპირებ, ვინაიდან ამ ეტაპზე ჩემთვის პრიორიტეტი პროფესიონალური გეგმების განხორციელებაა. ძალიან მიყვარს ჩემი ქვეყანა, თბილისი, სადაც დავიბადე და გავიზარდე, სადაც ჩემი მშობლები და ოჯახის წევრები ცხოვრობენ. იქ ძალიან ხშირად ჩავდივარ ოჯახთან ერთად. ჩემი შვილები მთელი ზაფხულის განმავლობაში ბებიასთან და ბაბუასთან ისვენებენ. ისინი ქართულს ძალიან კარგად ფლობენ, ისიც კარგად იციან, რომ მათ გენებში ქართული სისხლია, საქართველო კი მათი მშობლიური ქვეყანა...

 

1014
თემები:
ქართველები უცხოეთში
პოლიციის ლენტა

თბილისში პარტია „ლელოს“ ოფისი გატეხეს

0
(განახლებულია 16:12 04.06.2020)
ჯერჯერობით უცნობია, ვინ შეიჭრა პარტიის ოფისში და რა არის წაღებული. შსს–მ სისხლის სამართლის საქმე აღძრა და გამოძიება დაიწყო

თბილისი, 4 ივნისი – Sputnik. ოპოზიციური პარტია „ლელოს“ ოფისი ცოტნე დადიანის ქუჩაზე (ნაძალადევში) დღეს დილით გატეხეს, იუწყება „მთავარი არხი“.

ტელეარხის ინფორმაციით, პოლიციამ დანაშაულის ადგილი უკვე დაათვალიერა.

რა მიზნით შეიჭრნენ ოფისში უცნობი პირები, ჯერჯერობით უცნობია, თუმცა, თავად პარტიაში მომხდარში პოლიტიკურ მოტივებს არ გამორიცხავენ.

„არ შევსულვართ [ოფისში] ჯერ და არ ვიცით, არის თუ არა რამე წაღებული, მაგრამ კრიმინალები იქ არ ელოდებოდნენ ოქროს და ვერცხლს და შესაძლოა, ეს ჩვენს პოლიტიკური საქმიანობასაც უკავშირდებოდეს“, – განაცხადა პარტიის ერთ–ერთმა ლიდერმა კახა კოჟორიძემ.

სისხლის სამართლის საქმე აღიძრა ქურდობის მცდელობის მუხლით, რაც სამიდან ხუთ წლამდე პატიმრობით ისჯება.

შსს არ ავრცელებს ინფორმაციას, ჰყავს თუ არა ეჭვმტანილი ან დაკავებული საქმეზე.

პარტია „ლელო“ გასული წლის დეკემბერში ცნობილმა ბანკირმა მამუკა ხაზარაძემ დააარსა. პარტიის წევრები, ძირითადად, ბიზენს–წრეებისა და არასამთავრობო ორგანიზაციის წარმომადგენლები არიან.

პოლიტიკურ გაერთიანებაში „ლელო საქართველოსთვის“ შედიან მოძრაობა „ლელო“, პარტიები „შენების მოძრაობა“ და „ახალი მემარჯვენეები“.

0
თემები:
კრიმინალი საქართველოში