ეიფელის კოშკთან

„პარიზში სითბოა, ყველას ღია აქვს ფანჯარა, საიდანაც მეზობლები ერთმანეთს ვამხნევებთ“

736
(განახლებულია 19:55 24.03.2020)
კორონავირუსის გამო ევროპაში, იტალიის გარდა, კრიტიკული სიტუაციაა საფრანგეთშიც, სადაც ასევე ბევრი ჩვენი თანამემამულე ცხოვრობს.

პარიზში მცხოვრებ ქართველ ქალბატონს ლალი ნიკოლაძეს ბევრი იცნობს და არა მარტო საქართველოში. მისი ოპტიმიზმი ფრანგებისთვისაც გადამდები და სტიმულის მიმცემი აღმოჩნდა. თუ რა სიტუაციაა ახლა პარიზში, ამას ინტერვიუდან გაიგებთ.

ლალი ნიკოლაძე
ლალი ნიკოლაძე

- ქალბატონო ლალი, რა ხდება პარიზში და კონკრეტულად იქ, სადაც თქვენ ცხოვრობთ?

- პარიზში სულ 20 რაიონია, მე მე-17 რაიონში ვცხოვრობ. როგორც იცით, პარიზის ჰოსპიტლები ძალიან გადატვირთულია. სხვათა შორის, თავიდან ფრანგებმა უპასუხისმგებლობა გამოიჩინეს და, ვითომც არაფერი, ისე შეესივნენ ბაღებს, პარკებს, მდელოებს და ამ გაგანია კარანტინში პიკნიკები მოაწყვეს. ამის მერე მაკრონმა კატეგორიულად აუკრძალა მათ გარეთ გასვლა. ახლა ჩვენც, სხვების მსგავსად, სახლში ვართ გამომწყვდეული. სტაციონარში მხოლოდ რისკის ჯგუფი მიჰყავთ, ანუ ხანდაზმული ხალხი და ისინი, ვისაც კრიტიკული მდგომარეობა აქვს, ანუ თითქმის სუნთქვაგადაკეტილი არიან. ჩემს ერთ ნაცნობს სიცხე აღმოაჩნდა და თან მშრალი ხველა ჰქონდა, მაგრამ საავადმყოფოში არ გადაიყვანეს. საერთოდ, საავადმყოფოში არავინ გადაჰყავთ, თუ გართულებული სიტუაცია არ არის. ჩემს ახლობელს დღეში ოთხჯერ მისაღებად მხოლოდ „დოლიპრანი“, ანუ სიცხის დამწევი, იგივე „პარაცეტამოლი“ დაუნიშნეს. აფთიაქებში ამ წამლის მარტო ერთი შეკვრა გაიცემა. ანთების საწინააღმდეგო წამლები საფრანგეთში კატეგორიულად აიკრძალა.

ლალი ნიკოლაძე
ლალი ნიკოლაძე

- სად უნდა მიმართოთ საჭიროების შემთხვევაში?

- თუ ვინმე შეამჩნევს, რომ სუნთქვა უჭირს და ჰაერის უკმარისობას განიცდის, მაშინვე უნდა დარეკოს ნომერზე 15 და მოაკითხავენ. არსებობს მეორე, ე.წ. „მწვანე ნომერი“, რომელზე ასევე შეგვიძლია დავრეკოთ. რეკომენდაციები იგივეა, რაც ყველგან – ხელების ხშირად დაბანა. თუ მაღაზიაში მოგვინდება გასვლა, საამისოდ სპეციალური საბუთი წინასწარ უნდა შევავსოთ, წინააღმდეგ შემთხვევაში ჯარიმაა. მაღაზიებში მხოლოდ ოთხ-ოთხი კაცი შევდივართ, ბევრს ერთად არ გვიშვებენ. ნიღბები მხოლოდ მათთვისაა რეკომენდებული, ვინც ავადაა. დანარჩენები ანტისეპტიკური ჟელეთი ვიმუშავებთ ხელებს და მაღაზიაში ხელთათმანებით შევდივართ. თუმცა, მინდა გითხრათ, როცა ჩემს მეგობართან ფრანგი ექიმი მივიდა, ის ყოველგვარი ეკიპირების გარეშე, მოკლე მაისურში და ჯინსებში იყო გამოწყობილი. მკურნალმა ექიმმა გაგვაფრთხილა, საავადმყოფოებში არ მიხვიდეთ, თუ სიტუაცია კრიზისული არ არისო.

ლალი ნიკოლაძე
ლალი ნიკოლაძე

- ექიმებს რაც შეეხება, ვიცი, რომ რამდენიმე დღის წინ ქართველი ექიმების სამადლობელ საყოველთაო აპლოდისმენტებს პარიზიდან შეუერთდით და ფრანგი მეზობლებიც აიყოლიეთ...

- ქართველი ექიმების და მედპერსონალის თავდადებას მთელი უბანი ერთად ვუკრავდით ტაშს. თან ხმამაღლა ვიძახდი – ბრავო, ექიმებო! ქართველი მედიკოსების მიმართ მინდა კიდევ ერთხელ გამოვხატო ჩემი მოწიწება და უდიდესი პატივისცემა. ბარაქალა თქვენ, კიდევ ერთხელ გლოცავთ და გადიდებთ! ყველგან მარტო საქართველოზე ვლაპარაკობ. ჩემი წყალობით ჩვენს ქვეყანაზე ჩემი შვილის კოლეჯშიც ყველამ იცის. ძალიან ავღელდი, როცა თვალზე გავიკეთე ოპერაცია და ჩემმა ექიმმა მითხრა, შენი ქცევებით ჩემთვის შენ ხარ საქართველოო. მე ქუთაისში დავიბადე, სკოლა აფხაზეთში დავამთავრე. ქუთაისში პოლიტექნიკურ ინსტიტუტში ვსწავლობდი. პარიზში 19 წელია რაც ვარ. ეს ცოტა დრო არ არის, მაგრამ ამ ხნის მანძილზე გონებაში სულ ეს მქონდა: ლალი, ქართველი ხარ, ქართველი და სხვას არ უნდა შერცხვეს შენი ქართველობა!..

ლალი ნიკოლაძე
ლალი ნიკოლაძე

- საკმაოდ აქტიური ქალბატონი ხართ და კარანტინის დროს სახლში რას საქმიანობთ?

- სულ ვფიქრობ, რა ვაკეთოთ მე და ჩემმა შვილმა ამ ორ ოთახში? პიანინოზე დავუკრავ, ნაირ-ნაირ კერძებს მოვამზადებ, დავალაგებ. იქნებ რამე სიმღერა და ლექსიც დავწერო. მაგარი წითელი "ნავაროჩენი" საკერავი მანქანა მაქვს ნაყიდი, ყუთში დევს მყარად, ამოვათრევ და კერვას ვისწავლი, "სტროჩკის" დაკვრას მაინც დავამხეცებ, ნაჭრები, ნემსები, ძაფები და ანტიკვარული სათითურები მაქვს.

ლალი ნიკოლაძე
ლალი ნიკოლაძე

- რიგითი ფრანგები როგორ იქცევიან, თქვენს სამეზობლოში რა ხდება?

- ახლა პარიზში სითბოა და ყველას ღია აქვს ფანჯრები, საიდანაც მეზობლები ერთმანეთს ვუცინით და ვამხნევებთ. ასეთ დროს ერთად რომ ვართ, აშკარად ვგრძნობ. როცა მზე ჩადის, მივუჯდები ხოლმე კლავიშების დედა ინსტრუმენტს, Roland-ს და ქართული რეპერტუარით ფრანგი მეზობლებისთვის უფასო კონცერტებს ვმართავ. პირველად როცა დავუკარი, მითხრეს, რა კარგი დაკვრა და სიმღერა გცოდნია, ამას გვიმალავდიო. ასე რომ, ცხოვრება გრძელდება და ასეთ მომენტებში უფრო ხვდები, რა მნიშვნელობა აქვს ერთმანეთის თანადგომას, სადაც უნდა იყო, თბილისი იქნება ეს თუ პარიზი...

736
თამარ კეცხოველი

ძველთბილისური სახლების ნოსტალგია და პანდემიის დროს გამოფენილი ნახატები

354
(განახლებულია 19:48 07.08.2020)
ხატვა მოულოდნელად და უცნაურად დაიწყო... მანამდე მის მეხსიერებაში ქვეცნობიერად გროვდებოდა ნანახისა და განცდილის ფრაგმენტები. მისი ნახატების სახელწოდებებიც ამის დასტურია: „ქალაქი”, „სამკითხველო”, „საზაფხულო სახლი”, „მწვანე აბაჟური”, „ძველი ბუფეტი“.

ამაში უჩვეულოც არაფერი იქნებოდა, რომ არა ის, რაც გახდა ხატვის დაწყების სტიმული და ერთგვარად მისი განკურნების საუკეთესო საშუალებაც...

თამარ კეცხოველი თბილისში დაიბადა და გაიზარდა. პროფესიით არქეოლოგია. ხატვა 2019 წლის სექტემბერში, ინსულტის გადატანის შემდეგ დაიწყო. დღეში ძალიან ბევრს, დაახლოებით ათ საათს ხატავდა. პირველი პერსონალური გამოფენა პანდემიის დროს ჰქონდა.

თამარ კეცხოველი
თამარ კეცხოველი

- ქალბატონო თამარ, თქვენს ნახატებში წარსულის ნოსტალგიური განწყობაა და ამ გზით გამუდმებით ცდილობთ ბავშვობაში დაბრუნებას, ასეა?

- საერთოდ სადმე დაბრუნება მაშინ გინდა, როცა იქ კარგი იყო და კარგად გრძნობდი თავს. დიახ, შესაძლოა, არის რაღაც ნოსტალგიური მომენტები, თუმცა უფრო მეტად ძველებური ინტერიერი მომწონს და ვხატავ, ვიდრე ჩემი საბჭოთა ბავშვობის დროს იყო. სიძველის მომხიბვლელობას ასაკთან ერთად ვხვდები და მინდა, რომ ეს სხვასაც გავუზიარო...

თამარ კეცხოველის შემოქმედება
თამარ კეცხოველის შემოქმედება

- როგორი იყო თქვენი პლეხანოვური ბავშვობა, თუ არ ვცდები, პლეხანოვზე არსებული 23-ე სკოლა თბილისის ე.წ. პრესტიჟულ სკოლათა რიცხვშია, თქვენთვის თუ ჰქონდა ამგვარ იარლიყს მნიშვნელობა?

- დიახ, ჩემი 23-ე სკოლა „ელიტური” სკოლების სიაში შედიოდა, მაგრამ იქ ამიტომ არ მოვხვედრილვარ. უბრალოდ უბნით მეკუთვნოდა (მაშინ ასე იყო) და ტრადიციითაც, რადგან თავის დროზე იქ დედა და დეიდა სწავლობდნენ და ჩვენც იქ მიგვიყვანეს. პლეხანოვი და ჩემი უბანი ძალიან მიყვარს, ჩემი სახლი ეგაა... საერთოდ, მაპატიონ ახალუბნელმა თბილისელებმა და, თბილისი ჩემთვის ძველი უბნები და ძველი თბილისია. როდესაც ყველა ხეს ცნობ, ყველა მეეზოვეს, ფეხსაცმლის მწმენდავს და ქუჩის მოვაჭრეს სახელით იცნობ, ისაა შენი სახლი და შენი უბანი.

თამარ კეცხოველის შემოქმედება
თამარ კეცხოველის შემოქმედება

- 90-იანების სტუდენტობა არც ისე სასიამოვნო გასახსენებელია, მაგრამ მაინც, იმ „ბნელი“ დროის რომელ ნათელ მომენტს გაიხსენებდით?

- თავისი ხიბლი იმ ბნელი 90-იანების სტუდენტობასაც ჰქონდა. მაშინ დაიწყო მიტინგების ეპოქა და ჩამოინგრა სსრკ. ჩვენ, სტუდენტები კი მიტინგებიდან და უნივერსიტეტის ბაღიდან კარვებით პირდაპირ ქალაქგარეთ მივდიოდით. რაც კი ლამაზი ადგილი იყო ქალაქის გარშემო, სწორედ მაშინ შემოვიარე ყველა, უფრო სერიოზულად კი მთაში სიარულით ვიყავი დაკავებული. მაშინ სხვადასხვა ადგილებში იმართებოდა ბევრი ახალი ყაიდის ლექცია, სადაც ვესწრებოდით და თავისუფალ აზროვნებას ვცდილობდით... მოკლედ, ძალიან დატვირთული და საინტერესო სტუდენტობა მქონდა და მას არაფერში გავცვლიდი.

თამარ კეცხოველის შემოქმედება
თამარ კეცხოველის შემოქმედება

- ინსულტის მერე დაწყებული ხატვა თქვენთვის ერთგვარი შვება და გადარჩენის გზა იყო?

- ინსულტამდე სხვა ცხოვრება იყო, სახლი–სამსახური და სხვა არაფერი. ხატვით ყოველთვის ვხატავდი, უბრალოდ, ამის დრო არასდროს მქონდა. აი, ინსულტის მერე კი, როცა სამსახურიდანაც წამოვედი და სახლში დავჯექი, უცებ და ინტენსიურად დავიწყე მეგობრების პორტრეტების ხატვა. ვეღარ გავჩერდი და თამამად შემიძლია ვთქვა, რომ დღეში ათი საათი მაინც ვხატავდი. ხატვა არ მბეზრდებოდა და სწორედ ამან გადამარჩინა და პანდემიის დროს მძიმე კარჩაკეტილობაც ამან გადამატანინა.

თამარ კეცხოველის შემოქმედება
თამარ კეცხოველის შემოქმედება

- პანდემიის დროს პირველი პერსონალური გამოფენის გამართვა მონატრებული სამყაროს გამომზეურება იყო? 

- დიახ, ეს გამოფენა მეგობრებთან შეხვედრის და მძიმე სიტუაციიდან გამოსვლის მიზნითაც მოვაწყვეთ. ამაში გალერისტი მეგობარი დამეხმარა. ძალიან კარგი გამოფენა გამოვიდა.

თამარ კეცხოველის მიერ შესრულებული პორტრეტები
თამარ კეცხოველის მიერ შესრულებული პორტრეტები

- თქვენს ნახატებში ხშირად ჩნდება ძველი სახლი, რომელიც სიმყუდროვის განცდას აჩენს...

- ამჟამად არ ვარ ქალაქში და აქ, აგარაკზეც დავხატე რაღაცები. სიმყუდროვე თითქოს არ მაკლია სახლში, მაგრამ, ეტყობა, ეს უფრო ბავშვობის და ბებიების, ძველთბილისური სახლების ნოსტალგიაა, სადაც გაიარა ჩვენი თაობის უმრავლესობის სტუდენტობამ. ძალიან მიყვარს ძველი თბილისი და ის, რაც ფანჯრებს მიღმა ხდებოდა ძველ უბნებში, სულ ესაა...

თამარ კეცხოველის შემოქმედება
თამარ კეცხოველის შემოქმედება

- რაშია დეპრესიიდან გამოსავალი და ხსნა?

- რაშია ხსნა? ცხადია, ერთ-ერთი გზა საამისოდ ხელოვნებაცაა, რომელიც თერაპიაა... ჩემი აზრით, თუ ადამიანს რაიმეს შექმნა ხელეწიფება, უნდა გააკეთოს და არ გაჩერდეს, მერე ყველა მძიმე სიტუაციიდან იპოვის გამოსავალს...

 

354
საჰაერო ბურთები

ჭეშმარიტად უყვართ მხოლოდ ის, რაც არ იციან...

177
(განახლებულია 21:57 06.08.2020)
ქალმა უნდა აირჩიოს: მამაკაცთან, რომელიც სხვა ქალებს უყვართ, ის არასდროს იქნება მშვიდად; მამაკაცთან, რომელიც სხვა ქალებს არ უყვართ, ის არასდროს იქნება ბედნიერი...

აზრების ფოიერვერკი“ გთავაზობთ ანატოლ ფრანსის გამონათქვამებს.

ანატოლ ფრანსი (1844-1924), ფრანგი მწერალი და ლიტერატურული კრიტიკოსი
© photo: Sputnik /
ანატოლ ფრანსი (1844-1924), ფრანგი მწერალი და ლიტერატურული კრიტიკოსი

ანატოლ ფრანსი (Anatole France, ნამდვილი გვარია ანატოლ ფრანსუა ტიბო, ფრანგულად Anatole Thibault, 1844-1924) - ფრანგი მწერალი, რომანტიკოსი, ლიტერატურის კრიტიკოსი, ნობელის პრემიის ლაურეატი ლიტერატურის დარგში (1921). მისი ნაწარმოებებია: „თაისი“, „ჟერონ კუანიარის აზრები“, „სილვესტერ ბონარის დანაშაული“, „პინგვინთა კუნძული“, „ანგელოზთა აჯანყება“ და სხვა.

სიყვარულში მამაკაცებს ფორმები და ფერები სჭირდებათ, მამაკაცები სურათს ითხოვენ. ხოლო ქალები - მხოლოდ შეგრძნებებს. მათ უკეთესად უყვართ, ვიდრე მამაკაცებს, ისინი ბრმანი არიან.
ჩვენ საშიშად მიგვაჩნია ისინი, ვისი ტვინიც სხვაგვარადაა მოწყობილი, და უზნეოდ ისინი, ვისი ზნეობრიობაც ჩვენსას არ ჰგავს. სკეპტიკოსებს ვუწოდებთ მათ, ვისთვისაც უცხოა ჩვენი ილუზიები და კითხვაც არ გვიჩნდება, ხომ არ იციან მათ რაიმე სხვა ილუზიებიც.
გვინდა, რომ ვუყვარდეთ, ხოლო როცა ვუყვარვართ, ან გვაწამებენ, ან ყელში ამოჰყავთ.
მტრები მყავს, და ამით ვამაყობ.
ირონია - იმედგაცრუების ბოლო სტადიაა.
რელიგიამ სიყვარულს დიდი სამსახური გაუწია, როცა ის ცოდვად აქცია.

ორი რამ, რითიც ყველა მამაკაცი ამაყობს>>

ცივილიზაცია - ეს მეცნიერული ბარბაროსობაა.
ქალმა უნდა აირჩიოს: მამაკაცთან, რომელიც სხვა ქალებს უყვართ, ის არასდროს იქნება მშვიდად; მამაკაცთან, რომელიც სხვა ქალებს არ უყვართ, ის არასდროს იქნება ბედნიერი.


ადამიანს სჩვევია ბრძნული მსჯელობა და სულელური საქციელი.
ყველა ილუზიას შორის დიდება ყველაზე აბსურდული და ყველაზე დამღუპველია.
ძალზე ბრძენი უნდა იყო, რომ სიბრძნე ტვირთად არ აქციო.
ყველაზე იშვიათი სიმამაცე - ეს აზრის სიმამაცეა.
ის, ვინც რევოლუციები მოაწყო, სხვებს არ მისცემს უფლებას, მის მაგალითს მიბაძონ.
კანონები კარგია ან ცუდი არა თავისთავად, არამედ მათი გამოყენების ხერხის მიხედვით. ამა თუ იმ უკიდურესად უსამართლო დადგენილებას ბოროტება არ მოაქვს, თუ მოსამართლე მას ცხოვრებაში არ იყენებს. ზნეობა კანონებზე ძლიერია. ზნეობისა და ჩვეულებების კულტურულობა და სირბილე ერთადერთი წამალია კანონიერი ბარბაროსობის წინააღმდეგ.
სისულელე ხშირად ხელს უშლის სისულელის ჩადენას. ყველაზე სულელურად ყველაზე სულელი ადამიანები არ იქცევიან.

ამაოება ამაოებათა – როცა ყველაფერი აკრძალულია, მაშინ ყველაფერი ნებადართულია>>

უფრთხილდით მათ, ვინც საკუთარ თავს იტანჯავს: ისინი უნებლიეთ თქვენც დაგასახიჩრებენ.
კაცობრიობას ყველა დროში სიგიჟისა და სისულელის ერთნაირი მარაგი გააჩნია.
გიყვარდეს მგზნებარედ - ეს, რა თქმა უნდა, მშვენიერია, მაგრამ გიყვარდეს თავდადებით - კიდევ უკეთესი... ჭეშმარიტად უყვართ ის, ვინც უყვართ თავიანთი სისუსტეებით... დანდობა, პატიება, ნუგეში - აი, სიყვარულის მთელი მეცნიერება.

როცა ადამიანები შეწყვეტენ ერთმანეთზე გამარჯვებას, ისინი, ბოლოს და ბოლოს, ისწავლიან საკუთარ თავზე გამარჯვებას.
გონებრივი კულტურის გარეშე არ შეიძლება არსებობდეს დახვეწილი გრძნობები.
ომი - ბარბაროსობაა, რომელიც ცივილიზაციის განვითარებასთან ერთად გაქრება.
მოგზაურობა სხვა ყველაფერზე მეტად გვასწავლის. ხანდახან სხვა ადგილას გატარებული ერთი დღე მეტს გვაძლევს, ვიდრე სახლში ათი წელი ცხოვრება.
გონივრულ დასკვნებს ჯერ არავინ დაურწმუნებია.
სჯობს, ცოტა გაიგო, ვიდრე ცუდად.
სიტყვაზე მძლავრი არაფერია... სიტყვა ამარცხებს მრისხანეს და ანგრევს ციხესიმაგრეებს. ეს უხილავი იარაღია. მის გარეშე სამყარო უხეში ძალის ხელში იქნებოდა.

ნამდვილ სიყვარულს წერტილები არა აქვს...>>

ხშირად ბედნიერებას იმას ვუწოდებთ, რაც ჩვენ თვითონ არ განგვიცდია.
თვალმომჭრელი ჭეშმარიტება ფუჭი სიტყვაა იქ, სადაც მას თავს გახვევენ.
ყველა ღიმილი სიხარულს არ გამოხატავს ისევე, როგორც ყველა ცრემლი - უბედურებას.
ქალი მამაკაცის უდიდესი აღმზრდელია.

გულს შეუძლია ჭკუის მომატება, მაგრამ ჭკუა გულს ვერ გაზრდის.
როცა ადამიანი აზროვნებს, მას ეჭვები იპყრობს, მაგრამ როცა მოქმედებს - დარწმუნებულია.
არ ვიცით, რა ვუყოთ ჩვენს ხანმოკლე სიცოცხლეს, მაგრამ მაინც მარადიული სიცოცხლე გვინდა.
გულწრფელს ვუწოდებთ ქალს, რომელიც აუცილებლობის გარეშე არ ტყუის.
შური დემოკრატიული სახელმწიფოების კეთილისმყოფელია და მათ ტირანებისგან იცავს.
მხოლოდ ქალებმა და ექიმებმა იციან, როგორი აუცილებელი და სასარგებლოა ტყუილი.
ჭეშმარიტი სიყვარული არ საჭიროებს არც სიმპათიას, არც პატივისცემას, არც მეგობრობას; ის ცოცხლობს სურვილით და იკვებება სიცრუით. ჭეშმარიტად უყვართ მხოლოდ ის, რაც არ იციან.
არ მგონია, რომ ამ ქვეყანაზე იყო ეჭვიანობაზე უფრო დამამცირებელი ტანჯვა.
დაიმორჩილეთ თქვენი ვნებები და მათი ძალა გახდება თქვენი ძალა, მათი სიდიადე - თქვენი სილამაზე.
დემოკრატია ცუდად მართავს, სამაგიეროდ - ცოტას.

ბედნიერება ფრთებით მოდის, მაგრამ ყავარჯნებით მიდის>>

მომავალი - აწმყოშია, მაგრამ მომავალი წარსულშიცაა. ეს ჩვენ ვქმნით მას. თუ ის ცუდია, ჩვენი ბრალია.
ყოველთვის მხოლოდ საკუთარი შეცდომების გამო ვიტანჯებით.
მამაკაცები სიყვარულში უტყდებიან, სანამ მას იგრძნობენ, ხოლო ქალები - მას შემდეგ, რაც სიყვარულს გამოცდიან.

177
თემები:
აზრების ფოიერვერკი: ცნობილი ადამიანების ბრძნული გამონათქვამები
„ფეისბუქი“

„ბოტების შეტევა“ - განათლების სამინისტრო დახმარებას Facebook-ს სთხოვს

46
(განახლებულია 16:31 09.08.2020)
უწყებაში დარწმუნებულები არიან, რომ საქმე აქვთ გარკვეულ ჯგუფებთან, რომლებიც პროვოკაციის მოსაწყობად ტრაგიკულ მოვლენებსაც კი იყენებენ

თბილისი, 9 აგვისტო — Sputnik. საქართველოს განათლების, მეცნიერების, კულტურისა და სპორტის სამინისტროს ოფიციალურ ფეისბუგვერდზე შაბათს „ბოტების შეტევა“ განხორციელდა, იუწყება სამინისტრო.

გავრცელებული ინფორმაციით, კიბერშეტევას მას შემდეგ მოხდა, რაც განათლების სამინისტროს ვებგვერდზე მუხათგვერდის ძმათა სასაფლაოზე გადაღებული ფოტომასალა გამოქვეყნდა. ფოტოებზე 2008 წლის ომში დაღუპული გმირების მემორიალის ყვავილებით შემკობის ცერემონია იყო ასახული.

„განათლების, მეცნიერების, კულტურისა და სპორტის სამინისტროს ოფიციალურ ფეისბუქგვერდზე, მუხათგვერდის სასაფლაოზე მემორიალის ყვავილების შემკობის ფოტოების დადებისთანავე, 150-ზე მეტი ყალბი ანგარიშიდან, რომლებიც დარეგისტრირებულია ინდოეთში, ტაილანდში, მაროკოში, ერაყში, პაკისტანში — თითქმის ერთდროულად განხორციელდა ე.წ. „ბოტების“ შეტევა“, — ნათქვამია სამინისტროს განცხადებაში.

უწყებაში დარწმუნებულები არიან, რომ საქმე აქვთ გარკვეულ ჯგუფებთან, რომლებიც პროვოკაციის მოსაწყობად ტრაგიკულ მოვლენებსაც კი იყენებენ.  

განათლების, მეცნიერების, კულტურისა და სპორტის სამინისტროს სტრატეგიული კომუნიკაციის დეპარტამენტმა ოფიციალურად მიმართა „ფეისბუქის“ ადმინისტრაციას მოთხოვნით, გააუქმოს აღნიშნული ყალბი ანგარიშები და მათთან დაკავშირებული გვერდები.

 

46