ნატა სამქანაშვილი

ქართველი ხელოვანი American Art Awards-მა მსოფლიოს საუკეთესო მხატვარ-მინიმალისტად აღიარა

1325
(განახლებულია 09:12 07.12.2019)
მოხარული ვართ, ქართველი ხელოვანების მიერ მოპოვებული კიდევ ერთი გამარჯვების შესახებ პირველებმა გაცნობოთ. ნიჭიერმა ქართველმა მხატვარმა და ტანსაცმლის დიზაინერმა საერთაშორისო აღიარება მოიპოვა.

ნატა სამქანაშვილმა ამერიკაში გამართულ მხატვართა საერთაშორისო კონკურსზე „მინიმალიზმის“ ნომინაციაში მსოფლიოს საუკეთესო მხატვრის სტატუსი და პირველი ადგილი დაიმსახურა. მიმართულებაში „იმპრესიონიზმი“ კი მესამე ადგილის მფლობელი გახდა. ამ მიმართულებაში მასთან ერთად ქართველი მხატვარი გელა ფილაურიც აღიარეს.

ამ გამარჯვების შესახებ მხატვარს პირადად American Art Awards-ის პრეზიდენტმა თომ ბერდსიმ (Thom Bierdz) შეატყობინა.

გაცნობებთ, რომ ეს გახლავთ მსოფლიოს საუკეთესო მხატვრის გამოსავლენი კონკურსი, რომელშიც მხატვრები 63 ქვეყნიდან 50 ნომინაციაში საუკეთესოს ტიტულის გამოსავლენად მონაწილეობდნენ. ხელოვანთა ნამუშევრებს ამერიკის 25 საუკეთესო გალერეა და მუზეუმი აფასებდა. ნატა სამქანაშვილს თბილისში დავუკავშირდით.

ნატა სამქანაშვილი
ნატა სამქანაშვილი

- ქალბატონო ნატა, პირველ რიგში გილოცავთ ასეთ მართლაც მნიშვნელოვან გამარჯვებას, როგორ მიიღეთ მონაწილეობა ამ კონკურსში?

- დავიწყებ იმით, რომ ასეთ აღიარებას და, მით უმეტეს, ასეთ გლობალურ მასშტაბებში არ ველოდი. ყველაფერი იმით დაიწყო, რომ სოციალურ ქსელებში ჩემს მეგობრებს ჰყავდათ American Art Awards-ის პრეზიდენტი, ბატონი თომ ბერდსი, რომელსაც მეც დავუმეგობრდი. მან ჩემს გვერდზე ნახა ნამუშევრები, რის მერეც თავად დამიკავშირდა და მითხრა, რომ ისინი ძალიან მოეწონა. ეს პიროვნება ჰოლივუდის მსახიობი, მწერალი და მხატვარი გახლავთ. მან, წარმოიდგინეთ, სრულიად უფასოდ ჩამრთო კონკურსზე, რომელში მონაწილეობისთვისაც თანხის გადახდაა საჭირო. ალბათ იმიტომ, რომ ესაა ამერიკა, სადაც ყოველგვარი პროტექციის გარეშე შეგიძლია გაიმარჯვო. ეს მიმართულება – მინიმალიზმი ამერიკაში ჩამოყალიბდა და, წესით, იქ ამერიკელი უნდა გასულიყო, მაგრამ მათ ყველა მონაწილე ობიექტურად შეაფასეს.

- ამ გამარჯვების შესახებ ვინ შეგატყობინათ?

- ამის შესახებ სოციალური ქსელით თვითონ პრეზიდენტმა მითხრა. ეს კონკურსი ონლაინ ტარდება. ბატონმა თომმა მითხრა, რომ ზუსტად 15 სექტემბერს მომწერდა კონკურსის შედეგებს. თქვენ წარმოიდგინეთ, ერთი დღეც არ გადააცდინა, ამერიკის დროით ზუსტად 15 სექტემბერს მომწერა და მაცნობა, რომ პირველ და მესამე ადგილებზე გავედი. ეს ჩემთვის ძალიან მოულოდნელი იყო. ამ გამარჯვებით ბედნიერი ვარ, რადგან ეს საკმაოდ პრესტიჟული კონკურსია. რადგან ამერიკის 25-მა საუკეთესო გალერეამ მაღიარა, მომავალში მათგან ველოდები შემოთავაზებას. თუმცა, როცა ბიოგრაფიაში ასეთი გამარჯვება გიწერია, ეს უკვე დიდი მიღწევაა. საერთოდ ჩემ ოჯახში მხატვარი არავინაა, მე კი ბავშვობიდან ვიცოდი, რომ უნდა მეხატა. აკადემიაში არ ჩამიბარებია. ჯერ ნიკოლაძე დავამთავრე და მერე უნივერსიტეტი მოდელირების განხრით.

ნატა სამქანაშვილის შემოქმედება
ნატა სამქანაშვილის შემოქმედება

- ტანსაცმლის დიზაინერი, თანაც 90-იან წლებში, როგორ გახდით?

- იმ პერიოდში მოდელების სახლი დაიშალა. ეს იყო წლები, როცა უტრანსპორტო და უშუქო ქალაქში ყველანი ფეხით დავდიოდით. ძირითადად პედაგოგიურ მოღვაწეობას ვეწეოდი მოდისა და ტყავ-ფეხსაცმლის განხრით, მაგრამ ფერწერა ჩემი მამოძრავებელი ძალაა. გარკვეული მიზეზების გამო არანაირ გამოფენებში არ ვიღებდი მონაწილეობას. მაშინ მხოლოდ კოლექტიური პატარ-პატარა ჩვენებები იმართებოდა. როგორც ტანსაცმლის დიზაინერს, შერეული სტილის სამოსი უფრო მომწონს. ჩემი ხაზი ქანთრის და სპორტულის კომბინაციაა, რომლის ხასიათს ერთიანობაში ვხედავ: სამოსი+აქსესუარი.

ნატა სამქანაშვილის შემოქმედება
ნატა სამქანაშვილის შემოქმედება

- ცხოვრებაშიც მინიმალისტი ხართ?

- როგორ გითხრათ... სხვათა შორის, სიტყვაძუნწი ვარ და წერა უფრო მოსახერხებელია ჩემთვის, ვიდრე საუბარი. უბრალოდ, თქვენ სწორად დამისვით კითხვები, ამიტომ ასეთ მომენტებში საუბარში უფრო ვიხსენები ხოლმე. ცხოვრებაში სულ ვმოქმედებ და ძიების პროცესში ვარ. ძალიან მძიმე წლები მქონდა, ოჯახური ტრაგედიებიც გადავიტანე და ის პერიოდი ხელოვნებამ მართლა გადამატანინა.

ნატა სამქანაშვილის შემოქმედება
ნატა სამქანაშვილის შემოქმედება

- რა არის თქვენი შემოქმედების არსი, ვერბალურად როგორ შეგიძლიათ გადმოსცეთ?

- ფერწერა ჩემი მამოძრავებელი ძალაა, შთაგონების წყარო კი ის მომენტები, რაც ყველა ჩვენგანის ცხოვრებაშია. ისინი ჩემს მეხსიერებაში იქამდეა, სანამ მათ არ განვახორციელებ. ვთვლი, რომ გადმოცემის ფორმაზე მნიშვნელოვანია – ჩანაფიქრს აზრობრივი დატვირთვა მიეცეს და მაყურებლის წარმოსახვაში არა მარტო ესთეტიკური მხარე გაჩნდეს, არამედ აზრის ფილოსოფიური მხარეც. მაგალითად, ზედა რაკურსით გამოსახული ნავი – „გაჩერება როგორც დასაწყისი“, ჩიტები როგორც ნოტები – „მელოდიური ქალაქი“... ეს არის ყოველდღიური მომენტები, რომელსაც ყველანი ვხედავთ, დანახვის შემდეგ ისინი ჩემს წარმოსახვაში აზრს და ფორმას იძენენ. ჩემი შემოქმედების არსი და სამყაროს ხედვა იმაში მდგომარეობს, რომ ადამიანებმა ცხოვრების ყველა ეტაპზე პოზიტიურად იფიქრონ...

 

1325
თამარ კეცხოველი

ძველთბილისური სახლების ნოსტალგია და პანდემიის დროს გამოფენილი ნახატები

350
(განახლებულია 19:48 07.08.2020)
ხატვა მოულოდნელად და უცნაურად დაიწყო... მანამდე მის მეხსიერებაში ქვეცნობიერად გროვდებოდა ნანახისა და განცდილის ფრაგმენტები. მისი ნახატების სახელწოდებებიც ამის დასტურია: „ქალაქი”, „სამკითხველო”, „საზაფხულო სახლი”, „მწვანე აბაჟური”, „ძველი ბუფეტი“.

ამაში უჩვეულოც არაფერი იქნებოდა, რომ არა ის, რაც გახდა ხატვის დაწყების სტიმული და ერთგვარად მისი განკურნების საუკეთესო საშუალებაც...

თამარ კეცხოველი თბილისში დაიბადა და გაიზარდა. პროფესიით არქეოლოგია. ხატვა 2019 წლის სექტემბერში, ინსულტის გადატანის შემდეგ დაიწყო. დღეში ძალიან ბევრს, დაახლოებით ათ საათს ხატავდა. პირველი პერსონალური გამოფენა პანდემიის დროს ჰქონდა.

თამარ კეცხოველი
თამარ კეცხოველი

- ქალბატონო თამარ, თქვენს ნახატებში წარსულის ნოსტალგიური განწყობაა და ამ გზით გამუდმებით ცდილობთ ბავშვობაში დაბრუნებას, ასეა?

- საერთოდ სადმე დაბრუნება მაშინ გინდა, როცა იქ კარგი იყო და კარგად გრძნობდი თავს. დიახ, შესაძლოა, არის რაღაც ნოსტალგიური მომენტები, თუმცა უფრო მეტად ძველებური ინტერიერი მომწონს და ვხატავ, ვიდრე ჩემი საბჭოთა ბავშვობის დროს იყო. სიძველის მომხიბვლელობას ასაკთან ერთად ვხვდები და მინდა, რომ ეს სხვასაც გავუზიარო...

თამარ კეცხოველის შემოქმედება
თამარ კეცხოველის შემოქმედება

- როგორი იყო თქვენი პლეხანოვური ბავშვობა, თუ არ ვცდები, პლეხანოვზე არსებული 23-ე სკოლა თბილისის ე.წ. პრესტიჟულ სკოლათა რიცხვშია, თქვენთვის თუ ჰქონდა ამგვარ იარლიყს მნიშვნელობა?

- დიახ, ჩემი 23-ე სკოლა „ელიტური” სკოლების სიაში შედიოდა, მაგრამ იქ ამიტომ არ მოვხვედრილვარ. უბრალოდ უბნით მეკუთვნოდა (მაშინ ასე იყო) და ტრადიციითაც, რადგან თავის დროზე იქ დედა და დეიდა სწავლობდნენ და ჩვენც იქ მიგვიყვანეს. პლეხანოვი და ჩემი უბანი ძალიან მიყვარს, ჩემი სახლი ეგაა... საერთოდ, მაპატიონ ახალუბნელმა თბილისელებმა და, თბილისი ჩემთვის ძველი უბნები და ძველი თბილისია. როდესაც ყველა ხეს ცნობ, ყველა მეეზოვეს, ფეხსაცმლის მწმენდავს და ქუჩის მოვაჭრეს სახელით იცნობ, ისაა შენი სახლი და შენი უბანი.

თამარ კეცხოველის შემოქმედება
თამარ კეცხოველის შემოქმედება

- 90-იანების სტუდენტობა არც ისე სასიამოვნო გასახსენებელია, მაგრამ მაინც, იმ „ბნელი“ დროის რომელ ნათელ მომენტს გაიხსენებდით?

- თავისი ხიბლი იმ ბნელი 90-იანების სტუდენტობასაც ჰქონდა. მაშინ დაიწყო მიტინგების ეპოქა და ჩამოინგრა სსრკ. ჩვენ, სტუდენტები კი მიტინგებიდან და უნივერსიტეტის ბაღიდან კარვებით პირდაპირ ქალაქგარეთ მივდიოდით. რაც კი ლამაზი ადგილი იყო ქალაქის გარშემო, სწორედ მაშინ შემოვიარე ყველა, უფრო სერიოზულად კი მთაში სიარულით ვიყავი დაკავებული. მაშინ სხვადასხვა ადგილებში იმართებოდა ბევრი ახალი ყაიდის ლექცია, სადაც ვესწრებოდით და თავისუფალ აზროვნებას ვცდილობდით... მოკლედ, ძალიან დატვირთული და საინტერესო სტუდენტობა მქონდა და მას არაფერში გავცვლიდი.

თამარ კეცხოველის შემოქმედება
თამარ კეცხოველის შემოქმედება

- ინსულტის მერე დაწყებული ხატვა თქვენთვის ერთგვარი შვება და გადარჩენის გზა იყო?

- ინსულტამდე სხვა ცხოვრება იყო, სახლი–სამსახური და სხვა არაფერი. ხატვით ყოველთვის ვხატავდი, უბრალოდ, ამის დრო არასდროს მქონდა. აი, ინსულტის მერე კი, როცა სამსახურიდანაც წამოვედი და სახლში დავჯექი, უცებ და ინტენსიურად დავიწყე მეგობრების პორტრეტების ხატვა. ვეღარ გავჩერდი და თამამად შემიძლია ვთქვა, რომ დღეში ათი საათი მაინც ვხატავდი. ხატვა არ მბეზრდებოდა და სწორედ ამან გადამარჩინა და პანდემიის დროს მძიმე კარჩაკეტილობაც ამან გადამატანინა.

თამარ კეცხოველის შემოქმედება
თამარ კეცხოველის შემოქმედება

- პანდემიის დროს პირველი პერსონალური გამოფენის გამართვა მონატრებული სამყაროს გამომზეურება იყო? 

- დიახ, ეს გამოფენა მეგობრებთან შეხვედრის და მძიმე სიტუაციიდან გამოსვლის მიზნითაც მოვაწყვეთ. ამაში გალერისტი მეგობარი დამეხმარა. ძალიან კარგი გამოფენა გამოვიდა.

თამარ კეცხოველის მიერ შესრულებული პორტრეტები
თამარ კეცხოველის მიერ შესრულებული პორტრეტები

- თქვენს ნახატებში ხშირად ჩნდება ძველი სახლი, რომელიც სიმყუდროვის განცდას აჩენს...

- ამჟამად არ ვარ ქალაქში და აქ, აგარაკზეც დავხატე რაღაცები. სიმყუდროვე თითქოს არ მაკლია სახლში, მაგრამ, ეტყობა, ეს უფრო ბავშვობის და ბებიების, ძველთბილისური სახლების ნოსტალგიაა, სადაც გაიარა ჩვენი თაობის უმრავლესობის სტუდენტობამ. ძალიან მიყვარს ძველი თბილისი და ის, რაც ფანჯრებს მიღმა ხდებოდა ძველ უბნებში, სულ ესაა...

თამარ კეცხოველის შემოქმედება
თამარ კეცხოველის შემოქმედება

- რაშია დეპრესიიდან გამოსავალი და ხსნა?

- რაშია ხსნა? ცხადია, ერთ-ერთი გზა საამისოდ ხელოვნებაცაა, რომელიც თერაპიაა... ჩემი აზრით, თუ ადამიანს რაიმეს შექმნა ხელეწიფება, უნდა გააკეთოს და არ გაჩერდეს, მერე ყველა მძიმე სიტუაციიდან იპოვის გამოსავალს...

 

350
საჰაერო ბურთები

ჭეშმარიტად უყვართ მხოლოდ ის, რაც არ იციან...

177
(განახლებულია 21:57 06.08.2020)
ქალმა უნდა აირჩიოს: მამაკაცთან, რომელიც სხვა ქალებს უყვართ, ის არასდროს იქნება მშვიდად; მამაკაცთან, რომელიც სხვა ქალებს არ უყვართ, ის არასდროს იქნება ბედნიერი...

აზრების ფოიერვერკი“ გთავაზობთ ანატოლ ფრანსის გამონათქვამებს.

ანატოლ ფრანსი (1844-1924), ფრანგი მწერალი და ლიტერატურული კრიტიკოსი
© photo: Sputnik /
ანატოლ ფრანსი (1844-1924), ფრანგი მწერალი და ლიტერატურული კრიტიკოსი

ანატოლ ფრანსი (Anatole France, ნამდვილი გვარია ანატოლ ფრანსუა ტიბო, ფრანგულად Anatole Thibault, 1844-1924) - ფრანგი მწერალი, რომანტიკოსი, ლიტერატურის კრიტიკოსი, ნობელის პრემიის ლაურეატი ლიტერატურის დარგში (1921). მისი ნაწარმოებებია: „თაისი“, „ჟერონ კუანიარის აზრები“, „სილვესტერ ბონარის დანაშაული“, „პინგვინთა კუნძული“, „ანგელოზთა აჯანყება“ და სხვა.

სიყვარულში მამაკაცებს ფორმები და ფერები სჭირდებათ, მამაკაცები სურათს ითხოვენ. ხოლო ქალები - მხოლოდ შეგრძნებებს. მათ უკეთესად უყვართ, ვიდრე მამაკაცებს, ისინი ბრმანი არიან.
ჩვენ საშიშად მიგვაჩნია ისინი, ვისი ტვინიც სხვაგვარადაა მოწყობილი, და უზნეოდ ისინი, ვისი ზნეობრიობაც ჩვენსას არ ჰგავს. სკეპტიკოსებს ვუწოდებთ მათ, ვისთვისაც უცხოა ჩვენი ილუზიები და კითხვაც არ გვიჩნდება, ხომ არ იციან მათ რაიმე სხვა ილუზიებიც.
გვინდა, რომ ვუყვარდეთ, ხოლო როცა ვუყვარვართ, ან გვაწამებენ, ან ყელში ამოჰყავთ.
მტრები მყავს, და ამით ვამაყობ.
ირონია - იმედგაცრუების ბოლო სტადიაა.
რელიგიამ სიყვარულს დიდი სამსახური გაუწია, როცა ის ცოდვად აქცია.

ორი რამ, რითიც ყველა მამაკაცი ამაყობს>>

ცივილიზაცია - ეს მეცნიერული ბარბაროსობაა.
ქალმა უნდა აირჩიოს: მამაკაცთან, რომელიც სხვა ქალებს უყვართ, ის არასდროს იქნება მშვიდად; მამაკაცთან, რომელიც სხვა ქალებს არ უყვართ, ის არასდროს იქნება ბედნიერი.


ადამიანს სჩვევია ბრძნული მსჯელობა და სულელური საქციელი.
ყველა ილუზიას შორის დიდება ყველაზე აბსურდული და ყველაზე დამღუპველია.
ძალზე ბრძენი უნდა იყო, რომ სიბრძნე ტვირთად არ აქციო.
ყველაზე იშვიათი სიმამაცე - ეს აზრის სიმამაცეა.
ის, ვინც რევოლუციები მოაწყო, სხვებს არ მისცემს უფლებას, მის მაგალითს მიბაძონ.
კანონები კარგია ან ცუდი არა თავისთავად, არამედ მათი გამოყენების ხერხის მიხედვით. ამა თუ იმ უკიდურესად უსამართლო დადგენილებას ბოროტება არ მოაქვს, თუ მოსამართლე მას ცხოვრებაში არ იყენებს. ზნეობა კანონებზე ძლიერია. ზნეობისა და ჩვეულებების კულტურულობა და სირბილე ერთადერთი წამალია კანონიერი ბარბაროსობის წინააღმდეგ.
სისულელე ხშირად ხელს უშლის სისულელის ჩადენას. ყველაზე სულელურად ყველაზე სულელი ადამიანები არ იქცევიან.

ამაოება ამაოებათა – როცა ყველაფერი აკრძალულია, მაშინ ყველაფერი ნებადართულია>>

უფრთხილდით მათ, ვინც საკუთარ თავს იტანჯავს: ისინი უნებლიეთ თქვენც დაგასახიჩრებენ.
კაცობრიობას ყველა დროში სიგიჟისა და სისულელის ერთნაირი მარაგი გააჩნია.
გიყვარდეს მგზნებარედ - ეს, რა თქმა უნდა, მშვენიერია, მაგრამ გიყვარდეს თავდადებით - კიდევ უკეთესი... ჭეშმარიტად უყვართ ის, ვინც უყვართ თავიანთი სისუსტეებით... დანდობა, პატიება, ნუგეში - აი, სიყვარულის მთელი მეცნიერება.

როცა ადამიანები შეწყვეტენ ერთმანეთზე გამარჯვებას, ისინი, ბოლოს და ბოლოს, ისწავლიან საკუთარ თავზე გამარჯვებას.
გონებრივი კულტურის გარეშე არ შეიძლება არსებობდეს დახვეწილი გრძნობები.
ომი - ბარბაროსობაა, რომელიც ცივილიზაციის განვითარებასთან ერთად გაქრება.
მოგზაურობა სხვა ყველაფერზე მეტად გვასწავლის. ხანდახან სხვა ადგილას გატარებული ერთი დღე მეტს გვაძლევს, ვიდრე სახლში ათი წელი ცხოვრება.
გონივრულ დასკვნებს ჯერ არავინ დაურწმუნებია.
სჯობს, ცოტა გაიგო, ვიდრე ცუდად.
სიტყვაზე მძლავრი არაფერია... სიტყვა ამარცხებს მრისხანეს და ანგრევს ციხესიმაგრეებს. ეს უხილავი იარაღია. მის გარეშე სამყარო უხეში ძალის ხელში იქნებოდა.

ნამდვილ სიყვარულს წერტილები არა აქვს...>>

ხშირად ბედნიერებას იმას ვუწოდებთ, რაც ჩვენ თვითონ არ განგვიცდია.
თვალმომჭრელი ჭეშმარიტება ფუჭი სიტყვაა იქ, სადაც მას თავს გახვევენ.
ყველა ღიმილი სიხარულს არ გამოხატავს ისევე, როგორც ყველა ცრემლი - უბედურებას.
ქალი მამაკაცის უდიდესი აღმზრდელია.

გულს შეუძლია ჭკუის მომატება, მაგრამ ჭკუა გულს ვერ გაზრდის.
როცა ადამიანი აზროვნებს, მას ეჭვები იპყრობს, მაგრამ როცა მოქმედებს - დარწმუნებულია.
არ ვიცით, რა ვუყოთ ჩვენს ხანმოკლე სიცოცხლეს, მაგრამ მაინც მარადიული სიცოცხლე გვინდა.
გულწრფელს ვუწოდებთ ქალს, რომელიც აუცილებლობის გარეშე არ ტყუის.
შური დემოკრატიული სახელმწიფოების კეთილისმყოფელია და მათ ტირანებისგან იცავს.
მხოლოდ ქალებმა და ექიმებმა იციან, როგორი აუცილებელი და სასარგებლოა ტყუილი.
ჭეშმარიტი სიყვარული არ საჭიროებს არც სიმპათიას, არც პატივისცემას, არც მეგობრობას; ის ცოცხლობს სურვილით და იკვებება სიცრუით. ჭეშმარიტად უყვართ მხოლოდ ის, რაც არ იციან.
არ მგონია, რომ ამ ქვეყანაზე იყო ეჭვიანობაზე უფრო დამამცირებელი ტანჯვა.
დაიმორჩილეთ თქვენი ვნებები და მათი ძალა გახდება თქვენი ძალა, მათი სიდიადე - თქვენი სილამაზე.
დემოკრატია ცუდად მართავს, სამაგიეროდ - ცოტას.

ბედნიერება ფრთებით მოდის, მაგრამ ყავარჯნებით მიდის>>

მომავალი - აწმყოშია, მაგრამ მომავალი წარსულშიცაა. ეს ჩვენ ვქმნით მას. თუ ის ცუდია, ჩვენი ბრალია.
ყოველთვის მხოლოდ საკუთარი შეცდომების გამო ვიტანჯებით.
მამაკაცები სიყვარულში უტყდებიან, სანამ მას იგრძნობენ, ხოლო ქალები - მას შემდეგ, რაც სიყვარულს გამოცდიან.

177
თემები:
აზრების ფოიერვერკი: ცნობილი ადამიანების ბრძნული გამონათქვამები
სარფი

საქართველოს მთავრობა: თურქეთში გადასვლაზე თანხმობა 101 პირს მიეცა

0
თურქეთთან საზღვრის გადაკვეთის უფლება ექნებათ მხოლოდ იმ მოქალაქეებს, რომლებსაც სამთვიანი ოფიციალური მიწვევა ექნებათ თურქი დამსაქმებლისგან.

თბილისი, 9 აგვისტო — Sputnik. საქართველოს მთავრობის გადაწყვეტილებით, თურქეთის რესპუბლიკაში გადასვლაზე დადებითი პასუხი 101 პირს მიეცა. რამდენიმე მათგანმა უკვე გადაკვეთა საქართველო-თურქეთის საზღვარი, იუწყება აჭარის ჯანდაცვის სამინისტრო ავრცელებს. 

საქართველოს მოქალაქეები თურქეთში სამუშაოდ წასვლას იმ შემთხვევაში შეძლებენ, თუ მათ ექნებათ დამსაქმებლის მიერ გაცემული ოფიციალური სამთვიანი მიწვევა, აღნიშნული გადაწყვეტილება საქართველოს მთავრობასთან შექმნილ უწყებათშორისი საკოორდინაციო საბჭოს სხდომაზე მიიღეს.

თურქეთში გამგზავრების მსურველებმა რეგისტრაციის პროცედურა საქართველოს ჯანდაცვის სამინისტროს მიერ შექმნილ სპეციალურ ვებგვერდზე, ასევე აჭარის დასაქმების სააგენტოს დახმარებით abroadworkers.moh.gov.ge-ზე უნდა გაიარონ.

განაცხადს ის მოქალაქეები ავსებენ, რომლებმაც თურქეთის რესპუბლიკაში რეგისტრირებული ფიზიკური ან იურიდიული პირისგან მოწვევა უკვე მიიღეს და ნოტარიულად ქართულ ენაზე დაამოწმეს.

„პროცედურა მარტივია, პირადი ნომრისა და მობილურის ნომრის შეყვანის შემდეგ განმცხადებელი ღებულობს აქტივაციის კოდს, რომლის შემდეგაც საშუალება ეძლევა ატვირთოს თურქეთის რესპუბლიკიდან მიღებული მოწვევა. განმცხადებელს პასუხი უმოკლეს ვადაში, არაუგვაინეს შვიდ დღეში ეცნობება“, – ნათქვამია აჭარის ჯანდაცვის სამინისტროს მიერ გავრცელებულ ინფორმაციაში.

პროცესს კოორდინაციას უწევს აჭარის მთავრობა, სპეციალური სამუშაო ჯგუფი, ადგილობრივი თვითმმართველობების პირველი პირები და დასაქმების სააგენტო, რომლებიც იზრუნებენ რეგისტრაციის პროცესსა და შემდგომ მონიტორინგზე. 

როგორც აჭარის ჯანმრთელობისა და სოციალური დაცვის მინისტრმა, ნინო ნიჟარაძემ სარფის საბაჟოზე განაცხადა, საქართველოს შესაბამისი უწყებები ყველაფერს აკეთებენ, რომ უმოკლეს ვადებში დასრულდეს ნებართვის გაცემასთან დაკავშირებული ყველა პროცედურა და იმ პირებმა, რომლებმაც უკვე მიიღეს მოწვევა თურქეთში მცხოვრები ფიზიკური ან იურიდიული პირის მხრიდან, მალე გადაკვეთონ საქართველო-თურქეთის საზღვარი და დანიშნულების ადგილზე მივიდნენ.

კორონავირუსის პანდემიის გამო საქართველომ 20 მარტიდან, გამონაკლისი შემთხვევების გარდა, უცხოელებისთვის საზღვრები ჩაკეტა და ყველა მიმართულებით ავიამიმოსვლა შეაჩერა.

პანდემიის პერიოდში სრულდება მხოლოდ ჩარტერული რეისები საქართველოს მოქალაქეების სამშობლოში ეტაპობრივად დაბრუნების მიზნით.

ოთხთვიანი წყვეტის შემდეგ საქართველომ საჰაერო სივრცე გახსნა ხუთი ქვეყნისთვის, რომელთა მოქალაქეებს ქვეყანაში შემოსვლა უპირობოდ შეუძლიათ. ეს ქვეყნებია: გერმანია, საფრანგეთი, ლატვია, ლიეტუვა და ესტონეთი. განსაკუთრებული შემთხვევების გარდა, სახმელეთო საზღვრები დღემდე ჩაკეტილია.

0
თემები:
COVID-19 საქართველოში