ლუკა ნოზაძე

ქართველი ლუკა ნოზას წარმატებული მუსიკალური კარიერა გერმანიაში და მისი მსოფლიო დონის ბენდი

1829
(განახლებულია 16:30 04.12.2019)
რუბრიკა „ქართველები უცხოეთში“ გაგაცნობთ ლუკა ნოზაძეს, რომელსაც უცხოეთში Luka Nozza-ს ფსევდონიმით იცნობენ.

„დღეს ჩემნაირებს Bedroom Artists - ანუ საძინებლის არტისტებს ეძახიან, რადგან სიმღერების წერა, ჩაწერა, დამუშავება და მასტერინგი საძინებელ ოთახში მიხდება.“- ასე წარადგინა საკუთარი თავი გერმანიაში მცხოვრებმა ნიჭიერმა ქართველმა მომღერალმა, 300-ზე მეტი სიმღერის ავტორმა და პროდიუსერმა ლუკა ნოზაძემ.

მუსიკოსი ელექტრო და აკუსტიკურ გიტარაზე, პიანინოსა და ბას გიტარაზე უკრავს. გერმანიაში მან ფრაიბურგის მუსიკალური კონსერვატორიის ჯაზ-ვოკალისა და პროდიუსინგის ფაკულტეტი დაამთავრა. წარმატებით გამოვიდა გერმანულ „ვოისში“, სადაც გამოცდილება შეიძინა და ამ სფეროში საჭირო კონტაქტები დაამყარა.

 დღეს მუსიკოსი ევროპის მასშტაბით გამართულ შოუ-პროგრამებზე, კერძო და სახალხო კონცერტებზე გამოდის. ამა წლის აგვისტოს თვეში გამოვიდა მისი, რიგით მეორე ალბომი, სახელწოდებით „The Rebornation”, რომელზეც სრულიად დამოუკიდებლად იმუშავა.

ლუკა ნოზაძე
ლუკა ნოზაძე

- ლუკა, როგორც ჩანს, ევროპაში უკვე გიცნობენ, საქართველოში თუ გყავთ მსმენელი?

 - რაოდენ დასანანიც უნდა იყოს, ქართველი მსმენელი არ მყავს, ამის მიზეზი ალბათ ის სოციალური ფონია, რომელიც საქართველოშია. სამწუხაროდ, მუსიკისთვის ჩვენთან არ სცალიათ. თუმცა ეს იმას არ ნიშნავს, რომ საქართველოში მუსიკალური ბიზნესი არ არსებობს. ქართველები, რომლებიც საზღვრებს გარეთ ვცხოვრობთ, დღითი-დღე ვზრდით ჩვენს საინსპირაციო არეალს და მსოფლიოს მუსიკალური კუთხით ვაცნობთ ჩვენს ქვეყანას.

ლუკა ნოზაძე
ლუკა ნოზაძე

- თქვენი ამბის მოყოლა გერმანიით დაიწყეთ და მკითხველისთვის საინტერესო იქნებოდა ასევე გაეგო, რა იყო გერმანიამდე?

- გერმანიამდე თბილისში ვცხოვრობდი, გლდანში გავიზარდე. ექვსი წლის ვიყავი როცა ბებომ მუსიკალურ სასწავლებელში მიმიყვანა. 12 წლის ასაკში გიტარას საკუთარი სურვილით მოვკიდე ხელი. ყველაფერი 2012 წელს დაიწყო როცა "ჯორჯიან დრიმ სტუდიო ლეიბლიში" ამერიკელმა არტისტებმა დაიწყეს ვოკალისა და ქორეოგრაფიის გაკვეთილების ჩატარება. ბედი და შესაძლებლობა მოვსინჯე ქართულ „ვოისში“, სადაც ჩემი გამოსვლა წარმატებული აღმოჩნდა. შემდეგ დავით ფორჩხიძის ბენდში გიტარისტი გავხდი და შალვა რამიშვილის სატელევიზიო შოუში, ბენდთან ერთად ყოველ კვირა გამოვდიოდი. პარალელურად დათო მუსიკალური პროდიუსინგის სფეროში საკუთარ გამოცდილებასა და ცოდნას მიზიარებდა. მუსიკისადმი ჩემს განსაკუთრებულ დამოკიდებულებას ხედავდა ყველგან მასთან ერთად დავყავდი, ამისთვის მისი დიდი მადლობელი ვარ.

ლუკა ნოზაძე
ლუკა ნოზაძე

- ფრაიბურგის კონსერვატორიაში როგორ მოხვდით?

- ფრაიბურგის აკადემიაში ონლაინ მოვეწყე, ყველანაირი საბაზისო კურსის გარეშე დავიწყე და 100-დან 94 ქულით დავხურე საბაკალავრო ნაშრომი, რომელსაც ორი წელი დავუთმე და რომელიც ასევე ჩემი რიგით მეორე ალბომია ბოლო სამი წლის მანძილზე. აქვე, არ შემიძლია  მადლობა არ გადავუხადო დედას, რომელმაც ჩემი სწავლა-განათლებისთვის საჭირო თანხა გაიღო. დღეს დღეისობით ჯაზის გარდა ჩემი მიმართულებაა- R&B და Alternative Pop-ი. სიმღერებს თითქმის ყოველ დღე ვწერ.

ლუკა ნოზაძე
ლუკა ნოზაძე

- ქართულ ენაზე თუ გიცდიათ სიმღერა დაგეწერათ?

- მიუხედავად იმისა, რომ ქართული ჩემი მშობლიური ენაა, იგი ოდნავ პრეტენზიულია და ბევრი მცდელობა არ გჭირდება იმისთვის, რომ ცუდი სიმღერა „შემოგეწეროს“, შესაბამისად სიფრთხილეა საჭირო. არსებობს ფორმულები, რომლითაც დღევანდელი პოპ-მუსიკა იწერება, მე რათქმაუნდა ვეცნობოდი და ახლაც ვეცნობი ყველა ფორმულას და ვცდილობ, რომ ისინი ქართულ ენას მოვარგო. თუმცა მუსიკის მხოლოდ ფორმულებში მოქცევა კრეატივს ანადგურებს, შესაბამისად, ოქროს შუალედიც ნაპოვნი მაქვს.

- გაიხსენეთ „გერმანულ ვოისში“ თქვენი მონაწილეობის ამბავი, ვიცი, რომ საკმაო რეზონანსი მოჰყვა ჰქონდა თქვენს გამოსვლას... 

- გერმანული „ვოისის“ შესარჩევ ქასთინგზე ბერლინში სპონტანურად, ღამის ავტობუსით წავედი. ეს ქასთინგის ბოლო დღე იყო. იმ დღეს 500 კაცში გავძვერი და ჩემი სახელი უკვე პირველივე დღესვე ყველამ იცოდა. სხვებს თუ უპასუხოდ უშვებდნენ, მე კონტრაქტი მომცეს და ისე გამომიშვეს. უკვე ნათელი იყო, რომ იმ წელს, „ვოისის“ მონაწილე გავხდებოდი, მაგრამ ნამდვილად არ ვიცოდი ივონ კატარფელდის გუნდის წევრი რომ გავხდებოდი. თამამად ვიტყვი, რომ მონაწილეების 95 %-ზე მეტი გამოცდილება მქონდა- საკუთარი ალბომით და ჩემი დიდი შესაძლებლობით. შესაბამისად სხვებისგან განსხვავებით ოდნავ დაძაბულ გარემოში მიწევდა მუშაობა.

- როგორც გავიგე, მოწინააღმდეგეს გარკვეული კონსულტაცია თავად გაუწიეთ, საბოლოოდ რა მოხდა?

- ჩვენ 2018 წლის საუკეთესო რინგი „დავდეთ“ და სრულიად გაუგებარი დასასრულის მიუხედავად იქ გამოსვლა მაინც მეამაყება. რაც შეეხება მეტოქეს, მას მართლა მე ვამეცადინებდი კარგი ნომერი რომ გამოსულიყო.

-ქართულ მუსიკას პოპულარიზაციას უწევთ უცხოეთში...

- როდესაც შანსი მიჩნდება ხოლმე ჩემს სანაცნობო წრეს ვაცნობ გია ყანჩელს, რეზო ლაღიძეს და ჰამლეტ გონაშვილს. ვასმენინებ „წინწყაროს“, „ჩაკრულოს“, „დაიგვიანეს“, ქართულ მრავალხმიან ფოლკლორს და განსაკუთრებით ჩემს ბიძებს, თემურ და დავით მურაჩაშვილებს, რომლებიც ქართული ფოლკლორის უბადლო შემსრულებლები არიან.

- რომელია ყველაზე გამორჩეული შოუ-კონცერტი, რომელშიც მონაწილეობა მიიღეთ?

- ერთ-ერთი ყველაზე გამორჩეული კონცერტი შვეიცარიაში, ბერნში გამართული „Ebay“-ს კორპორატიულ საღამო იყო. იმ საღამოზე ჩემს ბენდს „მსოფლიო დონის ბენდის“ სახელი ოფიციალურად მიანიჭეს. შოუს დასრულებისთანავე, სცენაზე „ლუკა-ლუკას“ ძახილით დაგვაბრუნეს. ხშირად მეკითხებიან: როგორ ვეგუები გერმანულ პუნქტუალობას, მასზე აქ ჩამოსვლამდე ბევრი რამ მსმენია. ზოგადად მათი ეს თვისება მთელი მსოფლიოსთვის ნაცნობია, უფრო სწორად, იყო. თუმცა ოფიციალურ შეხვედრაზე დაგვიანება გერმანიაშიც ისეთივე არასასურველია, როგორც ნებისმიერ სხვა ქვეყანაში.

- როგორია ლუკა ნოზას ქართული ფიქრები?

- ხანდახან, საღამოობით, ფრაიბურგის ქუჩებს შეყვარებულთან ერთად გავდივარ, აქა-იქ ქართულ ლაპარაკსაც მოვკრავ ხოლმე ყურს და ვცდილობ, წარმოვიდგინო, რომ მომავლის საქართველოში დავაბიჯებ... ჩვენი პრობლემა ის არის, რომ საკმაოდ ბევრს ვფიქრობთ წარსულზე, რომელიც მართალია, საამაყოა, მაგრამ მხოლოდ „იქით“ გახედვით წინ ვერ წავალთ. საქართველოს ვუსურვებ, რომ წარსულზე ფიქრი დაამარცხოს და მისი საკადრისი მომავალი რეალურად დადგეს...

 

1829
თემები:
ქართველები უცხოეთში (77)
ნიკა ჭიკაიძე

„წლების წინ ამაზე საუბარი ჩემთვის მტკივნეული იქნებოდა"

548
(განახლებულია 22:23 11.08.2020)
როცა „დედამიწის ნახევარი შეშლილია, ნახევარიც, ალბათ, მალე შეიშლება“, ის „საკუთარი მერნებიდან“ გამოდის იმიტომ, რომ „სამყაროს საიდუმლო აღასრულოს“...

ეს ახალგაზრდა ნიჭიერი პოეტი ნიკა ჭიკაიძეა თავისი ამბიციური სათქმელით. პოეზიის მოყვარულები მას უკვე კარგად იცნობენ. საკუთარი ლექსების კრებული, სახელწოდებით „21-ე განთიადი“ 2018 წელს გამოსცა. 25 წლის ასაკში მწერალთა კავშირის წევრი გახდა. დაახლოებით ორ კვირაში თავისი საუკეთესო ლექსების კრებულის „ქრისტეთი“ გამოშვებას გეგმავს. წერს რომანს, რომელსაც, მისივე სიტყვებით, „პირველი სიტყვიდან უკანასკნელ სიტყვამდე გრძნობს“...

ნიკა ჭიკაიძე
ნიკა ჭიკაიძე

- ნიკა, როგორ ფიქრობთ, მცხეთაში - ამ ქართულ წმინდა ქალაქში დაბადებამ და ცხოვრებამ თქვენს ბედსა და ნიჭზე გავლენა მოახდინა?

- ვფიქრობ, რაც ადამიანში დევს, საბოლოო ჯამში მაინც ის გამოვლინდება, თუნდაც ამგვარი მოსაზრება ამ შემთხვევაში ლიტერატურულ საქმიანობას მივაკუთვნოთ. რა თქმა უნდა, მცხეთაში დაბადებამ და აქაურმა გარემო-პირობებმა ჩემზე დიდი შთაბეჭდილება მოახდინა. თუმცა გადამწყვეტ მნიშვნელობას, ვფიქრობ, გარემო მაინც არ წარმოადგენს. პოეზია ღმერთისგან ნაბოძები ნიჭია, რომელიც ამავე დროს უდიდეს პასუხისმგებლობას და ხშირად თავგანწირვასაც მოითხოვს. ქართველებს გვყავს სწორედ ერთი ასეთი თავგანწირული პოეტი - ნიკოლოზ ბარათაშვილი, რომლის გარეშეც წარმოუდგენელია დღევანდელი ქართული პოეზია და ურომლისოდაც კაცმა არ იცის, ვინ იქნებოდა გალაქტიონი და დღეს როგორი პოეზია გვექნებოდა. საერთოდ წმინდა ქალაქში ცხოვრება და მოღვაწეობა უფლისგან დიდი ჯილდოა და ამავდროულად დიდი პასუხისმგებლობაც. მინდა გითხრათ, რომ ჩემთვის მცხეთა ის ქალაქია, მსოფლიოს ვერც ერთ ქალაქს რომ ვერ შევადარებ და ვერც ვამჯობინებ.

ნიკა ჭიკაიძე
ნიკა ჭიკაიძე

- მოზარდობის დროს დაწერილი პირველი თქვენი ლექსი თუ გახსოვთ?

- ზუსტად არ მახსოვს - ცამეტი, თუ თოთხმეტი წლის ვიყავი, როდესაც პირველი ლექსი დავწერე, რომელიც არა სიყვარულზე, არამედ პატრიოტულ მოტივზე შეიქმნა. მახსოვს, სკოლიდან სახლში ვბრუნდებოდი საზოგადოებრივი ტრანსპორტით, როდესაც ამ ლექსზე მუზა მეწვია.

- ძირითადად პატრიოტულ თემაზეა თქვენი ლექსები...

- როდესაც ლექსს ვწერ, რა თემაზეც არ უნდა იყოს, ყოველთვის ვცდილობ, რომ გულწრფელად და დამაჯერებლად გადმოვცე სათქმელი. ლიტერატურა დამაჯერებლობაა... რაც შეეხება თემატიკას, პოეზიაში მრავალფეროვნება მიყვარს ყველაზე მეტად. მრავალფეროვნება როგორც თემატიკის, ასევე ვერსიფიკაციის თვალსაზრისით. ჩემი მკითხველი გარკვეულწილად იცნობს ჩემ შემოქმედებას, თუმცა, რა თქმა უნდა, არა ბოლომდე. რადგან, ჯერ კიდევ მრავალი ლექსი მაქვს მათთვის გასაცნობი.

ნიკა ჭიკაიძე
ნიკა ჭიკაიძე

- ძალიან ბევრს მოსწონს თქვენი ლექსი „გიორგი სააკაძე“:

„ვიძახი, როდესაც იმ დღეებს ვაჯამებ:

დიდება მარტყოფს და სირცხვილი ბაზალეთს!

ვიდრემდი განგვკითხავს სიკვდილის სამკვიდრო,

მტერს გადავურჩებით - სამშობლო არ გვინდობს...

არ ვიცი, რა უცნობ წლებს გადმოენარცხე,

დრო უცხო მიწაზეც დღემდე არ გაცხოვნებს

და თუკი წარსულში გმირად არ შეგრაცხეთ,

მაშ, ნუღარც მომავლის ღალატით გაცხოვრებთ...

ეს სტროფებია ამ ლექსიდან, რთულია, მაგრამ თქვენ მოახერხეთ და დღემდე საკამათო ისტორიულ პიროვნებაზე ასეთი მართალი და ემოციური ლექსი დაწერეთ...

-  ეს ლექსი გიორგი სააკაძეზე 2018 წელს დავწერე. სააკაძის პიროვნება ბევრისთვის მართლაც საკამათო ამბავს წარმოადგენს - ერთნი გმირს ხედავენ მის პიროვნებაში, მეორენი კი სამშობლოს მოღალატეს. არის საზოგადოების გარკვეული (მაგრამ მცირე ნაწილი), ვინც მის საქმიანობას ობიექტურად აფასებს. პირადად ჩემთვის გიორგი სააკაძე დიდი ქართველი მამულიშვილია. რა თქმა უნდა, არსებობს ისტორიაში ის შავი ლაქები, რაზეც მისი პიროვნების მოწინააღმდეგენი ხშირად ხაზს უსვამენ, მაგრამ ვფიქრობ, ასეთი მაგალითები მის დიდ ქართველობას მაინც ვერაფრით დააკნინებს. ყველაფერს რომ თავი დავანებოთ, საკუთარი შვილი შესწირა სამშობლოს მსხვერპლად! განა შეიძლება, რომ ასეთ ადამიანს მოღალატე ვუწოდოთ?! ამიტომ ვცდილობდი, რომ ეს ლექსი ობიექტური გამომსვლოდა და არა რადიკალური. ვფიქრობ, მკითხველიც შესანიშნავად მიმიხვდა ამას და ლექსიც არაჩვეულებრივად შეაფასა...

ნიკა ჭიკაიძე
ნიკა ჭიკაიძე

- რაზეა რომანი, რომელსაც ახლა წერთ და მისი ფინალი თუ იცით უკვე?

- რაც შეეხება რომანს, გეტყვით, რომ შექმნის პროცესში ვარ და ფინალამდე ჯერ კიდევ ბევრი მიკლია. თუმცა შესანიშნავად ვგრძნობ იმას, თუ როგორ განვითარდება რომანში შემდგომი მოვლენები. ჯერ კიდევ დაწყებულიც არ მქონდა წერა, როდესაც პირველი სიტყვიდან უკანასკნელ სიტყვამდე ვგრძნობდი ამ რომანს. არ მინდა წინასწარ ვისაუბრო იმაზე, თუ რა თემაზე ვწერ და როგორი პერსონაჟები მყავს. რამდენიმე ამონარიდი მაქვს საჯაროდ შეთავაზებული მკითხველისთვის (ძირითადად მონოლოგების სახით), თუმცა ეს მხოლოდ იმისთვის გავაკეთე, რომ ჩემეულ ენასა და შეხედულებაზე გარკვეულწილად წარმოდგენა შევუქმნა. ამ ყოველივეს გამხელით, შესაძლოა, რომანს გარკვეულწილად მკითხველის თვალში ინტერესი დავუკარგო, მაგრამ გეტყვით იმას, რომ ძალიან საინტერესო და მრავალფეროვან ნაწარმოებს შემოგთავაზებთ.

თენგო ხუციშვილთან ერთად
თენგო ხუციშვილთან ერთად

- გალაკტიონი რომ შეგხვედროდათ სიცოცხლეში, რას ჰკითხავდით?

- გალაკტიონი ჩემი უსაყვარლესი პოეტია ნიკოლოზ ბარათაშვილთან ერთად. მასთან რომ შეკითხვის დასმის შესაძლებლობა მომცემოდა, პირველ რიგში ვკითხავდი – როგორ შექმენით ასეთი ღვთაებრივი პოეზია?!

- სიმშვიდე თუ ფორიაქი და რატომ?

- რა თქმა უნდა, სიმშვიდე! რადგან უფალიც ამას გვეუბნება: „მშვიდ ვარ და მდაბალ გულითა". ადამიანის დანიშნულებაც ხომ სწორედ ღმერთთან მსგავსებაში მდგომარეობს. რა თქმა უნდა, ცხოვრება გარკვეულწილად ფორიაქსაც ითვალისწინებს, რადგან სამყაროში არაფერია აბსოლუტური, მაგრამ მიუხედავად ამისა, უნდა ვეცადოთ, რომ მშვიდობა შევინარჩუნოთ საკუთარ შინაგანში, რადგან ყოველგვარი ემოცია გულიდან მომდინარეობს...

- ემოციური ადამიანები სიზმრებსაც ემოციურს ხედავენ, სიზმარში თუ დაგიწერიათ ლექსი?

- ლექსი სიზმარში ბევრჯერ შემიქმნია, თუმცა ის ცხადში ვერც ერთხელ ვერაფრით ვერ გავიხსენე.

- მეცნიერებამ სიყვარული ფსიქიკურ აშლილობად აღიარა, თქვენ რას ფიქრობთ?

- ჩემთვის სიყვარული ღვთაებრივი გრძნობაა, რომელიც შეუძლებელია ფსიქიკურ აშლილობად წარმოვიდგინო. ვფიქრობ, შეყვარებულ პოეტს აუცილებლად ეწვევა მუზა, რომელიც თავისას ათქმევინებს. მქონდა ასეთი პერიოდიც და დღევანდელი გადმოსახედიდან ვგრძნობ მხოლოდ სასიამოვნო მოგონებას და არა ტკივილს. წლების წინ ამაზე საუბარი ჩემთვის მტკივნეული იქნებოდა...

- როგორი უნდა იყოს „ის“, რომელსაც შეიყვარებთ?

- რთულია ამ კითხვაზე პასუხის შეუცდომლად გაცემა, რადგან შესაძლოა გითხრათ, გოგო ასეთი და ასეთი უნდა იყოს, რომ შემიყვარდეს–მეთქი, მაგრამ ვიცი, ამ შემთხვევაში არ ვიქნები მართალი. რადგან უნაკლო და ჩემი შეხედულებით იდეალური ქალი, ალბათ, სამყაროში არც არსებობს. მაგრამ შემიძლია სამი სიტყვით ზოგადად აგიწეროთ ამგვარი ადამიანის სურათი: პატიოსანი, ნიჭიერი და ლამაზი. სწორედ ასეთი გოგო დგას ახლოს ჩემ სულიერებასთან.

- რაზე ოცნებობს 25 წლის პოეტი?

- ძალიან ბევრ რამეზე ვოცნებობ - როგორც პირადზე, ასევე საზოგადოზე. ვოცნებობ: გაერთიანებულ, ეკონომიკურად ძლიერ და სამართლიან საქართველოში ცხოვრებაზე. ვოცნებობ, რომ ადამიანებს ერთმანეთი გვიყვარდეს, პატივს ვცემდეთ ერთიმეორის პიროვნებას და ვაფასებდეთ ერთურთის ნიჭიერებას... რაც შეეხება პირად ოცნებებს, ვოცნებობ იმაზე, რომ ღირებული ლიტერატურა შევქმნა. ასევე იმაზე, რომ ვიპოვო ცხოვრებაში გოგო, რომელსაც ვეყვარები და რომელსაც შევიყვარებ...

 

548
ელინა მიმინოშვილი

ხელოვანი–დედა, მისი არტ-სიახლე სასტუმროებში და კაქტუსებით მოხატული კედლები თბილისში

741
(განახლებულია 19:18 10.08.2020)
ელინა მიმინოშვილი 24 წლისაა და უკვე ორი შვილის დედაა, ოჯახურ ცხოვრებას სიამოვნებით უთავსებს ხელოვნებას და საკუთარ განვითარებაზე სერიოზულად ზრუნავს.

ხატავს ოთხი წლიდან, სამხატვრო სკოლის მერე აკადემიის სახვითი ხელოვნების ფაკულტეტის ბაკალავრიატი დაამთავრა ფერწერის განხრით. არაერთ ჯგუფურ გამოფენაში აქვს მიღებული მონაწილეობა და მისმა პირველმა პერსონალურმაც წარმატებით ჩაიარა.

სიამაყით ამბობს, რომ პირველმა არტ-თერაპია საქართველოში, ხუთვარსკვლავიან სასტუმროში მან დანერგა. დღეს ხატვას მოზარდებს ასწავლის. რადგან პატარა ტილოზე ხატვა არასოდეს ხიბლავდა, ამიტომ სიამოვნებით ხატავს დიდ სივრცეზე. მისი უჩვეულო კედლის მხატვრობა თბილისში არაერთ შენობას ალამაზებს.

ელინა მიმინოშვილის შემოქმედება
ელინა მიმინოშვილის შემოქმედება

- ელინა, როგორც ხელოვანს და დედას მინდა გკითხოთ, რას გვეტყვით არტ-თერაპიაზე, როგორც მშობლებისა და შვილების ურთიერთობის გასამყარებელ ორიგინალურ საშუალებაზე?

- არტ-თერაპია ადამიანებს ემოციების გაცვლაში ეხმარება. დღეს მშობლებს და ბავშვებს ურთიერთობის დეფიციტი აქვთ, რაც პრობლემებს ქმნის ბავშვების განვითარებაში. ამიტომ არტ-თერაპიის სეანსებს პატარებისა და მშობლებისთვის მათი ურთიერთობების გასამყარებლად ვატარებ. ხატვის პროცესის დროს ისინი ამყარებენ ახლო კავშირს, მათ შორის ხდება ემოციების გაცვლა, ფერებით თამაში, რაც ძალიან სიამოვნებთ როგორც მშობლებს, ასევე მათ შვილებს. პარალელურად აქტიურად ვხატავ, ჩემი ნამუშევრები იყიდება „სტუდიო არტის“ გალერეაში, სადაც ასაკით ყველაზე პატარა ვარ სხვა მხატვრებთან შედარებით. ჩემთვის ხელოვნება ცხოვრების წესია, მუზას არ ველოდები ხოლმე იმისთვის, რომ რაიმე შევქმნა. რადგან თუ შენი საქმის პროფესიონალი ხარ, ყოველთვის უნდა შეგეძლოს ნახატის შესრულება.

ელინა მიმინოშვილის შემოქმედება
ელინა მიმინოშვილის შემოქმედება

- კედლის მხატვრობით როდის დაკავდით და რატომ დაინტერესდით, მხატვრისთვის რითია ეს საინტერესო?

- პირველად კედლის მხატვრობით ორი წლის წინ დავკავდი, რის შემდეგაც ვეღარ გავჩერდი. ზოგადად, არ მიყვარს პატარა ტილოებზე ხატვა, იმიტომ რომ სივრცეში ვიზღუდები. ყოველთვის დიდ ტილოებზე ვხატავდი. კედლებზე იმიტომ გადავედი, რომ მას ჩარჩო არ აქვს და არ გზღუდავს. თანაც ბევრად თავისუფალი ხარ დიდ მასშტაბებზე. პერსონალური გამოფენა მქონდა ეროვნულ ბიბლიოთეკაში, მიმიღია მონაწილეობა არაერთ ჯგუფურ გამოფენაში, სხვადასხვა საგამოფენო სივრცეებსა და სასტუმროებში.

ელინა მიმინოშვილი
ელინა მიმინოშვილი

- რა სიახლე დანერგეთ სასტუმროში?

- მე პირველი ვიყავი, ვინც საქართველოში არტ-თერაპია შეიტანა ხუთვარსკვლავიან სასტუმროში. დაახლოებით სამი წლის წინ მომიწია მუშაობა „ქრაუნ პლაზა ბორჯომში“, სადაც სტუმრებისთვის „არტ-თერაპია“ დავნერგე. სასტუმროს ტერიტორიაზე მათ ჩემი დახმარებით და მეთვალყურეობის ქვეშ საშუალება მიეცათ, რომ დაეხატათ მოლბერტზე როგორც ღია ცის ქვეშ, ასევე დახურულ სივრცეში. ეს ჩემი იდეა იყო და მოხარული დავრჩი, როცა სასტუმროს გაყიდვების გუნდმა მას მხარი დაუჭირა. მე შევძელი, რომ სამოყვარულო დონეზე ხატვა ბევრი ადამიანისთვის მესწავლებინა. ამის შემდეგ მქონდა ოცდღიანი პროექტი კურორტ საირმის სასტუმროში, სადაც ყოველდღიურად ვატარებდი ჯგუფურ გაკვეთილებს.

ელინა მიმინოშვილის შემოქმედება
ელინა მიმინოშვილის შემოქმედება

- ანუ ხატვის სწავლა ყველასთვის შესაძლებელია?

- ვფიქრობ, თუ ადამიანს სურს დაეუფლოს ფერწერას, ხატვას, ამაში შეუძლებელი არაფერია, რადგან ამ შემთხვევაში ნიჭის ფაქტორი 1%-ია, 99% კი საკუთარ თავზე მუშაობა და ხანგრძლივი შრომაა. აქედან გამომდინარე, დამებადა იდეა, რომ გამეკეთებინა არტ-თერაპია მშობლებისთვის და ბავშვებისთვის. დღეს არტ-თერაპია საკმაოდ პოპულარული გახდა და, როგორც ვიცი, ახლა სხვა სასტუმროებმაც დაიწყეს ამ კუთხით მუშაობა.

ელინა მიმინოშვილის შემოქმედება
ელინა მიმინოშვილის შემოქმედება

- ბოლოს რა მოხატეთ?

- ჩემ მიერ ბოლოს მოხატული კედლები გახლავთ ბელიაშვილზე არსებულ რესტორანში „ჩემო კარგო ქარხანა“, სადაც თითქმის მთელი ეზო ჩემი მოხატულია. ასევე მე მოვხატე სკოლა „ოლიმპის“ ეზოც. ბედნიერი ვარ, რომ შემიძლია სხვა ადამიანებს სამყარო გავუფერადო, რადგან მოხატული კედლებიდან ძალიან დიდი დადებითი ემოციები გადმოდის.

ელინა მიმინოშვილი
ელინა მიმინოშვილი

- რატომ გახდა ბოლო დროს მხატვრობის ეს ფორმა პოპულარული ჩვენში და რამდენად შემოსავლიანია?

- ზოგადად, ქუჩის მხატვრობა არ არის იაფი სიამოვნება, რადგან საკმაოდ ძვირი ღირს მასალა და, აქედან გამომდინარე, ბევრჯერ უსასყიდლოდ დამიხატავს კედელი მხოლოდ მასალის დაფინანსებით ან უბრალოდ საკმაოდ დაბალ ფასად. არიან ისეთი დამკვეთებიც, რომლებიც სათანადოდ აფასებენ ხელოვანი ადამიანის შრომას. ზუსტად ვერ გეტყვით ფასებთან დაკავშირებით დეტალებს, რადგან ყველა მხატვარი ინდივიდუალურად აფასებს საკუთარ შრომას, ასევე ფასი დგინდება ნახატის ზომისა და სირთულის მიხედვით და სასიხარულოა, რომ დღეს საქართველოში ასეთი პროექტები ფინანსდება და ფასდება.

ელინა მიმინოშვილი
ელინა მიმინოშვილი

- თქვენი ნება რომ იყოს, რომელ შენობებს მოხატავდით თბილისში და რას დახატავდით?

- ძალიან ბევრი კედელი მომწონს, როცა ვუყურებ, უკვე წარმოვიდგენ ხოლმე რასაც დავხატავ, მაგრამ ჯერჯერობით მათ არ დავასახელებ. თუმცა მომავალში გპირდებით, რომ ბევრ ქუჩაზე შეგხვდებათ ჩემი ნამუშევრები. ბოლო თვეები დავიწყე მუშაობა კაქტუსების სერიაზე და უკვე რამდენიმე კედელზეც კი გადავიტანე ჩემი კომპოზიციები. ამ სერიის ნამუშევრები გალერეა „სტუდიო არტში“ იყიდება. ალბათ მომავალში ძალიან დიდ კედელზეც იხილავთ ჩემს კაქტუსებს.

ელინა მიმინოშვილი
ელინა მიმინოშვილი

- რატომ მაინცდამაინც მსუსხავი კაქტუსი?

- ამ მცენარემ მომცა დიდი ინსპირაცია, რადგან ის მაღალ ტემპერატურას და საკმაოდ რთულ პირობებს უძლებს და, ყველაფრის მიუხედავად, მაინც ულამაზესად ყვავის. სხვათა შორის, კაქტუსი შეიძლება ჩვენს ქვეყანას შევადაროთ და მასთან პარალელი გავავლოთ. რადგან ჩვენმა ქვეყანამაც ბევრ გაჭირვებას გაუძლო, მჯერა, რომ ახლანდელ პანდემიასაც გაუმკლავდება და ისე, როგორც ჩემი კაქტუსები, ისიც აყვავდება... ისე, კაქტუსებში საკუთარ თავსაც ვხედავ, რადგან არაერთი რთული პერიოდი გამივლია ცხოვრებაში, მაგრამ ისევ ვცდილობ, რომ სხვა ადამიანები ბედნიერად გავაღიმო და მათ ფერადი და ლამაზი სამყარო ვაჩუქო. ჩემს სახლში, სამწუხაროდ, არ მაქვს მოხატული კედლები, მაგრამ მომავალში, როცა მექნება ჩემი დიდი სახლი, მას აუცილებლად მოვხატავ.

ელინა მიმინოშვილის შემოქმედება
ელინა მიმინოშვილის შემოქმედება

- 24 წლის ასაკში ორი შვილის დედა ხართ, თან აქტიურად საქმიანობთ, რამდენად იცლით ოჯახისთვის, როგორია ახალგაზრდა ხელოვანი დედა ოჯახში?

- დიახ, 24 წლის ასაკში საკმაოდ ბევრი მოვასწარი, ხანდახან თვითონაც არ მჯერა, რომ ორი შვილის დედა ვარ... საკმაოდ რთულია იყო დედა და ამავდროულად აქტიური მხატვარი, თუმცა ვფიქრობ, რომ შეუძლებელიც არაფერია. რადგან ზუსტად ჩემი შვილები და ხელოვნებისადმი სიყვარულია ჩემი ყველაზე დიდი სტიმული. მაქსიმალურად ვცდილობ ვიყო არა მარტო დედა, არამედ საუკეთესო მეგობარი ჩემი ოჯახისთვის. ასევე ვფიქრობ, რომ ჩემი მეუღლის, ნიკას მხარდაჭერის გარეშე ბევრ რამეს უბრალოდ ვერ შევძლებდი. ჩვენ ყოველთვის ვინაწილებთ საქმეს და, აქედან გამომდინარე, უფრო ადვილად ვუმკლავდებით ყოველდღიურობას. განვითარებისკენ სწრაფვა ყოველთვის მქონდა და არასოდეს მესმოდა იმ ადამიანების, ვინც ბავშვების გამო საკუთარ ცხოვრებასა და განვითარებაზე უარს ამბობს. ბავშვები მაძლევენ უზარმაზარ სტიმულს იმისთვის, რომ მათთან ერთად წინ ვიარო.

- სამომავლოდ ალბათ თქვენი ყველაზე დიდი შემფასებლებიც ისინი იქნებიან? 

- ჩემი ყველაზე დიდი შემფასებლები ჩემი შვილები დღეს უკვე არიან. ყოველთვის, როდესაც კედლებს ვხატავ ხოლმე, მის სანახავად ნიკას აუცილებლად მოჰყავს პატარები, სანი და კირა, რომლებიც ჯერ გაოცებული სახით უყურებენ ჩემს ნამუშევრებს და შემდეგ გაღიმებულები პატარა ხელებით ეფერებიან მას. ვფიქრობ, ამაზე დიდი ბედნიერება არ არსებობს, როდესაც შენი შვილების თვალებში დედის გამო სიამაყეს ხედავ...

 

741
მოსამართლის ჩაქუჩი

შაქარაშვილის მკვლელობაში ბრალდებულების ადვოკატები დაცვის სტრატეგიაზე მუშაობენ

0
შაქარაშვილის დამამძიმებელ მდგომარეობაში ჯგუფურად განზრახ მკვლელობის ბრალი დღეს ხუთ ადამიანს წაუყენეს, ყველა მათგანი პატიმრობაშია

თბილისის, 11 აგვისტო – Sputnik. 19 წლის გიორგი შაქარაშვილის მკვლელობაში ბრალდებულების - ვასილ ჩიქოვანის, არჩილ გაგნიძის, ნიკოლოზ რევაზიშვილის და ორი არასრულწლოვანის ადვოკატები ელოდებიან კონკრეტულ მტკიცებულებებს, რომლებიც მათი დაცვის ქვეშ მყოფთა ბრალს დაადასტურებს.

სამშაბათს გენერალურმა პროკურატურამ შაქარაშვილის საქმეში გარღვევის შესახებ განაცხადა და ხუთ ფიგურანტს ბრალი წაუყენა. გამოძიების ვერსიით, ბრალდებულებმა შაქარაშვილი მდინარე არაგვის პირას მოიმწყვდიეს, სასტიკად სცემეს და ჯერ კიდევ ცოცხალი მდინარეში გადააგდეს. 19 წლის ბიჭის ცხედარი იქ ოთხდღიანი ძებნის შემდეგ იპოვეს.

„საქმე გამოიყო, მაგრამ არც მაშინ, არც ახლა არ ველოდებით, რომ საქმეში არსებობს ისეთი სამხილები, რომლებიც ბრალდებას გაამყარებს“, - განაცხადა ვასილ ჩიქოვანის ადვოკატმა არჩილ ბერიანიძემ.

მისი თქმით, ის გაეცნობა მასალებს და მათზე დაყრდნობით დაცვის ხაზს ააგებს.

„ჩემთვის პროკურატურის პოზიცია დაუსაბუთებულია“, - განუცხადა ბერიანიძემ ჟურნალისტებს.

მტკიცებულებების არარსებობის გამო გამამართლებელ განაჩენს ელოდება ასევე არჩილ გაგნიძის ადვოკატი ვასილ მამულაშვილიც.

„დარწმუნებული ვარ, რომ ჩემი დაცვის ქვეშ მყოფს სასამართლო გაამართლებს“, - განუცხადა მან ჟურნალისტებს.

ამასთან ადვოკატმა აღნიშნა, რომ დანაშაულს სასამართლოში დამტკიცება სჭირდება, პროკურატურამ კი მხოლოდ შაქარაშვილის ოჯახის და საზოგადოების ვერსია გაიმეორა.

„ადამიანი ბოროტმოქმედი მხოლოდ სასამართლოს განაჩენის შემდეგ ხდება“, - განაცხადა მამულაშვილმა.

მას არასრულწლოვანის ადვოკატი გიორგი გელხაურიც ეთანხმება.

„ბრალის დამძიმების მოლოდინი ჩვენ არ გვქონდა, არანაირი მტკიცებულებები არ არსებობდა იმის, რომ ბრალი დამძიმებულიყო. იმედია, რომ წარმოადგენენ კონკრეტულ მტკიცებულებებს“, - განუცხადა ჟურნალისტებს გელხაურმა.

იმ ხუთი პირის გარდა, რომელთა მიმართ სისხლისსამართლებრივი დევნა გიორგი შაქარაშვილის დამამძიმებელ გარემოებებში განზრახ მკვლელობის ბრალდებით დაიწყო, ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის, ასევე, ჯგუფურად თავისუფლების უკანონო აღკვეთის ფაქტებზე დაკავებულია 12 პირი, რომელთაც აღკვეთის ღონისძიების სახით შეფარდებული აქვთ პატიმრობა. მათ მიმართ წარდგენილი ბრალდება სასჯელის სახით თავისუფლების აღკვეთას ოთხიდან ათ წლამდე ითვალისწინებს, აღნიშნავენ პროკურატურაში.

სასამართლო პროცესი შაქარაშვილის საქმეზე: ექვსივე არასრულწლოვანი პატიმრობაში დარჩა >>

სასამართლო სხდომის თარიღი ჯერჯერობით უცნობია. თუმცა 18 აგვისტოს დაიწყება მოსმენები ჩხუბის ეპიზოდებზე ყველა არასრულწლოვანის მონაწილეობით.

 

0
თემები:
19 წლის გიორგი შაქარაშვილის მკვლელობის საქმე