გეგა ნიჟარაძე

ქართველი პროგრამისტი „Sony Playstation“-ის კომპანიაში და მისი ლონდონური ცხოვრება

1667
(განახლებულია 15:10 27.11.2019)
რუბრიკაში „ქართველები უცხოეთში“ ძალიან საინტერესო ახალგაზრდა კაცის, ქართველი პროგრამისტის, გეგა ნიჟარაძის ლონდონურ ცხოვრებას გაგაცნობთ.

ბავშვობაში როგორც ყველა, ისიც კომპიუტერით იყო გატაცებული, მაგრამ ბევრისგან განსხვავებით ეს გატაცება საყვარელ საქმედ და პროფესიად აქცია. 2004 წელს სასწავლებლად ბრიტანეთში ჩავიდა. თავიდან ლონდონის სანდერლენდის უნივერსიტეტის ტექნოლოგიისა და მენეჯმენტის სკოლის (STM / LSC.) ბიზნეს-ადმინისტრაციის მენეჯმენტზე სწავლობდა, შემდეგ სწავლა კომპიუტერული მეცნიერების ფაკულტეტზე გააგრძელა.

სწავლის შემდეგ ადრინდელი ოცნება აისრულა და გარკვეული პერიოდი „Facebook“-ში იმუშავა. ამჟამად კომპანია „Sony Playstation“-ის პროგრამისტია. მისი ნამუშევრები პრესტიჟულ უცხოურ ჟურნალებშია დაბეჭდილი.

გეგა ნიჟარაძის შემოქმედება
გეგა ნიჟარაძის შემოქმედება

- გეგა, უცხოეთში წასვლა თუ შედიოდა თქვენს გეგმებში?

- საზღვარგარეთ წასასვლელად სკოლიდანვე ვემზადებოდი, ამიტომ ინგლისურ ენას ბავშვობიდან, ექვსი წლიდან ვსწავლობდი. კომპიუტერთან მუშაობაც პატარაობიდან მაინტერესებს. მართალია ძირითადად კომპიუტერულ თამაშებს ვთამაშობდი, მაგრამ ამავდროულად სხვადასხვა პროგრამების გარჩევა და კომპიუტერული ქსელებიც მიტაცებდა. ყველაზე მეტად Photoshop-ში მუშაობა შემიყვარდა. ჩემი მომავალი საქმიანობაც ამან განაპირობა. სტუდენტური პერიოდი, ალბათ, როგორც იმ დროს ყველა სტუდენტმა, მეც ფინანსურ კრიზისში გავატარე. ვცილობდი, რომ სწავლის პარალელურად რაღაც სამსახურები მეშოვნა. ამიტომ ხან მიმტანად ვმუშაობდი რესტორანში, ხან ავეჯის გადაზიდვის სერვისში -მუშა ხელად, ხან კი ქუჩებში ფლაერებს ვარიგებდი. ვცდილობდი, რომ  ოჯახს ფინანსურად შევხიდებოდი და თუნდაც ჩემი კვების ან მგზავრობის ფული გადამეხადა.

- თინეიჯერი იყავი როდესაც ლონდონში ჩახვედით, ეს რისკიც იყო ალბათ?
- ლონდონში ჩემს ბიძაშვილთან ერთად ჩავედი. მე ვიყავი 17 წლის, ის კი 16-ის. ჩამოვედით უცხო გარემოში და ეს უზარმაზარი ქალაქი ამ ორ პატარა ბავშვს შემოგვეგება. პირველ დღეებში ერთი-ორჯერ დავიკარგეთ კიდეც. ეს რისკიც იყო, რადგან თვითონაც არ ვიცოდი როგორ გავართმევდი მარტო ცხოვრებას თავს. მე არ ვიყავი მდიდარი ბიჭუნა შეძლებული ოჯახიდან ლონდონში რომ მესწავლა, ამიტომ ჩემი იქ ჩასვლა მშობლებს დიდ ფასად დაუჯდათ, ბევრ რამეზე მოუწიათ უარის თქმა, მათ შორის უძრავ ქონებაზეც... მე რა თქმა უნდა ვგრძნობდი ამ დიდ პასუხისმგებლობას. შეიძლება ბავშვურად გამომივიდეს, მაგრამ  ოცნებად მქონდა, რომ წარმატებისთვის მიმეღწია, რომ ჩემს მშობლებს ჩემით ეამაყათ.

გეგა ნიჟარაძის შემოქმედება
გეგა ნიჟარაძის შემოქმედება

- დღეს როგორ იტყვით, რთულია უცხოეთში ცხოვრება?

 - როცა საზღვარგარეთ მცხოვრებ სტუდენტებზე ამბობენ: „იმას რა უჭირს, მაგარ ქვეყანაშია“- ძალიან ცუდ ტონად მიმაჩნია. ერთია როდესაც ფინანსურად გიჭირს და სამშობლოში ხარ, მეორე, როდესაც ფინანსურად გიჭირს და საზღვარგარეთ ხარ. სამშობლოში სადაც მშობელი, და, ძმა, მეგობარი, ნათესავი და ახლობელი გყავს, ასე თუ ისე იმედიანი ხარ. საზღვარგარეთ კი ფაქტის წინაშე დგები, რომ შენი ახლობელი ხალხი ზურგს ვერ გიმაგრებს, პირიქით - შენ უნდა იყო შენი მშობლების, დის, მეგობრების იმედი - ეს კი ძალიან რთულია...

- უკან დაბრუნების საკითხი თუ დამდგარა დღის წესრიგში?  

- როგორც ყველას, 2008 წელი ჩემს ოჯახსაც ფინანსურად ცუდად შეეხო. აი, მაშინ გაჩნდა ფიქრი იმაზე, რომ საქართველოში დავბრუნებულიყავი, რადგან თავს ზემოთ ძალა აღარ იყო. ეს კიდევ უფრო მიმძაფრებდა იმის შეგრძნებას, რომ ვერ გავამართლე და ის პასუხისმგებლობა რაც მეკისრა, ასე ვთქვათ, ბოლომდე ვერ შევასრულე. სწორედ იმ პერიოდში სტაჟიორად დავიწყე მუშაობა ვებ-პროგრამირების განხრით, სადაც დღეში £5 მიხდიდნენ. ჭამაზე- დღეში 1.5 ფუნტი მყოფნიდა. ამასთან მეგობრების ვალიც მქონდა გასასტუმრებელი და საგონებელში ვიყავი ჩავარდნილი. ამ ყველაფერთან ერთად, მახსოვს, რომ ზუსტად მაშინ გადაუხდელობის გამო ტელეფონიც ორმხრივად გამითიშეს. მოხდა ისე, რომ ჩემმა სტაჟიორობამ შედეგი გამოიღო და სხვა, შედარებით უკეთეს ადგილას დავიწყე სტუდენტური სამსახური კვლავ ვებ პროგრამირების განხრით, სადაც უფრო მეტი მქონდა ანაზღაურება. ვალებიც გავისტუმრე და ტელეფონიც ჩავრთე.

გეგა ნიჟარაძის შემოქმედება
გეგა ნიჟარაძის შემოქმედება

- რამდენად შეგძინათ იმ წლებმა გამოცდილება?
- გამოცდილების დაგროვება მომდევნო ორ წელს შევძელი. ცოდნაც კიდევ უფრო გავიღრმავე ამ სფეროში და 2011 წელს full time სამსახურიც ვიშოვე ერთ სააგენტოში, სადაც L’Oreal-ის საიტებზე ვმუშაობდი. შემდეგ კიდევ რამდენიმე სამსახური გამოვიცვალე, კიდევ უფრო ბევრი ვისწავლე, უფრო მეტი გამოცდილება დავაგროვე. ჩემი ერთ- ერთი (და ალბათ ძალიან ბევრი პროგრამისტის) ოცნება ავიხდინე და მოკლევადიან კონტრაქტზე “Facebook“-ში დავიწყე მუშაობა. ამის მერე გავაგრძელე კონტრაქტორობა და ამჟამად „Sony Playstation“-ში ვმუშაობ პროგრამისტად. თქვენთან საუბარში ახლა ძალიან ბევრი რამ გამახსენდა და ძველი დრო მომენატრა... ამჟამად ლონდონში ვცხოვრობ მეუღლესთან ერთად, რომელიც გრაფიკოს დიზაინერია და საკმაოდ წარმატებულად იწყებს ლონდონურ ცხოვრებას.  

- მოდი, ვახსენოთ ის ადამიანი, რომელმაც პირველმა გაგაცნოთ და შეგაყვარათ ეს ქალაქი...

- ინგლისის სამეფო კარის დიდი გულშემატკივარი, 55-ე სკოლის დირექტორი და გეოგრაფიის მასწავლებელი, გია ჭანტურია, რომელიც შარშან გარდაიცვალა, ჩემი ნათლიის ძმა იყო. მას ბავშვები ყოველ წელს, წელიწადში ორჯერ დაჰყავდა ლონდონში. გიას სასწავლო-შემეცნებითი პროგრამით, 1999 წლის ზაფხულში ლონდონში მეც წამოვედი. შეიძლება ითქვას, რომ ეს იყო ინგლისის ისტორიაში გასეირნება. მან ისე დეტალურად და საინტერესოდ აგვიხსნა და დაგვათვალიერებინა ყველაფერი, რომ ის დღეები სასიამოვნოდ და სამუდამოდ აღიბეჭდა ჩემს მეხსიერებაში. 2004 წელს როდესაც არჩევნის წინაშე ვიდექი: ან ლონდონში უნდა წამოვსულიყავი ან გერმანიაში, იმ შთაბეჭდილებების მერე აქ ბევრად უფრო შინაურად ვიგრძნობდი თავს. ამიტომ მისი მუდამ  მადლობელი ვიქნები...

გეგა ნიჟარაძე
გეგა ნიჟარაძე

- ვიცი, რომ გადაწყვიტეთ თქვენს სფეროში საკუთარი გამოცდილება ქართველებისთვის გაგეზიარებინათ, მაგრამ...
- დაახლოებით 2015 წელს ამეკვიატა აზრი, რომ საკუთარი ცოდნა და გამოცდილება ქართველი პროგრამისტებისთვის გამეზიარებინა. მინდოდა ამ სფეროს განვითარებაში ჩემი ძალიან მცირე წვლილი მაინც შემეტანა. ამიტომ YouTube-ზე ვიდეო გაკვეთილების ატვირთვა დავიწყე. სამწუხაროდ ამას არც ისე დიდი გამოხმაურება მოჰყვა, თუმცა დღეს მაინც ვცდილობ, რომ ამ საქმისთვის თავისუფალი დრო გამოვნახო. ჩემი Photoshop-ისადმი სიყვარულიც უშედეგო არ გამოდგა და როცა მუზა მომაწვება, ფოტო-მანიპულაციებს ვაკეთებ ხოლმე. გული მწყდება, რომ საქართველოში ეს სფერო არ არის ისე განვითარებული, როგორც უნდა იყოს, არადა ჩვენთან ძალიან ბევრი კარგი პროგრამისტია. ლონდონში რომ იტყვიან, ეს სფერო ყვავის.

-ამბობენ, მზიანი ქვეყნიდან ჩასულ ქართველებს ნისლიან ალბიონში, უმეტესად ღრუბლიანი და პირქუში ამინდი განწყობასთან დაკავშირებულ პრობლემებს უქმნისო. თქვენ შემთხვევაში თუ არის ასე?

- სიმართლე გითხრათ, ეს დიდად არ მიგრძვნია. ყოველთვის მიკვირდა რატომ ასოცირდება ლონდონი ცუდ და პირქუშ ამინდთან. აქ ამინდი არც თუ ისე წვიმიანი და მოღრუბლულია, როგორც მოიხსენიებენ. თუმცა ძალიან ცვალებადია, ამიტომ ამინდის პროგნოზის ნახვას აზრი თითქმის არ აქვს. გასული რამდენიმე წელი განსაკუთრებით შეცვლილია კლიმატი - ზაფხული დაახლოებით აპრილის ბოლო პერიოდში იწყება და აგვისტოს, ზოგჯერ სექტემბრის ბოლომდე გრძელდება. ლონდონის ახლანდელი ნისლი რა თქმა უნდა ვერ შეედრება მე-18 -ან მე-20-ე საუკუნისას, ძირითადად რატომაც უწოდებენ ნისლიან ალბიონს. თუმცა ზოგჯერ ზამთარში, დილით ძალიან ადრე, ან ღამე, ისეთი ნისლი ჩამოწვება ხოლმე, რომ თავი ჯეკი მფატრავის დროინდელ ლონდონში მგონია...

გეგა ნიჟარაძე
გეგა ნიჟარაძე სპორტდარბაზში

- გამოთქმა ინგლისური იუმორი თუ შეიგრძენით ასე, ახლო დისტანციაზე?

- ნამდვილი ბრიტანული იუმორის დიდი „ფანი“ ვარ. ისეთის, როგორიც გვხვდება მაგალითად Guy Ritchie-ს ან Edgar Wright-ის ფილმებში, ასევე Frank Oz-ის 2007 წლის ფილმში „Death at a Funeral“, ან ისეთ ბრიტანულ სკეტჩ-შოუებში, როგორიც არის -Big Train, Man Stroke Woman, The Wrong Mans და ასე შემდეგ. ის გამოირჩევა სარკაზმით, სატირით, შავი იუმორით და ზოგჯერ აბსოლუტური აბსურდით. ალბათ ეს უკანასკნელი Charlie Chaplin-მაც კარგად დაგვანახა. თუმცა ყოველდღიურ დიალოგებში ნამდვილად არის მომენტი, რასაც ჩვენ ინგლისურ ხუმრობას ვეძახით, როდესაც ვერ ვხვდებით რა ითქვა სასაცილო. ჩვენ ანეკდოტის მოყოლა ვიცით, აქ კი ეგრეთწოდებული “Knock Knock” ხუმრობები იციან. დღემდე ვერ შევძელი ამ ტიპის ხუმრობებზე ბუნებრივად გაცინება და მქონია შემთხვევები, როდესაც უხერხული სიტუაციის გამო ძალით მიცინია კიდეც...

-კითხვა, რომელსაც ალბათ ახლობლებიც გისვამენ: სამშობლოში თუ დაბრუნდებით?

-სამწუხაროდ ჩემი პროფესია საქართველოში ისეთი მოთხოვნადი არ არის და ალბათ კიდევ დიდხანს ვერ იქნება, როგორიც აქ. შესაბამისად ჩემი კარიერული წინსვლისა და განვითარებისთვის აქ ცხოვრება ბევრად უფრო მეტ შესაძლებლობას მთავაზობს. მიუხედავად ამისა, ჩემს სამშობლოს მაინც განსაკუთრებული ადგილი უჭირავს ჩემს ცხოვრებაში. სამსახურში, საქართველოზე პრეზენტაცია გავაკეთე. რამდენი  სამსახურიც გამოვიცვალე, თანამშრომლები ყველა მათგანიდან ქართულ რესტორანში დამყავდა. ჩემი პატარა სტატისტიკის თანახმად, ყველასათვის საყვარელი კერძი აჭარული ხაჭაპურია. ჩემს აქაურ მეგობრებს საქართველოში ყოველ წელს ვეპატიჟები ხოლმე.  სხვათაშორის, ორ მათგანს გაისად დავაგეგმინე კიდეც “საქართველოში გასეირნება”. თავად წელიწადში ოთხჯერ მაინც ვახერხებ ჩამოსვლას. დიდი შვებულება სამშობლოში დაბრუნების გარეშე ვერც წარმომიდგენია...

1667
თემები:
ქართველები უცხოეთში (99)
შორენა მიქიაშვილი აღსაზრდელებთან ერთად

სამი შვილის დედა, მისი მოქსოვილი თოჯინების თეატრი და „წყნარი სივრცე" პატარებისთვის

251
(განახლებულია 22:38 02.03.2021)
„პატარებისგან ბევრს ვსწავლობ და ბევრი რამ ოჯახშიც გადმოვიტანე“ – ეს შორენა მიქიაშვილია, თბილისის 123-ე საჯარო ბაგა-ბაღის აღმზრდელი.

შორენამ ორი პროფესია აითვისა – ხატვა და თოჯინების ქსოვა დამოუკიდებლად ისწავლა. როცა პატარების აღმზრდელად დაიწყო მუშაობა, უკვე სამი შვილის დედა იყო. დღეს თვლის, რომ ბაგა-ბაღის აღმზრდელობა მისი მოწოდებაა და ეს არაერთი საინტერესო ინციატივით დაადასტურა კიდეც...

შორენა მიქიაშვილი
შორენა მიქიაშვილი

- შორენა, სანამ ბავშვების გულის კარს შეაღებდით, თანაც ასე ლამაზად, რა გზა გაიარეთ?

- პროფესიით აღმოსავლეთმოცოდნე ვარ არაბული ენის განხრით, ასევე ფილოლოგი - ქართული ენის და ლიტერატურის მასწავლებელი. ოთხი წელი მუსიკალურ სასწავლებელშიც ვსწავლობდი ვოკალის ფაკულტეტზე. ცხრა წელი აფხაზეთის სახელმწიფო კაპელაში ვმღეროდი, ჩემი პირველი პროფესიით არასოდეს მიმუშავია.

შორენა მიქიაშვილი კოლეგასთან ერთად
შორენა მიქიაშვილი კოლეგასთან ერთად

- ბავშვობაში მხატვრობაზე ოცნებობდით, მაგრამ რატომ ვერ აისრულეთ ოცნება?

- ჩემი აუხდენელი ოცნებაა, რომ მხატვარი გავმხდარიყავი. ხატვა ბავშვობიდან მიყვარს, განსაკუთრებით პორტრეტის ხატვა მიზიდავს. შვიდი წლის ასაკში დავხატე ბაბუა, რომელიც ძალიან დავამსგავსე. საერთოდ, ხატვის ნიჭი გენეტიკურად გამომყვა დედის მხრიდან. ახლა ვთვლი, ბევრი რომ მეშრომა, საკუთარ თავს მხატვრობაში ვიპოვიდი და წარმატებული ვიქნებოდი. დაახლოებით ათი წლის ასაკში დედამ შემიყვანა სამხატვრო სკოლაში, სადაც გამოცდები უმაღლესი შეფასებით გავიარე, მაგრამ, სამწუხაროდ, უსახსრობის გამო ექვს თვეზე მეტხანს ვერ შევძელი, რომ სწავლა გამეგრძელებინა.

შორენა მიქიაშვილი ბავშვებთან ერთად
შორენა მიქიაშვილი ბავშვებთან ერთად

- ახლანდელ სამსახურში როგორ იპოვეთ საკუთარი თავი?

- რაც შეეხება ჩემს ახლანდელ სამსახურს, ვიტყოდი, რომ ეს მხოლოდ სამსახური არ არის. ჩემთვის ეს ყველაზე ფაქიზ და ღვთიურ არსებებთან ურთიერთობაა, რაც უდიდეს სიყვარულს და პასუხისმგებლობას მოითხოვს. ბავშვთან მიმართებაში ოდნავი შეცდომაც კი დაუშვებელია, ამიტომ როცა საქმე პატარებს ეხება, საშინლად მომთხოვნი ვარ...

შორენა მიქიაშვილი
შორენა მიქიაშვილი

- როგორ უფერადებს ბავშვებს ცხოვრებას მასწავლებელი, რომელსაც ხატვა უყვარს? 

- ვცდილობ, რომ ბავშვებისთვის ყოველი დღე სიხარულით სავსე იყოს, დღე არ გავა, რომ მინიმუმ ორი შემოქმედებითი აქტივობა არ მქონდეს. ბავშვებს სრულ შემოქმედებით თავისუფლებას ვაძლევ. ხატვას დიდი მნიშვნელობა აქვს, რადგან ისინი არა მარტო ხატავენ, არამედ ხატვის დროს გადმოსცემენ ემოციას, რასაც იმ მომენტში განიცდიან. მე ვხედავ, რომ მათთვის უფრო მნიშვნელოვანია ხატვის პროცესი, ვიდრე შედეგი. ამიტომ მეც ზუსტად ან განწყობით მივყვები ბოლომდე. მნიშვნელოვანია, რომ ბავშვებმა მეტი შეგრძნებები და ემოციები გამოიმუშაონ. ჩვენთან მოწყენა არასდროსაა. ხშირად ერთად ვცეკვავთ, რადგან ცეკვაც განტვირთვის ერთ-ერთი საშუალებაა, რაც ბავშვებს მეტ თავდაჯერებულობას და სიმხნევეს მატებს.

შორენა მიქიაშვილი
შორენა მიქიაშვილი

- ვიცი, რომ ბაღში ე.წ. „წყნარი სივრცე" გაქვთ, რას ნიშნავს ეს?

- ჯგუფში ბევრი რამ საკუთარი ხელით მაქვს გაკეთებული და ერთი მათგანი სწორედ „წყნარი სივრცეა". ესაა ხე, რომელიც კედელს მიჰყვება და რომლის ფოთლებიც ჭერიდან დაბლა ეშვება. ბუნებასთან ურთიერთობას ხომ სიმშვიდე მოაქვს. ჩვენი „წყნარი სივრცეც“ ბავშვებისთვის ამის შეხსენებაა. ასევე სხვადასხვა სახის წრეებისთვის მოვხატე წარწერები და ამან უდიდესი სიამოვნება მომანიჭა. ამ ყველაფერში ჩემთვის უსაყვარლესი ადამიანი შორენა წერეთელი მეხმარება. ის, რაც იმ გარემოში ხდება, ბევრისთვის წარმოუდგენელი და მიუღწეველია, მე კი, მიუხედავად სირთულეებისა, ეს შევძელი...

შორენა მიქიაშვილი
შორენა მიქიაშვილი

- საბავშვო ბაღში თოჯინების თეატრის შექმნის იდეა როგორ გაგიჩნდათ?

- დიახ, სახლში მუყაოს გამოყენებით გავაკეთე პატარა მინი-თოჯინების თეატრი და ბაღში მივიტანე. თოჯინების თეატრის შექმნის იდეამ კიდევ სხვა საკითხი დააყენა დღის წესრიგში და სხვა წამოწყებას შეუწყო ხელი. ეს არის ქსოვა. თეატრისთვის დამჭირდა თოჯინები და ნელ-ნელა, ნაბიჯ-ნაბიჯ დავიწყე ქსოვის ათვისება. მერე ჩემი მოქსოვილი პატარა თოჯინების საშუალებით დავიწყეთ მინი-სპექტაკლების დადგმა. დღესაც კი, ყოველდღე მე და ჩემი პატარები სულ სიახლის ძიებაში ვართ, რაც ბედნიერებას გვანიჭებს და სიცოცხლით გვავსებს. აქვე გეტყვით, რომ სათამაშოების ქსოვა დროთა განმავლობაში ჩემი ჰობი გახდა, პანდემიის დროს კი დამატებითი შემოსავლის წყაროც.

შორენა მიქიაშვილის მოქსოვილი თოჯინები
შორენა მიქიაშვილის მოქსოვილი თოჯინები

- აქვე ისიც უნდა ვთქვათ, რომ სამი შვილი გყავთ, თქვენმა პროფესიამ მათთან ურთიერთობაც გაგიადვილათ?

- მე 41 წლის ვარ და სამი შვილი მყავს – 11, 9 და 6 წლის არიან. პატარებისგან ბევრს ვსწავლობ და ბევრი რამ ოჯახშიც გადმოვიტანე. ახლა თამამად შეიძლება ვთქვა, რომ შვილებთან დამოკიდებულებას უკვე სულ სხვა თვალით ვუყურებ. ყველაფერი გაცილებით მიადვილდება და უფრო მაბედნიერებს.

შორენა მიქიაშვილი
შორენა მიქიაშვილი

- ხატვის სურვილი და ნიჭი თუ აქვთ?

- მიხარია, რომ ხატვის ნიჭი ჩემს შვილებსაც გამოჰყვათ. სამიდან ერთ-ერთი შესანიშნავად ხატავს. თავისებური ხედვა, ფანტაზია და ფერების აღქმის უნარი აქვს. მიხარია, რომ ისინი ცხოვრებაში ყველაფერს ემოციურად აღიქვამენ. მახსოვს, რომ ჩემმა უფროსმა ქალიშვილმა მარიამ სონგულიამ, როცა ცხრა წლის იყო, თავისუფალი თემაში ასეთი რამ დაწერა: „ზოგჯერ ადამიანი თავს სწირავს და სხვას სიცოცხლეს ჩუქნის. ხან როცა ადამიანს მანქანა ეჯახება, მეორე არ ტოვებს მას და გადაარჩენს. როცა დედები შვილებს აჩენენ, სამყაროს ხალხი ემატება და ესეც გმირობაა“. მიხარია, რომ დედის ამაგს უკვე აქედანვე ხედავს და ასე აფასებს.

შორენა მიქიაშვილი აღსაზრდელებთან ერთად
შორენა მიქიაშვილი აღსაზრდელებთან ერთად

- ვიცი, რომ პანდემიის დროს თქვენი აღსაზრდელები არ დაგიტოვებიათ ყურადღების გარეშე...

- მე ვხვდებოდი, რომ ბავშვებისთვის ბაღის დატოვება მძიმე იქნებოდა, სახლებში გამოკეტვა კი მათ ფსიქოემოციურ განვითარებაზე იმოქმედებდა. ამის გამო პანდემიის დროს გადავწყვიტე, რომ ინტერნეტში ბაღის ჯგუფი შემექმნა. ამ გვერდზე ზოგჯერ სახალისო ვიდეობს ვდებდი, ხან ზღაპრებს ვკითხულობდი, ხან ლექსებს, ხან რაიმე შემოქმედებით-გასართობ ვიზუალურ მასალას, რაც ბავშვებს ძალიან ახარებდა და მათგან სიკეთე პოზიტივის სახით ორმაგად მიბრუნდებოდა. როცა დღეს ამდენ თვალებგაბრწყინებულ პატარას ვხედავ, ბედნიერი ვარ. მათი ენერგია ჩემზე გადმოდის, შეუძლებელია, ეს ვერ იგრძნო და ამან არ შეგავსოს...

 

251
ხელით მოქარგული აქსესუარი

„დაქარგული“: ორსულობის დროს დაწყებული საქმე და ქარგვის სიყვარულით შთაგონებული აქსესუარები

178
„დაქარგული“ ნათია მიგრიაულის სტარტაპია, რომელიც მომხმარებლებს თემატურ, ნაქარგებიან აქსესუარებს სთავაზობს.

როგორია ახალბედა სტარტაპერის ისტორია და როგორ გაუმკლავდა ის ბრენდის შექმნის გამოწვევას, როგორ დაიმსახურა მომხმარებლების კეთილგანწყობა, ნდობა – ამ საკითხებზე ნათია თავად გვესაუბრა.

ნათია მიგრიაული
photo: courtesy of Natia Migriauli
ნათია მიგრიაული

- ჩემი პროფესია დაკავშირებული იყო და არის დიზაინთან და ხელოვნებასთან. დავამთავრე ტანსაცმლის დიზაინი და მოდელირება. დიზაინი ბავშვობიდანვე მიტაცებდა და ყოველთვის მიზნად მქონდა დავუფლებოდი ამ პროფესიას. ასევე ვხატავ და ძალიან მიყვარს სხვადასხვა ორნამენტებზე მუშაობა.

ხელით მოქარგული ჩანთა
photo: courtesy of Natia Migriauli
ხელით მოქარგული ჩანთა

- ქარგვა როდის შეისწავლეთ და რამდენად საინტერესო პროცესია ეს თქვენთვის?

- მიყვარს სიახლეების ძიება. ყველაფერი ლამაზი და ესთეტიური საინტერესოა ჩემთვის. პანდემიის პერიოდში, როცა ძალიან ბევრი თავისუფალი დრო მქონდა, დავინტერესდი ქარგვის ხელოვნებით და სურვილი გამიჩნდა შემესწავლა. ვუყურებდი სხვადასხვა ვიდეოებს იუთუბზე, ინსტაგრამზე და ინტერნეტის საშუალებით ვისწავლე ძალიან მალე.

ხელით მოქარგული ქუდი
photo: courtesy of Natia Migriauli
ხელით მოქარგული ქუდი

იმდენად მომწონდა ეს პროცესი, იმდენი სიმშვიდე და სიამოვნება ვიგრძენი ქარგვის დროს, რომ გადავწყვიტე   სხვადასხვა კომპოზიციები გადამეტანა და მომექარგა აქსესუარებზე. შემდეგ კი ერთ-ერთ ჯგუფში, რომელიც ხელოვნებასთან არის დაკავშირებული, გამოვაქვეყნე ჩემი ნამუშევრები. მსურდა გამეგო ხალხის აზრი, თუ როგორ შეაფასებდნენ თვითნასწავლი ხელოვანის ნამუშევრებს. მართლა არ მეგონა ასეთ დიდ მოწონებას თუ დაიმსახურებდა ჩემი ნამუშევრები. ძალიან თბილი და დადებითი კომენტარები მომდიოდა. პირად შეტყობინებებშიც ძალიან ბევრი მწერდა, თუ როგორ მოსწონდათ ნაქარგები და სურდათ ჩემი ნამუშევრების შეძენა.

ხელით მოქარგული წინდები
photo: courtesy of Natia Migriauli
ხელით მოქარგული წინდები

ასეთმა დაინტერესებამ რა თქმა უნდა დიდი სტიმული და გამბედაობა მომცა. სწორედ ამის შემდეგ გადავწყვიტე შემექმნა გვერდი „დაქარგული“ და ყველას ჰქონოდა ჩემი ნამუშევრების ნახვის და შეძენის შესაძლებლობა. იდეამ ნამდვილად გაამართლა და შეკვეთებიც საკმაოდ ბევრი მაქვს. მეც ვცდილობ ჩემს მომხმარებლებს იმედები არ გავუცრუო და მრავალფეროვანი არჩევანი შევთავაზო.

ამასთან, ყოველთვის მსურდა ისეთ საქმეს შევჭიდებოდი, რომლითაც სულ ოდნავ მაინც მივიღებდი მონაწილეობას ქართული პროდუქტისა და კულტურის პოპულარიზებაში.

ხელით მოქარგული ქუდი
photo: courtesy of Natia Migriauli
ხელით მოქარგული ქუდი

- რამდენად მოდური და მოთხოვნადია დღეს მოქარგული სამოსი და აქსესუარები?

- მოქარგული აქსესუარები და სამოსის დეტალები დღეს ძალიან მოდური და აქტუალურია. ქარგვამ და ხელნაკეთმა აქსესუარებმა მნიშვნელოვანი ადგილი დაიმკვიდრა ჩვენს საზოგადოებაში. მიხარია, რომ ადამიანები აფასებენ ხელით შესრულებულ ნამუშევრებს. ხელით  ქარგვა დიდ დროს და შრომას მოითხოვს, ამიტომ შესაბამისი დაფასება სჭირდება.

ხელით მოქარგული ქუდი
photo: courtesy of Natia Migriauli
ხელით მოქარგული ქუდი

- ქარგვის დროს, ფერებთან მიმართებაში თამამი ხართ?

- ფერები, კომპოზიცია,  ნამუშევრის სისუფთავე და ხარისხი არის ის, რაც უნდა შესთავაზო მომხმარებელს. ვცდილობ ჩემი ნამუშევრები მრავალფეროვანი, დახვეწილი და რაც მთავარია ხარისხიანი იყოს.  ერთმანეთს ვუხამებ ნაზ, სადა ფერებს, რადგან შეინარჩუნოს კომპოზიციამ ბუნებრივი სახე. რაც შეეხება  ძაფებს, ეს ერთ-ერთ მნიშვნელოვანი დეტალია ქარგვის დროს. აუცილებელია ძაფი იყოს ხარისხიანი,  რადგან გარეცხვის დროს არ დაკარგოს ფერი.  DMC-ეს ის ფირმაა, რომელი ძაფებითაც სრულდება ჩემს მიერ დაქარგული ნამუშევრები.

ხელით მოქარგული ქუდი
photo: courtesy of Natia Migriauli
ხელით მოქარგული ქუდი

- ორსულად ხართ. არ გიჭორთ ამ მდგომარეობაში მუშაობა?

- ამჟამად ვარ  რვა თვის ორსული. აქამდე საერთოდ არ მიჭირდა მუშაობა. ახალი წლის პერიოდში საკმაოდ გადატვირთული გრაფიკი მქონდა, ძალიან ბევრი შეკვეთა იყო და ღამის თენებაც კი მიწევდა. ძალიან სასიამოვნოა, როცა ყოველი შეტყობინება ბედნიერებით და მადლიერებით არის სავსე და ეს მაძლევს სტიმულს, ძალას, რომ ჩემი საქმე პირნათლად შევასრულო, ამ მდგომარეობაშიც კი. უკვე მომიწევს, რომ რაღაც პერიოდი შევწყვიტო შეკვეთების მიღება. ალბათ ერთი თვით  შევისვენებ  და შემდეგ ისევ დავბრუნდები ახალი იდეებით და სიახლეებით. მომავალში მინდა უფრო მრავალფეროვანი და საინტერესო ნამუშევრები შევთავაზო ჩემს მომხმარებლებს და ბევრ სიახლეს ვპირდები მათ.

 

178
საქართველოში ბაზრობები ამუშავდა

საქართველოში ფასების ზრდამ პროგნოზს გადააჭარბა: „საქსტატის“ ახალი მონაცემები

0
(განახლებულია 23:13 02.03.2021)
თებერვალში ფასები შემცირდა ტანსაცმელზე (3,4%) და კომუნალურ მომსახურებაზე (0,4%). ამავე დროს ფასები სურსათზე გაიზარდა 1,1%-ით, სასტუმროებისა და რესტორნების მომსახურებაზე - 3,7%-ით, ტრანსპორტზე - 2,5%-ით.

თბილისი, 2 მარტი – Sputnik. საქართველოში წლიურმა ინფლაციამ (2021 წლის თებერვალი – 2020 წლის თებერვალი) 3,6% შეადგინა – 3%-იანი მიზნობრივი მაჩვენებლის პირობებში, იუწყება საქართველოს სტატისტიკის ეროვნული სამსახური „საქსტატი“

2021 წლის თებერვალში, 2021 წლის იანვართან შედარებით, ინფლაციის დონემ 1,1% შეადგინა.

რუსული ხორბლის გაძვირება ქართველ მეწარმეებს ალტერნატივის ძებნას აიძულებს >>

„საქსტატის“ მონაცემებით, თებერვალში ფასები შემცირდა ტანსაცმელზე (3,4%) და კომუნალურ მომსახურებაზე (0,4%). ამავე დროს ფასები სურსათზე გაიზარდა 1,1%-ით, სასტუმროებისა და რესტორნების მომსახურებაზე - 3,7%-ით, ტრანსპორტზე - 2,5%-ით.

როგორ იცვლებოდა ინფლაციის დონე გასულ წელს

2019 წელს წლიურმა ინფლაციამ 7% შეადგინა. მის შესაკავებლად ეროვნულმა ბანკმა 2019 წლის სექტემბრიდან მონეტარული პოლიტიკის გამკაცრება დაიწყო. წლის ბოლომდე რეფინანსირების განაკვეთი 6,5%-დან 9%-მდე გაიზარდა, ბოლოს იგი 2019 წლის დეკემბერში გაიზარდა. 

2020 წლის დასაწყისიდან ინფლაციის დონემ შემცირება დაიწყო – იანვარსა და თებერვალში მან 6,4% შეადგინა, მარტში – 6,1%, სექტემბერში – 3,8% და ამ დონეზე სამი თვე შენარჩუნდა. საქართველოში კორონავირუსის გავრცელების პრევენციის მიზნით ხელისუფლებამ 21 მარტიდან კარანტინი და კომენდანტის საათი დააწესა. ეკონომიკური აქტივობის სტიმულირებისთვის ეროვნულმა ბანკმა აპრილიდან სამ ეტაპად 8%-მდე შეამცირა მონეტარული პოლიტიკის ძირითადი განაკვეთი.

2021 წლის თებერვალში, გასული წლის ანალოგიურ პერიოდთან შედარებით, ფასები შემცირდა კომუნალურ მომსახურებაზე (21,2%).

ამასთან, წლის განმავლობაში სურსათი 6,2%-ით გაძვირდა, მათ შორის, რძე, ყველი და კვერცხი – 6,4%-ით, მზესუმზირის ზეთი – 34,3%-ით, ყავა და ჩაი – 12,4%-ით, პურპროდუქტები – 8,7%-ით. ხილი კი გაიაფდა 4,8%-ით. კორონავირუსის გამო შექმნილი ვითარების გათვალისწინებით, 9,8%-ით გაიზარდა ჯანდაცვის სფეროს მომსახურების ფასებიც.

რა მოქმედებს საქართველოში ფასების დინამიკაზე

ბოლო ორ თვეში წლიური ინფლაციის დონე 3%-იან მიზნობრივ მაჩვენებელზე დაბალია. საქართველოს ეროვნული ბანკის (სებ-ის) ინფორმაციით, ეს დაკავშირებულია სახელმწიფოს მხრიდან კომუნალური ხარჯების სუბსიდირებასთან, რაც დროებით ხასიათს ატარებს. 

პანდემიის პერიოდში საქართველოს ხელისუფლებამ გადაწყვეტილება მიიღო მოქალაქეებისთვის ელექტროენერგიისა და ბუნებრივი აირის (შესაბამისად, 200 კვტ/სთ და 200 მ3) ხარჯების დაფარვის შესახებ.

„როგორც წესი, ცენტრალური ბანკები მსგავსი ტიპის ეგზოგენური ფაქტორების გამო ინფლაციის დროებით გადახრებზე არ რეაგირებენ და ინფლაციის საშუალოვადიანი პროგნოზით ხელმძღვანელობენ. მიმდინარე პროგნოზის თანახმად, 2021 წელს ინფლაცია საშუალოდ 4%-ის ფარგლებში შენარჩუნდება და შემდეგ მიზნობრივ მაჩვენებელს ეტაპობრივად დაუახლოვდება“, – აღნიშნავს ეროვნული ბანკი.

 სებ-ის მონაცემებით, საერთაშორისო სასაქონლო ბაზრებზე ფასების მნიშვნელოვან ზრდასთან ერთად, რაც განსაკუთრებით იანვარში გამოიკვეთა, ინფლაციაზე აღმავალი ზეწოლა შენარჩუნებულია პანდემიასთან დაკავშირებული შეზღუდვების გახანგრძლივების ფონზე წარმოების ხარჯების ზრდისა და ლარის გაუფასურებული კურსის გამო.

„ნომინალური ეფექტური გაცვლითი კურსის გაუფასურება ასუსტებს ერთობლივი მოთხოვნის დაღმავალ გავლენას პროგნოზირებულ ინფლაციაზე, ხოლო ეკონომიკის მაღალი დოლარიზაციის გამო გაცვლითი კურსის ცვლილების გადაცემა ინფლაციაზე საგრძნობია“, – ნათქვამია ეროვნული ბანკის განცხადებაში.

რეგულატორის ინფორმაციით, რჩება გაურკვევლობის მაღალი დონე როგორც გლობალური ეკონომიკური აქტივობის აღდგენის დინამიკის, ისე ადგილობრივი დაკრედიტების ზრდის ტემპის თვალსაზრისით.

0