გიორგი კობი

„კობიზმი“ მხატვრობაში - მხატვარი რომლის გამოფენაზეც სპეციალური სათვალით უნდა მიხვიდეთ

754
(განახლებულია 16:48 24.10.2019)

გიორგი კობი - პროფესიონალი მხატვარი, როგორც ყველა ხელოვანს მასაც აქვს სურვილი, რომ მხატვრობაში საკუთარ ხელწერას და სტილს მიაგნოს და ვფიქრობთ, მოახერხა კიდეც....

აქამდე ბევრ ჯგუფურ გამოფენაში აქვს მონაწილეობა მიღებული. ახლა ემზადება პერსონალური გამოფენისთვის, რომელზეც ქართველი საზოგადოების წინაშე პირველად წარადგენს საკუთარ ნახატებს.

ამ ფაქტში თითქოს განსაკუთრებული არაფერია, მაგრამ საქმე ისაა, რომ მისი ზოგიერთი ნახატის დასანახად სპეციალური სათვალე იქნება საჭირო. ამგვარ, „ტრიდე“ ნახატებს (და არა „ტრიდე“ სტილში შესრულებულს, რაც სრულიად განსხვავებული თემაა), მხატვარი გამოფენაზე პირველად წარადგენს.

გიორგი კობი
გიორგი კობი

- გიორგი, დღეს ბევრი პროფესიონალი და თვითნასწავლი მხატვარია და ყურადღება რომ მიიქციო, სხვებისგან განსხვავებული რამის შექმნაა საჭირო...

- განსხვავებულის შექმნა ბუნებრივად უნდა მოხდეს, ეს შინაგანად უნდა მოდიოდეს. თუკი ამ საქმისადმი დაინტერესება გაქვს, ყოველთვის გექნება მცდელობა სხვებისგან განსხვავებული შექმნა, ხელოვნებასა და საკუთარ ნამუშევრებში სიახლე შეიტანო. მე უფრო ფიგურატიული, შინაარსობრივი ნამუშევრები მომწონს. სილამაზეზე ნაკლებად მაქვს  გათვლა. თუმცა ისიც ბუნებრივია, ნამუშევარმა რომ მიგიზიდოს და თვალში მოხვდეს, იქ სტილი და სილამაზეც საჭიროა. მე შესაძლოა სულ სხვა შინაარსი ჩავდო ნახატში, მნახველმა კი მასში სულ სხვა რამ დაინახოს. ეს ბუნებრივია...

გიორგი კობის შემოქმედება
გიორგი კობის შემოქმედება

- აკადემიური განათლება გაქვთ მიღებული...

- დიახ, მე ჯერ ნიკოლაძის სასწავლებელი დავამთავრე, მერე სამხატვრო აკადემია და ბაკალავრიატი, ბოლოს მაგისტრატურა. გამოფენება ბევრი მქონდა, ოღონდ ძირითადად სხვა მხატვრებთან ერთად ჯგუფურში ვიღებდი მონაწილეობას. პერსონალურისგან ჯერ თავს ვიკავებ რადგან მინდა, რომ უფრო კარგი და განსხვავებული ნამუშევრები შევქმნა.

გიორგი კობის შემოქმედება
გიორგი კობის შემოქმედება

- ვიცი, რაღაც უჩვეულოს გვიმზადებთ...

- ყველაზე უჩვეულო ნახატის ხატვა დაახლოებით ნახევარი წლის წინ დავიწყე, ისეთ მიმდინარეობაში, როგორიცაა, „ტრიდე“. ოღონდ ეს არ არის ის, რაც უკვე ყველამ იცის. იმისთვის, რომ მსგავსი ნახატები დაინახოთ, საჭიროა სპეციალური სათვალით შეხედოთ. წითელი და ლურჯი შეფერილობის სათვალეს ვგულისხმობ. ისევე როგორც მსგავსი ფილმების ყურების დროს. ჯერჯერობით ამ სტილის მხოლოდ სამი ნამუშევარი მაქვს. 

გიორგი კობის შემოქმედება
გიორგი კობის შემოქმედება

- ანუ როცა დამთვალიერებელი მოვა თქვენს გამოფენაზე მას ამ სპეციალურ სათვალესაც დაახვედრებთ? 

- დიახ, მასეა. მსგავსი რამ ჩვენთან ჯერჯერობით არ ყოფილა, ეს პირველი იქნება. ინტერნეტშიც ყველგან ვეძებე და მსგავსი ტიპის ნამუშევარი ვერსად ვნახე. ასე რომ, ვთვლი, რომ ეს ნამდვილად ჩემია!

გიორგი კობის შემოქმედება
გიორგი კობის შემოქმედება

- მაინტერესებს, ასეთ ნამუშევარს იგივე სათვალის გამოყენებით დახატავთ?

- რათქმაუნდა, იგივე სათვალით ვხატავ, აბა, სხვაგვარად არ გამოვა...

- რადგან ამბობთ, რომ პირველი ხართ, შესაბამისად ამ მიმდინარეობას სახელიც თქვენ უნდა შეურჩიოთ, ასეა?

- ბევრს ვფიქრობ, მაგრამ ჯერჯერობით სახელი ვერ მოვუფიქრე.

გიორგი კობი
გიორგი კობი

- სხვათა შორის, მე გამიჩნდა იდეა: არსებობს მიმდინარეობა, რომელსაც კუბიზმი ჰქვია, რადგან კობიაშვილი ხართ გვარად, თქვენს შემთხვევაში შეგიძლიათ კობიზმი დაარქვათ...

-კობიზმი?- მართლა კარგი იდეაა, მშვენიერია! სხვათა შორის ეგ აზრი არც მომსვლია! -მადლობა. ეს სტილი მართლა სიახლეა და საინტერესოდ მიმაჩნია.  როცა ნახატები დაგროვდება, მერე ვაპირებ ისეთი პერსონალური გამოფენა გავმართო, სადაც მხოლოდ ამ სტილის ნამუშევრები იქნება.. ვფიქრობ, ასეთი ნახატებს მოუხდება უფრო დიდი სივრცე, გალერეა, სადაც ყველა დამთვალიერებელი სათვალეს მოირგებს და ისე იმოძრავებს.

გიორგი კობის შემოქმედება
გიორგი კობის შემოქმედება

- რეალურ სამყაროსაც  „ტრიდეთი“ აღიქვამთ?

-- არა, სამყაროს ისეთს აღვიქვამ როგორიცაა, მაგრამ ყოფილა შემთხვევა როდესაც დამინახავს რაიმე ობიექტი და მიფიქრია, რომ მისი „სამი დე“ ვერსია საინტერესოდ ჩაჯდებოდა ჩემს ნამუშევრებში.

გიორგი კობის შემოქმედება
გიორგი კობის შემოქმედება

- როგორია სამყარო, რომელსაც მხოლოდ თქვენი „სათვალით“ ხედავთ?

- ყველა ადამიანს თავისი სამყარო აქვს და ალბათ ამ სამყაროს ყველა ინდივიდი თვითონ ქმნის. ასევე მისივე შექმნილია ის კომფორტული ზონა, სადაც თავს ბედნიერად და მშვიდად აღიქვამს. პირადად ჩემთვის ასეთი კომფორტული ზონა იქაა, სადაც საყვარელ საქმეს ვაკეთებ...

       

 

754
მიზნისკენ სვლა

მამაკაცური და ქალური ლოგიკა, ანუ გაიცანი შენი მთავარი მტერი

463
(განახლებულია 21:14 03.07.2020)
სად გადის გზა წარმატებისა და წარუმატებლობისკენ? რა იცის და რა შეუძლია მოწიფულ პიროვნებას? სად ბუდობს ბედნიერება?

ცნობილი ფსიქოლოგი და ფსიქოთერაპევტი, მწერალი, მედიცინის მეცნიერებათა კანდიდატი მიხაილ ლიტვაკი – ამ და სხვა საკითხებზე ლაკონურ, ფასდაუდებელ პასუხებსა და რჩევებს გვაძლევს.

ვინც ეძებს, ვინც იპოვა და, ზოგადად, ყველა, ანუ ყველაფერი მარტივია>>

• მე არ ვიცი წარმატებისკენ მიმავალი გზები, მაგრამ ვიცი გზა წარუმატებლობისკენ – ესაა სურვილი, ყველას მოსწონდე

• არ არსებობს მამაკაცური ან ქალური ლოგიკა, არის მხოლოდ სწორად აზროვნების უნარი

• გინდა გაიცნო შენი მთავარი მტერი? ჩაიხედე სარკეში. გაუმკლავდი მას – დანარჩენი ყველა დაიფანტება 

• მეგობრებთან ურთიერთობა სასიამოვნოა, ხოლო მტრებთან – სასარგებლო

• ურთიერთობების დასრულებისა და სამუშაოდან გათავისუფლების მხოლოდ ერთადერთი საპატიო მიზეზი არსებობს – შეუძლებელია არსებულ ვითარებაში პიროვნული ზრდა.

• უმწიფარმა პიროვნებამ ხშირად იცის, მაგრამ არ შეუძლია. მოწიფულმა არა მხოლოდ იცის, არამედ შეუძლია კიდეც. ამიტომ უმწიფარი პიროვნება აკრიტიკებს, ხოლო მოწიფული – აკეთებს

• მხოლოდ სიხარული გაუზიარე მეგობრებსაცა და მტრებსაც. მეგობარს გაუხარდება, მტერს – ეწყინება

დედობა, როგორც „გმირობა“, შვილი – „სამახსოვროდ“...>>

• ბედნიერებას ნუ გაეკიდები, არამედ იპოვე ადგილი, სადაც ის ბუდობს. და ბედნიერება თავად გიპოვის. შემიძლია გიკარნახო, სადაა შენი ბედნიერება – ეს შენ თვითონ ხარ. ხოლო მისკენ გზა – ეს საკუთარი შესაძლებლობების მაქსიმალური განვითარებაა

• ბედნიერება – ეს სწორად ორგანიზებული საქმიანობის „თანმდევი პროდუქტია"

• თუ ვინმემ უმადურობა გისაყვედურა, მაშინვე გაარკვიე, რა ღირს მისი მომსახურება, გაუსწორე ანგარიში და ამ ადამიანთან საქმე აღარ დაიჭირო

• თუ გინდა, ვინმეს რამე დაუმტკიცო, ეს ნიშნავს, რომ იმისთვის ცხოვრობ, ვისთვისაც ამის დამტკიცება გინდა. თუ საკუთარი თავისთვის ცხოვრობ, მაშინ ვინმესთვის რამის დამტკიცების საჭიროება არ არსებობს

• ოცნებები ჩვენი უნარების ხმებია. მაგალითად, მე არ ვოცნებობ ოპერაში სიმღერაზე. არც ხმა მაქვს და არც სმენა. რომ ვოცნებობდე, შესაბამისად, ამ ოცნებას ჩემი უნარები უფრო გააღვივებდა. შესაბამისად, ვეცდებოდი ოპერაში მოხვედრას. უბრალოდ, საჭიროა დაფიქრდე, როგორ განახორციელო ეს ოცნება. აქ მთავარია არ აჩქარდე, მაშინ ძალიან სწრაფად გამოვა. კარგია, როცა ადამიანს შეუძლია საკუთარ თავზე თქვას „მარტო იმას ვაკეთებ, რომ ვცდილობ ჩემი ოცნებები განვახორციელო"

აირჩიეთ ბედნიერება და ბედნიერება აგირჩევთ თქვენ>>

• იმისთვის, რომ გაიგო, როგორ გეპყრობიან ადამიანები, მოუყევი მათ საკუთარ გეგმებსა და ოცნებებზე. ის, ვინც შენ მიმართ ფარულ სიძულვილს გრძნობს, ამას გააკრიტიკებს. ვისაც შენთვის კარგი უნდა, დაგეხმარება

• ადამიანთან ურთიერთობისას გახსოვდეს, რომ მას საკუთარ თავზე კარგი წარმოდგენა აქვს

• მიაღწიე წარმატებას და წყენა გაგივლის.

463
თემები:
სასარგებლო რჩევები
შორენა ქუმსიაშვილი

ემიგრანტი ქალის წერილები: „მინდა–არ მინდა, სხვა რა გზაა? ძლიერი უნდა ვიყო“

1271
(განახლებულია 19:17 03.07.2020)
ემიგრანტი ქალები – ჩვენი დროის ჩვეულებრივი გმირები, საკუთარ მხრებზე რომ გადაიტანეს ქვეყნის ყველაზე რთული პერიოდი. ასეა დღესაც...

სამშობლოდან შორს მყოფები, უცხოეთში პიროვნულ რეალიზებას მაინც ახერხებენ. როგორც ჩანს, მათ ოპტიმიზმს და სიცოცხლის სიყვარულს ყოფითი პრობლემები ვერაფერს აკლებს. ვინ იცის, იქნებ, ჩვენი გადარჩენის საიდუმლოც ამაშია...

ემიგრაციაში ისიც პრობლემების გამო მოხვდა. იტალიაში კარანტინში ყოფნის დროს რვეულის ფურცლებზე ცარცით ხატვა დაიწყო. ის რთული პერიოდი ამან გადაატანინა. ეს შორენა ქუმსიაშვილის ემიგრანტული ისტორიაა, რაზეც თავის ღია წერილში გვიამბობს...

შორენა ქუმსიაშვილი
შორენა ქუმსიაშვილი

ბავშვობიდან პრანჭია ვიყავი, თავად ვქმნიდი კაბის მოდელებს. ჩემს მეგობრებსაც მე ვურჩევდი სტილს, ვუხატავდი რა და როგორი სამოსი მოუხდებოდათ. თბილისში დავიბადე და ექვს წლამდე ბარათაშვილის ხიდთან ვცხოვრობდით. კარგად მახსოვს ის ქვაფენილი, აღმართი და ჩვენი ქუჩა... მერე გლდანში გადავედით და იქ ვსწავლობდი 39-ე სკოლაში. რას აღარ მოვკიდე ხელი, რომ აქეთ არ წამოვსულიყავი, მაგრამ არაფერი გამომივიდა.

ემიგრაციაში ვარ ცხრა წელი, ამ დროის განმავლობაში ორჯერ ვიყავი საქართველოში. უსაბუთო ვარ, მაგრამ გავრისკე და გამიმართლა, რომ უკან უპრობლემოდ დავბრუნდი. თავიდან მივდიოდი საბერძნეთში, სადაც დედა, დეიდა და ნათესავები მყავდა, მაგრამ შემდეგ ისე მოხდა, რომ ხელი არ შემეწყო და უცებ მივიღე გადაწყვეტილება, წამოვსულიყავი იტალიაში, სადაც ჩვენი ოჯახის ახლობელი დარეჯან ნადირაძე დამხვდა. შვილივით მიმიღო.

მეგობრებთან ერთად
მეგობრებთან ერთად

იტალიაში ძალიან კარგ ოჯახში მოვხვდი, რამდენიმე დღეში დაბადების დღე მქონდა და აღვნიშნეთ, ამ ოჯახის ყველა წევრიც მაშინ გავიცანი.

თავს ძლიერ ადამიანად ვთვლი და ამიტომ აქაურობასთან შეგუება არ გამჭირვებია. თუმცა, მინდა–არ მინდა, სხვა რა გზაა? – ძლიერი უნდა ვიყო. უცხოეთში ყველაზე მეტად შვილები მენატრება, ჩემი ორი ბიჭი, რომლებიც სიცოცხლეს მირჩევნია. მათ გამო ყველაფერს ავიტან და გავუმკლავდები. ღმერთს მადლობა მინდა ვუთხრა, რომ ასეთი კარგი  შვილები მარგუნა.

კარანტინის დროს ძალიან მინდოდა თავი რამით გამერთო. მინდოდა მეხატა, მაგრამ არ მქონდა სახატავი ფანქრები და ქაღალდი, ამიტომ რვეულის ფურცლებზე ცარცით ხატვა დავიწყე. ერთ საღამოს ერთმა კეთილმა გოგომ, ნათია კაკაბაძემ, რომელსაც მაშინ კარგად არც ვიცნობდი, დამირეკა და მითხრა, შენს სახლთან ვდგავარ და გამომხედეო. გარეთ გასულს ნათია ფერადი ფანქრებით დამხვდა – საჩუქრად მომიტანა. ვერ წარმოიდგენთ, ჩემთვის ეს რა სიხარული იყო, ნათიამ ხატვის სტიმული მომცა. მაშინ დავრწმუნდი, რომ ქვეყნად არიან ადამიანები, რომლებიც იზიარებენ ჩემს სიხარულს, ამიტომ არ მინდა, რომ მათ იმედები გავუცრუო.

შორენა ქუმსიაშვილი
შორენა ქუმსიაშვილი

ნათიას სოციალურ ქსელში აქვს შექმნილი ჯგუფი, სადაც დამატებული ჰყავს ადამიანები, რომლებმაც ნიჭი გამოავლინეს სხვადასხვა სფეროში. მეც ასე მოვხვდი ამ ჯგუფში. როდესაც ჩემს ლექსს ან ნახატს ვდებდი ჯგუფში, ისინი მოწონებას იმსახურებდა. ეს ჩემთვის სტიმული იყო იმისთვის, რომ მეხატა და მეწერა. მუზა ღამეც მწვევია, ავმდგარვარ და რაღაც დამიწერია, ეს უდიდეს სიამოვნებას მანიჭებს.

შორენა ქუმსიაშვილის შემოქმედება
შორენა ქუმსიაშვილის შემოქმედება

ვოცნებობ, რომ პრობლემები მოვაგვარო და დარჩენილი ცხოვრება ჩემს შვილებთან და საყვარელ ადამიანებთან ერთად გავატარო. მინდა საქართველოში მალე დავბრუნდე და მქონდეს სამსახური ჩემი პროფესიით. ძალიან მენატრება ჩემი დედიკო და საყვარელი ადამიანები, რომლებიც მძიმე პერიოდში მამხნევებდნენ.

შორენა ქუმსიაშვილის შემოქმედება
შორენა ქუმსიაშვილის შემოქმედება

ჩემი ნება რომ იყოს, არც ერთ დედას არ გავუშვებდი შვილებისგან შორს, რადგან მათ დედა ახლოს სჭირდებათ. ღმერთს ვთხოვ, ისე აეწყოს ცხოვრება, რომ არც ერთ დედას არასოდეს დასჭირდეს პრობლემების გამო ოჯახიდან შორს წასვლა...

1271
ირანის დროშა

ისრაელის ხელი: ირანის ბირთვულ ობიექტზე აფეთქება მოხდა - ვრცელდება ვიდეო

0
(განახლებულია 12:36 06.07.2020)
რამდენიმე დღის წინ ირანის ერთ-ერთ ბირთვულ ობიექტზე აფეთქება მოხდა, დაშავებულებისა და რადიოაქტიური ნივთიერებების გაჟონვის თაობაზე ინფორმაცია უცნობია

თბილისი, 6 ივლისი — Sputnik. ირანის ქალაქ ნათანზში მდებარე ბირთვულ ობიექტზე მომხდარ აფეთქებაში შესაძლოა ისრაელის ხელი ერიოს, იუწყება New York Times-ი წყაროებზე დაყრდნობით.  

მანამდე, 2 ივლისს, ირანის ატომური ენერგიის სააგენტომ განაცხადა, რომ ნათანზში ურანის გამამდიდრებელი ქარხნის ერთ-ერთ მშენებარე ობიექტზე ხანძარი მოხდა. დაშავებულებისა და რადიოაქტიური ნივთიერებების გავრცელების თაობაზე ინფორმაცია არ გავრცელებულა.

New York Times-ის სტატიის ავტორები აღნიშნავენ, რომ ხანძარი ასაფეთქებელი მოწყობილობის ამოქმედების შედეგად გაჩნდა.  იმავდროულად გამოცემა წერს, რომ ამის დამადასტურებელი პირდაპირი მტკიცებულებები არ არსებობს. მსგავს მსგავს მოსაზრებას იზიარებენ სხვა დასავლური მედიასაშუალებებიც.

გამოცემის წყაროს თქმით, ისრაელმა ობიექტის შიგნით მძლავრი ასაფეთქებელი მოწყობილობა შეიტანა.

იმ ფაქტს, რომ ბირთვულ ობიექტზე ინციდენტი ასაფეთქებელმა გამოიწვია, ადასტურებს ირანის ისლამური რევოლუციის გუშაგთა კორპუსის წარმომადგენელიც. 

ცნობილია, რომ აფეთქების შედეგად დაინგრა მიწისზედა ნაგებობის უმეტესი ნაწილი, სადაც ახალი ცენტრიფუგები იყო განთავსებული.

0
თემები:
მსოფლიო დღეს