გივიკო დიდია ბებიასთან ერთად

ნეტა შემეძლოს სიბერის შეჩერება: ბებია და შვილიშვილი, რომლებმაც ინტერნეტსივრცე აღაფრთოვანეს

25147
(განახლებულია 19:16 19.09.2019)
გივიკო და ნათკა დღეს ინტერნეტ-სივრცეში ყველაზე პოპულარული ბებია-შვილიშვილია. ვიდეოებს, რომლებსაც გივიკო საყვარელ ბებიას ყოველდღიურად უღებს და შემდეგ სოციალურ ქსელში ტვირთავს, ასი ათასობით ნახვა აქვს.

დამეთანხმებით, ბებია-ბაბუების შვილიშვილებისადმი სიყვარული განსაკუთრებული გრძნობაა. ეს სიყვარული იმდენად ძლიერია, რომ ბებია-ბაბუები მზად არიან ყველაფერი დათმონ შვილიშვილებისთვის. უანგაროდ გაიღონ მსხვერპლი მათი ბედნიერებისთვის, კეთილდღეობისთვის. ასეა ნათელა ბებოც, რომელსაც განსაკუთრებული სიყვარულით უყვარს შვილიშვილები. თუმცა ზოგჯერ  უბრაზდება კიდეც გივიკოს. ეს მაშინ, როცა ნათკა ბებოს ვიდეოებს ინტერნეტში „წერს“.

გივიკო დიდია ბებიასთან ერთად
გივიკო დიდია ბებიასთან ერთად

- სამწუხაროდ, „უდიპლომო სასიძო“ ვარ. ძალიან მინდოდა თეატრალურ უნივერსიტეტში სწავლის გაგრძელება. ოჯახური პირობებიდან გამომდინარე ვეღარ გავაგრძელე. ვმუშაობ კულტურის ცენტრში, როგორც მომღერალი და სხვადასხვა ღონისძიების წამყვანი. ასევე სხვადასხვა ქალაქებში მაქვს ივენთები. ვცხოვრობ გურიაში, ჩოხატაურის რაიონში. ეს არის ყველაფერი, რაც ჩემ შესახებ შემიძლია გითხრათ.

- თქვენი ბავშვობა გაიხსენეთ, სად გაიზარდეთ, როგორი ბავშვი იყავით?

- დავიბადე და გავიზარდე ჩოხატაურის რაიონში, აქ დავამთავრე სკოლა. აქტიური ბავშვი ვიყავი, ძალიან თბილი და მოსიყვარულე. სულ სიმართლის სადარაჯოზე ვიდექი.

გივიკო დიდიას ბებია
გივიკო დიდიას ბებია

- ბებია ბავშვობაშიც ისე ძლიერ გიყვარდათ, როგორც ახლა?

- კი, ბებია ყოველთვის ძალიან მიყვარდა. უბრალოდ მაშინ სოციალური ქსელი არ იყო, ამიტომ მხოლოდ მეზობლები და ახლობლები ხედავდნენ ჩვენ დიდ სიყვარულს. ძალიან ლამაზი გოგო იყო ჩემი ნათკა. ნეტავ შემეძლოს სიბერის შეჩერება, ნეტა შემეძლოს მისგან მისი დაცვა. ბევრი სირთულე გამოიარა, მაგრამ ხშირად მიფიქრია, შეიძლება თუ არა, რომ სიყვარული მთელი ცხოვრება გაგრძელდეს. ყოველთვის, როცა უარყოფით პასუხამდე მივდივარ, ბებია და ბაბუა მახსენდება. ბაბუა რამდენიმე წლის წინ გარდაიცვალა. არ ვიცი რამდენი წელი იცხოვრეს ერთად. ფაქტია, ძალიან ბევრი... არც ის ვიცი, რა პრობლემები ჰქონდათ, რაზე კამათობდნენ, უფიქრიათ თუ არა დაშორებაზე. ვიცი მარტო ის, რომ ბებია დღემდე ძალიან თბილად იხსენებს და ამბობს, რომ საუკეთესო ქმარი ჰყავდა და რაც ის გარდაიცვალა, თავადაც აღარ ცოცხლობს. ხშირად მიყვება ხოლმე, როგორ უყვარდა ბაბუას და როგორ ვერ უბედავდა თქმას. როგორი წყვილი იყო, როგორი ოჯახი შექმნეს და როგორ ზრდიდნენ შვილებს. მე ბაბუა თეთრი თმით და წვერით მახსოვს. უზომოდ თბილი ადამიანი იყო, ისეთი თბილი, რომ აგრესია ვერასოდეს ვერ გაგიჩნდებოდა. და კითხვაზე, შეიძლება თუ არა, რომ სიყვარული მთელი ცხოვრება გაგრძელდეს, ყოველთვის, როცა ბებიას თვალებში ბაბუის გახსენებაზე მომდგარ ცრემლს ვხედავ, ვხვდები, რომ შეიძლება.

- ხშირად გაძლევთ ბებია რჩევა-დარიგებებს?

- კი, საკმაოდ ხშირად.

- და რამდენად ხშირად ითვალისწინებთ?

- შეიძლება არ დაიჯეროთ, მაგრამ ყოველთვის ვითვალისწინებ. ერთხელ მითხრა, იმაზე ნერვიულობის ნაცვლად, რაც შესაძლოა არ მოხდეს, გიჯობს ის დააფასო და შეირგო, რაც ახლა გაგაჩნიაო და ყველა ის სიმდიდრე ჩამომითვალა, რაც მართლაც გამაჩნია: ჯანმრთელობა, ძმა, მშობლები, ნიჭი, მეგობრები.  

ჩემი დილა იწყება ყავასთან და ბებიასთან ერთად მისი რჩევებით, რომელიც არის იმედებით, სიყვარულით სავსე. ნამეტანი ბედნიერი ადამიანი ვარ. მსოფლიოში საუკეთესო ბებიას შვილიშვილი ვარ. გათენება მიხარია მასთან ერთად.

- ხშირად გიბრაზდებათ?

- მხოლოდ მაშინ, როცა გაიგებს, რომ ფეისბუქზე „დავწერე“.

- ახლა მასთან ერთად ცხოვრობთ?

- კი, მასთან ერთად ვცხოვრობ. მენანება და ძალიან მტკივა მის გარეშე გატარებული ყოველი დღე.

- თქვენ გარდა სხვა შვილიშვილი თუ ჰყავს და მათთან როგორი დამოკიდებულება აქვს?

- კი, ჩემ გარდა კიდევ სამი შვილიშვილი ჰყავს და მართლა ყველა ერთნაირად ვუყვარვართ.

- სოციალურ ქსელში ძალიან პოპულარული ბებია-შვილიშვილი ხართ. რამ განაპირობა თქვენი პოპულარობა და ბებია როგორ შეხვდა ამ ამბავს, უკითხავთ ხოლმე კომენტარებს?

- არ ველოდი ამხელა სითბოს, სიყვარულს, ამდენ დადებით ემოციას. ძალიან დიდი მადლობა ყველას. გაუცნობლად მეძვირფასება ყველა ის ადამიანი, ვისაც ჩემთვის ერთი თბილი სიტყვა ემეტება. 2015 წლიდან დღემდე უფრო და უფრო მეტი ადამიანი მათბობს და მახარებს. რაც შეეხება ნათკას, მიხარია, რომ ზუსტად დავანახე ხალხს ჩვენი სიყვარული და მისი საოცარი ადამიანობა. უფრო მეტად ბედნიერი ვარ, რომ ჩემზე მეტად უყვართ და ელოდებიან.

- არაჩვეულებრივად მღერით. თქვენი ნიჭის შესახებაც მოგვიყევით. სიმღერას რა ადგილი უკავია თქვენ ცხოვრებაში, რამდენი წლიდან მღერით და ახლა სად მოღვაწეობთ?

- დიდი მადლობა, მიხარია ეს შეფასება. პატარა ასაკიდან ვმღერი. სიმღერა ჩემი სულის ნაწილია, ძალიან მეხმარება, განსაკუთრებით მაშინ, როცა მტკივა, როცა დეპრესიას ვებრძვი. ახლა დროებით ვისვენებ, რადგან ეს დრო ყველაზე ძვირფასია და ნათკას სჭირდება.

- როცა ბებია თქვენს სიმღერას უსმენს, ალბათ ძალიან ამაყობს...

- ამაყობს და ძალიან ბედნიერია. დასტურად ვიდეოც შემიძლია გამოგიგზავნოთ...

 

25147
ეკა კობახიძე

ერთ დღეში შეცვლილი ცხოვრება სილამაზის კონკურსში გამარჯვება და მიუსაფარ ცხოველებზე ზრუნვა

125
(განახლებულია 19:40 28.05.2020)
90-იან წლებში ტელევიზიის „მეორე არხის“ ერთ-ერთი ცნობილი სახე იყო. თუმცა მანამდე თბილისმა ეკა კობახიძე გაიცნო სილამაზის კონკურსიდან, რომელსაც მომავალი კინოვარსკვლავები უნდა გამოევლინა.

კონკურსი იმ დროის გაყინულ ქალაქში თავისებურ გამონათებად იქცა. კონკურსის მონაწილეებს არც ვიზაჟისტები და სტილისტები ემსახურებოდნენ და არც მოდური დიზაინერის კაბები ეცვათ. თუმცა 18 წლის გოგოს ბუნებრივმა სილამაზემ და საკონკურსო დავალებების საინტერესოდ შესრულებამ მაშინვე მიიქცია მაშინდელი ინოვაციური ტელეარხის ხელმძღვანელების ყურადღება და მალე სატელევიზიო სივრცეში გადაინაცვლა.

ტელევიზიამ სრულიად შეცვალა მისი ცხოვრება და შემოქმედებით სამყაროში დაასახლა. მალე 90-იანი წლების ცნობილი ტელეგადაცემა „სინემას“ წამყვანი გახდა. მოგვიანებით ბედი კინოშიც სცადა. ფილმმა „სუსა“, რომელშიც ერთ-ერთ მთავარ როლს ასრულებს, გრან-პრი ბევრ საერთაშორისო ფესტივალზე მიიღო, ნაჩვენები იყო ბერლინალესა და როტერდამის ფესტივალებზე.

დღეს ჯანდაცვის სამინისტროს საყოველთაო დაზღვევის სერვის-ცენტრში მუშაობს. სამი შვილის დედას ქალაქში სხვა კუთხით იცნობენ – როგორც მიუსაფარი ცხოველების ერთგულ დამცველსა და მფარველს, რომელმაც ოჯახში რვა ოთხფეხა მეგობარი შეიფარა.

ეკა კობახიძე
ეკა კობახიძე

- ეკა, თავიდან დავიწყოთ: რას გაიხსენებს ყოფილი „მის თბილისი“ სილამაზის კონკურსის შესახებ და, საერთოდ, იმ დროიდან?

- ეს იყო 1993 წელს, როცა თბილისში გამოცხადდა კონკურსი „მომავალი კინოვარსკვლავები – „ბემონი“. იდეა, რომ მასში მიმეღო მონაწილეობა, ჩემმა ოჯახმა და მეგობრებმა მომაწოდეს. გავედი კასტინგზე და კონკურსის ფინალში მოვხვდი. ეს ის დრო იყო, როცა არ ვიყავით განებივრებული არც სალონებით და არც დიზაინერების მიერ შექმნილი კაბებით. საკუთარ თავზე თავად ვზრუნავდი. კონკურსის ფინალი გრიბოედოვის სახელობის გაყინულ თეატრში ჩატარდა. აი, მაშინ პროფესიონალები მოიწვიეს სილამაზის სალონიდან „ოცნება“, ხოლო მაკიაჟი ანუკა მურვანიძემ გამიკეთა. ეს იყო ძალიან ემოციური საღამო.

ეკა კობახიძე (მარჯვნივ) სილამაზის კონკურსზე
ეკა კობახიძე (მარჯვნივ) სილამაზის კონკურსზე

- საფინალო დავალება რა გქონდათ?

- კონკურსანტებს მოგვცეს დავალება – როგორ მივიდოდით რეჟისორთან გადაღების პირველ დღეს. ყველაზე მაღალი ქულა ამ დავალებისთვის მე ავიღე. დარწმუნებული ვიყავი, რომ სამეულში აუცილებლად მოვხვდებოდი. ეს იყო ერთ-ერთი საუკეთესო დღე ჩემ ცხოვრებაში. ბედნიერი ვიყავი, როცა მამა სცენაზე ამოვიდა და ხელში ამიყვანა. მეორე დღეს უკვე სხვა რეალობაში გავიღვიძე. ჩემი სამეგობრო ამაყობდა, ქუჩაში ყველა მილოცავდა. მიუხედავად ცდუნებისა, პოპულარობას ისე ვგრძნობდი, როგორც პასუხისმგებლობას. როცა პირველად ავტოგრაფი მთხოვეს, უფრო გამიკვირდა, ვიდრე მესიამოვნა, მაგრამ მეორედ უკვე თავდაჯერებული ვიყავი.

სტატია ეკა კობახიძეზე მაშინდელ პრესაში
სტატია ეკა კობახიძეზე მაშინდელ პრესაში

- ტელევიზიაში სილამაზის კონკურსის შემდეგ მოხვდით...

- დიახ, კონკურსის სპონსორებს შორის ტელეკომპანია იყო. მისმა მთავარმა რედაქტორმა, ბატონმა ზურაბ აბაშიძემ მიმიწვია გადაცემაში „სინემა“ წამყვანად და ჟურნალისტად. ეს იყო ჩემი პირველი სამუშაო გამოცდილება. ამ პერიოდმა ძალიან დიდი გავლენა იქონია ჩემ პიროვნულ განვითარებაზე. პროფესიული ურთიერთობა მქონდა ცნობილ მსახიობებთან, რეჟისორებთან და კინოკრიტიკოსებთან, ეს იყო ზღაპრული სამყარო. იმ პერიოდში „მეორე არხი“ და კონკრეტულად ეს გადაცემა ახალი სიტყვა იყო ტელევიზიაში. მეამაყება, რომ ვმუშაობდი პროფესიონალებთან ზურაბ აბაშიძესთან, ზაზა დარასელთან, მანანა ნაცვლიშვილთან და კიდევ ბევრ ღირსეულ ადამიანთან.

ეკა კობახიძე
ეკა კობახიძე

- კინოში როგორ აღმოჩნდით?

- 2010 წელს, როდესაც ტელეკომპანია „იმედზე“ ვმუშაობდი, ჩემი ფოტო სააგენტოებში იყო. სწორედ იქ ნახა მანანა ორბელიანმა, რომელიც კასტინგისთვის დამიკავშირდა. ფილმის რეჟისორი რუსუდან პირველი გახლავთ. მოკლედ, გავიარე კასტინგი და მთავარ როლზე დამამტკიცეს. ასე მოვხვდი დიდ კინოში. ფილმს „სუსა“ ჰქვია და ცხოვრების დრამაა ერთ უბედურ ქალზე, რომელიც ქმრის ჩამოსვლას ელოდება და არყის საამქროში შვილთან ერთად მუშაობს. ის პერიოდი ჩემთვის გამოცდასავით იყო.

- დღეს სამი შვილის დედა ხართ, თუ იციან თქვენმა შვილებმა ის, რაც მოგვიყევით?

- ჩემმა შვილებმა ზოგადად იციან, რადგან ამ თემას აქტიურად არ განვიხილავ, თანაც ეს ყველაფერი დიდი ხნის წინ იყო. ოჯახმა უფრო მეტი პასუხისმგებლობა მოიტანა, თუმცა ინტერესები არ შეუცვლია.

ფილმში სუსა
ფილმში "სუსა"

- დღეს მიუსაფარ ოთხფეხა მეგობრებზე ზრუნავთ და რვა ძაღლი შეიფარეთ ოჯახში, როგორ მიიღეთ ეს გადაწყვეტილება?

- ოთხფეხა მეგობრებზე ყოველთვის ვზრუნავდი. არ მახსოვს პერიოდი, რომ ოჯახში ძაღლი არ გვყოლოდა. ქუჩა სავსეა სისასტიკით, განსაკუთრებით დაუცველი და მიუსაფარი ცხოველების მიმართ არიან დაუნდობლები. ყველა ძაღლი, რომელიც ჩემს სახლშია, ადამიანური სისასტიკის მსხვერპლია – ზოგი გამოგდებულია სიბერის გამო, ზოგი კი, პირდაპირი მნიშვნელობით, ნაწამები. გვერდს ვერ ავუვლიდი მათ და ღია ცის ქვეშ ვერ მივატოვებდი ბედის ანაბარად. გადაწყვეტილებას თავისთავად ვიღებ, დაუფიქრებლად და ემოციურად, ისინი უბრალოდ მომყავს სახლში. მათთან თანაცხოვრება რთული არ არის, როცა ოჯახი მხარს გიჭერს.

ეკა კობახიძე
ეკა კობახიძე

- არ გიჭირთ მათი მოვლა?

- რა თქმა უნდა, რთულია მათი მოვლა, უფრო სწორად, დამღლელია. ეს არის ტიტანური შრომა იმის გათვალისწინებით, რომ ჩემი დღე დილის ექვს საათზე იწყება – ძაღლების ქუჩაში გაყვანა რომ მოვასწრო სამსახურამდე. სახლში სივიწროვის მიუხედავად ყველას თავისი კუთხე აქვს და მეგობრულად ვცხოვრობთ. კიდევ დავამატებდი იმას, რომ მყავს ერთი კატა და თუთიყუში, რომელიც ჩემმა კატამ პირით მომიყვანა.

- ეს პირველი შემთხვევა არ არის, როცა ლამაზი ქალბატონი მიუსაფარ ძაღლებს მფარველად ევლინება, ბრიჯიტ ბარდოს მაგალითი ხომ არ გახდა თქვენთვის მისაბაძი?

- ბრიჯიტ ბარდოს ცხოვრება და ცხოველებზე ზრუნვა ყოველთვის მისაბაძია. სამწუხაროდ, მე არ მაქვს მისი მსგავსი შესაძლებლობები. ჩემი ოცნებაა მქონდეს მიწის ნაკვეთი, სადაც დიდ თავშესაფარს მოვაწყობდი. აუცილებელია გიყვარდეს ის, რასაც აკეთებ, სხვაგვარად არაფერი გამოვა. ძალიან ხშირად უსიამოვნებები მაქვს და ეს ნებისმიერ ცხოველთა დამცველს კარგად ესმის, მაგრამ ვერანაირი პროტესტი ვერ მათქმევინებს უარს იმაზე, რასაც ვაკეთებ. სახლში შეფარებული ძაღლების გარდა, ყოველდღიურად ჩემ საცხოვრებელ სახლთან მიმდებარე ქუჩებზე მობინადრე მიუსაფარ ცხოველებსაც ვკვებავ და ვუვლი.

ეკა კობახიძე
ეკა კობახიძე

- ამბობენ, ცხოველებისადმი სიყვარული და სიკეთე ერთი ფესვიდან აღმოცენებული გრძნობააო...

- ჩემი აზრით, სიკეთე სუბიექტური ცნებაა, მაგრამ მთავარი ის არის, რომ შენი ქმედებით ზიანი არ მიაყენო სხვას, ნებისმიერ სულიერს. სიკეთე სულის მოთხოვნილებაა და ადამიანური თვისებაა. თუ გვაქვს იმის ამბიცია, რომ ადამიანი გვქვია, მაშინ გულმოწყალება უნდა გამოვიჩინოთ დაუცველი არსებების მიმართ. ნუ ვატკენთ მათ, ნუ დავჩაგრავთ და, იქნებ, შევიყვაროთ კიდეც...

125
სიყვარული

ნამდვილ სიყვარულს წერტილები არა აქვს...

56
(განახლებულია 19:22 28.05.2020)
ადამიანები ძალიან ბევრ რამეს უკავშირებენ სექსს მაშინ, როცა ნამდვილი სიახლოვე უფრო ღრმაა. ის ალერსიან შეხებაში, მშვიდ მზერასა და გვერდით თანაბარ სუნთქვაშია...

აზრების ფოიერვერკი“ წარმოგიდგენთ ელჩინ საფარლის გამონათქვამებს. 

ელჩინ საფარლი (აზერბ. Elçin Səfərli. 1984) — თანამედროვე აზერბაიჯანელი მწერალი, ჟურნალისტია. მას აღმოსავლეთის ყველაზე გულში ჩამწვდომ მწერალს უწოდებენ. დიდხანს ცხოვრობდა სტამბულში, რამაც მის შემოქმედებაზე გავლენა მოახდინა.

Писатель Эльчин Сафарли
Anastasia Guz
ელჩინ საფარლი

მისი ცნობილი ნაწარმოებებია: „ბოსფორის ტკბილი მარილი“, „მიამბე ზღვაზე“, „როდესაც დავბრუნდები, სახლში დამხვდი“, „შინ მინდა“ და სხვ.

• გაუშვა — არ ნიშნავს, რომ დანებდი. ხშირად ეს ერთადერთი სწორი გადაწყვეტილებაა, გამარჯვება ვითარებებზე.

• ნამდვილ სიყვარულს წერტილები არა აქვს. შეიძლება დაშორდე, იჩხუბო, იმედი გაგიცრუვდეს – ყველაფერია შესაძლებელი. მაგრამ რა მიზეზებიც არ უნდა იყოს, ნამდვილი სიყვარული მაინც ცოცხლობს გულში… ამ სიყვარულს ვერაფერს უხერხებ და უბრალოდ შენში ინახავ.

• ამ განშორებას მიზეზი არ ჰქონია. მათი სიყვარული, უბრალოდ, ცხოვრებას შეეჯახა.

• მთავარია, ლოდინი ჩვენი ცხოვრების მხოლოდ მონაკვეთი იყოს და არა მთელი ცხოვრება.

ყველაზე ხანმოკლე მარადიულობა, ანუ ვის სჭირდება ბანალური „მიყვარხარ"?>>

• ადამიანები ძალიან ბევრ რამეს უკავშირებენ სექსს მაშინ, როცა ნამდვილი სიახლოვე უფრო ღრმაა. ის ალერსიან შეხებაში, მშვიდ მზერასა და გვერდით თანაბარ სუნთქვაშია.

• მაინც არაფერს ვნანობ – თუნდაც იმიტომ, რომ ეს უაზრობაა.

• განა არ იცი, რომ ყველაფერი უკეთესობისთვის კეთდება? უბრალოდ, ძალიან ნელა. უნდა განაგრძო სიარული და თან არ უნდა ათრიო წარსულით გამოტენილი ჩემოდანი. ხელები არ გეყოფა და ნახევარ გზაზე გამოგეცლება არაქათი.

• ცხოვრება პატარა საბანივითაა: ზევით აწევ – ფეხები გეყინება, ქვევით დაწევ – თავი. ცხოვრება მას შეუძლია, ვისაც მოკუნტულს შეუძლია გადაბრუნება.

• ხანდახან საჭიროა, რამე არ იცოდე, ან რამე გამოტოვო, რომ ბედნიერება შეინარჩუნო.

• ქალი ყველაფერს პატიობს, მაგრამ არასდროს არაფერს ივიწყებს.

• ჩვენ, დიდი ქალაქების ქალები ზედმეტად მამაკაცები გავხდით. ჩვენგან განვდევნეთ სურვილი, ვენდოთ საწინააღმდეგო სქესს, ვაჩვენოთ სისუსტე, რომელიც ბუნებამ გვიბოძა, როგორც არ უნდა ვიკამათოთ ამაზე. გვეშინია გამოვუტყდეთ საკუთარ თავს, როგორ გვინდა ხანდახან ვინმეს ჩავეხუტოთ და მის ღაწვებში ჩავრგოთ ცხვირი. ცხოვრება ხომ მშვენიერია, როცა ვიღაცის ლოყას შენი ცხვირი სჭირდება.

მხოლოდ ერთი ცოდვა არსებობს – ქურდობა, ყველა სხვა ცოდვა ქურდობის ვარიაციაა...>>

• ბედნიერება ისაა, როცა არაფერი გჭირდება მოცემულ მომენტში გარდა იმისა, რაც უკვე გაქვს.

• პასუხად დუმილი ყველაზე მტკივნეულია ქალისთვის. ჯობს მან თქვას, რომ აღარ უყვარს. ჯობს საწყენი რამ უთხრას, დაიყვიროს: „დავიღალე შენი სიყვარულით!“ ყველაფერი, გარდა დუმილისა. ეს კლავს.

• ოცნებას ვარგისიანობის ვადა არა აქვს.

• ბედნიერება – ეს ხასიათის თვისებაა. ზოგს ხასიათში აქვს, მას მუდამ ელოდოს, ზოგს – მუდამ ეძებოს, ზოგს – ყველგან იპოვოს.

• მიყვარს ღამით ცხოვრება. ღამე თავისუფლების სხვა ხარისხია…

• ყველა ქალი თავის ანარეკლს მამაკაცის თვალებში ეძებს. და ის, ვინც იტყვის, რომ თავისი დანიშნულება იპოვა სამსახურში, ბავშვებში, ფსიქოლოგიაში ან ქსოვაში – გვატყუებს, ან თავს იტყუებს. ასე დააწესა შემოქმედმა, რომ ქალი იბადება და გრძელდება უსასრულოდ – მამაკაცის მკლავებში.

• ძალიან ხშირად უთქვამთ ჩემთვის „გაუფრთხილდი თავს“, მაგრამ არავის – „მე ვიზრუნებ შენზე“.

• იცი, რა არის ცხოვრება? ცხოვრება – ეს სიყვარულია.

რატომ შეჭამა ადამმა ვაშლი...>>

• არ არის აუცილებელი მთელი სიყვარული ამოთქვა – რაღაც შენში შეინახე, სათუთად. სიტყვებით ნუ გამოხატავ. ჯობს – ქცევით, შეხებით, ალერსით, კოცნით. ერთი ვნებიანი კოცნით ნებისმიერ სიტყვაზე მეტი შეიძლება თქვა. ერთი ნაზი შეხება ხანდახან დაუჯერებელს დაგაჯერებს. ერთი ცეცხლოვანი ალერსი აუხსნელს ხსნის… სიყვარულში არ არის თეორემები, განტოლებები, სიყვარულს სწავლა არ სჭირდება, უბრალოდ, შიგნიდან უნდა იგრძნო. სადღაც გულის არეში…

• შეიცვალე ფოთლები, მაგრამ ფესვები შეინარჩუნე.

• ბავშვები ყოველთვის ნამდვილი რჩებიან – ჩვენგან, უფროსებისგან განსხვავებით, რომლებსაც ნიღბების მორგება გვიყვარს…

• სიყვარულს ოქროს შუალედი არა აქვს: ის ან ყვავის, ან ჭკნება. როცა სიყვარულს განსაცდელი აქვს, ის არ ჭკნება. კვლავ ყვავის, მაგრამ არომატს კარგავს. მისი დაბრუნება შეიძლება. დროთა განმავლობაში…

• არაფერს ვიღებთ უსასყიდლოდ. ღიმილისთვის ცრემლით ვიხდით. სიხარულისთვის – სევდით. სიტკბოსთვის – სიმწრით. რწმენისთვის – სასოწარკვეთით. სიყვარულისთვის – მარტოობით…

• მთისკენ მრავალი გზა მიდის, ხოლო ხედი მთიდან მაინც ერთნაირია.

• აღარ დავდივარ სხვების რჩევების კომპასით…

ზოგჯერ რასაც კრძალავენ, სწორედ იგი გვჭირდება...>>

• ადამიანები, რომლებიც ყველაფერზე მსჯელობენ, როგორც წესი, საკუთარ ცხოვრებაში ვერ გარკვეულან…

• რაც არ უნდა ძლიერი იყოს ქალი, მას სისუსტის უფლება აქვს…

• ჩემი ცხოვრება სქელ ფოტოალბომს დაემსგავსა შავ-თეთრი ფოტოებით. ყველა ერთნაირია, მოსაწყენი და ერთფეროვანი…

• ყველაზე მძიმე ჭრილობებს ერთმანეთს ენით ვაყენებთ.

56
თემები:
აზრების ფოიერვერკი: ცნობილი ადამიანების ბრძნული გამონათქვამები
სომხეთში კარანტინი გახანგრძლივდა

საქართველოს მზად არის დაეხმაროს სომხეთს კორონავირუსთან ბრძოლაში

0
საქართველოს და სომხეთს ჯანდაცვის სფეროში თანამშრომლობის კარგი გამოცდილება გააჩნიათ, განაცხადა საქართველოს მთავარმა ეპიდემიოლოგმა

თბილისი, 28 მაისი — Sputnik. თუ სომხეთის დაავადებათა კონტროლის ცენტრის წარმომადგენლები ქართველ კოლეგებს დახმარებისთვის მიმართავენ, ისინი მას მიიღებენ, განაცხადა საქართველოს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ონლაინ ბრიფინგზე.

სომხეთის ჯანდაცვის მინისტრმა არსენ ტოროსიანმა ადრე განაცხადა, რომ ეპიდსაწინააღმდეგო სისტემა და ჯანდაცვა საქართველოში განსხვავდება სომხურისგან, თუმცა არა საუკეთესო მხრიდან. მან ასევე აღნიშნა, რომ სომხეთი საკუთარ სტატისტიკას გამჭვირვალედ ავრცელებს, ხოლო საქართველოში ინფიცირებულთა დათვლის მეთოდოლოგიაში ეჭვი შეიტანა.

„იცით, რომ ამ ერთი კვირის წინ იყო პატარა გაუგებრობა. ჩვენ მოძმე ერები ვართ, ერთმანეთს ყოველთვის მხარში ვუდგევართ და კარგი ურთიერთობა გვაქვს სომხეთის დაავადებათა კონტროლის ეროვნულ ცენტრთან... თუ სომხეთის დაავადებათა კონტროლის ცენტრი, როგორც დაავადებათა კონტროლის ცენტრს ჩვენ დაგვიყენებს საკითხს, რომ მათ სჭირდებათ რაიმე დახმარება, ის, რაც ჩვენი კომპეტენციის ფარგლებშია, იგივე ტესტირებასთან ან კიდევ სხვა საკითხებთან დაკავშირებით, ჩვენ მზად ვართ“, - განაცხადა გამყრელიძემ.

გამყრელიძემ უპასუხა ჟურნალისტის შეკითხვას, არის თუ არა მზად საქართველო კორონავირუსით დაავადებული პაციენტების მისაღებად.

„რაც შეეხება სამკურნალო პროცესს, მე დარწმუნებული ვარ, რომ საქართველოს მთავრობა და ჯანდაცვის სამინისტრო უარს კი არა პირიქით, ყველა ღონეს იხმარს თუ სომხეთს ეს დახმარება სჭირდება. პირველ რიგში, სომხეთის ჯანდაცვის სამინისტრომ უნდა დააყენოს ეს საკითხი და მაშინ დარწმუნებული ვარ, საქართველო სიამოვნებით მიიღებს. მოგეხსენებათ, ქართველები იყვნენ პირველები, რომლებიც სპიტაკის მიწისძვრის დროს ჩავიდნენ სპიტაკში სხვა ერებს შორის. ჩვენ მზად ვართ ყოველთვის“, – განაცხადა გამყრელიძემ.

ასევე, გამყრელიძის თქმით, საქართველოს და სომხეთს ჯანდაცვის სფეროში თანამშრომლობის კარგი გამოცდილება გააჩნიათ.

ბოლო დღე-ღამეში სომხეთში კორონავირუსით ინფიცირების 442 ახალი შემთხვევა გამოვლინდა. 28 მაისის მონაცემებით, ქვეყანაში იყო 8 216 დადასტურებული შემთხვევა, კორონავირუსით გამოწვეული გართულებების გამო გარდაიცვალა 113 ადამიანი, კორონავირუსის ინფექციის მქონე პაციენტების რაოდენობა, რომლებიც სხვა მიზეზებით დაიღუპნენ - 44.

ახალი მონაცემებით, გამოჯანმრთელდა 3 287 ადამიანი. მკურნალობას 4 772 პაციენტი გადის. ქვეყანაში სულ 54 931 ტესტი ჩატარდა.

რაც შეეხება საქართველოს, ამჟამად კორონავირუსი დადასტურებული აქვს 738 ადამიანს. გამოჯანმრთელებულთა რაოდენობამ 573-ს (77,95%) მიაღწია. კარანტინის რეჟიმში იმყოფება 3076, ხოლო სტაციონარებში დაკვირვების ქვეშ 250 პაციენტია. გარდაიცვალა 12 ადამიანი. მაისის ბოლოსთვის ჩატარდა 46 ათასი ტესტი, ყოველდღიურად ტესტი 1600 ადამიანს უტარდება.

დღეისათვის საქართველოში საგანგებო მდგომარეობის რეჟიმი მოხსნილია, თუმცა შეზღუდვების ნაწილი მაინც ძალაში რჩება.

0
თემები:
საქართველოს საგარეო პოლიტიკა