სოფო ფოცხვერაშვილი

შვეიცარიაში დაწერილი ლექსები და ემიგრანტი ბავშვებისთვის უფასოდ დარიგებული საბავშვო წიგნები

312
(განახლებულია 18:26 17.07.2019)
რუბრიკა „ქართველები უცხოეთში“ ამჯერად გასტუმრებთ შვეიცარიას, სადაც საბავშვო მწერალი სოფო ფოცხვერაშვილი ცხოვრობს.

შვეიცარიაში 90-იანი წლების საქართველოდან მოხვდა, თუმცა მანამდე ევროპული ადაპტაცია ბელგიაში გაიარა. წარმოშობით გურჯაანის რაიონის ისტორიულ სოფელ კალაურიდანაა.

საბავშვო ლექსების წერა უცხოეთში ყოფნის დროს ქართველი ემიგრანტი ბავშვებისთვის დაიწყო. შემდეგ ისინი საჩუქარად მათვე დაურიგა. თავისი წიგნები საქართველოში, სოციალურად დაუცველი ბავშვებისთვისაც ჩამოიტანა საჩუქრად და ფერეიდნელ პატარებსაც გაუგზავნა. დღეს უკვე ტრადიციად აქცია- ჩადის ყველგან, სადაც ქართველი ბავშვები ეგულება და მათთვის საჩუქრად ქართული წიგნები ჩააქვს...ქალბატონ სოფოს ციურიხში დავუკავშირდით.

სოფო ფოცხვერაშვილი
სოფო ფოცხვერაშვილი

-ქალბატონო სოფო, ცოტა შორიდან დავიწყოთ: ალბათ თქვენთვის თავისებური შოკი იქნებოდა როცა 90-იანი წლების თბილისიდან ბელგიაში მოხვდით?

- მაგ კითხვაზე ასე გიპასუხებთ: ერთის მხრივ, აქ დავინახეთ ლამაზი, სუფთა, განათლებული და გაჭირვებულებზე მზრუნველი ქვეყანა, მეორეს მხრივ, იძულებითი პატივისცემა და ღიმილი, რაც ქართველებისთვის ძალიან უცხოა. ამას ბავშვები, რასაკვირველია, ვერ გრძნობდნენ. მაშინ ბიჭი თერთმეტი წლის და გოგონა ცხრა წლის იყო. ჩემი მეუღლე იურისტი გახლდათ და სანამ ყველაფერი დაინგრეოდა, თბილისში ჩვეულებრივად ვცხოვრობდით. სკოლა კალაურში დავამთავრე, მერე დაუსწრებლად ვსწავლობდი. მებაღე-მევენახეობის ფაკულტეტი მაქვს დამთავრებული. ინსტიტუტის მერე საქონელმცოდნედ ვმუშაობდი. ასეთი იყო ჩემი ცხოვრება საქართველოში. 1996 წელს, საქართველოში გაუსაძლისი ცხოვრების გამო, ჩვენც დავტოვეთ საქართველო. ჯერ ბრიუსელში ჩავბარდით. ძნელი იყო ჩვენთვის უცხო ქვეყანაში ლტოლვილების სტატუსით ცხოვრება. ბელგიაში ჩასვლიდან მეორე დღეს, სამედიცინო კონტროლის გავლისას, ჩემს მეუღლეს მოულოდნელად სიმსივნე აღმოაჩნდა. საავადმყოფოებში ყოფნამ, ენის ბარიერმა და მცირეწლოვან შვილებთან ერთად შეკედლებულმა ცხოვრებამ, უფრო დამაბნია. ბრიუსელში მსოფლიოს ყველა ქვეყნის ადამიანებთან ერთად საერთო საცხოვრებელში ყოფნისგან დათრგუნულები ვიყავით.

შეხვედრა ბელგიისა და ჰოლანდიის ეპარქიაში
შეხვედრა ბელგიისა და ჰოლანდიის ეპარქიაში

- ბრიუსელიდან უარით გამოგისტუმრეს?

- ისე მოხდა, რომ ერთი წლისა და სამი თვის მერე, ნეგატივი მოგვცეს, ანუ უარი გვითხრეს. იძულებული გავხდით ბელგია დაგვეტოვებინა. შემდეგ ვცადეთ და გადავედით შვეიცარიაში, სადაც ქალაქ ციურიხში მოვხვდით. ამ ქვეყანაში ჩვენს დარჩენასაც დიდი წინააღმდეგობა შეხვდა, მაგრამ მეუღლის ავადმყოფობის გამო დაგვტოვეს, ქართული ანდაზის არ იყოს: "ზოგი ჭირი მარგებელიაო" გამოვიდა. ევროპულ ცხოვრებას მანამდე, ბელგიაში ავუღეთ ალღო, ამიტომ ციურიხში შეგუება არ გაგვჭირვებია, განსაკუთრებით ბავშვებს გაუადვილდა.  

- ციურიხში რას საქმიანობდით?

- ციურიხში, ოფიციალურ სამსახურში არ მიმუშავია, რადგან მეუღლეს ხშირად უწევდა ოპერაციები და მკურნალობები და პატარებს ვერ დავტოვებდი. მეუღლის გარდაცვალების მერე, 2008 წელს, სასტუმროს სამზარეულოში დამხმარე თანამშრომლად მუშაობა დავიწყე. მანამდე არავითარ სამუშაოს არ ვთაკილობდი. ახლა დიდი ხანია, პენსიაზე ვარ.

შეხვედრა სოფო ფოცხვერაშვილთან
შეხვედრა სოფო ფოცხვერაშვილთან

- საბავშვო ლექსების წერა შვეიცარიაში დაიწყეთ?

- ლექსების წერა უცხო ქვეყანაში ნოსტალგიამ დამაწყებინა, მაგრამ ის ლექსები მხოლოდ ჩემთვის მქონდა. მეუღლესაც არ ვაჩვენებდი, რომ ზედმეტად არ ენერვიულა. მეგობრებმა დამაძალეს, რომ წიგნი დამებეჭდა. როცა 2013 წელს, ჩემი შვილიშვილი, მია დაიბადა, მთლიანად საბავშვო, სამხიარულო ნოტაზე გადავედი.

ავტოგრაფის მიცემის დროს
ავტოგრაფის მიცემის დროს

- პირველად რომელ ქვეყანაში ჩაიტანეთ თქვენი საბავშვო წიგნები?

- როცა ციურიხში დავბრუნდი, სურვილი გამიჩნდა, რომ ჩემი წიგნები უცხოეთში მცხოვრები ემიგრანტი ბავშვებისთვის მიმეწვდინა. პირველად დავუკავშირდი ათენის ქართული სათვისტომოს თავმჯდომარეს, ბატონ ავთანდილ მიქაბერიძეს, რომელმაც ეს საჩუქარი სიამოვნებით მიიღო. მას ჩემი საბავშვო ლექსების კრებულის 80 ეგზემპლარი გადავეცი. ტრანსპორტირება თვითონ უზრუნველყო. ათენის ბავშვებთან შეხვედრით, მათი ანთებული და გაბრწყინებული თვალების ნახვით ძალიან ვისიამოვნე. ამის შემდეგ გეგმა დავსახე, რომ სადაც კი ხელი მიმიწვდებოდა, ყველა ქვეყანაში ჩავსულიყავი და პატარა ქართველები გამეხარებინა...

სოფო ფოცხვერაშვილის წიგნი
სოფო ფოცხვერაშვილის წიგნი

- ანუ დროთა განმავლობაში ეს უკვე ტრადიციად აქციეთ?

-ასე გამოდის. სანამ ჩავალ, იმ ქვეყანაში წინასწარ ვგზავნი ხოლმე თითო ეგზემპლარს, ბავშვები სწავლობენ თითო ლექსს და ზეიმზე ამბობენ. რამდენიმე მშობელმა სხვადასხვა ქვეყნიდან მომწერეს და გამომიგზავნეს ვიდეოები, სადაც მათი შვილები თხოვენ დედებს, რომ "ეს წამიკითხე, აქ რა წერიაო", იქ ჩანს როგორ ფურცლავენ  ჩემს წიგნს და აღწერენ სურათებს, როგორ კითხულობენ: „ეს, რა ასოაო?"... ბევრი ბავშვი ქართულად კარგად ვერ ლაპარაკობს, მაგრამ  ლექსისა და სურათის აღქმას ცდილობს. როცა ადგილზე ჩავდივარ, პატარები გარს მეხვევიან, ჩემს ლექსებს ამბობენ, თვითონაც ხარობენ და მეც მახარებენ!..

ერთ-ერთ ღონისძიებაზე
ერთ-ერთ ღონისძიებაზე

- თქვენი საბავშვო წიგნები საქართველოშიც ჩამოიტანეთ...

- სამიოდე წლის წინ, თბილისში ვიყავი და გავიგე, რომ ჩვენთან ფერეიდნელი ქართველები ჩამოჰყავთ და მათ ქართულ წერა-კითხვას, სამზარეულოს, ისტორიას და კულტურას ასწავლიან. უცებ გამიჩნდა იდეა, დავუკავშირდი ორგანიზატორებს და მათ ჩემი საბავშვო წიგნები გავატანე ფერეიდნელი ბავშვებისთვის. ბედნიერი ვარ, რომ ორგანიზატორების დახმარებით ჩემი წიგნები: „დედამიწა რაზე დგას?" და "ნოსტალგია" უკვე მათთან მოხვდა. შემდეგ დავუკავშირდი მედია კავშირ "ობიექტივს", სადაც ჩემი საბავშვო ლექსების კრებულის „დედამიწა რაზე დგას?" 100 ეგზემპლარი სოციალურად დაუცველი ოჯახების ბავშვებისთვის დავტოვე.

სოფო ფოცხვერაშვილის წიგნი
სოფო ფოცხვერაშვილის წიგნი

- ალბათ რთულია საუბარი სამშობლოზე ბავშვებთან, რომლებსაც ის თვალით არ უნახავთ. თქვენთვის რა არის სამშობლო?

- რა არის სამშობლო? სამშობლო -ენით გამოუთქმელი, აუხსნელი, გულში ჩაკირული გრძნობაა, როცა მას უჭირს- შენც ჩუმად კვნესი, მისი წარმატების დროს სიხარულისგან ტირის...

- რაზე დგას დედამიწა?..

- დედამიწა სიყვარულზე დგას და ამას ჩვენ ყველაზე კარგად  ბავშვები გვასწავლიან!..

 

312
თემები:
ქართველები უცხოეთში (96)
ნინო რურუა

სამოთხე დედამიწაზე, ანუ რაში უნდა მივბაძოთ იტალიელებს, რომ უკეთ ვიცხოვროთ

3152
(განახლებულია 14:52 27.01.2021)
რუბრიკა „ქართველები უცხოეთში” იტალიაში მცხოვრებ ქართველ იურისტ ნინო რურუას და მის საქმიანობას გაგაცნობთ.

არაოფიციალური სტატისტიკით, იტალიის ქალაქ ბარში ყველაზე მეტი ქართველი ცხოვრობს, ამიტომ აქ წამოწყებულ ნებისმიერ ქართულ საქმიანობას განსაკუთრებული მნიშვნელობა ენიჭება. მათ შორის, ვინც იტალიაში თავის ქვეყანას ღირსეულად წარმოაჩენს, პროფესიით იურისტი ნინო რურუაც გახლავთ. იგი ქალაქ ბარის სასამართლოს ავტორიზებული კულტურათაშორისი მედიატორი და იტალიის რესპუბლიკის მიერ აკრედიტებული ქართულენოვანი თარჯიმანია.

იტალიაში ასოციაცია „აისი“ (A.I.S. Assistenza per integrazione degli stranieri) ჩამოაყალიბა და ქართველი ბავშვებისთვის ბარის პირველი ქართული საკვირაო სკოლა „აისიც“ დააფუძნა. ამას გარდა 2017 წელს ბარის სერვისების სააგენტოში საემიგრაციო საკითხებითაა დაკავებული.

ნინო რურუა
ნინო რურუა

– ქალბატონო ნინო, თქვენ მაგალითზე რას გვეტყვით, როგორაა შესაძლებელი ქართული საქმის კეთება უცხოეთში?

– მიუხედავად ემიგრაციის რთული ცხოვრებისა, სურვილის შემთხვევაში ეს შესაძლებელია. მე იტალიაში 2012 წლიდან ვცხოვრობ, იტალიის მიერ აკრედიტებული ქართულენოვანი თარჯიმანი და ქალაქ ბარის სასამართლოს მიერ ავტორიზებული მედიატორი ვარ. იტალიაში დავაარსე ქართული ასოციაცია, რომლის საქმიანობაში ყველაზე დიდ მიღწევად ქართულენოვანი გაზეთის დაარსება მიმაჩნია. გაზეთი ამ ეტაპზე შეზღუდული ტირაჟით გამოდის, თუმცა სამომავლოდ მის უფრო ფართო მასშტაბით გამოცემას ვგეგმავთ. ასოციაცია აქ მყოფი ქართველების ნიჭის გამოსავლენად ხშირად მართავს კულტურულ-შემოქმედებით საღამოებს, პერიოდულად გამოსცემს საინფორმაციო ბროშურებს, აწყობს საინფორმაციო შეხვედრებს. 2018 წლის 10 თებერვალს ბარიში დავაარსე ქართული უფასო საკვირაო სკოლა „აისი“, რომელიც დაახლოებით 40 ბავშვს ითვლის.

საკვირაო სკოლაში
საკვირაო სკოლაში

ბავშვობის სამყარო - შტრიხები პორტრეტისთვის

ნინო რურუა: ერთ ჩვეულებრივ, ტრადიციულ თბილისურ ოჯახში დავიბადე. ოჯახში პირველი შვილიშვილი ვიყავი და, ცოტა არ იყოს, მათამამებდნენ. თუმცა ბავშვობიდან ყოველთვის ჩემი სამყარო მქონდა და რაღაცნაირი სიჯიუტით გამოვირჩეოდი. არასდროს მხიბლავდა ერთფეროვნება, ყოველთვის რაღაც ახლის ძიებაში ვიყავი. მიყვარდა კითხვა და დროის უდიდეს ნაწილს სახლში, წიგნებთან ვატარებდი. სკოლის დამთავრების შემდეგ ოჯახის სურვილი იყო, რომ ექიმი გავმხდარიყავი. თუმცა როცა მივხვდი, რომ ჩემგან ექიმი ვერ დადგებოდა, გადავწყვიტე პროფესია შემეცვალა და ბავშვობის ოცნება ამესრულებინა – იურისტი გავმხდარიყავი. 

ნინო რურუა
ნინო რურუა

– ნოსტალგიას საოცარი უნარი აქვს – ის შენში მანამდე უცნობ თვისებას ააქტიურებს ან მიმალულ ნიჭს აღვიძებს... 

– ასეთი რამ ჩემ ცხოვრებაშიც მოხდა. ყველა ემიგრანტი საქართველოს გულით ატარებს. ნოსტალგია გრძნობაა, რომელიც ყოველდღიურად გეძალება, მაგრამ სიტყვებით ვერ გადმოსცემ. რამდენიმეწლიანმა ემიგრაციამ უფრო ძლიერი გამხადა. სულ ვცდილობ, რომ შესაძლებლობის მაქსიმუმი გავაკეთო. ამ ქვეყნის მადლობელი ვარ, რადგან აქ საშუალება მომეცა, რომ საკუთარი ძალებისა და თუნდაც სურვილების რეალიზება მომეხდინა. რაც შეეხება ჩემში აღმოჩენილ მანამდე უცნობ თვისებას, რა გასაოცარიც არ უნდა იყოს, იტალიაში ხატვა დავიწყე და ამის მიზეზი და წინაპირობა სწორედ ნოსტალგია გახდა. ჩემდა გასაოცრად, ერთ მშვენიერ დღეს ხელში ფუნჯი ავიღე და ხატვა დავიწყე.

ნინო რურუა
ნინო რურუა

– იტალიელებს ორი სიტყვით როგორ აცნობთ საქართველოს?

– როდესაც ჩემი იტალიელი მეგობრები მეკითხებიან საქართველოზე, მარტივად ვპასუხობ: ეს არის სამოთხე დედამიწაზე. ჩემი დიდი სურვილია, რომ იქ დაბრუნება ყველამ შევძლოთ. თითოეული ჩვენგანი უცხოეთში თავისი ქვეყნის სახე და დესპანია. როგორც ჩვენ მოვიქცევით, ამის მიხედვით იმსჯელებენ მთლიანად ერზე და ქვეყანაზეც, ამიტომ ეს დიდი პასუხისმგებლობაა.

ოფიციალური შეხვედრის დროს
ოფიციალური შეხვედრის დროს

– ზოგჯერ ბედნიერება და კმაყოფილება ერევათ ერთმანეთში...

– იყო ბედნიერი არ ნიშნავს იმას, რომ შენ გარშემო ყველაფერი სრულყოფილია, ეს იმას ნიშნავს, რომ გადაწყვიტე თვალი აარიდო ყველაფერ იმას, რაც არასრულყოფილად გეჩვენება – მე ასე მესმის ბედნიერება...

ნინო რურუას შემოქმედება
ნინო რურუას შემოქმედება

– ქართველებს და იტალიელებს ხშირად გვადარებენ ერთმანეთს, თქვენი აზრით, რაში უნდა მივბაძოთ მათ?

– მსგავსება მართლაც დიდია, ქართველებს ტემპერამენტით განსაკუთრებით სამხრეთ იტალიელები ჰგვანან. თუმცა სხვაობაც მკვეთრია. აქ ძალიან დიდი ყურადღება ეთმობა სოფლის მეურნეობას. საკმაოდ კარგად აქვთ ეს სფერო მოწესრიგებული და უპირატესობა ქვეყნაში წარმოებულ პროდუქციას ენიჭება. რიგით იტალიელებს ურჩევნიათ, რომ ქვეყანაში წარმოებული პროდუქცია შეიძინონ და არა ექსპორტირებული. ეს მათი პრინციპული პოზიციაა. ასეთი დამოკიდებულება კი ადგილობრივი ბიზნესის განვითარებას უწყობს ხელს. აი, ასეთ პატრიოტიზმში თუ მივბაძავთ მათ, კარგი იქნება და ეს ჩვენ ეკონომიკაზეც დადებითად აისახება.

ნინო რურუას ნაქარგები
ნინო რურუას ნაქარგები

– თქვენთვის რა არის ცხოვრების ყველაზე დიდი გაკვეთილი?

– ცხოვრების ყველაზე დიდი გაკვეთილი ემიგრაციამ ჩამიტარა, აქ ბევრი რამ ვისწავლე: გიყვარდეს შენის საქმე, დაისახე მიზანი და იშრომე ამ მიზნის მისაღწევად. როდესაც სურვილი დიდია, დამერწმუნეთ, ყველაფერი გამოვა. უნდა გვახსოვდეს, სად არის ჩვენი ფესვები. მინდა, რომ ერთ მშვენიერ დღეს სამშობლოში ყველა დაბრუნდეს და იქ იყოს ბედნიერი...

 

3152
თემები:
ქართველები უცხოეთში (96)
გიორგი მანდარია გამარჯვებულ მოსწავლეებთან ერთად

ლოგიკური აზროვნება გამარჯვებისთვის ქართველი მოზარდები მსოფლიოში უძლიერესთა შორის

469
(განახლებულია 22:44 26.01.2021)
დიდი ხანია მივეჩვიეთ იმ ფაქტს, რომ ქართველი მოზარდები ყველა სფეროში აღწევენ წარმატებას. ამჯერად ვისაუბრებთ ინფორმატიკის ოლიმპიადებზე, საიდანაც, არ ყოფილა შემთხვევა, რომ საქართველოდან წარგზავნილს მედალი არ ჩამოეტანოს.

საქართველოში ინფორმატიკის ეროვნული ოლიმპიადა, ისევე, როგორც მსოფლიო ოლიმპიადა, 1989 წლიდან იმართება. ოლიმპიადის ჩატარება განათლების სამინისტროს ინფორმატიკის მთავარმა ცენტრმა დაიწყო და ბატონი გიორგი მანდარია მასში პირველივე დღიდანაა ჩართული. ჩვენი ქვეყნის ეროვნულ ნაკრებს, რომელშიც ოთხი ძლიერი მოსწავლეა, ის 1990 წლიდან ხელმძღვანელობს. იმ წელს მეშვიდე გიმნაზიის მოსწავლემ გიორგი დათუაშვილმა, რომელიც საბჭოთა ნაკრებში მოხვდა, ინფორმატიკის მეორე მსოფლიო ოლიმპიადაზე ოქროს მედალი აიღო.

იქიდან მოყოლებული ჩვენი ყველა გამარჯვება ბატონი გიორგისა და მისი გუნდის სახელს უკავშირდება. ყოფილი ოლიმპიელები მიღებულ ცოდნასა და გამოცდილებას დიდ ცხოვრებაშიც იყენებენ. ამის დასტურია ის, რომ ბევრი მათგანი როგორც საქართველოში, ასევე უცხოეთში ცნობილ წამყვან კომპანიებში მუშაობს, ან თავად არიან კომპანიის მფლობელები.

გიორგი მანდარია
გიორგი მანდარია

- ბატონო გიორგი, როგორია ჩვენი ქვეყნის წარმატების სტატისტიკა?

- საქართველო, როგორც დამოუკიდებელი ქვეყანა, ინფორმატიკის მსოფლიო ოლიმპიადებში 1996 წლიდან მონაწილეობს. 2000 წელს პირველი მედალი მოვიპოვეთ და ამის შემდეგ მედლების გარეშე აღარ დავბრუნებულვართ. პირველი ოქროს მედალი საქართველოს ნაკრებს 2010 წელს ქუთაისის ფიზიკა-მათემატიკური 41-ე საჯარო სკოლის მოსწავლემ ცოტნე ტაბიძემ მოუტანა. მეორე ოქროს მედალი 2014 წელს თბილისელი მოსწავლის ნიკოლოზ სვანიძის სახელთანაა დაკავშირებული (კომაროვის ფიზიკა-მათემატიკური 199-ე საჯარო სკოლა, საინფორმაციო ტექნოლოგიების ცენტრი „მზიური“). ევროპის ოლიმპიადებში 2015 წლიდან ჩავერთეთ. ამ წლების მანძილზე არაერთი გამარჯვება გვაქვს მოპოვებული. საბოლოო ჯამში მსოფლიოს და ევროპის ოლიმპიადებზე აღებული გვაქვს 14 ოქროს, 12 ვერცხლისა და 50 ბრინჯაოს მედალი.

გიორგი მანდარია
გიორგი მანდარია

- ასე რომ, მედლის გარეშე ფაქტობრივად არც ერთი ოლიმპიადიდან არ დავბრუნებულვართ?

- დიახ, სწორედ ასეა. ქართველი მოსწავლეები 2017 წელს ცენტრალური ევროპის ქვეყნების ოლიმპიადისა და სრულიად ევროპის პირველი ახალგაზრდული ოლიმპიადის ჩემპიონები გახდნენ. 2018 წელს იაპონიის მსოფლიო ოლიმპიადაზე ორი ოქროს მედალი მოვიპოვეთ და საქართველო 87 მონაწილე ქვეყნიდან მსოფლიოს რვა უძლიერეს ქვეყანას შორის მოხვდა. 2019 წელს მსოფლიო ოლიმპიადაზე ერთი ოქროს და ორი ბრინჯაოს, სრულიად ევროპის მესამე ახალგაზრდულ ოლიმპიადზე კი ერთი ვერცხლის და სამი ბრინჯაოს მედალი დავიმსახურეთ. გასულ წელს რაც შეეხება, მსოფლიო ოლიმპიადაზე ორი ოქროსა და ორი ბრინჯაოს მედალი მოვიპოვეთ. ჩვენი ქვეყანა კი 87-დან ისევ მსოფლიოს რვა უძლიერეს ქვეყანას შორის მოხვდა.

გიორგი მანდარია
გიორგი მანდარია

- შარშან საქართველომ ონლაინ უმასპინძლა ევროპის ოლიმპიადას...

- დიახ, 2020 წელს საქართველომ ევროპის მეოთხე ახალგაზრდულ ოლიმპიადას ონლაინ რეჟიმში უმასპინძლა, რაც საკმაოდ რთული იყო. თუმცა იმას, რომ ოლიმპიადა მაღალ დონეზე ჩავატარეთ, საერთაშორისო კომიტეტის წევრების, მონაწილე ქვეყნების ხელმძღვანელების, თვით ოლიმპიადის პრეზიდენტის მიერ გამოგზავნილი სამადლობელი წერილები ადასტურებს. ფინანსური და ორგანიზაციული მხარდაჭერა საქართველოს განათლების, მეცნიერების, კულტურისა და სპორტის სამინისტრომ და შოთა რუსთაველის ეროვნულმა სამეცნიერო ფონდმა უზრუნველყვეს. ხოლო სამეცნიერო-თემატური უზრუნველყოფა, ჩვენთან ერთად, ყოფილი ოლიმპიელებით დაკომპლექტებულმა სამეცნიერო-ტექნიკურმა კომიტეტმა მოახდინა. ქართველი მოსწავლეები ამჯერადაც წარმატებით გამოვიდნენ. ოლიმპიადაზე ერთი ოქროს, ერთი ვერცხლისა და ორი ბრინჯაოს მედალი მოვიპოვეთ. მომავალ წელს, პანდემიის პრობლემის მოხსნის შემთხვევაში, ევროპის მეხუთე ახალგაზრდულ ოლიმპიადას ისევ საქართველო უმასპინძლებს.

გიორგი მანდარია ინფორმატიკის ოლიმპიადაზე მონაწილეებთან ერთად
გიორგი მანდარია ინფორმატიკის ოლიმპიადაზე მონაწილეებთან ერთად

- თუ შეიძლება, რომ მკითხველს გამორჩეული მოსწავლეები გავაცნოთ...

- მოგახსენებთ. 2018 წელს ჩვენი ორი ოქროსმედალოსნიდან (ორივე კომაროვი, სასწავლო ცენტრი „მზიური“) ნიკოლოზ ბირკაძე 340 მონაწილიდან მსოფლიოს უძლიერეს ოთხეულში შევიდა, ხოლო გიორგი კლდიაშვილი მსოფლიოს 16 უძლიერეს მოსწავლეს შორის მოხვდა. საქართველო 87 მონაწილე ქვეყნიდან რვა უძლიერეს ქვეყანას შორის დასახელდა. წლევანდელი ევროპის ახალგაზრდული ოლიმპიადის ოქროსმედალოსანი ლუკა მოსიაშვილი ევროპის უძლიერეს მოსწავლეთა ოთხეულში შევიდა. გარდა ამისა, გიორგი კლდიაშვილი (დემირელის სახელობის კერძო კოლეჯის ყოფილი მოსწავლე, სასწავლო ცენტრი „მზიური“) 2017 წელს ცენტრალური ევროპის ქვეყნების ოლიმპიადის ჩემპიონი გახდა. საქართველო კი მონაწილე ქვეყნების უძლიერეს სამეულში შევიდა. ნიკოლოზ ბირკაძემ საქართველოს ოლიმპიადების ისტორიაში თავისი ადგილი უკვე დაიმკვიდრა. ის პირველია, ვინც 15 წლის ასაკში მათემატიკისა და ინფორმატიკის მსოფლიო ოლიმპიადებზე ვერცხლის მედლები მოიპოვა. მანამდე გიორგი კლდიაშვილს ჰქონდა მეცხრე კლასში ორივე ოლიმპიადაზე ბრინჯაოს მედლები მოპოვებული. გარდა ამისა, ნიკოლოზი 2017 წელს ევროპის პირველი ახალგაზრდული ოლიმპიადის ჩემპიონი გახდა. საბოლოოდ კი ის ბოლო ოთხი წლის მანძილზე მოპოვებული სამი ოქროსა და ერთი ვერცხლის მედლით ინფორმატიკის მსოფლიო ოლიმპიადების ყველა დროის უძლიერეს ოცეულში შევიდა.

გიორგი მანდარია მოსწავლეებთან ერთად
გიორგი მანდარია მოსწავლეებთან ერთად

- ამ სფეროში ბევრი ინიციატივა თქვენ სახელთანაა დაკავშირებული, მათგან მნიშვნელოვანი გაგვაცანით...

- ჩემ თანამოაზრეებთან ერთად 2008 წელს დავაფუძნე „საინფორმაციო ტექნოლოგიების სწავლების და ინფორმატიკის ოლიმპიადების მხარდამჭერი ასოციაცია“, რომლის გამგეობის თავმჯომარეც გახლავართ. ეს ასოციაცია 2015 წლიდან  განათლების სამინისტროს მიერ გამოცხადებული კონკურსის საფუძველზე საქართველოს მოსწავლეთა ეროვნულ ოლიმპიადებს საკუთარი ხარჯებით ატარებს. 2017 წელს დავაფუძნე ინფორმატიკის ოლიმპიადა OLYINFO, რომელსაც წელიწადში ორჯერ, გაზაფხულსა და შემოდგომაზე ვატარებ. ის განკუთვნილია იმ მოსწავლეების გამოსავლენად, რომლებსაც არ აქვთ სპეციალური მომზადება, არ იციან დაპროგრამება და ალგორითმები, მაგრამ გამოირჩევიან ლოგიკური აზროვნებით, რაც ამ სფეროში უცილებელია. ასევე, 2015 წელს დავაფუძნე საქართველოს მოსწავლეთა ზამთრის ოლიმპიადა, რომელსაც ყოველი წლის თებერვლის ბოლოს შავი ზღვის საერთაშორისო უნივერსიტეტში ვატარებ უნივერსიტეტის ორგანიზაციული და ფინანსური მხარდაჭერით.

მოსწავლეებთან და კოლეგებთან ერთად
მოსწავლეებთან და კოლეგებთან ერთად

- რითია გამოწვეული ის, რომ ოლიმპიადებზე ძირითადად საქართველოს ორი ქალაქის მოსწავლეები გამოდიან?

- დიახ, გეოგრაფიული არეალი, რომელსაც ვწვდებით, საკმაოდ ვიწროა, პრაქტიკულად, მარტო თბილისითა და ქუთაისით შემოიფარგლება. ეს ძირითადად ამ საგნის კვალიფიციური პედაგოგების სიმწირითაა გამოწვეული და იმითაც აიხსენება, რომ დღეს ჩვენს სკოლებში ინფორმატიკა არ ისწავლება. არადა, ეს საჭირო საგანი ალგორითმული აზროვნების ჩამოყალიბებასა და დაპროგრამების ელემენტების სწავლებას ითვალისწინებს. მეორე მხრივ, საქართველოს რეგიონებში ნიჭიერი ბავშვების დიდი პოტენციალია, რომელთა საინფორმაციო ტექნოლოგიებთან ზიარება და ამ სფეროთი დაინტერესება ქვეყნისთვის მნიშვნელოვანი საქმეა. აქვე მინდა აღვნიშნო, რომ ამ პროცესში ძალიან დიდია კომაროვის სკოლის, ვეკუას სახელობის ფიზიკა-მათემატიკური, ქუთაისის ფიზიკა-მათემატიკური სკოლების, ასევე საინფორმაციო ტექნოლოგიების სასწავლო ცენტრ „მზიურის“ როლი, სადაც ბავშვები პატარა ასაკიდან იწყებენ მეცადინეობას და სკოლის დამთავრებამდე აგრძელებენ.

დაჯილდოების ცერემონია
დაჯილდოების ცერემონია

- ამ სკოლების გარდა ქართველი მოსწავლეების მომზადებაში ვინ იღებს მონაწილეობას და ვინ აფინანსებს ოლიმპიადებზე მათ გამგზავრებას?

- საქართველოს ეროვნული ნაკრების მომზადებას და მსოფლიო თუ სხვა საერთაშორისო ოლიმპიადებზე მოსწავლეების გამგზავრებას განათლების სამინისტრო აფინანსებს. რაც შეეხება მათ მომზადებას, არ შემიძლია არ ვახსენო რამდენიმე პედაგოგი, რომელთა უანგარო და მრავალწლიანი თავდადებული შრომის შედეგია სწორედ ის წარმატებები, რომლითაც ასე ვამაყობთ. ჩვენ ერთად შევძელით არცთუ ისე დიდი, მაგრამ საკმაოდ ეფექტური ინფრასტრუქტურის შექმნა.  შეიძლება ითქვას, რომ ჩვენი გუნდი ქვეყანას მაღალი დონის ცოდნით აღჭურვილ მომავალ თაობას უზრდის. მინდა ეს პედაგოგები ჩამოგითვალოთ: თბილისიდან – ზაზა გამეზარდაშვილი, გურამ ქოთოლაშვილი და პაატა ჯავახიშვილი, ქუთაისიდან – ვახტანგ შეკიშვილი და მალხაზ ჯინჯიხაძე. ასევე ის ყოფილი ოლიმპიელები, რომლებიც თავის ცოდნას უზიარებენ მომავალ თაობას. საბედნიეროდ, ისინი უკვე არცთუ ისე ცოტა არიან და მათი ჩამოთვლა შორს წაგვიყვანს. ბევრი წარმატებული ყოფილი ოლიმპიელი ფინანსურადაც გვეხმარება.

დაჯილდოების ცერემონია
დაჯილდოების ცერემონია

- სწორედ მათ შესახებ მინდა გკითხოთ, დღეს სად სწავლობენ ან რას საქმიანობენ წარმატებული ოლიმპიელები?

- ოლიმპიადებზე მიღებული ცოდნა-გამოცდილება დიდ ცხოვრებაშიც წარმატების საწინდარი ხდება ხოლმე, რაც განსაკუთრებით მახარებს. ჩვენი ოლიმპიელები დღეს მსოფლიოს წამყვან უნივერსიტეტებში სწავლობენ. ხოლო ვინც დაამთავრა სწავლა, როგორც საქართველოში, ასევე უცხოეთში ისეთ წამყვან კომპანიებში მუშაობენ, როგორიცაა Google, Facebook, Quora, Dropbox, Vmware და სხვ. ზოგიც საკუთარი კომპანიის მფლობელია. იმედია, თუ მომავალში ხელშეწყობა იქნება, საერთაშორისო ინტელექტუალურ ასპარეზზე საქართველო კიდევ არაერთხელ იტყვის თავის სიტყვას.

 

469
მონაცემების დამუშავება

ფიშინგი google-ის საძიებო სისტემის გამოყენებით: კიბერთაღლთობის ახალი სქემები

0
(განახლებულია 17:13 27.01.2021)
სპეციალისტების განცხადებით, ბოლო დროს კიბერთაღლითობის და სხვისი თანხის მითვისების შემთხვევები გახშირდა.

თბილისი, 27 იანვარი – Sputnik. საქართველოს საბანკო ასოციაცია მოსახლეობას კიბერთაღლითობის ახალი ფორმების შესახებ აფრთხილებს.

ასოციაციის ინფორმაციით, ბოლო დროს დაფიქსირდა რამდენიმე ფაქტი, რომლის შედეგად მომხმარებლებმა ფინანსური ზარალი ნახეს. კიბერთაღლითობის ერთ-ერთი გავრცელებული ფორმაა „ფიშინგი“, რომლის მიზანია ინტერნეტ-მომხმარებლის პერსონალური მონაცემების თაღლითური გზით მოპოვება. 

თაღლითობის ახალი სქემის მიხედვით, კიბერდამნაშავეები შეტევის დროს  იყენებენ Google-ის საძიებო სისტემას,  სადაც კომერციული ბანკების ინტერნეტბანკის ვებ-გვერდების მსგავი, ყალბი ე.წ. ფიშერული გვერდების რეკლამას ახორციელებენ. ასეთი გვერდების მისამართი, ხშირ შემთხვევაში,  კომერციული ბანკების ინტერნეტბანკის ნამდვილი მისამართების მსგავსია. ბმულზე გადასვლის შემთხვევაში იხსნება ყალბი ვებგვერდი, რომელშიც მომხმარებელს საკუთარი პერსონალური მონაცემების შეყვანას (პაროლი, საბანკო ბარათის ნომერი და სხვ.) სთხოვენ.

„გთხოვთ, არ გადახვიდეთ საეჭვო ბმულებზე, ბმულზე კურსორის მიტანით გამოჩნდება ვებგვერდის რეალური მისამართი. ყურადღებით დააკვირდით იმ ვებგვერდის მისამართს, სადაც პაროლი შეგყავთ, დარწმუნდით, რომ ნამდვილად ბანკის ვებგვერდზე იმყოფებით. ზოგიერთ შემთხვევაში, გაყალბებული მისამართი შეიძლება მხოლოდ ერთი სიმბოლოთი განსხვავდებოდეს ნამდვილისგან“, – ნათქვამია ასოციაციის განცხადებაში.

სპეციალისტები მომხმარებლებს ურჩევენ ინტერნეტბანკით სარგებლობისთვის Google-ის საძიებო ველში რომელიმე კონკრეტული ბანკის სახელწოდების მოძებნის ნაცვლად, მისამართის ველში პირდაპირ კომერციული ბანკის ვებგვერდის მისამართი ჩაწერონ.

ორგანიზაცია მოქალაქეებს მაქსიმალური სიფრთხილისკენ მოუწოდებს.

0
თემები:
კრიმინალი საქართველოში