ნუცი ნებიერიძე

ქართველი ჯაზმენი, რომელიც ნიუ-იორკის პრესტიჟულ კლუბებში მღერის

669
(განახლებულია 17:38 03.07.2019)
რუბრიკა „ქართველები უცხოეთში“ ამერიკაში მცხოვრებ ნიჭიერ მომღერალს ნუცი ნებიერიძეს გაგაცნობთ.

ჯაზს კი არ ასრულებს, თითოეულ კომპოზიციაში ჩასახლებულ საინტერესო პატარა ამბავს ჰყვება და ყოველ ჯერზე ნიჭიერად გადმოცემული ეს ამბავი განსხვავებულად და საოცრად ემოციურად ჟღერს...

მხატვრების ოჯახში გაზრდილმა, თავიდან ხატვის მიმართულებით სცადა წასვლა. თბილისის სამხატვრო აკადემიაში კინო-ტელე მხატვრობის ფაკულტეტი დაამთავრა. რადგან იმპროვიზაციები ცხოვრებაშიც უყვარს, ერთ მშვენიერ დღეს ინტერესთა სფერო შეიცვალა და მუსიკის გზა აირჩია. მისი მუსიკალური კარიერა მაშინ დაიწყო, როცა თბილისის სახელმწიფო კონსერვატორიაში ჯაზ-ვოკალის ფაკულტეტზე ჩააბარა. სტუდენტობის დროს აქტიურად გამოდიოდა სხვადასხვა კონცერტებსა და ფესტივალებზე. ყველაფრის მოტივაცია მუსიკის სიყვარული და ამერიკაში კარიერის გაგრძელება იყო.

ნუცი ნებიერიძე
ნუცი ნებიერიძე

გავუსწრებ მოვლენებს და ვიტყვი, რომ მისი ამერიკული ოცნება სრულად ახდა. ნუციმ მსოფლიოში ერთ-ერთი პრესტიჟული ნიუ-იორკის მუსიკალური უნივერსიტეტი დაამთავრა, საკუთარი ალბომი ჩაწერა და დღეს კონცერტების ჩატარებას სთავაზობენ ისეთ პრესტიჟულ კლუბებში, სადაც ბროდვეის ლეგენდარული მუსიკოსები გამოდიან.

– ნუცი, ქრონოლოგიას მივყვეთ, თბილისური მუსიკალური ცხოვრება გაიხსენეთ...

– თბილისში აქტიური მუსიკალური ცხოვრება მქონდა. ჯერ კიდევ კონსერვატორიაში სწავლის პარალელურად გამოვდიოდი კონცერტებზე, კლუბებსა და ბარებში. მყავდა სხვადასხვა ბენდი, ვაკეთებდი სტუდიურ ჩანაწერებს, ვმღეროდი სხვადასხვა ფესტივალზე და დიდ კონცერტებზე. მონაწილეობა მაქვს მიღებული სატელევიზიო კონკურსებშიც. ასე თანდათან ვაგროვებდი გამოცდილებას, ვწერდი მუსიკას. კონსერვატორიის დამთავრების შემდეგ ვემზადებოდი შემდეგი დიდი ნაბიჯისთვის, რასაც ნიუ-იორკში ჩასვლა წარმოადგენდა. დიდი მზადებისა და სამწლიანი წვალების შემდეგ, როგორც იქნა, აქ ჩამოვედი.

ნუცი ნებიერიძე
ნუცი ნებიერიძე

– ნიუ-იორკში საკმაოდ პრესტიჟულ უნივერსიტეტში ჩააბარეთ...

– დიახ, ეს გახლავთ მსოფლიოს ერთ-ერთი პრესტიჟული მუსიკალური უნივერსიტეტი The New School For Jazz And Contemporary Music. ისე მოხდა, რომ საკმარისი ფინანსების არქონის გამო, შემდეგ კი აშშ-ის ვიზაზე ორჯერ უარის მიღების შემდეგ ზუსტად სამი წელი ნიუ-იორკში ვირტუალურად ვცხოვრობდი. გამოცდები სამჯერ ჩავაბარე და უნივერსიტეტიდან დაფინანსებაც თანდათანობით გამეზარდა. საბოლოოდ მაღალი დაფინანსებითა და მშობლების ხელშეწყობით აქ  ჩამოვედი, ვისწავლე და ახლა ეს უნივერსიტეტიც დავამთავრე.

– როგორი იყო თავისუფალ სამყაროსთან თქვენი პირველი რეალური შეხვედრა და შთაბეჭდილება?

– ჩემი პირველი შთაბეჭდილება ნიუ-იორკზე განსაკუთრებულად მძაფრი იყო, რადგან, როგორც ზემოთ ვახსენე, სამი წელი ვოცნებობდი აქ ჩამოსვლაზე. არასდროს დამავიწყდება ის ემოცია, როდესაც პირველად გავედი მანჰეტენზე, გავიარე უნივერსიტეტთან იმ ქუჩებზე, სადაც ფოტოებით ვირტუალურად ვცხოვრობდი. პირველი წელი ძალიან ინსპირაციული იყო, მართლა ვეზიარე იმ „კულტურულ შოკს“, რითიც  ნიუ-იორკი გამოირჩევა. ახალ სამყაროსთან შეგუება სულ არ გამიჭირდა, პირიქით, აქ იმდენი ხანი ვერ ჩამოვდიოდი, რომ სწავლას და მოღვაწეობას დაგროვილი ენერგიით „შევუტიე“. სხვათა შორის, იმ ადგილზე, სადაც პირველი გასვლის დროს ყველაზე დიდი ემოციური შოკი დამემართა, ხანდახან ახლაც მივდივარ, ისევ იქ ვდგები, იმ ქუჩაზე, რომ იგივე განცდა გავიხსენო. ამ ფორმით ალბათ საკუთარ თავს მინდა შევახსენო, თუ რა გზა გამოვიარე და რამდენად მნიშვნელოვანია ჩემი აქ ყოფნა...

– ამბობენ, ჯაზს მხოლოდ თავისუფალი სულის ადამიანები მღერიანო...

– ბავშვობიდან ვგრძნობდი კავშირს ამ მუსიკასთან, ახლა კი ვფიქრობ, რომ ეს იყო ჩემი გაუცნობიერებელი სწრაფვა თავისუფლებისკენ. მუდამ გულჩათხრობილი ბავშვი ვიყავი და ჩემი შინაგანის რეალიზება სწორედ ასე უნდა მომხდარიყო. თუმცა ეს ეხება ზოგადად მუსიკასაც, რადგან ჯაზთან ერთად სხვა მრავალი ჟანრის გავლენაც მაქვს, რაც ახლა ერთბაშად ვლინდება ჩემ სიმღერებში და იდეებშიც. სულის გათავისუფლება მთელი ცხოვრების პროცესია, რაც, ვფიქრობ, ადამიანის მთავარი მისიაა. სწორედ ეს პროცესია ბრძოლა, რაც ჩემი ცხოვრების განუყოფელი ნაწილია. ჩემი აზრით, ჯაზიც ბრძოლაა, ბრძოლა თვითგანვითარების და შინაგანი თავისუფლებისთვის.

ნუცი ნებიერიძე
ნუცი ნებიერიძე

– როგორია ამერიკული პუბლიკა, ვისთვისაც ჯაზს მღერით?

– ნიუ-იორკის პუბლიკა მრავალფეროვანია და ძალიან კულტურული. ბოლო სამი წლის განმავლობაში ბევრი კონცერტი და ღონისძიება მქონდა ნიუ-იორკის სხვადასხვა პრესტიჟულ ვენიუებში, როგორებიცაა Birdland Jazz Club, Birdland Theatre, Club Bonafide, Rockwood Music Hall, Tribeca Performing Arts Center, Consulate General Of Georgia, The Amadeus Performance Hall და სხვ. ჩემ კონცერტებზე როგორც მუსიკოსები, კოლეგები, მასწავლებლები, მოსწავლეები, თანამშრომლები, სხვადასხვა ორგანიზაციის წარმომადგენლები და ჟურნალისტები, ასევე ტურისტები და სრულიად უცხო მსმენელიც მოდის. ისინი მიუხედავად იმისა, გიცნობენ თუ არა, დიდი პატივისცემით გისმენენ და გქომაგობენ. ამასთანავე, ქართველი პუბლიკაც განუყოფელი ნაწილია ჩემი კონცერტების, რითიც ძალიან ამაყი ვარ.

– გამორჩეული, დასამახსოვრებელი, საინტერესო ამბავი ციკლიდან “ერთხელ, ამერიკაში”...

– შარშან ჩავწერე ჩემი პირველი ალბომი და პრეზენტაცია–კონცერტის ჩატარება ძალიან მინდოდა ნიუ-იორკის ერთ-ერთ ყველაზე დიდ და ლეგენდარულ ვენიუში, სადაც ძალიან ძნელია მოხვედრა. იქ მინიმუმ ნახევარი წლით ადრე უკვე გაწერილი აქვთ პერფორმანსების ცხრილი, ისიც სულ გამოჩენილი, ბროდვეის ლეგენდარული მუსიკოსებით. ერთ დღეს, ნოემბრის დასაწყისში მიზანმიმართულად მივედი, ჯემ-სეიშენზე ვიმღერე, ვენიუს მფლობელს დაველაპარაკე, რის შემდეგაც მან თავად შემომთავაზა კონცერტის ჩატარება. არასდროს დამავიწყდება იქიდან წამოსვლისას განცდილი სიხარული, ფაქტობრივად გავბედე და მოვიპოვე ის, რაც ძალიან მინდოდა! მეორე დღეს კი მომწერეს, რომ ზედიზედ ორი დღე მომცეს, თანაც იმავე თვეში, 21-22 ნოემბერს. სიხარულისგან გადარეული ვიყავი, რომ ასე მალე მიწევდა ამხელა ივენთების ჩატარება. არანორმალურად ინტენსიური შრომის შედეგად კონცერტებმა მაგრად ჩაიარა, თანაც თითქმის სავსე დარბაზში ბევრი ქართველი იყო...

– ნიჭიერი უდავოდ ხართ, როგორ ფიქრობთ, ფორტუნაც გწყალობთ?

– უნივერსიტეტის დამთავრებისთანავე გამომიჩნდა პროდიუსერი, რომელიც ჩემ კონცერტს დაესწრო, აღფრთოვანდა და დაინტერესდა ჩემი მუსიკალური იდეებით. შეხვედრებზე დავდიოდით, ვგეგმავდით თანამშრომლობას და განვიხილავდით შემდგომ პროცესებს. მივიღე ძალიან მაგარი შემოთავაზებები და მან მიბიძგა რომ Music Production მესწავლა, სტუდიურ პირობებში მეკეთებინა მუსიკა, ახალი სიმღერები დამეწერა და ჩამეწერა. ამისთვის კი სახლში აპარატურა მჭირდებოდა და, პირველ რიგში, შესაბამისი კომპიუტერი, რაც არ მქონდა. ზამთრის ერთ დღეს, შეხვედრის ბოლოს მან მითხრა – ჩვენ ყველაფერს გავაკეთებთ გეგმის მიხედვით, მაგრამ შენ კომპიუტერიც კი არ გაქვსო. მახსოვს, იქიდან ჩაფიქრებული წამოვედი, ერთ ბაღში სკამზე ჩამოვჯექი და ვფიქრობდი, რომ ასეთი შესაძლებლობისთვის ყველაფერი უნდა მეცადა. უცებ მეგობარმა, არაჩვეულებრივმა ადამიანმა და მუსიკოსმა დამირეკა და მომიკითხა. საუბრის ბოლოს კი ისე, უბრალოდ მითხრა, რომ მჩუქნის კომპიუტერს, თანაც ზუსტად ისეთს, როგორიც მჭირდებოდა! ასეა, როცა რაღაც ძალიან გსურს და ამისთვის იბრძვი, თითქოს სამყაროც შენკენაა…

ასე დაიწყო ახალი ეტაპი ჩემ მუსიკალურ ცხოვრებაში. დანარჩენი აპარატურაც ნელ-ნელა ჩემი შრომით შევიძინე, ოთახში მოვიწყვე პატარა სტუდია, ვისწავლე პროგრამები და დავიწყე მუსიკის კეთება. ამ პროდიუსერთან უკვე ინტენსიური თანამშრომლობა მაქვს და ბევრ ახალ ჩანაწერზე ვმუშაობ, რომლებსაც მალე გამოვცემ.

– უცხო გარემოში მოხვედრილი ადამიანი საკუთარ თავში ყოველთვის აღმოაჩენს ხოლმე მანამდე უცნობ თვისებებსა და შესაძლებლობებს, თქვენ შემთხვევაშიც თუ მოხდა ასე?

– საზღვარგარეთ სამუშაოდ და წარმატებისთვის წასული ადამიანი სულიერად გარდატეხის ეტაპს გადის. ქართველის ნიუ-იორკში ადაპტირება–რეალიზება განსაკუთრებულ ფსიქოლოგიურ–მენტალურ მოვლენად მიმაჩნია. სოციალური იერარქიის წნეხიდან გამოქცეული ადამიანი უცებ აღმოჩნდება უზარმაზარ ფერად სივრცეში, სადაც მის იდენტობას გარემო და სოციუმი კი არ განაპირობებს, არამედ მხოლოდ თვითონ და მისი საქმე. თანაც, როდესაც ადამიანს თვითგადარჩენისთვის ბრძოლა გიწევს ასეთ დაუნდობელ და სწრაფ რეჟიმში, როგორიც ნიუ იორკშია, აღმოაჩენ უნარებს საკუთარ თავში და იყენებ უამრავ შესაძლებლობებს. მე ასეთ ქარცეცხლში ინდივიდუალური განვითარებისთვის ასმაგად უფრო სწრაფად და ნაყოფიერად ვმუშაობ. შინაგანი ენერგიის გამომუშავებასა და ბალანსს ვსწავლობ, რამდენადაც ბევრს ვხარჯავ, მით უფრო ულევი ენერგიით ვივსები, ვძლიერდები და ვიზრდები.

– ასეთ გლობალურ და ინტეგრირებულ სამყაროში საკუთარი იდენტობის და წარმომავლობის გაცნობიერება უკანა პლანზე ხომ არ იწევს?

– პირიქით, ასეთ მრავალფეროვან კულტურულ გარემოსა და სხვადასხვა ეროვნების ადამიანებს შორის საკუთარ კულტურასა და წარმომავლობას ბევრად უფრო ვაცნობიერებ, მისი ღირსებებითა და ნაკლოვანებებით, რაც პირდაპირ ჩემ შემოქმედებაზე აისახება. სწორედ ეს გენი და ფესვები მამოძრავებს, თანამედროვე სახით რეალიზდება და გარკვეულ ფორმას იძენს ჩემ მუსიკაში.

მეამაყება ჩემი თაობა და მინდა, რომ საკუთარი გამოცდილებით წვლილი შევიტანო ჩემი ქვეყნის უკეთესი და პროგრესული მომავლის საქმეში. ნოსტალგიასაც ამით ვერევი, რომ აქ, ამ ბრძოლაში ჩემს მისიას ვემსახურები...

 

669
თემები:
ქართველები უცხოეთში (73)
მიზნისკენ სვლა

მამაკაცური და ქალური ლოგიკა, ანუ გაიცანი შენი მთავარი მტერი

442
(განახლებულია 21:14 03.07.2020)
სად გადის გზა წარმატებისა და წარუმატებლობისკენ? რა იცის და რა შეუძლია მოწიფულ პიროვნებას? სად ბუდობს ბედნიერება?

ცნობილი ფსიქოლოგი და ფსიქოთერაპევტი, მწერალი, მედიცინის მეცნიერებათა კანდიდატი მიხაილ ლიტვაკი – ამ და სხვა საკითხებზე ლაკონურ, ფასდაუდებელ პასუხებსა და რჩევებს გვაძლევს.

ვინც ეძებს, ვინც იპოვა და, ზოგადად, ყველა, ანუ ყველაფერი მარტივია>>

• მე არ ვიცი წარმატებისკენ მიმავალი გზები, მაგრამ ვიცი გზა წარუმატებლობისკენ – ესაა სურვილი, ყველას მოსწონდე

• არ არსებობს მამაკაცური ან ქალური ლოგიკა, არის მხოლოდ სწორად აზროვნების უნარი

• გინდა გაიცნო შენი მთავარი მტერი? ჩაიხედე სარკეში. გაუმკლავდი მას – დანარჩენი ყველა დაიფანტება 

• მეგობრებთან ურთიერთობა სასიამოვნოა, ხოლო მტრებთან – სასარგებლო

• ურთიერთობების დასრულებისა და სამუშაოდან გათავისუფლების მხოლოდ ერთადერთი საპატიო მიზეზი არსებობს – შეუძლებელია არსებულ ვითარებაში პიროვნული ზრდა.

• უმწიფარმა პიროვნებამ ხშირად იცის, მაგრამ არ შეუძლია. მოწიფულმა არა მხოლოდ იცის, არამედ შეუძლია კიდეც. ამიტომ უმწიფარი პიროვნება აკრიტიკებს, ხოლო მოწიფული – აკეთებს

• მხოლოდ სიხარული გაუზიარე მეგობრებსაცა და მტრებსაც. მეგობარს გაუხარდება, მტერს – ეწყინება

დედობა, როგორც „გმირობა“, შვილი – „სამახსოვროდ“...>>

• ბედნიერებას ნუ გაეკიდები, არამედ იპოვე ადგილი, სადაც ის ბუდობს. და ბედნიერება თავად გიპოვის. შემიძლია გიკარნახო, სადაა შენი ბედნიერება – ეს შენ თვითონ ხარ. ხოლო მისკენ გზა – ეს საკუთარი შესაძლებლობების მაქსიმალური განვითარებაა

• ბედნიერება – ეს სწორად ორგანიზებული საქმიანობის „თანმდევი პროდუქტია"

• თუ ვინმემ უმადურობა გისაყვედურა, მაშინვე გაარკვიე, რა ღირს მისი მომსახურება, გაუსწორე ანგარიში და ამ ადამიანთან საქმე აღარ დაიჭირო

• თუ გინდა, ვინმეს რამე დაუმტკიცო, ეს ნიშნავს, რომ იმისთვის ცხოვრობ, ვისთვისაც ამის დამტკიცება გინდა. თუ საკუთარი თავისთვის ცხოვრობ, მაშინ ვინმესთვის რამის დამტკიცების საჭიროება არ არსებობს

• ოცნებები ჩვენი უნარების ხმებია. მაგალითად, მე არ ვოცნებობ ოპერაში სიმღერაზე. არც ხმა მაქვს და არც სმენა. რომ ვოცნებობდე, შესაბამისად, ამ ოცნებას ჩემი უნარები უფრო გააღვივებდა. შესაბამისად, ვეცდებოდი ოპერაში მოხვედრას. უბრალოდ, საჭიროა დაფიქრდე, როგორ განახორციელო ეს ოცნება. აქ მთავარია არ აჩქარდე, მაშინ ძალიან სწრაფად გამოვა. კარგია, როცა ადამიანს შეუძლია საკუთარ თავზე თქვას „მარტო იმას ვაკეთებ, რომ ვცდილობ ჩემი ოცნებები განვახორციელო"

აირჩიეთ ბედნიერება და ბედნიერება აგირჩევთ თქვენ>>

• იმისთვის, რომ გაიგო, როგორ გეპყრობიან ადამიანები, მოუყევი მათ საკუთარ გეგმებსა და ოცნებებზე. ის, ვინც შენ მიმართ ფარულ სიძულვილს გრძნობს, ამას გააკრიტიკებს. ვისაც შენთვის კარგი უნდა, დაგეხმარება

• ადამიანთან ურთიერთობისას გახსოვდეს, რომ მას საკუთარ თავზე კარგი წარმოდგენა აქვს

• მიაღწიე წარმატებას და წყენა გაგივლის.

442
თემები:
სასარგებლო რჩევები
შორენა ქუმსიაშვილი

ემიგრანტი ქალის წერილები: „მინდა–არ მინდა, სხვა რა გზაა? ძლიერი უნდა ვიყო“

1232
(განახლებულია 19:17 03.07.2020)
ემიგრანტი ქალები – ჩვენი დროის ჩვეულებრივი გმირები, საკუთარ მხრებზე რომ გადაიტანეს ქვეყნის ყველაზე რთული პერიოდი. ასეა დღესაც...

სამშობლოდან შორს მყოფები, უცხოეთში პიროვნულ რეალიზებას მაინც ახერხებენ. როგორც ჩანს, მათ ოპტიმიზმს და სიცოცხლის სიყვარულს ყოფითი პრობლემები ვერაფერს აკლებს. ვინ იცის, იქნებ, ჩვენი გადარჩენის საიდუმლოც ამაშია...

ემიგრაციაში ისიც პრობლემების გამო მოხვდა. იტალიაში კარანტინში ყოფნის დროს რვეულის ფურცლებზე ცარცით ხატვა დაიწყო. ის რთული პერიოდი ამან გადაატანინა. ეს შორენა ქუმსიაშვილის ემიგრანტული ისტორიაა, რაზეც თავის ღია წერილში გვიამბობს...

შორენა ქუმსიაშვილი
შორენა ქუმსიაშვილი

ბავშვობიდან პრანჭია ვიყავი, თავად ვქმნიდი კაბის მოდელებს. ჩემს მეგობრებსაც მე ვურჩევდი სტილს, ვუხატავდი რა და როგორი სამოსი მოუხდებოდათ. თბილისში დავიბადე და ექვს წლამდე ბარათაშვილის ხიდთან ვცხოვრობდით. კარგად მახსოვს ის ქვაფენილი, აღმართი და ჩვენი ქუჩა... მერე გლდანში გადავედით და იქ ვსწავლობდი 39-ე სკოლაში. რას აღარ მოვკიდე ხელი, რომ აქეთ არ წამოვსულიყავი, მაგრამ არაფერი გამომივიდა.

ემიგრაციაში ვარ ცხრა წელი, ამ დროის განმავლობაში ორჯერ ვიყავი საქართველოში. უსაბუთო ვარ, მაგრამ გავრისკე და გამიმართლა, რომ უკან უპრობლემოდ დავბრუნდი. თავიდან მივდიოდი საბერძნეთში, სადაც დედა, დეიდა და ნათესავები მყავდა, მაგრამ შემდეგ ისე მოხდა, რომ ხელი არ შემეწყო და უცებ მივიღე გადაწყვეტილება, წამოვსულიყავი იტალიაში, სადაც ჩვენი ოჯახის ახლობელი დარეჯან ნადირაძე დამხვდა. შვილივით მიმიღო.

მეგობრებთან ერთად
მეგობრებთან ერთად

იტალიაში ძალიან კარგ ოჯახში მოვხვდი, რამდენიმე დღეში დაბადების დღე მქონდა და აღვნიშნეთ, ამ ოჯახის ყველა წევრიც მაშინ გავიცანი.

თავს ძლიერ ადამიანად ვთვლი და ამიტომ აქაურობასთან შეგუება არ გამჭირვებია. თუმცა, მინდა–არ მინდა, სხვა რა გზაა? – ძლიერი უნდა ვიყო. უცხოეთში ყველაზე მეტად შვილები მენატრება, ჩემი ორი ბიჭი, რომლებიც სიცოცხლეს მირჩევნია. მათ გამო ყველაფერს ავიტან და გავუმკლავდები. ღმერთს მადლობა მინდა ვუთხრა, რომ ასეთი კარგი  შვილები მარგუნა.

კარანტინის დროს ძალიან მინდოდა თავი რამით გამერთო. მინდოდა მეხატა, მაგრამ არ მქონდა სახატავი ფანქრები და ქაღალდი, ამიტომ რვეულის ფურცლებზე ცარცით ხატვა დავიწყე. ერთ საღამოს ერთმა კეთილმა გოგომ, ნათია კაკაბაძემ, რომელსაც მაშინ კარგად არც ვიცნობდი, დამირეკა და მითხრა, შენს სახლთან ვდგავარ და გამომხედეო. გარეთ გასულს ნათია ფერადი ფანქრებით დამხვდა – საჩუქრად მომიტანა. ვერ წარმოიდგენთ, ჩემთვის ეს რა სიხარული იყო, ნათიამ ხატვის სტიმული მომცა. მაშინ დავრწმუნდი, რომ ქვეყნად არიან ადამიანები, რომლებიც იზიარებენ ჩემს სიხარულს, ამიტომ არ მინდა, რომ მათ იმედები გავუცრუო.

შორენა ქუმსიაშვილი
შორენა ქუმსიაშვილი

ნათიას სოციალურ ქსელში აქვს შექმნილი ჯგუფი, სადაც დამატებული ჰყავს ადამიანები, რომლებმაც ნიჭი გამოავლინეს სხვადასხვა სფეროში. მეც ასე მოვხვდი ამ ჯგუფში. როდესაც ჩემს ლექსს ან ნახატს ვდებდი ჯგუფში, ისინი მოწონებას იმსახურებდა. ეს ჩემთვის სტიმული იყო იმისთვის, რომ მეხატა და მეწერა. მუზა ღამეც მწვევია, ავმდგარვარ და რაღაც დამიწერია, ეს უდიდეს სიამოვნებას მანიჭებს.

შორენა ქუმსიაშვილის შემოქმედება
შორენა ქუმსიაშვილის შემოქმედება

ვოცნებობ, რომ პრობლემები მოვაგვარო და დარჩენილი ცხოვრება ჩემს შვილებთან და საყვარელ ადამიანებთან ერთად გავატარო. მინდა საქართველოში მალე დავბრუნდე და მქონდეს სამსახური ჩემი პროფესიით. ძალიან მენატრება ჩემი დედიკო და საყვარელი ადამიანები, რომლებიც მძიმე პერიოდში მამხნევებდნენ.

შორენა ქუმსიაშვილის შემოქმედება
შორენა ქუმსიაშვილის შემოქმედება

ჩემი ნება რომ იყოს, არც ერთ დედას არ გავუშვებდი შვილებისგან შორს, რადგან მათ დედა ახლოს სჭირდებათ. ღმერთს ვთხოვ, ისე აეწყოს ცხოვრება, რომ არც ერთ დედას არასოდეს დასჭირდეს პრობლემების გამო ოჯახიდან შორს წასვლა...

1232
სიცილია, ეოლიის კუნძულები

კვირის ასტროპროგნოზი: რას გვიმზადებენ ვარსკვლავები 6-12 ივლისის პერიოდში

0
(განახლებულია 13:20 05.07.2020)
ადამიანების უმრავლესობისთვის ეს კვირა იდეალური გახდება აწმყოსა და მომავლის შესაცვლელად. ამაში ასტროლოგების რჩევები დაგეხმარებათ

ახლა ვარსკვლავები იმდაგვარად არიან განწყობილი, რომ ადამიანებს დაეხმარებიან საქმეებში და სამუშაოსა და ახალი გატაცებებისთვის იდეალური პირობების შექმნისთვის. იმისთვის, რომ წარმატებებს მიაღწიოთ, პირველ რიგში პოზიტიური განწყობა უნდა შეიქმნათ – იფიქროთ კარგზე, დადებით მომავალზე და გახსოვდეთ, რომ სიტყვასა და აზრს უდიდესი ძალა აქვს.

ვერძი

ვერძებისთვის ძალიან მნიშვნელოვანი და ხელსაყრელი პერიოდი იწყება ახალი წამოწყებებისთვის. თუ გსურთ, ბიზნესსა და სამუშაოზე წარმატებებს მიაღწიოთ, უნდა იფიქროთ იმაზე, თუ როგორ დაიწყოთ რაღაც ახალი და საინტერესო. მაღალი პროდუქტიულობისთვის დაიცავით დღის რეჟიმი – ეს გააძლიერებს თქვენს ბიოველს და გააუმჯობესებს განწყობას.

მთლიანობაში კვირა მრავალფეროვანი იქნება. კვირის ბოლოს უკვე დაინახავთ თქვენი შრომისა და ძალისხმევის პირველ ნაყოფს. ასტროლოგები გირჩევენ, მეტად კეთილგანწყობილი იყოთ გარშემომყოფების მიმართ, დაეხმაროთ მათ რთულ ვითარებებში.

კურო

კუროებისთვის ეს კვირა წარმატებული და პრობლემური დღეების მონაცვლეობაში ჩაივლის. პოზიტიური განწყობა დაგეხმარებათ ბარიერების გადალახვაში სამუშაო თუ სასიყვარულო სფეროებში ყველაზე არახელსაყრელი დღეებია 7 და 11 ივლისი, ხოლო ყველაზე ხელსაყრელი – 6 და 12 ივლისი.

უქმეებზე ასტროლოგები გირჩევენ, კარგად დაისვენოთ. გექნებათ არჩევნის საშუალება – დაისვენოთ მარტპმ თუ მეგორბებთან და ახლობლებთან ერთად. მთავარი თქვენი სურვილია – გააკეთეთ ის, რაც გსურთ, მცირეოდენ ეჭვსაც კი გაუგებრობების გამოწვევა შეუძლია.

ტყუპი

ტყუპებს ენერგიის შევსება გესაჭიროებათ, რათა პოზიტივით დაიმუხტოთ. ამ შვიდ დღეში მრავალი მოვლენა შეიძლება მოხდეს, მათ შორის, უსიამოვნოც. ძალიან მნიშვნელოვანია, რომ პრობლემებს ფილოსოფიურად შეხედოთ და აღიქვათ, როგორც ცხოვრებისეული გამოცდილებისა და ახალი ცოდნის შეძენის ხერხი.

მარტოხელა ტყუპებს მეორე ნახევრის ძებნაში ძალიან გაგიმართლებთ. ეს ძალზე პროდუქტიული კვირა იქნება ახალი ნაცნობობის თვალსაზრისით. ახალი ნაცნობებიდან ვინმე, შესაძლოა, თქვენს ცხოვრებაში ცვლილებების ტალღის „მიზეზი“ გახდეს. კარგი იქნება, თუ გააქტიურდებით სოციალურ ქსელებში.

კირჩხიბი

ამ კვირაში მუხლჩაუხრელად უნდა იშრომოთ, მაგრამ ამასთან, არ უნდა დაივიწყოთ დასვენებაც. გადაღლა. შესაძლოა, ძალიან ცუდად აისახოს თქვენს განწყობაზე. დასვენების სასარგებლო საშუალება იქნება სპორტი ან მსუბუქი ფიზიკური დატვირთვები, მედიტაცია.

კვირა შესანიშნავად მიესადაგება ფინანსურ ოპერაციებსა და ფულთან დაკავშირებული საკითხების გადაწყვეტას. სასიყვარულო საქმეებში უფრო უქმეებზე გაგიმართლებთ, როდესაც სამუშაოზე ფიქრები მეორე პლანზე გადაიწევს. შეგიძლიათ დანიშნოთ პაემანი. თავისუფალ დროს ფლირტზე უარი არ თქვათ.

ლომი

კვირის განმავლობაში დიდი ყურადღება გესაჭიროებათ. ნუ გამოედევნებით ორ კურდღელს ერთდროულად. დროა, ყველაზე მნიშვნელოვან საქმეებს მიხედოთ, რომელთა გადადებაც უკვე აღარ შეიძლება. მათ თუ გადაწყვეტთ, შვებით ამოისუნთქავთ და თავდაჯერებულობას შეიძენთ. გაითვალისწინეთ, რომ ამ კვირაში დამოუკიდებლად მუშაობა აჯობებს.

ამასთან, მოსალოდნელია ენერგეტიკული ვამპირების გააქტიურება. ერიდეთ მათ, ვინც გარშემომყოფების სიკეთით სარგებლობენ. სასიყვარულო საქმეებში ჯერჯერობით ყველაფერი ისე დატოვეთ, როგორც არის და მიჰყევით დინებას. დასვენების კარგი საშუალება იქნება შოპინგი.

ქალწული

ასტროლოგები გირჩევენ, ამ კვირაში თქვენს საყვარელ გატაცებას დაუთმოთ დრო. სამსახურში ძალიან  ნუ გადაიღლებით. ასე დაზოგავთ ძალებსა და ენერგიას, რომელიც ორ ყველაზე არასახარბიელო დღეს – პარასკევსა და შაბათს დაგჭირდებათ. ამ ორ დღეს ყველაზე მეტად დასვენება იქნება უპრიანი.

რაც შეეხება სიყვარულს, ამ სფეროში სწრაფი შედეგების იმედი ნუ გექნებათ. ასტროლოგები გირჩევენ, საყვარელ ადამიანთან, ოჯახის წევრებთან დაძაბულობა განმუხტოთ. მარტოხელებისთვის აჯობებს, თუ სამუშაოზე იფიქრებთ და არა ურთიერთობებზე. ზედმეტად არაფრით გადაიტვირთოთ გონება – ეს თქვენს პროდუქტიულობაზე აისახება.

სასწორი

თქვენთვის ამ კვირაში ყველაზე მნიშვნელოვანი ფინანსური სფერო გახდება. 6–9 ივლისის პერიოდი საუკეთესოა იმისთვის, რომ დააბრუნოთ ვალები, შეიძინოთ სასურველი ნივთები და შეიცვალოთ გარემო. შესანიშნავი დროა ახალი იდეების წამოყენებისთვის.

ყველაზე მეტად გაუმართლებს სასწორებს, რომელთა პროფესია დაკავშირებულია, რეკლამასთან, გაყიდვებთან, კლიენტების მოზიდვასთან. ასევე იღბალი არ გიმტყუნებთ სიყვარულში. ეს ის დროა, როცა შეგიძლიათ სამუშაო და სიყვარული ორ სფეროდ არ გაყოთ – მუშაობა და არშიყი ერთმანეთს ხელს არ შეუშლის.

მორიელი

კვირა არცთუ პოზიტიური ნოტით დაიწყება. ორშაბათსა და სამშაბათს, შესაძლოა, ნეგატიური აზრები მოგეძალოთ. უარყოფითი ემოციების დაძლევაში ფიზიკური აქტიურობა დაგეხმარებათ – მეტი იმოძრავეთ.

გარშემომყოფებთან ურთიერთობების თვალსაზრისით ასტროლოგები გირჩევენ, დასკვნების გამოტანა არ იჩქაროთ. ადამიანი, ერთი შეხედვით, შესაძლოა, ცუდი მოგეჩვენოთ, მაგრამ შემდეგ ის სასიამოვნო აღმოჩნდეს, ან პირიქით – ერთი შეხედვით გულღია და გულწრფელმა ადამიანმა თავი ძალიან ნეგატიურად წარმოაჩინოს. ახლა მნიშვნელოვანია, ადამიანზე მისი საქციელით იმსჯელოთ და არა გარეგნობით.

მშვილდოსანი

მშვილდოსნებს ძალზე იღბლიანი კვირა გელოდებათ. მოსალოდნელი არ არის განწყობის მკვეთრი და ხშირი ცვლა და წარუმატებლობები. პლანეტების განლაგება დაგეხმარებათ აზრების მატერიალიზებაში, ამიტომ ეცადეთ, თქვენი ფიქრები პოზიტიური იყოს.

კვირის პირველი დღე მოვალეობების შესრულებას დაუთმეთ, 8 ივლისიდან კი ექსპერიმენტებს შეგიძლიათ დაუთმოთ დრო. ამ კვირაში გეძლევათ შანსი, რომ თქვენი ცხოვრების სიყვარულს შეხვდეთ, ან გაიცნოთ ადამიანები, რომლებიც მომავალში თქვენი ერთგული მეგობრები გახდებიან.

თხის რქა

თხის რქებისთვის ამ კვირაში ძირითადი სფერო სიყვარული გახდება. არ შეუშინდეთ ახალ ნაცნობობას, ფლირტს, რომანტიკას. ვისაც უკვე ჰყავს პარტნიორი, მან პატიება უნდა ისწავლოს – არ არის გამორიცხული, რომ თქვენმა პარტნიორმა დაუფიქრებელი ნაბიჯი გადადგას, რასაც ნეგატიური შედეგები მოჰყვება.

ამ კვირაში არასასურველია ძვირად ღირებული ნივთების შეძენა. თუ მოგიწიათ დაუგეგმავად ამის გაკეთება, რჩევისთვის აუცილებლად მიმართეთ ახლობლებს. სამსახურში, შესაძლოა, მნიშვნელოვანი დავალება მოგცენ – ეს თქვენთვის თავის წარმოჩენის შესანიშნავი შანსი იქნება.

მერწყული

მერწყულებისთვის დგება დრო, როდესაც კატეგორიულად იკრძალება გარისკვა და დაუფიქრებელი ნაბიჯების გადადგმა ცხოვრების ყველა სფეროში. უნდა დაეყრდნოთ მხოლოდ საკუთარ გონებასა და ცხოვრებისეულ გამოცდილებას და არ მოუსმინოთ ინტუიციას, რომელიც ვარსკვლავების ნეგატიური ენერგიის გამო დაბლოკილი იქნება. მოსალოდნელია უსიამოვნო შეხევდრები და დაუგეგმავი საქმეები, ასე რომ, კვირის ბოლოს დაღლილობა შეგახსენებთ თავს.

ნეგატივთან გამკლავებისთვის მნიშვნელოვანია, რომ კარგად გეძინოთ და დაისვენოთ. უნდა გააცნობიეროთ, რომ პრობლემები გზაზე – ეს ცხოვრების განუყოფელი ნაწილია. ეცადეთ, ამისგან გაკვეთილი და ცხოვრებისეული გამოცდილება მიიღოთ და დიდი მნიშვნელობა არ მიანიჭოთ.

თევზები

ეს კვირა თევზებისთვის ძალზე დინამიკური იქნება, მაგრამ ყოველთვის ხელსაყრელი – არა. ზოგიერთ საკითხში გადაწყვეტილების მიღება, არჩევნის გაკეთება გულით მოგიწევთ და არა გონებით, ზოგიერთში – პირიქით.

სასიყვარულო ურთიერთობებს რაც შეეხება, აქ იდეალური დრო იწყება, განსაკუთრებით, თუ ურთიერთობები ახალი დაწყებულია. შესანიშნავი კვირაა ერთად გართობისთვის, ერთმანეთის უკეთ გაცნობისთვის. ძველ პარტნიორებს შორისაც კი მოსალოდნელია, რომ რაღაც ახალი შეიტყოთ თქვენი საყვარელი ადამიანის შესახებ.

0