კრიზისი პარლამენტში

კრიზისი პარლამენტში უმრავლესობა გიორგი ვოლსკისა და გუგული მაღრაძის იმედად

258
(განახლებულია 15:42 15.11.2019)
ხელისუფლებამ მოახერხა და ქართული ოპოზიციური სპექტრი გააერთიანა. თუ ვინმეს წარმოედგინა, რომ ბურჯანაძე და ვაშაძე, ნათელაშვილი და კუკავა, ბესელია და ჩარკვიანი, უსუფაშვილი და ხაზარაძე ერთად დადგებოდნენ რუსთაველზე, ღმერთმა გაუმარჯოს! მე კი ნამდვილად ვერ წარმოვიდგენდი...

თუ ამ ხალხს ირმა ინაშვილი და ზვიად ძიძიგურის კონსერვატორებიც შეუერთდნენ, აღარც იმის გამორიცხვა შეიძლება, რომ ჩუგოშვილი და ხულორდავა ხალხთან ჩამოვიდნენ და, თუ მთლად კარვებში არ გაათევენ ღამეს, დღისით მაინც დაუდგნენ გვერდით ელენე ხოშტარიასა და თინა ბოკუჩავას.

როგორც ჩანს, დასავლურ ორგანიზაციებს მაინც იმედი ჰქონდათ, რომ „ქართულ ოცნებას“ ლამაზად და ხავერდოვნად, პროპორციული არჩევნებით შეცვლიდნენ. არ გამოდის ეს ისეთ ქვეყანაში, სადაც დეპუტატობა და მთავრობის წევრობა, ლამისაა, ყველა პრივილეგიასთან ასოცირდება.

თუმცა დასავლელი ექსპერტები მაინც არ ელოდნენ, რომ მმართველი პარტიის თავმჯდომარე ასე დღისით-მზისით უარყოფდა საკუთარ სიტყვებს. საინტერესოა, თუ ვინმეს სჯერა, რომ ნინო წილოსანი და თენგიზ ხუბულური დამოუკიდებლად მიიღებდნენ გადაწყვეტილებას – მიეცათ თუ არა ხმა კანონპროექტისთვის. აი, ბესელიას მიერ ინიცირებულ მოსმენების კანონპროექტზე თავის დროზე სწორედ პარტიის ხელმძღვანელობა ურეკავდა დეპუტატებს – ხმა მიეცითო და შემდეგ ურჩებთან საქმეში სხვა ორგანოები ერთვებოდნენ.

ახლა კი ასეთი ძალისხმევა არ ყოფილა. მოხდა კი პირიქით. უბრალოდ, ამ პროცესმა გამოაჩინა, ვის აქვს რეალური გავლენები „ოცნებაში“, ვისი პოლიტიკური კარიერა არ გასწირეს და ხმა მიაცემინეს პროპორციული არჩევნებისთვის და ვინ იბრძვის გადარჩენისათვის და არ აქვს სამომავლო გარანტიები.

„ქართული ოცნების“ ის ნაწილი, რომელიც გუშინ პარტიიდან წამოვიდა, კვირიკაშვილის გუნდადაა ცნობილი, თუმცა, მაგალითად, თამარ ჩუგოშვილი პირადად ბიძინა ივანიშვილის რჩეული იყო.

© Sputnik / Shota Nozadze
მომიტინგეებმა რუსთაველის გამზირზე კარვები გაშალეს - ვიდეო

დღესვე გაირკვა ორი მეტად მნიშვნელოვანი ამბავი. ერთი, რომ ჩუგოშვილი არ გამორიცხავს საპარლამენტო ფრაქციის შექმნას. ეს იმას ნიშნავს, რომ მალე პარლამენტში ახალი პროდასავლური ფრაქცია დარეგისტრირდება. გარდა მმართველი პარტიიდან გუშინ წასული დეპუტატებისა, ფრაქციას შეუერთდებიან ლევან კობერიძე და ლევან გოგიჩაიშვილი. სავარაუდოდ, უმრავლესობას დატოვებენ კონსერვატორებიც, თუ ასეთი შეთანხმება შედგა ბიძინა ივანიშვილთან, რომ მომავალ არჩევნებში დამოუკიდებლად მიიღონ მონაწილეობა. რისი 3-პროცენტიანი ბარიერის გადამლახავი არიან, მაგრამ იმავეს აპირებენ გია ჟორჟოლიანი და მწვანე გია გაჩეჩილაძეც. თუმცა რა სარგებლობა მოუტანა მათი პარლამენტში 8-წლიანმა ყოფნამ საქართველოს მოსახლეობას, ძნელი სათქმელია.

მეორე მნიშვნელოვანი ამბავი კი ისაა, რომ დღეს აშშ-ის საელჩოში გიორგი მარგველაშვილი, გიორგი კვირიკაშვილი, დავით უსუფაშვილი და მამუკა ხაზარაძე მიიწვიეს. აი, რეალურად ესაა ის ხალხი, ვისზეც, მათ გუნდებთან ერთად, ფსონს დადებს მომავალში დასავლეთი პარლამენტში მყოფ ჩუგოშვილსა და ასევე გაერთიანებულ ოპოზიციასთან ერთად. არც შალვა ნათელაშვილის რეიტინგია ხელწამოსაკრავი, რადგან დღევანდელი კვლევებით ის თავისუფლად ხვდება პარლამენტში 3-პროცენტიანი ბარიერის არსებობის შემთხვევაშიც.

აი, საახალწლოდ კი პარლამენტში ნამდვილად ახალი კონფიგურაცია შედგება. უკვე რამდენიმე კომიტეტს თავმჯდომარე არ ჰყავს. გაბრაზებული მაჟორიტარებისთვის ამ პოსტების მიცემა „აღიარებითი ჩვენება“ იქნება. ჰოდა, რადგან უმრავლესობაში მართლაც ცოტაა სპიკერი და ინგლისურისა და კომპიუტერის მცოდნე, ახლა ვოლსკისა და გუგული მაღრაძის დრო დადგა. სწორედ მათ შეუძლიათ დაიკავონ განათლების კომიტეტისა და საგარეო კომიტეტის თავმჯდომარეების სავარძლები. მართალია, წესით, მოვალეობას კომიტეტში პირველი მოადგილე უნდა ასრულებდეს, მაგრამ ამ კომიტეტებში მოადგილეებიც კვირიკაშვილის კლასელები და ახლობლები არიან.

რა სცენარით შეიძლება განვითარდეს მოვლენები? სავარაუდოდ, ირაკლი კობახიძეს არ უმხელენ, მაგრამ არჩევნები ალბათ მართლაც გაზაფხულზე ჩატარდება.

აბა, 1500 შეხვედრა რისთვის ჩაატარეს მაჟორიტარებმა რეგიონებში? ან ამდენი პროექტის დაანონსება რა იყო და ამხელა სარეკლამო თანხა რაში დაიხარჯა?

სავარაუდოდ, ჩავარდება ბიუჯეტიც და ოცნებაც პენსიების 300 ლარამდე ზრდის შესახებ.

ამ პირობებში მაჟორიტარული სისტემით, ბუნებრივია, მმართველ პარტიას არჩევნების მოგების მეტი შანსი აქვს, მაგრამ ისიც ძალიან მნიშვნელოვანია, როგორ კამპანიას ჩაატარებს და რა თანხები ჩაიდება ოპოზიციის წინასაარჩევნო ძალისხმევაში.

ხელისუფლების შეცვლა ყველა საარჩევნო სისტემითაა შესაძლებელი. ეს 2012 წელსაც გამოჩნდა. არსებობს კიდევ ერთი, რევოლუციური გამოცდილება, თუმცა ქუჩის პროცესები ყოველთვის ვარდებითა და ხავერდოვანი გადატრიალებით არ სრულდება. 1991 წლის მსგავს დაპირისპირებას კი ჩვენი მყიფე სახელმწიფო ვერ გადაიტანს. ასე რომ, დიდ პოეტს დავესესხები: „ჭკუით, ქართველებო!" და ეს ხელისუფლებასაც ეხება და ოპოზიციასაც.

 

258
თემები:
ახალი საპროტესტო ტალღა თბილისში: 2019 წლის ნოემბერი (171)
პრემიერ-მინისტრი და მთავრობის წევრები

შეიცვლება თუ არა საქართველოს მთავრობა არჩევნებამდე?

65
(განახლებულია 21:38 26.05.2020)
ცნობილია, რომ უღელტეხილზე ცხენებს არ ცვლიან. შესაბამისად, ხმები გიორგი გახარიას ოპოზიციაში წასვლისა და მთავრობის ცვლილების თაობაზე არათუ გადაჭარბებული, არამედ არარეალისტურიც უნდა იყოს.

თუმცა, მოდით, მივყვეთ თანმიმდევრობით, რამ გამოიწვია ვრცელი საუბრები სამთავრობო ცვლილებების შესახებ.

მასმედიაში გავრცელებული ინფორმაცია ასე გამოიყურება: პრემიერის პოსტზე გახარიას ლილუაშვილი შეცვლის, სუს-ის უფროსი ანზორ ჩუბინიძე ხდება, ხოლო სახელმწიფო დაცვის სპეციალურ სამსახურს გრიგოლ ლილუაშვილის დეიდაშვილი და მისი ამჟამინდელი მოადგილე გიგა ნიკოლაიშვილი დაიკავებს.

ინფორმაციის პირველწყარო უცნობია, თუმცა ამ ხმებს აქტიურად ავრცელებს „მთავარი არხის“ დამფუძნებელი ნიკა გვარამია.

ბუნებრივია, სამთავრობო ცვლილებების თემა ყოველთვის აქტუალური და მნიშვნელოვანია, მაგრამ ამ შემთხვევაში ვერსიების აგორებას ხელი სახელმწიფო მინისტრის ქეთი ციხელაშვილის ელჩად მივლინებამ შეუწყო.

თუ ვინმეს ავსტრიის ელჩობა სახელმწიფო მინისტრობაზე ნაკლები თანამდებობა ჰგონია, ეს მისი პრობლემაა, მაგრამ

ციხელაშვილი ამ პოსტზე ბევრად უფრო ეფექტური იქნება, ვიდრე აფხაზეთისა და სამაჩაბლოს დაბრუნების კუთხით. ამიტომ მას ეს ცვლილება, სავარაუდოდ, სულაც არ ეწყინებოდა.

ისევე, როგორც სახელისუფლებო გუნდი, როგორც ჩანს, წინასწარ ცდილობს იმ ადამიანების დასაქმება-დაფუძნებას, ვინც მომავალ საპარლამენტო გუნდში ვეღარ მოხვდება.

მაგალითად, რამდენიმე თვის წინ ტექნიკურ უნივერსიტეტში მიავლინეს დეპუტატი კარლო კოპალიანი. ჩვენი ინფორმაციით, მოლაპარაკებები სხვა დეპუტატებთანაც დაწყებულია და საარჩევნო დღისთვის ყველა მათგანს ექნება გარკვეული მონახაზი, სად გააგრძელებს საქმიანობას.

მთავრობის შეცვლაზე გავრცელებული ხმები ოპოზიციის ფანტაზია ჰგონია პოლიტოლოგ რამაზ საყვარელიძეს.

ის ამბობს, რომ ეს სურვილები და ვნებები ოპოზიციას გაზაფხულსა და შემოდგომაზე უმძაფრდება.

„გახარიას 20 ივნისის შემდეგ ვერაფერი დააკლეს და, მით უმეტეს, ახლა, როცა მისი სახელი კრიზისულ სიტუაციაში კარგ მენეჯერობას დაუკავშირდა", – ამბობს საყვარელიძე.

დაანონსებული ცვლილებებით გაკვირვებულია ექსპერტი ხათუნა ლაგაზიძე. მისი თქმით, გახარიას ფაქტორი დღეს დიდია, დიდია მის მიმართ ნდობა და ამ ფაქტორის გარეშე მმართველმა გუნდმა არჩევნები შესაძლოა წააგოს კიდეც.

ხელისუფლებაში ცვლილებებს არათუ გამორიცხავს, არამედ ელოდება კიდეც ექსპერტი ვახტანგ ძაბირაძე, მაგრამ – არჩევნების შემდეგ. ის თვლის, რომ საარჩევნოდ რაიმე დრამატული ცვლილებები მოსალოდნელი არაა და რეალური სიახლეები სწორედ არჩევნების შემდეგ მოხდება.

ზოგადად კი ცნობილი ამბავია, რომ პოლიტიკოსისთვის ყველანაირი ხმაურიანი ინფორმაცია სასარგებლოა, გარდა ნეკროლოგისა. საქართველოს მთავრობას და, კონკრეტულად, გახარიას დღეს გაცილებით სერიოზული ბრძოლები ელოდება წინ სიღარიბის, შიმშილისა და გაჭირვების სახით, რომ აღარაფერი ვთქვათ კორონავირუსზე. სწორედ ამ გამოწვევებზე პასუხი იქნება 2020-ის არჩევნების შედეგების განმაპირობებელი ფაქტორი. თუმცა, ბუნებრივია, პოლიტიკაში არც ქვედა დინებებისა და შიდა ომების ფაქტორების გამორიცხვა შეიძლება.

65
საქართველოს პარლამენტი

როგორ გაიყოფს ოპოზიცია ცოცხალი დათვის ტყავს?

153
(განახლებულია 21:25 23.05.2020)
გახსოვთ, ერთი ქართული ანდაზაა, ცოცხალი დათვის ტყავის გაყოფის თაობაზე? თუ გასულ კვირას ოპოზიციის სიხარულსა და იწილო-ბიწილოს დააკვირდებოდით, შეუძლებელია, ეს ამბავი არ გაგხსენებოდათ.

აქაოდა, ელჩების ძალისხმევით ოქრუაშვილისა და უგულავას ციხიდან გათავისუფლებას მივაღწიეთო, კორონობიის გამო ლეიბორისტების ბაღშიც შეიკრიბნენ და ხელებიც გამარჯვების ნიშნად აღმართეს. ამავე დროს ოპოზიციამ დაანონსა, 20 ივნისს დიდ პირბადეებიან აქციას გავმართავთო. მანამდე კი საკონსულტაციოდ მუშა რეჟიმში გადაინაცვლეს. ერთადერთი ძალა, რომელიც არ კეკლუცობს და აცხადებს, ჩემს თამაშს ვთამაშობო, „ლელოა“. მათ ბარიერის გადალახვის პრობლემა წესით, საპარლამენტო არჩევნებზე არ უნდა ჰქონდეთ. ასევე მაჟორიტარების ნაწილში „ლელო“ ფიქრობს, რომ გაცილებით მეტი რესურსი აქვს და 30 იქნება თუ 72 ოლქი, საკუთარი მაჟორიტარობის კანდიდატები ეყოლება. საერთოდ, ეს არჩევნები რომ არნახულად რთული იქნება და განსაკუთრებული დატვირთვა მაჟორიტარებსა და ფინანსურ რესურსზე მოვა, ამას არავინ უარყოფს. შესაბამისად, ყველა პარტია ეცდება, საკუთარი ინტერესები მაქსიმალურად დაიცვას.

სასიამოვნო, მაგრამ ცოტა სასაცილოა პრემიერობის კანდიდატების დასახელება. ზოგადად, ამომრჩეველმა ზუსტად უნდა იცოდეს, თუ პარტიას ხმას მისცემს, რა პროგრამას და ვის სთავაზობს ის თანამდებობებზე, მაგრამ ქართული რეალობისათვის ჯერ ეს ცოტა ნაადრევიც აღმოჩნდა და - უცნაურიც. კაბინეტი ჯერ არ ვიცით, მაგრამ პრემიერად კი გიორგი ვაშაძე უმცროსი შემოთავაზებული გვყავს. არავინ უარყოფს, რომ ის უდავოდ ნიჭიერი ახალგაზრდაა, მაგრამ რამდენად დამოუკიდებელი და რეალისტურია მისი გეგმები და რამდენად არ „გადაირევა“ არჩევის შემთხვევაში წინა პრეზიდენტივით, ჯერ არავინ იცის. ოპოზიცია ასევე გიგა ბოკერიას, გრიგოლ ვაშაძისა და სხვათა კანდიდატურებსაც განიხილავს.

როგორც ჩანს, ამ არჩევნებზე ძალთა ისეთი გადანაწილება, როგორიცაა ყველა მინუს ერთი, არ გვექნება და არც ოპოზიციაში იქნება დიდი ერთსულოვნება, რასაც ძალიანაც წარმატებით წაახალისებს მმართველი პარტია.

ისეთი გამოცდილი პოლიტიკოსიც კი, როგორიც ზვიად ძიძიგურია, ამბობს, რომ 2020-ის არჩევნები იქნება ყველაზე რთული, რაც საქართველოს დამოუკიდებლობის წლებში ჰქონია.

როგორც ჩანს, დიდი იქნება საერთაშორისო ინტერესიც და თუ კორონამ არ შეგვიშალა ხელი, დამკვირვებლებიც ბლომად ჩამოვლენ.

დღევანდელი მდგომარებით ისე ჩანს, რომ საკონსტიტუციო ცვლილებების მიღებას ხელი არაფერმა უნდა შეუშალოს. გიორგი რურუას პოლიტპატიმრობა ცალკე განხილვის საგანია, მაგრამ მაჰათმა განდიც რომ იყოს, ნამდვილად არაა ეს ის თემა, რის გამოც წვალებით მიღწეული და თითქმის პროპორციულთან მიახლოებული საარჩევნო კოდექსი უნდა გაიცვალოს. სავარაუდოა, რომ ამ თემაზე დიპლომატები „ნაცებსა” და „ევრონაცებსაც“ „ტკბილად” დაელაპარაკებიან, რადგან ეს სისტემა, რომელიც 1 პროცენტიან პარტიებსაც კი აძლევს პარლამენტში მოხვედრის შანსს, ყველაზე მეტად, მმართველი პარტიის შემდეგ, მათ არ აძლევთ ხელს, რადგან ამ შემთხვევაში მრავალფეროვნება ჩნდება და მათი ხმებიც შესაბამისად, იქსაქსება.

როგორც ჩანს, ოპოზიცია 20 ივნისის აქციის ორგანიზებასა და კონსულტაციებში „მოკლავს” დროს უკეთეს მომავლამდე. და თუ საერთო პრემიერზე ვერა, იმედია, მაჟორიტარობის კანდიდატებზე მაინც შეთანხმდებიან. ყველაზე რთული და საინტერესოსი რა მოგახსენოთ და ოქტომბრის არჩევნები რომ პირბადეების ფონზე ჩაივლის, დღესაც აშკარაა. წამზომი კი უკვე ჩართულია და თუ პარტიას და მის ლიდერს მხოლოდ პარლამენტში მოხვედრა და ტრიბუნის შოვნა არ დაუსახავს მიზნად, უახლოეს მომავალში თავდადებულ შრომას უნდა შეუდგნენ.

 

რედაქცია შესაძლოა არ ეთანხმებოდეს ავტორის მოსაზრებას!

153
დაცარიელებული მცხეთა

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/27 მაისი

78331
23 მაისიდან საქართველოში საგანგებო მდგომარეობა აღარ მოქმედებს, მაგრამ მთავრობამ შეზღუდვების ნაწილი ძალაში დატოვა.

თბილისი, 27 მაისი – Sputnik. საგანგებო მდგომარეობის რეჟიმის მოხსნის შემდეგ, კორონავირუსით ინფიცირებულთა რაოდენობის ზრდის თავიდან აცილების მიზნით, საქართველოს მთავრობამ შეზღუდვების და აკრძალვების ნაწილი ძალაში დატოვა. ეს შესაძლებელი გახდა პარლამენტის მიერ დამტკიცებული ცვლილებებით კანონში „საზოგადოებრივი ჯანმრთელობის შესახებ“. ახლა მთავრობას მიენიჭა უფლება შემოიღოს შეზღუდვები საგანგებო მდგომარეობის რეჟიმის მოხსნის შემდეგ.

ცვლილებები 15 ივლისამდე იმოქმედებს.

მოქმედი ძირითადი შეზღუდვების ჩამონათვალი:

  • დაკეტილია რესტორნები, სასტუმროები, ფეხსაცმლისა და ტანსაცმლის მაღაზიები, სავაჭრო მოლები, სპორტდარბაზები;
  • რესტორნებს აქვთ მხოლოდ კერძების მიწოდების სერვისით მუშაობის უფლება, აგრეთვე ფეხსაცმლისა და ტანსაცმლის მაღაზიებს შეუძლიათ ონლაინ ვაჭრობა;
  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე
  • აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;

მთავრობა საქართველოს ყველა მოქალაქეს მოქმედი რეკომენდაციების დაცვისკენ მოუწოდებს.

ტრანსპორტი

  • აკრძალულია საერთაშორისო სამგზავრო სახმელეთო და საზღვაო მიმოსვლა;
  • აკრძალულია პირდაპირი საერთაშორისო რეგულარული ავიარეისები, ჩარტერულის გარდა, რომელიც ინიშნება მხოლოდ საქართველოს მოქალაქეთა დაბრუნების მიზნით;
  • აკრძალულია სარკინიგზო ტრანსპორტით მგზავრთა გადაყვანა;
  • აკრძალულია საქალაქთაშორისო და მუნიციპალიტეტების ტერიტორიაზე მგზავრთა გადაყვანა სამარშრუტო ტაქსებითა და ავტობუსებით;
  • აკრძალულია საზოგადოებრივი ტრანსპორტით, მათ შორის, მეტროპოლიტენითა და საბაგიროთი გადაადგილება.

საზოგადოებრივი ცხოვრება

  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • ყველა სახის ტრენინგი, კონფერენცია და სემინარი უნდა ჩატარდეს დისტანციურად;
  • სკოლებსა და უნივერსიტეტებში სასწავლო პროცესი კვლავ დისტანციურად განხორციელდება;
  • დასაშვებია უნივერსიტეტში პრაქტიკული/ლაბორატორიული სამუშაოებისა და გამოცდების ჩატარება არადისტანციურად, მაგრამ რეკომენდაციების შესაბამისად;
  • კულტურული ღონისძიებები მხოლოდ დისტანციური ფორმით ჩატარდება;
  • აკრძალულია მასობრივი სპორტული ღონისძიებების, შეკრებების და შეჯიბრებების ჩატარება;

ეკონომიკური საქმიანობა

  • აკრძალულია რესტორნებში, ბარებში, კაფეებსა და სასადილოებში მომხმარებლის ადგილზე კვების მომსახურება;
  • აკრძალულია ფეხსაცმლისა და ტანსაცმლის მაღაზიების მუშაობა;
  • აკრძალულია სავაჭრო ცენტრების და ბაზრობების მუშაობა, აგრარული ბაზრობების გარდა;
  • აკრძალულია სპორტული, კულტურული და გასართობი ღონისძიებების ორგანიზება და გამართვა;
  • აკრძალულია ვალუტის გადამცვლელი პუნქტების მუშაობა;
  • აკრძალულია სპორტულ-გამაჯანსაღებელი აქტივობები და პროცედურები.

ამ მომენტისათვის ინფიცირებულთა რაოდენობა 732 ადამიანს შეადგენს, აქედან 537 გამოჯანმრთელდა, 12 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს. ეპიდემიოლოგები მიიჩნევენ, რომ ჯერჯერობით აუცილებელია სოციალური დისტანციის უზრუნველყოფა და მოქალაქეთა მობილობის შეზღუდვა.

კორონავირუსით ინფიცირების ახალი შემთხვევების უმრავლესობა შიდა გადაცემას უკავშირდება.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 3076, სტაციონარებში მეთვალყურეობის ქვეშ კი 300 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე StopCoV.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
78331
თემები:
COVID-19 საქართველოში