მამუკა ხაზარაძე

გახდება თუ არა მამუკა ხაზარაძისა და გიორგი კვირიკაშვილის ტანდემი მესამე ძალა?

371
(განახლებულია 19:15 09.07.2019)
იმ დროს, როცა ლარი მკვეთრ ვარდნას განაგრძობს და რუსეთიდან მოსალოდნელი სანქციების გამო მისი კიდევ უფრო გაუფასურებაა სავარაუდო, ბანკირები პოლიტიკაში მოსვლას აანონსებენ.

დიდი ხანია მასმედია წერს ე.წ. მდიდრების პარტიის შესახებ, რომელშიც მამუკა ხაზარაძესთან ერთად გიორგი კვირიკაშვილი და მისი მთავრობის რამდენიმე წევრი მოიაზრება. მათთან იქნებიან, სავარაუდოდ, პარლამენტში კვირიკაშვილის კვოტით მოხვედრილი დეპუტატების ერთი ნაწილიც.

მიმართვაში, რომელიც „თი-ბი-სი ბანკის“ დამფუძნებელმა დღეს გაავრცელა, ხელისუფლებასთან მის წყალგამყოფად 20 ივნისის ღამე დაასახელა. თუმცა დაპირისპირება, რეალურად, უფრო ადრე დაიწყო. ყველას კარგად გვახსოვს ანაკლიის ღრმაწყლოვან პორტთან დაკავშირებით პარლამენტში გამართული დებატები და ხაზარაძის დაპირისპირება გიორგი გახარიასთან. ქართველი ჟურნალისტები წერენ, რომ სწორედ გახარიამ დაუდო ბიძინა ივანიშვილს მაგიდაზე ჩანაწერები, რომელშიც ნათლად ჩანდა, როგორ ასმენდა კვირიკაშვილი დასავლელ დიპლომატებთან პარტიის ლიდერს და ამ ჩანაწერებმა გადაწყვიტა კვირიკაშვილის ხელისუფლებიდან ჩამოცილებაც.

როგორც ჩანს, ხელისუფლებას დიდი ხანია აქვს ინფორმაცია ხაზარაძე–კვირიკაშვილის პოლიტიკური ზრახვების შესახებ და მისი გავლენის ქვეშ მყოფი ყველაზე მაღალტირაჟიანი მედიასაშუალებით წარმოაჩენს მათ საქმიანობას.

ნამდვილად ჯობდა, ხაზარაძეს წინა რიგებში სწორედ ის ახალგაზრდები დაეყენებინა, ასე შეუპოვრად რომ აპროტესტებენ მოვლენებს. ანუ მათ რეალურად მეტი მხარდაჭერა ექნებოდათ, ვიდრე ხაზარაძე–კვირიკაშვილი–ქუმსიშვილის გაერთიანებას, მაგრამ არც ის უნდა დავივიწყოთ, რომ სამივე მათგანის წინააღმდეგ გამოძიებაა დაწყებული და პოლიტიკური აქტივობით ისინი ერთგვარ იმუნიტეტსაც მოიპოვებენ.

თავდაჭერით შეხვდა ხაზარაძის პოლიტიკაში შესვლას ოპოზიციური სპექტრი. თავდაცვის ყოფილი მინისტრი თინა ხიდაშელი თვლის, რომ ხაზარაძე ან ახლა უნდა წასულიყო პოლიტიკაში, ან საერთოდ არასოდეს აღარ ამოეღო ხმა. ხელისუფლებამ ის კუთხეში მიაყენა და სხვა არჩევანი აღარ დაუტოვა.

დიდი ხანია ეჭვობენ, რომ შარშანდელი ანტისამთავრობო აქციების უკანაც იგივე ჯგუფი იდგა და ის აფინანსებდა, თუმცა, ბუნებრივია, საპროტესტო აქციებზე მრავლად არიან რეალურად შეწუხებული მოქალაქეებიც. ის, რომ ქვეყანაში საპროტესტო მუხტი მაღალია, ნათლად ჩანს იქიდანაც, რომ გუშინ თბილისში ოთხი სხვადასხვა აქცია იმართებოდა.

საბედნიეროდ, პოლიციამ ამჯერად მეტი სიფრთხილით და კანონის ფარგლებში იმუშავა, თუმცა მათ რომ უშიშროების საბჭოს დახმარება და ანტიკრიზისული გეგმა სჭირდებათ, ფაქტია.

საბჭოს მდივნად კარგა ხანია გიორგი გახარია დაინიშნა, მაგრამ, როგორც ცნობილია, საბჭოს ჯერ აპარატი არ ჰყავს. სასურველია, თუ სახელისუფლებო წრეებში მაინც დაიდება სიტუაციის განმუხტვის რამდენიმე ვერსია.

ისევ ხაზარაძის მოძრაობას რომ დავუბრუნდეთ, მისი ახალი სახეების გამოჩენა სექტემბერშია მოსალოდნელი. უკვე გაცხადებულია მოძრაობის პროდასავლური კურსი. თუმცა, მაგალითად, პოლიტიკოსი და ნინო ბურჯანაძის თანამოაზრე გიორგი ახვლედიანი ფიქრობს, რომ ხაზარაძე კიდევ ერთ „ნაციონალური მოძრაობის ბიძაშვილ პარტიას“ შექმნის.

ნულოვანი ბარიერის წყალობით, ბუნებრივია, პარლამენტში ბევრი ისეთი პარტია აღმოჩნდება, ვისაც ფული, გავლენა და 15 ათასი მხარდამჭერი ჰყავს, მაგრამ პირადად მე და საქართველოს მოსახლეობის უდიდესი ნაწილიც, ალბათ, იმ პოლიტიკურ ძალას დაუჭერდა მხარს, რომელიც ადამიანურ ენაზე აგვიხსნის, რა ემართება ლარს, როგორ უნდა ირჩინოს თავი საშუალო სტატისტიკურმა ქართველმა არსებული ინფლაციისა და გაძვირებული ფასების ფონზე და როგორ ავაყვავოთ ქართული ეკონომიკა. მოკლედ, ქართული ერჰარდის გეგმა გვჭირდება.

პოლიტიკოსები ხშირად ჰპირდებიან ადამიანებს, ოქროს სარაიას აგიშენებთ, ჩემსას რომ მოვრჩები, მერეო. კვირიკაშვილმა უკვე აიშენა კოშკი პოლიტიკაში ყოფნისას. ხაზარაძესაც უნდა ჰქონდეს, წესით, როგორც ბანკირს. ვნახოთ, რით მოხიბლავენ ისინი საქართველოს მოსახლეობას.

რედაქცია შესაძლოა არ ეთანხმებოდეს ავტორის მოსაზრებას!

371
ვაქცინაზე მუშობა

მოსაზრება: „სავაქცინო რბოლა“ დასავლეთი რუსეთს ადანაშაულებს

47
(განახლებულია 18:56 03.08.2020)
მას შემდეგ, რაც კორონავირუსის პანდემიამ მუხლებზე დააჩოქა მსოფლიო ეკონომიკა, დაახლოებით ერთ თვეში პოლიტიკურ და მედიასამყაროში საერთაშორისო შეჯიბრების ახალი „ჟანრი“ გაჩნდა, რომელსაც ირონიულად „სავაქცინო რბოლა“ შეიძლება ეწოდოს.

ივან დანილოვი

იმ ხილული ფსიქოლოგიური ტრავმის გათვალისწინებით, რომელიც კორონავირუსმა ორჯერ მიაყენა კოლექტიურ დასავლეთს, ამ რბოლაში გამარჯვების საკითხი უბრალოდ პოლიტიკურად კი არა, პოლიტიკურად პრინციპული გახდა დასავლური საზოგადოების საკუთარი თავისადმი პატივისცემის შენარჩუნების თვალსაზრისით.

ადამიანისთვის, რომელიც ევროპული ჰუმანიზმის საუკეთესო ტრადიციებზეა აღზრდილი, საკმაოდ რთულია გაიგოს, რატომაა შეპყრობილი თანამედროვე დასავლეთი „ვაქცინისთვის რბოლით“. თუმცა ამის ახსნა თანამედროვე აშშ-ის და დიდი ბრიტანეთის მთავარი ინდუსტრიების თვალსაზრისით შეიძლება ვცადოთ, ანუ პოლიტიკური და კომერციული პიარის თვალსაზრისით.

პიარ-სივრცეში თანამედროვე დასავლეთმა და ასევე შეერთებულმა შტატებმა და ბრიტანეთმა რამდენიმე სერიოზული „კორონავირუსული ტრავმა“ მიიღეს. ჯერ ერთი, გაირკვა, რომ შორეული ჩინეთი ეპიდემიას უკეთ გაუმკლავდა, პრობლემა უფრო ადრე გააცნობიერა და ეფექტურად შემოსაზღვრა ეკონომიკური ზარალი. ამ ფონზე აშშ და ბრიტანეთი, ასევე ევროკავშირის რამდენიმე ქვეყანა საკუთარი პატრიოტების თვალშიც კი არცთუ სახარბიელოდ გამოიყურებიან.  

შემდეგი დარტყმა კოლექტიური დასავლეთის თვითშეფასებას რუსთმა მიაყენა კორონავირუსისგან სიკვდილიანობის „შეურაცხმყოფლად დაბალი“ დონითა და მასობრივი ტესტირების აწყობით.

და ამ ფონზე კოლექტიური დასავლეთისთვის პირველობის საკითხი ვაქცინის წარმოებაში სასიცოცხლოდ მნიშვნელოვანი ხდება იმიჯის თვალსაზრისით, ვინაიდან საჭიროა გამოჩნდეს, რომ, მაგალითად, აშშ კვლავაც ნომერი პირველია მსოფლიოში.

ამის პარალელურად კი ამერიკული პრესის კითხვისას ჩნდება უცნაური შეგრძნება: პარტიული კუთვნილებისა თუ გამოცემების მფლობელთა მხრიდან დონალდ ტრამპის მიმართ სიმპათია-ანტიპათიიდან გამომდინარე, კონკრეტული რედაქციები ქომაგობენ ვაქცინაზე მომუშავე ამერიკულ, ბრიტანულ, გერმანულ ან ინდურ კომპანიებსა და უნივერსიტეტებს იმ მიზნით, რომ „ვაქცინისთვის რბოლაში“ გამარჯვებულის დაფნის გვირგვინი რომელიმე „სწორი“ ქვეყნის სტრუქტურას ერგოს, მაგრამ „ტრამპის წყეულმა რეჟიმმა“ ამისგან პოლიტიკური ბონუსები ვერ დაიწეროს.

ასეთი კონფლიქტი მაკროდონეზეც არსებობს: იმის ნაცვლად, რომ ნატოელ და G7-ელ პარტნიორებთან ძალისხმევის კოორდინაცია მოახდინოს, ოფიციალური ვაშინგტონი (ყოველ შემთხვევაში, ზოგი გერმანული მედიასაშუალების შეფასებით) ცდილობდა გერმანიისთვის პერსპექტიული ბიოტექნოლოგიური კომპანია (რომელსაც მნიშვნელოვანი ანტიკორონავირუსული აღმოჩენები ჰქონდა) „აეხია“ და აშშ-ში გადაეყვანა.

ამ კონტექსტში ლოგიკურია, რომ ნებისმიერი ინფორმაცია იმის თაობაზე, რომ რუსეთი ან ჩინეთი ახლოს არიან კორონავირუსზე მასობრივ ვაქცინასციასთან, დასავლურ საინფორმაციო ველში იმგვარ რეაქციას იწვევს, რომელიც არა იმდენად ბანალურ ალერგიას შეიძლება შედარდეს, რამდენადაც ნამდვილ ანაფილაქტურ შოკს.

რა თქმა უნდა, შეიძლება ვივარაუდოთ, რომ ამერიკელ სამედიცინო ჩინოვნიკებს ნამდვილად მხოლოდ პროფესიონალური მოსაზრებები ამოძრავებთ, მაგრამ ყველაფერი ზემოთქმულის გათვალისწინებით, არსებობს სერიოზული ეჭვები გარკვეულ პოლიტიკურ ანგაჟირებულობაზე. ამ რეაქციების მაგალითად შეიძლება მოვიყვანოთ მთავარი ამერიკელი ინფექციონისტის პოზიცია, რომელსაც The Wall Street Journal-ი აქვეყნებს.

„დოქტორმა ენტონი ფაუჩიმ კონგრესის COVID-19-ის საკითხების ქვეკომიტეტის სხდომაზე განაცხადა, რომ აშშ სავარაუდოდ არ გამოიყენებს ჩინეთისა და რუსეთის მიერ შექმნილ ვაქცინებს. „იმედი მაქვს, რომ ჩინეთი და რუსეთი მართლაც ცდიან ვაქცინას მანამ, სანამ მას ვინმეს გაუკეთებენ“, ― თქვა მან. ― ტესტირების ჩატარებამდე იმის მტკიცება, რომ ვაქცინა მზადაა გასავრცელებლად, უკეთეს შემთხვევაში, პრობლემატურია“. დოქტორმა ფაუჩიმ ასევე განაცხადა, რომ აშშ ვაქცინას წლის ბოლოსთვის მიიღებს“.  

სხვადასხვა ქვეყნების შესაძლო ვაქცინების შედარებითი ანალიზის მიხედვით, რომელსაც Bloomberg-ი აქვეყნებს, ფაუჩის ვაქცინის ამერიკული კომპანია Moderna-სგან მიღების იმედი უნდა ჰქონდეს.  

მრავლისმეტყველია ის, რომ Bloomberg-ის ტრეკერში (ყოველ შემთხვევაში, ამ სტატიის წერისას) არ არის შესული რუსული ვაქცინები, რამაც დასავლელ მკითხველს შეიძლება უკუღმა შთაბეჭდილებები შეუქმნას რუსეთის შესაძლებლობებზე და გაჩნდეს ილუზია იმისა, რომ „რუსული ვაქცინა არსაიდან გაჩნდა“.  

უკვე ახლავე შეიძლება ვივარაუდოთ, რანაირად გაგრძელდება „სავაქცინო რბოლა“: რუსულს ან ჩინურს დაუყოვნებლივ გამოაცხადებენ სახიფათოდ და ამას შესაბამის საინფორმაციო ფეიკ-ნიუსებს მოაყოლებენ. ამის პარალელურად დასავლური აუდიტორიის სკეპრიკურად განწყობილი აუდიტორიის დასარწმუნებლად პოპულარიზაციას გაუწევენ თეზისს იმის შესახებ, რომ ეს ვაქცინები ჩინელი, ირანელი თუ რუსი ჰაკერების მიერ მოპარულ მონაცემებზე დაყრდნობით არის დამზადებული. ხოლო ფინალში ცინიკურად დაადანაშაულებენ რუსეთსა და ჩინეთს „ვაქცინურ ნაციონალიზმსა“ და ეპიდემიასთან ბრძოლის რაღაც საერთაშორისო შეჯიბრებად გადაქცევის სურვილში. თუმცა პარალელურ რეჟიმში ისაუბრებენ დასავლეთში საკუთარი ვაქცინის შექმნის აუცილებლობაზე, რათა ესოდენ მნიშვნელოვან საკითხში პეკინზე ან მოსკოვზე დამოკიდებული არ იყვნენ.

ასეთი მიდგომის პრობლემა ისაა, რომ ამ „კონტროლირებადი უკანდახევის“ თითოეულ ეტაპზე დასავლური მედიამანქანა ნდობას დაკარგავს თავისი აუდიტორიის სულ ახალ და ახალ სეგმენტებში.

ყველაფერი კი რუსულ და ჩინურ დეზინფორმაციასთან აუცილებელი ბრძოლის თაობაზე მორიგი კონფერენციებით დასრულდება. 

მაგრამ აუდიტორიის ნდობის დაკარგვა იოლია, აღდგენა კი რთული. მით უმეტეს, რომ კორონავირუსმა მხოლოდ დააჩქარა საზოგადოებრივი ნდობის დეგრადაციის პროცესები, რაც ისედაც მიმდინარეობდა დასავლეთში. ხოლო რუსეთს, ჩინეთსა და სხვა „მორიგე დამნაშავეებს“, რომლებისკენ მინიშნებაც ძალიან უყვართ დასავლურ მედიასივრცეში, რეალურად არანაირი კავშირი არ აქვთ ამ პრობლემასთან და დასავლელი პარტნიორები თვითონვე იქნებიან დამნაშავეები „ვაქცინურ ნაციონალიზმში“.  

რედაქცია შესაძლოა არ ეთანხმებოდეს ავტორის მოსაზრებებს

47
აშშ დოლარი

მოსაზრება: „კალმარი-ვამპირი“ დოლარის გამო განგაშს ტეხს

72
(განახლებულია 18:23 31.07.2020)
მსხვილმა ამერიკულმა ბანკმა, რომელიც ცნობილია თავისი პოლიტიკური გავლენითა და იმით, რომ მსოფლიოს სხვადასხვა ქვეყნის ათობით მაღალი რანგის ჩინოვნიკი მათი ყოფილი თანამშრომელია, შოკისმომგვრელი განცხადება გაავრცელა: დოლარის მთავარი მსოფლიო ვალუტის სტატუსს შესაძლოა ბოლო მოეღოს.

ივან დანილოვი

Goldman Sachs-ი ფინანსურ წრეებში ფართოდ ცნობილი სტრუქტურაა, რომელიც ერთი ტრილიონი დოლარის აქტივებს მართავს, უოლ-სტრიტის დიდი პატივისცემით სარგებლობს, კონვეიერული მეთოდით ამარაგებს თავისი ექს-თანამშრომლებით აშშ-ის ფინანსთა სამინისტროს მაღალ თანამდებობებზე და ასევე ფლობს კორპორატიულ მეტსახელს Vampire squid („ვამპირი კალმარი“). ეს მეტსახელი ბანკს ჟურნალისტმა მეტ ტაიბიმ შეარქვა 2008 წლის კრიზისის შემდეგ და შერჩა კიდეც.

„პირველი, რაც უნდა იცოდეთ Goldman Sachs-ის შესახებ, ეს ისაა, რომ ის ყველგანაა. მსოფლიოში ყველაზე მძლავრი საინვესტიციო ბანკი — ეს კალმარი–ვამპირია, რომელიც კაცობრიობის სახეს შემოხვევია და უმოწყალოდ არჭობს თავის სისხლიან ძაბრს ყველაფერში, რასაც ფულის სუნი უდის“, — წერდა ტაიბი თავის ჟურნალისტურ გამოძიებაში, რომელიც 2010 წელს გამოქვეყნდა ჟურნალში The Rolling Stone.

ზემოთ ჩამოთვლილი მიზეზებიდან გამომდინარე, როდესაც „კალმარი–ვამპირი“ რაიმე საჯარო პოზიციას აფიქსირებს (მით უმეტეს, იმ შემთხვევაში, როდესაც მისი შეფასება მკვეთრად განსხვავდება მეინსტრიმული მედიაკლასის წარმოდგენებისგან მოსალოდნელის შესახებ), მას აუცილებლად უნდა დაეთმოს ყურადღება.

დოლარის, როგორც მსოფლიო ვალუტის პერსპექტივების კრიტიკა სწორედ ამერიკული ბანკისგან ორმაგად საკვირველია. ხომ ცნობილია, რომ აშშ-ში „ჩაწერილი“ გლობალური ფინანსური სტრუქტურები სპეციფიკური, არც ისე შესამჩნევი პატრიოტიზმით ხასიათდებიან, რასაც ისინი პერიოდულად ამყარებენ მომავალი სენატორებისა და კონგრესმენებისთვის უხვი შეწირულობების გადარიცხვით. რაღაც აზრით, Goldman Sachs-ი — ეს ამერიკაა, უფრო ზუსტად კი — თანამედროვე, დაზგისგან განდგომილი და ფინანსურ მანიპულაციებში ღრმად ჩაფლული ამერიკა. ოდესღაც შეერთებული შტატების სიმბოლო იყო არა ბანკი, არამედ სამრეწველო კორპორაცია General Motors, რომლის შესახებაც თავდაცვის მინისტრი ვილსონი ამბობდა, რაც კარგია General Motors-სთვის, ის კარგია ამერიკისთვისო.

ახლა აშშ-ის სიმბოლოდ ისეთი საინვესტიციო ბანკი მიიჩნევა, რომელიც პერიოდულად ღებავს თავის ლოგოტიპს უმცირესობების ფერებში, აქვს ღრმად ამორალური, მაგრამ გავლენიანი სტრუქტურის რეპუტაცია და ახლა ძალიან ღელავს ამერიკული ვალუტის ბედზე, რომლის პრობლემებიც სერიოზულ გავლენას მოახდენს ამერიკის პერსპექტივებზე მთლიანობაში.

ამერიკული ფინანსური ინფორმაციის სააგენტო Bloomberg ავტორიტეტული ბანკის ანალიტიკოსების შიშებზე წერს:

„Goldman Sachs Group Inc.-მა ყურადღება მიაქცია აშშ-ში ინფლაციასთან დაკავშირებით მოულოდნელად გაძლიერებულ შფოთვებს, გაავრცელა რა სამშაბათს თამამი გაფრთხილება იმასთან დაკავშირებით, რომ დოლარს მსოფლიო სარეზერვო ვალუტის სტატუსის დაკარგვის რისკები ემუქრება.

გამომდინარე იქიდან, თუ როგორ უახლოვდება კონგრესი ფისკალური სტიმულირების მორიგ რაუნდს, რათა პანდემიით გაღარიბებულ ეკონომიკას მხარი დაუჭიროს, ხოლო ფედერალურმა რეზერვმა უკვე გაზარდა თავისი ბალანსი დაახლოებით 2,8 ტრილიონი დოლარით ამ წელს, Goldman-ის სტრატეგები გვაფრთხილებენ, რომ აშშ-ის პოლიტიკა „ვალუტის გაუფასურების შიშებს“ იწვევს, რამაც შეიძლება ბოლო მოუღოს დოლარს, როგორც დომინანტ ძალას მსოფლიო სავალუტო ბაზრებზე“.

Goldman Sachs-ის ანალიტიკოსებს სათანადოდ უნდა მივუზღათ: ჯერ კიდევ გაზაფხულზე, როდესაც აშშ-ის ფედერალური სარეზერვო სისტემის საბეჭდი დაზგა, ის-ის იყო, მუშაობას იწყებდა აშშ-ის ბიუჯეტისა და ფინანსური ბაზრების მხარდასაჭერად ეპიდემიის პირობებში, ხოლო კონგრესი და სენატი ეკონომიკაში საბიუჯეტო გადასხმების ზომებსა და თანამდევ დეფიციტის ზრდაზე მსჯელობდნენ, ბანკი კლიენტებთან სპეციალურ თათბირებს ატარებდა და არწმუნებდა მათ, გადაეცვალათ დოლარი ოქროზე (ან ბიტკოინებზეც კი), გამომდინარე მოსალოდნელი ინფლაციის საფრთხეებიდან. ახლა ბანკმა გადაწყვიტა, იგივე პრობლემა მაქსიმალურად ფართო აუდიტორიის წინაშე გამოიტანოს,  და ეს მას მშვენივრად გამოუვიდა — დოლარის, როგორც პლანეტის უმთავრესი ვალუტის სტატუსის დაკარგვის საფრთხეებზე ლამის მსოფლიოს ყველა წამყვანმა მედიასაშუალებამ დაწერა.

რა თქმა უნდა, გასათვალისწინებელია, რომ „ფინანსური წრეების უმეტესობაში ეს მოსაზრება ჯერ ისევ უმცირესობაში რჩება (როგორც ამას სამართლიანად შენიშნავენ Bloomberg-იც და სხვა მედიაკომენტატორებიც), ხოლო Goldman-ის ანალიტიკოსებს არ მიაჩნიათ, რომ სტატუსის დაკარგვა აუცილებლად მოხდება“.

ამ სახის ტიპური პოზიციის არსი იმაში მდგომარეობს, რომ აშშ-ის დოლარი „ახლოსაც კი არ არის იმასთან, რომ სარეზერვო ვალუტის სტატუსი დაკარგოს — კაპიტალის ბაზრების სიღრმისა და გლობალური ტრანზაქციების გათვალისწინებით, რომლებიც დოლარში ხორციელდება“, — განუცხადა Bloomberg-ს მაიკლ კრუპკინმა, ბრიტანული ბანკი Barclays-ის ჩრდილოეთ და სამხრეთ ამერიკაში სავალუტო ვაჭრობის ხელმძღვანელმა.

პრობლემა ისაა, რომ როცა ამ პოზიციას ამერიკული ანალიტიკური საზოგადოების დიდი ნაწილი გაითავისებს, უკვე გვიანი იქნება – იმ აზრით, რომ ამერიკული ვალუტის დომინირებაზე აგებული მსოფლიო სისტემის დემონტაჟი ან უკვე დასრულებული იქნება, ან უკვე გადალახული ექნება უკან დაბრუნების წერტილი.

კიდევ ერთ არგუმენტად იმის სასარგებლოდ, რომ დოლარის სისტემა ყველა კრიტიკოსს მოინელებს, შეიძლება ჩაითვალოს ის ფაქტი, რომ მან წინა „შეტევა“ გადაიტანა 2008–2009 წლებში. მაგრამ ამ არგუმენტის პრობლემა ისაა, რომ საბეჭდი დაზგის მუშაობის ინტენსივობა ვერანაირად ვერ შეედრება იმას, რაც გასული კრიზისის დროს ხდებოდა, როცა აშშ ერთპოლარული სამყაროს უდავო ლიდერი იყო.

ახლა ვითარება სულ სხვაგვარად გამოიყურება: ამერიკული ქალაქები იწვის, ორივე წამყვანი პარტია საპრეზიდენტო არჩევნების შედეგების არაღიარებასა და შესაძლო სამოქალაქო ომზე მსჯელობს, ხოლო ერთპოლარული სამყარო უკვე აღარ არსებობს — და მთელი საქმე მხოლოდ ისაა, რა ფორმას მიიღებს აშშ-სა და ჩინეთს შორის უკვე დაწყებული ცივი ომი.

ბრძენმა და კარგად ინფორმირებულმა „კალმარმა–ვამპირმა“ ტყულად არ ატეხა განგაში. გავლენიანი ბანკის გაფრთხილება აუცილებლად იქნება გაგონილი, მაგრამ უკვე არსებობს სერიოზული ეჭვები იმასთან დაკავშირებით, რომ ამერიკელი პოლიტიკოსები გამოავლენენ იმ არაპოპულარულ ნაბიჯებზე წასვლის უნარს, რომლებიც დოლარის მთავარ მსოფლიო ვალუტად შენარჩუნებას დასჭირდება.

რედაქცია შესაძლოა არ ეთანხმებოდეს ავტორის მოსაზრებებს

72
სავსე მთვარე

მთვარის კალენდარი: 4 აგვისტო რისი გაკეთება შეიძლება და რისი არა

0
(განახლებულია 16:54 03.08.2020)
გაეცანით ჩვენს ყოველდღიურ კალენდარს და შეიტყვეთ, რა საქმიანობა იქნება წარმატების მომტანი ამა თუ იმ დღეს ღამის მანათობლის განწყობის მიხედვით.

მთვარეს უზარმაზარი ძალა გააჩნია და დიდი ზეგავლენის მოხდენა შეუძლია ადამიანებზე, რადგან ყველა კოსმოსურ ობიექტს შორის დედამიწასთან ყველაზე ახლოს იმყოფება.

4 აგვისტო, სამშაბათი. ამ დღეს მარსი მართავს. სავსე მთვარე კლებას იწყებს. ის მერწყულის ნიშანშია.

ენერგეტიკული დღეა. მომატებულია ცდუნებების, სიზარმაცის ალბათობა. კარგი იქნება ემოციებისა და ვნებების გაკონტროლება, სიმშვიდის შენარჩუნება, თვითდისციპლინა.

არაერთმნიშვნელოვანი დღეა. უფრო რთულია დღის პირველი ნახევარი. მიუხედავად გარკვეული სირთულეებისა, შესაძლებელი იქნება შრომის პირველი ნაყოფის დანახვა.

კარგი დღეა ფლირტისა და მეგობრობისთვის. თუ გსურთ, საწინააღმდეგო სქესის წარმომადგენლის ყურადღება მიიპყროთ, არ შეუშინდეთ ორიგინალუ აზრებსა და საქციელს. ამ დღეს დაწყებული სასიყვარულო ურთიერთობები უფრო მეგობრულ კავშირზე იქნება დამყარებული, ვიდრე ვნებაზე.

რეკომენდებულია მარტივი საქმეების დაწყება, რომლებიც არ მოითხოვს განსაკუთრებულ ძალისხმევას, ვაჭრობა, დასვენება, კომფორტის შექმნა სამუშაო ადგილზე, იდეებზე ყურადღების გამახვილება – შესაძლოა, მათ შორის ისეთი იდეა გაჩნდეს, რომელიც მომავალში დიდ წარმატებას მოიტანს.

როგორ მოქმედებს მთვარის ფაზები ადამიანის ენერგეტიკაზე>>

არარეკომენდებულია მნიშვნელოვანი საქმეების დაწყება, ბევრი მუშაობა, ამბიციების გამოვლენა, პასუხისმგებლობის სხვებზე გადაბარება, ფინანსური ოპერაციების ჩატარება, მნიშვნელოვანი მოლაპარაკებების წარმოება, აზარტს აყოლა.

მგზავრობა არახელსაყრელია, მზად უნდა იყოთ უსიამოვნო მომენტებისთვის.

თმის შეჭრა, შეღებვა: ნიშანი შესამჩნევ გავლენას თმის ხარისხზე არ ახდენს. კარგი დღეა ექსპერიმენტული და ექსტრავაგანტული შეჭრისა და ვარცხნილობისთვის.

რაც შეეხება შეღებვას, ასევე წარმატებული იქნება ექსპერიმენტები თქვენთვის უჩვეულო ფერთან დაკავშირებით.

მებაღეობა: არახელსაყრელი დღეა მცენარეების დათესვისა და დარგვისთვის. შეიძლება მარცვლოვანი კულტურებისა და ბოლქვიანების მოსავლის აღება, გაკრეჭა, შეწამვლა.

კარგი დღეა, თუ გსურთ რამე ექსპერიმენტის ჩატარება და ანომალიური ჯიშის გამოყვანა.

0