საქართველოს პარლამენტი

სამიდან ნულამდე... ანუ ახალი დროების „ლაკმუსის ქაღალდი“

1035
(განახლებულია 14:18 03.07.2019)
ვინ და რატომ იწონებს მმართველი გუნდის ინიციატივას, ვის რა აქვს ნულოვანი ბარიერის საწინააღმდეგო და რას მოუტანს ქვეყანას პარლამენტში ხელოვნურად შექმნილი მრავალხმიანობა?

სამსონ ხონელი

წინამდებარე სტატიას ერთი ბანალური ჭეშმარიტების შეხსენებით დავიწყებ: არაფერია უფრო მარადიული, ვიდრე ადამიანების სწრაფვა ცვლილებებისკენ. სხვისი არ ვიცი, მე კი მგონია, რომ ჩვენში სწორედ ეს სენტენცია უდევს საფუძვლად დაუსრულებელ დისკუსიას თემაზე − რა გვინდა, როგორ მივაღწიოთ საწადელს, საით მივდივართ და რატომ? უკვე თითქმის სამი ათეული წელია, რაც გვინდა შევთანხმდეთ მართვის ისეთ სისტემებზე, რომელიც ყველასთვის მისაღები იქნება. არადა გვავიწყდება, რომ ასე არ ხდება ხოლმე...

მომავალ წელს სახელმწიფოს ძირითადი კანონის მიღებიდან მეოთხედი საუკუნე შესრულდება, თუმცა პოლიტიკური ისტებლიშმენტის ძალიან დიდი ნაწილის კონსენსუსით მიღებულმა კონსტიტუციამ ჯერაც ვერ შეიშრო მელანი. მთელი ამ ხნის განმავლობაში ყველა ხელისუფალმა, როგორც შეეძლო ისე, ხელი შეუწყო სახელმწიფოს ცხოვრების წესის ახლებურად გააზრებასა და გადაწერას. ბოლო საკონსტიტუციო ცვლილებები ერთ წელზე მეტს ითვლის. არ ვაპირებ დეტალურად გიამბოთ, ვინ და როგორ არგებდა საკუთარ ვიწრო პოლიტიკურ ინტერესებს ქვეყნის ძირითად კანონს. ახლა ისეთი პირი უჩანს, რომ წინ საკონსტიტუციო რეფორმის კიდევ ახალი ეტაპი გველის. ცვლილებები, სავარაუდოდ, საარჩევნო სისტემას შეეხება. სხვაგვარად პოლიტიკური სპექტრის უდიდესი ნაწილის ოცნება ვერაფრით შეისხამს ფრთებს. დიახ, მმართველი გუნდის ინიციატივამ მომავალი წლის საპარლამენტო არჩევნების მხოლოდ პროპორციული სისტემით და თანაც ე.წ. ნულოვანი ბარიერით ჩატარების თაობაზე „ოფსაიდში“ მყოფ ბევრ პოლიტიკურ ფიგურას გაუჩინა თამაშში დაბრუნების იმედი.

პარლამენტის ბიუროს უმრავლესობის 93 დეპუტატის ხელმოწერით კონსტიტუციურ კანონში ცვლილებები წარედგინა და საკონსტიტუციო ცვლილებების პროექტის ინიცირების პროცესიც დაიწყო. ბიურომ ხელმოწერების ნამდვილობის შემოწმება საპროცედურო საკითხთა და წესების კომიტეტს დაავალა. კომიტეტი დეპუტატთა ხელმოწერებს ერთი კვირის ვადაში შეამოწმებს და შედეგებს ბიუროს წარუდგენს. ამის შემდეგ კი პარლამენტის უახლოეს პლენარულ სხდომაზე კონსტიტუციური კანონის პროექტის გამოქვეყნებისა და საყოველთაო–სახალხო განხილვის საორგანიზაციო კომისიის შექმნის საკითხი დადგება. შემდეგ კი საჯარო განხილვების პროცესიც დაიწყება. საკონსტიტუციო ცვლილებები კონსტიტუციური კანონის გარდამავალ დებულებებში შედის. პროექტის მიხედვით, ამოღებულია ჩანაწერი სამპროცენტიან საარჩევნო ბარიერსა და პოლიტიკური პარტიების საარჩევნო ბლოკებზე. ძირითადი კანონის გარდამავალ დებულებებში გაწერილი ფორმულის მიხედვით, იმისათვის, რომ განისაზღვროს, თუ რამდენი მანდატი მიიღო პარტიამ, მის მიერ მიღებული ხმების რაოდენობა 150-ზე გამრავლდება და ყველა პარტიის მიერ მიღებული ხმების რაოდენობაზე გაიყოფა. მიღებული მთელი რიცხვი პარტიის მიერ მიღებული მანდატების რაოდენობა იქნება. რაც შეეხება გადაუნაწილებელ მანდატებს, ასეთის არსებობის შემთხვევაში, ის საუკეთესო შედეგის მქონე პარტიებს შორის რიგითობით განაწილდება.

ანალიტიკოსთა ერთი ნაწილის განმარტებით, ინიციატივა გარდატეხას შეიტანს პოლიტიკური სისტემის განვითარებაში. საქართველოში პოლიტიკური და პარტიული სისტემის განვითარება თვისობრივად ახალ ეტაპზე გადადის. ახალი სისტემის პირობებში უზრუნველყოფილი იქნება მაქსიმალურად ფართო კონსენსუსი. მათივე შეფასებებით, საზოგადოება სრულად ჯერ კიდევ ვერ აცნობიერებს, რა მნიშვნელოვანი რეფორმა იწყება ჩვენში. 2020 წელს დამოუკიდებელი საქართველოს ისტორიაში არჩევნები პირველად ჩატარდება მხოლოდ პროპორციული სისტემით. ეს კი ნიშნავს, რომ, თუ ბარიერიც ნულოვანი იქნება, მივიღებთ მრავალპარტიულ პარლამენტს, სადაც მოხვდება ყველა ის პოლიტიკური დაჯგუფება, რომელსაც სულ მცირე მხარდაჭერა მაინც ექნება. ქვეყნის უმაღლეს საკანონმდებლო ორგანოში ზუსტად იქნება ასახული საზოგადოებაში არსებული განწყობები და, შესაბამისად, პოლიტიკურ პროცესებზე პასუხისმგებლობას სრულად აიღებს საზოგადოება.

პოლიტიკური პარტიების აბსოლუტური უმრავლესობა მხარს უჭერს პროპორციულ საარჩევნო სისტემაზე გადასვლას. განსხვავებულია ხედვები საარჩევნო ბარიერის საკითხზე. მმართველი პარტიის პოზიცია ცნობილია, ის თავად არის ე.წ. ნულოვანი ბარიერის იდეის ავტორი. ყოფილი სახელისუფლებო გუნდის ერთი განაყოფი, რომლის შინაარსსა და ფორმას კვლავაც ქვეყნიდან დევნილი მესამე პრეზიდენტი მიხეილ სააკაშვილი განსაზღვრავს, ინიციატივის წინააღმდეგია. ყოფილ ხელისუფალთა იდეური მამის პოზიციას იზიარებენ ე.წ. „გაერთიანებული ოპოზიციის“ სხვა პარტიებიც. „ევროპული საქართველოს“ წევრები აცხადებენ, რომ უპირატესობას სამპროცენტიან ბარიერს ანიჭებენ, თუმცა ცვლილებებს მხარს უჭერენ და ხელისუფლებას უკან დახევის საბაბს არ მისცემენ მიუხედავად წვრილმანი ვირეშმაკობებისა, რომელიც ხელისუფლებამ ამ პროექტში ჩადო ნულოვანი ბარიერის და ბლოკების აკრძალვის სახით. ანალიტიკოსთა ერთი ნაწილის აზრით, სწორედ ბარიერის საკითხია „ლაკმუსის ქაღალდი“ და ნიშანდობლივია, რომ ნულოვანი ბარიერი არ მოსწონთ მხოლოდ გარეგნულად ვესტერნიზებულ, ეტატისტ-მოდერნიზატორებს, რომლებიც ოსტატურად ინიღბებიან პროდასავლელ დემოკრატებად. ხოლო სინამდვილეში კი არც პროევროპელები არიან და არც ლიბერალი-დემოკრატები თავიანთი მენტალობით. თუმცა ეს სხვა თემაა...

უნდა ითქვას, რომ პროპორციული არჩევნების ნულოვანი ბარიერით ჩატარებას სკეპტიკოსები ექსპერტთა წრეებშიც ჰყავს. მათი შეფასებით, თუ 2020 წელს არჩევნები მმართველი გუნდის მიერ შემოთავაზებული სისტემით ჩატარდება, პარლამენტში რამდენიმე პოლიტიკური დაჯგუფება მოხვდება. დამოუკიდებლად მთავრობის ფორმირებას ვერც ერთი მათგანი ვერ შეძლებს და დღის წესრიგში კოალიციური მთავრობის შექმნის საკითხი დადგება. გამომდინარე იქიდან, რომ ჩვენ არ გვაქვს ამის გამოცდილება, ამან შეიძლება დამატებითი პრობლემები შექმნას...

ყველა მოსაზრებას აქვს არსებობის უფლება და მეც ჩემეულ ხედვას შემოგთავაზებთ. უმაღლეს საკანონმდებლო ორგანოში პლურალიზმს მივესალმები. რა უნდა იყოს ჯანსაღ დისკუსიასა და აზრთა ჭიდილზე უკეთესი, თუმცა საამისოდ პირობები უნდა არსებობდეს. მრავალპარტიული პარლამენტი თვითმიზანი არ უნდა იყოს. ჩვენი ჭრელი და თანაც ერთგვაროვანი პოლიტიკური სპექტრის დაუოკებელი მისწრაფება ძალაუფლებისკენ და გაცხადებული სურვილი – ყველაფრის ფასად მოიპოვონ დეპუტატის მანდატი, ე.წ. სალაყბოში მრავალხმიანობის არც აუცილებელი და არც საკმარისი პირობა არაა. ჩვენში არ არსებობს პარტიული სისტემები, ჩვენთვის უცხოა პარტიული დემოკრატიაც. პოლიტიკურ პარტიათა დიდ უმრავლესობას უცვლელად თავმჯდომარეობენ პოლიტიკოსები მიუხედავად იმისა, რომ მათი ხელმძღვანელობით ეს პარტიები არჩევნებიდან არჩევნებამდე აგებენ ყველაფერს. ბოლო წლების განმავლობაში ჩატარებული უკლებლივ ყველა გამოკითხვის შედეგებით, არსებულ პოლიტიკურ ისტებლიშმენტს არ ენდობა ამომრჩეველთა ნახევარზე მეტი... ასეთია ის ჩვენი რეალობა, სადაც კონსულტაციები თამაშის ახალ წესებზე უკვე დაწყებულია იმ პოლიტიკურ ძალებს შორის, ვინც ეს რეალობა შექმნა... დროებით აქ დავსვათ წერტილი. გაგრძელება იქნება...

 

1035
ნიკა მელია

ნიკა მელიას გათავისუფლების ხუთი გზა

127
(განახლებულია 15:32 27.02.2021)
„ერთიანი ნაციონალური მოძრაობის“ თავმჯდომარე ნიკა მელია უკვე რამდენიმე დღეა პატიმრობაში იმყოფება. გუშინ პროკურატურამ მას ისევ შესთავაზა გირაოს გადახდის სანაცვლოდ გათავისუფლება.

პარტიის თავმჯდომარის დაკავებას მყისვე მოჰყვა საერთაშორისო გამოხმაურებები. ბუნებრივია, ხელისუფლებას ბეწვის ხიდზე უწევდა გავლა, რომ არ დარღვეულიყო ბალანსი სამართალსა და პოლიტიკურ მიზანშეწონილობას შორის.

რადგან პროკურატურაც უკვე აღკვეთის ღონისძიების შეცვლაზე ალაპარაკდა, იურისტები მსჯელობენ, რა გზით შეიძლება დააღწიოს თავი ნიკა მელიამ პატიმრობას.

ვერსია N1

გადაიხადოს გირაოს თანხა და მშვიდად დაელოდოს გამოძიებისა და სასამართლო პროცესის დასრულებას. როგორც ჩანს, მელია ამის გაკეთებას არ აპირებს, სხვა შემთხვევაში მას გირაოს თანხის შეგროვება არ გაუჭირდებოდა. ასე რომ, ეს ვერსია არსებობს სამართლებრივად, მაგრამ რეალობაში მისი განხორციელება ახლა უკვე ძნელი წარმოსადგენია.

ვერსია N2

ნიკა მელიას საქმის გასაჩივრება საკონსტიტუციო სასამართლოში – ვინაიდან სააპელაციო სასამართლომ უკვე უარი თქვა სარჩელის მიღებაზე, არის ვარიანტი, ადვოკატებმა მელიასთვის იმუნიტეტის მოხსნის და პატიმრობის საკითხი საკონსტიტუციო სასამართლოში გაასაჩივრონ. ამ ვერსიის ნაკლი ისაა, რომ საკონსტიტუციო სასამართლოს გადაწყვეტილებები, როგორც წესი, დროში იწელება და მელიას მინიმუმ 1 წელი მაინც დასჭირდება ლოდინი.

ვერსია N3

სტრასბურგის სასამართლო – ცნობილია, რომ სტრასბურგიც დიდი ხნის შემდეგ იხილავს საქმეებს, მაგრამ მას სხვა მექანიზმებიც აქვს. ძნელი სათქმელია, რამდენად მყისიერი იქნება საერთაშორისო საზოგადოების რეაქცია, თუმცა იურისტთა წრეებში არ გამორიცხავენ, რომ სტრასბურგის სასამართლომ მელიას დაუყოვნებლივ გათავისუფლება მოითხოვოს 39-ე მუხლის საფუძველზე, თუ, რაღა თქმა უნდა, ნიკა მელიას ადვოკატებმა მას მიმართეს.

იურისტი ლია მუხაშავრია აცხადებს, რომ მელიას გათავისუფლებისა და მისი დაცვის ყველაზე ეფექტური გზა სწორედ სტრასბურგზე გადის. საქმე ისაა, რომ სტრასბურგის სასამართლოს თავმჯდომარეს, დაკავებულის ან მისი ადვოკატის მიმართვის შემთხვევაში, შეუძლია საქართველოს იუსტიციის მინისტრსა და ქვეყნის პირველ პირს მიმართოს და 24 საათის განმავლობაში მოითხოვოს დაპატიმრებული პირის გათავისუფლება. თუ ასეთი რამ მოხდა, სავარაუდოდ, საქართველოს ხელისუფლება ევროსაბჭოს დაეთანხმება, თუმცა უმრავლესობის წევრები ღიად აცხადებდნენ, რომ მელიას გამოწვევაზე სათანადო პასუხი გაეცა და საერთაშორისო რეაქციები გათვლილი ჰქონდათ.

ვერსია N4

მელიას გათავისუფლების კიდევ ერთი მექანიზმი პრეზიდენტ სალომე ზურაბიშვილის ხელშია. ცნობილია, რომ ის შეხვდა კიდეც საქართველოს ახალ პრემიერ-მინისტრ ირაკლი ღარიბაშვილს და ამ თემაზეც ესაუბრა. ბუნებრივია, ზურაბიშვილი ამ გადაწყვეტილებას მმართველ გუნდთან შეთანხმების გარეშე არ მიიღებს. მეორე მხრივ, ამისთვის მელიას თანხმობაცაა საჭირო, ან მისი ოჯახისა და ადვოკატის მიმართვა საქართველოს პრეზიდენტისადმი.

ვერსია N5

ნიკა მელიას მეხუთე გზა ისაა, რომ იჯდეს ციხეში და მოიხადოს სასჯელი. თუმცა, ვფიქრობთ, მას მაინც ვადაზე ადრე მოუწევს საპატიმროს დატოვება და ბევრი რამ იმაზეა დამოკიდებული, რამდენად მიაღწევენ კომპრომისს ხელისუფლება და ოპოზიცია მოლაპარაკების შემდეგ რაუნდზე. საკმარისია გავიხსენოთ, რომ სწორედ ამ გზით ითქვა უარი გიგი უგულავასა და ირაკლი ოქრუაშვილის პატიმრობაზე და ისინი სალომე ზურაბიშვილის გადაწყვეტილებით გათავისუფლდნენ შემდგომი სამართლებრივი ნაბიჯებისგან. ასეა თუ ისე, კომპრომისი და ურთიერთმიტევება ყოველთვის უკეთეს შედეგებს გვაძლევს, ვიდრე დაპირისპირება, როგორც კაცობრიობის ისტორია გვკარნახობს.

 

127
ევროკავშირის დროშა

მოსაზრება: ევროპა ვერ ირიდებს ვალდებულებებს რუსეთის შეკავებაზე

23
(განახლებულია 20:53 25.02.2021)
დასავლეთი რუსეთის წინააღმდეგ ახალი სანქციების სერიას აამოქმედებს: ორშაბათს ევროკავშირმა პერსონალური სანქციები შეათანხმა რუსი ჩინოვნიკების მიმართ, რომლებიც პასუხისმგებლები არიან „ნავალნის დევნაზე“

პიოტრ აკოპოვი

კონკრეტული სია რამდენიმე დღის მერე იქნება წარმოდგენილი. ხოლო შტატებში მთავრდება „სანქციებისა და სხვა ზომების“ მთალი პაკეტის შემუშავება უკვე არა მარტო ნავალნის, არამედ ჰაკერული შეტევებისთვისაც (რასაც SolarWinds-ი ეწოდა) ამერიკულ უწყებებსა და კომპანიებზე, რაშიც რუსეთს ადანაშაულებენ.

ეს ყველაფერი პროგნოზირებადი იყო — რომ არაფერი ითქვას იმაზე, რომ რუსეთზე სასანქციო ზეწოლა უკვე შვიდი წელია, მიმდინარეობს. ამის შეჩვევა უკვე შეიძლებოდა, მაგრამ ყოველთვის საინტერესოა ის არგუმენტები, რომლებითაც თავიანთ ქმედებებს ამართლებენ დასავლელი პარტნიორები. სწორედ არგუმენტები და არა მოტივები, რომლებიც მათ ამოძრავებს. მოტივები ისედაც გასაგებია, რომლებიც კიდევ ერთხელ გაიხსენა რუსეტის პრეზიდენტმა უსაფრთხოების ფედერალური სამსახურის კოლეგიაზე გამოსვლისას.

„ჩვენ ვეჯახებით რუსეთის შეკავების პოლიტიკას. საუბარია არა საერთაშორისო ურთიერთობებისთვის დამახასიათებელ კონკურენციაზე, არამედ სწორედ თანმიმდევრულ და აგრესიულ ხაზზე, რომელიც მიმართულია იმისკენ, რომ ჩაიშალოს ჩვენი განვითარება, დამუხრუჭდეს იგი, შეიქმნას პრობლემები გარე პერიმეტრზე, მოხდეს შიდა დესტაბილიზაციის პროვოცირება, ჩამოიშალოს ფასეულობები, რომლებიც აერთიანებს რუსულ საზოგადოებას, და საბოლოო ჯამში, დასუსტდეს რუსეთი და მოექცეს გარე კონტროლის ქვეშ, როგორც ამას პოსტსაბჭოთა სივრცის ზოგ ქვეყანაში ვხედავთ“.

ეს მიზნები საიდუმლო სულაც არ არის. კარგადაა ცნობილი შეკავების ყველა მეთოდიც, პუტინმა მხოლოდ ჩამოთვალა ისინი: „ისინი ცდილობენ შეგვბოჭონ ეკონომიკური და სხვა სახის სანქციებით, დაბლოკონ დიდი საერთაშორისო პროექტები, რომლებითაც დაინტერესებულები ვართ არა მარტო ჩვენ, არამედ ჩენი პარტნიორებიც, პირდაპირ ერევიან საზოგადოებრივ და პოლიტიკურ ცხოვრებაში, ჩვენი ქვეყნის დემოკრატიულ პროცედურებში. და, რა თქმა უნდა. აქტიურად გამოიყენება სპეცსამსახურების არსენალში არსებული ინსტრუმენტები“.

ეს ყველაფერი უკვე არაერთხელ იყო რუსეთის ისტორიაში: ჩამოთვლილ მეთოდებს სხვადასხვა კომბინაციაში იყენებდნენ, ასე რომ ჩვენ წინააღმდეგობის გაწევაც ვისწავლეთ და პასუხის გაცემაც. სწორედ ამიტომ თქვა პუტინმა, რომ „რუსეთის მიმართ მსგავსი ხაზის გატარება აბსოლუტურად არაპერსპექტიულია“. რუსეთს ვერავინ აიძულებს, წავიდეს დათმობებზე. ამასთან რუსეთი აცხადებს, რომ ის მხოლოდ თავს, საკუთარ სუვერენიტეტსა და ინეტერესებს იცავს, და არანაირად არ არის აგრესორი.

უფრო მეტიც, რუსეთი გამუდმებით უსვამს ხაზს, რომ მზადაა ურთიერთობებისა და ღია დიალოგებისთვის ყველასთან ურთიერთგაგებისა და ურთიერთპატივისცემის საფუძველზე — რაზეც ასევე ისაუბრა რუსეთის პრეზიდენტმა. და რას ვისმენთ პასუხად?

ევროკავშირის ქვეყნების საგარეო საქმეთა მინისტრების დასკვნით, რუსეთი არ არის დაინტერესებული ევროკავშირთან თანამშრომლობით, ხოლო რუსეთის ხელისუფლებას ქვეყანა ავტორიტარიზმისკენ მიჰყავთ. ჟოზეპ ბორელმა კი რუსეთს უწოდა „მეზობელი, რომელმაც გადაწყვიტა, მოიქცეს როგორც მოწინააღმდეგე“. თუმცა ხაზი გაუსვა, რომ საჭიროა „განისაზღვროს მოდელი, რათა მეზობლებთან, რომლებიც წინააღმდეგ მიდიან, გამუდმებული კონფრონტაცია თავიდან იყოს აცილებული“.

ანუ ევროპა და მთლიანობაში დასავლეთი საქმეს ისე წარმოაჩენენ, რომ ეს რუსეთი მიდის კონფრონტაციებზე და არ სურს ურთიერთობების განვითარება. უფრო მეტიც, რუსეთი თურმე გამუდმებით ერევა ევროპის საქმეებში და ზეწოლას ახდენს ევროკავშირზე. ამიტომ ევროკავშირი ახლა მოსკოვთან ურთიერთობებს სამი პრინციპის თანახმად ააგებენ.

როგორც ბორელმა აღწერა, ეს პრინციპებია: პასუხი გასცენ მოსკოვს, თუ ის ადამიანისა და საერთაშორისო უფლებებს დაარღვევს; მიმართონ შეკავებას იმ შემთხვევაში, თუ რუსეთი გააძლიერებს ზეწოლას ევროკავშირზე; და ითანამშრომლონ რუსეთთან იმ მიმართულებებით, რომლებითაც ევროკავშირი იქნება დაინტერესებული. წინააღმდეგობა, შეკავება, თანამშრომლობა იქ, სადაც ეს ევროკავშირისთვისაა ხელსაყრელი — ეს ევროპული დიპლომატიის საბრძოლო ნაკრებია. მარამ რაზეა საუბარი? „ადამიანისა და საერთაშორისო უფლებების“ დარღვევაში ექცევა პრაქტიკულად ყველაფერი — ყირიმიდან და ნავალნიდან ნებისმიერ სხვა თემამდე, თანაც როგორც რუსეთის შიდა, ისე საერთაშორისო თემებამდე.

ზუსტად ასევე შეიძლება ევროკავშირზე ზეწოლად შეფასდეს ყველაფერი, რაც მოესურვებათ. სეპარატისტები კატალონიის გამოყოფას მოითხოვენ? იძებნება რუსული კვალი. მოსკოვში საპარლამენტო ფრაქცია „ალტერნატივა გერმანიისთვის“ წარმომადგენლები ჩამოდიან? რუსები მერკელს ძირს უთხრიან. მოსკოვი პოლონეტსა და ჩეხეთში საბჭოთა მეომრების ძეგლების დემონტაჟს აპროტესტებს? უბედურ და თავისუფლებისმოყვარე ევროპელებზე ზეწოლას ახდენენ. გაზსადენს აშენებენ? ევროპის გახლეჩვა სურთ. უარს ამბობენ მშენებლობაზე? ევროპის გაყინვა სურთ. აბსურდია? არა, ეს გათვლადი რეაქციაა.

ანუ ევროკავშირს რუსეთთან ურთიერთობების ცალმხრივად დარეგულირების უფლება სურს ჰქონდეს, დასჯისა და შეწყალების უფლება თავისი შეხედულების მიხედვით. რუსეთმა კი ეს მოცემულობად უნდა მიიღოს და არ აღშფოთდეს. თანაც თანამშრომლობისთვისაც მზადაც უნდა იყოს, როგორც კი დაუძახებენ, ოღონდ იმ სფეროებში, რომლებიც კეთილ ევროპელებს აწყობთ.

მაგრამ რეალურად ყველაფერი პირიქითაა: ეს ევროკავშირია ის მეზობელი, რომელიც მოწინააღმდეგესავით იქცევა - ზეწოლას ახდენს რუსეთზე, უყენებს პირობებს, ჭკუას ასწავლის და დემონიზაციას ახდენს, ერევა მის საშინაო საქმეებში და მიაჩნია, რომ ეს ასეც უნდა იყოს. ეს ევროკავშირი ცდილობს, მოწყვიტოს უკრაინა რუსეთს, შეცვალოს აღმოსავლეთისა და დასავლეთის ისტორიული საზღვრები, გააფართოვოს თავისი სასიცოცხლო სივრცე რუსული ცივილიზაციის ხარჯზე — და სურს, რომ რუსეთი ამ ყველაფერს მშვიდად შეეგუოს?

რუსეთი ნებისმიერ შემთხვევაში შეცვლის ურთიერთობებს ევროპასთან მისთვის მისაღები პირობებით — და რაც მალე გაიგებენ ამას ევროკავშირში, მით უფრო მსუბუქად და სწრაფად გაივლის ამ პროცესს. სხვა ალტერნატივა ევროპას მაინც არ აქვს: მას უბრალოდ არ შეუძლია, თავს უფლება მისცეს, გაემიჯნოს რუსეთს, ან მეზობლიდან მტრად გადაიქცეს. უფრო სწორად, კი შეუძლია, მაგრამ ეს მისთვის ბოლო ჯერი იქნება.

რედაქცია შესაძლოა არ ეთანხმებოდეს ავტორის მოსაზრებებს!

23
თემები:
რუსეთი დღეს
ყვავილი თოვლზე

დღის ასტროპროგნოზი ზოდიაქოს ნიშნებისთვის: 28 თებერვალი

0
(განახლებულია 16:48 27.02.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 28 თებერვალია, კვირა. კლებადი მთვარე ქალწულის ნიშანშია. ამ დღეს პლანეტა მზე მფარველობს.

დღეს ინტუიცია და შემოქმედებითი პოტენციალი პიკს მიაღწევს. ის, რასაც სხვა დროს დიდ დროს ანდომებთ, დღეს იოლად გამოგივათ. ეს ეხება სწავლას, მუშაობას, მეცნიერულ საქმიანობას. ამასთან, დღეს პასიურობის დღეცაა და მაღალი შემოქმედებითი პოტენციალი შინაგანად შეიძლება დაუპირისპირდეს იმას, რომ ამ პოტენციალის რეალიზების სურვილი არ გექნებათ. ასე რომ, თუ გინდათ, რამე შედეგს მიაღწიოთ, თავი ხელში აიყვანეთ, ნებისმყოფა მოიკრიბეთ და საქმეს შეუდექით.

საუკეთესო კოლეგები ზოდიაქოს ნიშნის მიხედვით>>

ვერძი: თუ მოისურვებთ, დღეს ბევრი რამის მიღწევა შეგიძლიათ, მაგრამ დიდი ალბათობაა იმისა, რომ ეს სურვილი შეიძლება არ გაგიჩნდეთ. დღე რომ გაიმრავალფეროვნოთ, საკმარისია, რამე საქმემ ან იდეამ გაგიტაცოთ, ან საწინააღმდეგო სქესის წარმომადგენელმა. ამ უკანასკნელ შემთხვევაში თქვენს აქტიურობას დიდი წახალისება აღარ დასჭირდებათ – თქვენი შეჩერება, შეიძლება ითქვას, უკვე შეუძლებელი გახდება.

ვერძი: დღეს განწყობა იმისა, რომ ორგანიზატორული უნარები გამოავლინოთ, არ გაქვთ, მაგრამ მაინც თუ მოგიწიათ რამის ორგანიზება, ამას შესანიშნავად გაართმევთ თავს და შედეგებით ყველას გაახარებთ. რა სახისაც არ უნდა იყოს ღონისძიება, თქვენთვის საკმაირისია, რომ ინიციატივა აიღოთ ხელში და ამოცანები გადაანაწილოთ – გარშემომყოფები დიდი სიამოვნებით აგყვებიან და დაგეხმარებიან.

ტყუპი: დღეს არაფრის გაკეთების ხალისი არა გაქვთ. ამაში სიტუაციაც შეგიწყობთ ხელს – თქვენგან არ მოითხოვება რამე გმირობის ჩადენა ან გადაუდებელი საქმეების გაკეთება. და საჭიროც რომ იყოს თქვენი ჩარევა საქმეებში, იმდენად არასაქმიან განწყობაზე ხართ, რომ ამის შეცვლა, პრაქტიკულად, შეუძლებელი იქნება. საქმე მოიცდის – სწორედ ესაა დღეს თქვენი დევიზი. ამიტომ ეს დღე სამ მიმართულებას უნდა დაუთმოთ – საკუთარ თავს, ახლობლებსა და... კიდევ საკუთარ თავს.

კირჩხიბი: ძალზე იღბლიანი დღეა. ხართ ძალზე ენერგიული და გაქვთ შესაძლებლობა, ეს ბრწყინვალედ გამოიყენოთ. ნებისმიერი საქმე, რომელსაც ხელს მოკიდებთ, შეგიძლიათ წინ წაწიოთ, დაძრათ მკვდარი წერტილიდან. ვარსკვლავები გირჩევენ, დრო წვრილმანებზე არ დაკარგოთ – დღეს ძალიან გიმართლებთ, ხართ იღბლიანი, ამიტომ აჯობებს, თუ ისეთ საქმეს შეეჭიდებით, რომელიც მეტ სარგებელს მოგიტანთ.

ლომი: დღეს თქვენთვის არარეკომენდებულია დიდ საქმეებთან შეჭიდება. და სიმართლე უნდა ითქვას, არც პატარა საქმეებთან. ბოლო ხანს დიდი ძალა დახარჯეთ და საკმარისია დინების საწინააღმდეგოდ ცურვა, დროა, მოდუნდეთ და დაისვენოთ. ამასთან, ვარსკვლავები გირჩევენ, ყურადღება ცხოვრების იმ სფეროებს მიაქციოთ, რომლებიც ბოლო დროს თქვენი თვალთახედვის არეში აღარ მოქცეულა. გაითვალისწინეთ, რომ დასვენება მხოლოდ დივანი და ტელევიზორი არაა – შეგიძლიათ შეხვდეთ მეგობრებს, ოჯახის წევრებთან სასიამოვნო საღამო გაატაროთ, არ რომანტიკულ შეხვედრაზე იფიქროთ...

ქალწული: დღეს გარშემომყოფებთან დისონანსში იქნებით. მათ გაუჭირდებათ თქვენს ტემპზე აყოლა, თავად კი გრძნობთ, რომ უამრავი რამის გაკეთება შეგიძლიათ. საქმიანი აქტიურობა, მახვილი გონება და საჭირო დროს საჭირო რამეზე „კლანჭის“ გამოდების უნარი უმაღლეს დონეზე იქნება. აქედან გამომდინარე, გარშემომყოფების აპათია და გულგრილობა, სავარაუდოდ, გაგაღიზიანებთ. ამიტომ დილიდან განეწყვეთ იმისთვის, რომ დღეს მხოლოდ საკუთარი ძალების იმედი უნდა გქონდეთ.

სასწორი: მიეცით უფლება თქვენ ირგვლივ მყოფ ადამიანებს, რომ თავიანთი პრობლემები თვითონ გადაჭრან. იმის ნაცვლად, რომ დრო სხვებზე დაკარგოთ, აჯობებს, თუ რამე სასიამოვნოს გააკეთებთ, მაგალითად, შემოქმედებით საქმიანობას შეუდგებით. ზუსტი მეცნიერებებისადმი კი ნამდვილად არ ხართ განწყობილი, ვერანაირად ვერ მოგხიბლავთ ციფრები, გრაფიკები და ცხრილები, ასე რომ, სჯობს შემოქმედებით აქტიურობაში გადაეშვათ თავით.

მორიელი: დღეს, უბრალოდ, ვალდებული ხართ, რომ საკუთარი აზრები სამყაროს გაუზიაროთ, ან, უკიდურეს შემთხვევაში, ამ სამყაროს მცირე ნაწილს მაინც – ახლობლებს, კოლეგებსა თუ მეგობრებს. თქვენი ტვინი მკაფიოდ და არასტანდარტულად იმუშავებს და დიდებული იდეების გენერატორი გახდება. ამასთან, გამორიცხული არაა, რომ გარშემომყოფებმა ეს იდეები ვერ დააფასონ, ვერ გაიგონ. მაგრამ რას ვიზამთ – დღეს ნამდვილად ყველაზე წინ ხართ, ამიტომ ხანდახან უნდა შეჩერდეთ, რომ სხვებს საშუალება მისცეთ, დაგეწიონ.

მშვილდოსანი: დღეს, სავარაუდოდ, არ გექნებათ საკმარისი ძალა იმისთვის, რომ ენთუზიაზმით აკეთოთ საქმე. განწყობა გაქვთ იმგვარი, რომ რაც შეიძლება ნაკლები მოძრაობა გააკეთოთ. სამაგიეროდ, გონება იმუშავებს უმაღლეს დონეზე და პირველ რიგში, სამუშაო გეგმების დაწყობაზე. თქვენი აზრები, პირველ რიგში, უდიდესი ლოგიკურობითა და მოულოდნელი სვლებით იქნება გამორჩეული. ამ დღის ჩანაფიქრებს მომავალში კარიერული წინსვლისა და კარგი შემოსავლის უზრუნველყოფა შეუძლია.

თხის რქა: დღეს გაგიმართლებთ. მოგიწევთ იმის გაკეთება, რაც გიყვართ. ვარსკვლავები არჩევანსაც არ დაგიტოვებენ – სხვა რამეს თუ მოკიდებთ, მაინც ვერაფერს მიაღწევთ. რუტინული საქმეები აუტანელი იქნება თქვენთვის. მაგრამ თუ რამე საქმე მართლა დაგაინტერესებთ, ის აურაცხელ სასიამოვნო ემოციას მოგიტანთ და ამასთან, შესანიშნავ შედეგსაც მიიღებთ.

მერწყული: დღეს თავის გამოჩენა შეგიძლიათ როგორც შესანიშნავ მეგობარსაც და როგორც საშიშ მეტოქესაც, ანუ ვის როგორ გაუმართლებს. ხართ გამჭრიახი, გრძნობთ ვითარებას და ყველაფერს გზადაგზა იტაცებთ. ნებისმიერი თქვენი გეგმა, რასაც არ უნდა ეხებოდეს ის (მეგობრებთან ერთად დროის გატარება თუ ვინმესთვის „სისხლის გაშრობა“), შემოქმედებითი აღმაფრენით იქნება გაჯერებული. ორივე შემთხვევაში წარმატება გელოდებათ. ასე რომ ოპონენტებს ურჩევნიათ, თქვენთან მეგობრობა არჩიონ.

თევზები: დღეს, შეიძლება ითქვას, გარკვეულწილად ჩიხში იქნებით მოქცეული. კარგია, თუ ვითარება თქვენგან სწრაფ გადაწყვეტილებებს არ მოითხოვს – მაშინ თქვენი გონებაგაფანტულობა განსაკუთრებულ ზიანს არ მოგაყენებთ; მაგრამ თუ სერიოზული საქმის გაკეთება მოგიწიათ, არაა გამორიცხული, უეცრად ერთ ადგილზე გაშეშდეთ ან თავი ქვიშაში დამალოთ. სხვა სიტყვებით რომ ვთქვათ, დღეს თქვენთვის ნებისმიერი აქტიური საქმიანობა უკუნაჩვენებია გარდა იმისა, რომელსაც არა შედეგისთვის, არამედ საკუთარი სიამოვნებისთვის გააკეთებთ.

0