თამუნა მერაბიშვილი

რატომ იტყუებიან ბავშვები ფსიქოლოგის რჩევები მშობლებს

3050
(განახლებულია 18:53 28.05.2018)
რუბრიკა "ფასილიტატორის" სტუმარია ფსიქოლოგი, ფსიქოთერაპიული ცენტრი „არსის" ფსიქოთერაპევტი, ტრენერი თამუნა მერაბიშვილი.

თამუნა მერაბიშვილი – ფსიქოლოგი, ფსიქოთერაპიული ცენტრი „არსის" ფსიქოთერაპევტი, მუშაობს ანალიზურ ფსიქოლოგიაში (ფსიქოანალიზი, ტრანსაქციული ანალიზი, ანთროპოანალიზი). კითხულობს ლექციებს წმ. ანდრია პირველწოდებულის სახელობის ქართულ უნივერსიტეტში, არის ამავე უნივერსიტეტის დოქტორანტი. ატარებს ტრენინგებს და ლექციებს სხვადასხვა ორგანიზაციებში როგორც ფსიქოთერაპიული მიმართულებით, ასევე განათლებასა და ბავშვის ფსიქოლოგიაში.

ბავშვის ტყუილი, ძირითადად, მის შიშებთან, დასჯის საფრთხესთან და თვითშეფასების პრობლემატიკასთან არის დაკავშირებული

ბავშვი იტანჯება შიშისგან, როდესაც ეჩვენება, რომ მშობლებს არ უყვართ. დაუშვებელია ბავშვს მიტოვებით დავემუქროთ თუნდაც ხუმრობით. პატარისთვის მშობლების გარეშე დარჩენა მთელ დედამიწაზე მარტოდ ყოფნის ტოლფასია. ბავშვს იმისიც კი შეიძლება შეეშინდეს, როცა საწოლში გაეღვიძება და დედას ვერ დაინახავს. მან შეიძლება გაიფიქროს – „იქნებ მიმატოვეს?!" წარმოვიდგინოთ, რომ დედ-მამა დაკავებულია და არ აქვთ დრო, რომ საკმარისი ყურადღება მიაქციონ შვილს. ბავშვი აღმოაჩენს, რომ როცა ის ავადაა, დედა რჩება სახლში და უვლის მას, მამა კი უკითხავს ზღაპრებს, რასაც საერთოდ იშვიათად აკეთებს ხოლმე. ბავშვს გამოაქვს დასკვნა: „იმისთვის, რომ მივიღო ყურადღება, უნდა გავხდე ავად". ამიტომ მან შეიძლება გამოიგონოს ხოლმე, რომ სტკივა თავი, მუცელი, შესაძლოა რაიმე იტკინოს, მაგრამ ეს ტკივილი რეალობის შეუსაბამოდ გააბუქოს და გააძლიეროს, რათა განსაკუთრებული სითბო და ალერსი გამოიწვიოს მშობლებისგან. ასევე შესაძლოა ეს პრობლემატიკა გაუცნობიერებლად მართლაც აისახოს ფსიქოსომატურ ჩივილებზე და ის ხშირად გახდეს ხოლმე ავად. ყურადღებისა და სიყვარულის მისაღებად იწვევს სიმპტომატიკას, საკუთარ თავსაც და სხვებსაც აჯერებს, რომ სუსტია, რათა შეიცოდონ და მოესიყვარულონ. აქ პრობლემა ის კი არაა, რომ ბავშვი აფერისტი მატყუარაა, პრობლემა მის საფუძველში არსებული მოტივაციაა – მშობლიური სიყვარულის დაკარგვის საფრთხე.

ბავშვის ეჭვიანობა და აგრესია მშობლისგან არის პროვოცირებული

ხშირად ბავშვები ეჭვიანობენ და-ძმაზე ან სხვა ბავშვებზე. ეს პრობლემა მაშინ უფრო მწვავდება, თუ მის შედარებას ვახდენთ და-ძმებთან ან სხვა ბავშვებთან. „აი, გიორგი როგორი ყოჩაღია, შენ რა გჭირს, მიბაძე მას“. ამ დროს ბავშვი ასეთ დასკვნას აკეთებს: „სხვები კარგები არიან, მე ცუდი ვარ, დედას უყვარს გიორგი, მე — არა“. ამიტომ ბავშვმა შეიძლება იოლად გამოიგონოს სხვა ბავშვებზე ტყუილები, ისინი ნეგატიურად წარმოგვიდგინოს, ტყუილად გადააბრალოს „დანაშაული", ამის მიზეზი საკუთარი უპირატესობის დამტკიცება და სხვა ბავშვების მიმართ აგრესიაა. ეს ეჭვიანობა და აგრესია კი ხშირად ჩვენი პროვოცირებულია და მის საფუძველშიც ასევე მშობლიური სიყვარულის დაკარგვის საფრთხეა. ბავშვის მოთხოვნილებაა – სწორედ ის გამოჩნდეს „საუკეთესო" მშობლის თვალში. სამართლიანობის მოყვარული მშობლები კი ჭეშმარიტების დადგენის შემდეგ თუ დასჯიან ასეთ ბავშვს, დიდ შეცდომას დაუშვებენ, რადგან პრობლემას ზედაპირულად შეხედეს და მის მოტივაციურ მხარეზე, რეალურ მიზეზზე არც კი უფიქრიათ.

შესაძლოა, ბავშვმა, თუნდაც შემთხვევით, ჭიქა გატეხა და კვლავ დასჯას გაურბის. მით უმეტეს, თუ დედა დაადგება და დაჟინებით, მრისხანედ ეკითხება: „ეს შენ გააკეთე?!" ბავშვმა შეიძლება იოლად უარყოს ან სხვას გადააბრალოს ნამოქმედარი. ეს არის ტყუილი თავდაცვის მიზნით. დასჯა არ ასწორებს პრობლემებს, იწვევს მხოლოდ მოქმედების დროებით შეწყვეტას, მაგრამ პერსპექტივაში აძლიერებს შიშს, ტყუილსა და აგრესიას. დასჯით ვერ ვუშველით ამ ქცევების გამომწვევ მოტივაციურ ფაქტორებს.

ტყუილი ფანტაზია, პოზიტიური ფანტაზია — გამოგონილი შიოლა

ბავშვი, მოზარდი ან ზოგჯერ ზრდასრულიც შეიძლება აგებდეს „პოზიტიურ" ფანტაზიას და იგონებდეს ტყუილ ისტორიებს იმაზე, თუ, მაგალითად, როგორი მეგობრული ურთიერთობა აქვს მშობლებთან, როგორ მოსწონთ ბიჭებს, როგორ ჰყავს შეყვარებული და როგორი ბედნიერია. მოზარდი გოგონა ან ბიჭი საწინააღმდეგო სქესის ადამიანის უბრალო გამოხედვაზეც კი შეიძლება ფიქრობდეს, რომ „ის მასზე გიჟდება". არადა ამას შესაძლოა არავითარი კავშირი არ ჰქონდეს რეალობასთან. ამ ისტორიებს ის ჯერ საკუთარ თავს აჯერებს და შემდეგ სხვა ადამიანებსაც; უყვება მეგობრებს, ნაცნობ თუ უცნობ ადამიანებს. ამის მოტივაცია კი მისი დაბალი თვითშეფასება, მარტოობის შიშია. მაგალითად, პატარა ბიჭი, რომელსაც უჭირს ურთიერთობები, აშინებს სხვა ბავშვებთან კომუნიკაციის მარცხი, კომპენსაციის მიზნით შესაძლოა აგებდეს ტყუილ ფანტაზიას, რომ ჰყავს ბევრი მეგობარი, ან როგორ იჩხუბა და ყველას მოერია სკოლაში. თან ამას დიდი ენთუზიაზმით შეიძლება აკეთებდეს. მას ეს ფანტაზია თავდაცვისთვის, საკუთარი შიშის კომპენსაციისთვის ესაჭიროება. ალბათ გვახსოვს „ნატვრის ხიდან" ფუფალა, მას ხომ საკუთარი მარტოობის განცდის გადასაფარად სჭირდებოდა „შიოლას" გამოგონება. თერაპიაზე კარგად ჩანს, რომ მსგავსი გამოვლინებები უფრო ხშირად ისტერიული სიმპტომატიკის ადამიანებისთვისაა დამახასიათებელი, რომელთაც თვითშეფასების პრობლემატიკიდან გამომდინარე თვითშელამაზების ტენდენცია აქვთ გამოხატული.

თუ მშობლებისთვის არსებობის მთავარი ფორმა შრომაა, ბავშვისთვის ეს არის თამაში

რეალიზმზე ორიენტირებული მშობლები ხშირად შიშით უყურებენ შვილის ფანტაზიორობას და სვამენ კითხვას: რამდენად საშიში მოვლენაა ეს? წარმოსახვა, ფანტაზია არაა უარყოფითი მოვლენა. მას არ მოაქვს ზიანი. პირიქით, ის სასიამოვნო განცდების მომტანია. თუ დიდებისთვის არსებობის მთავარი ფორმა შრომაა, ბავშვისთვის ეს არის თამაში. იგი ამით ემზადება მომავალი ცხოვრებისთვის. თამაშის დროს განსაკუთრებით კარგად ჩანს ბავშვის ფანტაზიორობა. ჩვეულებრივ, ადამიანი რაიმე საქმის გაკეთებამდე ჯერ წარმოსახვაში წყვეტს პრობლემას. ბავშვიც თამაშისას სწორედ ამისთვის ემზადება. ფანტაზია, წარმოსახვა არის ზოგადად ერთ-ერთი უმნიშვნელოვანესი ტექნიკური ინსტრუმენტი ადამიანისთვის როგორც თერაპიაზე, ისე საერთოდ ცხოვრებაში. სხვა საქმეა, როცა ბავშვი სრულიად წყდება რეალურ სამყაროს, წყვეტს ურთიერთობას უფროსებთან და თანატოლებთან და მხოლოდ შექმნილ ფანტასტიკურ სამყაროში იმყოფება. ადამიანები, საგნები და მოვლენები მისთვის არასანდო, საშიში ხდება. ამ შემთხვევაში თავად ფანტაზია კი არ არის უარყოფითი მოვლენა, არამედ ის ფსიქოლოგიური პრობლემები, რომლის გამოც გაურბის რეალურ ცხოვრებას.

ზედაპირულად იმის სწავლება, რომ ტყუილი არ შეიძლება, არ მუშაობს. ამ ტყუილებს ძირითადად ჩვენი მიზეზი აქვს და ჩვენივე დაშავებულზე ისევ ბავშვებს ვსჯით და ხანგრძლივი პერსპექტივით ვერც ვერაფერს ვცვლით. მნიშვნელოვანია, რომ ნება დავრთოთ ბავშვებს ხმამაღლა, თავისუფლად გამოხატონ საკუთარი შიშები, ეჭვები, ემოციები და ფიქრები. თუ ბავშვს დავარწმუნებთ, რომ კარგად გვესმის მისი, მასაც ეხსნება შიში, მეტი ნდობით ეპყრობა მშობლებს, არ სჭირდება ტყუილი და აღარც მათთან თავისუფლად საუბარი გაუჭირდება.

3050
თემები:
მშობლები და შვილები-2018 (71)
საერთაშორისო გადახდების საბანკო ბარათები

„დაისაჯოს მოსკოვი“: რა მოხდება, თუ რუსეთს SWIFT-დან გათიშავენ

47
(განახლებულია 22:04 13.04.2021)
რუსეთს ბანკთაშორისი კავშირის გლობალური სისტემიდან, SWIFT-დან გათიშვით უკვე მარტო აშშ-ში კი არა, ევროპაშიც ემუქრებიან. ამჯერად ხისტი კოორდინირებული ზომების გატარებისკენ მოწოდება ევროპარლამენტში გაისმა.

ნატალია დემბინსკაია

რით ემუქრება ეს რუსეთს და არის თუ არა მზად მისი ფინანსური სისტემა ამგვარი სცენარისთვის?

ძველი მეთოდები

საერთაშორისო ბანკთაშორის სისტემა SWIFT–ში ორასამდე ქვეყნის 11 ათასი ორგანიზაციაა ჩართული. რუსეთს, რომელიც SWIFT–ის ყველაზე მსხვილი ექსპლუატანტების სამეულში შედის, სისტემიდან გათიშვით 2014 წლიდან ემუქრებიან. საბაბები სხვადასხვაგვარია: ყირიმი, დონბასი, სკრიპალების საქმე, ალექსეი ნავალნის საქმე. აშშ–ის პრეზიდენტმა ჯო ბაიდენმაც პოსტზე მოსვლისთანავე დადო რუსეთის SWIFT–დან გათიშვის პირობა.

დეკემბერში სააგენტო Reuters წყაროებზე დაყრდნობით წერდა, რომ ჯო ბაიდენი მოსკოვის „დასჯას“ აპირებდა აშშ–ის სახელმწიფო დაწესებულებებზე ჰაკერული შეტევებისთვის, რასაც „სერიოზული ეკონომიკური, ფინანსური და ტექნოლოგიური დანაკარგები უნდა მოჰყვეს რუსეთისთვის“. როგორც კიბერუსაფრთხოების ექსპერტი ჯეიმს ენდრიუ ლუისი აცხადებს, SWIFT–დან გათიშვა — ეს დასჯის ერთ–ერთი ვარიანტია.

აპრილში უკრაინის აღმოსავლეთში მდგომარეობა გამწვავდა — ეს ახალი საბაბია. თემა ევროპაში აიტაცეს. როგორც ევროპარლამენტის წამყვანი ფრაქციის ხელმძღვანელმა მანფრედ ვებერმა თქვა, მოსკოვი „სასიში პროვოკაციების კურს განაგრძობს“.

მისი აზრით, უკრაინასთან საზღვართან „სამხედრო ყოფნის გაძლიერებით“ მოსკოვი დასავლეთის მოთმინებას ცდის. ამიტომ შეერთებულმა შტატებმა და ევროკავშირმა კოორდინირებული პასუხი უნდა გასცენ მას. დეპუტატის თქმით, ვითარების ესკალაციის შემთხვევაში „დოზირებული სანქციების დრო“ აღარ არის. ერთ–ერთ რეალურ ვარიანტად ვებერმა „ოლიგარქების ანგარიშების მასშტაბური გაყინვა“ და ასევე SWIFT–დან გათიშვა დაასახელა.

პრობლემები იქნება

რუსეთს აქვს ფინანსური შეტყობინებების გადაცემის საკუთარი სისტემა (SPFS), რომელიც 2014 წელს აამუშავა. მასში ჩართულია ყველა რუსული ბანკი და ასევე ევრაზიულ ეკონომიკურ კავშირში შემავალი ქვეყნების ათამდე ბანკი. SWIFT–დან გათიშვის შემდეგ ბანკები მის რუსულ ანალოგზე გადავლენ, მაგრამ საერთაშორისო ანგარიშსწორებებისთვის SPFS ჯერჯერობით არ არის სრულფასოვანი ალტერნატივა, ამიტომ დარტყმა სერიოზული იქნება.

„SWIFT–დან გათიშვა რუსეთის ბანკების ტრანზაქციების პარალიზებას გამოიწვევს. ყველაზე მეტად მსხვილი ექსპორტიორები დაზარალდებიან. მათ მხოლოდ უცხოურ ბანკებთან თანამშრომლობა მოუწევთ თავიანთი ოპერაციული საქმიანობის მომსახურებისთვის. გაჩნდება ბევრი შუამავალი, რომლებიც შეზღუდვებს გვერდს აუვლიან. ამით განსაკუთრებით მოიგებენ ევრაზიის ეკონომიკური კავშირის ქვეყნების ფინანსური ინსტიტუტები“, — მიაჩნია საინდექსაციო კომპანია „ბეტა ტექნოლოგიების“ მთავარ სტრატეგს არარატ მკრტიჩიანს.

ყველაფერი მოგვარებადია

მაგრამ კატასტროფა არ მოხდება.

„რუსული ბანკების SWIFT–დან გათიშვა თავისთავად ნიშნავს კონტრაგენტებს შორის ფინანსური ტრანზაქციების გაძვირებასა და შენელებას. აშკარაა, რომ ტრადიციული ჯაჭვი დაირღვევა, საჭირო იქნება გარკვეული დრო მათი აღდგენისთვის. მაგრამ ამის გაკეთება ერთ ან ორ კვირაში იქნება შესაძლებელი“, — ამბობს ოლეგ ბოგდანოვი, QBF–ის წამყვანი ანალიტიკოსი.

სხვა საქმეა, თუ ამას რუსეთის რეზიდენტების დოლარში არსებული სახსრების გაყინვა მოჰყვება, აზუსტებს ექსპერტი. მაშინ შესაძლოა ბაზრებზე პანიკური რეაქცია დაიწყოს. იმისათვის, რომ ყველაფერი დამშვიდდეს, ერთი ან ორი კვარტალი იქნება საჭირო და საბოლოოდ ფინანსური კავშირები მაინც აღდგება.

ამასთან გარდაუვალია სავალუტო რყევები. მაგრამ ტურბულენტობის მოკლე პერიოდის შემდეგ რუბლი ნორმას დაუბრუნდება.

წამგებიანი

მეორე მხრივ, არსებობს მოსაზრება, რომ რუსეთის SWIFT–დან გათიშვა მუქარას არ გასცდება. ჯერ ერთი: SWIFT კერძო კომპანიაა, რომელიც რუსული ბანკებიდან ფულს შოულობს. ამასთან სისტემას ისინი მარტო საერთაშორისო ტრანზაქციებისთვის კი არ იყენებენ, არამედ შიდა ბანკთაშორისი გადარიცხვებისთვისაც. იმისათვის, რომ SWIFT–მა ვინმე გათიშოს, აუცილებელია ევროკავშირის გადაწყვეტილება ან აშშ–ის სანქციები თავად SWIFT–ის წინააღმდეგ. მაგრამ ამ შემთხვევაში რუსეთის სავაჭრო პარტნიორებიც — ამერიკული და ევროპული ბიზესიც ჩამოშორდება საქმეს.

„ეს ვითარება შეიძლება ფორსმაჟორად ჩაითვალოს, რომელიც რუსულ კომპანიებსა და სახელმწიფოს უფლებას არ მისცემს, დაფაროს არსებული ვალდებულებები. ქვეყნის შიდა ვალი დაახლოებით 450 მილიარდი დოლარია. შესაბამისად, კრედიტორებს ფინანსური პრობლემები შეექმნებათ. გარდა ამისა, გართულდება ოპერაციები ძირითად სავაჭრო პარტნიორებთან, რომელთაგან უმსხვილესი ევროკავშირია. ევროპარლამენტის მოწოდებები სხვა არაფერია, თუ არა ბაზრის პოპულიზმი“, — დარწმუნებულია ექსპერტი ანდრეი კოჩეტოვი.

სიმწარეს იწვნევს აშშ–ც. ჯერ ერთი, ვაშინგტონს მხოლოდ ჰიპოთეტური გავლენა აქვს SWIFT–ზე, რომლის შტაბ-ბინაც ბელგიაშია. და მეორეც: რუსეთს ასევე შეუძლია მკაცრი სანქციები დაუწესოს ამერიკულ ბანკებსა და პოლიტიკოსებს.

რედაქცია შესაძლოა არ ეთანხმებოდეს ავტორის მოსაზრებებს

47
საქართველოს პარლამენტი

შესვლა?.. არშესვლა?.. საკითხავი, აი, ეს არის...

120
(განახლებულია 15:39 13.04.2021)
ქართული მედია ოპოზიციის მიერ გარკვეულ დათმობებსა და შეთანხმების ალბათობაზე დანიელსონის მიერ გამართული მოლაპარაკებების მეორე რაუნდის შემდეგ ისევ ალაპარაკდა.

ამის ინსპირაცია კი კვირას ევროკავშირის ოფისში ჯერ პარლამენტის თავმჯდომარის არჩილ თალაკვაძის, ხოლო შემდეგ „ლელოს“ ლიდერის მამუკა ხაზარაძის ვიზიტი გახდა. როგორც თალაკვაძე, ასევე ხაზარაძე აცხადებენ, რომ ისინი მზად არიან, დანიელსონის ტექსტს ხელი მოაწერონ, მაგრამ მცირედი შესწორებებით. წითელი ხაზი კი როგორც ერთი, ისევე მეორე მხრიდან ვადამდელი არჩევნების დანიშვნასა და მელია-რურუას გათავისუფლებაზე გადის.

სხვათა შორის, 9 აპრილს პარლამენტში გამოსვლისას სწორედ ამიტომ აკრიტიკებდა პრეზიდენტი როგორც ხელისუფლებას, ასევე ოპოზიციას, რომ ვერ იქნა და საერთო ენა ვერ გამონახეს და ქვეყნის ინტერესები საკუთარ ვიწროპარტიულ ინტერესებზე მაღლა ვერ დააყენეს.

ორივე მხარე საუბრების გაგრძელების პარალელურად დიდი ინტერესით ელოდება, რა მოხდება ირაკლი კობახიძის აშშ-ში და ბრიუსელში ვიზიტების შემდეგ. ძნელი დასაჯერებელია, რომ კობახიძემ შეძლოს მთავარი პარტნიორების იმაში დარწმუნება, რომ მელიას პატიმრობა აუცილებელი იყო მაშინ, როცა ამისი მის პრემიერ-მინისტრ გახარიასაც კი არ სჯეროდა.

მეორეს მხრივ, დასავლეთს არ ესმის, რას ნიშნავს ოპოზიციის გაჯიუტება და პარლამენტში არშესვლა, რომელსაც პაატა ზაქარეიშვილმა სამართლიანად უწოდა ყველა დროის ყველაზე სულელური პოლიტიკური გადაწყვეტილება. თანაც, ამ არჩევნების შედეგებს ყველა მთავარი საერთაშორისო მოთამაშე აღიარებს და დღესაც რომ ჩატარდეს არჩევნები, სოციოლოგიური კვლევების შედეგებით თუ ვიმსჯელებთ, დღევანდელ ოპოზიციას ნამდვილად არ აქვს იმის შანსი, უკეთესი შედეგები დადოს.

პარლამენტის ბოიკოტირების გადაწყვეტილების ავტორი და მოკარნახე რომ უკრაინაში მცხოვრები საქართველოს ყოფილი პრეზიდენტი მიხეილ სააკაშვილია, ნათლად ჩანს. მას ამ პოზიციით წვრილ-წვრილი პარტიების გაფანტვა და „ნაციონალური მოძრაობის“ დომინანტობის შენარჩუნება სურს, მაგრამ რატომ აყვნენ სხვა, ბარიერგადალახული პარტიები მას ამ ავანტიურაში, ეს უკვე სხვა საკითხია.

როგორც ჩანს, ბოლოს და ბოლოს, პარლამენტში ვიხილავთ „გირჩს“, რომელთაც ძალიან უნდათ საქართველოს პარლამენტის ხილვა და მისი ტრიბუნის გამოყენება, თუმცა საკუთარი სამეფო უკვე შეუქმნიათ, და ასევე „სტრატეგია აღმაშენებლის“ ოთხ დეპუტატს თაკო ჩარკვიანის გამოკლებით, რომელიც სიის მეორე ნომერი იყო, მაგრამ, როგორც ჩანს, სწორედ პარლამენტში შესვლა-არშესვლის საკითხის გამო დატოვებს პარტიას.

რაც შეეხება „ლელოს“, ის საკუთარ პირობებს აყენებს. არადა, როგორც ჩანს, სწორედ „ლელოს“ გადაწყვეტილება იქნება მთავარი იმისათვის, შეძლებს თუ არა პარლამენტი საკონსტიტუციო ცვლილებების მიღებას 113 ხმით. ამის გარეშე ბარიერის 3 პროცენტამდე ჩამოწევა არ მოხერხდება. სხვათა შორის, ხელისუფლებას ძალიანაც აძლევს ხელს, ამტკიცოს, რომ მას სურს საარჩევნო კოდექსის შეცვლა, მაგრამ ოპოზიცია ამის საშუალებას არ აძლევს. ამით ხელისუფლება მასზე მორგებულ კანონსაც შეინარჩუნებს და კონსტრუქციულ სახესაც.

„უახლოეს დღეებში" გახდება ცნობილი, თუ როდის შედგება მოლაპარაკებების შემდეგი რაუნდი. ვითარება არის ჩიხური, თუმცა მე გამოსავალს ვხედავ... ვფიქრობ, რომ არსებული შეთანხმების დოკუმენტში უნდა დავამატოთ პოლიტპატიმრების გათავისუფლების საკითხი, ასევე რიგგარეშე არჩევნებამდე მისასვლელი გზა და ამით შეთანხმება მოხდეს. ეს გზა არსებობს", – იმედიანადაა განწყობილი „სტრატეგია აღმაშენებლის“ ლიდერი გიორგი ვაშაძე.

მოლაპარაკების განახლებასა და შეთანხმების პერსპექტივაზე მინიშნებები მმართველ პარტიაშიც კეთდება. პარლამენტის ვიცე-სპიკერი გია ვოლსკი იმედოვნებს, რომ მალე მხარეები შეძლებენ საერთო ნიშნულამდე მისვლას. „ხუთი თუ ექვსი საკითხია, ყველასთან დაკავშირებით გვაქვს აწონილ-დაწონილი, საზოგადოების ინტერესებიდან გამომდინარე პოზიცია. ეს არის იმ სტანდარტის შესაბამისი, რასაც ჩვენგან პარტნიორები ითხოვენ და, რაც მთავარია, ჩვენი საზოგადოების დიდი ნაწილის ინტერესებს უკავშირდება“, – განაცხადა ვოლსკიმ.

რა პირობებს აყენებს „ქართული ოცნება“? რა თქმა უნდა, მმართველი პარტია არავითარ შემთხვევაში არ აპირებს აღიაროს, თითქოს პოლიტპატიმრები ჰყავს. როგორც ირკვევა, გარდა გირაოსი, ასევე მათი მხრიდან არსებობს შეთავაზება, რომ პარლამენტმა მიიღოს დაჩქარებული წესით ამნისტიის კანონი, რომელიც 2019 წლის ივნისის მოვლენებთან დაკავშირებით ყველანაირ პასუხისმგებლობას მოხსნიდა. მეორეს მხრივ კი, შესაძლოა, მმართველი გუნდი დათანხმდეს შემოდგომაზე ადგილობრივ არჩევნებთან ერთად ჩატარდეს პლებისციტი, რათა გაირკვეს, სურს თუ არა ხალხს ვადამდელი არჩევნები. აი, რა სურს ხალხს და როგორია მათი განწყობები, ამაზე მომავალ სტატიაში გიამბობთ.

 

120
სახლი ხობის მუნიციპალიტეტის სოფელ პირველ მაისში, სადაც ბაბუამ 24 წლის შვილიშვილი დაჭრა

ხობში 80 წლის ბაბუამ შვილიშვილი დაჭრა

0
(განახლებულია 16:09 14.04.2021)
ამ დროისთვის დაჭრილი 24 წლის ახალგაზრდა ხობის საავადმყოფოშია გადაყვანილი, სადაც ქირურგიული ოპერაცია უტარდება.

თბილისი, 14 აპრილი - Sputnik. ხობის მუნიციპალიტეტის სოფელ პირველ მაისში ბაბუამ  შვილიშვილი დაჭრა, იუწყება „Sputnik-საქართველოს“ კორესპონდენტი.

შემთხვევა ჯახუთის დასახლებაში დღეს, დაახლოებით 1,5 საათის წინ მოხდა.

გავრცელებული ინფორმაციით, დანაშაულის მოტივად ოჯახური კონფლიქტი სახელდება – 80 წლის მამაკაცსა და  24 წლის შვილიშვილს შორის სიტყვიერი დაპირისპირება მოხდა, რა დროსაც მამაკაცმა შვილიშვილი დანით დაჭრა.

პოლიციამ  დანაშაულში ეჭვმიტანილი უკვე დააკავა, გარდა ამისა, ნივთმტკიცებად ამოღებულია დანაშაულის ჩადენის იარაღი – დანა.

მომხდარ ფაქტზე გამოძიება ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის მცდელობის ფაქტზე სსკ-ის 11 პრიმა-109-ე მუხლის მეორე ნაწილის „ვ“ ქვეპუნქტით მიმდინარეობს.

ნიკა ლატარია

0
თემები:
შემთხვევები საქართველოში