ლონდონი

რა უნდა იცოდნენ ინგლისში შესვლის მსურველებმა საქართველოს საელჩოს განცხადება

71
(განახლებულია 10:53 09.01.2021)
საქართველოს საელჩო დიდ ბრიტანეთში საკუთარი მოქალაქეების საყურადღებოდ განცხადებას ავრცელებს, სადაც საუბარია იმ ცვლილებებზე, რომლებიც გაერთიანებული სამეფოს მთავრობას ქვეყანაში შესვლის მსურველებისთვის 11 იანვრიდან შემოაქვს

თბილისი, 9 იანვარი – Sputnik. COVID–19–ის ვირუსის ახალი შტამის გავრცელების შეზღუდვის მიზნით, ინგლისში მგზავრობის წესებში ცვილილება შედის, იუწყება საქართველოს საელჩო დიდ ბრიტანეთში.

კორონავირუსის ახალი შტამი მსოფლიოს ათობით ქვეყანაში გამოვლინდა: ჯანმო რაოდენობას ასახელებს>>

უწყების ცნობით, გაერთიანებული სამეფოს მთავრობის გადაწყვეტილებით, 11 იანვრიდან ყველა საერთაშორისო მოგზაური, ბრიტანეთის მოქალაქეების ჩათვლით, რომელიც მიემგზავრება ინგლისში, ვალდებულია წარადგინოს COVID–19 ვირუსზე PCR ტესტის უარყოფითი პასუხი, რომელიც გამგზავრებამდე 72 საათის ფარგლებში იქნა ჩატარებული.

„ახალი რეგულაციის უგულებელყოფისა და ტესტის პასუხის არქონის შემთხვევაში, მგზავრს დაეკისრება ჯარიმა - 500 ევრო“, - აღნიშნულია საელჩოს ინფორმაციაში.

შემოღებული ახალი წესების შესაბამისად, მგზავრები, რომლებიც ინგლისში ჩამოდიან იმ ქვეყნებიდან, რომლებთანაც ბრიტანეთს არ აქვს ე.წ. სამგზავრო დერეფანი, კვლავ ვალდებული არიან ჩამოსვლის შემდეგ გადავიდნენ 10–დღიან თვითიზოლაციაში.

ქვეყნები, რომლებთანაც მოქმედებს ე.წ. სამგზავრო დერეფანი, ამ მოთხოვნაზე COVID–19–ის ვირუსზე ტესტის პასუხი არ მოქმედებს.

მგზავრებმა ასევე უნდა შეავსონ სპეციალური ფორმა და დაემორჩილონ ქვეყანაში მოქმედი კარანტინის შეზღუდვებს.

უწყების ცნობით, ზემოხსენებული წესები მოქმედებს საჰაერო, სახმელეთო და საზღვაო გზით საერთაშორისო მგზავრობის შემთხვევაში.

დიდი ბრიტანეთის პრემიერ-მინისტრმა ბორის ჯონსონმა კორონავირუსის შემთხვევების სწრაფი მატების გამო 5 იანვრიდან ბრიტანეთში კოვიდ–განგაშის სისტემის მეხუთე დონის ამოქმედებისა და საყოველთაო კარანტინის შესახებ გამოაცხადა.

კარანტინი გულისხმობს შემდეგს:

  • ადამიანები უნდა დარჩნენ სახლში. გამონაკლისია გადაადგილება: აუცილებელი საჭიროების, განათლების, სამუშაო ადგილზე მისვლისა და დღეში ერთხელ ვარჯიშის მიზნით;
  • სტუმართმოყვარეობის სექტორი დახურულია;
  • სახლიდან მუშაობა, სადაც ეს შესაძლებელია;
  • ყველა სახის სავაჭრო ობიექტი, გამაჯანსაღებელი და გასართობი ცენტრი დახურულია;
  • საგანმანათლებლო დაწესებულებები და სკოლები გადადიან ონლაინ–სწავლების რეჟიმზე თებერვლის შუა რიცხვებამდე. გამონაკლისის სახით სკოლები ღია იქნება მხოლოდ განსაკუთრებული პროფესიის მქონე (critical workers) ადამიანების შვილებისთვის.
71
თემები:
მსოფლიო დღეს (2471)
 Mega Millions-ის ლატარიის ბილეთი

აშშ-ში მცხოვრებმა უცნობმა 1 მილიარდი დოლარის ჯეკპოტი მოხსნა

58
(განახლებულია 23:31 23.01.2021)
უცნობი იღბლიანის ლატარიის ბილეთში ერთმანეთს დაემთხვა ექვსივე რიცხვი თეთრ ბურთულებზე, ასევე ოქროს „მეგაბურთულა“

თბილისი, 23 იანვარი – Sputnik. ლატარია Mega Millions-ის ბილეთმა, რომელიც მიჩიგანის შტატში გაიყიდა, 1 მილიარდი დოლარის ჯეკპოტი მოიგო, რაც მეორე ყველაზე დიდი მოგებაა თამაშის ისტორიაში, აცხადებენ მისი ორგანიზატორები.

„ერთი მილიარდი დოლარის ოდენობის ნომინალური ჯეკპოტი ერგება ბედნიერი ბილეთის მფლობელს მიჩიგანში. ეს ერთადერთი ბილეთია, რომელშიც დაემთხვა 22 იანვარს გათამაშებული ექვსივე ნომერი - თეთრი ბურთულები 4, 26, 42, 50 და 60, ასევე ოქროს „მეგაბურთულა“ – 24“, - ნათქვამია ლატარიის ვებგვერდზე გავრცელებულ განცხადებაში.

გათამაშებული ჯეკპოტის რეკორდი დამყარდა 2018 წელს, როდესაც სამხრეთ კაროლინაში გაყიდულმა ბილეთმა მოიგო 1,5 მილიარდი დოლარის პრიზი. ცნობილია, რომ ის შეიძინა ქალმა, რომელმაც ინკოგნიტოდ დარჩენა ისურვა.

ორი დღის წინ სხვა ამერიკული ლატარია Powerball-ის მერილენდში ნაყიდი ბილეთის მფლობელმა 731,1 მილიონი დოლარის ჯეკპოტი მოიგო. ეს მეოთხე ყველაზე დიდი მოგებაა Powerball-ის ისტორიაში.

Mega Millions-ს ლატარიის ბილეთები აშშ-ში 1996 წლიდან იყიდება. ახლახან ორგანიზატორებმა წესები იმგვარად შეცვალეს, რომ ცალკეული მოთამაშეების ისედაც ასტრონომიულად მცირე შანსები კიდევ უფრო შემცირდა. თუმცა ამასთან ერთად დაიწყო რეკორდული ჯეკპოტების გათამაშება, რამაც დამატებით მყიდველები მიიზიდა.

58
ნინო ლომჯარია

არ შეიძლება ძალადობის წახალისება: სახალხო დამცველი ბათუმში მომხდარ ინციდენტს ეხმიანება

95
ომბუდსმენის განცხადებით, პროტესტის გამოხატვის ისეთი ფორმა, რომელიც არღვევს პირის ფიზიკურ ხელშეუხებლობას და უსაფრთხოებას, გამოხატვის თავისუფლების ჩარჩოებში არ ჯდება

თბილისი, 23 იანვარი - Sputnik. ბათუმში საპროტესტო აქციაზე აჭარის უმაღლესი საბჭოს დეპუტატს ირაკლი ჩავლეიშვილისთვის ნაგვის ურნიდან ნარჩენების დაყრას საქართველოს სახალხო დამცველი ნინო ლომჯარია გმობს.

სამოქალაქო საზოგადოებები - „ბათუმი“ და „დაიცავი ძველი ბათუმი“ - ბათუმის ბულვარში 16-სართულიანი შენობის მშენებლობას აპროტესტებდნენ, აქციაზე იმყოფებოდნენ „ნაციონალური მოძრაობის“ წარმომადგენლებიც. ირაკლი ჩავლეიშვილი უმაღლეს საბჭოში „ნაციონალური მოძრაობის“ პარტიული სიით შევიდა. „ნაცმოძრაობის“ წარმომადგენლების თქმით, მას პროტესტის გამოხატვის უფლება არ ჰქონდა.

„გამოხატვის თავისუფლებით დაცული არ არის პროტესტის გამოხატვის ისეთი ფორმა, რაც არღვევს პირის ფიზიკურ ხელშეუხებლობას და უსაფრთხოებას. პირისთვის ნაგვის ურნის თავზე ჩამოცმა არ ჯდება გამოხატვის თავისუფლების ფარგლებში! არ შეიძლება ძალადობის წახალისება ან გამართლება!“ - წერს ლომჯარია.

დღეს მთელი დღის განმავლობაში აღნიშნულ ფაქტთან დაკავშირებით პოლიტიკოსების და საზოგადოებრივი აქტივისტების შეფასებები ისმოდა. აღსანიშნავია, რომ „ნაცმოძრაობის“ ერთ-ერთმა ლიდერმა სალომე სამადაშვილმა მკაცრად დაგმო მომხდარი, რასაც მისი თანაპარტიელები არ დაეთანხმნენ და გააკრიტიკეს კიდეც. 

თავად ჩავლეიშვილი აცხადებს, რომ თვითონ გადაიტანს მომხდარს, მაგრამ მსგავსი ინციდენტები ქვეყანას აზიანებს.

„მთელი ცხოვრებაა გამოხატვის თავისუფლებისთვის ვიბრძვი. ის, რაც დღეს მოხდა ღმერთმა შეუნდოს. ინცინდენტისას, რომ მოვბრუნდი, ჩემი ტოლი შემხვედროდა საკადრის პასუხს გავცემდი, შვილიშვილისხელა ბავშვი შემხვდა, რომელმაც არ იცოდა რას შვრებოდა. მე ამას როგორმე გადავიტან, მაგრამ ქვეყანა ვერ გადაიტანს... ალბათ განსჯის საკითხი გახდება საზოგადოებაში. თუ ადამიანს პატივს არ ვცემთ, ვერანაირ სახელმწიფოს ვერ ავაშენებთ“, - აცხადებს ჩავლეიშვილი.

აქციის ორგანიზატორთა თქმით, ისინი ორგანიზაცია „ალტერნატივას“ წარმომადგენლის მიერ ჩადენილ საქციელს ემიჯნებიან და აცხადებენ, რომ „ამ ამაზრზენმა ინციდენტმა სრულიად გადაფარა ის აქტუალური თემა, რისთვისაც დღეს ბათუმელები შევიკრიბეთ, ლამის დისკრედიტირებულ იქნა ის მოძრაობა, რომელსაც დღეს ჩაეყარა საფუძველი“.

 

 

95
სოფ.ქაისხევის წმ.გიორგის სახელობის ეკლესია

საეკლესიო კალენდარი: 24 იანვარი

0
(განახლებულია 00:42 24.01.2021)
საქართველოს მართლმადიდებელი ეკლესია 24 იანვარს წმიდა თეოდოს დიდს და ღირს თეოდოს ანტიოქიელის იხენიებს.

Sputnik საქართველო გიამბობთ ვინ იყვნენ ეს ადამიანები და რატომ არიან მოხსენიებული საეკლესიო კალენდარში.

წმიდა თეოდოსი დიდი

წმიდა თეოდოსი დიდი 424 წელს დაიბადა კაბადოკიაში, ღვთისმოშიშ ქრისტიანთა ოჯახში.  

თეოდოსიმ რამდენიმე ხანი სიწმიდით განთქმული ერთი განდეგილი ბერის მორჩილებაში დაჰყო, შემდეგ კათისმას მონასტერში ცხოვრობდა, ბოლოს კი განმარტოება ისურვა და პალესტინის უდაბნოს იმ გამოქვაბულში დაეყუდა, სადაც, გადმოცემით, იესოს თაყვანისცემის შემდეგ ბეთლემიდან გამობრუნებულ მოგვებს გაუთევიათ ღამე.

 ოცდაათი წელი ცხოვრობდა წმიდა მამა ამ მღვიმეში და ფიცხელი შრომითა და მარხვით ცდილობდა ხორციელი გულისთქმების დაოკებას: მხოლოდ კვირა დღეს ჭამდა; დღე და ღამე ლოცვად იდგა. წმიდანმა იქ ააგო პირველი საერთო საცხოვრისი, ანუ, ლავრა, რომელიც ბასილი დიდის ტიპიკონით ხელმძღვანელობდა. თეოდოსის სავანეში სიხარულით ღებულობდნენ და ნუგეშს სცემდნენ უცხოებს, გლახაკებს. წმიდა მამა ზრუნავდა სნეულებზეც. მან ააშენა დავრდომილთა თავშესაფარი. წმიდანის ბევრი მოწაფე უდაბნოს გარეთაც მოსაგრეობდა: ზოგმა მეუდაბნეობის ღვაწლი იტვირთა, ზოგიც ეპისკოპოსად და სხვადასხვა სავანეთა იღუმენად დაადგინეს.

„და ვინმცა შეუძლო მოთხრობად ყოვლისა, რავდენსა წმიდაჲ იგი იქმოდა ფერად-ფერადთა სათნოებათა და გარდარეულსა ლოცვასა და წიგნთა კითხვასა დღე და ღამე“? ყოველ კვირას, შაბათის მწუხრიდან გათენებამდე, იგი ძმებს მღვიძარებაში ამყოფებდა, ლოცვის შემდეგ კი მოციქულთა და ეკლესიის მამათა გამონათქვამებით მოძღვრავდა.

იმპერატორ ანასტასის (491-518) ზეობისას იმპერიაში გავრცელდა ევტიხისა და სევერის მწვალებლობა, რომლებიც „უთავოებად“ (ბერძნულად აკაფალებად) იწოდებოდნენ საღმრთო საიდუმლოებებისა და სამღვდელო მადლის უარყოფის გამო. ანასტასი მიემხრო ერეტიკოსებს და ქრისტიანთა სასტიკი დევნა დაიწყო. თეოდოსი აღსდგა მართლმადიდებლობის დასაცავად: ყველა მონასტრის წინამძღვარი შეჰყარა, მათთან ერთად მეფეს მისწერა წერილი, რომელშიც დაგმო მსოფლიო კრებებზე ანათემას გადაცემული ყველა ერესი და განაცხადა: ბერები „არ მიერჩდებიან შეწყნარებასა სევეროსისასა და არცა სხჳსა ვის მწვალებელთაგანისა, ვიდრემდის ყოველთა სისხლი დაითხიოს“. იმპერატორი ცოტა ხნით დაცხრა, მაგრამ შემდეგ კვლავ განაახლა დევნა. მაშინ საღვთო შურით აღძრული წმიდა მამა იერუსალიმში ჩავიდა და დიდი ტაძრის ამბიონიდან შეაჩვენა მწვალებლობა.

ღირსი  მამა 105 წლის ასაკში მიიცვალა. ეს მოხდა 529 წელს.

ღირსი თეოდოსი ანტიოქიელი 

წმინდა თეოდოსი ანტიოქელმა სიყმაწვილეშივე დატოვა მდიდრული ოჯახი და მცირე კელიაში დასახლდა ისის ყურის სანაპიროზე, ქალაქ როსის მახლობლად. წმიდანს შიშველ მიწაზე ეძინა, ჯვალოს სამოსელი ეცვა და თან რკინის მძიმე ბორკილებსაც ატარებდა. მას თმები ისე წამოეზარდა, რომ კოჭებამდე სცემდა. მარხვის და ლოცვის დაუსრულებელი ღვაწლით ღირსმა თეოდოსიმ დათრგუნა ხორციელი ვნებები, მრისხანება დააცხრო და გონება არაწმინდა ფიქრებისაგან განიწმინდა. თავის სამშობლოში მან დააარსა მონასტერი და სავანის ძმებში ფიზიკური შრომისა და სულიერი ღვაწლის სიყვარულს აღვივებდა, ღირსი მამა განსაკუთრებულ მზრუნველობას იჩენდა მწირებისა და მიუსაფრების მიმართ. წმიდანმა შორს გაითქვა სახელი, მას ქრისტიანებიც იცნობდნენ და წარმართებიც. ზღვაოსნები განსაცდელის ჟამს შემწედ „თეოდოსის ღმერთს“ უხმობდნენ. ზოგჯერ მისი სახელის უბრალო ხსენებაც კი აცხრობდა აბობოქრებულ ტალღებს. წმიდანის ეშინოდათ, პატივს სცემდნენ ყაჩაღებიც და ლოცვას ითხოვდნენ მისგან. თეოდოსიმ გადაწყვიტა, განრიდებოდა ადამიანურ დიდებას. სოფელ მარათონის მახლობლად დაიწყო განდეგილი ცხოვრება და მიიცვალა კიდეც მშვიდობით (+დაახლ. 412).

 

მასალა მომზადებულია ღია წყაროებზე დაყრდნობით.

0