https://sputnik-georgia.com/20210705/qeTi-arevaZe-xelnakeTi-Tojinebi-252216304.html

იტალიელი სინიორას ვიდეო-გაკვეთილები და ქართველი ინჟინრის „გოგოცუნები“

იტალიელი სინიორას ვიდეო-გაკვეთილები და ქართველი ინჟინრის „გოგოცუნები“

Sputnik საქართველო

ეს ამბავი კიდევ ერთი დასტურია იმისა, რომ ქართველი ქალების უმეტესობა შემოქმედებითი ბუნებით გამოირჩევა და თუ მოისურვებენ, შეუძლიათ სრულიად უცნობი სფეროც... 05.07.2021-ს, Sputnik საქართველო

2021-07-05T16:34+0400

2021-07-05T16:34+0400

2021-07-05T22:45+0400

ავტორები

ანალიტიკა

ინტერვიუ

https://cdnn1.img.sputnik-georgia.com/img/07e5/07/05/252213951_0:0:2048:1159_1920x0_80_0_0_757e58f0c0e1e7d132e163f198f60d9f.jpg

პროფესიით ინჟინერი ქეთი არევაძე ალბათ ვერასდროს იფიქრებდა, რომ უცნობი იტალიელი ქალბატონის მიერ ინტერენტში ატვირთული ვიდეო მისი ახალი საქმიანობის დაწყების წინაპირობა გახდებოდა.− ქალბატონო ქეთი, როგორ გაჩნდა თქვენს ცხოვრებაში ახალი გატაცება?− თავის დროზე ტექნიკური უნივერსიტეტის მანქანათმშენებლობის ფაკულტეტი დავამთავრე, მაგრამ პროფესიით არასოდეს მიმუშავია. მერე წლების განმავლობაში კონსულტანტად და მენეჯერად ვმუშაობდი იტალიური ტანსაცმლის მაღაზიაში.ჩემთვის სრულიად განსხვავებული და ლამაზი სამყარო მას მერე აღმოვაჩინე, რაც ბავშვის გამო მუშაობას თავი დავანებე. დღეს ეს სამყარო იმდენად ჩემია და იმდენად მავსებს, რომ ამ ხელსაქმის გარეშე ცხოვრება უკვე ვერც წარმომიდგენია.− ამ ხელსაქმის დაწყებას კონკრეტული მიზეზი ჰქონდა?− დიახ და ამის მიზეზი ჩემი შვილისთვის სკოლაში მიცემული დავალება გახდა. დაავალეს, რომ რომელიმე ხელნაკეთი შინაური ცხოველი მიეტანა. წარმოდგენა არ მქონდა, რა და როგორ უნდა გაკეთებულიყო. ამიტომ ერთად დავიწყეთ ინტერნეტში იმ ვიდეოების ძიება, რომლითაც რამე მარტივის შექმნას შევძლებდით. ამ ძებნაში შემთხვევით აღმოვაჩინე ერთი იტალიელი ქალბატონის ვიდეო, რომელიც თოჯინებს აკეთებდა. იმ საოცარ ვიდეოებს მთელი ერთი კვირის განმავლობაში ვუყურებდი და ვუსმენდი.− იტალიური ენა იცით?− იტალიური, რა თქმა უნდა, არ მესმოდა, მაგრამ მაინც „ვუსმენდი“ და ვუყურებდი. მოკლედ, ამ ვიდეოების ყურებამ ისე ჩამითრია, რომ მოსვენება დავკარგე. დავიწყე იმაზე ფიქრი, თუ რით და როგორ შეიძლებოდა მსგავსი რამ გამეკეთებინა. ერთ დღესაც რაღაც მასალები მოვიძიე და დავიწყე. შევკერე პირველი თოჯინა, პირველს მეორე მოჰყვა, მერე მესამე და მივხვდი, რომ ამ საქმეს თავს ვეღარ დავანებებდი.− ახლობლების რეაქცია როგორი იყო?  − როცა ჩემი ნახელავი ოჯახის წევრებმა და მეგობრებმა ნახეს, ძალიან მოეწონათ. მაშინვე მირჩიეს, რომ სოციალურ ქსელებში ჩემი ხელნაკეთი თოჯინების გვერდი გამეკეთებინა. რა თქმა უნდა, მაშინვე შევქმენი, მერე კი რამდენიმე მათგანი გასაყიდად მაღაზიაშიც მივიტანე. მაშინ ახალი წელი მოდიოდა და ჩემი ნამუშევრები კარგად გაიყიდა.− დღეს ხელნაკეთ თოჯინებს ბევრი აკეთებს და ამ კუთხით კონკურენცია დიდია...− ვიცი. ამიტომაც დავიწყე მუშაობა და იმაზე ფიქრი, რომ ჩემი გოგოცუნები განსხვავებული და ჩემეული ყოფილიყვნენ. ავდექი და გამოვპრანჭე ისინი: ძალიან მიყვარს „წიულის“ ფუშფუშა ქვედა ბოლოები, ნატურალური ქსოვილები, მაქმანები და ლენტები. როცა რაიმე ქსოვილს ვხედავ, უკვე ვიწყებ იმაზე ფიქრს, რა და როგორ გავაკეთო. გონებაში ფერებსა და სტილს ვუხამებ. შეიძლება რამდენიმე დღე დამჭირდეს იმისთვის, რომ ჩემმა თოჯინებმა საბოლოო სახე მიიღონ.− საერთოდ პატარა ზომის ნივთი უფრო რთული დასამზადებელია...− ჩემი ყველაზე პატარა ბროშები ზომით 15 სმ-ია, ყველაზე დიდი − 50-55 სმ-მდეა. დიდი ზომის თოჯინების დამზადებას საშუალოდ ხუთი დღე სჭირდება, პატარებს კი ორ-სამ დღეში ვამზადებ. ვცდილობ, რომ ამ ხელსაქმესთან ყოველდღიურად მქონდეს შეხება. სხვათა შორის, ყველა ჩემი თოჯინა, რომელიც გამოფენაზე გავიტანე, გაიყიდა.− ამ საქმეს სახალისო მომენტებიც თუ ახლავს?− რამდენჯერმე ყოფილა შემთხვევა, რომ ჩემი თოჯინები კონკრეტული ადამიანებისთვის მიუმსგავსებიათ. მახსენდება თოჯინა, რომელიც შემიკვეთეს და ერთ-ერთ ჯგუფში გოგონამ ძალიან მიამსგავსა თავის მეგობარს. დამიკავშირდა და მეგობრის ფოტოც მომაწოდა. დავრწმუნდი, რომ მართლაც საოცრად ჰგავდა. შემდეგ იმ გოგონასთვის ბროშიც შემიკვეთა. აი, ასეთი სახალისო ამბებიც ხდება ხოლმე უფროსების თოჯინურ სამყაროში.მომავალში სიამოვნებით დავიწყებ პოლიმერული თიხის თოჯინებზე მუშაობას. ასეთმა საქმიანობამ შეიძლება ნებისმიერი დიასახლისის მოსაწყენი ცხოვრება უფრო ლამაზი და შინაარსიანი გახადოს და ხელოვნებისგან მიღებული სიამოვნება სხვებსაც განაცდევინოს.

2021

ახალი ამბები

ka_KA

ავტორები, ანალიტიკა, ინტერვიუ