COVID-19-ის ვაქცინა

ყველაფერი COVID-19-ის რუსული ვაქცინის შესახებ

223
(განახლებულია 18:08 20.08.2020)
COVID-19-ის ახალი რუსული ვაქცინის რეგისტრაციის პროცედურაზე, ცდების შედეგებსა და მოსახლეობის აცრის გეგმებზე სააგენტო Sputnik-ს გამალეის სახელობის ცენტრის დირექტორის მოადგილე სამეცნიერო დარგში დენის ლოგუნოვი ესაუბრა.

- გასულ კვირაში თქვენ გადაეცით კლინიკური კვლევების შედეგები ჯანდაცვის სამინისტროს. შედეგები ჯერ გამოქვეყნებული არ არის. გაგვიზიარეთ ამ კვლევების მთავარი დასკვნები.

- ჩვენ გამოვიკვლიეთ ვაქცინის უსაფრთხოება და ეფექტურობა კლინიკური ცდების ჩატარებამდე. შემდეგ ჩავატარეთ ორი კლინიკური კვლევა, რომლის დროსაც, ჯანმრთელი მოხალისეების მონაწილეობით, ვაქცინას ვსწავლობდით უსაფრთხოებისა და იმუნოგენურობის მაჩვენებლების მიხედვით. ამ კვლევების შედეგად ვაქცინამ უსაფრთხოების კარგი პროფილი და მაღალი იმუნოგენურობა გამოავლინა.

ყველა მოხალისეს აღმოაჩნდა ვირუსის გასანეიტრალებელი ანტისხეულები ვაქცინის როგორც მშრალი, ისე თხევადი ფორმების გამოყენებისას. გაანალიზდა ასევე უჯრედული იმუნური პასუხის სხვადასხვა მაჩვენებელი, კერძოდ, ციტოტოქსიკური ლიმფოციტები – ვირუსის საწინააღმდეგო იმუნიტეტის მეტად მნიშვნელოვანი პარამეტრი.

ციტოტოქსიკური ლიმფოციტები, რომლებიც ორგანიზმიდან ვირუსით დაავადებულ უჯრედებს აძევებენ, აღმოაჩნდა ყველა აცრილ მოხალისეს. ამ მხრივ ძალიან კარგი შედეგები მივიღეთ.

უსაფრთხოების თვალსაზრისით: მოსალოდნელი არასასურველი მოვლენები, რომლებიც გამოიხატებოდა ტემპერატურითა და ვაქცინის შეყვანის ადგილის ტკივილით, ყველა მოხალისეს არ გამოუვლინდა. კონკრეტული ციფრები უახლოეს მომავალში გამოქვეყნდება.

- რამდენმა ადამიანმა მიიღო მონაწილეობა ცდებში პირველი და მეორე ფაზების დროს?

- პირველ და მეორე ფაზებში მონაწილეობდა 38-38 ადამიანი, სულ – 76. ორი პროტოკოლი იმით განსხვავდებოდა, რომ ვაქცინის მოქმედი ნივთიერება ერთი და იგივე იყო, აგრეგატული ფორმა კი - სხვადასხვა.

- რამდენად განსხვავდებოდა მონაწილეთა ასაკი?

- მოხალისეები პირველი და მეორე ფაზებისთვის შეირჩნენ 18-დან 60 წლამდე ასაკობრივი ჯგუფებიდან.  

- პრესაში ხშირად მეორდება, რომ საიმედო უსაფრთხო ვაქცინის შესაქმნელად საჭიროა არანაკლებ წელიწად-ნახევარი. შეგიძლიათ აგვიხსნათ, როგორ მოახერხეს გამალეის სახელობის ცენტრის მეცნიერებმა ვაქცინის შექმნა ასეთ მოკლე დროში, პრაქტიკულად, 5-6 თვეში?

- არასწორია იმის მტკიცება, რომ ჩვენ ვაქცინა „ნულიდან“ მოკლე დროში შევქმენით. ადენოვირუსული ვექტორების ტექნოლოგიის შემუშავების მომენტიდან დაწყებული, პრაქტიკაში მის დანერგვამდე უკვე ოთხი ათწლეული გავიდა.

2015 წლიდან ადენოვირუსული ვექტორების საფუძველზე შექმნილი ვაქცინებით, რომლებიც გამალეის ცენტრში შემუშავდა, 3000-ზე მეტი ადამიანი აიცრა. ამიტომ ეს არ ყოფილა ხუთი თვის ნაშრომი, არავითარ შემთხვევაში.

ადენოვირუსული ვექტორების საფუძველზე ვაქცინები მხოლოდ რუსეთში არ იქმნება. ჩინეთი, კომპანია CanSino და Johnson & Johnson ასევე მუშაობენ ადენოვირუსულ ვექტორებთან. პირველ რიგში, ესაა ებოლას ვირუსის საწინააღმდეგო ვაქცინები. ეს პლატფორმები ცნობილია და კარგადაა შესწავლილი კლინიკური ცდების ფარგლებში.

ადენოვირუსული ვექტორების საფუძველზე აღნიშნული პლატფორმების უსაფრთხოების სასარგებლოდ, კლინიკური ცდების შედეგების გარდა, შეიძლება იმის დამატებაც, რომ ჩვენ ყველანი ვართ დაავადებული ადენოვირუსებით და არავის არასდროს არ აწუხებს არანაირი შედეგი სომატური დაავადებების სახით.

ჩვენ ვმუშაობთ არა ცოცხალ ადენოვირუსებთან, არამედ ადენოვირუსულ ვექტორებთან. ესაა ვირუსები, რომლებსაც მოცილებული აქვს გენომების ნაწილი და აღარ გააჩნიათ გამრავლების უნარი ადამიანის უჯრედებში. გამოდის, რომ ადენოვირუსებთან ერთად ცხოვრება საშიში არ არის, ხოლო ვექტორებთან ერთად, რომლებსაც გამრავლების უნარი არ გააჩნიათ, სრულებით უსაფრთხოა. ჩემს სიტყვებს ადასტურებს ამ ვექტორების ათობით ათასი კვლევა, მათ შორის, კლინიკური კვლევებიც.

- თქვენმა ვაქცინამ დროებითი რეგისტრაცია გაიარა. რას ნიშნავს ეს?

- რისთვის არსებობს დროებითი რეგისტრაცია? ჩვენ ხომ ჯანმრთელი მოხალისეების დაცვას არ ვისახავთ მიზნად მომდევნო 1,5 წლის განმავლობაში.

თუ ჩვეულებრივ მოსახლეობასთან ვმუშაობთ, რომელთა შორის არიან რისკ-ჯგუფები, ანუ ადამიანები, რომლებიც გადატანილი ინფექციის შედეგად ან დაიღუპებიან ან კიდევ მძიმედ დაავადდებიან, მაშინ საჭირო იყო მექანიზმი, რომელიც საშუალებას მოგვცემდა, ძალიან მკაცრი პირობებითა და შეზღუდვებით ვაქცინა გონივრულ ვადებში ბრუნვაში გამოგვეტანა.

მინდა ასევე ხაზი გავუსვა, რომ საუბარი არ არის იძულებით მასობრივ ვაქცინაციაზე, აცრის თაობაზე გადაწყვეტილებას ყველა დამოუკიდებლად იღებს.

- დაახლოებით რამდენი ადამიანი მიიღებს მონაწილეობას მესამე ფაზაში?

- საბოლოო ციფრებზე ვმსჯელობთ, მაგრამ შემიძლია აღვნიშნო, რომ კვლევებში დაახლოებით 30-40 ათასი ადამიანი ჩაერთვება.

ერთ-ერთი სამუშაო ვარიანტი გულისხმობს 2000 ადამიანის მონაწილეობას კლინიკურ ცდებში იმუნოგენურობის პარამეტრების შესაფასებლად, 28 ათასი მოხალისე კი მონაწილეობას მიიღებს კვლევაში ეპიდემიოლოგიური ეფექტურობის შესაფასებლად.

ამჟამად ჩვენ ვასრულებთ პროტოკოლზე მუშაობას, რათა ის შეესაბამებოდეს ყველა ნორმას, მათ შორის, საერთაშორისოს.

- რით განსხვავდება ერთმანეთისგან კლინიკური კვლევების სხვადასხვა ფაზა?

- ჩვენ რუსეთის კანონში არ გვაქვს გაწერილი 1-ლი, მე-2, მე-3 ფაზების ცნებები. ეს პირობითი განსაზღვრებაა, რომელიც საერთაშორისო დონეზე გამოიყენება. პირველი ფაზა არის უსაფრთხოების ფაზა, მას იშვიათად ატარებენ ცალკე – ხშირად ვაქცინებისთვის კლასიკურ პირველ ფაზას მეორესთან ერთად ატარებენ, რომლის დროსაც ფასდება არა მხოლოდ უსაფრთხოება, არამედ ეფექტურობაც.

მესამე ფაზის მსვლელობისას ფასდება ეპიდემიოლოგიური ეფექტურობა.

- რატომ ჩატარდება მესამე ფაზა უკვე დროებითი რეგისტრაციის შემდეგ?

- დროებითი რეგისტრაციის იდეა და არსი ისაა, რომ რისკ-ჯგუფებს შესაძლებლობა მიეცეთ გამოიყენონ ვაქცინა, რაც ადამიანებს დაიცავს ინფექციის მძიმე შედეგებისგან ან სიკვდილისგან. ამასთან, ვაქცინის მოხმარება მკაცრად გაკონტროლდება და დროებითი რეგისტრაცია ნებისმიერ მომენტში შეიძლება შეწყდეს.

მესამე ფაზის მიზანი არის უსაფრთხოებისა და ეფექტურობის მასშტაბური შეფასება დიდი რაოდენობის მოხალისეებზე, გაკონტროლებული კვლევის ფარგლებში.

- თქვენი მისამართით გაისმა კრიტიკა ჯანდაცვის მსოფლიო ორგანიზაციის წარმომადგენელთა მხრიდან, რომლებიც აცხადებდნენ, რომ არანაირი სამეცნიერო კვლევები არ უნახავთ. თანამშრომლობთ თუ არა ჯანმოს წარმომადგენლებთან?

- ჩვენთან ასეთი პრაქტიკა დამკვიდრდა - შედეგებს ჯერ ჯანდაცვის სამინისტროს ექსპერტებს ვაცნობთ. მიზანი იყო უსაფრთხო და ეფექტური ვაქცინის მიღება მაქსიმალურად სწრაფად და ეს გაკეთდა. ამის შემდეგ კი შეიძლება მონაცემების გადათარგმნა ინგლისურ ენაზე და სამეცნიერო ნაშრომების წერა.  

ერთი მხრივ, ეს არ უფანტავს ყურადღებას ადამიანებს, რომლებიც ორიენტირებული არიან დასახული ამოცანის შესრულებაზე, მეორე მხრივ, ექსპერტები, რომლებიც ჩვენ მიერ მიღებულ მონაცემებს აანალიზებენ, არ განიცდიან ზეწოლას. როდესაც რამეს ვაქვეყნებთ, თითქოს ვაჩვენებთ: ხედავთ, გამოვაქვეყნეთ, ჩვენს ნათქვამს იმეორებენ და იხილავენ – მოდით, დაგვარეგისტრირეთ. ანუ ჯანდაცვის სამინისტროში განხილვის შემდეგ მონაცემების გამოქვეყნების გადაწყვეტილება შესაძლებლობას გვაძლევს ჩავატაროთ მიუკერძოებელი ექსპერტიზა. ახლა, როდესაც პრეპარატი დავარეგისტრირეთ, უახლოეს დღეებში სტატია ინგლისურ ენაზე გაიგზავნება ავტორიტეტულ საერთაშორისო ჟურნალში, მას ექსპერტები – რედაქტორები და რეცენზენტები შეაფასებენ. ეს ერთი-ორი დღის საქმე არ არის, პროცესს გარკვეული დრო სჭირდება, მაგრამ ნებისმიერ შემთხვევაში მთელი მასალა შეკრებილია და ჩვენ მის გამოქვეყნებას ვაპირებთ. იმედია, უახლოეს მომავალში კრიტიკის საფუძველი აღარ იარსებებს.

- როგორ აპირებთ წარმოების სიმძლავრეების გაზრდას?

- მოსალოდნელია, რომ ვაქცინის მასობრივი დამზადება 2020 წლის სექტემბერში დაიწყება. 2020 წლის ბოლოსთვის კი იგეგმება ვაქცინის წარმოების გაზრდა 200 მილიონ დოზამდე, თუ ამოქმედდება ყველა საწარმოო მოედანი, მათ შორის, საერთაშორისო.

- კლინიკური კვლევების ორგანიზაციების ასოციაცია აკრიტიკებდა გამალეის სახელობის ცენტრის მეცნიერებს იმის გამო, რომ ისინი თავად იკეთებდნენ საკუთარი ვაქცინის პროტოტიპს. მათი თქმით, საერთაშორისო სტანდარტების თანახმად, ეს უხეში დარღვევაა. ამ კრიტიკას როგორ უპასუხებთ?

- ცენტრის მეცნიერებს არაფერი არ დაურღვევიათ. დარღვევა იქნებოდა, მათ ქუჩაში რომ დაეწყოთ მოხალისეების დევნა და ინფორმირებული თანხმობის ხელმოწერისა და დაზღვევის გარეშე შეეყვანათ მათთვის ვაქცინა. ეს ნამდვილად იქნებოდა დარღვევა, რომელზეც ასოციაცია საუბრობდა, ასე რომ მოვქცეულიყავით.

ვინაიდან შემქმნელს უფლება აქვს, საკუთარ თავზე გამოსცადოს ის, რასაც ამზადებს, და ეს არანაირად არ რეგულირდება, აცრას ვიკეთებდით არა იმიტომ, რომ გმირები ვართ და სახელის მოხვეჭა გვინდა, არამედ იმიტომ, რომ ადამიანებს უბრალოდ წითელ ზონაში, ანუ ვირუსთან უწევდათ მუშაობა. მოსკოვში კორონავირუსით ინფიცირებულთა მთელი პლაზმა ჩვენთან მოდიოდა, უნდა გაგვეკონტროლებინა ამ პლაზმის აქტივობა ცოცხალი ვირუსის მიმართ, ანუ ჩვენი თანამშრომლები მუდმივად საფრთხის ქვეშ იყვნენ.

მეტიც, ადამიანების ერთი ნაწილი უკვე აღარ არის ახალგაზრდა, ნაწილს კი თანმდევი დაავადებები აწუხებს.

- შეუძლიათ თუ არა თქვენი ვაქცინის მიღება ადამიანებს, რომლებსაც კორონავირუსი აქვთ გადატანილი? მოსალოდნელია თუ არა ამ შემთხვევაში რაიმე არასასურველი ეფექტები?

- ჩემთვის ამ მხრივ აბსოლუტურად არანაირი პრობლემა არ არსებობს. ჩვენ ყოველ წელს ხელახლა ვიკეთებთ გრიპის ვირუსის აცრას, ამის მიუხედავად, ავად მაინც ვხდებით. არავინ კითხულობს, არის თუ არა ეს პრობლემა, შეიძლება თუ არა მომავალ წელს აცრა, თუ წელს გრიპით იყავი ავად.

- რუსული ვაქცინის შექმნაზე მხოლოდ რუსი მეცნიერები მუშაობდნენ თუ უცხოელი კოლეგებიც მონაწილეობდნენ?

- არა, ეს კონკრეტული ვაქცინა მხოლოდ გამალეის სახელობის ცენტრში იქმნებოდა, უცხოელ კოლეგებთან ერთად არ გვიმუშავია.

თავად ტექნოლოგია – ცოდნისა და სამეცნიერო გამოცდილების უზარმაზარი პლასტია. ბუნებრივია, მსოფლიოში ბევრი ადამიანი მუშაობს მასზე, არის უამრავი პუბლიცისტური ნაშრომი, ჩვენ მათ ვეცნობით, ისინი ჩვენსას ეცნობიან, ეს საერთო სამეცნიერო ველია.

მაგრამ უშუალოდ ვაქცინის შემუშავებაზე, მის შექმნაზე მხოლოდ რუსი მეცნიერები მუშაობდნენ.

223
მეუღლესა და შვილთან ერთად

ქართველი სპორტსმენის წარმატება საბერძნეთში და ქორწილი, როგორც „სიყვარულის მარათონი“

389
(განახლებულია 17:44 10.06.2021)
რუბრიკაში „ქართველები უცხოეთში“ დღეს ათენში მცხოვრებ ქართველ სპორტსმენს ლელა საღარეიშვილს გაგაცნობთ.

„საბერძნეთში ბევრია ისეთი ისტორიული სპორტული ობიექტი, სადაც როცა გამოდიხარ, ისეთი შეგრძნება გიჩნდება, თითქოს ანტიკური ღმერთები გლოცავენ“ – ამბობს ქართველი სპორტსმენი-მორბენალი ლელა საღარეიშვილი, რომელიც დღეს, როგორც ლელა საგა, საბერძნეთის სახელით ასპარეზობს და საკმაოდ წარმატებულადაც. თუმცა, საკუთარ ფესვებსაც არ ივიწყებს. რამდენიმე წლის წინ მისმა უჩვეულო ქორწილმა ბერძენ სპორტსმენთან ხრისტოს კეხარგიასთან ბერძნული პრესა აალაპარაკა.

ლელა საღარეიშვილი
photo: courtesy of Lela Eleni Saga
ლელა საღარეიშვილი

- ლელა, უკვე თორმეტი წელია, რაც საბერძნეთში ლელა საღას სახელით ასპარეზობთ, ამ ხნის მანძილზე როგორ შეიცვალა თქვენი სპორტული ცხოვრება?

- 2009 წლის აგვისტოში ათენში ჩამოვედი იმიტომ, რომ ჩემი დიდი მიზანი და ყველა ჩანაფიქრი რეალობად მექცია, და ასეც მოხდა. საქართველოში 100 და 200 მეტრის დისტანციაზე დავრბოდი. აქ ჩამოსვლის მერე გავზარდე მანძილი და ახლა 5, 10 და 21 კილომეტრს დავრბივარ. ბერძნებს აქვთ გამოთქმა, „როცა იზრდები, შენი სირბილის მანძილიც იზრდებაო“, და ჩემ შემთხვევაშიც ასე მოხდა.

ლელა საღარეიშვილი
ლელა საღარეიშვილი

- როდის დაიწყო თქვენი სპორტული მარათონი?

- სპორტით რომ დავკავდი, ხუთი წლის ვიყავი. სკოლაშიც ამ დროს შევედი და მის დამთავრებამდე სულ ვვარჯიშობდი. მახსოვს, მწვრთნელი ძალით მავარჯიშებდა ხოლმე. ვარჯიშის გამო გაკვეთილებიდან გამოვყავდი და ხანდახან ისე მეზარებოდა, რომ ვიმალებოდი კიდეც. ის კი მაინც მპოულობდა და დამატებით მავარჯიშებდა.

ლელა საღარეიშვილი შეჯიბრზე
ლელა საღარეიშვილი შეჯიბრზე

- სპორტული ნიჭი გენეტიკურად გამოგყვათ მამისგან და მამიდისგან, რომლებიც ასევე მძლეოსნები იყვნენ, მათ თუ სჯეროდათ თქვენი წარმატების?

- მართალია, სპორტული ნიჭი მამისა და მამიდისგან გამომყვა, ისინიც მძლეოსნები იყვნენ. მამას იგივე მწვრთნელი ჰყავდა, ვინც მე, აწ გარდაცვლილი ლერი ჩხენკელი. მე მან აღმომაჩინა და მერე მისმა ვაჟმა მამუკამ გააგრძელა მისი საქმე და ის მავარჯიშებდა. საქართველოში ყოფნისას, 11 წლის განმავლობაში მივდევდი სპორტს და შეჯიბრებებში ხშირად ვიმარჯვებდი.

ლელა საღარეიშვილი
ლელა საღარეიშვილი

- თქვენი მწვრთნელი როგორ გახსენდებათ?

- ლერი ჩხენკელზე ბევრი რამ მახსოვს... მახსენდება, სანამ ფინიშამდე მივიდოდით, ლერი საათით ხელში როგორ გველოდა და თავისებურად გვამხნევებდა: „მოდი, მოდი, მოდი!“ და ბოლოს – „დეგექცა ოჯახი!“ ამას ყველას გვეუბნებოდა, რაზეც ძალიან ვხალისობდით. მახსოვს, როგორ ცდილობდა, რომ წარმატებისთვის მიმეღწია და ამის გამო ძალიან ვემადლიერები. მართალია, საქართველოში ვერა, მაგრამ საბერძნეთში ხომ წარმატებით მივიწევ წინ...

ლელა საღარეიშვილი ვარჯიშის დროს
ლელა საღარეიშვილი ვარჯიშის დროს

- ერთი პერიოდი საქართველოში სპორტს თავი დაანებეთ, რატომ?

- სკოლის დამთავრების შემდეგ სწავლა ქუთაისში, აკაკი წერეთლის სახელობის უნივერსიტეტში ფილოლოგიურ ფაკულტეტზე გავაგრძელე. იმ პერიოდში სპორტისთვის დრო აღარ მრჩებოდა, ვარჯიშს ვერ ვასწრებდი და ეს ძალიან მაკლდა ხოლმე. სულ ვფიქრობდი და საკუთარ თავს პირობას ვაძლევდი, რომ მძლეოსნობა ჩემთვის მხოლოდ წარსული არ იქნებოდა.

ლელა საღარეიშვილი
ლელა საღარეიშვილი

- როგორც ჩანს, ეს დანაპირები საკუთარ თავს შეუსრულეთ ათენში, სადაც მწვერვალების დასაპყრობად ჩახვედით...

- საბერძნეთში დიდი ტრადიციების მქონე სპორტულ კლუბ „პანელინიოში“ მოვხვდი. ამ კლუბმა ბევრი სახელოვანი ბერძენი მძლეოსანი აღზარდა. ერთ დღესაც ბერძნებმა მათი სახელით გამოსვლა შემომთავაზეს და მომზადება დავიწყე. 2016 წელს ნემეის თამაშებზე პირველი ადგილი დავიკავე. საერთოდ, ჩემთვის ყველა გამარჯვება მნიშვნელოვანია, რადგან ვიცი, რომ პირველ რიგში ამ გამარჯვებისთვის ვშრომობ, ამიტომ რაც უნდა დაღლილი ვიყო, ვარჯიშს არასოდეს ვაცდენ.

ლელა საღარეიშვილი
ლელა საღარეიშვილი

- პირადი ბედნიერებაც ელადის მიწაზე გეწვიათ, როგორია თქვენი სიყვარულის ისტორია?

- მე და ხრისტომ, რომელიც ბერძენი სპორტსმენია, ერთმანეთი შეჯიბრებაზე გავიცანით. ის ყოველთვის პირველ ადგილზე გადიოდა ხოლმე და მისი დაჯილდოების შემდეგ იყო ჩემი დაჯილდოება. ჩვენ ოთხი წელი ვიცნობდით ერთმანეთს და ეს ნაცნობობა მხოლოდ „გამარჯობით“ შემოიფარგლებოდა. ერთ-ერთ შეჯიბრებაზე დამელაპარაკა, გამამხნევა, მითხრა – ბრავო, პირველ ადგილზე ხარ და არ დანებდე! აი, იმის შემდეგ გავაგრძელეთ საუბარი, შემდეგ კი ურთიერთობა, რაც ლამაზი ოჯახით დაგვირგვინდა.

ლელა საღარეიშვილი მეუღლესთან ერთად
ლელა საღარეიშვილი მეუღლესთან ერთად

- მინდა გაიხსენოთ თქვენი ქორწილი–მარათონი, რომელზეც სტუმრებს შორის თავისებური შეჯიბრება გაიმართა...

- როდესაც ჩვენს ქორწილს ვაანონსებდით, ჩვენზე ბერძნულმა მედიამ სტატიები დაწერა და რადიოში მიგვიწვიეს. მე და ხრისტომ საბერძნეთში გადავიხადეთ უჩვეულო ქორწილი – 1st wedding run, რომელზეც დაპატიჟებულმა სტუმრებმა მონაწილეობა მიიღეს სირბილში იმპროვიზებულ შეჯიბრებაში. შემდეგ ეკლესიაში ჩვენს ჯვრისწერას დაესწრნენ. ქორწილის შუალედში გვქონდა დაჯილდოება – თასები და მედლები გადავეცით მათ, ვინც ირბინა და გაიმარჯვა. ამის მერე ცეკვა და მხიარულება დილამდე გაგრძელდა. მოწვეული გვყავდა ქართველი მოცეკვავეები, რომელთა ცეკვის გამო ბერძნებმა აღფრთოვანება ვერ დამალეს. ასეთმა უჩვეულო ქორწილმა ყველა გააოცა და გაახალისა. მას დღემდე იხსენებენ ხოლმე...

ლელა საღარეიშვილი ოჯახთან ერთად
ლელა საღარეიშვილი ოჯახთან ერთად

- შეიძლება ითქვას, რომ ქორწილზე დაწყებული „სასიყვარულო მარათონი“ დღემდე გრძელდება, როგორ ცხოვრობს თქვენი ქართულ–ბერძნული ოჯახი?

- დღეს ჩვენ ცხოვრებაში სპორტის გარდა ოჯახის ინტერესებიც გაჩნდა: ვზრდით ორ პატარას – სამი წლის მელანას და წლინახევრის იოანეს. სანამ ფეხმძიმედ ვიყავი, ვცდილობდი, რომ ფორმაში ვყოფილიყავი. შვიდი თვის ფეხმძიმეც კი დავრბოდი ხოლმე. მშობიარობიდან 40 დღეში ისევ დავიწყე ვარჯიში. ხარების დღესასწაულზე 10 კმ დისტანციაზე ვირბინე და მესამე ადგილი დავიკავე. ყოველთვის მჯეროდა, რომ ნებისმიერ სიტუაციაში საჭირო იყო ფორმის აღდგენა, რათა პირველობა შეინარჩუნო. აქ შემომთავაზეს, რომ მწვრთნელი გავხდე და მანდილოსნები ვავარჯიშო. ალბათ სექტემბერიდან ჩავუდგები ამ საქმეს სათავეში. დღეს თითქმის ყოველ კვირას ვმონაწილეობ შეჯიბრებებში. მეუღლე ძალიან მეხმარება და იმედიანად ვარ განწყობილი. ღმერთის წყალობით, ყველაფერი კარგად იქნება...

ლელა საღარეიშვილი მეუღლესთან ერთად
ლელა საღარეიშვილი მეუღლესთან ერთად

- ბერძნულ საკვებს როგორ მიეჩვიეთ? ვიცი, რომ მაკარონი არ გიყვართ...

- ბერძნული კულინარია ძალიან კარგად ავითვისე და ბერძნულ კერძებს უკვე ვამზადებ. რაც შეეხება მაკარონს, ისევ არ მიყვარს, მაგრამ ჩვენთვის, სპორტსმენებისთვის აუცილებელია, რომ შეჯიბრების წინა დღეს მივირთვათ, მით უმეტეს თუ დიდი მანძილი გვაქვს სარბენი. ამიტომ სხვა გზა არ არის, შევეჩვიე...

- დღეს როგორ ფიქრობთ, საქართველოში დაბრუნდებით თუ საბერძნეთია ის ქვეყანა, სადაც სიცოცხლის ბოლომდე გინდათ, რომ იცხოვროთ?

- მიუხედავად ამდენი წელი აქ ცხოვრებისა, ჩემი პიროვნება არ შეცვლილა, ალბათ ისეთივე დავრჩი, როგორიც მშობლებმა გამზარდეს. საქართველო მიყვარს, რადგან იქ დავიბადე და გავიზარდე, ის ჩემი და ყველა ქართველის სამშობლოა, რომელიც ყოველთვის ჩემს გულში იქნება. დაბრუნებით, არა მგონია, რომ დავბრუნდე... დღეს საბერძნეთი ჩემი მეორე სამშობლოა, რადგან მან საკუთარი შვილივით მიმიღო და შემიყვარა, მან დამარწმუნა იმაში, რომ ცხოვრებაში მთავარია მიზნისკენ სვლა და დიდი მოთმინება მანამდე, სანამ ყველა ჩანაფიქრი არ ასრულდება...

 

389
თემები:
ქართველები უცხოეთში
ფონდის იალქანი ქველმოქმედება სოციალურად დაუცველ ოჯახს

სიკეთის ზურგის ქარი „იალქანს“, ანუ „სხვა რომ გაათბო“

112
(განახლებულია 19:58 08.06.2021)
რუბრიკაში „კეთილი ამბების ქრონიკა“ მკითხველს შევახსენებთ ბათუმელი თეონა აბაშიძის მიერ დაარსებული არასამთავრობო ორგანიზაციის, საქველმოქმედო ფონდი „იალქანის“ საქმიანობას.

„როცა ბედნიერი სხვის დარდზე ატირდები – ესაა ადამიანობა. ფუფუნებაში მყოფს რომ ბავშვთა თავშესაფრის მონახულება მოგინდება – ესაა ადამიანობა. ფერადი ბუშტებით თამაშისას მოხუცის სევდიანი თვალები რომ გაგახსენდება და მისი ჩახუტება მოგინდება, ან ზამთრის ცივ დღეს გარდერობს რომ გადმოალაგებ და უმწეოთათვის გადმოიღებ ტანსაცმელს, იქნებ ვინმეს სცივაო – ესაა ადამიანობა... ზოგჯერ სიცივის დათმენა უნდა შეგეძლოს, რომ სხვა გაათბო“ – ეს თეონა აბაშიძის სიტყვებია, რომელსაც რეალურად ასრულებს. ამის შესახებ ბათუმში ბევრმა იცის.

ფონდის იალქანი დამაარსებელი თიკო აბაშიძე
ფონდის "იალქანი" დამაარსებელი თიკო აბაშიძე

- ქალბატონო თეონა, მკითხველს გვინდა კიდევ ერთხელ შევახსენოთ საქველმოქმედო ფონდი „იალქანი“ და მისი კეთილი ამბები...

- ჩვენი ფონდი 2016 წლიდან არსებობს, იქიდან მოყოლებული საკმაოდ ბევრ ადამიანს დავეხმარეთ. პირველები გამოვედით ინიციატივით, რომ ბათუმში უმწეოდ და უმეთვალყურეოდ დარჩენილი ბავშვებისთვის თავშესაფარი გახსნილიყო და მათთვის დახმარება აღმოგვეჩინა. დღეს მუდმივად გვყავს 1500 ბენეფიციარი, რომელთა პრობლემების გადაჭრაში შეძლებისდაგვარად ვიღებთ მონაწილეობას.

ფონდის მორიგი აქცია
ფონდის მორიგი აქცია

- ჩვენ ხშირად ვაშუქებდით ამ ფონდის მუშაობას, რა სიახლეა თქვენ საქმიანობაში?

- თითქმის ყოველდღიურად ვგეგმავთ და ვანხორციელებთ სხვადასხვა აქტივობას, რომლებიც ძალიან მნიშვნელოვანია ბენეფიციარების განათლებისა თუ განვითარებისთვის. მათი ისტორიები საკმაოდ რთულია. თამამად შემიძლია ვთქვა, რომ ჩვენი ჩარევის მერე, „იალქანის"დახმარებით ამ ადამიანების ცხოვრება უკეთესობისკენ რადიკალურად იცვლება ხოლმე.

ბავშვები ფონდის აქტივობის დროს
ბავშვები ფონდის აქტივობის დროს

- მრავალშვილიან ოჯახებსაც მფარველობთ...

- დიახ, ჩვენი მზრუნველობის ქვეშ ბევრი მრავალშვილიანი ოჯახია, რომლებსაც ადვოკატირებას ვუწევთ და სერვისების ხელმისაწვდომობაში ვეხმარებით, პანდემიის პერიოდში მათ ბინაზე მისვლით საკვებს ვაწვდიდით.

ფონდის მორიგი აქცია
ფონდის მორიგი აქცია

- ბოლო პერიოდის აქტივობებზე მოგვიყევით...

- რაც შეეხება ბოლო პერიოდის მნიშვნელოვან აქტივობას, ფონდმა „იალქანი" საერთაშორისო სტანდარტების მქონე დღის ცენტრი გახსნა, რომელიც რეგიონში ერთადერთია. ცენტრი გათვლილია ქუჩაში მყოფ მიუსფარ ბავშვებზე. ვცდილობთ, რომ კანონთან კონფლიქტში მყოფ 35-მდე ბავშვსაც შესაბამისი დახმარება აღმოვუჩინოთ. ამის გარდა მოხუცთა თავშესაფრებთანაც გვაქვს კონტაქტი, იქ პერიოდულად დავდივართ და მიგვაქვს საჩუქრები, რაც ზრუნვას მოკლებულ ასაკოვან ადამიანებს ბავშვივით ახარებს ხოლმე.

ფონდის მორიგი აქცია
ფონდის მორიგი აქცია

- უკვე რამდენიმე წელია, რაც აჭარის რეგიონში თქვენ ძალადობის მსხვერპლი ქალებისა და ბავშვების პრობლემებზე მუშაობთ...

- დიახ, ჩვენ ყოველგვარი მხარდაჭერის გარეშე, საკუთარი ძალისხმევით გავხსენით უფასო სასწავლო ცენტრი, რომლის მსმენელებს სასკოლო საგნებში გაკვეთილებს მოხალისე მასწავლებლები უტარებენ. ასევე აქ ბავშვებთან და ძალადობის მსხვერპლ ქალებთან მოხალისე ფსიქოლოგი მუშაობს და მათ კვალიფიციური კონსულტაციით შესაბამის დახმარებას უწევს.

ერთ-ერთ აქციაში მონაწილე ბავშვები
ერთ-ერთ აქციაში მონაწილე ბავშვები

- სამომავლოდ ამ კატეგორიის ქალებთან დაკავშირებით რას აპირებთ?

- არც სამომავლოდ დავტოვებთ ასეთ ქალებს ყურადღების მიღმა, გვინდა, რომ მცირე საოჯახო ტიპის თავშესაფრების პროგრამებში მივიღოთ მონაწილეობა და ძალადობის მსხვერპლი ქალებისთვის თავშესაფარი გავხსნათ.

- ვინ უწევს ფონდს ფინანსურ დახმარებას?

- ჩვენი ფონდი ძირითადად შემოწირულობებით არსებობს. კონკრეტული პირების დასახელებისგან თავს შევიკავებ. ზოგადად კი ვიტყვი, რომ ჩვენი „იალქანისთვის“, ასე ვთქვათ, ზურგის ქარი სიმბოლურად ყოველთვის ის პატარ-პატარა სიკეთეა, რასაც მისთვის თითოეული ადამიანი გაიღებს...

 

112
ფურისულა

დღის ასტროპროგნოზი ზოდიაქოს ნიშნებისთვის: 14 ივნისი

0
(განახლებულია 10:45 13.06.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 14 ივნისია, ორშაბათი. მზარდი მთვარე ლომის ნიშანშია. ამ დღეს პლანეტა მთვარე მფარველობს.

არ იჩქაროთ. დღეს შეიძლება ბევრი რამ ჩვეულებრივზე რთული გასაკეთებელი იყოს. უკან არ დაიხიოთ, თუ გზაზე დაბრკოლებები შეიქმნა. ასევე რთული იქნება ერთობლივ სამუშაოზე შეთანხმება, ადვილი არ იქნება კომპრომისის მოძებნა. სერიოზული უთანხმოებების თავიდან არიდება შესაძლებელი იქნება, თუ მეგობრულად და ტაქტიანად მოიქცევით.

მამაკაცის „საოცნებო ქალი“ ზოდიაქოს ნიშნის მიხედვით>>

ვერძი: ხართ ენერგიული, წარმატების მისაღწევად უკან არაფერზე იხევთ. გზაზე არ გაჩნდება დაბრკოლება, რომლის გადალახვასაც ვერ შეძლებთ. გაგახარებთ მეგობრებთან ურთიერთობები. შესაძლოა, მათ რამე ახალი ინფორმაცია მოგაწოდონ ან საინტერესო იდეა შემოგთავაზონ. არაა გამორიცხული რომანტიკული სიურპრიზები. ურთიერთობები საყვარელ ადამიანთან ჰარმონიული იქნება, შესანიშნავად უგებთ ერთმანეთს.

კურო: მშფოთვარე დღეა. არ არის გამორიცხული, რომ გეგმების შეცვლა მოგიწიოთ გზადაგზა და ეს მაინცდამაინც არ მოგეწონებათ. შესაძლოა გადაიდოს შეხვედრები, რომლებსაც მოუთმენლად ელოდებოდით, საკითხების გადაჭრა, რომლებიც მნიშვნელოვანია თქვენთვის. სამაგიეროდ გაიხსნება ახალი შესაძლებლობები. უნდა ეცადოთ, რომ მოცემული შანსი ხელიდან არ გაუშვათ. გამოიჩინეთ ინიციატივა როგორ საქმეებში, ისე პირად ურთიერთობებში.

ტყუპი: იღბლიანი იქნება დღის პირველი ნახევარი. დარწმუნებული ხართ თქვენს წარმატებებში და ინტუიცია არ გღალატობთ – მართლაც შესანიშნავი შედეგების მიღწევა შეგიძლიათ. კარგი დროა გეგმების განხილვისთვის. დღის მეორე ნახევარში შესაძლებელი იქნება ადრე დაწყებული საქმეების დამთავრება, პასუხების პოვნა კითხვებზე, რომლებიც ბოლო რამდენიმე კვირის განმავლობაში მოსვენებას არ გაძლევთ.

კირჩხიბი: დღის დასაწყისი ძალზე ხელსაყრელია. გაქვთ შანსი, რომ წარმატებას მიაღწიოთ მნიშვნელოვან საქმეში, რომლისთვისაც ძალღონე არ დაიშურეთ. პოზიტიური ტენდენციების გავლენა საქმიან სფეროში თანდათანობით მიილევა, მაგრამ ის კვლავ ძლიერი დარჩება პირად ურთიერთობებში. საღამო სასიამოვნო სიურპრიზებს გპირდებათ შეყვარებულ კირჩხიბებს. შეგიძლიათ საყვარელ ადამიანთან ერთად საერთო გეგმები განიხილოთ და იოცნებოთ.

ლომი: მიუხედავად იმისა, რომ არაერთი საქმე და საზრუნავი გექნებათ, დღეს ვერც უიღბლოსა და ვერც დაძაბულს ვერ ვუწოდებთ. ბევრ რამეს შესანიშნავად უმკლავდებით, მათ შორის, რთულ ამოცანებსაც. მოსალოდნელია შეხვედრა ძველ ნაცნობებთან, შესაძლებელია მათთან საერთო გეგმებიც გაჩნდეს.. კარგი დღეა სწავლისა და შემოქმედებითი საქმიანობისთვის. საჭიროა ყურადღება მცირე დეტალების მიმართ, რაც ზოგიერთ თქვენგანს გაუჭირდება.

ქალწული: დღის დასაწყისი საკმაოდ დაძაბული ემოციური ფონით იქნება გამორჩეული. შესაძლოა, მცირე წვრილმანებზეც კი ინერვიულოთ; მოსალოდნელია უთანხმოებები ახლობლებთან. ეს გაგანერვიულებთ. დროთა განმავლობაში გაძლიერდება პოზიტიური ტენდენციების გავლენა და დაგიბრუნდებათ ოპტიმიზმი, უკეთ გააკონტროლებთ თავს. დღის მეორე ნახევარში მოსალოდნელია საინტერესო ნაცნობობა. ახლობლებთან და საქმიან პარტნიორებთან შედეგიანი საუბრები.

სასწორი: ეცადეთ, დღის პირველ ნახევარში არ გადაიღალოთ. ეს ცუდად იმოქმედებს როგორც ფიზიკურ მდგომარეობაზე, ისე განწყობაზე. მოერიდეთ სტრესულ სიტუაციებს, არ იჩქაროთ გადაწყვეტილებების მიღება. ყველაფრის მშვიდად მოსაფიქრებლად დრო გჭირდებათ. დღის მეორე ნახევარი მსუბუქი და ხელსაყრელი იქნება. მოგეცემათ რაღაც მნიშვნელოვან საქმეებთან გამკლავების საშუალება. ბევრი მიაღწევს წარმატებას იქ, სადაც ფანტაზიაა საჭირო.

მორიელი: დღის დასაწყისი შესაფერისი დროა საქმიანი შეხვედრებისთვის. არ არის გამორიცხული, რომ მიიღოთ წინადადება, რომელიც ძალიან დაგაინტერესებთ. ასევე შეიძლება გაჩნდეს ძველი საქმიანი კავშირების აღდგენის შანსი. დღის მეორე ნახევარში მოგეცემათ საშუალება, რომ გამოასწოროთ რომელიმე ძველ საქმეში დაშვებული შეცდომები. დიდი ალბათობაა, რომ თანხა მიიღოთ – შესაძლოა, დიდი არა, მაგრამ ეს მაინც დაგეხმარებათ მნიშვნელოვანი ნივთების შეძენაში.

მშვილდოსანი: შეიძლება ითქვას, რომ აღმაფრენის დღეა, რომელიც მოგიტანთ კარგ და მნიშვნელოვან სიახლეებს. გექნებათ ძველი კავშირების აღდგენის საშუალება. ასევე მოსალოდნელია, რომ მიიღოთ უჩვეულო, საინტერესო წინადადება. დღის მეორე ნახევარი კარგი დროა ფინანსური საკითხების გადაწყვეტისთვის, მომგებიანი გარიგებების დადებისთვის, თანამშრომლობაზე შეთანხმებისთვის. არ არის გამორიცხული დაუგეგმავი ხარჯებიც, მაგრამ ეს ფუჭად დახარჯული ფული არ იქნება.

თხის რქა: ხელსაყრელი დღეა. შეგიძლიათ ახალი საქმის დაწყება, მაღალია წარმატებების სწრაფად მიღწევის შანსი. არაა გამორიცხული სასარგებლო ნაცნობობა. ხართ ძალზე მომხიბვლელი, ამიტომ თქვენდამი გულგრილი ვერავინ დარჩება. შესაძლოა, ვიღაც თქვენდამი სასიყვარულო გრძნობითაც განიმსჭვალოს. დღის მეორე ნახევარში კარგად წარიმართება სახლის საქმეები. შეგიძლიათ იყიდოთ ავეჯი, ყოფითი ტექნიკა და სხვა ნივთები სახლისთვის.

მერწყული: ეცადეთ, შეინარჩუნოთ ჯანსაღი აზრი და სწორად შეაფასოთ თქვენი ძალები. რეალური შეხედულებები იმედგაცრუებისგან გიხსნით. აჯობებს, თუ ყურადღებას გაამახვილებთ პრაქტიკულ ამოცანებზე, ისეთზე, რომლებიც უახლოეს მომავალში კონკრეტული შედეგების მიღების საშუალებას იძლევა. დღის მეორე ნახევარში შესაძლებელია შეხვედრები ძველ ნაცნობებთან. ეს ძალიან გაგახარებთ. მოგეცემათ ადრე დაშვებული შეცდომის გამოსწორების შანსი.

თევზები: დღე კარგად აეწყობა, მაგრამ თქვენ დაჟინებით ცდილობთ მოძებნოთ საბაბი იმისთვის, რომ აღელდეთ და განაწყენდეთ. ეცადეთ, უფრო პოზიტიურად განეწყოთ. ამ შემთხვევაში ბევრ საინტერესო შესაძლებლობას აღმოაჩენთ, მიხვდებით, როგორ მიაღწიოთ წარმატებას. არ გარისკოთ იქ, სადაც ამის საჭიროება არ არის. ფრთხილად მოქმედებით ბევრი რამის გაკეთება შეგიძლიათ. დაფიქრებით ნათქვამი სიტყვა და მოქმედება როგორც საქმიან სფეროში, ისე პირად ურთიერთობებში მიზნების მიღწევაში დაგეხმარებათ.

0