რაში სჭირდება საქართველოს ხელოვნური ინტელექტი

200
(განახლებულია 20:26 03.06.2020)
თბილისში ხელოვნური ინტელექტის აკადემია გაიხსნა. სასწავლებელი დაფუძნებულია შვედური სტარტაპის „ნეირონის" მიერ, რომელიც 2017 წელს შეიქმნა და ისეთი ხელოვნური ინტელექტის გიგანტი კომპანიის პარტნიორია, როგორიც არის „პელტარიონი".

იმის შესახებ, რატომ გადაწყვიტეს ხელოვნური ინტელექტის აკადემიის საქართველოში გახსნა და რას მისცემს ის ადგილობრივ შრომის ბაზარს, „Sputnik-საქართველოსთან“ კომპანია „ნეირონისა“ და აკადემიის დამფუძნებელი პეტერ სვაეტიჩინი საუბრობს.

პეტერ სვაეტიჩინი, კომპანია ნეირონისა და აკადემიის დამფუძნებელი
photo: courtesy of Peter Svaetichin
პეტერ სვაეტიჩინი, კომპანია ნეირონისა და აკადემიის დამფუძნებელი

- გვიამბეთ თქვენი აკადემიის შესახებ, ვისთვის არის ის, რა არის მისი მიზანი?

- ჩვენი აკადემიის მთავარი მიზანია ხელოვნური ინტელექტის პოპულარიზაცია საქართველოში. ჩვენ გვჯერა, რომ ხელოვნური ინტელექტი შეცვლის სამყაროს და თანამედროვე ინდუსტრიებს, რასაც ის უკვე აკეთებს ბევრ სხვა ქვეყანაში. ამის გათვალისწინებით ჩვენ გადავწყვიტეთ ჩვენი აკადემია გაგვეხსნა ყველა მსურველისთვის. ჩვენი კურსები დაფარავს უამრავ ხელოვნური ინტელექტის, მანქანური სწავლებისა და პროგრამული უზრუნველყოფის შემუშავების საკითხს. გვინდა, რომ ჩვენმა სტუდენტებმა კურსების წარმატებულად დამთავრების შემდეგ ადვილად იპოვონ სამსახური. მაგრამ, ამავე დროს, რადგან აკადემიის კარი ღია იქნება ყველასთვის, ჩვენ შევთავაზებთ არატექნიკურ კურსებს მათ, ვისაც სურს ინფორმაციის მიღება ამ ტექნოლოგიაზე, მის გამოყენებაზე სხვადასხვა ორგანიზაციებსა და ინდუსტრიებში, ტერმინოლოგიაზე, მონაცემთა სწორ დამუშავებაზე და ა.შ. ჩვენ ასევე ვგეგმავთ შევიმუშაოთ კურსები მაღალი კლასების მოსწავლეებისთვის სკოლებში, ვისაც ჩვენ პროგრამირების საფუძვლებს და ალგორითმებს ვასწავლით. 

ჩვენი მიზანია ტექნოლოგიური პროგრესის განვითარება საქართველოში და ხელოვნური ინტელექტი სწორი არჩევანია დასაწყისისთვის! 

ჩვენი ლექტორები შვედი და ქართველი თანამშრომლები არიან, რომელთაც ამ სფეროში რამდენიმეწლიანი გამოცდილება აქვთ. მათ უკვე დაამთავრეს რამდენიმე რეალური ხელოვნური ინტელექტის პროექტი და იციან როგორ უნდა მიუდგნენ საქმეს ასეთ პროექტებზე მუშაობისას, სად უნდა და სად არ უნდა გამოიყენონ ხელოვნური ინტელექტი. 

კურსების გარდა, ჩვენ ასევე ჩავატარებთ სემინარებს, რადგან ვფიქრობთ, რომ ხელოვნური ინტელექტის შესწავლა უნდა მოხდეს პრაქტიკულ ამოცანებზე მუშაობისას. ამისათვის ჩვენ სტუდენტებს შევთავაზებთ იმ პროექტებზე მუშაობას, რომლებიც ჩვენი კომპანიის, Neiron-ის მიერ იყო შემუშავებული.

რაც შეეხება მოთხოვნებს, რა თქმა უნდა, ისინი კურსების მიხედვით სხვადასხვა იქნება. ზოგიერთი კურსის წინაპირობა შეიძლება იყოს კალკულუსისა (მათემატიკური ანალიზი - რედ.) და პროგრამირების სიღრმისეული ცოდნა, ზოგიერთს კი შეიძლება საერთოდ არ ჰქონდეს წინაპირობები.

- რატომ თბილისი და საქართველო, კიდევ რომელ ქვეყნებში არის მსგავსი ტიპის აკადემიები და იქ რა პრაქტიკაა?

- შვედური კომპანია „ბიტრუტი“ საკმაოდ წარმატებული აღმოჩნდა მსგავსი კონცეფციით უკრაინაში. გარკვეულწილად ისინი ჩვენი კომპანიისთვის მაგალითიც იყო. მათ 2014 წელს დაიწყეს და დღეისათვის უკრაინაში 18 IT აკადემია აქვთ, 25000-ზე მეტი კურსდამთავრებულით. Ჩვენ მიგვაჩნია, რომ საქართველო ეფექტიანად მიიღებს ამ კონცეფციას, რადგან მას საკმაოდ კარგი ფიზიკისა და მათემატიკის სწავლების ტრადიციები აქვს. 

შვედეთს კომპიუტერული კომპანიების მიერ საკუთარი აკადემიების გახსნის დიდი ტრადიცია აქვს. შვედეთი და, განსაკუთრებით, სტოკჰოლმი დღემდე არის ტექნოლოგიური სტარტაპების გახსნის ერთ-ერთი ცენტრალური ადგილი მსოფლიოში სილიკონის ველის მსგავსად. ისეთი ცნობილი სტარტაპები, როგორიცაა Skype, Spotify, King (Candy Crush), Mojang (Minecraft), Klarna და iZettle სწორედ სტოკჰოლმში დაფუძნდა. ამ კომპანიებმა შექმნეს სწორედ დიდი მოთხოვნა კვალიფიციურ კომპიუტერულ მეცნიერებათა პროფესიონალებზე და ანაზღაურების რაოდენობაც ცამდე აიყვანეს. ამან წაახალისა მცირე ტექნოლოგიური კომპანიები, რათა გაეხსნათ სასწავლო აკადემიები, რომელთა კურსდამთავრებულები შემდეგ თავად მუშაობდნენ შექმნაზე და ასაქმებდნენ საკუთარ თავს. 

ამიტომაც გვსურს ასეთი მოდელი თბილისშიც დავნერგოთ. საქართველოს აქვს უნიკალური შესაძლებლობა, ფართო რეგიონული ტექნოლოგიური ჰაბის ფუნქცია შეასრულოს. ამასთან თბილისი უნიკალური ქალაქია თავისი ისტორიითა და ტრადიციებით, ტექნოლოგიური ჰაბის ფუნქცია კი უაღრესად მიმზიდველი და თანამედროვე სინერგია იქნება. ამავე დროს საქართველოში დიდი ინტერესია ამ სფეროს მიმართ, ქართველები ძალიან პროგრესული და ადვილად ადაპტირებადი ხალხია და შეუძლიათ სწრაფად აუწყონ ფეხი მიმდინარე ტენდენციებს.

- რამდენად იქნება ქართულ შრომის ბაზარზე ამ აკადემიაში მიღებულ ცოდნაზე მოთხოვნა და ეკონომიკის რომელ სექტორებში?

- ხელოვნური ინტელექტის ინჟინრების პროფესიაზე დღეს მსოფლიოში ყველაზე მაღალი მოთხოვნაა. მოთხოვნა Ხელოვნური ინტელექტის ექსპერტებზე ბოლო წლებში ძალიან გაიზარდა. ამავე დროს შესაბამისი განათლების მიწოდება ბაზარზე არ არის საბაზრო მოთხოვნის ადეკვატური. დიდი გამოწვევაა კვალიფიციური ხელოვნური ინტელექტის ინჟინრის მოძებნა არა მხოლოდ საქართველოში, არამედ მთელ მსოფლიოში. აკადემიის გახსნის ერთ-ერთი მთავარი ამოცანა იმ კვალიფიცური ინჟინრების მომზადებაა, რომლებიც შემდეგ დასაქმდებიან ჩვენს კომპანიაში, ან იმუშავებენ მსოფლიოს მასშტაბით. „ნეირონის“ აკადემიის დიპლომის მიღება გზას გაუხსნის მის კურსდამთავრებულებს დასაქმების მთელი სპექტრისკენ როგორც საქართველოში, ისე რეგიონსა და მის ფარგლებს გარეთ.  

- რამდენად აქვს სამომავლო პერსპექტივა ამ მიმართულებას განვითარებადი ეკონომიკის მქონე ქვეყანაში და რამდენად დააინტერესებს ეს ქართულ ბიზნესს?

- ხელოვნური ინტელექტის გამოყენება უმნიშვნელოვანესია, განსაკუთრებით, განვითარებადი ეკონომიკის ქვეყნებისთვის. ხელოვნური ინტელექტის დანერგვა გზას გაუხსნის კომპანიებს – თანაბარი კონკურენცია გაუწიონ თავიანთი ბიზნეს-პრაქტიკით დანარჩენ მსოფლიოს და შეიქმნან საშუალება მეტი განვითარებისთვის. ხელოვნური ინტელექტის დანერგვა ბიზნესში საშუალებას იძლევა დაიზოგოს კომპანიის ხარჯები წარმოების, ადმინისტრირების, ზედამხედველობისა და ხარისხის ავტომატიზაციის გზით. „ნეირონი“ ქართულ კომპანიებს სწორედ სთავაზობს, რომ განახორციელონ მათი საქმიანობის შეფასება, თუ რა მხრივ და როგორ გამოიყენონ ხელოვნური ინტელექტი. „ნეირონის“ ერთ-ერთი მთავარი აქცენტი სოფლის მეურნეობაზე მოდის, სადაც ხელოვნური ინტელექტი ეხმარება მწარმოებლებს უკეთესი, მაღალი ხარისხის პროდუქციის შექმნაში, მიწოდების ხაზის ავტომატიზაციაში, თანხების დაზოგვასა და მეტი მოგების მიღებაში. ჩვენი კომპანია თანამშრომლობს კარტოფილის მასშტაბურ მწარმოებელ Frixx-თან სწორედ აღნიშნული პროექტის ფარგლებში. ეს არის სფერო, რომელშიც ხელოვნურ ინტელექტს შეუძლია საქართველოს ძალიან დაეხმაროს. მაგალითად, ნებისმიერ ბიზნესს, რომელიც კონვეიერულ ხაზს იყენებს წარმოებაში, შეუძლია სარგებელი მიიღოს იმ ტექნოლოგიით, რომელიც ჩვენ შევქმენით. ამავე დროს ჩვენი მიმართულებაა ფარმაცევტიკა და სამედიცინო სფერო, ასევე სადაზღვევო და ღვინის ინდუსტრია, რომელშიც ხელოვნურ ინტელექტს ხარისხის გაზრდითა და ფერმერული მეურნეობების ავტომატიზაციით დიდი სარგებლის მოტანა შეუძლია. 

 

ნატა პატარაია

 

200
გამოფენაზე

„გელბახას“ მისტიკური სამყარო, ანუ „ადამიანი, ვისაც შეიძლება ენდო”

928
(განახლებულია 19:16 04.08.2020)
ხატვა ბავშვობიდან იყო მისი სტიქია. თავიდან ტუშით ხატავდა და, შესაბამისად, მისი ნახატები შავ-თეთრი იყო, ფერები მოგვიანებით გაჩნდა.

დათო გელბახიანმა სკოლის მერე არქიტექტურის ფაკულტეტზე ჩააბარა და 15 წელი აღარ დაუხატავს. ხატვას ბოლო ათი წელია დაუბრუნდა. მისი ნახატების პირველი გამოფენა საკმაოდ წარმატებით 2018 წელს „აბრეშუმის გალერეაში“ გაიმართა, მასზე საკმაოდ ბევრი ადამიანი მოვიდა. ერთი წლის მერე კი ეროვნულ ბიბლიოთეკაში მისმა ნახატებმა მეორედ შეკრიბა ხელოვნების მოყვარულები. მის ნამუშევრებზე პანდემიის დროსაც დიდი მოთხოვნილება იყო და არა მარტო საქართველოში...

დათო გელბახიანი
დათო გელბახიანი

- ბატონო დათო, თქვენს ნამუშევრებში გადაჯაჭვულია მისტიკა და რეალობა, რამდენად გჯერათ სასწაულის?

- სასწაულების მჯერა, როგორ არ უნდა მჯეროდეს... მარტივ მაგალითს გეტყვით, განა ცხრა თვის ლოდინის მერე ადამიანის დაბადება სასწაული არ არის? არა მგონია, უცნაური ადამიანი ვიყო, ჩვეულებრივი ვარ. თუმცა მისტიკა მიტაცებს და ვცდილობ, რომ ყველაფერ უცნაურს ლოგიკური ახსნა მოვუძებნო ხოლმე. თავიდან შავ-თეთრი ნახატები მქონდა და ტუშით ვხატავდი. შემდეგ ფერები და საღებავები შემოვიდა ჩემს ცხოვრებაში.

დათო გელბახიანი
დათო გელბახიანი

- ხატვის დროს შთაგონებას მიჰყვებით თუ რაციოს კარნახით ხატავთ?

- ჩემს ნახატებში ალბათ შთაგონებას უფრო მივყვები, სიუჟეტს არასდროს ვგეგმავ წინასწარ. როცა ხატვას ვიწყებ, არც კი ვიცი ბოლოს რა გამოვა, დაახლოებით წარმომიდგენია, მაგრამ ზუსტად არ ვიცი. და, რაც მთავარია, წინასწარ ვერასდროს დავგეგმავ. მოდი, ხვალ ავდგები და დავხატავ – ასე არაა ჩემთან...

დათო გელბახიანის შემოქმედება
დათო გელბახიანის შემოქმედება

- ბოლო ათი წელია, რაც ხატვას დაუბრუნდით...

- დიახ, სკოლის მერე 15 წელი არ გავკარებივარ ფანქარს და საღებავებს. ბოლო ათი წელია რაც დავუბრუნდი. მიზეზი მარტივია: უბრალოდ მომინდა ხატვა...

- ნანობთ იმ წლებს?

- არა, ზოგადად არასოდეს არაფერს ვნანობ, რადგან, ჩემი აზრით, ყველაფერი, რაც ხდება, კანონზომიერია.

დათო გელბახიანი
დათო გელბახიანი

- ამხელა პაუზა იმიტომ ხომ არ დაგჭირდათ, რომ ახალი შეგრძნებებით და ემოციით შევსებულიყავით?

- მართლაც ასე იყო. ის წლები, როცა არაფერი მიხატავს, ფანტაზია და თემები დამიგროვდა და ეს ალბათ კარგად აისახა ჩემს ნახატებზე. უფრო ზუსტად კი ეს იყო მონატრება და სურვილი – რაღაც ახალი და განსხვავებული შემექმნა.

დათო გელბახიანის შემოქმედება
დათო გელბახიანის შემოქმედება

- თქვენმა პირველმა პერსონალურმა გამოფენამ ხმაურით ჩაიარა...

- ჩემი პირველი პერსონალური გამოფენა 2018 წელს „აბრეშუმის გალერეაში“ გაიმართა, მასზე საკმაოდ ბევრი ადამიანი მესტუმრა, ტელევიზიებმაც გააშუქეს. პირველი გამოფენის შემდეგ მომეცა სტიმული, რადგან დავინახე ადამიანები, რომლებსაც სახეზე ეტყობოდათ, რომ სიამოვნებდათ ჩემი ნახატების ყურება და მოვალეობის მოხდის მიზნით არ იყვნენ მოსული. მივხვდი, რომ არ უნდა გავჩერდე და უნდა გავაკეთო ის, რაც ყველაზე კარგად გამომდის და ყველას მოსწონს. ამას მოჰყვა 2019 წლის პერსონალური გამოფენა ეროვნულ ბიბლიოთეკაში, რომელმაც ასევე ფურორით ჩაიარა და კარგად მახსენდება. ამის შემდეგ უკვე „კორონა ჩაერია” და დაგეგმილი გამოფენა ჩაიშალა.

დათო გელბახიანის შემოქმედება
დათო გელბახიანის შემოქმედება

- ნახატების გაყიდვის პრობლემა არ გაქვთ?

- მიხარია, რომ ჩემი ნახატები დიდი რაოდენობით იყიდება – არა მარტო საქართველოში, ამერიკაში, რუსეთში, გერმანიაში, უკრაინასა და ჰოლანდიაში. ამაში პანდემიასაც არ შეუშლია ხელი.

დათო გელბახიანის შემოქმედება
დათო გელბახიანის შემოქმედება

- თუ გაქვთ ნახატი, რომელმაც „დაგამახსოვრათ“ თავი?

- ასეთი გამორჩეული ნახატი არ მაქვს, ყველა ერთნაირად მიყვარს. უბრალოდ იყო ასეთი შემთხვევა: ერთხელ შავი საფერავი ღვინის წვეთი დაეცა ფურცელზე და ასე შეიქმნა პირველი ნახატი „საფერავითა“ და ტუშით. ამ ნახატს „ბაბუა“ ჰქვია. ესაა მონატრებული ბაბუა, რომელიც შვილების და შვილიშვილების მოლოდინში ხის ძირას ღობესთან ზის ჩაფიქრებული. ერთი ნახატის წინაპირობა კი ჩემი მონატრება გახდა. ერთ დღეს ვიგრძენი, რომ ჩემი გოგო, მარიამი, რომელიც უცხოეთში სწავლობს, ძალიან მომენატრა და დავხატე...

დათო გელბახიანის შემოქმედება
დათო გელბახიანის შემოქმედება

- თქვენი შემოქმედების შეფასების დროს ყველაზე მეტად რა გსიამოვნებთ?

- ყველაზე მეტად რაც მსიამოვნებს, ისაა, რომ ყველა იძახის “გელბახას” ნამუშევრების ამოცნობა ათასი ნახატიდან შეიძლებაო, ანუ შენი ხელწერა გაქვსო. მახარებს ის, რომ არავის ვბაძავ და განსხვავებული ვარ.  

დათო გელბახიანის შემოქმედება
დათო გელბახიანის შემოქმედება

- თქვენი აზრით, ვინ არის „გელბახა“, როგორი ადამიანია?

- “გელბახა” – ეს მეტსახელი ბავშვობიდან შემრჩა და მივეჩვიე. გელბახა ვინ არის? ამაზე მე რა ნამუსით უნდა ვილაპარაკო? - არ ვიცი და ვერც გეტყვით. მხოლოდ ერთს ვიტყვი: გელბახა არის ადამიანი, ვისაც შეიძლება, რომ ენდო...

დათო გელბახიანის შემოქმედება
დათო გელბახიანის შემოქმედება

- რაზე ოცნებობთ და რას ელოდებით ცხოვრებისგან?

- ვოცნებობ იმაზე, რომ ქალაქგარეთ სიწყნარესა და სიმწვანეში ოჯახთან ერთად ვიცხოვრო. პირველ რიგში გარშემო ჩემი ახლობლები და მეგობრები კარგად უნდა იყვნენ, რომ ხალისი და განწყობა მქონდეს იმისთვის, რომ რაღაც კარგი შევქმნა. არაა აუცილებელი ფეშენებელური ვილა იყოს, უბრალო პატარა სახლიც დამაკმაყოფილებს. მთავარია, მქონდეს საკუთარი სივრცე, სადაც ვიმუშავებ და რაღაც კარგს შევქმნი, ესაა და ეს...

 

928
კოღო

ტკიპის, კოღოს, მოსკიტის ნაკბენი: ის, რაც უნდა ვიცოდეთ მწერების მიერ გადამტან დაავადებებზე

525
(განახლებულია 19:19 14.07.2020)
ზაფხული ის დროა, როცა განსაკუთრებით დიდ დროს ვატარებთ ბუნებაში, სუფთა ჰაერზე. ამ დროს ხშირია მწერების ნაკბენით გამოწვეული უსიამოვნებები, რაც, შესაძლოა, პარაზიტული დაავადებების გამომწვევი მიზეზიც გახდეს.

რომელი პარაზიტული დაავადებებია გავრცელებული ზაფხულის სეზონზე, რა სიმპტომები აქვს და როგორ ამოვიცნოთ ისინი, ამის შესახებ საზოგადოებრივი მაუწყებლის „პირველი არხის“ ეთერში პარაზიტოლოგმა, მედიცინის დოქტორმა ირმა კოკაიამ ისაუბრა.

- ზაფხულის სეზონთან ყველაზე ხშირად რომელი პარაზიტული დაავადებები ასოცირდება?

- ზაფხულის სეზონთან ასოცირებული პირველი ჯგუფის, ყველაზე ხშირი დაავადებებია მწერების დაკბენით გამოწვეული დაავადებები. ასევე ზაფხულის პერიოდში სტატისტიკურად ყველაზე ხშირად გვხვდება ნაწლავური პარაზიტული დაავადება. მწერების კბენასთან ასოცირებული პარაზიტული დაავადებების მატება დამოკიდებულია ორ ფაქტორზე. პირველი ის არის, რომ ზაფხულის ცხელ პერიოდთან ერთად მწერების აქტივობა არის მომატებული და ეს გამომდინარეობს მათი ბიოლოგიიდან. მეორე ფაქტორი, რის გამოც იმატებს ეს დაავადებები და ამ დაავადებებთან დაკავშირებული საფრთხე, არის ის, რომ უშუალოდ ადამიანების ურთიერთობა ბუნებასთან არის გაცილებით აქტიური. ეს არის სეზონი, როცა ადამიანები ყველაზე ხშირად გადიან ქალაქგარეთ პიკნიკებზე, აგარაკებზე, სოფლებში და ა.შ. შესაბამისად, ეს საფრთხე არის მომატებული.

- იქნებ ეს დაავადებები განვიხილოთ...

- მწერების კბენით გამოწვეული დაავადებებიც ორ ნაწილად შეიძლება გაიყოს. ეს არის უშუალოდ დაკბენასთან ასოცირებული ალერგიული რეაქციები და მეორე – უფრო დიდი საფრთხე, ის დაავადებები, რომელიც გადააქვთ მწერებს. ბოლო პერიოდში ინტენსიურად არის მომატებული ბორელიოზი, იგივე ლაიმის დაავადება, რომელიც ტკიპებს გადააქვთ. ეს დაავადება ძალიან აქტუალურია საქართველოში, განსაკუთრებით, ბოლო წლების განმავლობაში. თუმცა ამ მხრივ დიაგნოსტიკაც უფრო გაუმჯობესებულია. მეორე დაავადება, რომელიც ინტენსიური ხდება ამ პერიოდში, არის ლეიშმანიოზი, რომელიც ასევე მწერებს გადააქვთ. ეს არის პატარა ზომის მოსკიტები, ფლებუტომუსები. გარდა ამისა, კიდევ არის რამდენიმე დაავადება, მაგალითად, კოღოებთან ასოცირებული მალარია, რომელიც ასევე ზაფხულის დაავადებაა. თუმცა, საბედნიეროდ, მალარიის ენდემური შემთხვევები ბოლო რამდენიმე წელია საქართველოში არ გვაქვს დაფიქსირებული. შემთხვევები, რაც გვაქვს, ძირითადად არის სხვა ქვეყნებიდან იმპორტირებული. კიდევ ერთი დაავადება გახლავთ ყირიმ-კონგოს ჰემორაგიული ცხელება, რომელიც ცალსახად ტკიპას უკავშირდება.

- რა ჩივილებს უნდა მიაქციოს ადამიანმა ყურადღება, რა სიმპტომები აქვს ამ დაავადებებს?

- ვინაიდან ყველაზე გავრცელებულია, დავიწყოთ ლაიმის დაავადებით. თავიდანვე მინდა აღვნიშნო, რომ ტკიპის კბენა არ არის საკმარისი დაავადების გამოწვევისთვის. თვითონ ტკიპა უნდა იყოს ინფიცირებული, რომ გამოიწვიოს დაავადება. აქედან გამომდინარე, ყველა ტკიპის კბენის შემდეგ, რა თქმა უნდა, დაავადება არ ვითარდება. 100 კბენიდან მხოლოდ ერთ შემთხვევაში შეიძლება განვითარდეს დაავადება. კბენის დროს ამის მიხვედრა წარმოუდგენელია. ამას სჭირდება სპეციალური ანალიზი, რომელიც საკმაოდ რთულად კეთდება და არ არის მოწოდებული, რომ ყველა შემთხვევაში გაკეთდეს. იმ შემთხვევაში, თუ ეს ტკიპა აღმოჩნდა ინფიცირებული და დაავადების გადამტანი, კლინიკური სიმპტომები, რომელიც დამახასასიათებელია ლაიმის დაავადებისთვის, არის საკმაოდ მრავალფეროვანი და გამოვლინდება გარკვეული დროის განმავლობაში. ინკუბაციური პერიოდი, როგორც წესი, არის სამი დღიდან 28 დღემდე. ანუ ეს არის ის პერიოდი, როცა შეიძლება გამოვლინდეს კლინიკური ნიშნები. ამას იმიტომ ვამბობ ხაზგასმით, რომ ძალიან ხშირად ტკიპის კბენის შემდეგ მეორე და მესამე დღეს მოდიან ხოლმე პაციენტები და ითხოვენ ანალიზის ჩატარებას, რომელიც ამ შემთხვევაში არ არის ინფორმატიული. ამისთვის საჭიროა დრო, რადგან ანალიზით ხდება ანტისხეულების განსაზღვრა. ეს შეიძლება იყოს, მაგალითად, 28 დღე, შესაძლოა იყოს ხუთი დღე. დაჟინებით ითხოვენ ხოლმე ანალიზს. ზოგჯერ მოდიან, ტკიპა ისევ აზით კანზე. ამ დროს პირველ რიგში ვაცილებთ ტკიპს. გულდასმით ვუხსნით, რომ ამ შემთხვევაში ტესტის პასუხი შესაძლოა იყოს ნეგატიური, რომელიც არ გამორიცხავს, რომ ეს დაავადება გაქვს, რადგან წინ გაქვს მთელი ინკუბაციური პერიოდი. უარყოფითი პასუხის შემთხვევაშიც ცოტა მოგვიანებით ვიბარეთ, რომ თავიდან გადავამოწმოთ ეს ადამიანი. რაც შეეხება სიმპტომებს, ყველაზე ხშირად ვლინდება გამონაყარი ნაკბენის ირგვლივ, რომელიც არის უხშირესად გამოხატული. თუმცა, შესაძლოა, გამონაყარი სხეულის სხვა ნაწილშიც გამოვლინდეს. ეს არის წითელი რკალისებრი შემოხაზვა, რომლის დიამეტრი საკმაოდ დიდია, შესაძლოა ხუთი სანტიმეტრი და მეტიც იყოს. გარდა ამისა, დაავადების სიმპტომებია ცხელება, სახსრების ტკივილი, კუნთის ტკივილი, ზოგადი სისუსტე, ოფლიანობა, ხშირად გამოვლინდება თავის ტკივილი. არის კიდევ ისეთი ნიშნები, რომელიც უკვე სერიოზულ საფრთხეზე მიუთითებს. ეს არის გართულებები გულის და ნერვული სისტემის მხრივ. ეს ორი დაზიანება, ნერვული და გულის მხრივ, ცოტა უფრო მოგვიანებით ფაზებში ვითარდება, სადღაც ერთი თვის მერე.

რაც შეეხება ლეიშმანიოზს, მისი საინკუბაციო პერიოდი არის 4-6 თვე. სწორედ ამ პერიოდის შემდეგ ხდება ხოლმე კლინიკური სურათის მანიფესტირება. ეს ძალიან მძიმე დაავადებაა და ყველა მკურნალობის გარეშე შემთხვევები და, მათ შორის, დაგვიანებული შემთხვევები ხშირ შემთხვევაში ცუდი გამოსავლით მთავრდება.

- წლევანდელ სეზონზე საქართველოს რომელ რეგიონში გამოვლინდა პარაზიტული დაავადებების ყველაზე მეტი შემთხვევა?

- წელევანდელ სეზონზე ინტენსიურია კახეთის შემთხვევები. საკმაოდ ბევრი შემთხვევა შემოვიდა კახეთიდან, შედარებით ნაკლებია თბილისის შემთხვევები.

- ძირითადად რა სიმპტომებით შემოდიან პაციენტები?

- შემოდიან ცხელებით, ღვიძლის და ელენთის გადიდებით, ანემიით, ჰემოგლობინის ნაკლებობით და წონის კარგვით. ეს არის ძირითადი სიმპტომები, თუმცა შესაძლოა დაფიქსირდეს დაბალი ლეიკოციტი, დაბალი თრომბოციტი. ეს ის დაავადებაა, რომელიც არ გამოგვეპარება, რადგან მკვეთრად არის სიმპტომები გამოხატული და ყველა ნიშნის არსებობის შემთხვევაში, რაც დროზე მიმართავთ ექიმს, გამოსავალი უფრო მარტივად მოიძებნება. დაავადების დროს თვითმკურნალობა დაუშვებელია, დაუყონებლივ უნდა მიმართოთ ექიმს.

 

525
თემები:
ჯანმრთელობა და სილამაზე
თბილისის ინფექციური საავადმყოფო

კორონავირუსის ახალი შემთხვევები და ინფიცირების წყაროები

0
(განახლებულია 14:10 10.08.2020)
ამ დოისთვის COVID–ცენტრებში 261 პაციენტი მკურნალობს. პანდემიის დაწყებიდან დღემდე 1010 ადამიანი გამოჯანმრთელდა

თბილისი, 10 აგვისტო – Sputnik. ბოლო დღე–ღამეში გამოვლენილი კორონავირუსის 25 ახალი შემთხვევიდან 16 უკვე დადასტურებული შემთხვევის კონტაქტია, განუცხადა ჟურნალისტებს თბილისის ინფექციური საავადმყოფოს სამედიცინო დირექტორმა მარინა ეზუგბაიამ.

მისი თქმით, ამ დროისთვის საქართველოს COVIDცენტრებში 261 პაციენტი მკურნალობს. გამოჯანმრთელების მაჩვენებელი 81%.

„25 ახალი დადასტურებული შემთხვევიდან ერთი პაციენტი არის გაჩიანიდან, 16 დადასტურებულ შემთხვევებთან კონტაქტია, 1 სამედიცინო პერსონალია, 5 გახლავთ იმპორტირებული, ანუ შემოტანილი შემთხვევა, 1 პაციენტი აფხაზეთიდან არის გადმოყვანილი, ხოლო 1 პაციენტზე გრძელდება ეპიდემიოლოგიური კვლევა კონტაქტების გამოვლენისა და წყაროს დადგენის მიზნით“, – განაცხადა ეზუგბაიამ.

უშუალოდ ინფექციურ საავადმყოფოში ამჟამად კორონავირუსზე 27 პაციენტი მკურნალობს.

„უშუალოდ ინფექციურ საავადმყოფოში გამოჯანმრთელდა შვიდი და დაემატა ექვსი ახალი პაციენტი. დღესდღეობით გვყავს 27 დადასტურებული შემთხვევა“, – აღნიშნა ეზუგბაიამ.

კორონავირუსი მსოფლიოში – 10 აგვისტოს მონაცემები>>

ექიმები ორი პაციენტის მდგომარეობას, COVID-19–ის მიმდინარეობისა და თანმდევი დაავადებების გათვალისწინებით, აფასებენ, როგორც მძიმეს. დანარჩენების მდგომარეობა ძირითადად საშუალო სიმძიმისაა.

ბოლო ოფიციალური მონაცემებით, საქართველოში კორონავირუსით ინფიცირებულთა რაოდენობაა 1250. ამასთან, ბოლო 24 საათში კლინიკებიდან გაეწერა 10 ადამიანი. სულ პანდემიის დაწყებიდან დღემდე გამოჯანმრთელდა 1010 ადამიანი, გარაიცვალა – 17.

კარანტინში მოთავსებულია 6 930 ადამიანი, ხოლო ექიმების მეთვალყურეობის ქვეშ – 263.

უცხოეთიდან სამკურნალოდ საქართველოში გადმოყვანილია ქვეყნის 41 მოქალაქე.

კორონავირუსის პირველი შემთხვევა საქართველოში 26 თებერვალს დაფიქსირდა.

0
თემები:
COVID-19 საქართველოში