გვანცა კორძახიას ხელნაკეთი დეკორატიული ნივთები

„ინკა“ სიზმრისმიღმა  სამყაროს აუცილებელი ატრიბუტი

1397
(განახლებულია 10:46 14.07.2019)
გვანცა კორძახია ანუ ჯუდი, როგორც მას მეგობრები ეძახიან, ხუთი  წელია  ერთგული მომხმარებლისთვის გამოვნებიან, დახვეწილ და ფერად აქსესურებს ქმნის.  უყვარს მუსიკა, უკრავს დასარტყამ ინსტრუმენტზე,  არის კომუნიკაციების მენეჯერი  და ებრძვის ოჯახში ძალადობას... გვანცა ჩვენს მკითხველს სიზმრის მჭერებზე მოუყვება.

ნინი რაზმაძე

- DreamCatcher ანუ  სიზმრების დამჭერი,  სათავეს ლაკოტას ტომიდან იღებს.  ერთ-ერთ ბელადს გამოეცხადა  დედა–ობობა, რომელმაც უთხრა, რომ ტირიფის რგოლებზე ის მოქსოვდა ქსელს, შემდეგ ამ ნივთს დაკიდებდა ბავშვების საწოლის თავზე და ისინი ცუდი სიზმრებისგან იქნებოდნენ  დაცული.  

„დრიმ ქეჩერის“ ყველა დეტალს თავისი მნიშველობა აქვს. ქსელი იჭერს სიზმრად ნანახ ცუდ ემოციებს და ფილტრავს. ცენტრისკენ მიდის მხოლოდ კარგი მომენტები და ბუმბულებით ის მძინარე ადამიანის ცნობიერებაში ეშვება. დილის დადგომის და მზის პირველი სხივისთანავე, ქსელში გახვეული ცუდი სიზმრები იწვება. 

გვანცა კორძახია
გვანცა კორძახიას პირადი არქივი
გვანცა კორძახია

– როგორ გაჩნდა იდეა შეგექმნათ მსგავსი სტილის ხელნაკეთი ნივთები?

– დაახლოებით 5 წლის წინ თავად  მსურდა  სიზმრის მჭერის შეძენა. ონლაინ–საიტებზე ლამაზი ქეჩერები საკმაოდ ძვირი იყო. ამიტომ, გადავწყვიტე თვითონ გამეკეთებინა. მეგობარს როცა ვაჩვენე, შემომთავაზა დამემზადებინა გარკვეული რაოდენობა და მეცადა მათი რეალიზება ფბ-გვერდის საშუალებით. მომეწონა  იდეა  და პირველი რაც ვიყიდე, ეს ჩემი საყვარელი სამუშაო იარაღი - ბრტყელტუჩა იყო. ჩემი პირველი ქეჩერი, რომელიც გაავკეთე, ყველაზე მეტად მიყვარს. სახლში მიკიდია და ყოველთვის, როცა ვუყურებ, მახსენებს, რომ არ აქვს მნიშვნელობა რას გადავწყვეტთ ცხოვრებაში, მთავარია, რომ გვქონდეს მიზანი და აუცილებლად მივაღწევთ წარმატებას. მთავარი არის ღიმილი, სილაღე და თავისუფლება - სწორედ ასეთია ინკა - ფერადი და ბედნიერი.

– რას ნიშნავს სახელი „ინკა“?

– სახელსა და ლოგოზე ძალიან დიდხანს ვიფიქრე. მინდოდა ყოფილიყო თემატიკასთან ახლოს, მაგრამ არ ყოფილიყო შეზღუდული - სიზმრის მჭერები ჩემი საქმიანობის ძირითადი მიმართულებაა, თუმცა, სხვადასხვა ხელნაკეთ ნივთებსაც ვამზადებ. ამიტომ, არ მინდოდა სახელში საგნებთან რაიმე მიმსგავსებული სიტყვა ყოფილიყო. ინკების იმპერია კოლუმბამდელი ამერიკის ერთ-ერთი უმსხვილესი იმპერია იყო. ინკების ცივილიზაცია პერუს მაღალმთიან რეგიონში მე-13-ე საუკუნეში აღმოცენდა. მათი მთავარი ღვთაება მზის ღმერთი იყო, თუმცა, ყველა ტომს საკუთარი რელიგიის ქონის უფლება ჰქონდა.

არ ვიცი, რატომ, მაგრამ ყოველთვის მომწონდა ეს სახელი. დასამახსოვრებელი, მარტივი და თემატურია. სახელი და ლოგო მინდოდა ასოცირებული ყოფილიყო ჯიმ მორისონის ბავშობასთან, როდესაც ის ინდიელს ხეადვს, არ ვიცი რამდენად გამოვიდა, მაგრამ ვგრძნობ, რომ ზუსტად პასუხობს ამოცანას. 

ინდიელი ქალის თავსამკაული გვანცა კორძახიასგან
გვანცა კორძახიას პირადი არქივი
ინდიელი ქალის თავსამკაული გვანცა კორძახიასგან

– მუშაობის პროცესზე მოგვიყევით...

– „ინკას“ მარტო ვქმნი. ძირითადი პროდუქტი სიზმრის მჭერებია. მასალისა და ნივთების ხარისხი ძალიან მაღალია, 5 წლის განმავლობაში უკმაყოფილო მომხმარებელი არ მყოლია. დამზადების დრო დამოკიდებულია სირთულეზე, სიდიდესა და რაოდენობაზე. საშუალო ვადა 1 კვირაა. უკვე მაქვს ახალი სერვისი - უფასო მიტანა, რაც უფრო ამარტივებს შეკვეთის პროცედურას.

– რას სთვაზობთ მომხარბელს?

– გარდა სიზმრის მჭერებისა, „ინკას“ აქვს საფესტივალო აქსესუარები, ე.წ. ჰედდრესები - ბუმბულის გვირგვინები, თმაზე დასამაგრებელი ბუმბულები. ასევე, ქორწილების, ივენთების, დაბადების დღეების გაფორმების სერვისი. ასევე ნაკლებად ცნობილია ჩემი „ქანქარები“. ეს არის პროდუქტი, რომელიც კიდევ უფრო პირადულია, ვიდრე სიზმრის მჭერი. მომხმარებლისგან ვიღებთ ინფორმაციას მისი საყვარელი ფერის, ქვის, ზოდიაქოს, ციფრის, სიმბოლოს შესახებ და ამის გათვალისწინებით ვამზადებთ „ქანქარას“.  ეს არის განუყრელი და ერთგული თილისმა, რომელიც ყველა დასმულ შეკითხვაზე აუცილებლად სწორ პასუხს გაგცემთ. 

გვანცა კორძახიას დეკორატიული სახლები
გვამცა კორძახიას პირადი არქივი
გვანცა კორძახიას დეკორატიული სახლები

– რითია გამორჩეული თქვენი ნივთები სხვებისგან?

– პირველ რიგში, როგორც გითხარით, ეს არის ხარისხი – ფერები, ბადის სიმჭიდროვე, თითოეული დეტალი  მომხმარებელთან ერთად განიხილება. შეკვეთის მიღებისას ჯერ უნდა განვიხილოთ დიზაინი, შემდეგ რგოლის, ბადის, მძივებისა თუ სხვა დეტალების ფერები, ბუმბულების სტილი, რაოდენობა, ფერები. თავიდანვე უნდა ვიცოდე, რა დანიშნულება ექნება კონკრეტულ ნივთს, რადგან საკიდიც შესაბამისი გაუკეთდეს. „ინკას“ ნივთები აბსოლუტურად გამოხატავენ მომხმარებლის სურვილებს, ინტერესებს და ყოველთვის აჭარბებს მათ მოლოდინს. არის შემთხვევები, როცა მომხმარებელმა არ იცის, როგორი ქეჩერი უნდა, ან საჩუქრად სურს. ამ შემთხვევაში ვარიანტებს განვიხილავთ და საბოლოო ჯამში ვიღებთ იდეალურ შედეგს.

– არ გაგიჭირდათ ბაზარზე დამკვიდრება?

– სიმართლე რომ ვთქვა, არა, რადგან  ჩემი პროდუქცია შედარებით ახალი იყო, ყველას მოსწონდა და მარტივად შევძელი ერთგული მომხმარებლების მოძიება. მყავს ისეთი მომხმარებლებიც, რომლებიც გამუდმებით მიკვეთავენ ნივთებს საჩუქრებად, სახლის გასაფორმებლად. რა თქმა უნდა, კონკურენცია არის, ფასების მხრივაც და შედარებით მომრავლდა სიზმრის მჭერები, მაგრამ ვისაც სურს თავისი გემოვნებით, ხარისხიანად და ძალიან ლამაზად დამზადება, ყველამ იცის, რომ იდეალური თილისმა „ინკაზე“ უნდა ეძებონ.

 ჩვენი პროდუქციის შეძენა, ძირითადად,  სოციალური ქსელის მეშვეობითაა შესაძლებელი. რადგან „ინკას“ მთავარი ნიშა არის მომხმარებელზე მორგებული პროდუქტი, ცოტა რთულია, დაამზადო და ელოდო „იმ ერთადერთს“, ამიტომ შეკვეთებზე ვმუშაობ. 

სარკე დეკორატიულ ჩარჩოში - გვანცა კორძახია
გვანცა კორძახიას პირადი არქივი
სარკე დეკორატიულ ჩარჩოში - გვანცა კორძახია

– დასაწყისისთვის რა იყო ყველაზე რთული?

– რთული, ალბათ, საზოგადოების მხრიდან იმ ნდობის მოპოვება იყო, რაც ახლა მაქვს. მიუხედავად იმისა, რომ მყავს ჩემი მომხმარებელი, ცოტა ძნელია კომპანიებთან ურთიერთობა.  ვგეგმავ, რომ „ინკა“ იყოს კარგი კორპორატიული საჩუქარი, რადგან შესაძლებელია კომპანიის ფერებში, თემატიკაში დამზადება, გამოყენებით კი მრავალფუნქციურია - როგორც სამკაულად - საყურე, ყელსაბამი, თმის აქსესუარი, ასევე მანქანის, კედლის, ჩანთის თუ გასაღების საკიდი.  მინდა, რომ ჩემი პროდუქცია კარგ, მოთხოვნად და კორპორატიულ საჩუქრად იქცეს. 

გვანცა კორძახიას ხელნაკეთი სიზმრების დამჭერი
გვანცა კორძხიას პირადი არქივი
გვანცა კორძახიას ხელნაკეთი სიზმრების დამჭერი

– საკმაოდ ფერადი აქსესურები გაქვთ, რამდენად მოწონს ქართველ მომხმარებელს ფერადი სიზმრის მჭერები?

– მომხმარებელს უყვარს ფერადი ნივთები. ჩემი მომხმარებელი ასეთია – „ინკასავით“ ნათელი და ლამაზი. „ინკას“ აქსესუარები ძალიან უხდება ბოჰემურ, ავანგარდულ და თავისუფალი სტილის ტანსაცმელს, ამიტომ მსურს თუნდაც დამწყებ დიზაინერთან ერთად ერთობლივი კოლექცია  შევქმნა.  მინდა საკუთარი მაღაზია  მქონდეს, სადაც მომხმარებელს თავად შეეძლება შეარჩიოს დეტალები, თუმცა, ეს გარკვეულ  ფინანსებთან არის დაკავშირებული და  ასე ვთქვათ, შორეული გეგმებია. როგორც უკვე აღვნიშნე, ვგეგმავ ქართულ კომპანიებთან თანამშრომლობას.  

1397
ხორბალი

ხორბლის რა მარაგი აქვს ქვეყანას და რა შემთხვევაში გაძვირდება პური

76
(განახლებულია 17:06 20.11.2020)
საქართველო წელიწადში 700-800 ათას ტონა ხორბალს მოიხმარს. აქედან მხოლოდ 10-12%-ია ადგილზე მოყვანილი, დანარჩენი ქვეყანას შემოაქვს, ძირითადად – რუსეთიდან.

ბოლო დროს დოლარის მიმართ ლარის კურსის მკვეთრი გაუფასურების გამო ეკონომისტები იმპორტზე დამოკიდებულ ქვეყანაში ფქვილზე და პურზე ფასების მატებას ელოდებიან. რა მდგომარეობაა ქვეყანაში ხორბლის მარაგების თვალსაზრისით და მოსალოდნელია თუ არა პურ-პროდუქტებზე ფასების ზრდა, „Sputnik–საქართველოსთან“ ხორბლისა და ფქვილის მწარმოებელთა ასოციაციის ხელმძღვანელი ლევან სილაგავა საუბრობს:

ლევან სილაგავა
ლევან სილაგავა

ფქვილის ფასზე ლარის კურსიც აისახება და მსოფლიო ბაზრებზე ხორბლის გაძვირებაც, თუმცა ახლა გარდამავალი მარაგებით ვმუშაობთ. ზაფხულში ხორბალი რუსეთში საკმაოდ დაბალ ფასად შევიძინეთ, სექტემბერში, ოქტომბერსა და ნოემბერში კი უკვე უფრო ძვირად, მაგრამ საშუალო შეწონილი ფასით ნელ-ნელა აქამდე მოვედით, ყოველ შემთხვევაში პირველი ხარისხის ფქვილი, რომლისგანაც პური ცხვება, მხოლოდ 4 ლარით გაძვირდა. ახლა ერთი ტომარა ფქვილის ფასი 55 ლარია. მართალია, ეს არ არის იმხელა ცვლილება, რომ პურის ფასში აისახოს, თუმცა გამოწვევად, რა თქმა უნდა, რჩება ისევ მსოფლიო ბაზრებზე ხორბლის ფასების მერყეობა. თანაც რუსეთმა გამოაცხადა, რომ 2021 წლის თებერვლიდან წლის ბოლომდე მარცვლეულის ექსპორტის მოცულობას შეზღუდავს და ეს იმ 124-მა ქვეყანამ უნდა გაითვალისწინოს, რომლებსაც რუსეთი აწვდის ხორბალს. ჩვენთანაც ხორბლის დიდი წილი რუსეთიდან შემოდის და, შესაბამისად, ვმუშაობთ იმაზე, რომ სხვა ქვეყნიდან წამოვიღოთ, თუ იქ უფრო იაფი იქნა ხორბალი. თუმცა, ჯერჯერობით მაინც შემოგვაქვს, მართალია, გაძვირებული, მაგრამ მაინც სხვებთან შედარებით იაფი რუსული  ხორბალი.   

რაც შეეხება მარაგებს, ახლა ქვეყანაში ხორბლის დეფიციტი არ გვაქვს. გვაქვს კონტრაქტი 30 000 ტონა ხორბალზე, რომელიც დეკემბრის თვეში აშშ-დან უნდა შემოვიდეს. ამასთან, ადგილობრივი ხორბლის რაღაც ნაწილიც არის დარჩენილი კახეთში და ეს ბალანსის საშუალებას გვაძლევს. თუ ვინიცობაა, მსოფლიო ბაზრებზე არსებული სიტუაციიდან გამომდინარე, პურის ფქვილზე ფასის აწევა აუცილებელი გახდება, ამ შემთხვევაში ჩვენ გვაქვს მუდმივი კომუნიკაცია მთავრობასთან და არის სამი ვარიანტი სუბსიდირების: პირველი მექანიზმი არის ხორბლის იმპორტის სუბსიდირება, როგორც მოხდა მარტსა და აპრილში კორონავირუსის პირველი ტალღის დროს, მეორე არის ფქვილის ფასის სუბსიდირება, და მესამე – თვითონ პურის ფასის სუბსიდირება. ამ სამი ვარიანტიდან მთვარობა აირჩევს იმას, რომელიც უფრო ეფექტური და ნაკლებხარჯიანი იქნება ბიუჯეტისთვის.

რამდენ ხორბალს მოიხმარს საქართველო წელიწადში?

საქართველო დაახლოებით მოიხმარს 700-800 ათას ტონამდე ხორბალს წელიწადში. ჩვენ ხორბალი წლების განმავლობაში შემოგვქონდა რუსეთიდან, უკრაინიდან, ყაზახეთიდან, უნგრეთიდან, აშშ-დანაც კი, მაგრამ ბოლო სამი წელია დომინანტი ჩვენს ბაზარე რუსეთი გახდა, იმიტომ რომ დღეს ეს ქვეყანა მსოფლიოში პირველი ექსპორტიორია. გარდა ამისა, ჩვენთვის იქიდან იმპორტი ხელსაყრელია ლოგისტიკის თვალსაზრისითაც, რადგან გვაქვს საერთო საზღვარი ლარსზე. გარდა ამისა, რუსული ხორბალი შემოდის ფოთისა და ბათუმის პორტებით და რკინიგზით აზერბაიჯანიდან. ამას ემატება მომხიბვლელი ფასიც.

რა ღირს 1 ტონა რუსული ხორბალი?

ახლა 1 ტონა ხორბლის ღირებულება სადღაც 250-260 დოლარია. ეს უფრო ნაკლებია მსოფლიოს სხვა ქვეყნებთან შედარებით, თუმცა უფრო ძვირია ზაფხულთან შედარებით. მაგალითად, იმავე სექტემბრის თვეში რუსული ხორბალი 200 დოლარი ღირდა. 25% საკმაოდ დიდი გაძვირებაა და ამიტომ დღეს დაძაბული ბალანსით ვმუშაობთ.

რა ალტერნატიული ვარიანტები აქვს საქართველოს რუსული ხორბლის გარდა?

დღეს რუსულ ხორბალს ყიდულობს 124 ქვეყანა, შესაბამისად, მათთვის და, მათ შორის, ჩვენთვისაც არის სხვა წყაროებიც მსოფლიოში, საიდანაც შეიძლება ხორბლის იმპორტი. რუსული ხორბლის ფასი თუ იქნება უფრო მაღალი, ვიდრე იმავე ყაზახურის, უკრაინულის, უნგრულის, რუმინულის ან ამერიკულის, ყველა ეს ბაზარი ჩვენთვის ღიაა და არც ფიზიკურად ხორბლის წამოღების პრობლემა იქნება.

ხორბლის მარაგები როგორ კეთდება?

ჩვენ ვმუშაობთ შემდეგი სქემით: ადგილზე ხორბალი, გზაში ხორბალი და ხორბლის შესყიდვის ახალი კონტრაქტი. საშუალოდ ორი თვის სამყოფი ხორბლის მარაგი ადგილზე ყოველთვის არის. ის იხარჯება, თავისთავად ცხადია, მაგრამ იმავე რაოდენობით ივსება. როდესაც ხორბალი ძვირდება, შესაბამისად ხარჯვის პარალელურად ახლის შემოტანა მაღალ ფასში ხდება, რაც იწვევს პროდუქტის გაძვირებას. თუმცა როდესაც ჩვენ გარდამავალი მარაგები გვაქვს, იაფად შეძენილი ხორბალი აბალანსებს ახალ ძვირად შეძენილ ხორბალს და საშუალება გვაქვს საშუალო შეწონილ ფასად მოვახდინოთ მისი რეალიზება.

ქართული ხორბალი რა მოცულობით არის და როგორია პერსპექტივა, რომ ქვეყნის მოხმარების დიდი ნაწილი ადგილობრივმა მარცვლეულმა დააკმაყოფილოს?

სასურსათო უსაფრთხოებაში მონაწილე პროდუქტის ადგილზე წარმოება რომ ძალიან მნიშვნელოვანია, ეს კორონავირუსის პანდემიამაც დაგვანახა. მაგრამ რეალისტები უნდა ვიყოთ – არ ვართ ქვეყანა, რომელიც მარტო ხორბლის მოყვანაზე უნდა იყოს ორიენტირებული. არის ბევრი სხვა კულტურა, რომელიც საქართველოში მოდის, თანაც ჩვენ მცირემიწიანი ქვეყანა ვართ, შესაბამისად, ჩვენი ამოცანაა – 5 წელიწადში ხორბლის მთლიანი მოხმარების დაახლოებით 30-40 პროცენტამდე ადგილობრივი მარცვლეულით დავაკმაყოფილოთ. 

რა კეთდება ამისათვის სახელმწიფოს მხრიდან?

პირველი, ეს არის დარაიონება, რომელიც იმისთვის კეთდება, რომ ვიცოდეთ რომელი ხორბლის თესლი რომელ რეგიონში იძლევა ყველაზე მეტ მოსავალს – კახეთში, შიდა ქართლში, ქვემო ქართლში თუ სხვაგან. ამაზე მუშაობს სოფლის მეურნეობის სამინისტრო და ბოლო დროს აქვთ კიდეც წარმატებები. თითო ჰექტარზე მოწეული ხორბლის რაოდენობა საქართველოში 2–2.5 ტონაა, მაშინ, როდესაც რუსეთსა და ევროპის ქვეყნებში ეს მაჩვენებელი 5-8 ტონას შეადგენს. შესაბამისად, ჩვენ იმავე მეცნიერული მიდგომით, ახალი ტექნოლოგიებით და აგრო-განათლებით უნდა შევძლოთ, რომ ერთ ჰექტარ ფართობზე ხორბლის მოსავლიანობა მინიმუმ 5 ტონამდე გავზარდოთ. თუ დღეს ადგილობრივი ხორბალი მთლიანი მოხმარების 10-12%-ს შეადგენს, შეგვიძლია ის სადღაც 25%-მდე გავზარდოთ. ეს არის ჩვენი მიზანი უახლოეს ორ წელიწადში, და შემდგომში თუ ჩვენ ფართობების რაოდენობას გავზარდით, ჩამოვაყალიბებთ კოოპერატივებს, რადგან ფერმერები ძალიან მცირე მიწას ამუშავებენ, მაშინ შეიძლება სადღაც 30-40 პროცენტზეც ავიდეთ. თუ ამას მივაღწიეთ, ჩვენ ვიქნებით სტაბილურად და სასურსათო უსაფრთხოების პრობლემა ხორბლის ფქვილის და პურის მხრივ გადაწყვეტილი გვექნება. გაეროს რეკომენდაციით, ორი თვის მოხმარების მარაგი უნდა იყოს ქვეყანაში და თუ მომავალში საჭირო რაოდენობის 40%-ს ადგილზე მოვიყვანთ, თავისთავად ცხადია, სამჯერ გადავაჭარბებთ ამ დადგენილ ნორმას.

ნატა პატარაია

76
საბა ბოდიკია

საბა ბოდოკიას „გრძნობათა ქაოსი" საერთაშორისო ფესტივალზე გამარჯვებული ქართველი თინეიჯერი

1819
(განახლებულია 20:28 17.11.2020)
„საბა ბოდოკია“ - დავიმახსოვროთ ეს სახელი და გვარი, ეს ბიჭი ნამდვილი აღმოჩენაა!” - ასე გამოაცხადა საბავშვო ფილმების ფესტივალი „ოქროს პეპელას“ გამარჯვებული ფესტივალის დამაარსებელმა და ორგანიზატორმა, რეჟისორმა ირაკლი ჯაოშვილმა.

15 ნოემბერს დასრულდა საბავშვო ფილმების მეათე საიუბილეო (ON LINE) საერთაშორისო ფესტივალი „ოქროს პეპელა -2020", რომლის მთავარი პრიზი საქართველოში დარჩა.

საბავშვო ფილმების საერთაშორისო ფესტივალის „ოქროს პეპელა“ დამაარსებელი და ორგანიზატორი, რეჟისორი ირაკლი ჯაოშვილი
საბავშვო ფილმების საერთაშორისო ფესტივალის „ოქროს პეპელა“ დამაარსებელი და ორგანიზატორი, რეჟისორი ირაკლი ჯაოშვილი

გასულ კვირაში - 13, 14 და 15 ნოემბერს თბილისმა უკვე მეათედ უმასპინძლა ფესტივალს, რომელშიც წელს ოცი ქვეყნის მოზარდებმა მიიღეს მონაწილეობა. „ოქროს პეპელას“ ორგანიზატორები არიან კომპანია „ოქროს პეპელა“ და თბილისის ევროპული სკოლა. საერთაშორისო ჟიურიმ ფესტივალზე წარმოდგენილი 87 ფილმიდან საკონკურსოდ 40 ფილმი შეარჩია.

რაც შეეხება გამარჯვებულს, 16 წლის საბა ბოდოკია გეგუთის N1 საჯარო სკოლის მოსწავლეა. ფესტივალისთვის მან წარადგინა ხუთწუთიანი ფილმი „გრძნობათა ქაოსი", რომლის რეჟისორი, სცენარისტი და მხატვარი თავადაა.

საბასთვის ეს პირველი საერთაშორისო კონკურსი და, შესაბამისად, პირველი გამარჯვებაა. ნიჭიერ მოზარდს ბევრი გატაცება აქვს, ფილმი ფაქტობრივად მის საინტერესო შინაგან სამყაროს ასახავს. ეს ერთგვარი მცდელობაა, რომ კინოხერხების საშუალებით პასუხი გაეცეს პიროვნული დამკვიდრების გზაზე მყოფი მოზარდის მარადიულ კითხვებს...

საბა ბოდიკია
საბა ბოდიკია

- საბა, გილოცავ წარმატებას და ტრადიციული პირველი კითხვა გამარჯვებულს: თუ ელოდი ასეთ შედეგს და რას ნიშნავს შენთვის ეს გამარჯვება?

- დიდი მადლობა მოლოცვისთვის, რაც შეეხება ფილმს, გულწრფელი ვიქნები და გეტყვით, რომ ასეთ შედეგს ნამდვილად არ ველოდი. დაჯილდოებისას ოპერატორთა ნომინაციაში მეორე ადგილი ავიღე, ამ ფაქტმა ძალიან გამახარა და იმის მცირე იმედი, რომ ფესტივალის გამარჯვებული გავხვდებოდი, ბოლომდე გადამეწურა. ვეცადე ყურადღება სხვა რამეზე გადამეტანა და ჩემ წინ დადებულ ქაღალდზე ხატვა დავიწყე, სწორედ ამ დროს მომესმა ჩემი ფილმის სახელი, ამან იმდენად ამაღელვა, ამანერვიულა და ამავდროულად გამაკვირვა, რომ სიტყვებს თავი ვერ მოვაბი.

საბა ბოდიკია
საბა ბოდიკია

- „ოქროს პეპელა“ შენთვის პირველი ფესტივალია...

- დიახ, ეს პირველი ფესტივალია, რომელშიც მონაწილეობა მივიღე, შესაბამისად, ჯილდოც პირველია ამ სფეროში. დიდ მადლობას ვუხდი თითოეულ ადამიანს, ჟიურის, ორგანიზატორებს, რომ ასეთი მნიშვნელოვანი პრიზი ჩემი ფილმისთვის გაიმეტეს. ეს ჩემთვის არა უბრალოდ წარმატება, არამედ მომავალი გეგმების განხორციელებისთვის ძალიან დიდი მოტივაციის მომცემია.

საბა ბოდიკია
საბა ბოდიკია

- შენს ფილმში, რომელსაც უწოდე „გრძნობათა ქაოსი" გადმოცემულია ადამიანური გრძნობები და განცდები, რატომ შეარჩიე ასეთი ფსიქოლოგიური თემა?  

- ადამიანი ძალიან საინტერესო არსებაა, ფსიქოლოგიით კი წლებია გატაცებული ვარ. 13 წლის ვიყავი, როცა დავინტერესდი, თუ ვინ ვიყავი რეალურად, რა მიზანი მქონდა, რატომ ვცხოვრობდი და რა იყო ზოგადად ცხოვრება. მერე თვეების განმავლობაში ხშირად ვიკეტებოდი საკუთარ თავში და ვეძებდი ამ კითხვებზე პასუხს. ცოტა ხანში მივხვდი, რომ ერთადერთი ადამიანი, ვისაც ამ კითხვებზე პასუხი ჰქონდა, საკუთარი თავი იყო... საბა ბოდოკია, როგორც პიროვნება, მისი შინაგანი სამყაროთი, სურვილებითა და მიზნებით სწორედ ამ დროს ჩამოყალიბდა. მინდა ფილმების მეშვეობით მაქსიმალურად გავუზიარო ჩემი გრძნობები ადამიანებს, რომ ჩავახედო ამ სამყაროში და იგივე კითხვები მათაც დაუსვან საკუთარ თავს: ვინ არიან და რა უნდათ ცხოვრებაში?..

საბა ბოდიკია
საბა ბოდიკია

- ფილმის პერსონაჟებზე რას იტყვი?

- ზოგადად, ეს სფერო იმდენად არის ჩემში, რომ საკუთარ ცხოვრებასაც აღვიქვამ ფილმად, რომელშიც მთავარი პერსონაჟი, რა თქმა უნდა, ისევ მე ვარ. ყველაზე უცნაური ის არის, რომ ამას ჩემი ტვინი როგორღაც იჯერებს და რეალობიდან მწყვეტს. ამ დროს ვიკეტები ჩემს სამყაროში, საკუთარ ოთახში, საკუთარ თავში. აი, სწორედ ამ დროს „ჩნდება“ ჩემი თავის სხვადასხვა ვერსია, ანუ სხვადასხვა პიროვნება, რომლებიც ერთმანეთთან ძალიან საინტერესო დიალოგებს მართავენ. თუ დაუკვირდებით, ამაზე „გრძნობათა ქაოსშიც" საუბრობს ერთ-ერთი პერსონაჟი. ეს პერსონაჟები ყველა ჩემში არსებული სხვადასხვა პიროვნების ჩვენებაა, ეკრანიზაციაა.

- საკუთარი გრძნობათა ქაოსის გადმოსაცემად ყველაზე პოპულარული და მასობრივი – კინოხელოვნება შეარჩიე...

- პირველად კამერის, ოღონდ, როგორც გასართობი საშუალების მიმართ ინტერესი ცხრა წლის ასაკში გამიჩნდა. 12 წლისა უკვე ვწერდი სცენარებს ჩემს მეგობრებთან ერთად და ვიღებდით მოკლემეტრაჟიან ფილმებს, რომელთა დასრულების შესაძლებლობა, სამწუხაროდ, არ გვეძლეოდა სხვადასხვა მიზეზების გამო. იმ წლების შემდეგ გემოვნება რადიკალურად შემეცვალა, ახლა უკვე, შეიძლება ითქვას, საკუთარი სტილიც მაქვს არჩეული.

- ყველაზე რთული და საინტერესო რა იყო ფილმის გადაღების დროს?

1 / 5
კადრი ფილმიდან "გრძნობათა ქაოსი"

- ფილმის გადაღებისას ყველაზე რთული ალბათ დროის სწორად განაწილება იყო, რადგან გადაღებების ნაწილი მიმდინარეობდა 30 ოქტომბერს, მაშინ, როცა ფესტივალზე გაგზავნის ბოლო ვადა ამავე დღის 00:00 საათამდე იყო. ყველაზე საინტერესო იყო ჩემი დამოკიდებულება იმ გამოწვევისადმი, რომელიც ჩემივე გადაწყვეტილებით დავაკისრე საკუთარ თავს. აქვე აღვნიშნავ, რომ სურვილებისა და მიზნისთვის მაქსიმალური ბრძოლა ყოველთვის იძლევა დადებით შედეგს.

- ფილმი მსახიობებისთვისაც სადებიუტო იყო?

- ფილმში მონაწილეობენ თემურ ბოდოკია, თორნიკე სირაძე, ნინა ხაინდრავა. მათი შესრულების მანერა სასიამოვნოდ მაკვირვებს და მახარებს, შემიძლია ვთქვა, რომ ეს მათი წარმატებული დებიუტიცაა. ჩემს ფილმში ასევე მეორეხარისხოვან (მცირე) როლებში არიან გულნარა მარგველაშვილი და ეკატერინა ტყეშელაშვილი. მინდა ყველას დიდი მადლობა გადავუხადო ნდობისა და თანხმობისთვის, რომ ჩემს მცირე ნამუშევარში მიეღოთ მონაწილეობა.

- მომავალი ფილმის თემა თუ გაქვს მოფიქრებული?

- მეორე ფილმის გადაღებები ზაფხულში დავიწყე და ზამთარში დავასრულებ. მისი ხანგრძლივობა დაახლოებით 12 წუთს მოიცავს. ფილმი განსხვავებულ ადამიანზეა, რომელიც ერთფეროვან დედამიწაზე უსახო ადამიანთა გარემოცვაში ცხოვრობს, შინაგანად კი საკუთარ სიზმრებსა და სამყაროშია დასახლებული. ასევე ვიწყებ მუშაობას სრულმეტრაჟიანი ფილმის სცენარზე, რომლის გადაღების საშუალება, იმედი მაქვს, რამდენიმე წელში მომეცემა.

- შენი ფილმის მთავარი არსი ერთი წინადადებით როგორ შეიძლება გამოხატო?

- არსს გამოვხატავდი იმ წინადადებით, რომლითაც თავად ფილმი სრულდება: „მე ქაოსში დაკარგული პერსონაჟი ვარ, რომელიც ცდილობს ცხოვრება ერთ დიდ წიგნად ან ფილმად აქციოს"...

 

1819
ლაბორატორია

კოვიდ-გეოგრაფია რეგიონების მიხედვით: რამ განაპირობა დღე-ღამური მაჩვენებლის რეკორდული ზრდა

0
(განახლებულია 11:40 05.12.2020)
ბოლო 24 საათში გამოჯანმრთელდა 2 306 პირი, ხოლო ჯამში გამოჯანმრთელებულთა რაოდენობა გაიზარდა – 129 210-მდე. გასულ დღე-ღამეში კორონავირუსით გარდაცვალების 37 ახალი შემთხვევა დაფიქსირდა. 2020 წლის 26 თებერვლიდან დღემდე სულ 1 462 ადამიანი გარდაიცვალა.

თბილისი, 5 დეკემბერი – Sputnik. ბოლო 24 საათის განმავლობაში ჩატარდა 18 095 ტესტი, აქედან 7 716 ანტიგენი და 10 379 PCR, ბერდია სიჭინავამ, სწორედ ამის შედეგად ბოლო 24 საათის განმავლობაში გამოვლენილია ვირუსით ინფიცირების 5 450 ახალი დადასტურებული შემთხვევა, განაცხადა მთავრობის ადმინისტრაციაში გამართულ ბრიფინგზე უწყებათაშორის საკოორდინაციო საბჭოსთან არსებული საოპერაციო შტაბის უფროსის მოადგილემ ბერდია სიჭინავამ.

მიზნობრივი წერტილოვანი შეზღუდვების ორ თვიანი კონკრეტული გეგმის ფარგლებში, უკვე დაიწყო ინტენსიური ტესტირება, რომელიც სახელმწიფოს მიერ დღეში 20 000 ტესტის ჩატარებას გულისხმობს.

ქვეყანაში COVID-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 158 154-ს. ბოლო 24 საათში გამოჯანმრთელდა 2 306 პირი, ხოლო ჯამში გამოჯანმრთელებულთა რაოდენობა გაიზარდა – 129 210-მდე. გასულ დღე-ღამეში კორონავირუსით გარდაცვალების 37 ახალი შემთხვევა დაფიქსირდა. 2020 წლის 26 თებერვლიდან დღემდე სულ 1 462 ადამიანი გარდაიცვალა.

დღეს გამოვლენილი ინფიცირების 5 450 ახალი შემთხვევიდან, დედაქალაქისა და რეგიონების მიხედვით მაჩვენებლები გამოიყურება შემდეგი სახით:

თბილისში გამოვლენილია 2 053 შემთხვევა, იმერეთში – 931, შიდა ქართლში – 528, აჭარაში – 453, სამეგრელო – ზემო სვანეთში – 434, კახეთში – 386, ქვემო ქართლში – 339, სამცხე-ჯავახეთში – 105, მცხეთა-მთიანეთში – 104, გურიაში – 84, რაჭა-ლეჩხუმსა და ქვემო სვანეთში – 33.

ქვეყანაში აქტიური შემთხვევა არის 27 456.

აქედან საავადმყოფოში მკურნალობს 6 768 ადამიანი მათ შორის, თბილისის საავადმყოფოებში – 2 981, აჭარაში – 1 009, იმერეთში – 1 252.

ამ ეტაპზე მძიმე პაციენტია 1 116 პირი, მათ შორის, თბილისში – 521, აჭარაში – 154, იმერეთში – 261. მათ შორის ხელოვნური სუნთქვის აპარატზე იმყოფება 395 პირი, მათგან თბილისში – 204, აჭარაში – 38, იმერეთში – 55.

კოვიდ-სასტუმროში მოთავსებულია  4 067 ადამიანი. მათ შორის 1 318 – თბილისში, 2 004 – აჭარაში, 424 – იმერეთში.

საცხოვრებელ ბინაზე მკურნალობის კურსს გადის 16 621 პირი.

საკარანტინე სივრცეებში მოთავსებულია 1 325 ადამიანი, მათ შორის, თბილისში - 367, აჭარაში – 263, ხოლო იმერეთში – 28.

სულ 6 ოქტომბრიდან – 4 დეკემბრის პერიოდში, სახელმწიფო საზღვრიდან საკარანტინე სივრცეებში გადაყვანილია – 19 904 პირი.

ამ ეტაპისთვის თვითიზოლაციაში იმყოფება 52 850 ადამიანი, მათ შორის თბილისში – 19 932 პირი, აჭარაში – 12 102, იმერეთში – 5 206.

0
თემები:
COVID-19 საქართველოში