Лолита Милявская во время съемок клипа на песню Судьба

ლოლიტა მილიავსკაია: ახლა მესმის, რატომ სახლდებიან საქართველოში

878
(განახლებულია 20:20 04.02.2018)
Sputnik წარმოგიდგენთ ექსკლუზიურ ინტერვიუს რუს მომღერალ ლოლიტა მილავსკაიასთან, რომელმაც იანვარში საქართველოში ორი სიმღერის კლიპი გადაიღო (Раневская და Судьба)

Sputnik-საქართველოს“ კორესპონდენტები გადასაღებ მოედანზე ლოლიტას გაესაუბრნენ.

Лолита Милявская во время съемок клипа на песню Раневская
© Sputnik / Denis Aslanov
ლოლიტა მილიავსკაია სიმღერის Судьба კლიპის გადაღებების დროს

- ორი კლიპი — ეს საკმაოდ მასშტაბური სამუშაოა. რატომ გადაწყვიტეთ საქართველოში მათი გადაღება?

— შემოდგომით მეგობრებმა ჩემი საყვარელი ნინო ქათამაძის ახალი კლიპი მაჩვენეს. ეს უნიკალური მომღერალია, ვგიჟდები მასზე, თუმცა ერთმანეთს არ ვიცნობთ. ჰოდა, როდესაც ვნახე, შოქში ჩავვარდი! შესანიშნავი ნამუშევარია! რა თქმა უნდა, პირველი კითხვა, რომელიც გამიჩნდა — ვინ? ვინ გააკეთა? მე პრინციპში ვიცი, რომ ასეთი გადაღება ყველას არ შეუძლია. როდესაც გავიგე, რომ ეს თინა ბარკალაია იყო, მაშინვე მისი ნიმერი ავკრიფე. კიდევ კარგი, რომ ის ტელეფონის ნომერს არასდროს ცვლის. როდესაც დავურეკე, გავიგე, რომ ის დიდი ხანია საქართველოშია. ამიტომაც ვარ აქ და მე და თინამ ორი შესანიშნავი კლიპი გადავიღეთ.

- საქართველოში პირველად იღებთ. მოედანზე თქვენს ირგვლივ ქართველები არიან. ადვილია მათთან მუშაობა?

— ამისთანა პროფესიონალი, შეკრული და ორგანიზებული გუნდი, როგორც საქართველოშია, დიდი ხანია არ მინახავს. რომ მცოდნოდა, რომ აქ ასე მუშაობენ, ბევრად ადრე ჩამოვიდოდი. ნახევარი ჯგუფი არიან ან ჩამოსახლებული, ან დაბრუნებული ადამიანები. ახლა ვხვდები, რატომაც.

© Sputnik / Denis Aslanov
ლოლიტა მილიავსკაია საქართველოში ახალ კლიპს იღებს Sputnik-ის გადამღები ჯგუფი დაესწრო ლოლიტა მილიავსკაიას სიმღერის Судьба კლიპის გადაღებებს

- საქართველოში ჩამოსული ადამიანებიდან ბევრი ამბობს, რომ შეუძლებელია არ შეგიყვარდეს ის. თქვენც იგრძენით ეს?

— სახლში დაბრუნება საერთოდ არ მიყვარს. როდესაც ვბრუნდები, შემიძლია სამი დღე სახლიდან არ გავიდე და უბრალოდ სახლის ხალათით ვიჯდე. მთრგუნავს ნაცრისფერი, ამინდი, სიახლეები, ჰაერი. ჩემი ხსნა ბულგარეთია. იცით, იქ ძალიან სუფთა, ლამაზი, მშვენიერი გარემოა. მეზობლები მეგობრობენ, დღესასწაულებს ერთად აღნიშნავენ, რაღაც გემრიელობები მოაქვთ. იქ ცხოვრობს ჩვენი საყვარელი ძაღლი, რომელიც ქუჩაში  ვიპოვეთ. მოკლედ, ის ჩემი ხსნაა. ამას რატომ ვყვები — გადაღებების მეორე დღეს გადაასღებად უფლისციხეში წავედით. როდესაც იქ შევედით, ვთქვი: „ეს ხომ ჩემი ბულგარეთია!“. ქუჩები, სახლები, ადამიანები, ბუნება, ყველაფერმა ბულგარეთი გამახსენა. მაგრამ საქართველოს არავითარ შემთხვევაში არ ვადარებ ბულგარეთთან. საქართველოს ისეთი ისტორია აქვს, ის ინტელიგენტურია, ყველაფრით სავსეა, აქ ძალიან ბევრი გენიალური რამ არის. ჩემი აზრით, საქართველომ შეინარჩუნა თავი როგორც გენიალურობის წყარომ. ამიტომ საქართველო უკვე მიმაჩნია მშობლიურ და საყვარელ ადგილად. მართლა შემიყვარდა თქვენი ქვეყანა.

- მუდმივი გასტროლები, გადაღებები, კონცერტები. თქვენი ოჯახი როგორ იტანს განშორებას? ქალიშვილი და მეუღლე მოგზაურობენ თქვენთან ერთად?

— რა თქმა უნდა, ძალიან ვენატრები, მაგრამ მათ ესმით, რომ ეს ჩემი სამუშაოა. რაც შეეხება მოგზაურობას, ჩემი ქალიშვილი მე-11 კლასს ამთავრებს და მისთვის ახლა მთავარი სწავლაა. თავისუფალ დროსაც სწავლას უთმობს. ისედაც, ბავშვს რატომ უნდა დავუნგრიო ფსიქიკა. გასტროლები — ეს არის საშინელი განრიგი, არანორმალური რიტმი და რეჟიმი. ბავშვს ეს არ სჭირდება. ჩვენ დავდივართ თეატრებში, მუზეუმებში, მას ძალიან უყვარს ცირკი. მეუღლე დამყვება, მაგრამ ძალიან იშვიათად. მაგალითად, თუ გასტროლები ამერიკაში მაქვს, და ვიცით, რომ დათვალიერებისთვის და სასეირნოდ დრო დაგვრჩება, მაშინ ისიც ჩემთან ერთად მოდის. ისიც ძალიან დაკავებულია. იმისათვის, რომ ჩემთან ერთად წამოვიდეს, მან უნდა სამსახურიდან დაეთხოვოს, აიღოს შვებულება. სახლში დაბრუნებისთანავე ცხადდება სამსახურში. ის ძალიან კარგი მწვრთნელია, სამსახურში დილის რვა საათზე მიდის და საღამოს 11 საათზე ბრუნდება.

Лолита Милявская во время съемок клипа на песню Раневская
© Sputnik / Denis Aslanov
ლოლიტა მილიავსკაია სიმღერის Судьба კლიპის გადაღებების დროს

- რამდენადაც მე ვიცი, თქვენ ასტროლოგიის გჯერათ. ეს მოდაა თუ სერიოზული გატაცებაა?

— მე ძალიან გამიმართლა. გავიცანი ერთი მშვენიერი ქალბატონი. მანამდე ასტროლოგია ჩვეულებრივი თაღლითობა მეგონა. ხომ არსებობენ ადამიანები, რომლებიც თითქოსდა ექსტრასენსები არიან. ზოგს თავში უქრის და იმიტომ მიმართავენ მათ, ზოგი კი სასოწარკვეთილია. ბევრს არ ესმის, რომ ეს ჩვეულებრივი გაბითურებაა. აქ კი, ასტროლოგიას ვგულისხმობ, საქმე სულ სხვაგვარადაა. ასტროლოგია — ზუსტი მეცნიერებაა. არავინ იცის, ის რამდენ ათასწლეულს ითვლის. ასტროლოგი, რომელიც ჩემთან მუშაობდა, არანაირ რუკებს არ მიხატავდა. მან უბრალოდ მითხრა: „დაბადების მომენტისთვის არსებობს ერთ-ერთი პლანეტა, რომელიც პასუხისმგებელია იმაზე, რომ შენ ამ და იმ ურთიერთობებში თავს კომფორტულად ვერ იგრძნობ. თუ ამაზე მუშაობას არ დაიწყებ, არაფერი შეიცველბა“. მას წელიწადში ერთხელ ვხვდები. ზოგჯერ უფრო ხშირად, მაგრამ მხოლოდ ყავის დასალევად და საჭორაოდ. ზოგჯერ ვეკითხები: „აბა წელს რა იქნება?“ ის პასუხობს: „წელს ოსკარის გარეშე“. ერთხელ მითხრა, რომ ოსკარი ჩვენიაო. არ დავიჯერე, ვიფიქრე, რომელი ოსკარი შოუბიზნესში? თურმე, სულ ტყუილად. სწორედ იმ წელს მივიღე „ტეფის“ სტატუეტი სატელევიზიო შოუსთვის „უკომპლექსოდ“. რუსეთისთვის ეს ნამდვილი ოსკარია. ჩემთვის ეს დიდი ჯოლდოა, შეიძლება ითქვას მთავარი.

Лолита Милявская во время съемок клипа на песню Раневская
© Sputnik / Denis Aslanov
ლოლიტა მილიავსკაია სიმღერის Судьба კლიპის გადაღებების დროს

- ვიცი, რომ თავისუფალ დროს გიყვართ საჭმლის მომზადება. ზამთრისთვის კონსერვებსაც კი აკეთებთ. რომელია თქვენი საყვარელი კერძი? ქართულ კერძებს თუ ამზადებთ?

— უფლისციხეში ვიყიდე ქართული რეცეპტების წიგნი. ვიფიქრე, შევისწავლი და დავიწყებ მომზადებას. მაგრამ გადაღებების დროს ჩემმა გრიმიორებმა, გოგოებმა დაათვალიერეს ეს წიგნი და პირველივე რეცეპტიდან აღშფოთება გამოხატეს: „ეს რა არის? ეს ასე არ კეთდება!“ ეს ძალიან გამიკვირდა. წიგნი ქართულია, ავტორიც ქართველია. მაგრამ გოგოები ირწმუნებოდნენ, რომ რეცეპტები არასწორია. წიგნში ვახტანგ კიკაბიძის შესავალი სიტყვაც არის. ვიფიქრე, იქნებ მან დაწერა თავისი საყვარელი რეცეპტები და როგორც მამაკაცმა, რაღაცა შეცვალა. მაგრამ ჩემი გრიმიორები მაინც თავისას იმეორებდნენ. მივხვდი, რომ ამ წიგნიდან მექნებოდა მხოლოდ ორი რეცეპტი — ლობიო და წიწილა-ტაბაკა. დანარჩენი არ დაემთხვა. მაგრამ სახლში ქართული რეცეპტით ნიგვზიან ბადრიჯანს აუცილებლად მოვამზადებ.

- აქ რომელი კერძები მოგეწონათ ყველაზე მეტად?

— იცით, აქ ყოველ დღე რას ვჭამ საუზმეზე? სუპ ხარჩოს! დილის ცხრა საათზე, ყოველ დღე — სუპ ხარჩო. ის ღამეც კი მესიზმრება. მერე მომატებული მჟავიანობისთვის წამალს ვსვამ, მაგრამ ეს არაფერია. მერე კი ისევ სუპ ხარჩოს ვჭამ.

Лолита Милявская во время съемок клипа на песню Раневская
© Sputnik / Denis Aslanov
ლოლიტა მილიავსკაია სიმღერის Судьба კლიპის გადაღებების დროს

- რას ნიშნავს თქვენთვის აბსოლუტური ბედნიერება და დამშვიდება? და თუ გჩვევიათ დამშვიდება?

— თავს ბედნიერად ძალიან ხშირად ვგრძნობ. მხოლოდ იმიტომ, რომ ბედნიერების შეგრძნების დაფიქსირება დავიწყე. მანამდე ნახევარი ცხოვრება წუწუნში გავატარე. ხან ეს არ მომწონდა, ხან ის არ მომწონდა. მერე კი მივხვდი, რომ ასეთი გაელვებები აღარ იქნებოდა. ზოგჯერ ჰაერს მოაქვს რაღაც სუნი, და გახსენდება, რომ ასეთი სუნი იყო, როდესაც შვიდი წლის იყავი. სხვა არომატი კი სიყვარულს გამახსენებს, რომელმაც თავდავიწყებამდე მიმიყვანა. იმ დროიდან თავს ბედნიერად ვგრძნობ.

რაც შეეხება დამშვიდობებას, მე მაღიიზიანებს ყველაფერი, რაც არაპროფესიონალურად კეთდება. აქ დამშვიდობება ქრება. ამიტომ ვებღაუჭები ბულგარეთს. იქ მშვიდად ვარ. იქ შემიძლია თავს უფლება მივცე საღამოს ცხრა საათზე დავიძინო. ასე მაგალითად, ამ ახალ წელს მე და ჩემმა ქმარმა თითო ბოკალი კომპოტი დავლიეთ, რომელიც მე მოვხარშე, საჭმელი შევჭამეთ და საღამოს ცხრა საათზე დავიძინეთ. ეს ჩემი ხსნაა. თავს დამშვიდებულად სწორედ იქ ვგრძნობ. ამით მომხიბლა საქართველომაც. ამ ქვეყანას ისეთი ენერგეტიკა, ისეთი სული აქვს. გავიმეორებ, არავითარ შემთხვევაში არ ვადარებ. ეს არის ორი აბსოლუტურად განსხვავებული ქვეყანა. უბრალოდ ჩემ შინაგან შეგრძნებებზე ვსაუბრობ.

Лолита Милявская во время съемок клипа на песню Судьба
© Sputnik / Denis Aslanov
ლოლიტა მილიავსკაია სიმღერის Судьба კლიპის გადაღებების დროს

- გეგმავთ საქართველოში დაბრუნებას?

— ამ ქვეყანასთან რომანი დიდი ხნით მექნება. მუზეუმების დათვალიერება ვერ მოვასწარი. ძალიან მიყვარს ისტორია, ვგიჟდები მუზეუმების დათვალიერებაზე. მით უმეტეს ვიცი, რომ აქ არსებობს მუზეუმი უძველესი სამკაულებით. სამწუხაროდ, მჭიდრო განრიგის გამო ვერ დავათვალიერე ყველაფერი, თუმცა ძალიან მინდა. გაზაფხულზე კი საქართველოს ტერიტორიაზე ახალი გადაღებები გველოდება…

ესაუბრა ქსენია არაბული
878
თემები:
უცხოელის თვალით დანახული საქართველო (79)
გამოფენაზე

„გელბახას“ მისტიკური სამყარო, ანუ „ადამიანი, ვისაც შეიძლება ენდო”

928
(განახლებულია 19:16 04.08.2020)
ხატვა ბავშვობიდან იყო მისი სტიქია. თავიდან ტუშით ხატავდა და, შესაბამისად, მისი ნახატები შავ-თეთრი იყო, ფერები მოგვიანებით გაჩნდა.

დათო გელბახიანმა სკოლის მერე არქიტექტურის ფაკულტეტზე ჩააბარა და 15 წელი აღარ დაუხატავს. ხატვას ბოლო ათი წელია დაუბრუნდა. მისი ნახატების პირველი გამოფენა საკმაოდ წარმატებით 2018 წელს „აბრეშუმის გალერეაში“ გაიმართა, მასზე საკმაოდ ბევრი ადამიანი მოვიდა. ერთი წლის მერე კი ეროვნულ ბიბლიოთეკაში მისმა ნახატებმა მეორედ შეკრიბა ხელოვნების მოყვარულები. მის ნამუშევრებზე პანდემიის დროსაც დიდი მოთხოვნილება იყო და არა მარტო საქართველოში...

დათო გელბახიანი
დათო გელბახიანი

- ბატონო დათო, თქვენს ნამუშევრებში გადაჯაჭვულია მისტიკა და რეალობა, რამდენად გჯერათ სასწაულის?

- სასწაულების მჯერა, როგორ არ უნდა მჯეროდეს... მარტივ მაგალითს გეტყვით, განა ცხრა თვის ლოდინის მერე ადამიანის დაბადება სასწაული არ არის? არა მგონია, უცნაური ადამიანი ვიყო, ჩვეულებრივი ვარ. თუმცა მისტიკა მიტაცებს და ვცდილობ, რომ ყველაფერ უცნაურს ლოგიკური ახსნა მოვუძებნო ხოლმე. თავიდან შავ-თეთრი ნახატები მქონდა და ტუშით ვხატავდი. შემდეგ ფერები და საღებავები შემოვიდა ჩემს ცხოვრებაში.

დათო გელბახიანი
დათო გელბახიანი

- ხატვის დროს შთაგონებას მიჰყვებით თუ რაციოს კარნახით ხატავთ?

- ჩემს ნახატებში ალბათ შთაგონებას უფრო მივყვები, სიუჟეტს არასდროს ვგეგმავ წინასწარ. როცა ხატვას ვიწყებ, არც კი ვიცი ბოლოს რა გამოვა, დაახლოებით წარმომიდგენია, მაგრამ ზუსტად არ ვიცი. და, რაც მთავარია, წინასწარ ვერასდროს დავგეგმავ. მოდი, ხვალ ავდგები და დავხატავ – ასე არაა ჩემთან...

დათო გელბახიანის შემოქმედება
დათო გელბახიანის შემოქმედება

- ბოლო ათი წელია, რაც ხატვას დაუბრუნდით...

- დიახ, სკოლის მერე 15 წელი არ გავკარებივარ ფანქარს და საღებავებს. ბოლო ათი წელია რაც დავუბრუნდი. მიზეზი მარტივია: უბრალოდ მომინდა ხატვა...

- ნანობთ იმ წლებს?

- არა, ზოგადად არასოდეს არაფერს ვნანობ, რადგან, ჩემი აზრით, ყველაფერი, რაც ხდება, კანონზომიერია.

დათო გელბახიანი
დათო გელბახიანი

- ამხელა პაუზა იმიტომ ხომ არ დაგჭირდათ, რომ ახალი შეგრძნებებით და ემოციით შევსებულიყავით?

- მართლაც ასე იყო. ის წლები, როცა არაფერი მიხატავს, ფანტაზია და თემები დამიგროვდა და ეს ალბათ კარგად აისახა ჩემს ნახატებზე. უფრო ზუსტად კი ეს იყო მონატრება და სურვილი – რაღაც ახალი და განსხვავებული შემექმნა.

დათო გელბახიანის შემოქმედება
დათო გელბახიანის შემოქმედება

- თქვენმა პირველმა პერსონალურმა გამოფენამ ხმაურით ჩაიარა...

- ჩემი პირველი პერსონალური გამოფენა 2018 წელს „აბრეშუმის გალერეაში“ გაიმართა, მასზე საკმაოდ ბევრი ადამიანი მესტუმრა, ტელევიზიებმაც გააშუქეს. პირველი გამოფენის შემდეგ მომეცა სტიმული, რადგან დავინახე ადამიანები, რომლებსაც სახეზე ეტყობოდათ, რომ სიამოვნებდათ ჩემი ნახატების ყურება და მოვალეობის მოხდის მიზნით არ იყვნენ მოსული. მივხვდი, რომ არ უნდა გავჩერდე და უნდა გავაკეთო ის, რაც ყველაზე კარგად გამომდის და ყველას მოსწონს. ამას მოჰყვა 2019 წლის პერსონალური გამოფენა ეროვნულ ბიბლიოთეკაში, რომელმაც ასევე ფურორით ჩაიარა და კარგად მახსენდება. ამის შემდეგ უკვე „კორონა ჩაერია” და დაგეგმილი გამოფენა ჩაიშალა.

დათო გელბახიანის შემოქმედება
დათო გელბახიანის შემოქმედება

- ნახატების გაყიდვის პრობლემა არ გაქვთ?

- მიხარია, რომ ჩემი ნახატები დიდი რაოდენობით იყიდება – არა მარტო საქართველოში, ამერიკაში, რუსეთში, გერმანიაში, უკრაინასა და ჰოლანდიაში. ამაში პანდემიასაც არ შეუშლია ხელი.

დათო გელბახიანის შემოქმედება
დათო გელბახიანის შემოქმედება

- თუ გაქვთ ნახატი, რომელმაც „დაგამახსოვრათ“ თავი?

- ასეთი გამორჩეული ნახატი არ მაქვს, ყველა ერთნაირად მიყვარს. უბრალოდ იყო ასეთი შემთხვევა: ერთხელ შავი საფერავი ღვინის წვეთი დაეცა ფურცელზე და ასე შეიქმნა პირველი ნახატი „საფერავითა“ და ტუშით. ამ ნახატს „ბაბუა“ ჰქვია. ესაა მონატრებული ბაბუა, რომელიც შვილების და შვილიშვილების მოლოდინში ხის ძირას ღობესთან ზის ჩაფიქრებული. ერთი ნახატის წინაპირობა კი ჩემი მონატრება გახდა. ერთ დღეს ვიგრძენი, რომ ჩემი გოგო, მარიამი, რომელიც უცხოეთში სწავლობს, ძალიან მომენატრა და დავხატე...

დათო გელბახიანის შემოქმედება
დათო გელბახიანის შემოქმედება

- თქვენი შემოქმედების შეფასების დროს ყველაზე მეტად რა გსიამოვნებთ?

- ყველაზე მეტად რაც მსიამოვნებს, ისაა, რომ ყველა იძახის “გელბახას” ნამუშევრების ამოცნობა ათასი ნახატიდან შეიძლებაო, ანუ შენი ხელწერა გაქვსო. მახარებს ის, რომ არავის ვბაძავ და განსხვავებული ვარ.  

დათო გელბახიანის შემოქმედება
დათო გელბახიანის შემოქმედება

- თქვენი აზრით, ვინ არის „გელბახა“, როგორი ადამიანია?

- “გელბახა” – ეს მეტსახელი ბავშვობიდან შემრჩა და მივეჩვიე. გელბახა ვინ არის? ამაზე მე რა ნამუსით უნდა ვილაპარაკო? - არ ვიცი და ვერც გეტყვით. მხოლოდ ერთს ვიტყვი: გელბახა არის ადამიანი, ვისაც შეიძლება, რომ ენდო...

დათო გელბახიანის შემოქმედება
დათო გელბახიანის შემოქმედება

- რაზე ოცნებობთ და რას ელოდებით ცხოვრებისგან?

- ვოცნებობ იმაზე, რომ ქალაქგარეთ სიწყნარესა და სიმწვანეში ოჯახთან ერთად ვიცხოვრო. პირველ რიგში გარშემო ჩემი ახლობლები და მეგობრები კარგად უნდა იყვნენ, რომ ხალისი და განწყობა მქონდეს იმისთვის, რომ რაღაც კარგი შევქმნა. არაა აუცილებელი ფეშენებელური ვილა იყოს, უბრალო პატარა სახლიც დამაკმაყოფილებს. მთავარია, მქონდეს საკუთარი სივრცე, სადაც ვიმუშავებ და რაღაც კარგს შევქმნი, ესაა და ეს...

 

928
კოღო

ტკიპის, კოღოს, მოსკიტის ნაკბენი: ის, რაც უნდა ვიცოდეთ მწერების მიერ გადამტან დაავადებებზე

525
(განახლებულია 19:19 14.07.2020)
ზაფხული ის დროა, როცა განსაკუთრებით დიდ დროს ვატარებთ ბუნებაში, სუფთა ჰაერზე. ამ დროს ხშირია მწერების ნაკბენით გამოწვეული უსიამოვნებები, რაც, შესაძლოა, პარაზიტული დაავადებების გამომწვევი მიზეზიც გახდეს.

რომელი პარაზიტული დაავადებებია გავრცელებული ზაფხულის სეზონზე, რა სიმპტომები აქვს და როგორ ამოვიცნოთ ისინი, ამის შესახებ საზოგადოებრივი მაუწყებლის „პირველი არხის“ ეთერში პარაზიტოლოგმა, მედიცინის დოქტორმა ირმა კოკაიამ ისაუბრა.

- ზაფხულის სეზონთან ყველაზე ხშირად რომელი პარაზიტული დაავადებები ასოცირდება?

- ზაფხულის სეზონთან ასოცირებული პირველი ჯგუფის, ყველაზე ხშირი დაავადებებია მწერების დაკბენით გამოწვეული დაავადებები. ასევე ზაფხულის პერიოდში სტატისტიკურად ყველაზე ხშირად გვხვდება ნაწლავური პარაზიტული დაავადება. მწერების კბენასთან ასოცირებული პარაზიტული დაავადებების მატება დამოკიდებულია ორ ფაქტორზე. პირველი ის არის, რომ ზაფხულის ცხელ პერიოდთან ერთად მწერების აქტივობა არის მომატებული და ეს გამომდინარეობს მათი ბიოლოგიიდან. მეორე ფაქტორი, რის გამოც იმატებს ეს დაავადებები და ამ დაავადებებთან დაკავშირებული საფრთხე, არის ის, რომ უშუალოდ ადამიანების ურთიერთობა ბუნებასთან არის გაცილებით აქტიური. ეს არის სეზონი, როცა ადამიანები ყველაზე ხშირად გადიან ქალაქგარეთ პიკნიკებზე, აგარაკებზე, სოფლებში და ა.შ. შესაბამისად, ეს საფრთხე არის მომატებული.

- იქნებ ეს დაავადებები განვიხილოთ...

- მწერების კბენით გამოწვეული დაავადებებიც ორ ნაწილად შეიძლება გაიყოს. ეს არის უშუალოდ დაკბენასთან ასოცირებული ალერგიული რეაქციები და მეორე – უფრო დიდი საფრთხე, ის დაავადებები, რომელიც გადააქვთ მწერებს. ბოლო პერიოდში ინტენსიურად არის მომატებული ბორელიოზი, იგივე ლაიმის დაავადება, რომელიც ტკიპებს გადააქვთ. ეს დაავადება ძალიან აქტუალურია საქართველოში, განსაკუთრებით, ბოლო წლების განმავლობაში. თუმცა ამ მხრივ დიაგნოსტიკაც უფრო გაუმჯობესებულია. მეორე დაავადება, რომელიც ინტენსიური ხდება ამ პერიოდში, არის ლეიშმანიოზი, რომელიც ასევე მწერებს გადააქვთ. ეს არის პატარა ზომის მოსკიტები, ფლებუტომუსები. გარდა ამისა, კიდევ არის რამდენიმე დაავადება, მაგალითად, კოღოებთან ასოცირებული მალარია, რომელიც ასევე ზაფხულის დაავადებაა. თუმცა, საბედნიეროდ, მალარიის ენდემური შემთხვევები ბოლო რამდენიმე წელია საქართველოში არ გვაქვს დაფიქსირებული. შემთხვევები, რაც გვაქვს, ძირითადად არის სხვა ქვეყნებიდან იმპორტირებული. კიდევ ერთი დაავადება გახლავთ ყირიმ-კონგოს ჰემორაგიული ცხელება, რომელიც ცალსახად ტკიპას უკავშირდება.

- რა ჩივილებს უნდა მიაქციოს ადამიანმა ყურადღება, რა სიმპტომები აქვს ამ დაავადებებს?

- ვინაიდან ყველაზე გავრცელებულია, დავიწყოთ ლაიმის დაავადებით. თავიდანვე მინდა აღვნიშნო, რომ ტკიპის კბენა არ არის საკმარისი დაავადების გამოწვევისთვის. თვითონ ტკიპა უნდა იყოს ინფიცირებული, რომ გამოიწვიოს დაავადება. აქედან გამომდინარე, ყველა ტკიპის კბენის შემდეგ, რა თქმა უნდა, დაავადება არ ვითარდება. 100 კბენიდან მხოლოდ ერთ შემთხვევაში შეიძლება განვითარდეს დაავადება. კბენის დროს ამის მიხვედრა წარმოუდგენელია. ამას სჭირდება სპეციალური ანალიზი, რომელიც საკმაოდ რთულად კეთდება და არ არის მოწოდებული, რომ ყველა შემთხვევაში გაკეთდეს. იმ შემთხვევაში, თუ ეს ტკიპა აღმოჩნდა ინფიცირებული და დაავადების გადამტანი, კლინიკური სიმპტომები, რომელიც დამახასასიათებელია ლაიმის დაავადებისთვის, არის საკმაოდ მრავალფეროვანი და გამოვლინდება გარკვეული დროის განმავლობაში. ინკუბაციური პერიოდი, როგორც წესი, არის სამი დღიდან 28 დღემდე. ანუ ეს არის ის პერიოდი, როცა შეიძლება გამოვლინდეს კლინიკური ნიშნები. ამას იმიტომ ვამბობ ხაზგასმით, რომ ძალიან ხშირად ტკიპის კბენის შემდეგ მეორე და მესამე დღეს მოდიან ხოლმე პაციენტები და ითხოვენ ანალიზის ჩატარებას, რომელიც ამ შემთხვევაში არ არის ინფორმატიული. ამისთვის საჭიროა დრო, რადგან ანალიზით ხდება ანტისხეულების განსაზღვრა. ეს შეიძლება იყოს, მაგალითად, 28 დღე, შესაძლოა იყოს ხუთი დღე. დაჟინებით ითხოვენ ხოლმე ანალიზს. ზოგჯერ მოდიან, ტკიპა ისევ აზით კანზე. ამ დროს პირველ რიგში ვაცილებთ ტკიპს. გულდასმით ვუხსნით, რომ ამ შემთხვევაში ტესტის პასუხი შესაძლოა იყოს ნეგატიური, რომელიც არ გამორიცხავს, რომ ეს დაავადება გაქვს, რადგან წინ გაქვს მთელი ინკუბაციური პერიოდი. უარყოფითი პასუხის შემთხვევაშიც ცოტა მოგვიანებით ვიბარეთ, რომ თავიდან გადავამოწმოთ ეს ადამიანი. რაც შეეხება სიმპტომებს, ყველაზე ხშირად ვლინდება გამონაყარი ნაკბენის ირგვლივ, რომელიც არის უხშირესად გამოხატული. თუმცა, შესაძლოა, გამონაყარი სხეულის სხვა ნაწილშიც გამოვლინდეს. ეს არის წითელი რკალისებრი შემოხაზვა, რომლის დიამეტრი საკმაოდ დიდია, შესაძლოა ხუთი სანტიმეტრი და მეტიც იყოს. გარდა ამისა, დაავადების სიმპტომებია ცხელება, სახსრების ტკივილი, კუნთის ტკივილი, ზოგადი სისუსტე, ოფლიანობა, ხშირად გამოვლინდება თავის ტკივილი. არის კიდევ ისეთი ნიშნები, რომელიც უკვე სერიოზულ საფრთხეზე მიუთითებს. ეს არის გართულებები გულის და ნერვული სისტემის მხრივ. ეს ორი დაზიანება, ნერვული და გულის მხრივ, ცოტა უფრო მოგვიანებით ფაზებში ვითარდება, სადღაც ერთი თვის მერე.

რაც შეეხება ლეიშმანიოზს, მისი საინკუბაციო პერიოდი არის 4-6 თვე. სწორედ ამ პერიოდის შემდეგ ხდება ხოლმე კლინიკური სურათის მანიფესტირება. ეს ძალიან მძიმე დაავადებაა და ყველა მკურნალობის გარეშე შემთხვევები და, მათ შორის, დაგვიანებული შემთხვევები ხშირ შემთხვევაში ცუდი გამოსავლით მთავრდება.

- წლევანდელ სეზონზე საქართველოს რომელ რეგიონში გამოვლინდა პარაზიტული დაავადებების ყველაზე მეტი შემთხვევა?

- წელევანდელ სეზონზე ინტენსიურია კახეთის შემთხვევები. საკმაოდ ბევრი შემთხვევა შემოვიდა კახეთიდან, შედარებით ნაკლებია თბილისის შემთხვევები.

- ძირითადად რა სიმპტომებით შემოდიან პაციენტები?

- შემოდიან ცხელებით, ღვიძლის და ელენთის გადიდებით, ანემიით, ჰემოგლობინის ნაკლებობით და წონის კარგვით. ეს არის ძირითადი სიმპტომები, თუმცა შესაძლოა დაფიქსირდეს დაბალი ლეიკოციტი, დაბალი თრომბოციტი. ეს ის დაავადებაა, რომელიც არ გამოგვეპარება, რადგან მკვეთრად არის სიმპტომები გამოხატული და ყველა ნიშნის არსებობის შემთხვევაში, რაც დროზე მიმართავთ ექიმს, გამოსავალი უფრო მარტივად მოიძებნება. დაავადების დროს თვითმკურნალობა დაუშვებელია, დაუყონებლივ უნდა მიმართოთ ექიმს.

 

525
თემები:
ჯანმრთელობა და სილამაზე
არაქისი

არაქისი, იგივე მიწის თხილი სასარგებლო და მავნე თვისებები

0
(განახლებულია 15:10 09.08.2020)
არაქისს უამრავი სასარგებლო თვისება გააჩნია – კარგია გულის მუშაობისთვის, ენერგიულობისთვის და ა.შ. თუმცა მისი დიდი რაოდენობით მიღება არ შეიძლება.

არაქისი  – მიწის თხილი (Arachis) — პარკოსანთა ოჯახის ბალახოვანი მცენარის გვარია. ცნობილია მისი 15 სახეობა. კულტურული სახეობებიდან გავრცელებულია Arachis hypogaea. არაქისი გავრცელებულია ამერიკაში, ევროპაში, საქართველოში, შუა აზიაში, უკრაინაში, ჩინეთში, ინდოეთში. მის სამშობლოდ სამხრეთ ამერიკას მიიჩნევენ.

მკურნალობა ხალხური მეთოდებით. კაკლის უღელი>>

მიწის თხილი დიდი რაოდენობით შეიცავს ცხიმებსა და ცილებს, მისი კალორიულობაა 100 გრამზე 552 კკალორია, ხოლო არაქისის ზეთის – 884 კკალორიაა. მისი დიდი რაოდენობით მიღება სიმსუქნის მიზეზი შეიძლება გახდეს.

100 გრამი პროდუქტის კვებითი ღირებულებაა:

  • ცილები – 26,4 გ
  • ცხიმები – 45,3 გ
  • ნახშირწყლები – 9,8 გ
  • ნაცარი – 2,7 გ
  • წყალი – 8 გ

კალორიულობა 100 გრამ პროდუქტზე – 500–800 კკალორიაა.

მიწის თხილი შეიცავს უნიკალურ ამინომჟავებს, ვიტამინებს – A, D, E, В1, В2, РР, Е, ბიოტინს, ფოლიუმის მჟავას, მცენარეულ ზეთებსა და სხვა მიკროელემენტებს. ის შეიცავს 35%-ზე მეტ ცილებსა და დაახლოებით 50% ცხიმებს, ქოლესტერინი მასში საერთოდ არ არის.

არაქისის სასარგებლო თვისებები:

• არაქისი სასარგებლოა გულისთვის. მასში შემავალ ცხიმებს გულის ჯანმრთელობის შენარჩუნების უნარი აქვს. ასევე, მის შემცველობაში არსებული ოლეინმჟავა ამცირებს ცუდ ქოლესტერინს და ზრდის კარგ ქოლესტერინს.

• არაქისი ზრდის ენერგიას. მიწის თხილი ფართოდაა ცნობილი, როგორც მცენარე, რომელიც ადამიანის ენერგიულობას ზრდის. ეს მასში არსებული უზარმაზარი რაოდენობის ვიტამინების, მინერალების, ანტიოქსიდანტებისა და საკვები ნივთიერებების წყალობითაა.

• არაქისის ზომიერი მიღება ხელს არ უშლის წონაში დაკლებას.

ბოლოკი – სასარგებლო, დიეტური და შემადგენლობით მდიდარი სამკურნალო მცენარე>>

• არაქისი ებრძვის კიბოს უჯრედებს. ის შეიცავს პოლიფენოლის ანტიოქსიდანს, რომელიც სასარგებლოა კუჭის კიბოს შესაჩერებლად. 

• არაქისის რეგულარულად მიღება ხელს უშლის ნაღვლის ბუშტში ქვების წარმოქმნასა და არსებულის შემცირებას. კვლევებით დადასტურდა, რომ დღეში სულ 30 გრამი მიწის თხილი ქვების წარმოქმნას 25%-ით ამცირებს.

• არაქისი აუმჯობესებს მეხსიერებას. არაქისს ტვინის საკვებს უწოდებენ, რადგან მასში შედის ვიტამინი B3, რომელიც ტვინს მუშაობაში ეხმარება და ასევე კარგია მეხსიერების გაუმჯობესებისთვის.

• არაქისი ებრძვის დეპრესიას. სეროტონინი ქიმიური ნივთიერებაა, რომელიც მნიშვნელოვანია ტვინისთვის და რომელსაც განწყობის რეგულირებაში დახმარება შეუძლია. მიწის თხილში არსებული ტრიპტოფანის ამინომჟავა სეროტონინის გამომუშავებას ეხმარება.

• არაქისი ეხმარება ორსულობის შენარჩუნებაში და იცავს ნაყოფს. ორსულობის დროს მიწის თხილის მიღებას შეუძლია შეამციროს ზოგიერთი ალერგიული დაავადების (მაგალითად, ასთმა) შანსი ბავშვებში.

უკაპრიზო და ძალზე სასარგებლო – წიწმატი>>

• არაქისი ხელს უშლის ალცჰეიმერის დაავადების განვითარებას. მრავალი კვლევის შედეგად მეცნიერებმა დაასკვნეს, რომ ისეთი პროდუქტების გამოყენებას, რომლებიც ნიაცინის დიდ რაოდენობას შეიცავს, როგორიცაა არაქისი, შეუძლია ალცჰაიმერის დაავადების გავითარების ალბათობის, სულ ცოტა, 70%–მდე შემცირება.

• არაქისი კანს ჯანსაღ ელფერს აძლევს, დევნის ორგანიზმიდან ზედმეტ ტოქსინებს, რაც კანს ბევრად უფრო რბილსა და ლამაზს ხდის.

• არაქისი ებრძვის ნაოჭების გაჩენასა და დაბერებას – ის შეიცავს დიდი რაოდენობით С–ვიტამინს, რაც მნიშვნელოვანია კოლაგენის წარმოებისთვის.

არაქისის მიღება არ შეიძლება:

როდესაც ადამიანს აქვს ალერგია მასზე, განსაკუთრებით ალერგია ვითარდება არაქისის ზეთზე.

მისი მიღება არ არის რეკომენდებული პოდაგრის, ართროზისა და ართრიტის დროს.

ჭარბი რაოდენობით მიღება იწვევს წონაში მატებას.

უაღრესად სასარგებლო კენკრა, რომელიც კოსმონავტებისა და მფრინავების მენიუში შედის>>

მიწის თხილის არასწორად შენახვისას (ნესტიან ადგილებში) მას უჩნდება სოკო, რომელიც ტოქსინებს გამოყოფს, რაც, თავის მხრივ, ორგანიზმში მოხვედრისას დასუსტებულ ორგანოებს აზიანებს. ამიტომ არაქისის შეძენის დროს ყურადღებით იყავით.

0
თემები:
სასარგებლო რჩევები