ირაკლი ჭაღიაშვილი

ირაკლი ჭაღიაშვილის თავბრუდამხვევი ვოიაჟი და უჩვეულო ისტორიები

398
(განახლებულია 18:19 15.12.2017)

ჩვენი რუბრიკის დღევანდელი სტუმარი ირაკლი ჭაღიაშვილია. იგი იუსტიციის სახლში IT-manager-ის პოზიციაზე მუშაობს. დატვირთული გრაფიკის მიუხედავად მაინც ახერხებს წელიწადში რამდენჯერმე იმოგზაუროს უცხო ქვეყნებში.

პირველად 13 წლის ასაკში გადაკვეთა ქვეყნის საზღვარი და მას მერე არ გაჩერებულა. უკვე 25 ქვეყანაშია ნამყოფი, თუმცა ამბობს, რომ ეს მცირე ნაწილია, წინ უამრავი თავგადასავალი და საუცხოო ქვეყანა ელოდება.

ირაკლი ჭაღიაშვილი
ირაკლი ჭაღიაშვილი: მოგზაურობას ჩემს ცხოვრებაში მნიშვნელოვანი როლი აკისრია

— მოგზაურობის გარდა ჩემი ინტერესის სფერო და ჰობი არის კოლექციონერობა. ვაგროვებ დროშებს, საკოლექციო მოდელებს და ყველა ტიპის ტრანსპორტის სახეობას. თუმცა, მოგზაურობას პირველი თუ არა, მეორე ადგილი ნამდვილად უკავია ჩემს ცხოვრებაში. ეს ჩემთვის სუნთქვასავითაა და უმნიშვნელოვანესი როლი აქვს. ვცდილობ, წელიწადში 9-10-ჯერ მაინც გადავკვეთო ქვეყნის საზღვარი.

- პირველი მოგზაურობა გაიხსენეთ.

— პირველად 13 წლისა წავედი უცხოეთში სამოგზაუროდ, თანაც, საკუთარ დაბადების დღეს. ეს ქვეყანა იყო თურქეთი, ქალაქი იზმირი. ამ მოგზაურობამ განსაკუთრებული შთაბეჭდილება მოახდინა ჩემზე. შემიძლია ვთქვა, რომ მას მერე, ფაქტობრივად, არ შევხვედრივარ დაბადების დღეს სახლში.

- ყველაზე მეტად, რა დაგამახსოვრდათ ამ მოგზაურობიდან?

— იმ პერიოდში აქ შუქი და წყალი გრაფიკით გვქონდა. გამაოცა იმან, რომ აღმოვაჩინე ქალაქი, სადაც დამხვდა უცხო გარემო და მოწესრიგებული ინფრასტრუქტურა, ტრანსპორტი. ქუჩების სისუფთავემ ჩემზე დიდი შთაბეჭდილება მოახდინა. სტუმრად სადაც ვიყავი, იქ შუქიც და, ჩემდა გასაკვირად, ცივის გარდა, ცხელი წყალიც მოდიოდა ონკანში. არდა, იმ დროს ჩვენთან „ტაშტებში“ ბანაობდნენ „კიპიწელნიკით“ ადუღებული წყლით.

ირაკლი ჭაღიაშვილი
courtesy of Irakli Chagiashvili
ირაკლი ჭაღიაშვილი: ვცდილობ, წელიწადში 9-10-ჯერ მაინც გადავკვეთო ქვეყნის საზღვარი

- ამ მოგზაურობამ იქონია გავლენა შემდეგ მოგზაურობებზე?

— რა თქმა უნდა. უკან დაბრუნების შემდეგ უფრო იმატა მოგზაურობის სურვილმა. ყოველი მოგზაურობის შემდეგ ასეა, სურვილი მიჩნდება უფრო მეტი ადგილები და ქვეყნები მოვინახულო.

- რამდენ ქვეყანაში ხართ ნამყოფი?

— ამ დრომდე 25 ქვეყანა მოვინახულე. რამდენიმე დღეა, იტალიიდან ჩამოვედი და მიკვრის, ამდენი ხანი როგორ არ ვიყავი ნამყოფი. საოცარი ქვეყანაა თავისი ისტორიით, კულტურით, გამაოგნებელი სანაპიროებით.

კიდევ გამოვყოფდი გერმანიას და გერმანელებს — წესრიგისა და კანონის მოყვარულ ხალხს.

არ შემიძლია, ხაზი არ გავუსვა ბელორუსიას, ქვეყანას, რომელმაც, მართლა გამაოცა. თუ ვინმეს სურვილი გაუჩნდება ნახოს, როგორ იყო გამართული საბჭოთა კავშირი სრული სვლით, შეუძლია ესტუმროს ამ ქვეყანას.

ირაკლი ჭაღიაშვილი
ირაკლი ჭაღიაშვილი: მოგზაურობა ჩემთვის განათლებაა

- ალბათ მარტო არ დადიხართ, ვინ გიწევთ ამ დროს მეგზურობას?

— ყველანაირი შემთხვევა მქონია. მეგზურობა მეგობრებსაც გაუწევიათ და შეყვარებულსაც, მაგრამ მაინც მარტო მოგზაურობაა ყველაზე საინტერესო და სასიამოვნო. იმიტომ რომ არავინ გიშლის ხელს, მიდიხარ იქ, სადაც გინდა, ირჩევ იმ გზასა და მიმართულებას, რომელიც შენთვის არის მისაღები და სხვის აზრზე არ ხარ დამოკიდებული. უსმენ მხოლოდ საკუთარ „მეს“ და საკუთარ „მინდას“.

- ტურს თავად გეგმავთ?

— ტურს ვგეგმავ თავად — თვითმფრინავის ბილეთებით დაწყებული, შიდა გადაადგილებითა და სასტუმროებით დასრულებული.

- თქვენი ფავორიტი ქვეყანა რომელია?

— გამოვყოფდი უკრაინას. ეს არის ქვეყანა, სადაც ძალიან კომფორტულად ვგრძნობ თავს. როგორც ჩემი უკრაინელი მეგობარი ამბობს, იქ ისე ვარ, როგორც თევზი წყალში.

არ შემიძლია არ აღვნიშნო უნგრეთი — ულამაზესი ბუდაპეშტი, ასევე ქალაქი პეტერბურგი. ეს ქალაქი-მუზეუმებია,  რომლებიც აუცილებლად უნდა ნახოს ადამიანმა. იქ განცდილსა დ მიღებულ შთაბეჭდილებებს ვერანაირი  სიტყვით ვერ გამოვხატავ.

საუცხოოა გერმანიაში „ოქტომბერფესტზე“ დასწრება. ეს არის ევროპის ერთ-ერთი საოცარი მოვლენა და ქვეყნის ღირსშესანიშნაობა, რომელიც ერთხელ მაინც უნდა ნახო და დაესწრო. ულამაზესია ოლიმპოს მთა ათენში — მართლაც ღმერთების დიდებული სამფლობელო, და ასევე ბელგიის ძალიან ლამაზი და კოპწია ქალაქი ბრიუგე.

ირაკლი ჭაღიაშვილი
ირაკლი ჭაღიაშვილი: ამა თუ იმ ქვეყანას, პირველ რიგში, კულტურული და შემეცნებითი მზერით ვუცქერ

- როგორც მივხვდი, კულტურული ცენტრები გიზიდავთ…

— მოგზაურობა ჩემთვის განათლებაა, ერთი დიდი გადაშლილი წიგნი, რომელიც უნდა დაინახო, წაიკითხო და მერე შენებურად დაწერო. ამიტომ, ამა თუ იმ ქვეყანას, პირველ რიგში, კულტურული და შემეცნებითი მზერით ვუცქერ. რამდენიმე კვირის წინ, როცა ვიყავი იტალიაში, მივხვდი, რომ ეს ქვეყანა დახატულია!!!

- მოგზაურობისას უცნაურ, ან კურიოზულ სიტუაციაში თუ აღმოჩენილხართ?

— ერთხელ სტამბულში, სანამ სხვა თვითმფრინავზე გადავჯდებოდი, 6 საათიანი შუალედი მქონდა. აეროპორტში. გოგონა გავიცანი, ლაპარაკს შევყევით, მერე ცოტა ღვინოც მივირთვით, საუბარი რომ უფრო მხიარული და სასიამოვნო გამხდარიყო. ბოლოს ისე მოხდა, რომ ბილეთი გადავცვალე და ახალგაცნობილი გოგო სამშობლოში გავაცილე.  ცოტა ხანი სტუმრადაც დავრჩი. დღესაც სასიამოვნოდ მახსენდება ეს ისტორია.

- რომელ ქვეყანაში ამოყავით თავი?

— რუსეთში — მოსკოვსა და კრასნოდარში.

ირაკლი ჭაღიაშვილი
courtesy of Irakli Chagiashvili
ირაკლი ჭაღიაშვილი: ასეთი იყო ჩემი მოულოდნელი მასპინძელი ქალაქი

- ექსტრემალურ სიტუაციაში თუ გიმოგზაურიათ?

— ნოემბერში ვიმოგზაურე ექსტრემალურად. გირჩევთ ყველას, რომ გაითვალისწინოთ, რასაც გეტყვით და ყურადღებით იყოთ.

სიცილიიდან მილანში ჩავფრინდი. 6 საათში საქართველოსკენ მქონდა რეისი. რა თქმა უნდა, დავრჩი აეროპორტში და დაველოდე ჩემს რეისს. დაიწყო რეგისტრაცია, მე და ჩემმა მეგობრებმა ჩავაბარეთ ბარგი. შემდეგ საპასპორტო კონტროლიც გავიარეთ. ბოლოს მე და კიდევ 15 ჩემი თანამოქალაქე გასასვლელ კართან  მივედით და… კომპანიის წარმომადგენელმა გამოგვიცხადა, რეისზე დააგვიანეთო — ბორტზე ასვლის უფლება არ მოგვცეს.

ატყდა ერთი ამბავი და ჩოჩქოლი. სრულიად უსაფუძვლოდ არ გვიშვებდნენ ხომალდში, იმიტომ რომ დაგვიანების გარეშე ვიყავით ადგილზე. 25-30 წუთი გააჩერეს რეისი და ბარგის ჩამოზიდვა დაიწყეს იმის მაგივრად, რომ ჩვენ ავეშვით თვითმფრინავზე. მერე გავიგეთ, რომ ადგილები არ ყოფილა და ფიზიკურად ვერ აგვიშვებდნენ ბორტზე. ადგილები კი იმიტომ არ იყო, რომ კომპანიას ორჯერ გაუყიდია ბილეთები. კომპეტენტურიც არ აღმოჩნდა არავინ, ვისთანაც ამ ყველაფერს გავასაჩივრებდით. ამიტომ ყველამ თავიდან ვიყიდეთ ბილეთები და სხვა რეისით დავბრუნდით სამშობლოში. ახლა ვემზადებით, რომ ვუჩივლოთ იმ კომპანიას.

ირაკლი ჭაღიაშვილი
ირაკლი ჭაღიაშვილი: ჩემი ოცნების ქვეყანა ბრაზილიაა. ახლაც ბრაზილიის ფეხბურთის ნაკრების ფორმა მაცვია

- რომელი ქვეყნის სამზარეულოს გამოარჩევდით?

— ჯერჯერობით იტალიურს. როგორც ნამდვილ ხინკალს მხოლოდ საქართველოში გასინჯავ, ისე მხოლო იქ დააგემოვნებ ნამდვილ პიცასა და სპაგეტის. მაგრამ ზღვის პროდუქტებმა, რომლებიც სიცილიაზე მივირთვი, ყოველგვარ მოლოდინს გადააჭარბა.

- თქვენი საოცნებო ქვეყანა რომელია?

— ოცნების ქვეყნები! ესენია ბრაზილია და იაპონია. აი ახლაც ბრაზილიის ფეხბურთის ნაკრების ფორმა მაცვია.

- ამ ეტაპზე სად გეგმავთ გამგზავრებას, რის მონახულებას აპირებთ?

— ახლო მომავალში მივდივარ რუსეთში, ფეხბურთში მსოფლიო ჩემპიონატს უნდა დავესწრო. მერე კი მსურს, ისრაელში წავიდე. იმედი მაქვს, გართულებების გარეშე შემიშვებენ მესაზღვრეები ქვეყანაში…

398
ლაშა ბოსტაშვილი

ის, რაც უნდა იცოდეს ბიზნესმა სააგენტოს „აწარმოე საქართველოში“ პროგრამების შესახებ

148
(განახლებულია 17:26 03.07.2020)
ახალი კორონავირუსის პანდემიამ გამოწვევების წინაშე არა მხოლოდ ქართული ბიზნესი, არამედ ის სახელმწიფო უწყებაც დააყენა, რომლის ერთ-ერთი მიზანიც ქვეყანაში სამეწარმეო გარემოს გაუმჯობესებაა.

იმაზე, რა ცვლილებები შევიდა სააგენტოს „აწარმოე საქართველოში“ ბიზნესის მხარდასაჭერად შემუშავებულ პროგრამებში და რამდენად პასუხობენ ისინი არსებულ გამოწვევებს, „Sputnik-საქართველოსთან“ უწყების მეწარმეობის დეპარტამენტის ხელმძღვანელი ლაშა ბოსტაშვილი საუბრობს.

- რა მნიშვნელოვანი კომპონენტები დაემატა სააგენტოს „აწარმოე საქართველოში“ პროგრამებს?

- ზოგადად, ყველა ჩვენი პროგრამა მიმართულია იქითკენ, რომ მეწარმეებისთვის გაზარდოს ფინანსებზე ხელმისაწვდომობა, შესაბამისად, კორონავირუსის პანდემიით გამოწვეული კრიზისიდან გამომდინარე, სააგენტომ ძალიან ბევრი პროგრამა განაახლა და დანერგა მნიშვნელოვანი კომპონენტები, რომლებმაც ფინანსებზე ხელმისაწვდომობა უნდა გაზარდონ. მაგალითად, ცვლილებები შევიდა იმ საკრედიტო-საგარანტიო მექანიზმში, რომელიც ჯერ კიდევ გასულ წელს შეიქმნა და რომლის ბიუჯეტიც მაშინ 20 მილიონი ლარი იყო. ამ თანხით სახელმწიფოს მეწარმის მიერ აღებული ახალი სესხის 70%-ის უზრუნველყოფა უნდა მოეხდინა. თუმცა, 2019 წელს როგორც ბიზნესის მხრიდან, ასევე ბანკებიდან ინტერესი ფაქტობრივად ნულოვანი იყო. ახლა კი, როდესაც ქვეყანა კორონავირუსის პანდემიის შედეგად ახალი გამოწვევების წინაშე დგას, ამ პროდუქტით სარგებლობას საჭიროებენ ბიზნესიც და საფინანსო ინსტიტუტებიც. წელს ამ კომპონენტის ბიუჯეტი უკვე 300 მლნ ლარია, ხოლო ბანკებმა, თავის მხრივ, დაახლოებით 2,1 მლრდ ლარის მოცულობის საკრედიტო პორტფელი უნდა შეკრან. 13 კომერციულ ბანკთან უკვე გვაქვს ხელშეკრულება და პროგრამის იმპლემენტაციის პროცესიც უკვე დაწყებულია. აღსანიშნავია ისიც, რომ ამჯერად სახელმწიფო ახალი სესხის შემთხვევაში 90%-ის უზრუნველყოფას მოახდენს. გარდა ამისა, პროგრამას წელს კიდევ ერთი მნიშვნელოვანი კომპონენტი დაემატა, რომელიც ძველი სესხის რესტრუქტურიზაციის შემთხვევაში სახელმწიფოს მხრიდან 30%-იან გარანტიაში შესვლას გულისხმობს. უფრო გასაგები რომ იყოს, ნებისმიერი ბიზნესის წარმომადგენელს, რომელსაც აქვს სესხი, შეუძლია მიმართოს ბანკს მისი რესტრუქტურიზაციის მოთხოვნით, რის შემდეგაც „აწარმოე საქართველოში“ 50 ათასი ლარიდან 5 მლნ ლარამდე სესხის 30%-იან უზრუნველყოფას მოახდენს.

კიდევ ერთი უმნიშვნელოვანესი სიახლე ის არის, რომ საგენტოს პროგრამებით სარგებლობა უკვე ვაჭრობის დარგის წარმომადგენლებსაც შეუძლიათ, კერძოდ, მათ შეუძლიათ 50 ათასი ლარიდან 5 მლნ ლარამდე მოცულობის სესხის აღება და მისი გამოყენება საოპერაციო ხარჯებისთვის. მაგალითად, კომუნალურების, ხელფასების, იჯარის გადასახდელად.  

- რამდენად დააინტერესებს ბიზნესს სააგენტოს განახლებული პროგრამები?

- 2014 წლიდან მოყოლებული 359 საწარმო არის დაფინანსებული და 153 სასტუმრო არის სუბსიდირებული სახელმწიფოს მიერ. 2019 წლის დეკემბერში სააგენტომ რიგი პროგრამების ოპტიმიზაცია მოახდინა, მაგალითად, თუ ადრე 24 თვით სესხის 10%-ის სუბსიდირება ხდებოდა, 2019 წლის დეკემბრიდან სახელმწიფოს კონტრიბუციამ 7 პროცენტამდე დაიწია. გარდა ამისა, შევწყვიტეთ ისეთი დარგების მხარდაჭერა, როგორიცაა სამშენებლო მასალების, ავეჯის და მინერალური წყლების წარმოება, რადგან ეს სექტორები უკვე ინერციით ვითარდებოდნენ და აღარ საჭიროებდნენ სახელმწიფოს მხრიდან იმხელა მხარდაჭერას, რომელსაც ახორციელებდა სააგენტო.

თუმცა, ახლა სხვა გამოწვევევების წინაშე დგას საქართველოს ეკონომიკა და ორმაგად არის გაზრდილი ბიზნესის მხრიდან ინტერესიც. შექმნილი ვითარებიდან გამომდინარე, ჩვენ დავაბრუნეთ ყველა დარგი, გარდა სოფლის მეურნეობის პირველადი წარმოებისა, რათა არ მომხდარიყო კვეთა სოფლის მეურნეობის სამინისტროსთან, რადგან მათაც აქვთ საკმაოდ მნიშვნელოვანი პროგრამები. გარდა ამისა, გავზარდეთ სესხის ლიმიტი 50 ათასიდან 10 მლნ ლარამდე. თანადაფინანსებების ვადა კი 24 თვიდან 36 თვემდე. ასევე გაიზარდა ჩვენი კონტრიბუციაც, რომელიც ადრე 7% იყო, ამჟამად კი 11.25%-ს შეადგენს (რეფინანსირების განაკვეთს პლუს 3 პროცენტი). კონკრეტული ქეისები მუშავდება ბანკებშიც და, როგორც კი შესაბამისი ინსტიტუტი მოახდენს ჩვენი პროგრამებით გათვალისწინებული სესხების დამტკიცებას, სააგენტოს არაფერი უშლის ხელს – ყოველთვიური კონტრიბუციის გადარიცხვა დაიწყოს. 

ნატა პატარაია

 

148
ვალენტინა მატვიენკო

მატვიენკო: პარლამენტის დიპლომატიის წარმატებას ადამიანური ურთიერთობები განსაზღვრავს

110
(განახლებულია 16:51 30.06.2020)
რატომ არ შეიძლება დემოკრატიის ერთიანი სტანდარტის თავს მოხვევა; ვისთან და როგორ თანამშრომლობენ რუსი კანონმდებლები; რთულია თუ არა მუშაობა COVID-19-ის შეზღუდვების პირობებში - ამის შესახებ რუსეთის ფედერალური საბჭოს თავმჯდომარე ვალენტინა მატვიენკო საუბრობს

- რატომ გამოვიდა პარლამენტარიზმის საერთაშორისო დღის დაწესების ინიციატივით მაინცდამაინც რუსეთი? შეიძლება თუ არა ორი წლის შემდეგ იმის თქმა, რომ საერთაშორისო საპარლამენტო საზოგადოებრიობაში აღნიშნული ინიციატივა წარმატებით სარგებლობს?

- გაეროს კალენდარში ამ დღის შეტანის ინიციატივით რუსეთმა მოახდინა დემონსტრირება იმისა, რომ დარწმუნებულია საპარლამენტო დიპლომატიის შემოქმედებით პოტენციალსა და მაკონსოლიდირებელ ძალაში. პირადად მე სწორედ ასე ვფიქრობ. განსხვავებული შეხედულებების მიუხედავად, ის, რაც ჩვენ, პარლამენტარებს გვაერთიანებს, გადაწონის იმას, რაც გვაშორებს. პარლამენტარები - არიან არა პროფესიონალი ჩინოვნიკები, არამედ ამომრჩევლების, ჩვეულებრივი ადამიანების წარმომადგენლები. ადამიანებს კი მსოფლიოში, როგორც წესი, ერთი რამ უნდათ - უსაფრთხო და ბედნიერი ცხოვრება თავისთვის და თავიანთი შვილებისთვის. სიმართლე გითხრათ, მაკვირვებს, რომ დღესასწაულის იდეა ადრე არავის მოსვლია აზრად. ეს ხომ თავისი არსით ყველაზე დემოკრატიული დღესასწაულია, ვინაიდან პარლამენტარიზმი - ნებისმიერი დემოკრატიული სისტემის ქვაკუთხედია.

რასაკვირველია, ორი წელი დიდი დრო არ არის. მაგრამ ამ დროის განმავლობაში საკმარისი რაოდენობის საერთაშორისო ღონისძიება თუ შეხვედრა გაიმართა საიმისოდ, რომ დავრწმუნებულიყავით: ინიციატივას დადებითი გამოხმაურება მოჰყვა პარლამენტებისა და პარლამენტარების, ასევე მთელი საერთაშორისო საზოგადოებრიობის მხრიდან.

- მასობრივი ინფორმაციის საშუალებებში, ექსპერტთა წრეებში შეიძლება გაიგონოთ, რომ ტექნოლოგიების უსწრაფესი განვითარებისა და ცვლილებების ეპოქაში ყველა სფეროში შეინიშნება პარლამენტების, საპარლამენტთაშორისო თანამშრომლობის როლის შემცირების ტენდენცია. ამდენად პარლამენტარიზმის საერთაშორისო დღეც - გუშინდელი დღის ზეიმია?

- ჩემი აზრით, ცხოვრება საპირისპიროს გვიჩვენებს. დიახ, სამყარო იცვლება, იცვლება მოთხოვნებიც მიღებული კანონების ხარისხისა და პარლამენტართა მუშაობის მიმართ, მაგრამ მათი როლის დაკნინება ნამდვილად არ ხდება. დარწმუნებული ვარ, არც მოხდება. პარლამენტის გარეშე შეუძლებელია მოქალაქეთა მონაწილეობა უმნიშვნელოვანესი გადაწყვეტილებების მიღებაში, სახელმწიფოს საქმეთა მართვაში. თქვენ საუბრობთ ტექნოლოგიების განვითარებაზე, მაგრამ ამ განვითარებას ხომ მხოლოდ მაშინ აქვს აზრი, როდესაც ის საზოგადოების, ადამიანების ინტერესებს ემსახურება. ამის მიღწევა კი ხელისუფლების გარეშე, რომელიც ადამიანების ინტერესებს წარმოადგენს, შეუძლებელია. ტექნოლოგიებმა კი არ უნდა ჩაანაცვლონ ან საერთოდ გააუქმონ ადამიანების უფლებები და შესაძლებლობები, არამედ მათთვის უნდა იმუშაონ. სწორედ ეს არის ფორმულა, რომელიც, ჩემი აზრით, პარლამენტარიზმის ინსტიტუტების მნიშვნელობის შენარჩუნების გარანტს წარმოადგენს. ასე რომ, პარლამენტარიზმის დღე - ნამდვილად არ არის გუშინდელი დღის დღესასწაული, პირიქით.

ჩემი ღრმა რწმენით, პარლამენტების როლი ნებისმიერი საზოგადოებრივად მნიშვნელოვანი გადაწყვეტილების მისაღებად მთელ მსოფლიოში მხოლოდ გაიზრდება. როგორც ეროვნულ, ისე საერთაშორისო საქმეებში. დღესაც ნათელია ტენდენცია პარლამენტების მაგალითზე, რომლებიც დსთ-ის საპარლამენტთაშორისო ასამბლეაში, საპარლამენტთაშორისო კავშირში შედიან. ჩვენს მრავალპოლარულ მსოფლიოში ყველა საკითხი მხოლოდ მოლაპარაკების გზით უნდა მოგვარდეს, არ შეიძლება ვინმეს „ერთადერთი ჭეშმარიტი“ თვალთახედვით დომინირების დაშვება. და მხოლოდ საპარლამენტთაშორისო დიპლომატია, ტრადიციულ დიპლომატიასთან ერთად, შეძლებს ამ ბალანსის დაცვას.

ამასთან, პარლამენტის საქმიანობა არის არა ერთ ადგილზე გაყინული, ერთხელ და სამუდამოდ განსაზღვრული მოცემულობა. ის უნდა იყოს დროის გამოწვევების ადეკვატური. ჩვენ, რუსეთში, ამ წესს მივსდევთ. ამჟამად ტარდება კენჭისყრა საკონსტიტუციო ცვლილებებზე. ცვლილებები შეინარჩუნებს რუსეთს, როგორც სახელმწიფოს ძლიერი საპრეზიდენტო ხელისუფლებით, რაც ჩვენი ქვეყნის ისტორიულ და თანამედროვე რეალიებს პასუხობს. ამასთან, განმტკიცდება ფედერაციის საბჭოს და სახელმწიფო დუმის უფლებამოსილებები. ასეთია დროის მოთხოვნა. ძლიერი პარლამენტი - ძლიერი დემოკრატია - ძლიერი ქვეყანა.

- კორონავირუსის ეპიდემია არ შეიძლებოდა, არ ასახულიყო სხვადასხვა ქვეყნის პარლამენტარების კავშირებზე, მათ ინტენსიურობაზე. მაგრამ რამდენად კრიტიკულია ეს, თქვენი აზრით, საერთაშორისო ურთერთობებისთვის? როგორ მიმდინარეობს დღეს ფედერაციის საბჭოს საერთაშორისო საქმიანობა?

- ეპიდემიამ, რასაკვირველია, გავლენა იქონია, მაგრამ არა კრიტიკული. მუშაობა არცერთი მიმართულებით არ შეწყვეტილა, ზოგიერთი მიმართულებით განვითარდა კიდეც თანამედროვე ტექნოლოგიების წყალობით. რა თქმა უნდა, რამდენიმეთვიანი იძულებითი თვითიზოლაციის შემდეგ ადამიანებთან პირადი ურთიერთობის მოთხოვნილება გიჩნდება. ცოცხალი კონტაქტი ურთიერთობის, მოლაპარაკების სრულიად სხვა ეფექტს იძლევა. ერთი შეხედვით, რა განსხვავებაა? ვიდეოკავშირითაც ისევე უყურებთ ერთმანეთს, ისევე ხედავთ ემოციებს, მაგრამ მაინც რაღაც არასაკმარისია, რაღაც წვრილმანები, რომლების გადაცემაც არანაირ ვიდეოკავშირს არ შეუძლია.

ცხოვრება აჩვენებს - ნებისმიერი სირთულის გადალახვა შეიძლება, მთავარია სურვილი. მით უფრო, რომ ბოლო წლებში ჩვენს მოკავშირეებთან და პარტნიორებთან ერთად საპარლამენტთაშორისო თანამშრომლობაში გადავდგით ნაბიჯები, რომლებმაც, ვფიქრობ, მის განვითარებას ახალი იმპულსი შესძინა.

შეგახსენებთ რუსეთის დელეგაციის მიერ ინიცირებულ ორ რეზოლუციას, რომლებიც ბოლო წლებში საპარლამენტთაშორისო საბჭომ მიიღო. ისინი ეხებოდა სუვერენული სახელმწიფოების საქმეებში ჩარევის და მათთვის ერთადერთი მისაღები, დემოკრატიის „კლასიკური“ მოდელის თავს მოხვევის დაუშვებლობას. ასეთი მოდელი არ არსებობს და არც შეიძლება არსებობდეს. ყველა ქვეყანას უფლება აქვს, თავისუფლად აირჩიოს დემოკრატიული წყობის ისეთი ფორმა, რომელიც მის ეროვნულ და ისტორიულ თავისებურებებს, თანამედროვე პოლიტიკურ რეალიებს შეესაბამება. სწორე ჩვენი ქვეყანა გახდა ორივე დოკუმენტის ავტორი, რომლებიც საერთაშორისო ურთიერთობებში ზეწოლისა და დიქტატის ნებისმიერ მცდელობას ეღობება წინ. პრინციპული პოზიცია დაიკავა კავშირის თავმჯდომარე გაბრიელა კუევას ბარონმა სანქციებთან დაკავშირებით, რომლებიც ცალკეულმა ქვეყნებმა პარლამენტარების მიმართ დააწესეს. ჩვენ ღრმად ვართ დარწმუნებული, რომ სახალხო რჩეულების წინააღმდეგ სანქციები - არის სანქციები ხალხისა და დემოკრატიის წინააღმდეგ. მოხარული ვართ, რომ ეს ჩვენი შეხედულება გაიზიარა და მხარი დაუჭირა მსოფლიოს ყველაზე დიდი საპარლამენტო ორგანიზაციის ხელმძღვანელობამ.

თანამედროვე საერთაშორისო პარლამენტარიზმის ერთ-ერთი უმნიშვნელოვანესი თემა - კულტურული მრავალფეროვნების დიალოგის გზით განვითარებაა. ესაა კონფლიქტების, სანქციებისა და ომების ალტერნატივა. რუსეთმა წამოაყენა რელიგიათაშორისი და ეთნოსებს შორის დიალოგის მიზნით საყოველთაო კონფერენციის ჩატარების ინიციატივა მსოფლიოს რელიგიების ლიდერების, სახელმწიფოთა ხელმძღვანელების და პარლამენტარების მონაწილეობით. ამ წინადადებას დასკვნით დეკლარაციაში მხარი დაუჭირა საპარლამენტთაშორისო საბჭოს 137-ე ასამბლეამ, რომელიც 2017 წელს სანქტ-პეტერბურგში გაიმართა, შემდეგ კი გაეროს გენერალური ასამბლეის რეზოლუციაში მოხვდა. საყოველთაო კონფერენცია რუსეთში 2022 წლის 21 მაისს უნდა გაიმართოს. მისთვის მზადება უკვე დაწყებულია. ყველა ღონეს ვიხმართ, რათა ეს მნიშვნელოვანი მსოფლიო ფორუმი გახდეს არა მხოლოდ 2022 წლის პოლიტიკური დღის წესრიგის მოვლენა, არამედ დამადასტურებელი ღონისძიება რუსეთის სტატუსისა, როგორც უნიკალური მოედნისა, სადაც ხვდებიან, საუბრობენ, და თუ საჭიროა, თანხმდებიან კულტურები, ერები, რელიგიები და პოლიტიკური ძალები. 

ჩვენ მივაღწიეთ ყველა შეზღუდვის მოხსნას ევროპის საბჭოს საპარლამენტო ასამბლეაში ჩვენი დელეგაციის მიმართ. ეს იოლი არ იყო, მაგრამ ჩვენი მტკიცე პოზიციის წყალობით, რუსეთის დელეგაციის დისკრიმინაცია წარსულს ჩაბარდა. რთულია, ეს მოვლენა ზედმეტად გადააფასო. ამით ხომ ნათლად ვაჩვენეთ, რომ საპარლამენტთაშორისო თანამშრომლობის სფეროში დისკრიმინაცია დაუშვებელია. მაგრამ საქმე არა მხოლოდ სამართლიანობის აღდგენას, პოლიტიკურ თამაშებზე სამართალისა და ჭეშმარიტი დემოკრატიის გამარჯვების აღნიშვნას ეხება. ჩვენ ეუთოს ფარგლებში კონსტრუქციული თანამშრომლობის იმედი გვაქვს და აქ არა საომრად ან ანგარიშსწორებისთვის, არამედ ევროპელების, დედამიწის ყველა ერის საკეთილდღეოდ მუშაობის მიზნით მოვედით.

განვაგრძობთ თანამშრომლობას ორმხრივი ფორმატით. ამას წინათ ვიდეოკონფერენციის მეშვეობით გავმართე მოლაპარაკება ჩემს კოლეგასთან, საფრანგეთის რესპუბლიკის სენატის თავმჯდომარე ჟერარ ლარშესთან. ჩვენ ერთობლივი რუსულ-ფრანგული მოხსენება განვიხილეთ - „რუსეთი-საფრანგეთი: ნდობაზე დაფუძნებული დღის წესრიგისთვის“.

შეგახსენებთ, რომ ეს უკვე მეორე მოხსენებაა და ის ჩვენი თვალთახედვით არის პარლამენტების სერიოზული წვლილი რუსეთსა და საფრანგეთს შორის პოლიტიკური დიალოგის გაფართოებაში, ორმხრივი სამომავლო დღის წესრიგის ფორმირებაში, რადგან მოხსენება - არის შემდგომი მოქმედების ერთგვარი „საგზაო რუკა“, რომელიც თანამშრომლობის სრულიად განსხვავებულ სფეროებს მოიცავს. ეს ის შემთხვევაა, როდესაც პარლამენტები წინ უსწრებენ სხვა პოლიტიკურ კონტაქტებს და სამომავლოდ ტონს იძლევიან.

ვფიქრობ, დღეს უკვე შეიძლება ჩვენი ქვეყნების პარლამენტარების მხრიდან საერთაშორისო ურთიერთობების ახლებური სტილის ფორმირებისკენ საერთო სწრაფვაზე საუბარი. სწორედ ამ ჭრილში უნდა განიხილებოდეს რუსი სენატორების წინადადება, შეიქმნას საპარლამენტო დონეზე საერთაშორისო მოლაპარაკების მოედანი, რათა შევინარჩუნოთ საერთაშორისო მოლაპარაკებების ბაზა შეიარაღების შესამცირებლად.

მსგავსი ერთობლივი მოხსენებების მომზადება, ჩემი აზრით, პარლამენტართა თანამშრომლობის ძალიან ეფექტური ფორმაა. ჩვენ მას ვიყენებთ სხვა ქვეყნების პარლამენტებთან თანამშრომლობის დროსაც. მაგალითად, ფედერაციის საბჭოსა და იტალიის რესპუბლიკის სენატის პროფილური კომიტეტები მუშაობენ მოხსენებაზე, რომელიც რუსეთის ფედერაციისა და იტალიის მომავალ ურთიერთობებს ეხება. მისი პრეზენტაცია უკვე მიმდინარე წელს შეიძლება შედგეს.

რუსეთში დსთ-ს ქვეყნებს სტრატეგიულ პარტნიორებად მივიჩნევთ. ამაში კიდევ ერთხელ დავრწმუნდი მარტის დასაწყისში ბელარუსში ვიზიტისას. ბელარუსისა და რუსეთის რეგიონების VII ფორუმისთვის მზადება, რომელიც ნაციზმზე დიდი გამარჯვების ისტორიულ მემკვიდრეობას ეძღვნება, გრძელდება. 16 ივნისს საორგანიზაციო კომიტეტის სხდომაზე ფორუმის ჩატარების თარიღი განისაზღვრა.

ბევრ სენატორს პირდაპირი კონტაქტი აქვს დამყარებული უცხოელ კოლეგებთან. ისინი ხშირად უკავშირდებიან ერთმანეთს და მსჯელობენ. მიმაჩნია, რომ სწორედ ეს ადამიანური ურთიერთობები უდევს საფუძვლად საპარლამენტო დიპლომატიას და განსაზღვრავს მათ წარმატებას.

110
თემები:
რუსეთი დღეს
სიცილია, ეოლიის კუნძულები

კვირის ასტროპროგნოზი: რას გვიმზადებენ ვარსკვლავები 6-12 ივლისის პერიოდში

0
(განახლებულია 13:20 05.07.2020)
ადამიანების უმრავლესობისთვის ეს კვირა იდეალური გახდება აწმყოსა და მომავლის შესაცვლელად. ამაში ასტროლოგების რჩევები დაგეხმარებათ

ახლა ვარსკვლავები იმდაგვარად არიან განწყობილი, რომ ადამიანებს დაეხმარებიან საქმეებში და სამუშაოსა და ახალი გატაცებებისთვის იდეალური პირობების შექმნისთვის. იმისთვის, რომ წარმატებებს მიაღწიოთ, პირველ რიგში პოზიტიური განწყობა უნდა შეიქმნათ – იფიქროთ კარგზე, დადებით მომავალზე და გახსოვდეთ, რომ სიტყვასა და აზრს უდიდესი ძალა აქვს.

ვერძი

ვერძებისთვის ძალიან მნიშვნელოვანი და ხელსაყრელი პერიოდი იწყება ახალი წამოწყებებისთვის. თუ გსურთ, ბიზნესსა და სამუშაოზე წარმატებებს მიაღწიოთ, უნდა იფიქროთ იმაზე, თუ როგორ დაიწყოთ რაღაც ახალი და საინტერესო. მაღალი პროდუქტიულობისთვის დაიცავით დღის რეჟიმი – ეს გააძლიერებს თქვენს ბიოველს და გააუმჯობესებს განწყობას.

მთლიანობაში კვირა მრავალფეროვანი იქნება. კვირის ბოლოს უკვე დაინახავთ თქვენი შრომისა და ძალისხმევის პირველ ნაყოფს. ასტროლოგები გირჩევენ, მეტად კეთილგანწყობილი იყოთ გარშემომყოფების მიმართ, დაეხმაროთ მათ რთულ ვითარებებში.

კურო

კუროებისთვის ეს კვირა წარმატებული და პრობლემური დღეების მონაცვლეობაში ჩაივლის. პოზიტიური განწყობა დაგეხმარებათ ბარიერების გადალახვაში სამუშაო თუ სასიყვარულო სფეროებში ყველაზე არახელსაყრელი დღეებია 7 და 11 ივლისი, ხოლო ყველაზე ხელსაყრელი – 6 და 12 ივლისი.

უქმეებზე ასტროლოგები გირჩევენ, კარგად დაისვენოთ. გექნებათ არჩევნის საშუალება – დაისვენოთ მარტპმ თუ მეგორბებთან და ახლობლებთან ერთად. მთავარი თქვენი სურვილია – გააკეთეთ ის, რაც გსურთ, მცირეოდენ ეჭვსაც კი გაუგებრობების გამოწვევა შეუძლია.

ტყუპი

ტყუპებს ენერგიის შევსება გესაჭიროებათ, რათა პოზიტივით დაიმუხტოთ. ამ შვიდ დღეში მრავალი მოვლენა შეიძლება მოხდეს, მათ შორის, უსიამოვნოც. ძალიან მნიშვნელოვანია, რომ პრობლემებს ფილოსოფიურად შეხედოთ და აღიქვათ, როგორც ცხოვრებისეული გამოცდილებისა და ახალი ცოდნის შეძენის ხერხი.

მარტოხელა ტყუპებს მეორე ნახევრის ძებნაში ძალიან გაგიმართლებთ. ეს ძალზე პროდუქტიული კვირა იქნება ახალი ნაცნობობის თვალსაზრისით. ახალი ნაცნობებიდან ვინმე, შესაძლოა, თქვენს ცხოვრებაში ცვლილებების ტალღის „მიზეზი“ გახდეს. კარგი იქნება, თუ გააქტიურდებით სოციალურ ქსელებში.

კირჩხიბი

ამ კვირაში მუხლჩაუხრელად უნდა იშრომოთ, მაგრამ ამასთან, არ უნდა დაივიწყოთ დასვენებაც. გადაღლა. შესაძლოა, ძალიან ცუდად აისახოს თქვენს განწყობაზე. დასვენების სასარგებლო საშუალება იქნება სპორტი ან მსუბუქი ფიზიკური დატვირთვები, მედიტაცია.

კვირა შესანიშნავად მიესადაგება ფინანსურ ოპერაციებსა და ფულთან დაკავშირებული საკითხების გადაწყვეტას. სასიყვარულო საქმეებში უფრო უქმეებზე გაგიმართლებთ, როდესაც სამუშაოზე ფიქრები მეორე პლანზე გადაიწევს. შეგიძლიათ დანიშნოთ პაემანი. თავისუფალ დროს ფლირტზე უარი არ თქვათ.

ლომი

კვირის განმავლობაში დიდი ყურადღება გესაჭიროებათ. ნუ გამოედევნებით ორ კურდღელს ერთდროულად. დროა, ყველაზე მნიშვნელოვან საქმეებს მიხედოთ, რომელთა გადადებაც უკვე აღარ შეიძლება. მათ თუ გადაწყვეტთ, შვებით ამოისუნთქავთ და თავდაჯერებულობას შეიძენთ. გაითვალისწინეთ, რომ ამ კვირაში დამოუკიდებლად მუშაობა აჯობებს.

ამასთან, მოსალოდნელია ენერგეტიკული ვამპირების გააქტიურება. ერიდეთ მათ, ვინც გარშემომყოფების სიკეთით სარგებლობენ. სასიყვარულო საქმეებში ჯერჯერობით ყველაფერი ისე დატოვეთ, როგორც არის და მიჰყევით დინებას. დასვენების კარგი საშუალება იქნება შოპინგი.

ქალწული

ასტროლოგები გირჩევენ, ამ კვირაში თქვენს საყვარელ გატაცებას დაუთმოთ დრო. სამსახურში ძალიან  ნუ გადაიღლებით. ასე დაზოგავთ ძალებსა და ენერგიას, რომელიც ორ ყველაზე არასახარბიელო დღეს – პარასკევსა და შაბათს დაგჭირდებათ. ამ ორ დღეს ყველაზე მეტად დასვენება იქნება უპრიანი.

რაც შეეხება სიყვარულს, ამ სფეროში სწრაფი შედეგების იმედი ნუ გექნებათ. ასტროლოგები გირჩევენ, საყვარელ ადამიანთან, ოჯახის წევრებთან დაძაბულობა განმუხტოთ. მარტოხელებისთვის აჯობებს, თუ სამუშაოზე იფიქრებთ და არა ურთიერთობებზე. ზედმეტად არაფრით გადაიტვირთოთ გონება – ეს თქვენს პროდუქტიულობაზე აისახება.

სასწორი

თქვენთვის ამ კვირაში ყველაზე მნიშვნელოვანი ფინანსური სფერო გახდება. 6–9 ივლისის პერიოდი საუკეთესოა იმისთვის, რომ დააბრუნოთ ვალები, შეიძინოთ სასურველი ნივთები და შეიცვალოთ გარემო. შესანიშნავი დროა ახალი იდეების წამოყენებისთვის.

ყველაზე მეტად გაუმართლებს სასწორებს, რომელთა პროფესია დაკავშირებულია, რეკლამასთან, გაყიდვებთან, კლიენტების მოზიდვასთან. ასევე იღბალი არ გიმტყუნებთ სიყვარულში. ეს ის დროა, როცა შეგიძლიათ სამუშაო და სიყვარული ორ სფეროდ არ გაყოთ – მუშაობა და არშიყი ერთმანეთს ხელს არ შეუშლის.

მორიელი

კვირა არცთუ პოზიტიური ნოტით დაიწყება. ორშაბათსა და სამშაბათს, შესაძლოა, ნეგატიური აზრები მოგეძალოთ. უარყოფითი ემოციების დაძლევაში ფიზიკური აქტიურობა დაგეხმარებათ – მეტი იმოძრავეთ.

გარშემომყოფებთან ურთიერთობების თვალსაზრისით ასტროლოგები გირჩევენ, დასკვნების გამოტანა არ იჩქაროთ. ადამიანი, ერთი შეხედვით, შესაძლოა, ცუდი მოგეჩვენოთ, მაგრამ შემდეგ ის სასიამოვნო აღმოჩნდეს, ან პირიქით – ერთი შეხედვით გულღია და გულწრფელმა ადამიანმა თავი ძალიან ნეგატიურად წარმოაჩინოს. ახლა მნიშვნელოვანია, ადამიანზე მისი საქციელით იმსჯელოთ და არა გარეგნობით.

მშვილდოსანი

მშვილდოსნებს ძალზე იღბლიანი კვირა გელოდებათ. მოსალოდნელი არ არის განწყობის მკვეთრი და ხშირი ცვლა და წარუმატებლობები. პლანეტების განლაგება დაგეხმარებათ აზრების მატერიალიზებაში, ამიტომ ეცადეთ, თქვენი ფიქრები პოზიტიური იყოს.

კვირის პირველი დღე მოვალეობების შესრულებას დაუთმეთ, 8 ივლისიდან კი ექსპერიმენტებს შეგიძლიათ დაუთმოთ დრო. ამ კვირაში გეძლევათ შანსი, რომ თქვენი ცხოვრების სიყვარულს შეხვდეთ, ან გაიცნოთ ადამიანები, რომლებიც მომავალში თქვენი ერთგული მეგობრები გახდებიან.

თხის რქა

თხის რქებისთვის ამ კვირაში ძირითადი სფერო სიყვარული გახდება. არ შეუშინდეთ ახალ ნაცნობობას, ფლირტს, რომანტიკას. ვისაც უკვე ჰყავს პარტნიორი, მან პატიება უნდა ისწავლოს – არ არის გამორიცხული, რომ თქვენმა პარტნიორმა დაუფიქრებელი ნაბიჯი გადადგას, რასაც ნეგატიური შედეგები მოჰყვება.

ამ კვირაში არასასურველია ძვირად ღირებული ნივთების შეძენა. თუ მოგიწიათ დაუგეგმავად ამის გაკეთება, რჩევისთვის აუცილებლად მიმართეთ ახლობლებს. სამსახურში, შესაძლოა, მნიშვნელოვანი დავალება მოგცენ – ეს თქვენთვის თავის წარმოჩენის შესანიშნავი შანსი იქნება.

მერწყული

მერწყულებისთვის დგება დრო, როდესაც კატეგორიულად იკრძალება გარისკვა და დაუფიქრებელი ნაბიჯების გადადგმა ცხოვრების ყველა სფეროში. უნდა დაეყრდნოთ მხოლოდ საკუთარ გონებასა და ცხოვრებისეულ გამოცდილებას და არ მოუსმინოთ ინტუიციას, რომელიც ვარსკვლავების ნეგატიური ენერგიის გამო დაბლოკილი იქნება. მოსალოდნელია უსიამოვნო შეხევდრები და დაუგეგმავი საქმეები, ასე რომ, კვირის ბოლოს დაღლილობა შეგახსენებთ თავს.

ნეგატივთან გამკლავებისთვის მნიშვნელოვანია, რომ კარგად გეძინოთ და დაისვენოთ. უნდა გააცნობიეროთ, რომ პრობლემები გზაზე – ეს ცხოვრების განუყოფელი ნაწილია. ეცადეთ, ამისგან გაკვეთილი და ცხოვრებისეული გამოცდილება მიიღოთ და დიდი მნიშვნელობა არ მიანიჭოთ.

თევზები

ეს კვირა თევზებისთვის ძალზე დინამიკური იქნება, მაგრამ ყოველთვის ხელსაყრელი – არა. ზოგიერთ საკითხში გადაწყვეტილების მიღება, არჩევნის გაკეთება გულით მოგიწევთ და არა გონებით, ზოგიერთში – პირიქით.

სასიყვარულო ურთიერთობებს რაც შეეხება, აქ იდეალური დრო იწყება, განსაკუთრებით, თუ ურთიერთობები ახალი დაწყებულია. შესანიშნავი კვირაა ერთად გართობისთვის, ერთმანეთის უკეთ გაცნობისთვის. ძველ პარტნიორებს შორისაც კი მოსალოდნელია, რომ რაღაც ახალი შეიტყოთ თქვენი საყვარელი ადამიანის შესახებ.

0