მომიტინგეები და პოლიცია საქართველოში - უფლებები და წესები

132
(განახლებულია 16:54 22.06.2019)
პოლიცია და მომიტინგეები საქართველოში - უფლებები და წესები

საკითხი, რა უფლებები აქვთ საპროტესტო აქციების მონაწილეებსა და საპოლიციო ძალებს საქართველოში, ასევე, რა ეკრძალებათ მათ, აქტუალური მას შემდეგ გახდა, რაც 21 ივნისს თბილისში პოლიციამ მომიტინგეები დაშალა.

საპროტესტო აქცია თბილისში, რომელიც მას შემდეგ დაიწყო, რაც რუსმა დეპუტატმა სერგეი გავრილოვმა საქართველოს პარლამენტის თავჯდომარის სავარძლიდან რუსულად მიმართა მართლმადიდებლობის პარლამენტთაშორის ასამბლეაზე შეკრებილებს, მოგვიანებით არეულობაში გადაიზარდა. შედეგად, საავადმყოფოებში 240 დაშავებული გადაიყვანეს — როგორც მომიტინგეები, ისე პოლიციის თანამშრომლები.

ოპოზიციამ შინაგან საქმეთა სამინისტრო მომიტინგეებისადმი სასტიკ მოპყრობაში დაადანაშაულა. ითქვა ისიც, რომ სამართალდამცველები დამიზნებით ესროდნენ რეზინის ტყვიებს აქციის მონაწილეებს, რის შედეგადაც ორმა ადამიანმა თვალი დაკარგა. 

საქართველოს სახალხო დამცველმა ნინო ლომჯარიამ განაცხადა, რომ პოლიციამ არაპროპორციული ძალა გამოიყენა. მისი თქმით, ძალოვნებმა მომიტინგეები მკაფიო და გასაგები ფორმით არ გააფრთხილეს სპეციალური საშუალებების — ცრემლსადენი გაზის, რეზინის ტყვიებისა და წყლის ჭავლის გამოყენების შესახებ.

საქართველოს ხელისუფლებამ, თავის მხრივ, თბილისში მომხდარ არეულობაში ყოფილი მმართველი პარტია „ერთიანი ნაციონალური მოძრაობა“ დაადანაშაულა. აქციის დაშლამდე ცოტა ხნით ადრე, პრემიერ-მინისტრმა მამუკა ბახტაძემ განაცხადა, რომ დაწყებული არეულობა „ნაციონალური მოძრაობის აგრესიული მცდელობაა, რათა არიოს სიტუაცია ქვეყანაში“.

იმ დღეს პოლიციამ 300 ადამიანი დააკავა.

როგორც შს-მინისტრის მოადგილე ვლადიმერ ბორცვაძემ განაცხადა, „აქცია გამოხატვის თავისუფლებისა და მშვიდობიანი შეკრების კანონით დადგენილ ფარგლებს გასცდა და აშკარად ძალადობრივი ხასიათი მიიღო“.

მისი თქმით, პოლიციამ ძალა მხოლოდ იმ მიზნით გამოიყენა, რომ არ დაეშვა მომიტინგეებს პარლამენტის შენობაში შეჭრა, აღედგინა სამოქალაქო წესრიგი, დაებრუნებინა აქცია სამართლებრივ ჩარჩოებში, აღეკვეთა თავდასხმები პოლიციაზე და ასევე მართლწესრიგის უხეში დარღვევა.

132
თემები:
ცხელი პოლიტიკური ზაფხული: ახალი საპროტესტო ტალღა თბილისში (371)

კორონავირუსი და საქართველოს საგარეო ვაჭრობა

61
(განახლებულია 20:49 01.06.2020)
კორონავირუსის ეპიდაფეთქებამ სერიოზული ზიანი მიაყენა ქართულ ეკონომიკას – 2020 წლის პირველ ოთხ თვეში საგარეო სავაჭრო ბრუნვა, გასული წლის ანალოგიურ პერიოდთან შედარებით, 11,8%-ით შემცირდა და 3,5 მლრდ დოლარი შეადგინა.
როგორ იმოქმედა კორონავირუსმა საქართველოს საგარეო ვაჭრობაზე

იანვარ-აპრილში ქვეყნის ფარგლებს გარეთ 1 მილიარდ დოლარზე მეტი ღირებულების პროდუქცია გავიდა – გასული წლის ანალოგიურ პერიოდთან შედარებით 11,9%-ით ნაკლები, ნათქვამია სტატისტიკის ეროვნული სამსახურის „საქსტატის“ მასალებში.

2020 წლის დასაწყისიდან იმპორტმა დაახლოებით 2,5 მლრდ დოლარი შეადგინა, რაც 11,8%-ით ნაკლებია 2019 წლის იანვარ–აპრილის პერიოდის მაჩვენებელთან შედარებით.

საქართველოს უარყოფითმა სავაჭრო ბალანსმა მითითებულ პერიოდში დაახლოებით 1,5 მლრდ დოლარი შეადგინა, რაც მთელი საგარეო სავაჭრო ბრუნვის 42,2%-ს შეადგენს. 

2020 წლის დასაწყისიდან საქართველოს მსხვილი სავაჭრო პარტნიორები არიან თურქეთი, რუსეთი და აზერბაიჯანი – ამ ქვეყნებთან სავაჭრო ბრუნვამ იანვარ–აპრილში 1,2 მლრდ დოლარს გადააჭარბა, რაც მთლიანი სავაჭრო ბრუნვის 35,6%-ია. 

საქართველოს სავაჭრო პარტნიორების ათეულში ასევე შედიან: ჩინეთი - 346,1 მილიონ დოლარზე მეტი, აშშ - 162,7 მილიონ დოლარზე მეტი, უკრაინა - 174 მილიონ დოლარზე მეტი, სომხეთი - დაახლოებით 161,4 მილიონი დოლარი, გერმანია - დაახლოებით 140 მილიონი დოლარი, ბულგარეთი - 145,5 მილიონ დოლარზე მეტი, იტალია - დაახლოებით 65,8 მლნ დოლარი.

კორონავირუსის აფეთქებამ ქვეყნის ეკონომიკას სერიოზული დარტყმა უკვე მიაყენა – მიმდინარე წლის აპრილში ქვეყნის საგარეო სავაჭრო ბრუნვა 35,4%-ით დაეცა, მათ შორის, ექსპორტი 27,9%-ით, იმპორტი კი 38,5%-ით.

ქართული საინვესტიციო კომპანია Galt&Taggart-ის მონაცემებით, კორონავირუსის პანდემიასთან დაკავშირებით დაწესებული შეზღუდვების გამო ექსპორტის შემცირებამ ეკონომიკას შეიძლება 200 მილიონიდან 1 მილიარდ დოლარამდე ზარალი მიაყენოს, იმის მიხედვით, თუ როგორ განვითარდება მოვლენები.

61
თემები:
საქართველოს ეკონომიკა

როგორ იმოქმედა კორონავირუსმა თბილისის უძრავი ქონების ბაზარზე

89
(განახლებულია 21:33 29.05.2020)
თბილისში 2020 წლის აპრილში 203 ბინა გაიყიდა, გასული წლის ანალოგიურ პერიოდთან შედარებით, ტრანზაქციების რაოდენობა და საბაზრო ღირებულება 92%-ით შემცირდა.
როგორ იმოქმედა კორონავირუსმა თბილისის უძრავი ქონების ბაზარზე
© Sputnik / Konstantin Ivanov.

თუმცა, ამ ეტაპზე ფასებთან დაკავშირებით დასკვნების გამოტანა ნაადრევია, ნათქვამია არაკომერციულ პლატფორმა Recov.ge-ს ვებ-გვერდზე გავრცელებულ მონაცემებში.

კორონავირუსის გავრცელების პრევენციის მიზნით საქართველოში შემოღებული შეზღუდვების ნაწილობრივ ან სრულად მოხსნის პარალელურად მაისსა და ივნისში მოსალოდნელია გარიგებების გააქტიურება და, შესაბამისად, ზრდა.

გამომდინარე იქიდან, რომ მარტის პირველი ნახევარი აქტიური იყო, ჯამურად მარტის თვეზე შეზღუდვები მწვავედ არ ასახულა და, წინა წლის იმავე პერიოდთან შედარებით, ოპერაციების მოცულობა მხოლოდ 10%-ით შემცირდა. 

ამ ეტაპზე ფასების ცვლილებასთან დაკავშირებით რეალური რეაქციების შეჯამება რთულია, სანამ არ აღდგება ეკონომიკური აქტივობა და არ მოიხსნება სახელმწიფოს მიერ დაწესებული შეზღუდვები. აღსანიშნავია, რომ მშენებლების გარკვეულმა ნაწილმა ბაზარზე უკვე დაიწყო ფასდაკლების აქციები, თუმცა მეორად ბაზარზე ჯერჯერობით ამ დოზით რეაგირება არ მომხდარა.

მოკლევადიან პერიოდში მოსალოდნელია ვაჭრობის შემცირება, განსაკუთრებით, ტურისტულ ზონებში, როგორიცაა ბათუმი, ბაკურიანი და გუდაური. 2019 წლის მონაცემებით, ბათუმის ბაზარზე ჯამში 11,5 ათასი ტრანზაქცია განხორციელდა, აქედან დიდი ნაწილი საინვესტიციო ქონებაზე მოდის.

სხვა მასშტაბით, მაგრამ საინვესტიციო ბინები ჭარბობს ბაკურაინსა და გუდაურშიც. სავარაუდოა, რომ გაურკვევლობის ამ პერიოდში მყიდველები თავს შეიკავებენ ე.წ. ტურისტული დანიშნულების ბინების შეძენისგან.

გასაქირავებელი ბინების ბაზარი გამოწვევების წინაშე დადგება. მოსალოდნელია ფასების მნიშვნელოვანი შემცირება როგორც გასაქირავებელ, ისე გასაყიდ ქონებაზე. მეორე მხრივ, ამ შემცირებამ, შესაძლოა, გააჩინოს სპეკულატიური ინვესტორების ახალი ტალღა, რომლებიც კრიზისულ პერიოდში აქტიურდებიან.

89
ქართველი მაშველები ვერტმფრენით

ოთხფეხა მეგობრები მაშველების გვერდით: ზვავქვეშ მოყოლილების ძებნაში ძაღლები ჩაერთვებიან

0
(განახლებულია 16:52 03.06.2020)
ძაღლი გაივლის იქ, სადაც ამას ადამიანი ვერ შეძლებს, ხოლო სპეციალურად გაწვრთნილი მაშველებს მიუთითებს, სად უნდა ეძებონ ზვავქვეშ მოყოლილი ადამიანი

თბილისი, 3 ივნისი – Sputnik. „მთის კურორტების განვითარების კომპანია“, ახალი პროექტის ფარგლებში, ავსტრიის განვითარების სააგენტოს (Austrian Development Agency) მხარდაჭერით, ორ გაწვრთნილ ბელგიურ ძაღლსა და შესაბამის საწვრთნელ აღჭურვილობას შეიძენს კინოლოგებისთვის, იუწყება საქართველოს ეკონომიკისა და მდგრადი განვითარების სამინისტროს პრეს–სამსახური.

ტრაგედია თუშეთში: ზვავში მოყოლილ 62 წლის მამაკაცს მესამე დღეა უშედეგოდ ეძებენ>>

ძაღლების გაწვრთნის პროექტმა „ზვავში გადარჩენილთა ძებნა: გაწვრთნილი მაშველი ძაღლები ზვავში დაშავებულთა გადარჩენის გარანტი“ სამთო-სათხილამურო კურორტებზე თეთნულდსა და გუდაურში მაშველი ძაღლების წვრთნისა და გამოყენების პრაქტიკა უნდა დანერგოს.

კინოლოგების უნარების სპეციალურ სწავლებას გაივლიან ასევე სამაშველო სამსახურის თანამშრომლებიც.

„პირველად საქართველოში დაინერგება ზვავში მაშველი ძაღლების წვრთნისა და გამოყენების პრაქტიკა, რაც გაზრდის სამთო-სათხილამურო კურორტების მომსახურების ხარისხს სამაშველო-საზვავე უსაფრთხოების კუთხით და უზრუნველყოფს ზვავში დაშავებულთა დროულ ძებნასა და გადარჩენას,“ - განაცხადა „მთის კურორტების განვითარების კომპანიის“ დირექტორმა ირაკლი ჭირაქაძემ.

მიუხედავად კვალიფიცირებული მაშველებისა, ბოლო ოთხ წელიწადში გაიზარდა იმ ადამიანების რაოდენობა, რომლებიც ზვავის ჩამოწოლის გამო დაშავდნენ ან დაიღუპნენ. მაშველებს არ ჰქონდათ სპეციალური აღჭურვილობა რთულად მისადგომ ადგილებში საძიებო სამუშაოების წარმოებისთვის, რაც ხშირად იწვევდა ადამიანების დაღუპვას.

0