სეტყვა

ძლიერი სეტყვა და წვიმა: სტიქიამ  დედოფლისწყარო დააზარალა

119
ჯერჯერობით უცნობია, რა ზიანი მიაყენა სტიქიამ რაიონს. ზარალის ოდენობას სპეციალურად შექმნილი კომისია დაადგენს.

თბილისი, 11 ივნისი – Sputnik. ძლიერმა  სეტყვამ კახეთის რეგიონში პრობლემები შექმნა, იუწყება ტელეკომპანია „პირველი არხი“.

ძლიერმა სეტყვამ, რომელიც ათ წუთზე მეტხანს გრძელდებოდა, დედოფლისწყაროს რაიონი დააზარალა. განადგურებულია ერთწლოვანი ბოსტნეული კულტურები.

როგორც დედოფლისწყაროს მერმა ნიკა ჯანიაშვილმა განაცხადა, სეტყვამ მხოლოდ ქალაქის ტერიტორიაზე არსებული საკარმიდამო ნაკვეთები დააზიანა.

„ძირითადად სეტყვამ ქალაქს გადაუარა, თუმცა სახლების დატბორვის ან სასოფლო-სამეურნეო სავარგულების განადგურების შესახებ ინფორმაცია არ შემოსულა. შეიძლება ითქვას, რომ ამ ეტაპზე ძირითადი მოსავალი გადარჩა“, – ჯანიაშვილმა.

დღის განმავლობაში, კახეთის რეგიონის რამდენიმე მუნიციპალიტეტში გადაუღებლად წვიმს.

ბოლო ათი დღის განმავლობაში ძლიერმა ქარმა და სეტყვამ კახეთის სოფლები წინანდალი, ვანთა, ბუშეტი და ქვემო ხოდაშენი დააზარალა. სტიქიის შედეგად განადგურდა ვენახები, ხეხილი, ბოსტნეული და ბაღჩეული კულტურები. როგორც ადგილობრივი მოსახლეობა აცხადებს, შესაძლოა წელს ყურძნის მოსავლის გარეშე დარჩნენ.

119
თემები:
უამინდობა საქართველოში (325)
დაკავება

„ქურდული სხადნიაკი" და წილების გაყოფა: ქუთაისში სამი პირი დააკავეს

56
(განახლებულია 18:54 16.06.2021)
ორ ბიზნესმენს შორის სადავო საკითხის გადაჭრა ე.წ. ქურდული სამყაროს წევრებმა გადაწყვიტეს – საქმის გარჩევა დაკავებით დასრულდა.

თბილისი, 16 ივნისი — Sputnik. ქუთაისში სამართალდამცველებმა „ქურდული სამყაროს" წევრობისა და ე.წ. ქურდულ შეკრებაში მონაწილეობის ბრალდებით სამი პირი დააკავეს, ნათქვამია შინაგან საქმეთა სამინისტროს მიერ გავრცელებულ განცხადებაში.

ყველა დაკავებული წარსულში ნასამართლევი პირია.

გამოძიების ცნობით, ერთ-ერთმა დაკავებულმა შემთხვევით გაიგო თავისი ნაცნობის, ქუთაისში მდებარე ერთ-ერთი კაფე-ბარის ყოფილი მეწილისა და ამავე ობიექტის ახლანდელი მფლობელის ფინანსური დავის შესახებ.

მან თანამზრახველებთან ერთად თვითნებურად, საკუთარი სარგებლის მიღების მიზნით, გადაწყვიტა აღნიშნულ დავაში ჩარევა. ბრალდებულებმა „ქურდული სამყაროს" მიერ დადგენილი წესების მიხედვით მოაწყვეს „ქურდული გარჩევა". ფინანსური დავის ქურდული წესით გარჩევის შედეგად კი ბარის ახლანდელ მეპატრონეს ყოფილი ბიზნეს-პარტნიორისთვის და „ქურდული სამყაროს" წევრების სასარგებლოდ გარკვეული თანხის გადახდა დაეკისრა.

პოლიციამ ბრალდებულები სასამართლოს გადაწყვეტილების საფუძველზე მას შემდეგ დააკავა, რაც ბარის მეპატრონემ მათ მოთხოვნილი თანხა გადაუხადა.

სამართალდამცველებმა დაკავებულთა საცხოვრებელ სახლებში ჩატარებული ჩხრეკის შედეგად ნივთმტკიცების სახით ამოიღეს მობილური ტელეფონები და კომპიუტერული ტექნიკა, რომელთა მეშვეობითაც ბრალდებულები ერთმანეთს და მათთან დანაშაულებრივ კავშირში მყოფ სხვა პირებს უკავშირდებოდნენ.

გამოძიება სსკ-ის ორი მუხლით მიმდინარეობს – „ქურდული სამყაროს" წევრობა“ და „ქურდულ შეკრებაში" მონაწილეობა“. დაკავებულებს 7-დან 10 წლამდე ვადით თავისუფლების აღკვეთა ემუქრებათ.

56
თემები:
კრიმინალი საქართველოში
საპატრულო პოლიცია

მუხრანში მამაკაცი მოკლეს, მისმა შვილმა კი თავი მოიკლა

102
მომხდართან დაკავშირებით გამოძიება ორი მუხლით, მკვლელობისა და თვითმკვლელობამდე მიყვანის საქმეზე მიმდინარეობს.

თბილისი, 15 ივნისი – Sputnik. მცხეთის მუნიციპალიტეტის სოფელ მუხრანში შუახნის მამაკაცი, სავარაუდოდ, მეზობლებს შორის მომხდარი დაპირისპირებისას მძიმედ დაიჭრა, კლინიკაში გადაყვანის შემდეგ კი გარდაიცვალა.

შუახნის მამაკაცის სავარაუდო მკვლელი იდენტიფიცირებულია, ის 30 წლამდე მამაკაცია, რომელსაც პოლიცია ამ დრომდე ეძებს.

თანასოფლელების თქმით, სავარაუდოდ, ორივე - მოკლული და მკვლელიც შემთხვევის დროს ნასვამ მდგომარეობაში იყვნენ. მამაკაცს დაზიანებები ბლაგვი საგნით, თავის არეში აქვს მიყენებული.

მეზობლებს შორის დაპირისპირება მუხრანში რამდენიმე დღის წინ მოხდა.

მამის გარდაცვალების გამო, მისმა შვილმა, 30 წლამდე მამაკაცმა ორი დღის შემდეგ თავი მოიკლა.

ადგილობრივები აცხადებენ, რომ ახალგაზრდა მამაკაცმა მამის სიკვდილი ვერ გადაიტანა და თავი ჩამოიხრჩო.

მომხდართან დაკავშირებით გამოძიება ორი მუხლით, მკვლელობისა და თვითმკვლელობამდე მიყვანის საქმეზე მიმდინარეობს.

102
აშშ-ის და რუსეთის პრეზიდენტები

რა ამოიკითხეთ ბაიდენის თვალებში: პუტინმა ჟურნალისტის კითხვას უპასუხა

0
რუსეთის პრეზიდენტ ვლადიმირ პუტინისა და აშშ-ის პრეზიდენტ ჯო ბაიდენის შეხვედრა ჟენევაში სამ საათ-ნახევარი გაგრძელდა.

თბილისი, 16 ივნისი - Sputnik. რუსეთის პრეზიდენტმა ვლადიმირ პუტინმა უპასუხა ამერიკელი ჟურნალისტის კითხვას იმაზე, თუ რა ამოიკითხა მან აშშ-ის პრეზიდენტ ჯო ბაიდენის თვალებში ჟენევაში გამართული შეხვედრისას.

ჟურნალისტმა დასძინა, რომ რამდენიმე წლის წინ ბაიდენმა, როდესაც იგი ვიცეპრეზიდენტი იყო, რუსეთის ლიდერთან შეხვედრის შემდეგ აღნიშნა, რომ პუტინს თვალებში ჩახედა და იქ სული ვერ დაინახა. ჟურნალისტი დაინტერესდა, ჩახედა თუ არა პუტინმა ბაიდენს თვალებში დღევანდელ შეხვედრაზე და რა დაინახა.

„ბაიდენი ძალიან კონსტრუქციული, გაწონასწორებული ადამიანია, როგორც ველოდი კიდეც. ძალიან გამოცდილი. მან გაიხსენა თავისი ოჯახი, რაზე ესაუბრებოდა დედა. ეს მნიშვნელოვანია. თითქოს პირდაპირ არ უკავშირდება საქმეს, მაგრამ მისი მორალური ფასეულობების ხარისხს ავლენს. ეს ყველაფერი საკმაოდ მიმზიდველია და, ვფიქრობ, მთლიანობაში ერთ ენაზე ვსაუბრობდით. ეს სულაც არ ნიშნავს, რომ აუცილებელია სულში, თვალებში ჩაიხედო და სამუდამო სიყვარული და მეგობრობა შეჰფიცო. ჩვენ ჩვენი ქვეყნების, ხალხების ინტერესებს ვიცავთ და ეს ურთიერთობები ყოველთვის პრაგმატული ხასიათისაა“, - აღნიშნა პუტინმა პრესკონფერენციაზე.

პრეზიდენტების შეხვედრა ჟენევაში სამ საათ-ნახევარი გაგრძელდა. შედგა ერთი ვიწრო ფორმატის და ერთიც ფართო ფორმატის შეხვედრა. წინასწარი ინფორმაციით, უნდა გამართულიყო გაფართოებული ფორმატის ორი შეხვედრა.

თეთრი სახლის ინფორმაციით, ბაიდენის პრესკონფერენცია თბილისის დროით 21:30 სთ-ზე გაიმართება. წყარომ დელეგაციიდან „რია ნოვოსტის“ აცნობა, რომ პრეზიდენტების მოლაპარაკებამ „სავსებით წარმატებით“ ჩაიარა.

0