ღამის კლუბი

წვეულებები აკრძალვის მიუხედავად შრომის ინსპექციამ კანონდარღვევის ფაქტები გამოავლინა

64
(განახლებულია 16:54 26.04.2021)
მასობრივი ღონისძიებების ორგანიზატორებსა და იმ პირებს, რომლებიც წვეულებებისთვის ფართებს იჯარით გასცემენ, სოლიდური ჯარიმა ემუქრებათ.

თბილისი, 26 აპრილი – Sputnik. საქართველის ჯანდაცვის სამინისტროს შრომის ინსპექციამ მოქმედი შეზღუდვების დარღვევისთვის რიგ ობიექტებს ფინანსური სანქციები დააკისრა.

შრომის ინსპექციის მონაცემებით, კლუბ Gate 36-ში ხალხმრავალი წვეულების გამართვისთვის ღონისძიების ორგანიზატორი 10 ათასი ლარით, ხოლო ის პირი, რომელმაც შენობა იჯარით გასცა, 2 ათასი ლარით დაჯარიმდა.

თბილისში კოვიდ–შეზღუდვების დარღვევის კიდევ ერთი ფაქტი პოლიტკოვსკაიას №10-ში დაფიქსირდა. ადგილობრივმა მცხოვრებლებმა პოლიცია ახალგაზრდების ჩხუბის გამო გამოიძახეს. მას შემდეგ, რაც სიტუაცია განიმუხტა, გაირკვა, რომ კონფლიქტი ერთ-ერთ დაქირავებულ ბინაში წვეულების დროს დაიწყო. პასუხისმგებლობა დაეკისრათ როგორც წვეულების მონაწილეებს, ისე ბინის მეპატრონეს, რომელმაც ერთდროულად ორი ბინა გააქირავა. 

შრომის ინსპექციის თანამშრომლებმა მოქმედი რეგულაციების დარღვევის ფაქტი გამოავლინეს სოფელ წავკისშიც, სადაც ღია სივრცეში ხალხმრავალი წვეულება კოვიდ–რეგულაციების დარღვევით გაიმართა.

თბილისში დაახლოებით 10 კერძო და იურიდიული პირი დაჯარიმდა.

ამ დროისათვის ინსპექციის თანამშრომლები ბათუმში ერთ-ერთი კლუბის იდენტიფიცირებას ცდილობენ, სადაც ასევე ხალხმრავალი ღონისძიება გაიმართა.

აპრილის დასაწყისში საქართველოს მთავრობამ მასობრივი ღონისძიებების, ქორწილების, ქელეხებისა და იუბილეების გამართვისთვის ფართების იჯარით გაცემა აკრძალა.

შესაბამისი ცვლილება „იზოლაციისა და კარანტინის წესის დამტკიცების შესახებ“ დადგენილებაში შევიდა.

საქართველოში კორონავირუსის გავრცელების პრევენციის მიზნით იკრძალება მასობრივი ღონისძიებების გამართვა ათზე მეტი ადამიანის მონაწილეობით.

დამატებითი შეზღუდვების შემოღების გადაწყვეტილება ქვეყანაში ეპიდვითარების გაუარესების ფონზე იქნა მიღებული. ეპიდემიოლოგების განცხადებით, ქვეყანაში კორონავირუსის გავრცელების მესამე ტალღა დაიწყო. სპეციალისტების თქმით, ვირუსის გავრცელების ყველა დიდი ჯაჭვი, როგორც წესი, თავყრილობებს უკავშირდება.

 

64
გუმათჰესის აღჭურვილობა

ხვალ გუმათჰესის კასკადისა და რიონჰესის სათავე ნაგებობის საგუბრებს წყლისგან დაცლიან

44
(განახლებულია 15:06 06.05.2021)
სოფელ ნამოხვანში 10 აპრილს გაუჩინარებული მამაკაცის საძიებო-სამაშველო ღონისძიებები უწყვეტ რეჟიმში მიმდინარეობს.

თბილისი, 6 მაისი – Sputnik. სოფელ ნამოხვანში გაუჩინარებული მამაკაცის სამძებრო სამუშაოების ფარგლებში 7 მაისიდან გუმათჰესის კასკადისა და რიონჰესის სათავე ნაგებობის საგუბრების წყლისგან დაცლა იგეგმება, ნათქვამია საგანგებო სიტუაციების მართვის სამსახურის მიერ გავრცელებულ განცხადებაში.

წყალტუბოს მუნიციპალიტეტის სოფელ ნამოხვანში 10 აპრილს მამაკაცი მდინარე რიონში შევიდა დაიკარგა. ის „ნამახვანჰესის“ წინააღმდეგ მიმდინარე უწყვეტი აქციის მონაწილე იყო.

  • უწყების ცნობით, ოპერაციის ფარგლებში 7 მაისის 08:00 საათიდან 9 მაისის 18:00 საათამდე იგეგმება გუმათჰესის კასკადისა და რიონჰესის სათავე ნაგებობის საგუბრების წყლისგან დაცლა. ტერიტორიაზე სახანძრო-სამაშველო ჯგუფები იმუშავებენ.

საგანგებო სიტუაციების მართვის სამსახური ადგილობრივ მოსახლეობას ყურადღებისა და მაქსიმალური სიფრთხილის გამოჩენისკენ მოუწოდებს. უწყების ცნობით, სამუშაობის შესახებ ინფორმაცია მოსახლეობას ადგილზეც მოეწოდება.

კარვები აღებულია: რა ვითარებაა „ნამახვან ჰესის“ წინააღმდეგ მიმდინარე საპროტესტო აქციაზე>>

საგანგებო სიტუაციების მართვის სამსახური მიმდინარე წლის 10 აპრილიდან ახორციელებს სოფელ ნამოხვანში გაუჩინარებული მამაკაცის საძიებო-სამაშველო ღონისძიებებს. მდინარე რიონზე სამუშაოები უწყვეტ რეჟიმში მიმდინარეობს.

 

44
ოქროს ნაკეთობები

სარფში ოქროს კონტრაბანდა აღკვეთეს

75
(განახლებულია 21:34 05.05.2021)
არადეკლარირებული ძვირფასეულობა მებაჟე–ოფიცრებმა სატვირთო ავტომობილში აღმოაჩინეს, რომელსაც საქართველოს მოქალაქე მართავდა.

თბილისი, 5 მაისი – Sputnik. საქართველოს ფინანსთა სამინისტროს შემოსავლების სამსახურის მებაჟე-ოფიცრებმა საქართველო–თურქეთის საზღვარზე დაახლოებით 10 ათასი აშშ დოლარის ღირებულებულების არადეკლარირებული ოქროს ნაკეთობების შემოტანა აღკვეთეს, ნათქვამია უწყების მიერ გავრცელებულ განცხადებაში.

მებაჟე–ოფიცრებმა საკონტროლო–გამშვებ პუნქტ „სარფში“ ერთ-ერთი სატვირთოს დათვალიერებისას, რომელსაც საქართველოს მოქალაქე მართავდა, არადეკლარირებული 293,969 გრამი ოქროს საიუველირო ნაკეთობები აღმოაჩინეს.

საქონლის საერთო საბაჟო ღირებულებამ 33.744 ლარი შეადგინა.

საქმის მასალები, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეგზავნა. 

75
ქუთაისის საერთაშორისო აეროპორტი

ქუთაისის აეროპორტიდან  რეისები ხუთი ქვეყნის ცხრა  მიმართულებით შესრულდება

0
(განახლებულია 17:21 06.05.2021)
თებერვლიდან ხელისუფლებამ საჰაერო საზღვრები გახსნა და იმ ქვეყნების ჩამონათვალი გააფართოვა, რომელთა მოქალაქეებსაც ხანგრძლივი სავალდებულო კარანტინის გარეშე შეუძლიათ ქვეყანაში ჩამოსვლა.

თბილისი, 6 მაისი - Sputnik. ქუთაისის დავით აღმაშენებლის სახელობის საერთაშორისო აეროპორტიდან მაისში პირდაპირი რეგულარული რეისები ხუთი ქვეყნის ცხრა მიმართულებით შესრულდება, ნათქვამია ქუთაისის აეროპორტის ადმინისტრაციის მიერ გავრცელებულ  განცხადებაში.

უწყების ცნობით, ქუთაისის  აეროპორტიდან ევროპასა და ცენტრალურ აზიაში მოხვედრა პირდაპირი რეგულარული ავიარეისებით არის შესაძლებელი.

კერძოდ, მაისში დაბალბიუჯეტიანი ავიაკომპანია Wizz Air-ი ქუთაისის აეროპორტიდან პირდაპირ რეგულარულ რეისებს რიგის, დორტმუნდის, კატოვიცესა და გდანსკის მიმართულებით აახლებს.

„საქართველოს აეროპორტების გაერთიანება ავიაკომპანიასთან მოლაპარაკებებს პანდემიამდე არსებული მიმართულებების განახლების შესახებ, ეპიდსიტუაციიდან გამომდინარე აწარმოებს და ფრენები ეტაპობრივად აღდგება“, -ნათქვამია განცხადებაში.

Wizz Air-მა 18 აპრილიდან ვარშავისა და ვილნიუსის მიმართულებით ქუთაისიდან რეგულარული რეისების განახლება დაიწყო. თავდაპირველად რეისები კვირაში ერთი სიხშირით სრულდებოდა, თუმცა ეპიდსიტუაციის გათვალისწინებით, ავიაკომპანიამ უკვე გაზარდა სიხშირე ვარშავის მიმართულებით და 13 მაისიდან ქუთაისიდან პოლონეთის დედაქალაქში და პირიქით მოხვედრა უკვე კვირაში ორჯერ იქნება შესაძლებელი.

გარდა ამისა, 14 მაისიდან Wizz Air-ი ქუთაისიდან რეგულარულ ფრენებს რიგის მიმართულებით განაახლებს, ხოლო 21 მაისიდან დორტმუნდის მიმართულებით დაიწყებს რეგულარულ პირდაპირ ავიარეისებს. მაისის ბოლოდან კი ქუთაისიდან პოლონეთის მიმართულებით და პირიქით, კიდევ ორ ქალაქში იქნება პირდაპირი საჰაერო გზით მოხვედრა შესაძლებელი: 29 მაისიდან - კატოვიცეს მიმართულებით, 30 მაისიდან კი - გდანსკისა.

ქუთაისის საერთაშორისო აეროპორტიდან  2 მაისიდან ოპერირება დაიწყო ახალმა ყაზახურმა დაბალბიუჯეტიანმა ავიაკომპანია FlyArystan-მაც, რომელიც პირდაპირ ფრენებს კვირაში ორჯერ ახორციელებს სამი მიმართულებით: ატირაუ, აქტაუ და ნურ-სულთანი.

საჰაერო გზით უცხო ქვეყნის მოქალაქეს საქართველოს საჰაერო საზღვრის კვეთა PCR ტესტის ნეგატიური პასუხით, ან საზღვარზე კოვიდვაქცინის სრული კურსის ჩატარების (ორი დოზა) დამადასტურებელი დოკუმენტის წარდგენით შეუძლია.

კორონავირუსის პანდემიის გამო საქართველომ რეგულარული ფრენები 2020 წლის მარტის შუა რიცხვებიდან ყველა მიმართულებით შეწყვიტა. საქართველოდან და საქართველოს მიმართულებით სრულდებოდა მხოლოდ სპეცრეისები ქვეყნის მოქალაქეების სამშობლოში დასაბრუნებლად. ზაფხულში რეგულარული რეისების აღდგენა დაიწყო, მაგრამ ეპიდსიტუაციის გაუარესების გამო საავიაციო მიმოსვლის განახლება რამდენჯერმე გადაიდო.

0