პატრული

ახალწვეულთა მიმართ ძალადობის საქმის ერთ-ერთმა ფიგურანტმა თავი მოიკლა

128
(განახლებულია 22:23 23.04.2021)
თბილისის საქალაქო სასამართლოში გამართულ პროცესზე მესამე სავარაუდო დამნაშავის შესახებაც გახდა ცნობილი, რომელმაც ერთი თვის წინ სიცოცხლე თვითმკვლელობით დაასრულა.

თბილისი, 23 აპრილი – Sputnik. ახალწვეულთა მიმართ არაადამიანური მოპყრობის საქმის ერთ-ერთმა ფიგურანტმა სიცოცხლე თვითმკვლელობით დაასრულა, იუწყება ტელეკომპანია „რუსთავი 2“. 

აღნიშნულ საქმეზე ბრალი უკვე წარედგინათ შსს-ს ობიექტების დაცვის დეპარტამენტის ორ თანამშრომელს – გიორგი ბიჩელაშვილსა და დიმიტრი დევდარიანს. თბილისის საქალაქო სასამართლომ ორივე პირს პატიმრობა დღეს გამართულ სხდომაზე შეუფარდა.

პროცესზე ცნობილი გახდა, რომ საქმეში ობიექტების დაცვის დეპარტამენტის კიდევ ერთი თანამშრომელი ფიგურირებდა, თუმცა დაახლოებით ერთი თვის წინ მან სიცოცხლე თვითმკვლელობით დაასრულა.

საქმეში ფიგურირებს სავარაუდო დანაშაულების სხვადასხვა ეპიზოდი, რომლებიც „იაღლუჯას“ საწვრთნელ სამხედრო ბაზაზე 2020 წლის იანვრიდან ივლისის ჩათვლით პერიოდში მოხდა. აღნიშნულ პირებს ხუთიდან რვა წლამდე პატიმრობა ემუქრებათ.

გამოძიებით დადგინდა, რომ შინაგან საქმეთა სამინისტროს ობიექტების დაცვის დეპარტამენტის საბრძოლო მომზადებისა და გადამზადების სამმართველოს ცვლის უფროსებმა გადაამეტეს სამსახურებრივ უფლებამოსილებას, სხვა ჯარისკაცების თანდასწრებით ვადიანი სამხედრო მოსამსახურეების მიმართ გამოიყენეს კანონით აკრძალული დასჯის მეთოდები, რომლითაც შელახეს მათი პირადი ღირსება, არსებითად დაარღვიეს მათი უფლებები, მიაყენეს მორალური და ფიზიკური ტკივილი და დააზიანეს სახელმწიფოს კანონიერი ინტერესები. 

ერთ-ერთ ეპიზოდში აღნიშნულია, რომ ერთ-ერთი ცვლის უფროსი სამხედროებს სპეციალური ეკიპირებით, რომელიც 10 კილოგრამს იწონის, ორი საათის განმავლობაში მუხლზე დამდგარს აიძულებდა, კბილის ჯაგრისით გაეხეხათ ყაზარმის ტუალეტის იატაკი.

ორი თვის შემდეგ, მაისში მან გაიმეორა მსგავსი ქმედება სხვა სამხედროების მიმართ და მათ ტუალეტის ხეხვა 11 საათის განმავლობაში აიძულა.

აღნიშნული პირი ასევე გადის სამხედრო მოსამსახურის ცემის ეპიზოდში 2020 წლის ივლისში.

მეორე დაკავებულს ასევე ბრალად ედება სამსახურებრივი უფლებამოსილების გადაჭარბებით სამხედროების მიმართ არაადამიანური და ღირსების შემლახავი მოპყრობა. ის სამ ეპიზოდში ფიგურირებს.

როგორც შსს-ს გენერალური ინსპექციის განცხადებაშია აღნიშნული, რომელმაც ფაქტები გამოიძია, დაკავებულების მიერ ჩადენილი დანაშაულები დასტურდება ათეულობით მოწმის პირდაპირი ჩვენებებით, ბრალდებულთა მობილურ ტელეფონებზე ჩატარებული კომპიუტერული ექსპერტიზის დასკვნებით, გამოძიების მიერ მოპოვებული ფოტო-მტკიცებულებებით, შინაგან საქმეთა სამინისტროდან გამოთხოვილი დოკუმენტებით და სხვა მტკიცებულებებით.

128
დაზიანებული ჭერი

თბილისში მამაკაცი ბანკში სავენტილაციო მილიდან შეიპარა

12
მამაკაცი ბანკში სავარაუდოდ გასაქურდად შეიპარა, თუმცა ფულის წაღება ვერ მოახერხა. ინციდენტის შედეგად არავინ არ დაშავდა.

თბილისი, 26 ივლისი – Sputnik. თბილისში, ჭავჭავაძის გამზირზე მდებარე  VTB ბანკის ფილიალში ახალგაზრდა მამაკაცი სავენტილაციო მილიდან ბანკის გასაქურდად  შეიპარა და შემდეგ იმავე გზით გაიპარა, - იუწყება ტელეკომპანია „რუსთავი 2“.

ბანკში შეპარული მამაკაცი დილით სამსახურში მისულმა თანამშრომლებმა შეამჩნიეს. მამაკაცი მათ დაემუქრა, რომ სახეში ნავთს შეასხამდა, რის შემდეგაც თანამშრომლებმა შენობა დატოვეს და პოლიცია გამოიძახეს.

ბანკში მისულ პოლიციას მამაკაცი იქ აღარ დახვდა. მან შენობა ისევ სავენტილაციო მილების საშუალებით დატოვა. 

მამაკაცმა ბანკიდან ფულის წაღება ვერ მოახერხა. თუმცა მას სამართალდამცველები ამ დრომდე ეძებენ, თვითმხილველების თქმით, მას სახეზე სამედიცინო ნიღაბი ეკეთა.

შინაგან საქმეთა სამინისტროს ცნობით, ფაქტზე გამოძიება სისხლის სამართლის კოდექსის ორი მუხლით (151-ე და 19-177-ე) მიმდინარეობს, რაც მუქარას და ქურდობის მცდელობას გულისხმობს.

მომხდარის შედეგად არავინ დაშავებულა.

12
პოლიცია

ბერძნულ-რომაულ ჭიდაობაში მსოფლიო ჩემპიონი ხობში ხულიგნობისთვის დააკავეს

50
(განახლებულია 16:45 26.07.2021)
პოლიციისადმი დაუმორჩილებლობის ბრალდებით დაკავებულ ნუგზარ წურწუმიას და მოჭიდავე ნიკა ყორშიას სამ-სამი დღის ვადით თავისუფლების აღკვეთა შეეფარდა.

თბილისი, 26 ივლისი — Sputnik. ბერძნულ-რომაულ ჭიდაობაში მსოფლიო ჩემპიონი ნუგზარ წურწუმია ხობში ხულიგნობისთვის დააკავეს, იუწყება ტელეკომპანია Rustavi 2.

წურწუმიასთან ერთად დაკავებულია კიდევ ერთი სპორტსმენი - ნიკა ყორშია. ინციდენტი ქალაქის ცენტრში სასურსათო მაღაზიასთან მოხდა. სამართალდამცველებმა ახალგაზრდებს, რომლებიც გამომწვევად იქცეოდნენ, წესრიგისკენ მოუწოდეს, თუმცა, მათ სამართალდამცველებს წინააღმდეგობა გაუწიეს.

წვრილმანი ხულიგნობისა და პოლიციისადმი დაუმორჩილებლობის ბრალდებით დაკავებულ წურწუმიასა და ყორშიას სამი დღით პატიმრობა შეეფარდათ.

რაც შეეხება ინციდენტის კიდევ ორ ფიგურანტს - ზაზა დათეშიძეს და ვარლამ კვარაცხელიას, მათ ბრალი ედებათ პოლიციის თანამშრომლებზე თავდასხმაში. აღნიშნულ პირებთან დაკავშირებით აღკვეთის ღონისძიების შეფარდების საკითხზე ფოთის რაიონული სასამართლო იმსჯელებს.

50
თემები:
შემთხვევები საქართველოში
საარჩევნო ბიულეტენები

2020 წლის არჩევნების შემსწავლელმა კომისიამ მუშაობა დაასრულა: რა წერია დასკვნაში

0
საპარლამენტო არჩევნების დროს გამოვლინდა ხარვეზები, მაგრამ ეს ხარვეზები კენჭისყრის საბოლოო შედეგებზე გავლენას ვერ მოახდენდა, დაასკვნა დროებითმა საგამოძიებო კომისიამ.

თბილისი, 26 ივლისი — Sputnik. 2020 წლის საპარლამენტო არჩევნებზე გამოვლინდა გარკვეული ხარვეზები, მაგრამ მათ არჩევნების საბოლოო შედეგებზე რაიმე გავლენა არ მოუხდენია, განაცხადა საპარლამენტო არჩევნების შემსწავლელი საქართველოს პარლამენტის დროებითი საგამოძიებო კომისიის თავმჯდომარემ, გივი მიქანაძემ.

მიქანაძემ კომისიის დასკვნა პარლამენტის რიგგარეშე სხდომაზე ორშაბათს წარადგინა.

დროებითი საგამოძიებო კომისია საკანონმდებლო ორგანოში მიმდინარე წლის 17 თებერვალს მმართველი პარტია „ქართული ოცნება - დემოკრატიული საქართველოს" ინიციატივით შეიქმნა ოპოზიციის ბრალდებების საპასუხოდ, რომ საპარლამენტო არჩევნები გაყალბდა.

„საგამოძიებო კომისიის მიერ გაწეული საქმიანობის შედეგად დადგინდა, რომ საპარლამენტო არჩევნები კონკურენტულ გარემოში, ძირითადი თავისუფლებებისა და კანონმდებლობის სრული დაცვით ჩატარდა. ამასთანავე, საპარლამენტო არჩევნების ჩატარებისას გამოიკვეთა რიგი ხარვეზები, რომლებსაც არჩევნების საბოლოო შედეგებზე გავლენა არ მოუხდენია. შესაბამისად, საპარლამენტო არჩევნებთან დაკავშირებით ცენტრალური საარჩევნო კომისიის მიერ შემაჯამებელ ოქმში გამოქვეყნებული მონაცემები ამომრჩევლის გამოხატულ თავისუფალ ნებას სრულად ასახავს“, – განაცხადა გივი მიქანაძემ.

მისი ინფორმაციით, საგამოძიებო კომისიამ ჩაატარა 16 სამუშაო შეხვედრა, საარჩევნო პროცესებთან დაკავშირებული 38 ადამიანი გამოკითხა და სხვადასხვა უწყებას მიმართა 22 წერილით და მათგან მიიღო შესაბამისი პასუხები.

„საერთო ჯამში, დისბალანსიანი ბიულეტენების რაოდენობა იყო 0,16%. კომისიამ დაადგინა, რომ იყო იმდენად მიზერული განსხვავება, რომ არანაირი არსებითი გავლენა არ შეიძლებოდა მოეხდინა შედეგებზე. ეს განსხვავებები ფიქსირდებოდა მეასედებში - 0,01%- 0,02%, როგორც მეტობის, ისე ნაკლებობის თვალსაზრისით“, - განაცხადა მიქანაძემ.

ამასთან, საგამოძიებო კომისიის თავმჯდომარემ აღნიშნა, რომ არცერთ ოპოზიციურ პარტიას არ წარმოუდგენია თუნდაც ერთი მტკიცებულება იმისა, რომ არჩევნები გაყალბდა ან მოხდა რაიმე მანიპულაცია. მეტიც, ოპოზიციის წარმომადგენლებს არამხოლოდ არ მიუღიათ მონაწილეობა კომისიის მუშაობაში, არამედ ისინი სხდომებსაც არ დასწრებიან, აღნიშნა მიქანაძემ.

დროებითი საპარლამენტო დასკვნის განხილვა ამჯერადაც პრაქტიკულად ოპოზიციის გარეშე წარიმართა. ოპოზიციონერი დეპუტატების უმრავლესობა განხილვას არ ესწრებოდა.

„როდესაც ამ თემაზე კომისიამ მუშაობა დაასრულა და ეს თემა გამოდის განსახილველად, ოპოზიციის მხოლოდ სამი წარმომადგენელია დარბაზში, „ნაცმოძრაობიდან“ არცერთი. შემკამათებელი არ გყავთ იმ თემაზე, რომელი თემითაც უნდოდათ არეულობის მოწყობა, 6 თვე, ვიდრე შეთანხმებას ხელი არ მოეწერა, აჯანჯღარებდნენ ამ ქვეყანას“, - განაცხადა საპარლამენტო უმრავლესობის ლიდერმა მამუკა მდინარაძემ.

მმართველმა პარტიამ გასულ კვირაში ოპოზიციას მოუწოდა, მონაწილეობა მიიეღო დროებითი საგამოძიებო კომისიის დასკვნის განხილვასა და დამტკიცებაში. როგორც გავრცელებულ განცხადებაში იყო აღნიშნული, თუ ოპოზიციის ლიდერებს კვლავ მიაჩნიათ, რომ პარლამენტის მრავალთვიან საბოტაჟს ლეგიტიმური საფუძველი გააჩნია, მათ თავიანთი სიმართლის დამტკიცება უნდა სცადონ.

აღნიშნულ საკითხთან დაკავშირებით საკუთარი არგუმენტები ოპოზიციასაც გააჩნია.

„პოსტფაქტუმ, კრიზისის პერიოდში, საგამოძიებო კომისიის შექმნა, სადაც მხოლოდ თავად (მმართველი პარტია - რედ.) იღებენ მონაწილეობას, რა თქმა უნდა, ვერ დადებს დასკვნას, რომელიც საზოგადოების აზრზე იმოქმედებს ან რაიმე სანდოობა ექნება. ეს არის ძალიან სამწუხარო”, – განაცხადა არლამენტის ფრაქცია “შარლ მიშელის რეფორმების ჯგუფის” თავმჯდომარემ ხათუნა სამნიძემ.

უფრო ადრე მმართველმა პარტიამ განაცხადა, რომ კომისია ხმებს უბნების ნაწილზე გადაითვლის და თუ ეს შედეგები საქართველოს ცესკოს შედეგებთან 1%-ზე მეტით იქნება აცდენილი, ქვეყანაში ახალი საპარლამენტო არჩევნები დაინიშნება.

არჩევნების შედეგებით, მმართველმა პარტია „ქართულმა ოცნებამ" პარლამენტში 90 ადგილი მიიღო, დანარჩენი 60 ადგილი კი რვა ოპოზიციურ პარტიას შორის გადანაწილდა.

0