ახალწვეულები

ძალადობა ჯარისკაცებზე დაკავებულია შსს-ს ორი თანამშრომელი

92
(განახლებულია 22:45 22.04.2021)
არაადამიანური, ღირსების შემლახავი მოპყრობისთვის დაკავებულებს ხუთიდან რვა წლამდე თავისუფლების აღკვეთა ემუქრებათ.

თბილისი, 22 აპრილი – Sputnik. შინაგან საქმეთა სამინისტროს ობიექტების დაცვის დეპარტამენტის ორი თანამშრომელი სავალდებულო სამხედრო სამსახურში მყოფი ჯარისკაცების მიმართ განხორციელებული სამსახურებრივი უფლებამოსილების გადამეტებისა და პირადი ღირსების შემლახავი ქმედების ბრალდებით დააკავეს, იუწყება საქართველოს შსს-ს გენერალური ინსპექცია.

„კორტების საქმე“: მოკლულის ოჯახი სახელმწიფოსგან კომპენსაციას მიიღებს>>

საქმეში ფიგურირებს სავარაუდო დანაშაულების სხვადასხვა ეპიზოდი, რომლებიც „იაღლუჯას“ საწვრთნელ სამხედრო ბაზაზე 2020 წლის იანვრიდან ივლისის ჩათვლით პერიოდში მოხდა.

ჩადენილი დანაშაული ხუთიდან რვა წლამდე პატიმრობით ისჯება.

გამოძიებამ დაადგინა, რომ შინაგან საქმეთა სამინისტროს ობიექტების დაცვის დეპარტამენტის საბრძოლო მომზადებისა და გადამზადების სამმართველოს ცვლის უფროსებმა გადაამეტეს სამსახურებრივ უფლებამოსილებას, სხვა ჯარისკაცების თანდასწრებით ვადიანი სამხედრო მოსამსახურეების მიმართ გამოიყენეს კანონით აკრძალული დასჯის მეთოდები, რომლითაც შელახეს მათი პირადი ღირსება, არსებითად დაარღვიეს მათი უფლებები, მიაყენეს მორალური და ფიზიკური ტკივილი და დააზიანეს სახელმწიფოს კანონიერი ინტერესები.

ერთ-ერთ ეპიზოდში აღნიშნულია, რომ ერთ-ერთი ცვლის უფროსი სამხედროებს სპეციალური ეკიპირებით, რომელიც 10 კილოგრამს იწონის, ორი საათის განმავლობაში მუხლზე დამდგარს აიძულებდა, კბილის ჯაგრისით გაეხეხათ ყაზარმის ტუალეტის იატაკი.

ორი თვის შემდეგ, მაისში მან გაიმეორა მსგავსი ქმედება სხვა სამხედროების მიმართ და მათ ტუალეტის ხეხვა 11 საათის განმავლობაში აიძულა.

ცვლის ეს უფროსი ასევე გადის სამხედრო მოსამსახურის ცემის ეპიზოდში 2020 წლის ივლისში.

მეორე დაკავებულს ასევე ბრალად ედება სამსახურებრივი უფლებამოსილების გადაჭარბებით სამხედროების მიმართ არაადამიანური და ღირსების შემლახავი მოპყრობა. ის სამ ეპიზოდში ფიგურირებს.

როგორც გენინსპექციის განცხადებაშია აღნიშნული, დაკავებულების მიერ ჩადენილი დანაშაულები დასტურდება ათეულობით მოწმის პირდაპირი ჩვენებებით, ბრალდებულთა მობილურ ტელეფონებზე ჩატარებული კომპიუტერული ექსპერტიზის დასკვნებით, გამოძიების მიერ მოპოვებული ფოტო-მტკიცებულებებით, შინაგან საქმეთა სამინისტროდან გამოთხოვილი დოკუმენტებით და სხვა მტკიცებულებებით.

დაკავებულებს ოფიციალური ბრალი უკვე წარუდგინეს. ისინი დუმილის უფლებას იყენებენ.

92
თემები:
კრიმინალი საქართველოში (1302)
სასწრაფო დახმარების მანქანა

ქალი, რომელიც პეკინზე ხანძრის დროს მეექვსე სართულიდან გადავარდა, გარდაიცვალა

52
შემთხვევის ადგილზე 14 სახანძრო–სამაშველო ბრიგადა იყო მობილიზებული, ამ დროისთვის ხანძარი სრულად ლიკვიდირებულია.

თბილისი, 18 მაისი - Sputnik. 35 წლამდე ქალი, რომელიც პეკინის გამზირზე ხანძრის დროს მეექვსე სართულიდან გადავარდა, გარდაიცვალა. ინფორმაციას ხეჩინაშვილის სახელობის კლინიკაში ადასტურებენ.

დევნილთა საცხოვრებელ კორპუსში ხანძარი 18 მაისს, დილით მოხდა. გავრცელებული ინფორმაციით, ცეცხლი 14–სართულიანი კორპუსის მეხუთე სართულზე გაჩნდა, რის შემდეგაც კორპუსის ზედა სართულებზე გავრცელდა.

დაშავებული ხეჩინაშვილის კლინიკაში გადაიყვანეს. ექიმების განცხადებით, ქალს მძიმე ტრავმული მდგომარეობა აღენიშნებოდა და მისი გადარჩენა ვერ მოხერხდა.

გამოძიება დაადგენს, ახალგაზრდა ქალი სიმაღლიდან გადახტა, თუ შემთხვევით გადავარდა.

ცეცხლმოკიდებული კორპუსიდან  მეხანძრე-მაშველებმა ბავშვები გამოიყვანეს და მოსახლეების  ევაკუაცია განახორციელეს.

ამ დროისთვის კორპუსში ხანძარი სრულად ლიკვიდირებულია.

52
ვითარება დმანისში

ვითარება დმანისში: ბოლო ცნობები

25
შინაგან საქმეთა მინისტრის განცხადებით, დაპირისპირების შედეგად დაშავებულები არიან, მაგრამ სერიოზული დაზიანებები არ მიუღიათ არც პოლიციელბს და არც ინციდენტის მონაწილეებს

თბილისი, 18 მაისი – Sputnik. ამჟამად ვითარება დმანისში სტაბილურია, თუმცა იქ კვლავ რჩებიან პოლიციის დამატებითი ძალები, რომლებიც სიტუაციას აკონტროლებენ.

მასობრივი დაპირისპირება დმანისში ეთნიკურ აზერბაიჯანელებსა და ეკომიგრანტებს შორის სვანეთიდან თითქმის ერთი დღე–ღამე გაგრძელდა. მხარეთა შერიგება ადგილობრივი და ცენტრალური ხელისუფლების წარმომადგენლების, ასევე სასულიერო პირების ჩარევით მოხერხდა. საქმეზე გამოძიება დაწყებულია. გრძელდება ინციდენტის მონაწილეთა დაკითხვა.

დმანისში იმყოფება შინაგან საქმეთა მინისტრი ვახტანგ გომელაური, რომელმაც განაცხადა, რომ სერიოზული დაზიანებები დაპირისპირების დროს არ მიუღია არც პოლიციელებს და არც ინციდენტის მონაწილეებს.

შერიგებისა და სამოქალაქო თანასწორობის საკითხებში სახელმწიფო მინისტრის აპარატი მიესალმება ინციდენტის ამოწურვას და იმედს გამოთქვამს, რომ საქართველოს თითოეული მოქალაქე, ეთნიკური წარმომავლობის მიუხედავად, გააცნობიერებს სახელმწიფოებრივ პასუხისმგებლობას სტაბილური, მშვიდობიანი და თანასწორი გარემოს განმტკიცებისთვის ქვეყანაში.

„მნიშვნელოვანია, რომ თითოეული მოქალაქე სიფრთხილით მოეკიდოს ისეთი განცხადებების გაკეთებას, რასაც მსგავს სიტუაციებში შეუძლია გამოიწვიოს ვითარების ხელოვნურად დაძაბვა სახელმწიფოსა და ჩვენი მრავალეთნიკური საზოგადოების ინტერესების საზიანოდ“, – აღნიშნულია უწყების განცხადებაში.

აღმოსავლეთ საქართველოს მუფთმა ეტიბარ ემინოვმა დაპირისპირებულ მხარეებთან შეხვედრის შემდეგ განაცხადა, რომ მხარეები შერიგებაზე შეთანხმდნენ და კონფლიქტი არ გაგრძელდება.

გომელაური და ლილუაშვილი დმანისში ჩავიდნენ>>

„ძალიან მოხარული და ბედნიერი ვარ, რომ ყოფით ნიადაგზე მომხდარი კონფლიქტი, რომლის გაღვივების საშიშროებაც იყო, ყველა მხარის – სასულიერო პირების, სახელმწიფოს, მოსახლეობის ჩართულობით იქნა მიღწეული შეთანხმება, ერთმანეთს მიუტევეს, შერიგდნენ და ეს არის ძალიან სასიხარულო და მისასალმებელი. ჩემი, როგორც სასულიერო პირის სურვილი და რჩევა იქნება ადგილობრივების მიმართ, გაუფრთხილდნენ ერთმანეთს. დარწმუნებული ვარ, ჩვენი ხალხი არ დაუშვებს, კონფლიქტი გაღვივდეს, ისინი ყოველთვის შერიგებისა და მშვიდობიანი თანაცხოვრების მომხრეები არიან“, – განაცხადა მან.

ეთნიკურ აზერბაიჯანელებსა და სვანეთიდან ეკომიგრანტებს შორის დაპირისპირება, რომელიც ბეისბოლის ბიტებისა და ხის ხელკეტების გამოყენებით სისხლიან გარჩევაში გადაიზარდა, კვირას, საღამოს დაიწყო იმის გამო, რომ ერთ-ერთი ადგილობრივი მაღაზიის მეპატრონემ ახალგაზრდებს ლუდის ნისიად მიცემაზე უარი უთხრა.

თვითმხილველების თქმით, განაწყენებულმა ახალგაზრდებმა დასახმარებლად სხვებიც იხმეს და მაღაზიის მფლობელთან საქმის გარჩევა სცადეს. დამცველები ამ უკანასკნელსაც გამოუჩნდნენ. ჩხუბში დაახლოებით ორი ათეული ახალგაზრდა აღმოჩნდა ჩართული.

ვითარება დმანისში ორშაბათ დილითაც დაიძაბა – ქუჩებში განახლდა მასობრივი ჩხუბი. შეკრებილები თავს დაესხნენ ჟურნალისტებს და აგრესია პოლიციელების მიმართაც გამოამჟღავნეს.

შსს საზოგადოებრივი წესრიგის აღდგენას დიდხანს ცდილობდა. მობილიზება მოხდა დამატებითი ძალების. პოლიციამ შეზღუდა ქალაქში შესვლა–გამოსვლა. დმანისში მოხვედრა მხოლოდ სპეციალური საშვით შეიძლება.

25
თემები:
შემთხვევები საქართველოში
პატრული

ბრძოლა COVID-19-თან: რეგულაციების დარღვევის ფაქტები ბოლო 24 საათში

0
(განახლებულია 12:10 18.05.2021)
შექმნილი ეპიდვითარების გამო საქართველოში 28 ნოემბრიდან დაწესებული რეგულაციებიდან დარჩენილია „კომენდანტის საათი“, პირბადე, დისტანცია და რამდენიმე სხვა შეზღუდვა.

თბილისი, 18 მაისი – Sputnik. პოლიციამ ბოლო 24 საათის განმავლობაში მთელი ქვეყნის მასშტაბით დაწესებული შეზღუდვების ფარგლებში მოქმედი რეგულაციების დარღვევის 1.240 ფაქტი გამოავლინა, იუწყება შინაგან საქმეთა სამინისტრო. 

არსებული ეპიდემიოლოგიური ვითარების გამო საქართველოში 28 ნოემბრიდან ახალი შეზღუდვები ამოქმედდა, რომლებიც 2021 წლის 31 იანვრის ჩათვლით იყო ძალაში. შეზღუდვების ეტაპობრივი შემსუბუქების გეგმა საქართველოს პრემიერ-მინისტრმა ირაკლი ღარიბაშვილმა თებერვლის ბოლოს წარმოადგინა და შეზღუდვების ეტაპობრივად მოხსნაც დაიწყო. თუმცა ძალაში რჩება წესები, რომლებიც ეხება პირბადის ტარებას, ღამით გადაადგილების აკრძალვას და სხვ.

პოლიციამ იზოლაციისა და კარანტინის წესის დარღვევისთვის 79 ფიზიკური პირი დააჯარიმა.

დაჯარიმებულთა შორის არიან მოქალაქეები, რომლებმაც საღამოს 9 საათიდან დილის 5 საათამდე დაწესებული გადაადგილების შეზღუდვის წესი დაარღვიეს.

გარდა ამისა, 24 საათის განმავლობაში პირბადის ტარების წესის დარღვევის ფაქტზე 975 ფიზიკური პირია დაჯარიმებული, ხოლო პირბადის ტარების წესის განმეორებით დარღვევის 186 ფაქტია გამოვლენილი.

პირბადის ტარების წესის დარღვევა ითვალისწინებს ჯარიმას 20 ლარის ოდენობით, ხოლო პირბადის ტარების წესის განმეორებით დარღვევა ისჯება 40 ლარიანი ჯარიმით.

იზოლაციისა და კარანტინის წესის დარღვევა ფიზიკური პირის დაჯარიმებას 2 ათასი ლარით, ხოლო იურიდიული პირის – 10 ათასი ლარის ოდენობით. განმეორებითი ჯარიმა კი სისხლისსამართლებრივ პასუხისმგებლობას ითვალისწინებს.

შინაგან საქმეთა სამინისტრო მოუწოდებს მოქალაქეებს, გამოიჩინონ მაღალი საზოგადოებრივი პასუხისმგებლობა და დაემორჩილონ არსებულ რეგულაციებს.

0