აფგან მუხთარლი

საქართველოს გენპროკურატურამ და აფგან მუხთარლიმ საერთო ენა ვერ გამონახეს

73
ორმა თარჯიმანმა - თურქულენოვანმა და აზერბაიჯანულენოვანმა - ვერ დააკმაყოფილა გამომძიებლები, ამიტომ აფგან მუხთარლის პროკურატურაში კიდევ ერთი შეხვედრა ელოდება

თბილისი, 8 აპრილი – Sputnik. აზერბაიჯანელი ჟურნალისტის აფგან მუხთარლის გამოკითხვა საქართველოს გენპროკურატურაში თარგმანთან დაკავშირებული პრობლემების გამო ვერ შედგა, განუცხადა ჟურნალისტებს ადვოკატმა არჩილ ჩოფიკაშვილმა.

აფგან მუხთარლის პროკურატურაში დღეს გამოკითხავენ >>

იურისტის თქმით, მათ თავდაპირველად თურქულენოვანი თარჯიმანი დახვდათ და მხოლოდ საათნახევრის შემდეგ აზერბაიჯანულენოვანი თარჯიმანი მოვიდა. კიდევ 2 საათის შემდეგ გაირკვა, რომ თარგმანში უზუსტობები იყო.

„როდესაც გამოკითხვაზე მივედით, დაგვხვდა თურქულენოვანი თარჯიმანი. დაახლოებით საათნახევარი დასჭირდათ დრო, რათა მოეწვიათ აზერბაიჯანულენოვანი თარჯიმანი, მაგრამ გამოკითხვის დაწყების შემდეგ, დაახლოებით 2 საათის შემდეგ გაირკვა, რომ თარგმნის დროს იყო გარკვეული ხარვეზები და ამის გამო ვეღარ დასრულდა გამოკითხვა. დღეს გახდა ჩვენთვის ცნობილი, გამოძიება აპირებს, რომ ჩაატაროს საგამოძიებო ექსპერიმენტი. ყველა წინადადებაზე განვაცხადეთ თანხმობა. ხვალისათვის თუ იქნება უზრუნველყოფილი თარჯიმანი, მზად ვართ, გამოვცხადდეთ. აფგან მუხთარლი მზად არის, გამოძიებასთან ითანამშრომლოს.– განაცხადა ადვოკატმა.

ჩოფიკაშვილის თქმით, დღევანდელი გამოკითხვის ჩაწერა თავიდან მოხდება.

მუხთარლი თბილისში 7 აპრილს ჩამოვიდა. ეს ჟურნალისტის საქართველოში პირველი ვიზიტია 2017 წელს მისი გატაცების შემდეგ. მისი ჩამოსვლა საქართველოს პროკურატურაში ჩვენების მიცემას უკავშირდება.

მუხთარლი თბილისიდან 2017 წლის მაისის ბოლოს გაუჩინარდა. მოგვიანებით გაირკვა, რომ ის ბაქოში პატიმრობაში იმყოფებოდა, ბრალად ედებოდა საზღვრის უკანონო გადაკვეთა, ფულის კონტრაბანდა და პოლიციის თანამშრომლისთვის წინააღმდეგობის გაწევა. 2018 წლის იანვარში აზერბაიჯანულმა სასამართლომ მას ექვსი წლით თავისუფლების აღკვეთა მიუსაჯა.

მას შემდეგ, რაც ოჯახმა განაცხადა, რომ მუხთარლი მოიტაცეს, ფული ჩაუდეს და ფარულად გაიყვანეს აზერბაიჯანში, საქართველოს შსს-მ აღძრა სისხლის სამართლის საქმე თავისუფლების უკანონოდ აღკვეთის მუხლით.

მუხთარლი 2020 წლის მარტში გათავისუფლდა და ბაქოდან მაშინვე გერმანიაში გაფრინდა. 2020 წლის ოქტომბრის შემდეგ რამდენჯერმე სცადა თბილისში ჩამოსვლა გამოძიებისთვის ჩვენების მისაცემად, თუმცა, მისი თქმით, პრობლემებს საქართველოს ხელისუფლება უქმნიდა.

მუხთარლის საქმეზე გამოძიება საქართველოს სისხლის სამართლის კოდექსის 143-ე მუხლის პირველი ნაწილით მიმდინარეობს, რაც თავისუფლების უკანონოდ აღკვეთას გულისხმობს და ორიდან ოთხ წლამდე პატიმრობით ისჯება.

73
პატრული

ბრძოლა COVID-19-თან: რეგულაციების დარღვევის რამდენი ფაქტი გამოვლინდა ბოლო 24 საათში

23
(განახლებულია 11:26 14.04.2021)
შექმნილი ეპიდვითარების გამო საქართველოში 28 ნოემბრიდან დაწესებული რეგულაციებიდან დარჩენილია „კომენდანტის საათი“, პირბადე, დისტანცია და რამდენიმე სხვა შეზღუდვა.

თბილისი, 14 აპრილი – Sputnik. პოლიციამ ბოლო 24 საათის განმავლობაში მთელი ქვეყნის მასშტაბით დაწესებული შეზღუდვების ფარგლებში მოქმედი რეგულაციების დარღვევის 1.259 ფაქტი გამოავლინა, იუწყება შინაგან საქმეთა სამინისტრო. 

არსებული ეპიდემიოლოგიური ვითარების გამო საქართველოში 28 ნოემბრიდან ახალი შეზღუდვები ამოქმედდა, რომლებიც 2021 წლის 31 იანვრის ჩათვლით იყო ძალაში. შეზღუდვების ეტაპობრივი შემსუბუქების გეგმა საქართველოს პრემიერ-მინისტრმა ირაკლი ღარიბაშვილმა თებერვლის ბოლოს წარმოადგინა და შეზღუდვების ეტაპობრივად მოხსნაც დაიწყო. თუმცა ძალაში რჩება წესები, რომლებიც ეხება პირბადის ტარებას, ღამით გადაადგილების აკრძალვას და სხვ.

პოლიციამ იზოლაციისა და კარანტინის წესის დარღვევისთვის 95 ფიზიკური და ერთი იურიდიული პირი დააჯარიმა.

დაჯარიმებულთა შორის არიან მოქალაქეები, რომლებმაც საღამოს 9 საათიდან დილის 5 საათამდე დაწესებული გადაადგილების შეზღუდვის წესი დაარღვიეს.

გარდა ამისა, 24 საათის განმავლობაში პირბადის ტარების წესის დარღვევის ფაქტზე 1.053 ფიზიკური პირია დაჯარიმებული, ხოლო პირბადის ტარების წესის განმეორებით დარღვევის 110 ფაქტი გამოვლინდა.

პირბადის ტარების წესის დარღვევა ითვალისწინებს ჯარიმას 20 ლარის ოდენობით, ხოლო პირბადის ტარების წესის განმეორებით დარღვევა ისჯება 40 ლარიანი ჯარიმით.

იზოლაციისა და კარანტინის წესის დარღვევა ფიზიკური პირის დაჯარიმებას 2 ათასი ლარით, ხოლო იურიდიული პირის – 10 ათასი ლარის ოდენობით. განმეორებითი ჯარიმა კი სისხლისსამართლებრივ პასუხისმგებლობას ითვალისწინებს.

შინაგან საქმეთა სამინისტრო მოუწოდებს მოქალაქეებს, გამოიჩინონ მაღალი საზოგადოებრივი პასუხისმგებლობა და დაემორჩილონ არსებულ რეგულაციებს.

23
პოლიცია აკონტროლებს ქალაქის ცენტრს

თბილისში ბარი კოვიდ-შეზღუდვების დარღვევის გამო დალუქეს

32
(განახლებულია 00:04 14.04.2021)
გასული წლის ნოემბრის ბოლოს, კორონავირუსის მეორე ტალღის დროს რესტორნების მუშაობა აკრძალული იყო, ამის შემდეგ შეზღუდვები ეტაპობრივად იხსნება.

თბილისი, 14 აპრილი - Sputnik. თბილისში, კოსტავას ქუჩაზე ბარი „ოთახი“ უკანონო ეკონომიკური საქმიანობის გამო დააჯარიმეს და დალუქეს, ნათქვამია შრომის ინსპექციის ვებგვერდზე გავრცელებულ განცხადებაში.

საქართველოს მასშტაბით ეპიდვითარების გაუარესება შეინიშნება, რასთან დაკავშირებით მონიტორინგის ჯგუფები ობიექტების აქტიურ შემოწმებას ახორციელებენ და მკაცრად ადევნებენ თვალს, თუ როგორც იცავენ მთავრობის #322 დადგენილებას „იზოლაციის და კარანტინის წესების დამტკიცების შესახებ“.

შრომის ინსპექციის ინფორმაციით, 1 აპრილს დაჯარიმდა კომპანია „მარგი“, რომელიც ერთსა და იმავე მისამართზე ფუნქციონირებდა. ამის შემდეგ იურიდიულმა პირმა შეიცვალა დასახელება და საქმიანობა „ოცნება-2“-ის სახელით გააგრძელა. ისინი 7 აპრილს დაჯარიმდნენ.

შედეგად 30 ათასი ლარით დაჯარიმდა ერთ მისამართზე რეგისტრირებული და სამართალდარღვევის სქემის მიხედვით მოქმედი სამი იურიდიული პირი. დღეს, შრომის მთავარი ინსპექტორის ბრძანების მიხედვით, ობიექტზე მესამე პირთა შესვლა შეიზღუდა.

იურიდიული პირი შპს „ოცნება-2“-ის მიმართ მთავრობის დადგენილების არაერთგზის დარღვევის გამო შესაბამისი ზომები გატარდება, საქმის მასალები შსს-ს გადაეცა.

კორონავირუსის გავრცელების საფრთხის გამო საქართველოში გარკვეული შეზღუდვები მოქმედებს. რესტორნები და კაფეები უქმე დღეებში მხოლოდ გატანაზე მუშაობენ, ხოლო სამუშაო დღეებში „კომენდანტის საათის“ დადგომამდე, 21:00 საათამდე მუშაობენ.

გარდა ამისა, დაწესებულებების მეპატრონეები ვალდებულები არიან თვალი ადევნონ, რომ ერთ მაგიდასთან არ იჯდეს ექვსზე მეტი ადამიანი, დაიცვან სანიტარული ნორმები და ორ კვირაში ერთხელ თანამშრომლების ტესტირება ჩაატარონ.

გასული წლის ნოემბრის ბოლოს, კორონავირუსის მეორე ტალღის დროს რესტორნების მუშაობა მთლიანად აკრძალული იყო, ამის შემდეგ შეზღუდვები ეტაპობრივად იხსნება, მაგრამ რესტორატორები უკმაყოფილონი არიან.

32
დისტანციური სწავლება

ფოთში სასწავლო პროცესი შეწყდა: სკოლები დისტანციურ რეჟიმზე გადავიდნენ

0
(განახლებულია 14:14 14.04.2021)
საქართველოში ბოლო 24 საათში გამოვლენილი კორონავირუსის 1.085 ახალი დადასტურებული შემთხვევიდან 120 სამეგრელო–ზემო სვანეთში  დაფიქსირდა

თბილისი, 14 აპრილი - Sputnik. ფოთის მუნიციპალიტეტში  გაზრდილი ინფიცირების შემთხვევის გამო, საჯარო და კერძო სკოლები სწავლების დისტანციურ რეჟიმზე გადავიდნენ, იუწყება პირველი არხი.

ფოთის რესურს–ცენტრის უფროსის გოჩა ქორქიას განცხადებით, ფოთის მასშტაბით 11 საჯარო და ოთხი კერძო სკოლა ონლაინ–ფორმატში ორი კვირის ვადით გააგრძელებს ფუნქციონირებას. 

„აღნიშნული გადაწყვეტილება კორონავირუსის გავრცელების თავიდან აცილების მიზნით განხორციელდა. სასწავლო დაწესებულებებში კვლავაც გაგრძელდება პედაგოგთა ტესტირებები და სკოლის ადმინისტრაციები მოსწავლეთა ჯანმრთელობის მდგომარეობის მონიტორინგს განახორციელებენ“, – განაცხადა რესურს ცენტრის ხელმძღვანელმა, გოჩა ქორქიამ.

ქვეყნის მასშტაბით ინფიცირების მატების გამო საქართველოს განათლებისა და მეცნიერების სამინისტრო საზოგადოებას კიდევ ერთხელ მიმართავს თხოვნით, ზედმიწევნით დაიცვან ჯანდაცვის სამინისტროს მიერ შემუშავებული რეკომენდაციები, რათა მოსწავლეებმა სემესტრის დასრულება ბუნებრივ გარემოში, სასკოლო სივრცეში შეძლონ.

განათლების სამინისტროს ინფორმაციით, საქართველოში ამ ეტაპზე სრულ დისტანციურ სწავლებაზე 43 სკოლა და 174 ცალკეული კლასი იმყოფება.

0
თემები:
განათლება საქართველოში