ვახტანგ გომელაური

„რაც შეგვეძლო, ყველაფერი გავაკეთეთ“: გომელაური 14 წლის გოგონას გარდაცვალებას გამოეხმაურა

107
(განახლებულია 16:29 21.02.2021)
თუ ვინმეს გაუჩნდება კითხვები გამოძიების მსვლელობაზე, ეს იქნება ოჯახის წევრი თუ სხვა პირი, შეუძლია გაეცნოს ყველა იმ ღონისძიებას, რომელიც შსს-მ გაატარა

თბილისი, 14 თებერვალი — Sputnik. გამოძიების მსვლელობისას პოლიციამ გააკეთა ყველაფერი, რაც კანონით არის შესაძლებელი, განაცხადა შინაგან საქმეთა მინისტრმა ვახტანგ გომელაურმა 14 წლის გოგონას გარდაცვალების ფაქტის კომენტირებისას.

9 თებერვალს ქობულეთის ერთ-ერთ სოფელში საკუთარი სახლის ეზოში 14 წლის გოგონა ჩამომხრჩვალი იპოვეს. მეორე დღეს დააკავეს 23 წლის ნიკოლოზ ტაკიძე. პროკურატურის მონაცემებით, მან მეცხრეკლასელ გოგონასთან სექსუალური კავშირი 2020 წლის ივნისსა და დეკემბერში მოტყუებით დაამყარა, ის დაპირდა, რომ მომავალში ცოლად შეირთავდა, თუმცა შემდგომში კონტაქტი გაწყვიტა მასთან. მოგვიანებით კი გოგონას განუცხადა, რომ მის ცოლად შერთვას არ აპირებდა.

ტაკიძეს ბრალად ედება თვითმკვლელობამდე მიყვანა და 16 წელს მიუღწეველთან სქესობრივი კავშირი. ბათუმის საქალაქო სასამართლომ მას პატიმრობა შეუფარდა.

გარდა ამისა, მედიის მონაცემებით, გოგონა განიცდიდა ფიზიკურ ძალადობას ნათესავების მხრიდან, მათ შორის ბაბუის მხარიდან. როდესაც მათ გაიგეს, რომ გოგონას სექსუალური ურთიერთობა ჰქონდა, მას სასტიკად გაუსწორდნენ.

„ძალიან მძიმე ფაქტია, როდესაც ახალგაზრდა ადამიანი, ბავშვი – სიცოცხლეს თვითმკვლელობით დაასრულებს. პირველ რიგში სამძიმარს ვუცხადებ მის ოჯახს. რაც შეეხება გამოძიებას, ჩვენ რაც შეგვეძლო, ყველაფერი გავაკეთეთ, რაც კანონმა მოგვცა უფლება, შესაძლებლობა, ჩაგვეტარებინა საგამოძიებო მოქმედებები, გამოკითხვები ყველაფერი გავაკეთეთ“, – განუცხადა მინისტრმა ჟურნალისტებს.

„ეს ტრაგედიაა“ - საქართველოს პრეზიდენტი აჭარაში გოგონას დაღუპვას გამოეხმაურა >>

გომელაურის თქმით, თუ ვინმეს გაუჩნდება კითხვები გამოძიების მსვლელობაზე, ეს იქნება ოჯახის წევრი თუ სხვა პირი, შეუძლია გაეცნოს ყველა იმ ღონისძიებას, რომელიც შსს-მ გაატარა.

წინასასამართლო მოსმენა საქმეზე 6 აპრილისთვის არის დანიშნული.

107
ბავშვი ითხოვს მოწყალებას

მამას, რომელიც შვილს მათხოვრობას აიძულებდა, ბრალი წარედგინა

37
მამაკაცს, რომელიც 6 წლის განმავლობაში თავის 11 წლის შვილზე ძალადობდა და მათხოვრობას აიძულებდა, 14-დან 17 წლამდე პატიმრობა ემუქრება

თბილისი, 1 მარტი – Sputnik. მამაკაცს, რომელიც 11 წლის შვილს მათხოვრობას აიძულებდა, არასრულწლოვნის შრომითი ტრეფიკინგის ფაქტზე ბრალდება წარედგინა, იუწყება საქართველოს გენერალური პროკურატურა

გენერალური პროკურატურის ცნობით, ჩატარებული გამოძიებით დადგინდა, რომ 2015 წლიდან 2021 წლის იანვრის ჩათვლით მამაკაცი ფიზიკური ძალადობით და ფსიქოლოგიური ზეწოლით აიძულებდა ბავშვს თბილისის ქუჩებში მოწყალების თხოვნას და სხვადასხვა ნივთების გაყიდვას. ამასთან, სავალდებულოდ დაუწესა მისთვის ყოველ დღე 50 ლარის მიტანა, შეუსრულებლობის შემთხვევაში კი მასზე ძალადობდა ფიზიკურად და ფსიქოლოგიურად. მცირეწლოვანის მიერ მათხოვრობით ნაშოვნ ფულს კი თვითონ ისაკუთრებდა.

„შრომითი ექსპლუატაციის განხორციელების შედეგად, ზიანდებოდა არასრულწლოვნის ჯანმრთელობა, ფიზიკური და სულიერი განვითარება. ბრალდების შესახებ დადგენილების გაცნობის შემდეგ, მამაკაცმა აღიარა ჩადენილი დანაშაული და თავი დამნაშავედ ცნო წარდგენილ ბრალდებაში“, - ნათქვამია პროკურატურის გვერდზე გავრცელებულ ინფორმაციაში.

მამაკაცს ბრალდება წარედგინა საქართველოს სისხლის სამართლის კოდექსის 432-ე მუხლის მე-2 ნაწილის „ბ“ ქვეპუნქტით და მე-3 ნაწილის „ბ“ და „ე“ ქვეპუნქტებით - „არასრულწლოვნით ვაჭრობა (ტრეფიკინგი)“, „არასრულწლოვნის გადაბირება ექსპლუატაციის მიზნით, დამნაშავისათვის წინასწარი შეცნობით მასზე მატერიალურად და სხვაგვარად დამოკიდებულის მიმართ, ჩადენილი იძულებით, ჯანმრთელობისათვის საშიში ძალადობით და ასეთი ძალადობის გამოყენების მუქარით“, რაც სასჯელის სახით 14-დან 17 წლამდე თავისუფლების აღკვეთას ითვალისწინებს.

უწყების ცნობით, ბრალდებულს სხვა სისხლის სამართლის საქმეზე წარმოებული გამოძიების ფარგლებში შეფარდებული აქვს პატიმრობა. შესაბამისად, პროკურატურა თბილისის საქალაქო სასამართლოს კანონით დადგენილ ვადაში მიმართავს შუამდგომლობით წინასასამართლო სხდომის თარიღის განსაზღვრის შესახებ.

37
ხელბორკილი

ქრთამის აღების ფაქტზე სამგორის რაიონის გამგეობის თანამშრომელი დააკავეს

43
(განახლებულია 17:35 01.03.2021)
სამგორის რაიონის გამგეობის თანამშრომელი უცხოელ ბიზნესმენებს გარკვეული თანხის სანაცვლოდ მათ მიერ შესაძენად შერჩეულ მიწის ნაკვეთთან მისასვლელი გზის მოწყობას შეჰპირდა

თბილისი, 1 მარტი - Sputnik. სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დიდი ოდენობით ქრთამის მოთხოვნისა და აღების ფაქტზე სამგორის რაიონის გამგეობის თანამშრომელი დააკავეს. იუწყება სახელმწიფო უსაფრთხოების სასახური.

გამოძიებამ დაადგინა, რომ თბილისის მუნიციპალიტეტის მერიის სამგორის რაიონის გამგეობის თანამშრომელი უცხოელ ბიზნესმენებს დაჰპირდა, რომ მათ მიერ შესაძენად შერჩეულ მიწის ნაკვეთთან მისასვლელი გზის მოსაწყობად მიმდებარე ტერიტორიაზე არსებულ ჯანმრთელ ხეებს მოჭრიდა. ამის სანაცვლოდ კი მერიის თანამშრომელმა 8 ათასი დოლარის გადახდა მოითხოვა.

„მიმდინარე წლის 26 თებერვალს სამგორის რაიონის გამგეობის თანამშრომელმა აიღო მის მიერ ქრთამის სახით მოთხოვნილი თანხის ნაწილი – 4 000 აშშ დოლარის ოდენობით, რა დროსაც იგი ანტიკორუფციული სააგენტოს თანამშრომლებმა ბრალდებულის სახით დააკავეს“, - ნათქვამია უწყების მიერ გავრცელებული განცხადებაში.

საქმეზე გამოძიება დიდი ოდენობით ქრთამის აღების ფაქტზე მიმდინარეობს. გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს.

43
თემები:
კრიმინალი საქართველოში
შარლ მიშელი

პლებისციტი არჩევნების ნაცვლად? შარლ მიშელმა ქართულ ოპოზიციას მიმართა

17
ევროპული საბჭოს პრეზიდენტმა თბილისში ვიზიტისას ოპოზიციის წარმომადგენლებთან მოლაპარაკებები გამართა.

თბილისი, 1 მარტი - Sputnik. ევროპის საბჭოს პრეზიდენტმა შარლ მიშელმა ქართული ოპოზიციის ლიდერებს პოლიტიკური კრიზისიდან გამოსასვლელად კომპრომისისკენ მოუწოდა, განაცხადა პარტია „სტრატეგია აღმაშენებლის“ ლიდერმა გიორგი ვაშაძემ სტუმართან შეხვედრის შემდეგ.

ოპოზიცია პარლამენტთან მშვიდობიან პროტესტს აანონსებს >>

ევროპული საბჭოს პრეზიდენტი საქართველოს კვირას ეწვია. მისი ვიზიტი პოლიტიკური კრიზისის ფონზე მიმდინარეობს. „ერთიანი ნაციონალური მოძრაობის“ ლიდერის, ნიკა მელიას დაკავების შემდეგ კრიზისი გამწვავდა და ოპოზიცია ქუჩაში გამოვიდა. ის ვადამდელ არჩევნებსა და პოლიტპატიმრების გათავისუფლებას ითხოვს.

„გარკვეულ შეთანხმებამდე უნდა მივიდეთ. ჩვენს მხარესთან იყო თხოვნა, რომ უნდა ვიყოთ გარკვეულწილად კომპრომისულები. ჩვენ ვთქვით, რომ რიგგარეშე არჩევნების ნაცვლად, შეგვიძლია წავიდეთ პლებისციტზე. ეს, ჩემი აზრით, ფუნდამენტური და დიდი კომპრომისია, რომელიც ოპოზიციას გაცხადებული აქვს“, - განუცხადა ვაშაძემ ჟურნალისტებს.

ამასთან, ვაშაძემ არ გამორიცხა, რომ მსგავსი შეთანხმების მიღწევა ოპოზიციასა და „ქართულ ოცნებას“ შორის მიმდინარე თვის ბოლომდეა შესაძლებელი.

„ნაციონალური მოძრაობის“ ერთ-ერთი ლიდერის, სალომე სამადაშვილის თქმით, შეხვედრაზე ოპოზიციას დაპირდნენ, რომ ევროკავშირი აქტიურად მიიღებს მონაწილეობას პოლიტიკური კრიზისიდან გამოსვლის პროცესში.

„ყველას ესმის, რომ პოლიტიკური კრიზისიდან გამოსავალი არის აუცილებლად მოსაძებნი... ევროკავშირს პოლიტიკური კრიზისის დასაძლევად ჩვენს ქვეყანაში აქვს გეოპოლიტიკური და გეოსტრატეგიული ინტერესი. სწორედ ამიტომ ჩვენ გვქონდა ძალიან საფუძვლიანი საუბარი იმაზე, როგორ შეიძლება ევროკავშირის ფუნქცია გაძლიერდეს ამ კრიზისიდან გამოსავლის მოსაძებნად“, - აღნიშნა სამადაშვილმა. 

პლებისციტს მხარი დაუჭირა ასევე ოპოზიციური პარტია „ევროპული საქართველოს“ ლიდერმა გიგა ბოკერიამ.

„ჩვენ პლებისციტს მხარს ვუჭერთ, როგორც სერიოზულ კომპრომისს. პოლიტიკური ფასი შეიძლება იყოს ცუდი ან ძალიან ცუდი თუ კრიზისის რეალურად განმუხტვაზე არ წამოვლენ, რაც პოლიტიკური პატიმრების გათავისუფლებას და ვადამდელ არჩევნების დანიშნვას გულისხმობს“, - განაცხადა ბოკერიამ.

ოპოზიციური პარტია „ლელოს“ ლიდერმა მამუკა ხაზარაძემ შეხვედრაზე ხელისუფლებასა და ოპოზიციას შორის ე.წ. ეროვნული თანხმობის დოკუმენტის გაფორმების წინადადება წამოაყენა.

„ჩვენ გვჭირდება დიალოგი, გაერთიანება ჩვენი ქვეყნის გარშემო“, - აღნიშნა მან.

როგორც შარლ მიშელმა ამასწინათ განაცხადა, მისი ვიზიტი მიმდინარეობს მწვავე პოლიტიკური კრიზისის ფონზე, რომელიც მეტად აწუხებს ევროკავშირს და პირადად მას. ამიტომ ევროკავშირი მხარეებს მოუწოდებს, ინტენსიურად იმუშაონ ვითარების განსამუხტად.

ოფიციალური ვიზიტის ფარგლებში იგი უკვე შეხვდა საქართველოს პრეზიდენტ სალომე ზურაბიშვილსა და პრემიერ ირაკლი ღარიბაშვილს.

შარლ მიშელი ქვეყანას 2 მარტს დატოვებს.

საქართველოში ვიზიტამდე შარლ მიშელი იმყოფებოდა მოლდავეთში. თბილისიდან კი კიევში გაემგზავრება.

 

17