ტყის ხანძრის ქრობა დასავლეთ საქართველოში

რა ხდება რაჭა-ლეჩხუმში: ხანძრის ქრობაში ავიაცია ჩაერთო

74
(განახლებულია 21:42 06.01.2021)
ბოლო დღეებში საქართველოს სხვადასხვა რეგიონში ცეცხლის ასზე მეტი კერა გაჩნდა, რომელთა დიდი ნაწილი უკვე ჩამქრალია.

თბილისი, 6 იანვარი — Sputnik. რაჭა-ლეჩხუმში ხანძრის ქრობის სამუშაოებში ვერტმფრენი ჩაერთო, იუწყება შსს-ს საგანგებო სიტუაციების მართვის სამსახური. 

გავრცელებული ინფორმაციით, სასაზღვრო პოლიციის ვერტმფრენი რაჭის მიმართულებით უკვე გაფრინდა და ის ონჭევი-წოლას კერის ქრობას შეუერთდება.

აღსანიშნავია, რომ რეგიონში ცეცხლის კიდევ ორი კერაა, რომელთაგან ერთი — ჩქუმში უკვე ლოკალიზებულია და მიმდინარეობს სალიკვიდაციო სამუშაოები, ხოლო ლაილაშში ხანძარი ჯერ არ ჩაუქრიათ.

საგანგებო სიტუაციების მართვის სამსახურის ინფორმაციით, ამ დროისათვის იმერეთში ლიკვიდირებულია ხანძრები წყალტუბოში, სოფელ ზარათსა და ხონში, სოფელ ძეძილეთში.

„დილის შემდეგ შემოვიდა შეტყობინება ხანძრების შესახებ ხარაგაულში, სოფელ ნადაბურსა და ჭიათურაში, სოფელ ნავარძეთში. ორივე ლოკაციაზე მობილიზებული არიან მეხანძრე-მაშველები და მიმდინარეობს სალოკალიზაციო სამუშაოები“, — ნათქვამია უწყების განცხადებაში.

რაც შეეხება ქვეყნის სხვა რეგიონებს და იქ არსებულ სახანძრო ვითარებას, ქედის რაიონის სოფელ ბზუბზუში ხანძრის ლიკვიდაცია უწყვეტი სამუშაოების შედეგად მოხერხდა. ამ მომეტისთვის მიმდინარეობს რამდენიმე მცირე მხრჩოლავი კერის დამუშავება.

სამეგრელოში ლიკვიდირებულია ხანძარი წალენჯიხის სოფელ ჯაღირაში, სალოკალიზაციო სამუშაოები გრძელდება ჯვარში (სოფელ მუჟავში), წალენჯიხაში (სოფელ სქურში) და მარტვილში (სოფელ ბალდაში). სამივე ლოკაციაზე სიტუაცია კონტროლს ექვემდებარება.

საგანგებო სიტუაციების მართვის სამსახურში ხანძრის შესახებ შეტყობინება შევიდა აბაშის რაიონის სოფელ წყემიდანაც, სადაც ცეცხლი უკიდია ტყის ქვედა საფარს. ადგილზე მობილიზებულია როგორც სახანძრო-სამაშველო ტექნიკა, ისე მეხანძრე-მაშველების ქვეითი შემადგენლობა.

გარდა ამისა, ტყის ქვედა საფარი იწვის კასპში, რკონის ხეობაშიც. ცეცხლი დასახლებული პუნქტიდან 11 კილომეტრის დაშორებით გაჩნდა, რომლის ჩასაქრობადაც, მიუხედავად გზის მოყინული და დაზიანებული საფარისა, შესაბამისი ავტოტექნიკა და მეხანძრე-მაშველთა ქვეითი ჯგუფებია მობილიზებული.

შინაგან საქმეთა სამინისტროს საგანგებო სიტუაციების მართვის სამსახური მოსახლეობას მოუწოდებს, თავი შეიკავონ მინდვრებსა და სახნავ მიწებზე ბალახის დაწვისგან, რამაც შეიძლება ხანძრის გავრცელება გამოიწვიოს როგორც საცხოვრებელ სახლებზე, ისე ტყის მასივებზეც.

74
საპატრულო პოლიცია

თბილისის ზღვაზე მამაკაცი მოკლეს: დაკავებულია ერთი პირი

41
ბრალდებულმა მამაკაცს სასიკვდილო ჭრილობა ცივი იარაღით მიაყენა და შემთხვევის ადგილიდან მიიმალა. დაპირისპირებას წინ უძღოდა შელაპარაკება.

თბილისი, 15 იანვარი - Sputnik. თბილისში განზრახ მკვლელობის ბრალდებით 42 წლის მამაკაცი ცხელ კვალზე დააკავეს. იუწყება შინაგან საქმეთა სამინისტრო.

გამოძიებით დადგინდა, რომ ალკოჰოლური თრობის მდგომარეობაში მყოფმა ბრალდებულმა თბილისის ზღვის მიმდებარედ არსებულ ერთ-ერთ საცხოვრებელ ვაგონში ურთიერთშელაპარაკების ნიადაგზე 38 წლის მამაკაცს ცივი იარაღით სხეულზე ჭრილობა მიაყენა და დანაშაულის ადგილიდან მიიმალა. დაჭრილი შემთხვევის ადგილზე გარდაიცვალა.

სამართალდამცველებმა ცივი იარაღი ნივთმტკიცებად ამოიღეს, ხოლო ბრალდებული მომხდარიდან რამდენიმე საათში დააკავეს.

გამოძიება განზრახ მკვლელობის ფაქტზე, საქართველოს სსკ-ის 108-ე მუხლით მიმდინარეობს. აღნიშნული დანაშაული 7-დან 15 წლამდე ვადით თავისუფლების აღკვეთას ითვალისწინებს.

41
გაზქურა

გლდანში 3 ათასზე მეტ აბონენტს გაზმომარაგება ავარიულად შეუწყდა

42
გლდანის რაიონში ავტომობილის შეჯახების შედეგად გაზსადენი დაზიანდა. გაზმომარაგება 20:00 საათამდე სრულად აღდგება.

თბილისი, 15 იანვარი - Sputnik. თბილისში, გლდანის რაიონში 3 250 აბონენტს გაზის მიწოდება ავარიულად შეუწყდა. ინფორმაციას გაზგამანაწილებელი კომპანია „თბილისი ენერჯი“ ავრცელებს.

კომპანიის ცნობით, გლდანის რაიონში ავტომობილის შეჯახების შედეგად საშუალო წნევის გაზსადენი დაზიანდა.

ავარიის შედეგად გაზის მიწოდება ძირითადად გლდანის გლდანის პირველ, მეორე და „ა“ მიკრორაიონების მცხოვრებლებს შეუწყდათ. კომპანია აქვეყნებს ყველა იმ მისამართს, სადაც გაზმომარაგებაა შეწყვეტილი.

კომპანიის მიერ გავრცელებულ ინფორმაციაში აღნიშნულია, რომ გაზმომარაგების აღდგენა დაიწყება 16:00 სთ-დან და 20:00 სთ-მდე დასრულდება.

42
„ჩრდილოეთ ნაკადი 2“-ის მშენებლობა

აშშ კვლავ „ჩრდილოეთის ნაკად 2“-ს მიუბრუნდა

0
ინტერესთა კონფლიქტი და „ჩრდილოეთის ნაკადი 2“-ის პერსპექტივა: რუსეთი აშენებს, გერმანია დაზღვევის ფონდს ქმნის, შვედეთს „გაზის ომის“ ეშინია, აშშ სანქციებს აწესებს, ბრიტანეთი კი მას მხარს უჭერს

დანიური კომპანია Ramboll-ი, რომელიც „ჩრდილოეთის ნაკადი 2“-ის მონაწილეა, ვაშინგტონის სანქციების გამო შეშფოთებულია, იუწყება მასმედია. მართლაც, 1 იანვრიდან აშშ-მა პროექტში ჩართული ყველა სუბიექტის წინააღმდეგ ზომები გააძლიერა. თუმცა მშენებლობა გრძელდება. ევროპაში ამ საკითხის ირგვლივ ვნებათაღელვა არ წყდება: სანამ გერმანელები ამზადებენ ფონდს სანქციებისგან თავის დასაცავად, ბრიტანელებს სურთ, ამერიკელების მაგალითს მიბაძონ, შვედებს კი „გაზის ომის“ დაწყების ეშინიათ. რა ელის მილსადენს - ამის შესახებ РИА НОВОСТИ-ს მიერ მომზადებულ ნატალია დემბინსკის მასალაში წაიკითხავთ.

ძველი მეთოდები

„ჩრდილოეთის ნაკადი 2“-ის სახმელეთო ნაწილის მშენებლობა სხვა სახელმწიფოების ტერიტორიებზე დასრულებულია. ახლა მილები გაჰყავთ გერმანიის წყლებში, შემდეგ სამუშაოები დანიის წყლებში გაგრძელდება. პროექტი დადასრულს უახლოვდება. თუმცა ვაშინგტონში ამის აღიარება არ სურთ. 1 იანვრიდან მოქმედებს ახალი კანონი თავდაცვითი ბიუჯეტის შესახებ, რომელიც რუსული გაზსადენის წინააღმდეგ დამატებით სანქციებს ითვალისწინებს. 

კერძოდ, საუბარია ორგანიზაციებზე, რომლებიც ტესტირების, ინსპექციის ან სერტიფიცირების მომსახურებით არიან დაკავებული. ნორვეგიულმა კომპანია DNV GL-მა უკვე განაცხადა, რომ წყვეტს გაზსადენის შემოწმებას და მის სერტიფიცირებას ვერ შეძლებს.

როგორც ამას წინათ აშშ-ის სენატში რესპუბლიკელების ლიდერმა მიტჩ მაკკონელმა განაცხადა, კანონს თავდაცვითი ბიუჯეტის შესახებ გადამწყვეტი მნიშვნელობა აქვს სახელმწიფო უსაფრთხოებისა და „ისეთი ზესახელმწიფო-მეტოქეების შესაკავებლად, როგორებიც არიან რუსეთი და ჩინეთი“. ეს დოკუმენტი გაამყარებს აშშ-ის უპირატესობას „ზღვაზე, ხმელეთზე, ჰაერში, კიბერსივრცესა და კოსმოსში“.

„გაზპრომს“ დაახლოებით 150 კილომეტრის სიგრძის მილების ჩაყრა დარჩა. 120-დანიაში და 30-ზე ოდნავ მეტი - გერმანიაში. სამუშაოების 94% დასრულებულია.  სამუშაოებს ევროპის ხუთი უმსხვილესი ენერგეტიკული კომპანია აფინანსებს. ვაშინგტონის ხელის შეშლის მიუხედავად, 11 იანვარს, ერთწლიანი შესვენების შემდეგ, განახლდა მუშაობა გერმანიის ტერიტორიულ წყლებში. 15 იანვრიდან მილების გაყვანას დანიის სანაპიროსთანაც დაიწყებენ.

მილგამყვან „ფორტუნას“ დაეხმარებიან რუსეთის საზღვაო სამაშველო სამსახურის გემები „მურმანი“ და „ბალტიის მკვლევარი“, ასევე სხვა ხომალდები. ზღვაში მილსადენის გაყვანის ხაზიდან ორივე მხარეს დაახლოებით 200 მეტრის რადიუსში დროებით აკრძალული ზონა გამოცხადდება.

როგორც ამას წინათ „გაზპრომ ექსპორტის“ გენერალურმა დირექტორმა ელენა ბურმისტროვამ განაცხადა, მილსადენის საზღვაო ნაწილის მშენებლობის დასრულების ვადა დამოკიდებულია გარკვეულ გარემოებებზე, კერძოდ, ამინდზე.

დაცვითი მექანიზმი

ამასობაში, აშშ-ში ევროპულ კომპანიებს, რომლებიც, ვაშინგტონის აზრით, რუსეთს მილსადენის გაყვანაში ეხმარებიან, კვლავ ემუქრებიან.

„ჩვენ ვცდილობთ მათ რისკები გავაცნოთ და მოვუწოდოთ, უარი თქვან თანამშრომლობაზე, ვიდრე გვიანი არ არის“, - მოჰყავს Reuters-ს სახელმწიფო დეპარტამენტში თავისი წყაროს სიტყვები. უახლოეს დღეებში თეთრი სახლი, ამ სააგენტოს ინფორმაციით, არასასურველი ორგანიზაციების სიას გამოაქვეყნებს.

რუსეთის საგარეო საქმეთა სამინისტროში ხაზგასმით აცხადებენ: მოსკოვს ეჭვი არ ეპარება „ჩრდილოეთის ნაკადი 2“-ის წარმატებაში, როგორც არ უნდა ეცადოს ვაშინგტონი „გაზპრომის“ დასავლეთ ევროპელ პარტნიორებზე ზეწოლას.

გერმანიაში „ჩრდილოეთის ნაკად 2“-ს კვლავაც ეკონომიკურ პროექტად მიიჩნევენ. მათთვის მიუღებელია აშშ-ის სანქციები, რის შესახებაც ამ დღეებში გერმანიის მინისტრთა კაბინეტის ოფიციალური წარმომადგენლის მოადგილე ულრიკე დემერმაც ისაუბრა. მეტიც, იანვრის დასაწყისში გერმანიის მეკლენბურგ-წინა პომერანიის ფედერალური მიწის პარლამენტმა ხმათა უმრავლესობით მხარი დაუჭირა რეგიონული მთავრობის ინიციატივას, შეიქმნას ეკოლოგიური ფონდი „კლიმატისა და გარემოს დაცვა MV“.

ეს ფონდი ამერიკული სანქციების გასანეიტრალებლად შეიქმნა. ორგანიზაცია შეძლებს მშენებლობისთვის საჭირო მოწყობილობის შეძენას. და უპირველეს ყოვლისა მილსადენს ეკოლოგიისთვის მნიშვნელოვან პროექტად აღიარებს.

როგორც გერმანული Bild აზუსტებს, ეს შესაძლებელს გახდის, „ჩრდილოეთის ნაკადი 2“-ს „გარემოს დაცვის პრინციპული ელემენტის“ კლასიფიკაცია მიენიჭოს.

ფონდი აპირებს კომერციული საწარმოს დარეგისტრირებას, რომელიც მხოლოდ „ჩრდილოეთის ნაკადი 2“-ით იქნება დაკავებული. კომპანიები, რომლებსაც სანქციებით დაემუქრებიან, რუსულ მხარესთან ითანამშრომლებენ იმ ეკონომიკური ინსტრუმენტების მეშვეობით, რომლებსაც აღნიშნული საწარმო უზრუნველყოფს.

დრო არ ითმენს

მოასწრებენ თუ არა გერმანელები თავის დაცვას სანქციებისგან? დამკვირვებლებს შორის აზრთა სხვადასხვაობაა. ერთი მხრივ, ფონდმა მიიღო ინვესტიციები და უფლებამოსილება, რაც საკმარისია იმისათვის, რომ ვაშინგტონს ძალისხმევა წყალში ჩაუყაროს, აღნიშნავს კომპანია ТМТ-ს დირექტორი დანილ როსტოვცევი.

„თუმცა ფონდის შექმნის ინიციატივამ საზოგადოების, განსაკუთრებით „მწვანეთა“ უკმაყოფილება გამოიწვია. ეკოლოგები არაეთიკურად და აღმაშფოთებლად მიიჩნევენ ამგვარი მეთოდებით ისეთი პროექტის ხელშეწყობას, რომელიც, მათი აზრით, სულაც არ არის „მწვანე“, არამედ სახიფათოა გარემოსთვის“, - აღნიშნავს ანალიტიკოსი. ახლა ყველაფერი იმაზეა დამოკიდებული, შეძლებენ თუ არა „ჩრდილოეთის ნაკადი 2“-ის მხარდამჭერები საზოგადოებასთან მოლაპარაკებას.

ამავდროულად, დამოუკიდებელი სამრეწველო ექსპერტის, ლეონიდ ხაზანოვის აზრით, ბერლინი არცერთ შემთხვევაში არ დაუთმობს ვაშინგტონს: გერმანიას სჭირდება რუსეთის ცისფერი საწვავი, უფრო იაფი, ვიდრე ამერიკული თხევადი აირი. და მით უფრო აუცილებელია რუსეთთან ეკონომიკური ურთიერთობის შენარჩუნება: ეს ბაზარი სტრატეგიულია გერმანული კომპანიებისთვის.

რასაკვირველია, ფონდზე სანქციები გავრცელდება, მაგრამ ისინი არაეფექტური იქნება. მისი ქვეკონტრაქტორების წინააღმდეგ კი საჭირო გახდება ახალი კანონპროექტის მომზადება, მისი გატანა კონგრესზე, ლოდინი, ვიდრე პრეზიდენტი ხელს მოაწერს. ამ პროცედურას შესაძლოა ნახევარი წელიწადი დასჭირდეს. ამ დროის განმავლობაში კი „ჩრდილოეთის ნაკადი 2“-ის მშენებლობაც დასრულდება“, - მსჯელობს ექსპერტი. თუმცა არ გამორიცხავს გართულებებს მილსადენის ამუშავების ეტაპზე - სწორედ აშშ-ის თავდაცვით ბიუჯეტში გათვალისწინებული სანქციების გამო. 

შიში და სიძულვილი

ბრიტანელებს უნდათ, ამერიკელების მაგალითს მიბაძონ. როგორც ბრიტანეთის კონსერვატორმა პარლამენტარმა დანიელ კოჩინსკიმ განაცხადა, რუსული გაზსადენი „მეტისმეტად სახიფათოა“ - იმით, რომ ნატოს ქვეყნების ტერიტორიებზე გამავალი ყველა გაზისა და ნავთობის ქსელის გვერდის ავლით, „პირდაპირ რუსეთში“ მიდის. მისი სიტყვებით, ბრიტანელებს აღარ აკავებს ევროკავშირის წევრობა, ამიტომ „საჭიროა ამერიკელ მეგობრებს მივყვეთ და დავაწესოთ სანქციები ყველა იმ კომპანიის წინააღმდეგ, რომელიც „ჩრდილოეთის ნაკადი 2“-ის მშენებლობაში მონაწილეობს“.

შვედეთში კი შიშობენ, რომ ჯო ბაიდენის პრეზიდენტობა ნიადაგს შექმნის „გაზის ომისთვის“, თანაც ქვეყნის მილსადენთან უშუალო სიახლოვის პირობებში. როგორც Svenska Dagbladet აღნიშნავს, ამერიკელი დემოკრატი ამ პროექტის „უფრო სასტიკი მოწინააღმდეგეც კია, ვიდრე დონალდ ტრამპი“. ხოლო თავად სკანდინავიური სამეფოსთვის ეს საკითხი უკვე გადაჭრილია: მთავრობამ მოიწონა შვედეთის ეკონომიკურ ზონაში მილსადენის გაყვანა.

„გაზპრომისთვის“ ბაიდენის პრეზიდენტობის ნეგატიურ ასპექტად მიიჩნევა მისი ენერგეტიკული პოლიტიკა, ე.წ. მწვანე კურსი. დემოკრატები გეგმავენ ორი ტრილიონი დოლარის გამოყოფას, რათა ქვეყანა 2035 წლამდე ეკოლოგიურად სუფთა ენერგეტიკაზე, 2050 წლისთვის კი - ნულოვან გამონაბოლქვზე გადავიდეს. თუმცა რუსეთისთვის მწვანე ენერგეტიკაც ხელსაყრელია: „ჩრდილოეთის ნაკადი 2“-ით შესაძლებელია არა მხოლოდ ბუნებრივი აირის გადატანა, არამედ წყალბადისაც. ევროპაში წყალბადის საწვავზე მოთხოვნილება პოტენციურად ძალიან მაღალია.

თავად აშშ-ში ეჭვი ეპარებათ, რომ ყველაფერი შესრულდება, რასაც თეთრი სახლი „ნაკადს“ ჰპირდება. როგორც ვირჯინიის შტატის ყოფილი სენატორი რიჩარდ ბლეკი ირწმუნება, მოსკოვთან მოლაპარაკება მშენებლობის დასრულებაზე ბაიდენს უხმაუროდ ურჩევნია. სანაცვლოდ კი იგი ვაშინგტონისთვის რაიმე სარგებლის გამოძალვას შეეცდება.

 

ავტორის თვასაზრისი შესაძლოა არ ემთხვეოდეს რედაქციის პოზიციას

0