პოლიცია

ბათუმში მომხდარი მკვლელობა გახსნილია: პოლიციამ ერთი პირი დააკავა

88
(განახლებულია 21:17 04.01.2021)
ბრალის დამტკიცების შემთხვევაში დაკავებულის დანაშაული 7-დან 15 წლამდე ვადით თავისუფლების აღკვეთას ითვალისწინებს.

თბილისი, 4 იანვარი – Sputnik. ბათუმში მომხდარი მკვლელობის ფაქტი გახსნილია – სამართალდამცველებმა 24 წლის მამაკაცი დააკავეს, ნათქვამია შინაგან საქმეთა სამინისტროს განცხადებაში.

შემთხვევა ფრიდონ ხალვაშის გამზირზე, ე.წ. „ოცნების ქალაქის“ ტერიტორიაზე გუშინ მოხდა.

გამოძიების ცნობით, ბრალდებულმა ურთიერთშელაპარაკების ნიადაგზე ცივი იარაღით ორი ადამიანი დაჭრა და შემთხვევის ადგილიდან მიიმალა. მიღებული ჭრილობების შედეგად 43 წლის მამაკაცი საავადმყოფოში მიყვანამდე გარდაიცვალა. 27 წლის მამაკაცს კი ექიმებმა შესაბამისი სამედიცინო დახმარება აღმოუჩინეს.

პოლიციამ დანაშაულის ჩადენის იარაღი - დანა ნივთმტკიცების სახით ამოიღო.

განზრახ მკვლელობისა და ჯანმრთელობის განზრახ მძიმე დაზიანების ფაქტებზე გამოძიება სსკ-ის 108-ე და 117-ე მუხლებით მიმდინარეობს.

88
ეჭვმიტანილის დაკავება

უსაფრთხოების სამსახურმა ქრთამის აღების ფაქტზე ყოფილი მაღალჩინოსანი დააკავა

66
(განახლებულია 20:53 27.01.2021)
ყოფილი მაღალჩინოსანი სამსახურებრივი უფლებამოსილების გამოყენებით ქრთამის სანაცვლოდ ბორჯომის მუნიციპალიტეტის სოფელ ჭობისხევში მიწის ნაკვეთის უკანონოდ რეგისტრაციას გეგმავდა.

თბილისი, 27 იანვარი – Sputnik. საქართველოს სახელმწიფოს უსაფრთხოების სამსახურის ანტიკორუფციული სააგენტოს თანამშრომლებმა დიდი ოდენობით ქრთამის აღებისა და უკანონო ქმედების ჩასადენად ქრთამის მიცემის ფაქტზე ორი პირი დააკავეს, აღნიშნულია სახელმწიფო უსაფრთხოების სამსახურის განცხადებაში.

უწყების ცნობით, ერთ-ერთი დაკავებული ბორჯომის მუნიციპალიტეტის მერიის ინფრასტრუქტურისა და ზედამხედველობის სამსახურის ყოფილი უფროსია.

გამოძიებით დგინდება, რომ 2020 წლის იანვარში ბორჯომში მცხოვრები პირი დაუკავშირდა ბორჯომის მუნიციპალიტეტის მერიის მაღალჩინოსანს და სთხოვა დახმარებოდა სოფელ ჭობისხევში მდებარე, საკომლო ჩანაწერით მის მფლობელობაში არსებული მიწის რეგისტრაციაში.

უწყებაში განმარტავენ, რომ აღნიშნული ტერიტორიის მფლობელს არ აკმაყოფილებდა მიწის ადგილმდებარეობა. მან ბორჯომის მუნიციპალიტეტის მერიის თანამშრომელს შესთავაზა, რომ ნაკვეთის რეგისტრაცია ტურისტული თვალსაზრისით უფრო პერსპექტიულ ადგილზე მომხდარიყო, რის სანაცვლოდაც მერიის თანამშრომელი ნაკვეთის ნაწილს, ან შესაბამისი ღირებულების თანხას მიიღებდა.

ქრთამის აღების ფაქტზე ზუგდიდის მუნიციპალიტეტის მერის წარმომადგენელი დააკავეს>>

მერიის მაღალჩინოსანი აღნიშნულ შეთავაზებას დათანხმდა და ნაკვეთის მფლობელს დაჰპირდა, რომ სამსახურებრივი უფლებამოსილების გამოყენებით უზრუნველყოფდა, სოფელ ჭობისხევის რწმუნებულს გაეცა მიწის ნაკვეთის იდენტურობის ყალბი ცნობა, რის საფუძველზეც 46 737 ლარის ღირებულების სახელმწიფოს კუთვნილი მიწის ნაკვეთი უკანონოდ დარეგისტრირდებოდა.

„საქმეზე გატარებული ოპერატიული და საგამოძიებო მოქმედებების შედეგად დანაშაულებრივი ჯგუფის წევრებმა ვერ მოახერხეს მიწის ნაკვეთის რეგისტრაცია და მხილებულ იქნენ მართლსაწინააღმდეგო ქმედების განხორციელებაში”, – ნათქვამია უწყების განცხადებაში.

საქმეზე გამოძიება სისხლის სამართლის კოდექსის 338-ე მუხლის მეორე ნაწილის „ბ" ქვეპუნქტითა და 339-ე მუხლის მეორე ნაწილით მიმდინარეობს.

გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს.

66
თემები:
კრიმინალი საქართველოში
ქალი ხელბორკილებით

ეჭვიანმა ცოლმა ინტიმურ ფოტოებზე თავი ვერ იცნო და ქმარი დანით დაჭრა

148
(განახლებულია 17:19 27.01.2021)
გავრცელებული ინფორმაციით, ქალმა ძველ ფოტოებზე თავი იმის გამო ვერ იცნო, რომ წარსულში ის სხვაგვარად გამოიყურებოდა.

თბილისი, 27 იანვარი — Sputnik. ქალი, რომელმაც საკუთარი თავი ვერ იცნო ქმრის ტელეფონში ნაპოვნ ინტიმურ ფოტოებზე, მეუღლეს დანით დაესხა თავს და დაჭრა, იუწყება მექსიკური გამოცემა Prensa.

გავრცელებული ინფორმაციით, ქმარმა ვერ მოასწრო აეხსნა ცოლისთვის, რომ ფოტოებზე თავად ის იყო აღბეჭდილი.

ირკვევა, რომ სურათები ჯერ კიდევ დაქორწინებამდე იყო გადაღებული და ისინი თვითონ ქალს ჰქონდა გაგზავნილი ელექტრონული ფოსტით კაცისთვის. წლების შემდეგ ქმარმა შემთხვევით აღმოაჩინა ისინი და ტელეფონში გადაიწერა.

გამოცემა წერს, რომ ქალმა საკუთარი თავი იმის გამო ვერ იცნო, რომ ქორწინებამდე ის ბევრად უკეთესად გამოიყურებოდა: მაკიაჟსაც ატარებდა და „რამდენიმე კილოგრამით ნაკლებსაც იწონიდა“.

ამასთან ირკვევა, რომ საბოლოოდ ქმარმა, რომელსაც რამდენიმე ჭრილობა ჰქონდა მიღებული, მაინც მოასწრო ცოლის განიარაღება და ყველაფრის ახსნა, მაგრამ მეზობლებს უკვე გამოეძახებინათ სასწრაფო დახმარება და პოლიცია.

ეჭვიანი ცოლი დააკავეს და ოჯახურ ძალადობაში წაუყენეს ბრალი.

 

148
თემები:
საერთაშორისო პანორამა
საგარეო საქმეთა სამინისტრო

რუსეთიდან საქართველოში: ირანის საგარეო საქმეთა მინისტრს თბილისში ელოდებიან

0
საქართველოში 27-28 იანვარს, რეგიონული ტურნეს ფარგლებში, ირანის საგარეო საქმეთა მინისტრ მოჰამად ჯავად ზარიფის ვიზიტი იგეგმება

ირანის საგარეო საქმეთა მინისტრი თბილისს ერევნიდან ესტუმრება. ის უკვე იმყოფებოდა მოსკოვში, სადაც რუსეთის საგარეო საქმეთა მინისტრ სერგეი ლავროვს შეხვდა.

თავისი რეგიონული ტურნე მოჰამად ჯავად ზარიფმა აზერბაიჯანში ვიზიტით დაიწყო, დღეს კი სომხეთს ესტუმრა. ტურნეს დაწყებამდე ირანის საგარეო საქმეთა მინისტრმა განაცხადა, რომ გეგმავს ვიზიტს ქვეყნებში, რომლებთანაც მთიან ყარაბაღში კრიზისის მოგვარების საქმესა და რეგიონში მშვიდობისა და სტაბილურობის დამყარების საკითხზე შესაძლებელია თანამშრომლობა.

რაც შეეხება საქართველოს, ვიზიტისას ირანის საგარეო საქმეთა მინისტრი მოლაპარაკებებს გამართავს ქვეყნის პირველ პირებთან - პრეზიდენტ სალომე ზურაბიშვილთან და პრემიერ-მინისტრ გიორგი გახარიასთან. შეხვედრა დაიგეგმა ასევე მინისტრის ქართველ კოლეგა დავით ზალკალიანთან. თუმცა სამშაბათს გაირკვა, რომ საქართველოს საგარეო საქმეთა მინისტრს კორონავირუსი დაუდასტურდა.

რას უნდა ველოდოთ?

პოლიტოლოგ არჩილ სიხარულიძის თქმით, მოჰამად ჯავად ზარიფის საქართველოში ვიზიტი შედგება ირანსა და დასავლეთს შორის ურთიერთობის დათბობის ფონზე. პოლიტოლოგის აზრით, თეთრ სახლში ჯო ბაიდენის მოსვლით ირანისადმი დამოკიდებულება გადაიხედება.

„როგორც მოგეხსენებათ, ბაიდენმა უკვე მოუხსნა შეზღუდვები მოგზაურებს ზოგიერთი ქვეყნიდან, მათ შორის, ირანიდან. ასევე ცნობილია, რომ ტრამპი გამოვიდა ირანული შეთანხმებიდან, რაც ბევრისთვის არასასიამოვნო იყო. ჩვენ უნდა ველოდოთ, რომ ამ მიმართულებით დათბობა დაიწყება. შესაბამისად, ირანმა ეს მშვენივრად იცის და აპირებს მაქსიმალური მოგების მიღებას“, - აღნიშნა სიხარულიძემ.

პოლიტოლოგის თქმით, აქტუალური იქნება კავკასიის რეგიონული დღის წესრიგიც.

„ნათელია, რომ თურქეთს აქ ხუთეულის ლიგის, რეალურად თავისი პლატფორმის შექმნა უნდა, სადაც რუსეთის ფედერაციასთან ერთად წამყვან ძალად ჩამოყალიბდება. როგორც ჩანს, ირანსაც არ სურს ჩამორჩეს მოვლენებს და პროცესში ჩართვის სურვილი აქვს. როგორც უნდა იყოს, სამხრეთ კავკასიაში გავლენისთვის მთელი ისტორიის მანძილზე ყოველთვის იბრძოდნენ რუსეთის იმპერია, ოსმანთა იმპერია და სპარსეთის იმპერია. როგორც ჩანს, ახლა ასეთივე ფორმულაში აღმოვჩნდით“, - განაცხადა სიხარულიძემ.

პოლიტოლოგის აზრით, დასავლეთისა და ირანის ურთიერთობის დათბობა საქართველოსთვის ხელსაყრელია.

„საქართველოს შეუძლია ირანთან უფრო ღიად თანამშრომლობა იმ მიმართულებებით, რომლებიც ჩვენთვის მისაღებია - ესაა იმპორტი, ენერგეტიკული საკითხები. ანუ ყველაფერი, რამაც შეიძლება შეამციროს საქართველოზე თურქეთის, აზერბაიჯანის, რუსეთის ფედერაციის ზეწოლა. ამიტომ ეს ძალიან სასარგებლოა“, - აღნიშნა სიხარულიძემ.

სავაჭრო ურთიერთობები

კორონავირუსის პანდემიის გამო საქართველოსა და ირანს შორის სავაჭრო ბრუნვა 2020 წელს 71,2%-ით შემცირდა და 74,3 მილიონი დოლარი შეადგინა. ასეთია „საქსტატის“ ოფიციალური მონაცემები.

2019 წელს ქვეყნებს შორის სავაჭრო ბრუნვამ 187,1 მილიონი დოლარი შეადგინა. 2020 წელს საქართველოდან ირანში 29,1 მილიონი დოლარის პროდუქცია გავიდა, რაც დაახლოებით 60%-ით ნაკლებია 2019 წლის მაჩვენებელზე.

ირანიდან საქართველოში კი 76%-ით ნაკლები პროდუქცია შემოვიდა, ვიდრე 2019 წელს - სულ 45,2 მლნ დოლარის ღირებულების.

ტურიზმი

ტურიზმის ეროვნული ადმინისტრაციის მონაცემებით, 2019 წელს ირანიდან საქართველოს 141 997 ირანის მოქალაქე ესტუმრა. ერთი ვიზიტის ხარჯი დაახლოებით 600 დოლარია.

მთლიანობაში 2019 წელს ირანის მოქალაქეთა ტურისტულმა ხარჯმა შეადგინა 160,7 მილიონი ლარი.

2020 წელს საქართველოში ჩამოსულ ირანელთა რაოდენობა 88%-ით შემცირდა და 17 053 ადამიანი შეადგინა.

დიპლომატიური ურთიერთობა

საქართველომ და ირანმა დიპლომატიური ურთიერთობა 1992 წლის 15 მაისს დაამყარეს. მას შემდეგ ორმხრივი ურთიერთობა ქვეყნებს შორის აქტიურად ვითარდება პოლიტიკურ, სავაჭრო-ეკონომიკურ, საინვესტიციო, სოფლის მეურნეობის, კულტურის, განათლებისა და ტურიზმის სფეროებში.

ქვეყნებს შორის არსებობს თანამშრომლობის სხვადასხვა ფორმატი, მაგალითად, პოლიტიკური კონსულტაციების ფორმატი, რომელიც არსებითად უწყობს ხელს ორმხრივი თანამშრომლობის გაღრმავებას.

გარდა ამისა, საქართველო და ირანი თანამშრომლობენ ორი ქვეყნის საკანონმდებლო უწყებების დონეზე.

ირანში საქართველოს საგანგებო და სრულუფლებიანი ელჩის თანამდებობა 2014 წლიდან იოსებ ჩახვაშვილს უკავია. ხოლო საქართველოში ირანის დიპლომატიურ უწყებას 2013 წლიდან აბას თალები-ფარი ხელმძღვანელობს.

0