თბილისი, 18 დეკემბერი - Sputnik. თბილისში, ბერი გაბრიელ სალოსის გამზირზე მდებარე საცხოვრებელი კორპუსის ერთ-ერთ ბინაში ერთი თვის წინ გარდაცვლილი ქალის ცხედარი აღმოაჩინეს.
გავრცელებული ინფორმაციით, 66 წლის ალა ჩიბისოვა 15 ნოემბერს, სავარაუდოდ, გულის შეტევით გარდაიცვალა და ოჯახის წევრები ერთი თვის განმავლობაში ბინაში ცხედართან ერთად იმყოფებოდნენ.
მეზობლებმა სამართალდამცველები მას შემდეგ გამოიძახეს, რაც მთელი კორპუსი მძიმე სუნმა შეაწუხა.
როგორც გარდაცვლილის შვილმა, ზურაბ ბარბაქაძემ ჟურნალისტებთან დაადასტურა, ის და მისი და დედის ცხედართან ერთად ერთი თვის განმავლობაში ცხოვრობდნენ. მისი განმარტებით, ოჯახს ფინანსური პრობლემები ჰქონდა და „შიდა პრობლემებით მეზობლების შეწუხება არ უნდოდა“.
„გულის შეტევა დაემართა, სულ პარალიზებული იყო. შეშინებულები ვიყავით, უსახსრობის გამო ვერ შევატყობინეთ ვერავის, ვითმენდით“, -განაცხადა დაღუპულის შვილმა.
ადგილზე ამ წუთებში კრიმინალური პოლიცია და ექსპერტ-კრიმინალისტები მუშაობენ.
საქმეზე გამოძიება საქართველოს სსკ-ის 115-ე მუხლით დაიწყო, რაც თვითმკვლელობამდე მიყვანას გულისხმობს.
