თბილისის საქალაქო სასამართლო

თბილისის საქალაქო სასამართლოში ზურაბ ადეიშვილის წინააღმდეგ კიდევ ერთი პროცესი დაიწყო

103
(განახლებულია 21:56 16.12.2020)
განსასჯელის სკამი სასამართლოს დარბაზში ცარიელია – ზურაბ ადეიშვილი, რომლის მიმართ საქართველოში სხვადასხვა საქმეზე არაერთი განაჩენია გამოტანილი, უცხოეთში იმყოფება.

თბილისი, 16 დეკემბერი — Sputnik. თბილისის საქალაქო სასამართლოში ხანგრძლივი პაუზის შემდეგ განახლდა პროცესი ოპოზიციონერი პოლიტიკოსის კობა დავითაშვილის ცემის საქმეზე, რომელშიც მთავარი ბრალდებული ყოფილი გენერალური პროკურორი და იუსტიციის ექს-მინისტრი ზურაბ ადეიშვილია.

საქმე ეხება 2007 წლის 7 ნოემბრის ცნობილ მოვლენებს, როდესაც ოპოზიცია მაშინდელი პრეზიდენტის მიხეილ სააკაშვილის გადადგომის მოთხოვნით პერმანენტულ აქციებს ატარებდა. ხელისუფლება სასტიკად გაუსწორდა მანიფესტანტებს – მაშინ დაახლოებით 500 ადამიანი დაშავდა. ერთ-ერთი მათგანი იყო რამდენიმე მოწვევის პარლამენტის დეპუტატი კობა დავითაშვილი. ის სპეცსამსახურის თანამშრომლებმა გაიტაცეს და სასტიკად სცემეს. ორდღიანი ძებნის შემდეგ პოლიტიკოსი გორის სამხედრო ჰოსპიტალში სხეულის მრავლობითი დაზიანებებით იპოვეს, რამაც ის შემდგომში ინვალიდის ეტლამდე მიიყვანა.

კობა დავითაშვილი ახლახან, 2 დეკემბერს 49 წლის ასაკში გარდაიცვალა. 2017 წელს პოლიტიკოსს დაუდგინეს ბეხტერევის დაავადება. როგორც თავად დავითაშვილი აცხადებდა, უკურნებელი და იშვიათი დაავადება მას 2007 წელს მიღებული ტრავმების შედეგად განუვითარდა.

ყოფილი გენპროკურორი ზურაბ ადეიშვილი, რომელმაც საქართველო 2013 წელს დატოვა, თავისუფლების უკანონო აღკვეთის ორგანიზებაში და სამსახურებრივი უფლებამოსილების გადამეტებაშია ბრალდებული. სხვა მაღალჩინოსნები ამ საქმეზე 2017 წელს გაასამართლეს.

საქმის პროკურორის შოთა კაკულიას თქმით, ბრალდების მხარემ დაახლოებით ერთი წლის წინ დაასრულა მტკიცებულებების შესწავლა და მას შემდეგ, დაცვის მხარის შუამდგომლობის საფუძველზე, სასამართლო განხილვა ხუთჯერ გადაიდო.

„რაც შეეხება ადეიშვილის საქმეს, არის არაერთი პირდაპირი მტკიცებულება, დასკვნა ჯანმრთელობის დაზიანების შესახებ, ასევე მოწმეთა ჩვენებები, რაც ერთობლიობაში გვაძლევს მოლოდინს, რომ ადეიშვილის მიმართ გამოტანილი იქნება გამამტყუნებელი განაჩენი“, – განაცხადა შოთა კაკულიამ.

გამოძიება ამტკიცებს, რომ დავითაშვილის გატაცების ორგანიზება მოახდინეს ადეიშვილმა და დავით ქარსელაძემ, რომელიც მაშინ ფინანსთა სამინისტროს შემოსავლების სამსახურის უფროსის მოადგილე იყო.

ამასთან, ადეიშვილის ადვოკატმა ბექა ბასილაიამ დღევანდელ სასამართლო პროცესზე თვითაცილების შესახებ განაცხადა. მან უარი განაცხადა ყოფილი გენპროკურორის დაცვაზე. მიზეზი, ბასილიას თქმით, მას და კლიენტს შორის არსებული უთანხმოებაა.

„ბუნებრივია, მქონდა კომუნიკაცია ადეიშვილთან და მივიღეთ გადაწყვეტილება, რომ გარკვეულ პოზიციებზე არ გვქონდა შეჯერებული აზრი. ორივე მივედით იმ აზრამდე, რომ უნდა ჩამოვშორდე ამ საქმეს. მოხდა შეუთავსებლობა გარკვეულ პოზიციებზე“, – განაცხადა ბასილიამ.

მოსამართლემ ადვოკატის შუამდგომლობა დააკმაყოფილა.

103
თემები:
გახმაურებული სასამართლო პროცესები (138)
დაკავება

ფოთში შსს-ს თანამშრომელი დააკავეს

32
ფოთის საქალაქო სამმართველოს ინსპექტორ-გამომძიებელი მოსამართლის განჩინების საფუძველზე დააკავეს, მას სამ წლამდე პატიმრობა ემუქრება

თბილისი, 26 იანვარი – Sputnik. ფოთში უფლებამოსილების ბოროტად გამოყენების ბრალდებით ინსპექტორ-გამომძიებელი დააკავეს, იუწყება შსს-ს პრესსამსახური.

უწყების ინფორმაციით, ფოთის საქალაქო სამმართველოს ინსპექტორ-გამომძიებელი მოსამართლის განჩინების საფუძველზე დააკავეს.

სისხლის სამართლის საქმე აღიძრა „სამსახურეობრივი უფლებამოსილების ბოროტად გამოყენების“ ფაქტზე სსკ-ის 332-ე მუხლის პირველი ნაწილით, რაც სამ წლამდე თავისუფლების აღკვეთას ითვალისწინებს.

32
ბათუმის საქალაქო სასამართლო

აქტივისტ ირაკლი ფანგანს გირაო შეეფარდა

21
(განახლებულია 19:39 26.01.2021)
საზოგადოებრივი მოძრაობა „ალტერნატივის“ აქტივისტი ირაკლი ფანგანი თავს დამნაშავედ არ ცნობს და აცხადებს, რომ თუ საჭირო გახდა, მომავალშიც ანალოგიურად მოიქცევა.

თბილისი, 26 იანვარი – Sputnik. ბათუმის საქალაქო სასამართლომ ბრალდების მხარის შუამდგომლობა დააკმაყოფილა და საზოგადოებრივი მოძრაობა „ალტერნატივის“ აქტივისტს ირაკლი ფანგანს აღკვეთის ღონისძიების სახით გირაო შეუფარდა, იუწყება „აჭარის ტელევიზია". 

ირაკლი ფანგანი პოლიციამ 24 იანვარს ორგანიზაციის ოფისში დააკავა. აქტივისტმა ბათუმის ბულვარის ტერიტორიაზე 16-სართულიანი შენობის მშენებლობის წინააღმდეგ 23 იანვარს გამართულ აქციაზე აჭარის უმაღლესი საბჭოს დეპუტატს ირაკლი ჩავლეიშვილს თავზე ნაგავი დააყარა. აქციაზე დეპუტატის გამოჩენამ აქტივისტების გაღიზიანება გამოიწვია, რადგანაც ჩავლეიშვილი აჭარის უმაღლეს საბჭოში ერთადერთი ოპოზიციონერია, რომელმაც სადეპუტატო მანდატზე უარი არ განაცხადა. 

საქართველოს პროკურატურამ აქტივისტს ბრალდება პოლიტიკურ მოღვაწეობასთან დაკავშირებით ძალადობით დევნის მუხლით წარუდგინა. ირაკლი ფანგანი ბრალის წარდგენის შემდეგ გუშინ, 25 იანვარს გათავისუფლდა.

დღეს გამართულ სასამართლო პროცესზე პროკურატურის მიერ დასახელებული თანხის რაოდენობა შემცირდა და 2 ათასი ლარის ოდენობით განისაზღვრა. გარდა ამისა, ფანგანი კვირაში ერთხელ უნდა გამოცხადდეს გამომძიებელთან.

„თქვენი გამოხატვის თავისუფლება იზღუდება იქ, სადაც იწყება სხვისი თავისუფლების შეზღუდვა. თქვენივე უსაფრთხოებისთვის, რომ დაცული იყოთ ბრალის დამძიმებისგან თქვენივე ქმედებით, სასამართლომ მიიღო ეს გადაწყვეტილება“, – მიმართა ბრალდებულს მოსამართლე ვიოლეტა ფორჩხიძემ.

დღეს გამართულ სასამართლო სხდომას არ ესწრებოდა დაზარალებული ირაკლი ჩავლეიშვილი.

გავრცელებული ინფორმაციით, საქმეზე წინასასამართლო სხდომა 15 თებერვალს დაიგეგმა.

 

21
კოვიდ-შეზღუდვების-საწინააღმდეგო აქცია

რა შემთხვევაში შერბილდება კოვიდ-შეზღუდვები: ბიზნეს-სექტორთან შეხვედრა გაიმართა

0
პრემიერ-მინისტრის დავალებით, პირველი ვიცე-პრემიერის ხელმძღვანელობით, ბიზნესის წარმომადგენლებთან, შეზღუდვების ეტაპობრივი მოხსნის გეგმაზე შეხვედრა გაიმართა

თბილისი, 26 იანვარი – Sputnik. კორონავირუსით ინფიცირების დადებითობის მაჩვენებლის მონიტორინგი ყოველი კვირის თავზე მოხდება და ეკონომიკის სხვა დარგების ეტაპობრივად გახსნა აქედან გამომდინარე იქნება შესაძლებელი, ნათქვამია საქართველოს ეკონომიკისა და მდგრადი განვითრების სამინისტროს მიერ გავრცელებულ ინფორმაციაში.

შეზღუდვების ეტაპობრივი მოხსნის გეგმაზე ბიზნესის წარმომადგენლებთან პრემიერ-მინისტრის დავალებით და პირველი ვიცე-პრემიერ მაია ცქიტიშვილის ხელმძღვანელობით მთავრობის ადმინისტრაციაში შეხვედრა გაიმართა.

ტურისტული, რესტორატორთა და სამთო კურორტების ასოციაციების წარმომადგენლებთან გამართულ შეხვედრას ესწრებოდნენ ეკონომიკისა და მდგრადი განვითარების მინისტრი ნათია თურნავა, ფინანსთა მინისტრი ივანე მაჭავარიანი და ჯანდაცვის მინისტრი ეკატერინე ტიკარაძე, დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი ამირან გამყრელიძე, შრომის ინსპექციის ხელმძღვანელი ბექა ფერაძე და ბიზნესომბუდსმენის მოვალეობის შემსრულებელი ნინო კვეტენაძე.

შეხვედრაზე ყურადღება გამახვილდა ქვეყანაში 28 ნოემბრიდან დაწესებული წერტილოვანი შეზღუდვების შედეგად მიღწეულ შედეგებზე და აღინიშნა, რომ თითოეული ნაბიჯი შემსუბუქების მიმართულებით უნდა გადაიდგას ფრთხილად, ეპიდემიოლოგიური მდგომარეობის მკაცრი მონიტორინგის საფუძველზე, რათა ინფიცირების შემთხვევები ისევ მკვეთრად არ გაიზარდოს.

პირველმა ვიცე-პრემიერმა ხაზი გაუსვა იმ ფაქტს, რომ შეზღუდვების ეტაპობრივი მოხსნის პროცესში მთავრობა ხელმძღვანელობს როგორც მოქალაქეების ჯანმრთელობის, ისე ეკონომიკის ინტერესებით და სწორედ ამიტომ, შესაბამის გადაწყვეტილებებს იღებს მათ შორის ინფიცირების დადებითობის მაჩვენებლის გათვალისწინებით, რომელიც 4%-ზე ნაკლები უნდა იყოს.

ბიზნესის წარმომადგენლებთან შეხვედრისას დაავადებათა კონტროლის ეროვნული ცენტრის ხელმძღვანელმა აღნიშნა, რომ ბოლო 7 დღის მონაცემებით, ქვეყანაში ინფიცირების შემთხვევების დადებითობის მაჩვენებელი 6-7%-ის ფარგლებში მერყეობს, შესაბამისად „ნებისმიერი დამატებითი შემსუბუქება აღნიშნული მაჩვენებლის დასტაბილურებამდე არარელევანტურია“.

„დღევანდელი საკმაოდ ხანგრძლივი შეხვედრის მთავარი მიზანი იყო, კიდევ ერთხელ გაგვეცნო ტურისტული ინდუსტრიისთვის, რესტორნებისთვის და ზამთრის კურორტების წარმომადგენლებისთვის, თუ რა ლოგიკით მიიღება საკოორდინაციო საბჭოზე საბოლოო გადაწყვეტილებები ბიზნესის შეზღუდვების მოხსნის გრაფიკთან დაკავშირებით“, - განაცხადა  ეკონომიკისა და მდგრადი განვითარების მინისტრმა ნათია თურნავამ შეხვედრის შემდეგ.

მისი თქმით, არის მიდგომა, რომ გადაწყვეტილება არა მთელი ქვეყნის მასშტაბით იქნას მიღებული, არამედ მოხდება რეგიონების მიხედვით ყოველი კვირის თავზე დადებითობის მაჩვენებლის მონიტორინგი და აქედან გამომდინარე შესაძლებელი იქნება ეტაპობრივად  სხვა დარგების გახსნა.

„ეკონომიკა მთლიანობაში გახსნილი გვაქვს, არ შეგვიზღუდავს არც მრეწველობა, არც სასურსათო ვაჭრობა, არც სოფლის მეურნეობა, არც მომპოვებელი და გადამამუშავებელი მრეწველობა, მაგრამ საუბარია იმ სფეროებზე, რომლებიც მსოფლიოში მაღალი რისკის მატარებლად არიან მიჩნეული და იმათაც ეხლა ვხსნით“, - აღნიშნა ნათია თურნავამ ბიზნესთან შეხვედრის დასრულების შემდეგ.

მისივე თქმით, ასევე დადებითია ის ფაქტი, რომ 1 თებერვლიდან იხსნება ფრენები და საერთოდ უქმდება ნებისმიერი  შეზღუდვა რეგულარულ ფრენებზე.

„მიმდინარე კვირაში რამდენიმე შეხვედრაა დაგეგმილი, მათ შორის ტუროპერატორებთან, თუ როგორ ვიმუშაოთ ვაქცინირებულ ტურისტებზე, რადგან ჩვენს რეგიონში ძალიან ბევრი ქვეყანაა, სადაც ვაქცინაციაგავლილ ადამიანებს საქართველოში ჩამოსვლა უნდათ და ჩვენ ამაშიც დავეხმარებით“, - დასძინა ეკონომიკისა და მდგრადი განვითარების მინისტრმა.

კვირას, მთავრობის შენობის წინ ქვეყანაში მოქმედი შეზღუდვების წინააღმდეგ საპროტესტო აქცია გაიმართა, რომელშიც ბიზნეს–სექტორის წარმომადგენლებმაც მიიღეს მონაწილეობა – მთავრობას შეზღუდვების მოხსნის შესახებ გადაწყვეტილების მისაღებად 48 საათი მიეცა. ულტიმატუმის ვადა დღეს ამოიწურა.

0