თბილისი, 13 ნოემბერი – Sputnik. საქართველოს ფეხბურთის ფედერაციასთან მიმდინარე აქციაზე ფიზიკური დაპირისპირება მოხდა.
ფეხბურთის ფედერაციასთან სამოქალაქო აქტივისტებმა საპროტესტო აქცია გამართეს. აქციის მონაწილეების თქმით, მათი პროტესტის მიზეზი გუშინდელ საფეხბურთო მატჩთან დაკავშირებული გადაწყვეტილება გახდა, რომლის გამო საქართველოსა და ჩრდილოეთ მაკედონიის შეხვედრას გულშემატკივარი არ დაესწრო.
აქციის მონაწილეები აღნიშნავდნენ, რომ მიუხედავად მაყურებლის გარეშე ჩატარებული მატჩისა, ტრიბუნებზე ხელისუფლების მაღალჩინოსნები იმყოფებოდნენ, კერძოდ, თბილისის მერი კახა კალაძე და „ქართული ოცნების“ აღმასრულებელი მდივანი ირაკლი კობახიძე.
მომიტინგეები ფედერაციაში შესვლას ითხოვდნენ, რათა ფეხბურთის ფედერაციის პრეზიდენტის ლევან კობიაშვილისთვის სიმბოლურად წითელი ბარათი და წიგნი გადაეცათ.
„გვინდოდა წიგნის ჩაბარება ფედერაციაში და გვითხრეს, დაკეტილიაო. ფედერაცია არის დაკეტილი, რომელსაც ქართველი ხალხი ვაფინანსებთ და ვალდებულები არიან, რომ ღია იყოს და იმუშაოს", – განაცხადა აქციის ერთ-ერთმა მონაწილემ.
ფიზიკური და სიტყვიერი შეურაცხყოფა აქციის მონაწილეების შენობაში შესვლის მცდელობას მოჰყვა. მათ საქართველოს ფეხბურთის ფედერაციაში მყოფი პირები დაუპირისპირდნენ. ადგილზე იმყოფებიან სამართალდამცველი ორგანოების თანამშრომლებიც.
ფედერაციასთან მომხდარ დაპირისპირებაში ვეტერანი ფეხბურთელი და ფედერაციის თანამშრომელი ლევან ცქიტიშვილიც მონაწილეობდა. მისი თქმით, მომიტინგეები შეურაცხმყოფელი სიტყვებით გამოირჩეოდნენ.
„ცუდად იქცევიან და იგინებიან, ჩვენც ქართველები ვართ და ვერ ავიტანთ გინებას, მოსახვედრს მოხვდა, ვისაც საჭირო იყო", – განაცხადა ლევან ცქიტიშვილმა.
საქართველოსა და ჩრდილოეთ მაკედონიას შორის შეხვედრა 12 ნოემბერს კორონავირუსთან დაკავშირებით მიღებული რეგულაციების გამო მაყურებლის გარეშე გაიმართა. მატჩი ჩრდილოეთ მაკედონიის გამარჯვებით 1-0 დასრულდა.
