ივანიშვილის რეზიდენცია

სროლა ბიძინა ივანიშვილის რეზიდენციასთან: ადგილზე პოლიციაა მობილიზებული

244
(განახლებულია 18:42 06.11.2020)
შსს მომხდარ ფაქტთან დაკავშირებით კომენტარს მოგვიანებით გააკეთებს. ამ დროისათვის ტერიტორია ყვითელი ლენტითაა შემოსაზღვრული.

თბილისი, 6 ნოემბერი – Sputnik. მმართველი პარტია „ქართული ოცნება – დემოკრატიული საქართველოს“ თავმჯდომარის ბიძინა ივანიშვილის ბიზნეს–ცენტრთან ოპოზიციის აქციის დროს რამდენჯერმე გაისროლეს, იუწყება ტელეკომპანია „რუსთავი2“.

გასროლის დროს რეზიდენციასთან ოპოზიციის აქტივისტების ავტოკოლონა იმყოფებოდა, რომლებიც საპარლამენტო არჩევნების შედეგებს აპროტესტებენ.

შემთხვევის ადგილზე მობილიზებულია პოლიცია, რომელიც თავად აქციის მონაწილეებმა გამოიძახეს. „ნაციონალური მოძრაობის“ მომხრეების განმარტებით, პირი, რომელმაც გასროლა განახორციელა, დაბურულმინებიანი თეთრი ფერის ავტომობილით იყო, რომელმაც აქციის მონაწილეების მიმართულებით ხუთჯერ გაისროლა. ტერიტორიაზე ცეცხლსასროლი იარაღის სამი მასრაა ნაპოვნი.

შსს მომხდარ ფაქტთან დაკავშირებით კომენტარს მოგვიანებით გააკეთებს. ამ დროისთვის ტერიტორია ყვითელი ლენტითაა შემოსაზღვრული.

244
თემები:
შემთხვევები საქართველოში (1955)
საპატრულო პოლიცია

დაჭრილი მონადირე, რომელიც მაშველებს ტყიდან გამოჰყავდათ, გარდაიცვალა

60
მამაკაცმა „112“-ში თვითონ დარეკა, მაგრამ მას იმდენად ღრმა ჭრილობა ჰქონდა, რომ ის ტყიდან გამოყვანისას გარდაიცვალა. საქმეზე დაწყებულია გამოძიება

თბილისი, 25 ნოემბერი – Sputnik. დაჭრილი მონადირე, რომელსაც წალენჯიხის მუნიციპალიტეტში, დაბა ჯვარის ტყეში იარაღი გაუვარდა და თვითდაზიანება მიიყენა, ტყიდან გამოყვანისას გარდაიცვალა, იუწყება Sputnik-საქართველოს კორესპონდენტი.

გარდაცვლილის ოჯახის წევრების ინფორმაციით, უბედური შემთხვევა დილის საათებში მოხდა. დაჭრილმა „112“-ში თავად დარეკა.

სამაშველო ღონისძიება რამდენიმე საათის განმავლობაში მიმდინარეობდა, მასში მაშველთა ჯგუფები და სასაზღვრო პოლიციის ვერტმფრენი იყო ჩართული.

უამინდობის და მიუვალი რელიეფის გამო,  თვითმფრინავმა შემთხვევის ადგილზე დაჯდომა ვერ მოახერხა, რის გამოც ფეხით წასულ მაშველებს და ადგილობრივებს დაჭრილი მამაკაცი ტყიდან საკაცის საშუალებით ფეხით გამოჰყავდათ, თუმცა მონადირე  გზაში გარდაიცვალა. მას ღრმა ჭრილობა მუცლის არეში ქონდა მიყენებული.

გარდაცვლილი ქუთაისის ექსპერტიზის ბიუროშია გადასვენებული, თუმცა მანამდე გარდაცვლილის ახლობლებსა და სამართალდამცავებს შორის დაპირისპირება მოხდა. ოჯახის წევრები უარს აცხადებდნენ  გარდაცვლილი მამაკაცის ექსპერტიზაზე გადასვენებაზე.

62 წლის მამაკაცი სანადიროდ 23 ნოემბერს წავიდა.

მომხდართან დაკავშირებით დაწყებულია გამოძიება.

ნიკა ლატარია

 

60
თემები:
შემთხვევები საქართველოში (1955)
საქართველოს ნაკრების ქომაგები. საქართველო - ჩრდილოეთ მაკედონია

გულშემატკივრობა არ ისჯება - კალაძე კომენდანტის საათის დროს დაჯარიმებულ ქომაგს შეხვდა

51
(განახლებულია 22:18 25.11.2020)
დედაქალაქის მერი კახა კალაძე საქართველო-ჩრდილოეთ მაკედონიის მატჩის დროს დაჯარიმებულ გულშემატკივარს 2 ათას ლარიან ჯარიმას გადაუხდის, მაგრამ აცხადებს, რომ კანონს ყველა უნდა დაემორჩილოს

თბილისი, 25 ნოემბერი – Sputnik. დედაქალაქის მერი კახა კალაძე საქართველო-ჩრდილოეთ მაკედონიის მატჩის დროს დაჯარიმებულ გულშემატკივარს 2 ათას ლარიან ჯარიმას გადაუხდის, იუწყება პირველი არხი.

დედაქალაქის მერი, კახა კალაძე ფეხბურთელთა ეროვნული ნაკრების გულშემატკივრობისთვის დაჯარიმებულ მოქალაქეს პირადად შეხვდა. შეხვედრა დღეს გაიმართა.

ამასთან, კალაძის თქმით, კანონს ყველა უნდა დაემორჩილოს.

„კანონს ყველა უნდა დავემორჩილოთ. მაგრამ ის დღე განსაკუთრებული იყო გულშემატკივრისთვის, ჩვენი ქვეყნის ისტორიაში... სამწუხაროდ, ის შედეგი ვერ მივიღეთ, რასაც მთელი საქართველო ამ ხნის განმავლობაში ველოდებოდით. ამ კონკრეტულ პიროვნებას რაც შეეხება, ეს ერთი ადამიანი იყო დაჯარიმებული“, – განაცხადა კახა კალაძემ.

როგორც ფოტოდან ირკვევა, მერმა მას საჩუქრად მაისურიც გადასცა.

12 ნოემბერს საქართველომ ისტორიული მატჩი ჩრდილოეთ მაკედონიასთან წააგო. საქართველოს პირველად ჰქონდა ისტორიული შანსი ევროპის ჩემპიონატზე ეთამაშა, თუმცა საკვალიფიკაციო ეტაპის ფინალურ მატჩში 0:1 წააგო. ნაკრების მთავარმა მწვრთნელმა ვლადიმირ ვაისმა კი ამ მარცხის შემდეგ თანამდებობა დატოვა.

მატჩის შემდეგ ერთ-ერთი გულშემატკივარი, რომელიც ცრემლებს ვერ მალავდა, პოლიციამ რეგულაციების დარღვევის გამო დააჯარიმა 2 ათასი ლარით, რადგან კორონავირუსთან დაკავშირებულ რეგულაციების თანახმად 22:00 საათის შემდეგ გარეთ გასვლა იკრძალება.

საქართველოსა და ჩრდილოეთ მაკედონიას შორის შეხვედრა 12 ნოემბერს, კორონავირუსთან დაკავშირებით მიღებული რეგულაციების თანახმად, მაყურებლის გარეშე გაიმართა.

შეხვედრაზე საქართველოს ფეხბურთის ფედერაციის პრეზიდენტთან ლევან კობიაშვილთან ერთად მატჩის საყურებლად კახა კალაძე, „ქართული ოცნების“ აღმასრულებელი მდივანი ირაკლი კობახიძე და სხვა პირებიც იმყოფებოდნენ.

ამ ფაქტმა საზოგადოების ნაწილში გაღიზიანება და პროტესტის გრძნობა გამოიწვია. ამასთან დაკავშირებით საქართველოს ფეხბურთის ფედერაციასთან 13 ნოემბერს აქციაც კი გაიმართა, რომელიც სიტყვიერი და ფიზიკური დაპირისპირების ფონზე მიმდინარეობდა.

51
თემები:
კალაძე - „ოცნების“ მერი
სალომე ზურაბიშვილი

ზურაბიშვილმა გაეროს უამბო, რა კეთდება საქართველოში ოჯახურ ძალადობასთან ბრძოლის კუთხით

0
ოჯახში ძალადობა საქართველოში ერთ-ერთ მთავარ პრობლემად რჩება და ყველაზე ხშირი დანაშაულის ხუთეულში შედის

თბილისი, 25 ნოემბერი – Sputnik. ოჯახში ძალადობის პრევენცია და მასზე რეაგირება საქართველოსთვის პრიორიტეტად რჩება, განაცხადა საქართველოს პრეზიდენტმა სალომე ზურაბიშვილმა ქალთა მიმართ ძალადობის აღმოფხვრის საერთაშორისო დღისადმი მიძღვნილ გაეროს ოფიციალურ ონლაინ-ღონისძიებაზე.

ქალთა არასამთავრობო ორგანიზაციები ამ თარიღს 1981 წლიდან აღნიშნავენ. ამ დღეს 1960 წელს დომინიკას რესპუბლიკის ლიდერის, რაფაელ ტრუხილიოს ბრძანებით სასტიკად მოკლეს სამი და მირაბალები, რომლებიც რესპუბლიკის გამოჩენილი პოლიტიკური მოღვაწეები იყვნენ. 1999 წლის 17 დეკემბერს გაეროს გენერალურმა ასამბლეამ 25 ნოემბერი ქალთა მიმართ ძალადობის აღმოფხვრისთვის ბრძოლის საერთაშორისო დღედ გამოაცხადა.

„ოჯახში ძალადობის პრევენცია და რეაგირება საქართველოსთვის პრიორიტეტად რჩება. ჩვენ უზრუნველვყავით, რომ მიუხედავად COVID-19-ს მდგომაროებისა, არანაირი შეფერხება არ არის სახელმწიფოს მიერ მხარდაჭერილი სერვისების მიწოდებაში (თავშესაფრები, კრიზისის ცენტრები, ცხელი ხაზები); სახელმწიფომ ძლიერი მესიჯი გაუგზავნა ქალებსა და გოგონებს, რათა ძალადობის შემთხვევაში მათ მოიძიონ დახმარება და დაუკავშირდნენ სამართალდამცავებსა და სხვა მხარდამჭერ ორგანიზაციებს“, - განაცხადა ზურაბიშვილმა.

მან ასევე ისაუბრა ოჯახურ ტირანებზე ელექტრონული მეთვალყურეობაზე, რომელიც საქართველოში წელს შემოიღეს.

„შემაკავებელ ორდერთან ერთად, ეს მექანიზმი დამნაშავის რეალურ დროში მონიტორინგისა და მსხვერპლთან, მსხვერპლის სახლთან, სამსახურთან თუ სხვა სივრცეებში მიახლოების აკრძალვის საშუალებას იძლევა“, - აღნიშნა პრეზიდენტმა.

თავის გამოსვლაში ზურაბიშვილმა გამოხატა მადლიერება გენერალური მდივნის მიმართ განსაკუთრებული მოწოდებისთვის – „მშვიდობა შინ“ და აღნიშნა, რომ ამ საკითხში ყველა ქვეყნის თანამშრომლობა პრობლემის გადაჭრის ერთადერთი გზაა.

ოჯახში ძალადობა საქართველოში ერთ-ერთ მთავარ პრობლემად რჩება და ყველაზე ხშირი დანაშაულის ხუთეულში შედის. 2020 წლის ცხრა თვეში საქართველოში ოჯახური ძალადობის 4 138 შემთხვევა მოხდა. ძალადობის მსხვერპლთა ძირითადი ნაწილია 25-დან 44 წლამდე ასაკის ქალებია. წლის დაწყებიდან ოჯახში ძალადობას 19 ქალი ემსხვერპლა.

0
თემები:
ადამიანის უფლებები საქართველოში