მართლმსაჯულება

არეულობა ქვემო ქართლში: „ნაცმოძრაობის“ აქტივისტი გირაოს სანაცვლოდ გათავისუფლდა

46
(განახლებულია 20:55 05.10.2020)
რაც შეეხება მასობრივ არეულობაში მონაწილე „ქართული ოცნების“ აქტივისტებს, მათ შესახებ ინფორმაცია არ ვრცელდება.

თბილისი, 5 ოქტომბერი – Sputnik. ოპოზიციური პარტია „ერთიანი ნაციონალური მოძრაობის“ აქტივისტი არიფ იუსუფოვი, რომელიც პოლიციამ ბოლნისში მომხდარი დაპირისპირების შემდეგ დააკავა, 4 ათასი ლარის ოდენობით გირაოს სანაცვლოდ გათავისუფლდა, იუწყება ტელეკომპანია Rustavi 2. 

იუსუფოვის წინააღმდეგ საქმე „ძალადობის“ მუხლითაა აღძრული. იგი 27 სექტემბერს სოფელ ნახიდურში „ნაცმოძრაობისა“ და „ქართული ოცნების“ აქტივისტებს შორის მომხდარი ფიზიკური დაპირისპირების ერთ-ერთი მონაწილეა. მარნეულში 29 სექტემბერს მომხდარი დაპირისპირების ფაქტზე ენმ-ის კიდევ ერთი აქტივისტი ლაშა ქველაძეა დაკავებული.

პროკურატურა ორივე დაკავებულისთვის 5000-ლარიან გირაოს მოითხოვდა, თუმცა ადვოკატებმა დღეს გამართულ სასამართლო მოსმენის წინ განაცხადეს, რომ ისინი მათი დაცვის ქვეშ მყოფთა აღკვეთის ღონისძიების გარეშე გათავისუფლების მოთხოვნას აპირებდნენ, რადგანაც იუსუფოვისა და ქველაძის დანაშაული არ მტკიცდება.

„წარმოდგენილია ორი ეპიზოდი. საუბარია ორ ადამიანთან მიმართებით ძალადობაზე, თუმცა, გუშინ საქმის მასალებს გავეცანი, მასში არ არის ერთმნიშვნელოვანი მტკიცებულებები იმისა, რომ არიფ იუსუფოვმა რაიმე სახის ძალადობას მიმართა“, – განაცხადა ადვოკატმა როსტომ ლაზარიამ.

ხოლო მეორე დაკავებული ლაშა ქველაძე თავს დამნაშავედ არ ცნობს.

რაც შეეხება მასობრივ არეულობაში მონაწილე „ქართული ოცნების“ აქტივისტებს, მათ შესახებ ინფორმაცია არ ვრცელდება.

46
თემები:
შემთხვევები საქართველოში (1879)
საპატრულო პოლიცია

ქურდობა ბეთუმში: სახლის პატრონმა ბოროტმოქმედს წინააღმდეგობა გაუწია

38
(განახლებულია 12:39 25.10.2020)
სახლის მეპატრონემ უცნობისთვის წინააღმდეგობის გაწევა სცადა, რის შემდეგაც ბოროტმოქმედმა მას თავში ბლაგვი საგანი რამდენჯერმე ჩაარტყა.

თბილისი, 25 ოქტომბერი – Sputnik. ბათუმში, ფრიდონ ხალვაშის გამზირზე ერთ-ერთ საცხოვრებელ სახლში გამთენიისას უცნობი პირი სავარაუდოდ სახლის გასაქურდად შეიპარა, იუწყება საქართველოს პირველი არხი.

ტელეკომპანიის ინფორმაციით, სახლის მეპატრონემ, 51 წლის მამაკაცმა მისთვის წინააღმდეგობის გაწევა სცადა, რის შემდეგაც უცნობმა მას თავში ბლაგვი საგანი რამდენჯერმე ჩაარტყა.

დაშავებული კლინიკაშია გადაყვანილი. მედიკოსების ინფორმაციით, მას სახის ძვლების მოტეხილობა აღენიშნება, თავის ტვინი კი დაზიანებული არ არის. 

მამაკაცის ჯანმრთელობის მდგომარეობა ექიმების შეფასებით საშუალო სიმძიმისაა.

ჯერჯერობით უცნობია, არის თუ არა წაღებული თანხა. ასევე უცნობია, დააკავეს თუ არა ქურდი.

საქართველოს შინაგან საქმეთა სამინისტროში ფაქტს ადასტურებენ. უწყების ინფორმაციით, გამოძიება სისხლის სამართლის კოდექსის 177-ე ქურდობის მუხლით მიმდინარეობს.

38
თემები:
კრიმინალი საქართველოში
სპეცოპერაცია ზუგდიდში

„მეამაყება დავით ხვიბლიანი“: თემურ ხვიბლიანი სასამართლოში ჩივილს აპირებს

88
სამხედრო მოსამსახურე თემურ ხვიბლიანი აცხადებს, რომ ზუგდიდში, „საქართველოს ბანკის“ ფილიალზე თავდასხმის ფაქტში მის მონაწილეობასთან დაკავშირებით ზოგიერთ მედიასაშუალებაში ცრუ ინფორმაცია ვრცელდება.

თბილისი, 24 ოქტომბერი - Sputnik. სამხედრო მოსამსახურე თემურ ხვიბლიანი მის შესახებ ზოგიერთ მედიასაშუალებაში გავრცელებული ცრუ ინფორმაციის გამო მათგან ბოდიშის მოხდას ითხოვს, წინააღმდეგ შემთხვევაში კი ჩივილს აპირებს, იუწყება პირველი არხი.

სამხედრო მოსამსახურე აცხადებს, რომ ზუგდიდში, „საქართველოს ბანკზე“ მომხდარი თავდასხმის შემდეგ, ფაქტში მის მონაწილეობასთან დაკავშირებით ზოგიერთმა მედიასაშუალებამ ცრუ და გადაუმოწმებელი ინფორმაცია გაავრცელა.

მისი განცხადებით, სიმართლეს არ შეესაბამება ინფორმაცია, რომლის მიხედვითაც, ის სავარაუდო თავდამსხმელად სახელდება.

„ის, რომ თურმე მე ვყოფილვარ თავდამსხმელი, რომელიც შეიჭრა „საქართველოს ბანკის“ ზუგდიდის ფილიალში, ასევე ის, რომ თანამზრახველად მყოლია ასევე მოქმედი სამხედრო მოსამსახურე დავით ხვიბლიანი, არის აბსოლუტური ტყუილი, ცრუ ბრალდება, გადაუმოწმებელი ინფორმაცია, რომელიც გაჟღერდა სხვადასხვა ტელევიზიაში“, - აცხადებს ხვიბლიანი.

ხვიბლიანმა განმარტა, რომ ძარცვის დღეს იმყოფებოდა თბილისში, საკუთარ სახლში. მისივე თქმით, ამას არაერთი ადამიანი დაადასტურებს.

თემურ ხვიბლიანი ასევე გამოეხმაურა ერთ-ერთ მძევალთან, დავით ხვიბლიანთან დაკავშირებით ზოგიერთი მედიასაშუალების მხრიდან გავრცელებულ ინფორმაციას, რომ ის იყო თავდამსხმელის თანამზრახველი. თემურ ხვიბლიანის თქმით, მას დიდი წვლილი მიუძღვის იმაში, რომ მძევლები არ დაშავებულან.

„სხვათა შორის, დავით ხვიბლიანის დიდი დამსახურებაა, რომ მძევლები უვნებლად, ჯანმრთელები და ცოცხლები გამოვიდნენ იმ ტერიტორიიდან. სინამდვილეში ლომის წვლილი მიუძღვის დავით ხვიბლიანს მძევლების უსაფრთხო გამოსვლაში“, – განაცხადა თემურ ხვიბლიანმა.

თემურ ხვიბლიანი ცრუ ბრალდებების გამო ბოდიშის მოხდას მოითხოვს, წინააღმდეგ შემთხვევაში სასამართლოს მიმართავს.

მედიასაშუალებებს ბოდიშის მოხდისკენ მოუწოდებს ყოფილი მძევალი დავით ხვიბლიანიც. მისი განცხადებით, ბოლო დღეებია მის წინააღმდეგ ცრუ და ღირსების შემლახველი ინფორმაცია ვრცელდება.

ხვიბლიანი ერთ-ერთი მათგანია, რომელიც შეიარაღებულმა პირმა ოთხშაბათს „საქართველოს ბანკის“ ზუგდიდის ფილიალზე თავდასხმისას მძევლად აიყვანა და რომელიც შენობის დატოვების შემდეგ თან გაიყოლა. მასმედიაში გავრცელებული ინფორმაციით, ხვიბლიანი ბანკზე თავდამსხმელის თანამზრახველია და, შესაბამისად, ცრუ მძევალი.

21 ოქტომბერს შეიარაღებული პირი „საქართველოს ბანკის“ ზუგდიდის ფილიალში შეიჭრა და 40-ზე მეტი ადამიანი მძევლად აიყვანა. ბოროტმოქმედმა ხელისუფლებისგან ნახევარი მილიონი დოლარი, ვერტმფრენი ან მანქანა, ასევე მისი უსაფრთხოების გარანტიები მოითხოვა. მოთხოვნების შეუსრულებლობის შემთხვევაში დამნაშავე მძევლების დახოცვით იმუქრებოდა.

მძევლების გათავისუფლების ოპერაცია შვიდ საათზე მეტხანს გაგრძელდა, რთული და ხანგრძლივი მოლაპარაკებების შედეგად მძევლების გათავისუფლება მოხდა, მათ სამეგრელო–ზემო სვანეთის პოლიციის დეპარტამენტის დირექტორი ავთანდილ გალდავა ჩაენაცვლა. ფულის მიღების შემდეგ თავდამსხმელმა ავთანდილ გალდავასთან და სამ მძევალთან ერთად დატოვა ბანკის შენობა. გავრცელებული ინფორმაციით, თავდამსხმელმა მძევლები ჩხოროწყუს მუნიციპალიტეტის სოფელ კირცხის ტყეში გაათავისუფლა, თავად კი მიიმალა. საბოლოოდ ყველა მძევალი გათავისუფლდა, ბოროტმოქმედზე კი ძებნაა გამოცხადებული.

ზუგდიდში მომხდარ ფაქტზე გამოძიება საქართველოს სსკ-ის 179-ე, 236-ე და 144-ე მუხლებით მიმდინარეობს, რაც ყაჩაღობას, იარაღის უკანონო შეძენა-შენახვა-ტარებას და მძევლად აყვანას გულისხმობს.

88
თემები:
ზუგდიდში შეიარაღებულმა პირმა მძევლები აიყვანა
ზუგდიდის რეფერალური საავადმყოფო

სამეგრელო-ზემო სვანეთის რეგიონში კორონავირუსის 93 შემთხვევა გამოვლინდა

0
(განახლებულია 14:09 25.10.2020)
რეგიონში დადასტურებული შემთვევების უმრავლესობა ზუგდიდში გამოვლინდა, ყველაზე მეტი პაციენტები რუხის კლინიკაში მკურნალობს

თბილისი, 25 ოქტომბერი — Sputnik. სამეგრელო-ზემო სვანეთის რეგიონის მასშტაბით ზუგდიდის ინფექციური საავადმყოფოს ლაბორატორიაში გამოკვლეული 276 ნიმუშებიდან 93-ზე დადებითი პასუხია, იუწყება Sputnik-საქართველოს კორესპონდენტი.

სამეგრელო-ზემო სვანეთის სახელმწიფო რწმუნებულის მოვალეობის შემსრულებლის მალხაზ თორიას გამცხადებით, აქედან 59 შემთხვევა დაფიქსირდა ზუგდიდში. 10 შემთხვევა - ფოთში, 7 შემთხვევა - წალენჯიხაში. ასევე 7 შემთხვევა ჩხოროწყუში, 6 შემთხვევა  სენაკში, 3 შემთხვევა დაფიქსირდა ხობში, 1 ოკუპირებული აფხაზეთის ტეროტორიიდან. მათი ნაწილი უკვე დადასტურებული კონტაქტები არიან, ხოლო ნაწილი კი ახალი შემთხვევებია და ისინი ცხელებით შესული პაციენტები არიან.

რუხის კლინიკაში მკურნალობის კურსს გადის 119 კოვიდ პაციენტი, აქედან 15-ის მდგომარეობა შედარებით მძიმეა. ფოთის ჰოსპიტალში 40 კოვიდპაციენტი მკურნალობს.

ბოლო 24 საათის განმავლობაში რეგიონის მასშტაბით გამოჯანმრთელდა 9 პირი, მათ შორის 5 რუხის კლინიკიდან და 4 ფოთის კლინიკაში მკურნალობდა. (3 ზუგდიდი, 3 ოკუპირებული აფხაზეთის ტერიტორიიდან, 1 წალენჯიხა, 1 სამტრედია, 3 ქუთაისი).

რეგიონის მასშტაბით სულ საკარანტინე სივრცეში იმყოფება - 174 ადამიანი.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 1928-ით გაიზარდა და საერთო რიცხვმა 28 431-ს მიაღწია, გამოჯანმრთელებულთა რიცხვს 604 ადამიანი შეემატა, გარდაიცვალა 8 ადამიანი.

ამ დროისათვის სულ გამოჯანმრთელდა 10767 ადამიანი, გარდაიცვალა – 201, კარანტინის რეჟიმში იმყოფება 4112, სტაციონარებში ექიმების დაკვირვების ქვეშ 3766 პაციენტია, ხოლო კოვიდ–სასტუმროებში 2268 ადამიანი იმყოფება.

„დაბურული მინის“ ნიშანი : რა ცვლილებები აღმოაჩნდათ უსიმპტომო პაციენტებს >>

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

ნიკა ლატარია

0
თემები:
COVID-19 საქართველოში