ქვემო ქართლი

საქართველოში ევროპისა და აზიის დამაკავშირებელი ინტერნეტის კაბელები გადაჭრეს

220
(განახლებულია 17:35 02.10.2020)
ორივე შემთხვევაზე შესაბამისმა სამსახურებმა სწრაფი რეაგირება მოახდინეს. ამ დროისთვის პრობლემა აღმოფხვრილია და ინტერნეტის მიწოდება შეუფერხებლად მიმდინარეობს

თბილისი, 2 ოქტომბერი - Sputnik. საქართველოს შინაგან საქმეთა სამინისტრო ეძებს პირებს, რომლებმაც ქვემო ქართლში საერთაშორისო მნიშვნელობის მქონე ოპტიკურ-ბოჭკოვანი კაბელები დააზიანეს, ნათქვამია უწყების მიერ გავრცელებულ განცხადებაში.

სამინისტროს ინფორმაციით, შემთხვევები 28-29 სექტემბერს მოხდა. კერძოდ, მიმდინარე წლის 29 სექტემბერს, ღამით დმანისში, სოფელ ოროზმანის მიმდებარე ტერიტორიაზე განთავსებულ კაბელების მანიშნებელ ბოძთან დაუდგენელმა პირებმა/პირმა მიწა ამოიღო და მიწის სიღრმეში არსებული ოპტიკურ-ბოჭკოვანი სატელეკომუნიკაციო ქსელის კაბელები დააზიანა. გადაჭრილია  კომპანიის კუთვნილი საერთაშორისო მნიშვნელობის მქონე, შავი ზღვიდან შემომავალი, ევროპისა და აზიის დამაკავშირებელი, ფოთი-თბილისი-ბოლნისი-დმანისი-სომხეთის მიმართულებით გამავალი ოპტიკურ-ბოჭკოვანი კაბელები. კაბელები შპს „ოპტიკურ-ბოჭკოვან სატელეკომუნიკაციო ქსელს“ ეკუთვნის.

გარდა ამისა, უწყება ავრცელებს ინფორმაციას კიდევ ერთ შემთხვევაზე, კერძოდ კი, 28 სექტემბერს მარნეულში, სოფელ სადახლოში კომპანია „სილქნეტის“ ოპტიკურ-ბოჭკოვანი კაბელის დაზიანებაზე.

„ადგილზე მისულმა კომპანიის წარმომადგენლებმა ნახეს, რომ გადაჭრილი იყო წყლის არხზე გადამავალი ოპტიკურ-ბოჭკოვანი კაბელი. აღნიშნული კაბელით ხდება ინტერნეტით ადგილობრივი მოსახლეობის უზრუნველყოფა და იგი ასევე უკავშირდება სომხეთის რესპუბლიკას", — აღნიშნულია განცხადებაში.

ორივე შემთხვევაზე შესაბამისმა სამსახურებმა სწრაფი რეაგირება მოახდინეს. ამ დროისთვის პრობლემა აღმოფხვრილია და ინტერნეტის მიწოდება შეუფერხებლად ხდება.

ფაქტებზე გამოძიება საქართველოს სსკ-ის  187-ე მუხლით მიმდინარეობს,  სხვისი ნივთის დაზიანებას ან განადგურებას გულისხმობს, რამაც მნიშვნელოვანი ზიანი გამოიწვია.

220
თემები:
შემთხვევები საქართველოში (1879)
შსს-ს შენობა

შსს: ზუგდიდში „საქართველოს ბანკზე“ თავდამსხმელი იდენტიფიცირებულია

22
შსს მიმართავს მედიასაშუალებებსა და საზოგადოების ყველა წევრს, თუ სხვადასხვა წყაროთი მათთვის ცნობილი გახდა დანაშაულის ჩამდენი პირის ვინაობა და ფოტოსურათი, არ გაავრცელონ აღნიშნული ინფორმაცია

თბილისი, 25 ოქტომბერი – Sputnik. ზუგდიდში, 21 ოქტომბერს „საქართველოს ბანკზე“ მომხდარ ყაჩაღურ თავდასხმაში მონაწილე დამნაშავე პირის ვინაობა დადგინდა და ის იდენტიფიცირებულია, ნათქვამია შსს-ს განცხადებაში.

„პოლიციის მიერ იდენტიფიცირებული პირის ადგილსამყოფელის დადგენისა და მისი დაკავების მიზნით, სამართალდამცველების მიერ სპეციალური ოპერატიული, საგამოძიებო და სამძებრო მოქმედებები ამ დრომდე აქტიურად მიმდინარეობს“, - აღნიშნულია სამინისტროს განცხადებაში.

შინაგან საქმეთა სამინისტრო მიმართავს მედიასაშუალებებსა და საზოგადოების ყველა წევრს, თუ სხვადასხვა წყაროთი მათთვის ცნობილი გახდა დანაშაულის ჩამდენი პირის ვინაობა და ფოტოსურათი, არ გაავრცელონ აღნიშნული ინფორმაცია, რადგან ეს ხელს შეუშლის მიმდინარე საგამოძიებო ღონისძიებებს.

21 ოქტომბერს შეიარაღებული პირი „საქართველოს ბანკის“ ზუგდიდის ფილიალში შეიჭრა და 40-ზე მეტი ადამიანი მძევლად აიყვანა. ბოროტმოქმედმა ხელისუფლებისგან ნახევარი მილიონი დოლარი, ვერტმფრენი ან მანქანა, ასევე მისი უსაფრთხოების გარანტიები მოითხოვა. მოთხოვნების შეუსრულებლობის შემთხვევაში დამნაშავე მძევლების დახოცვით იმუქრებოდა. 

მძევლების გათავისუფლების ოპერაცია შვიდ საათზე მეტხანს გაგრძელდა, რთული და ხანგრძლივი მოლაპარაკებების შედეგად მძევლების გათავისუფლება მოხდა, მათ სამეგრელო–ზემო სვანეთის პოლიციის დეპარტამენტის დირექტორი ავთანდილ გალდავა ჩაენაცვლა. ფულის მიღების შემდეგ თავდამსხმელმა ავთანდილ გალდავასთან და სამ მძევალთან ერთად დატოვა ბანკის შენობა. გავრცელებული ინფორმაციით, თავდამსხმელმა მძევლები ჩხოროწყუს მუნიციპალიტეტის სოფელ კირცხის ტყეში გაათავისუფლა, თავად კი მიიმალა. საბოლოოდ ყველა მძევალი გათავისუფლდა, ბოროტმოქმედზე კი ძებნაა გამოცხადებული.

უწყების ცნობით, შინაგან საქმეთა სამინისტრო ფაქტთან დაკავშირებით დამატებით ინფორმაციას ეტაპობრივად გაავრცელებს.

ზუგდიდში მომხდარ ფაქტზე გამოძიება საქართველოს სსკ-ის 179-ე, 236-ე და 144-ე მუხლებით გრძელდება, რაც ყაჩაღობას, იარაღის უკანონო შეძენა-შენახვა-ტარებას და მძევლად აყვანას გულისხმობს.

 

22
თემები:
ზუგდიდში შეიარაღებულმა პირმა მძევლები აიყვანა
საპატრულო პოლიცია

ქურდობა ბეთუმში: სახლის პატრონმა ბოროტმოქმედს წინააღმდეგობა გაუწია

39
(განახლებულია 12:39 25.10.2020)
სახლის მეპატრონემ უცნობისთვის წინააღმდეგობის გაწევა სცადა, რის შემდეგაც ბოროტმოქმედმა მას თავში ბლაგვი საგანი რამდენჯერმე ჩაარტყა.

თბილისი, 25 ოქტომბერი – Sputnik. ბათუმში, ფრიდონ ხალვაშის გამზირზე ერთ-ერთ საცხოვრებელ სახლში გამთენიისას უცნობი პირი სავარაუდოდ სახლის გასაქურდად შეიპარა, იუწყება საქართველოს პირველი არხი.

ტელეკომპანიის ინფორმაციით, სახლის მეპატრონემ, 51 წლის მამაკაცმა მისთვის წინააღმდეგობის გაწევა სცადა, რის შემდეგაც უცნობმა მას თავში ბლაგვი საგანი რამდენჯერმე ჩაარტყა.

დაშავებული კლინიკაშია გადაყვანილი. მედიკოსების ინფორმაციით, მას სახის ძვლების მოტეხილობა აღენიშნება, თავის ტვინი კი დაზიანებული არ არის. 

მამაკაცის ჯანმრთელობის მდგომარეობა ექიმების შეფასებით საშუალო სიმძიმისაა.

ჯერჯერობით უცნობია, არის თუ არა წაღებული თანხა. ასევე უცნობია, დააკავეს თუ არა ქურდი.

საქართველოს შინაგან საქმეთა სამინისტროში ფაქტს ადასტურებენ. უწყების ინფორმაციით, გამოძიება სისხლის სამართლის კოდექსის 177-ე ქურდობის მუხლით მიმდინარეობს.

39
თემები:
კრიმინალი საქართველოში