თბილისი, 18 სექტემბერი - Sputnik. ვადასტურებთ, რომ თამარ ბაჩალიაშვილის საქმეში ნამდვილად მოიპოვება ვიდეო და აუდიომასალა, სადაც ის ტყეში თვითმკვლელობით სიცოცხლის დასრულებაზე საუბრობს, განაცხადა ბრიფინგზე პროკურორმა ამირან გულუაშვილმა.
დღეს პროკურატურაში გამართულ ბრიფინგზე განაცხადეს, რომ თამარ ბაჩალიაშვილის სიკვდილის მიზეზი მედიკამენტოზური ინტოკსიკაციაა და მის ცხედარს მექანიკური დაზიანების რამე ნიშნები, მათ შორის, ინექციის კვალი არ აღენიშნება. ექსპერტიზის შედეგების თანახმად კი დადგინდა, რომ პრეპარატების მოხვედრა თამარ ბაჩალიაშვილის კუჭ-ნაწლავის ტრაქტში შესაძლებელი იყო მხოლოდ საყლაპავი გზით და არა – ინექციის გზით.
პროკურორის განცხადებით, ის ვიდეომასალა, რომელიც ბაჩალიაშვილის მობილური ტელეფონიდანაა მოპოვებული, მის მძიმე ფსიქოლოგიურ მდგომარეობას ასახავს.
„საქმეში ნამდვილად მოიპოვება როგორც ვიდეო, ისე აუდიომასალა, რომელიც საკმაოდ მძიმე საყურებელი და მოსასმენია. საქმეში ნამდვილად არსებობს აუდიოჩანაწერი, განხორციელებული თამარ ბაჩალიაშვილის მიერ, როდესაც ის განიხილავს ტყეში თვითმკვლელობის სიცოცხლის დასრულების შესაძლებლობას“, – განაცხადა პროკურორმა.
თამარ ბაჩალიაშვილის საქმეში არსებული ვიდეო-აუდიომასალების ჩანაწერები პროკურატურაში, დახურულ დარბაზში დღეს ჟურნალისტებს მოასმენინეს.
თამარ ბაჩალიაშვილი ხუთი დღის ძებნის შემდეგ თეთრიწყაროს რაიონში, საკუთარ ავტომობილში გარდაცვლილი იპოვეს. ის სახლიდან 18 ივლისს გავიდა და უკან აღარ დაბრუნებულა. ოჯახი გოგონას დაღუპვას მის საქმიანობას უკავშირებს და ძირითადი ვერსიის – თვითმკვლელობის არ სჯერა. მათ მიაჩნიათ, რომ ეს მკვლელობა იყო, რომელიც თამარის სამსახურს უკავშირდება, რადგან მას ხელში გარკვეული კომპრომატი ჩაუვარდა.
ბაჩალიაშვილის საქმეზე გამოძიება მიმდინარეობს ორი მუხლით: „თავისუფლების უკანონო აღკვეთა" და „თვითმკვლელობამდე მიყვანა".
ადრე შსს-მ გოგონას კუთვნილი ნოუთბუქის ექსპერტიზის შედეგები გაასაჯაროვა, რომლის თანახმადაც გოგონა სუიციდზე ფიქრობდა და თვითმკვლელობის მეთოდების შესახებ ინფორმაციას ეძებდა. გარდა ამისა, მის ცხედართან ნაპოვნია ბარათი ჩანაწერით, რომ საბანკო ანგარიშზე თანხაა. ამ ანგარიშზე 75 ათასი ლარი აღმოჩნდა.
