სასწრაფო დახმარება

აჭარაში მომხდარი ავტოავარია მსხვერპლით დასრულდა: დაღუპულთა შორის შსს-ს თანამშრომლები არიან

121
(განახლებულია 15:37 04.09.2020)
წინასწარი ინფორმაციით, სოფლის გზაზე მოძრავი ავტომანქანა მოცურდა და გზის სავალი ნაწილიდან ხევში გადავარდა. მომხდარის შედეგად სამი ადამიანი გარდაიცვალა, ორი კი დაშავდა.

თბილისი, 4 სექტემბერი — Sputnik. შუახევის მუნიციპალიტეტში მომხდარ ავტოსაგზაო შემთხვევას სამი ადამიანი, მათ შორის შსს-ს საგანგებო სიტუაციების მართვის სამსახურის ორი თანამშრომელი ემსხვერპლა, ნათქვამია უწყების მიერ გავრცელებულ განცხადებაში.

„შინაგან საქმეთა სამინისტრო და საგანგებო სიტუაციების მართვის სამსახური ღრმა მწუხარებას გამოთქვამენ აჭარაში, შუახევის მუნიციპალიტეტის სოფელ ხაბელაშვილებთან მომხდარ ავტოსაგზაო შემთხვევასთან დაკავშირებით და სამძიმარს უცხადებენ გარდაცვლილთა ოჯახებს. გარდაცვლილთა შორის ორი პირი შსს-ს საგანგებო სიტუაციების მართვის სამსახურის თანამშრომელია“, – ნათქვამია განცხადებაში. 

წინასწარი ინფორმაციით, სოფლის გზაზე მოძრავი ავტომანქანა, სავარაუდოდ, მოცურდა და გზის სავალი ნაწილიდან ხევში გადავარდა დაახლოებით 100 მეტრის სიმაღლიდან. მომხდარის შედეგად სამი ადამიანი გარდაიცვალა, ორი კი დაშავდა.

შემთხვევის ადგილზე მისულმა მაშველებმა დაშავებულები უსაფრთხო ადგილზე გამოიყვანეს, რის შემდეგაც სასწრაფო დახმარების ბრიგადებმა ისინი სამედიცინო დაწესებულებაში გადაიყვანეს. ამ დროისთვის არსებული ინფორმაციით, მათ სიცოცხლეს საფრთხე არ ემუქრება.

„შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო. დანიშნულია ყველა შესაბამისი ექსპერტიზა“, – ნათქვამია შსს-ს განცხადებაში.

2020 წლის პირველ ნახევარში საქართველოში 2 270 ავარია მოხდა. დაიღუპა 203 ადამიანი, მათ შორის 9 ბავშვი. აღნიშნულ პერიოდში ავტოსაგზაო შემთხვევების შედეგად დაშავდა 2 982 ადამიანი, მათ შორის 245 ბავშვი. 

ავტოსაგზაო შემთხვევები საქართველოში: ექვსი თვის სტატისტიკა
© Sputnik / Konstantin Ivanov.
ავტოსაგზაო შემთხვევები საქართველოში: ექვსი თვის სტატისტიკა


121
თემები:
შემთხვევები საქართველოში (1789)
სიგარეტი

მარტვილში 90 ბლოკი უაქციზო სიგარეტი ამოიღეს

35
(განახლებულია 17:40 23.09.2020)
ფინანსთა სამინისტროს შემოსავლების სამსახურის ცნობით, აღმოჩენილი პროდუქცია კანონდამრღვევ მოქალაქეებს უკვე ჩამოერთვა.

თბილისი, 23 სექტემბერი  — Sputnik. ფინანსთა სამინისტროს შემოსავლების სამსახურის თანამშრომლებმა მარტვილის მუნიციპალიტეტში უაქციზო თამბაქოს ნაწარმის ტრანსპორტირების ფაქტი გამოავლინეს, ნათქვამია უწყების მიერ გავრცელებულ განცხადებაში.

სამართალდამცველებმა სოფელ ხუნწში ერთ–ერთი პირის კუთვნილი ავტომობილის ჩხრეკისას 90 ბლოკი (18 ათასი ღერი)  უაქციზო სიგარეტი აღმოაჩინეს.

კანონდამრღვევ მოქალაქეს აღნიშნული საქონელი ჩამოერთვა.

სისხლის სამართლის კოდექსით გათვალისწინებული შესაძლო დანაშაულის ნიშნების არსებობის გამო, საქართველოს საგადასახადო კოდექსის 271-ე მუხლის მეშვიდე ნაწილის შესაბამისად, საქმის მასალები საქართველოს ფინანსთა სამინისტროს საგამოძიებო სამსახურს გადაეგზავნა.

35
თემები:
კრიმინალი საქართველოში
პატრული

ფონიჭალაში 11 ნარკორეალიზატორი დააკავეს

44
(განახლებულია 17:05 23.09.2020)
ბრალის დამტკიცების შემთხვევაში ნარკორეალიზატორებს 20 წლამდე ან უვადო თავისუფლების აღკვეთა ემუქრებათ.

თბილისი, 23 სექტემბერი — Sputnik. სამართალდამცველებმა ნარკოტიკული საშუალების უკანონო შეძენა-შენახვა-გასაღების ბრალდებით ფონიჭალის დასახლებაში 11 ნარკორეალიზატორი დააკავეს, იუწყება შინგან საქმეთა სამინისტრო. 

გამოძიებით დადგინდა, რომ ბრალდებულები ნარკოტიკულ საშუალებებს სისტემატურად ყიდდნენ. სამართალდამცველებმა, მოსამართლის განჩინების საფუძველზე, რამდენჯერმე განახორციელეს ბრალდებულებისგან ნარკოტიკული საშუალება „ჰეროინის“ საკონტროლო შესყიდვა და აღნიშნული შესყიდვების ფარული აუდიო-ვიდეოჩაწერა.
პოლიციამ დაკავებულების პირადი და საცხოვრებელი სახლების ჩხრეკისას ნარკოტიკული საშუალება „ჰეროინი“, თანხა და მობილური ტელეფონები ამოიღო.

ბრალის დამტკიცების შემთხვევაში დაკავებულებს 8-დან 20 წლამდე ან უვადო თავისუფლების აღკვეთა ემუქრებათ.

განსაკუთრებით დიდი ოდენობით ნარკოტიკული საშუალების უკანონო შეძენა-შენახვა-გასაღების ფაქტებზე გამოძიება სსკ-ის 260-ე მუხლის პირველი ნაწილით, მე-3 ნაწილის „ა“ ქვეპუნქტით, მე-4 ნაწილით, მე-5 და მე-6 ნაწილების „ა“ ქვეპუნქტით მიმდინარეობს.

44
თემები:
ნარკოდანაშაული საქართველოში
საარჩევნო პლაკატები აღმაშენებლის გამზირზე

შეადარე პარტიები და გააკეთე არჩევანი: ამომრჩევლებისთვის აპლიკაცია ამუშავდა

0
(განახლებულია 19:54 23.09.2020)
სოციალური გამოკითხვებით, საქართველოში ამომრჩევლების დიდ ნაწილს ჯერ არ გადაუწყვეტია, რომელ პარტიას მისცეს ხმა

თბილისი, 23 სექტემბერი — Sputnik. საქართველოში ამუშავდა აპლიკაცია სახელწოდებით „საარჩევნო კომპასი - საქართველო“, რომელიც საპარლამენტო არჩევნების წინ ამომრჩეველს დაეხმარება პარტიების პოზიციები სხვადასხვა საკითხზე შეადაროს.

„წავალ, მაგრამ არ ვიცი, ვის მივცემ ხმას...“: დავუჯეროთ თუ არა გამოკითხვებს არჩევნების წინ >>

აპლიკაციის და ვებგვერდ Partiebi.Ge-ს პრეზენტაცია ოთხშაბათს გაიმართა. ღონისძიებაზე მიწვეული იყო პოლიტიკური პარტიების ლიდერები და საერთაშორისო და ადგილობრივი ორგანიზაციების წარმომადგენლები.

ახალი აპლიკაცია - ეს არის უპარტიო, ელექტრონული ინსტრუმენტი, რომელიც მომხმარებლებს აწვდის ინფორმაციას პოლიტიკური პარტიების პოზიციების შესახებ და ეხმარება ამომრჩეველს გაერკვეს, რომელიც პოლიტიკური პარტიის შეხედულებები არის მისთვის მისაღები.

აპლიკაცია ვებგვერდზე უკვე ხელმისაწვდომია. პროექტი განახორციელეს CRRC Georgia-ს, საქართველოს პოლიტიკის ინსტიტუტის (GIP) და თსუ-ს ეკონომიკის საერთაშორისო სკოლის (ISET) მკვლევარებმა აშშ-ის განვითარების საერთაშორისო სააგენტოს (USAID), გერმანული პოლიტიკური ფონდების და ნიდერლანდების სამეფოს მხარდაჭერით.

რაც შეეხება ვებგვერდ www.partiebi.ge-ს, ეს პროექტი განახორციელა აღმოსავლეთ ევროპული მრავალპარტიული დემოკრატიის ცენტრმა (EECMD), რომელიც 2012 წლიდან აქვეყნებს მნიშვნელოვან პოლიტიკურ, ეკონომიკურ და სოციალურ საკითხებზე საქართველოს პოლიტიკური პარტიების შეხედულებებს. პროექტს აფინანსებს ნიდერლანდების სამეფოს საელჩო საქართველოში.

საქართველოში საპარლამენტო პარტიები 31 ოქტომბერს გაიმართება. ამ დროისათვის არჩევნებისთვის დარეგისტრირებულია 58 პარტია და ორი ბლოკი.

0
თემები:
თანამედროვე ტექნოლოგიები