თბილისის ცენტრალური საავადმყოფო

თბილისის ცენტრალური საავადმყოფო თავის თანამშრომლებს გამოესარჩლა

175
(განახლებულია 20:48 05.08.2020)
კლინიკაში, სადაც სისხლის სამართლის პასუხისგებაში მიცემული ექიმები მუშაობდნენ, მიიჩნევენ, რომ მათ წინააღმდეგ ბრალდება გამოგონილია.

თბილისი, 5 აგვისტო – Sputnik. თბილისის ცენტრალურმა საავადმყოფომ გაავრცელა განცხადება, რომელშიც პროკურატურის მიერ მისი თანამშრომლებისთვის წარდგენილ ბრალდებას მთლიანად უარყოფს და მას აბსურდულს, საქმის ფაქტობრივ გარემოებებთან სრულიად შეუსაბამოს უწოდებს.

კლინიკის დირექტორი და ორი ექიმი გულგრილობასა და უკანონო სამედიცინო საქმიანობაში არიან ბრალდებული. კლინიკაში ჩატარებული ორი ოპერაციის შედეგად 25 წლის გოგონა უკვე თითქმის ორი წელია, კომატოზურ მდგომარეობაში იმყოფება.

საავადმყოფოს დირექცია აცხადებს, რომ პროკურატურის ბრალდება სრული სიცრუეა და არავის დაურწმუნებია პაციენტის ოჯახის წევრები, რომ იტალიელი ექიმების მომსახურებით ესარგებლათ.

„კლინიკა ბოლო რამდენიმე წელია თანამშრომლობს იტალიის ქალაქ ბერგამოს საუნივერსიტეტო კლინიკის პროფესორებთან რობერტო აგაცისთან და რობერტო ნანისთან და მათი მეთვალყურეობის ქვეშ, კლინიკის სამედიცინო გუნდის ჩართულობით, ბოლო 3 წლის განმავლობაში 98 პაციენტს გადაუდებელი ოპერაცია წარმატებით ჩაუტარდა“, – ნათქვამია განცხადებაში.

განცხადებაში აღნიშნულია, რომ 23 წლის გოგონამ საავადმყოფოს 2018 წლის სექტემბერში მიმართა. მას ჩაუტარდა ოპერაცია, რომლის დროსაც სიმსივნე მოკვეთეს. დაახლოებით ორი თვის შემდეგ მან კვლავ იგრძნო დისკომფორტი და განმეორებითი ოპერაცია 2018 წლის 11 ნოემბერს დაინიშნა. ოპერაციას თვალყურს ადევნებდა ცნობილი იტალიელი ექიმი რობერტო აგაცი.

„ოპერაციის დაწყებისას, ანესთეზიოლოგის მიერ პაციენტის ანესთეზიის პროცესში მისი მდგომარეობა გაუარესდა და მიუხედავად იტალიელ-ქართველი ექიმების ჯგუფის მზაობისა, ქირურგიული ჩარევის მაგივრად საჭირო გახდა რეანიმაციული ქმედებების განხორციელება. ყოველივე ზემოაღნიშნულიდან გამომდინარე, სრულიად გაუგებარი და აუხსნელია, სად იკვეთება თაღლითური ქმედების ნიშნები“, – აღნიშნულია განცხადებაში.

რუსთავში 18 წლის გოგონა ცხვირის ოპერაციამდე ნარკოზის გაკეთების შემდეგ გარდაიცვალა>>

როგორც განცხადებაშია ნათქვამი, პროკურატურის მტკიცება, რომ დაკავებულ ექიმს ვახტანგ ყიფიანს არ ჰქონდა ამ მომსახურების გაწევის შესაბამისი ლიცენზია, დაუსაბუთებელი და მოგონილია.

„ვახტანგ ყიფიანი ცნობილი და ლიცენზირებული ექიმია ინტერვენციული რადიოლოგიის დარგში, 15 წელზე მეტი სტაჟით. მხოლოდ ბოლო 12 თვის განმავლობაში მის მიერ 2000-მდე გადაუდებელი ოპერაცია ჩატარდა. აღნიშნული მანიპულაციაც წარმოადგენდა ინტერვენციულ-რადიოლოგიურ ჩარევას. ვინაიდან პროცედურის დასაწყისშივე გართულდა პაციენტის მდგომარეობა და არ განხორციელებულა ქირურგიული ჩარევა, ნათელია, რომ ვახტანგ ყიფიანის ქმედებები ვერ გახდებოდა პაციენტის ჯანმრთელობის მდგომარეობის დამძიმების საფუძველი“, – აღნიშნავენ კლინიკაში.

პროკურატურის მონაცემებით, დაკავებულმა ექიმმა ყიფიანმა ოპერაციის დროს თანაშემწედ აიყვანა ექიმი–ანესთეზიოლოგი მაგდა ხოჭოლავა, რომელსაც ლიცენზია საერთოდ არ ჰქონდა.

თავის მხრივ საავადმყოფოს ხელმძღვანელობა აცხადებს, რომ მაგდა ხოჭოლავა მოქმედი ანესთეზიოლოგია, რომელსაც აქვს ლიცენზია, რომელიც იტალიის შესაბამისმა ორგანომ გასცა და მის კომპეტენტურობაში დაეჭვების საბაბი არ არსებობს.

ისინი ასევე აბსურდულს უწოდებენ კლინიკის დირექტორის გიორგი ლობჟანიძის წინააღმდეგ წარდგენილ ბრალდებას, რომ მან გულგრილობა გამოამჟღავნა და სათანადოდ არ შეასრულა თავისი მოვალეობები, რადგან გოგონას დღემდე უტარდება ყველა საჭირო სამედიცინო პროცედურა.

ვახტანგ ყიფიანს ბრალი წარდგენილი აქვს მუხლით, რომელიც უკანონო საექიმო ან ფარმაცევტულ საქმიანობას ითვალისწინებს, რომელსაც ჯანმრთელობის დაზიანება მოჰყვა. დანაშაული სასჯელის სახედ და ზომად ექვსიდან ცხრა წლამდე თავისუფლების აღკვეთას ითვალისწინებს.

საავადმყოფოს დირექტორს ბრალად ედება გულგრილობა, მას ორიდან ხუთ წლამდე ვადით პატიმრობა ემუქრება.

მაგდა ხოჭოლავამ დატოვა ქვეყანა და მას ბრალი უკანონო საექიმო საქმიანობისთვის დაუსწრებლად წარედგინა, რაც ცხრა წლამდე ვადით პატიმრობას ითვალისწინებს.

175
თემები:
კრიმინალი საქართველოში (1122)
ძალადობა

ყოფილ მეუღლეზე ძალადობის ბრალდებით 31 წლის მამაკაცი დააკავეს

27
(განახლებულია 12:01 24.09.2020)
ოჯახური ძალადობა დღემდე ერთ–ერთი ყველაზე გავრცელებული სისხლის სამართლის დანაშაულია საქართველოში. საგამოძიებო ორგანოებმა ნახევარ წელიწადში ამ მხრივ 2,6 ათასი სისხლის სამართლის საქმე აღძრეს.

თბილისი, 24 სექტემბერი  — Sputnik. სამართალდამცველებმა  ყოფილი მეუღლის მიმართ ჩადენილი ძალადობის, მუქარისა და თავისუფლების უკანონო აღკვეთის ბრალდებით  31 წლის მამაკაცი დააკავეს, ნათქვამია შსს–ს პრესცენტრის მიერ გავრცელებულ განცხადებაში. 

გავრცელებული ინფორმაციით, ბრალდებულმა  39 წლის ყოფილ მეუღლეს სახლში მიაკითხა, იძულებით ჩასვა ავტომობილში და  სოფელ დაბის მიმართულებით ტყისკენ წაიყვანა, სადაც, უთანხმოების ნიადაგზე, ფიზიკური შეურაცხყოფა მიაყენა და სიცოცხლის მოსპობით დაემუქრა.

გამოძიება დაწყებულია სსკ-ის 11 პრიმა 143-ე მუხლის პირველი ნაწილით, 11 პრიმა 151-ე მუხლის მეორე ნაწილით და 126-ე პრიმა მუხლის პირველი ნაწილით, რაც ოჯახის წევრის მიმართ ჩადენილ თავისუფლების უკანონო აღკვეთას, ძალადობასა და მუქარას გულისხმობს და ითვალისწინებს ოთხ წლამდე ვადით პატიმრობას.

ოჯახური ძალადობა დღემდე ყველაზე გავრცელებული სისხლის სამართლის დანაშაულია საქართველოში. საგამოძიებო ორგანოებმა ნახევარ წელიწადში ამ მხრივ 2,6 ათასი სისხლის სამართლის საქმე აღძრეს. ამასთან, ამავე პერიოდში ოჯახური ძალადობის შედეგად დაიღუპა 11 ადამიანი, დაიჭრა – 12.

ოჯახური ძალადობა საქართველოს სისხლის სამართლის კოდექსში ცალკე მუხლად 2014 წელს გამოიყო. ამა თუ იმ საქმის განხილვისას ის დამამძიმებელი გარემოებაა. კანონმდებლობის გამკაცრება ხელისუფლებამ ოჯახური კონფლიქტების ნიადაგზე მკვლელობების ტალღის შემდეგ გადაწყვიტა. 2014 წელს ოჯახური ძალადობის მსხვერპლი 14 ადამიანი გახდა.


27
თემები:
კრიმინალი საქართველოში (1122)
დაკავება

კიბერდანაშაულის სქემა გახსნილია: დაკავებულია ორი პირი

48
(განახლებულია 13:48 24.09.2020)
პოლიციამ დაკავებულების პირადი და საცხოვრებელი სახლების ჩხრეკისას, კომპიუტერული ტექნიკა, მობილური ტელეფონები, საბანკო პლასტიკური ბარათები ნივთმტკიცების სახით ამოიღო.

თბილისი, 24 სექტემბერი  — Sputnik. სამართალდამცველებმა ოზურგეთში კიბერდანაშაულის ბრალდებით ორი პირი დააკავეს, ნათქვამია შსს–ს პრესცენტრის მიერ გავრცელებულ განცხადებაში.

28 და 30 წლის მამაკაცებს  ბრალად ედებათ კომპიუტერულ სისტემაში უნებართვო შეღწევა და კომპიუტერული მონაცემების უნებართვო შეცვლა.

გამოძიებით დადგინდა, რომ მიმდინარე წლის 28 აპრილსა და 6 ივნისს ერთ–ერთმა ბრალდებულმა  მის მიერ კუსტარულად აწყობილი სწრაფი ჩარიცხვის აპარატის გამოყენებით მოახერხა ქალაქ სენაკსა და ქალაქ ზესტაფონში მდებარე სწრაფი ჩარიცხვის აპარატების პროგრამული უზრუნველყოფის გასაღების, ე.წ. „დონგლის“ კოდის გაწერა. 

„ერთ–ერთმა დაკავებულმა კუსტარული სწრაფი ჩარიცხვის აპარატის გამოყენებით, ონლაინ–ტოტალიზატორის მის მიერვე შექმნილ, არავერიფიცირებულ და ერთ-ერთი მომხმარებლის ვერიფიცირებულ ანგარიშებზე თაღლითური გზით გადარიცხა 7 ათასი ლარი. აღნიშნული თანხის ნაწილი – 2 ათასი ლარი მეგობართან ერთად გაანაღდა, რომელიც ამავე ონლაინ–ტოტალიზატორის მომხმარებელია. თანხის  მეორე ნაწილი კი – 5 ათასი  ლარი  ქობულეთში მდებარე ერთ-ერთი ბანკომატიდან თავად გამოიტანა“, – აღნიშნულია განცხადებაში.

პოლიციამ დაკავებულების პირადი და საცხოვრებელი სახლების ჩხრეკისას, კომპიუტერული ტექნიკა, მობილური ტელეფონები, საბანკო პლასტიკური ბარათები ნივთმტკიცების სახით ამოიღო.

გამოძიება დაწყებულია სსკ-ის 284-ე მუხლის მეორე, 286–ე მუხლის მესამე და 180-ე მუხლის მეორე და მესამე ნაწილით, რაც სამიდან ცხრა წლამდე ვადით თავისუფლების აღკვეთას ითვალისწინებს.

48
თემები:
კრიმინალი საქართველოში (1122)
ტესტირება კორონავირუსზე

გრიპია თუ COVID-19? მთავარი განსხვავება სიმპტომების თანმიმდევრობაა - ქვეყნდება კვლევა

0
(განახლებულია 15:31 24.09.2020)
მსოფლიოს წამყვანი მეცნიერები ირწმუნებიან, რომ კორონავირუსული ინფექცია ბავშვებში განსხვავებული სიმპტომატიკით ვლინდება

თბილისი, 24 სექტემბერი — Sputnik. ბავშვებში COVID-19 ზრდასრულებისგან განსხვავებულად იჩენს თავს, აცხადებენ ამერიკელი მეცნიერები, რომელთა შრომაც სპეციალიზებულ პორტალ Frontiers Media–ზეა გამოქვეყნებული.

მათი თქმით, კორონავირუსს, გრიპსა და სხვა მწვავე რესპირატორულ ვირუსულ ინფექციებს ბევრი რამ აქვთ საერთო და მსგავსი. თუმცა მათი გარჩევა მაინც შესაძლებელია.

აშშ–ის დაავადებათა კონტროლისა და პროფილაქტიკის ცენტრის ასახელებს COVID–19–ის 11 უმთავრეს სიმპტომს. ესენია: ცხელება ან სიცივის შეგრძნება, ხველება, ჰაერის უკმარისობა ან გაძნელებული სუნთქვა, დაღლილობა, კუნთების ან სხეულის ტკივილი, თავის ტკივილი, ყელის ტკივილი, გემოსა და სუნის შეგრძნებების დაკარგვა, ცხვირის გაჭედვა ან სურდო, პირღებინება ან გულისრევის შეგრძნება, დიარეა.

სწავლულების თქმით, ეს სიმპტომები შესაძლოა მაინცდამაინც COVID-19–ით დაავადებაზე არ მეტყველებდეს და სეზონური გრიპისა თუ ჩვეულებრივ მწვავე რესპირატორულ ინფექციაზე მიუთითებდეს.

„მთავარი განსხვავება, რომლის მეშვეობითაც შეიძლება დადგინდეს, კორონავირუსით ინფიცირებასთან გვაქვს საქმე თუ სხვა დაავადებასთან — ეს სიმპტომების გამოვლენის თანმიმდევრობაა“, — მიაჩნიათ ნაშრომის ავტორებს.

კალიფორნიის უნივერსიტეტის მკვლევარებმა კორონავირუსით ინფიცირებული დაახლოებით 57 ათასი ადამიანის მონაცემები შეისწავლეს და სიმპტომების ის თანმიმდევრობა დაადგინეს, რომელიც უტყუარად მიუთითებს COVID-19–ით დაავადებაზე. თანმიმდევრობა ასე გამოიყურება: 

  1. მაღალი ტემპერატურა;
  2. ხველება (უპირატესად, მშრალი) და კუნთების ტკივილი;
  3. პირღებინება ან გულისრევის შეგრძნება;
  4. დიარეა.

სეზონური გრიპის შემთხვევაში კი სიმპტომების თანმიმდევრობა ასეთია:

  1. ხველება და კუნთების ტკივილი;
  2. თავისა და ყელის ტკივილი;
  3. მაღალი ტემპერატურა;
  4. დიარეა, პირღებინება და გულისრევის შეგრძნება.

ანუ, გრიპის შემთხვევაში ცხელება მაშინვე არ იწყება.

როგორც ნიუ–იორკელი ექიმი რობერტ გლატერი წერს გამოცემა Healthline–ში, ახალ კორონავირუსს ასევე აქვს უნიკალური სიმპტომები: გემოსა და სუნის შეგრძნებების დაკარგვა, გამონაყარი კანზე, ფეხის თითების გაწითლება და შეშუპება. 

გარდა ამისა, მედიკოსები გვირჩევენ, სასწრაფოდ მივმართოთ ექიმს იმ შემთხვევაში, თუ ქვემოთ ჩამოთვლილთაგან რომელიმე სიმპტომი შენიშნეთ: სუნთქვის პრობლემა, ტკივილი ან სიმძიმის შეგრძნება გულ–მკერდის არეში, დეზორიენტაცია, რთულად გაღვიძება და საწოლიდან ადგომის პრობლემა, სახის ან ტუჩების სილურჯე.

კორონავირუსის სიმპტომები ბავშვებში

წამყვანი ბრიტანელი ექსპერტი, პროფესორი ტიმ სპექტორი აცხადებს, რომ ბავშვებს, რომლებსაც ცხვირი გაჭედილი აქვთ და აცემინებენ, გამორიცხულია, რომ კორონავირუსით იყვნენ  ინფიცირებულები.  

პროფესორი სპექტორი მონაწილეობდა კვლევაში, რომელმაც აჩვენა, რომ სასკოლო ასაკის ბავშვებში COVID-19–ის ყველაზე მეტად გავრცელებული სიმპტომები ასე გამოიყურება:

  • დაღლილობა (55%-ში);
  • თავის ტკივილები (55%-ში);
  • მაღალი ტემპერატურა (49%-ში).

ამასთან, როგორც Covid Symptom Study–ს მასალებიდან ირკვევა (სწორედ ეს დანართი დაეხმარა ბრიტანელ მკვლევარებს ინფიცირებულებზე დაკვირვებაში), 18 წლამდე ასაკის ინფიცირებული ბავშვები და მოზარდები, როგორც წესი, არ ახველებენ და არ აღენიშნებათ მაღალი ტემპერატურა.

გარდა ამისა, დადებითი ტესტის მქონე ბავშვებიდან ყოველ მესამეს საერთოდ არ აღენიშნებოდა არანაირი სიმპტომი. ხოლო იმ ბავშვებში, რომლებსაც კორონავირუსით ინფიცირების სიმპტომები გამოუვლინდათ, ყველაზე ხშირი იყო ყელის ტკივილი (38%) და მადის დაკარგვა (35%). ამასთან, ყოველ მეექვსეს აღენიშნებოდა გამონაყარი კანზე.

0
თემები:
მსოფლიო და მეცნიერება