თბილისის საქალაქო სასამართლო

ახალი სკანდალი საქართველოში: თაღლითი ექიმები და მათი მსხვერპლი ახალგაზრდა გოგონა

401
(განახლებულია 16:39 05.08.2020)
დაკავებულებს ბრალად ედებათ სამსახურებრივი გულგრილობა, პროფესიული მოვალეობის შესრულებისას თაღლითობა და უკანონო საექიმო საქმიანობა.

თბილისი, 5 აგვისტო – Sputnik. თაღლითობის ბრალდებით დაკავებულ თბილისის ცენტრალური საავადმყოფოს დირექტორსა და ორ ექიმს დღეს თბილისის საქალაქო სასამართლოში აღკვეთის ზომას შეუფარდებენ. მათ ბრალად ედებათ სამსახურებრივი გულგრილობა, პროფესიული მოვალეობის შესრულებისას თაღლითობა და უკანონო საექიმო საქმიანობა, რასაც ჯანმრთელობის მძიმე დაზიანება მოჰყვა.

კერძოდ, 25 წლის გოგონა ორი ოპერაციის გადატანის შემდეგ, უკვე მეორე წელია, კომატოზურ მდგომარეობაში იმყოფება.

პროკურატურა დაკავებულების აღკვეთის ზომად პატიმრობას მოითხოვს.

ბრალდების ვერსიები

ცნობილია, რომ დაზარალებული 25 წლის გოგონაა. მის შესახებ მეტი ინფორმაცია ცნობილი არ არის. მან საავადმყოფოს მაშინ მიმართა, როდესაც 23 წლის იყო. ჩაუტარეს ორი ოპერაცია, რის შემდეგაც დღემდე კომატოზურ მდგომარეობაშია.

პაციენტის ადვოკატის გაიოზ ჩარკვიანის განცხადებით, გოგონას ეს მდგომარეობა, პირველ რიგში, ანესთეზიოლოგის შეცდომამ გამოიწვია.

„25 წლის გოგო ექიმების გულგრილობის, დაუდევრობისა და თაღლითობის გამო 20 თვეა კომატოზურ მდგომარეობაშია. ელემენტარული უსისხლო ოპერაცია ჩაუტარდა, ანესთეზიოლოგმა ანესთეზია არასწორად გაუკეთა. შედეგად მას ჟანგბადი 13-15 წუთის განმავლობაში არ მიეწოდებოდა, გოგონა გაითიშა და დღემდე იმყოფება კომატოზურ მდგომარეობაში“, – განაცხადა ოჯახის ადვოკატმა გაიოზ ჩარკვიანმა.

ადვოკატის თქმით, გაირკვა, რომ ექიმებს არ ჰქონიათ შესაბამისი საექიმო პრაქტიკა და ლიცენზია.

საავადმყოფოს პოზიცია

თბილისის ცენტრალური საავადმყოფოს იურისტი ნუცა ბუზალაძე აცხადებს, რომ გავრცელებული ინფორმაცია იმის თაობაზე, თითქოს ოპერაცია არაკვალიფიციურმა ექიმებმა ჩაატარეს, სიცრუეა და ის ამ პოზიციას დაიცავს სასამართლოზე.

მისი თქმით, ორი წლის განმავლობაში იტალიიდან ნამდვილად ჩამოდიოდნენ დარგის სპეციალისტები და მათ არაერთი წარმატებული ოპერაცია ჩაატარეს. ამ კონკრეტულ შემთხვევაში მათ მონაწილეობა მიიღეს ქირურგიული ჩარევის მსვლელობაში, რაც ცნობილი იყო პაციენტისა და მისი კანონიერი წარმომადგენლისთვის. ჩვენ არ ვეთანხმებით ბრალდებას, განაცხადა ადვოკატმა.

სკანდალის არსი

გამოძიებით დადგინდა, რომ 2018 წლის ზაფხულში ცენტრალურ საავადმყოფოს მიმართა პაციენტმა, სადაც მას კონსულტაცია გაუწია ერთ-ერთმა ამჟამად დაკავებულმა ექიმმა ვ.ყ.-მ.

მან პაციენტი დაარწმუნა, რომ ჩატარებული გამოკვლევის შედეგები იტალიაში იქნა გადაგზავნილი, საიდანაც მოვიდა პასუხი აუცილებელი ოპერაციის თაობაზე. უფრო მეტიც, პაციენტი დაარწმუნეს, რომ ქირურგიულ ოპერაციასაც იტალიელი ექიმები ჩაატარებდნენ.

თუმცა, აღნიშნული ოპერაცია 2018 წლის 18 სექტემბერს, იტალიელი ექიმების ნაცვლად, თავად ვ.ყ.-მ ჩაატარა, რომელსაც არ ჰქონდა სახელმწიფო სერტიფიკატი „ორთოპედია–ტრავმატოლოგიის“ სპეციალობით. ოპერაციის დროს მისი ასისტენტი იყო მეორე ბრალდებული მ.ხ., რომელსაც საექიმო საქმიანობის არანაირი სერტიფიკატი არ გააჩნდა.

ოპერაციის შემდეგ პაციენტს ტკივილები განუახლდა, რის გამოც მან აღნიშნულ საავადმყოფოს ისევ მიმართა. იმავე ექიმმა ვ.ყ-მ იგი განმეორებითი ოპერაციის ჩატარებაზე დაიყოლია იმ არგუმენტით, რომ ეს იტალიელი სპეციალისტების რეკომენდაცია იყო და რომ ოპერაციას იტალიიდან მოწვეული ექიმები თავად ჩაატარებდნენ. 

განმეორებითი ოპერაცია 2018 წლის 10 დეკემბერს ჩატარდა. ისევე, როგორც პირველ შემთხვევაში, ოპერაცია იტალიელი სპეციალისტების ნაცვლად, იმავე „ექიმებმა“ ჩაატარეს. ექიმების მიერ გამოვლენილი უყურადღებობისა და დაშვებული შეცდომების გამო პაციენტის მდგომარეობა გართულდა და იგი დღემდე კომატოზურ მდგომარეობაში იმყოფება.

გამოძიებით ასევე დადგინდა, რომ მთელი ამ „მკურნალობის“ პერიოდში კლინიკას გ.ლ. ხელმძღვანელობდა, რომელსაც უნდა გაეკონტროლებინა მედპერსონალის შესაბამისი ლიცენზიის არსებობის საკითხი, უფრო მეტიც, მას წარმოდგენაც არ ჰქონდა ზემოაღნიშნული პაციენტის მკურნალობის პროცესზე.

ბათუმში გარდაცვლილი 29 წლის გოგოს ოჯახმა საავადმყოფოს ეზოში მდუმარე აქცია გამართა>>

ვ.ყ.-ს ბრალი სსკ-ის 180-ე და 246-ე მუხლებით წარედგინა, რაც სასჯელის სახედ და ზომად ექვსიდან ცხრა წლამდე თავისუფლების აღკვეთას ითვალისწინებს.

საავადმყოფოს დირექტორს ბრალად ედება გულგრილობა, მას ორიდან ხუთ წლამდე ვადით პატიმრობა ემუქრება.

მ.ხ.-მ ქვეყნის დატოვება მოასწრო და მას ბრალი უკანონო საექიმო საქმიანობისთვის დაუსწრებლად წარედგინა, რაც ცხრა წლამდე ვადით პატიმრობას ითვალისწინებს.

401
თემები:
კრიმინალი საქართველოში (1108)
პოლიციის მანქანა

სროლა ყანაში: სვანეთში ქალი დაჭრეს

103
(განახლებულია 00:07 19.09.2020)
სოფლის მოსახლეობის თქმით, მესტიის მუნიციპალიტეტში დანაშაული წარსულში მომხდარი დაპირისპირების გამო მოხდა.

თბილისი, 18 სექტემბერი ― Sputnik. მესტიის მუნიციპალიტეტის სოფელ ბეჩოში ქალი დაჭრეს, იუწყება "Sputnik-საქართველოს" კორესპონდენტი.

არსებული ინფორმაციით, ინციდენტი გუშინ მოხდა. ქალბატონს ცეცხლსასროლი იარაღიდან ჭრილობა მაშინ მიაყენეს, როცა ქმართან ერთად ყანაში მუშაობდა. დაჭრილი სასწრაფო სამედიცინო დახმარების სამსახურმა მესტიის რეფერალურ საავადმყოფოში გადაიყვანა.

მედიკოსების თქმით, მისი ჯანმრთელობის მდგომარეობა დამაკმაყოფილებელია. ადგილობრივების თქმით, დანაშაულის მოტივი წარსულში არსებული დაპირისპირებაა.

შსს ინფორმაციით, გამოძიება მიმდინარეობს სსკ-ის 19-108  (განზრახ მკვლელობის მცდელობა) და 236 (იარაღის უკანონო შეძენა, შენახვა, ტარება) მუხლებით.

ნიკა ლატარია

103
თემები:
კრიმინალი საქართველოში (1108)
პოლიცია

სამართალდამცველები 41 წლის მამაკაცს ეძებენ

102
(განახლებულია 16:45 18.09.2020)
მამაკაცს ბოლო სატელეფონო კომუნიკაცია მიმდინარე წლის 29 ივლისს დედასთან ჰქონდა, რის შემდეგაც მასთან დაკავშირება ვერ ხერხდება

 

თბილისი, 18 სექტემბერი - Sputnik. სამართალდამცველები უგზოუკვლოდ დაკარგულ 41 წლის ამირან გაფრინდაშვილს ეძებენ, ნათქვამია საქართველოს შინაგან საქმეთა სამინისტროს მიერ გავრცლებულ განცხადებაში. 

უწყების ცნობით, მამაკაცი თბილისში, გლდანის რაიონის სოფელ გიორგიწმინდაში ცხოვრობს. მას  ბოლო სატელეფონო კომუნიკაცია მიმდინარე წლის 29 ივლისს დედასთან ჰქონდა, რის შემდეგაც მასთან დაკავშირება ვერ ხერხდება.

სამართალდამცავ უწყებაში  მამაკაცის გაუჩინარების შესახებ შეტყობინება 12 აგვისტოს შევიდა.

„შეტყობინების მიღებისთანავე დაიწყო და გრძელდება აღნიშნული პირის ინტენსიური სამძებრო-საძიებო ღონისძიებები. ამ ეტაპზე, გამოკითხულია ათეულობით პირი, დანიშნულია ექსპერტიზები და აქტიურ რეჟიმში გრძელდება შესაბამისი მოქმედებები გაუჩინარებული მამაკაცის ადგილსამყოფელის დადგენის მიზნით“,- აღნიშნულია განცხადებაში.

საქმეზე გამოძიება საქართველოს სსკ-ის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.

შინაგან საქმეთა სამინისტრო მოქალაქეებს მოუწოდებს,  აღნიშნულ პიროვნებასთან დაკავშირებით ნებისმიერი ინფორმაციის არსებობის შემთხვევაში, დარეკონ საზოგადოებრივი უსაფრთხოების მართვის ცენტრ "112"-ში ან აცნობონ პოლიციის უახლოეს განყოფილებას.

102
თემები:
შემთხვევები საქართველოში
სასწრაფო დახმარება

საქართველოში COVID-19-ით ინფიცირებულთა უმრავლესობა უსიმპტომოა ან მსუბუქი სიმძიმისაა

0
ეპიდემიოლოგები პაციენტების მკურნალობს სახლის პირობებში გეგმავენ - მიმდინარეობს ექიმების გადამზადება

თბილისი, 19 სექტემბერი — Sputnik. საქართველოში კორონავირუსით ინფიცირებულთა შორის ჭარბობენ მსუბუქი, უსიმპტომო ან საშუალო სიმძიმის პაციენტები, განაცხადა დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.

საქართველოში ამ დროისათვის 1657 პაციენტი მკურნალობს. მათგან 13-ის მდგომარეობა კრიტიკულია, ხუთი კი ხელოვნური სუნთქვის აპარატზეა ჩართული.

„ზოგადად ბოლო ორ კვირაში გვაქვს ახალი შემთხვევების მზარდი დინამიკა და ეს ძირითადად ხდება აჭარის რეგიონის ხარჯზე, სადაც გვაქვს ეპიდაფეთქება, მაგრამ სიტუაცია სრულად მართვადია და მათ შორის აჭარის რეგიონში“, – განაცხადა გამყრელიძემ.

გამყრელიძემ არ გამორიცხა, რომ აჭარაში პაციენტების მართვა სახლში დაიწყოს. მისი თქმით, უახლოეს დღეებში პირველადი ჯანდაცვის ექიმები კიდევ ერთხელ გადამზადდებიან, რათა პაციენტებს სახლის პირობებში უმკურნალონ.

გამყრელიძის თქმით, 30 იანვრიდან საქართველოში 534 ათასი PCR-ტესტი და დაახლოებით 301 ათასი სწრაფი ტესტი გაკეთდა.

ეპიდემიოლოგმა მოუწოდა ყველას ცხელების შემთხვევაში შესაბამის სამსახურებს მიმართონ. მისი თქმით, ეს პირველი წელიწადია, როდესაც გრიპთან და სხვა რესპირატორულ დაავადებებთან ერთად, რომლებიც შემოდგომით აქტიურდება, იარსებებს ასევე კორონავირუსი. საჭიროა მაქსიმალური სიფრთხილე და რეკომენდაციების შესრულება.

გურიაში კორონავირუსი პედაგოგებს დაერია >>

ოქტომბრის დასაწყისში საქართველოს ექნება გრიპის ოთხკომპონენტიანი ვაქცინის 135 ათასამდე დოზა. დაავადებათა კონტროლის ცენტრი ვაქცინის დამატებითი დოზების შემოტანაზე მუშაობს.

„როგორც წესი, ვაქცინა გაუკეთდება რისკჯგუფებს და ეს რისკჯგუფები ყოველწლიურად ისაზღვრება იმუნიზაციის საბჭოს დადგენილებით. ვცდილობთ მაქსიმალურად, გავზარდოთ სახელმწიფოს მიერ შესყიდული ვაქცინის მარაგი. ძალიან ბევრ ბაზარზე და ბევრ მწარმოებელთან გვაქვს კონტაქტი და შესაძლებელია, წელს გრიპის აცრებზე მოთხოვნა იყოს მეტი, ვიდრე ოდესმე ყოფილა. რა თქმა უნდა, ვაქცინა ექნებათ კერძო კომპანიებსაც“, - განაცხადა გამყრელიძემ.

გასულ დღე-ღამეში კორონავირუსით ინფიცირების შემთხვევების რაოდენობა 182-ით გაიზარდა. სამთავრობო ვებგვერდ StopCov-ის მონაცემებით, ინფიცირებულთა საერთო რაოდენობა ქვეყანაში 3119-ე შეადგენს.

 

0
თემები:
COVID-19 საქართველოში