თბილისი, 21 ივლისი - Sputnik. თბილისის საქალაქო სასამართლომ არასრულწლოვანის გაუპატიურებაში ბრალდებულს 11 წლით თავისუფლების აღკვეთა მიუსაჯა, ნათქვამია პროკურატურის მიერ გავრცელებულ განცხადებაში.
გამოძიების ინფორმაციით, ბრალდებულმა 2019 წლის 17 დეკემბერს არასრულწლოვანი გააუპატიურა. მამაკაცი თბილისის პროკურატურის საგამოძიებო სამმართველოს თანამშრომლებმა მომხდარიდან რამდენიმე დღეში დააკავეს.
დაკავებულს ბრალი საქართველოს სსკ-ის 137-ე მუხლის მე-3 ნაწილის ,,დ“ ქვეპუნქტით (გაუპატიურება, ჩადენილი არასრულწლოვანის მიმართ) წარედგინა და აღკვეთის ღონისძიების სახით პატიმრობა შეეფარდა.
საქმის სპეციფიკიდან გამომდინარე, უწყება არ აკონკრეტებს მსხვერპლის სქესსა და ასაკს.
თბილისის საქალაქო სასამართლომ პროკურატურის მიერ წარდგენილი მტკიცებულებების საფუძველზე ბრალდებული სრულად ცნო დამნაშავედ წარდგენილ ბრალდებაში.
