შსს–ს შენობა

17 დაკავებული და მაინც გაუხსნელი საქმე: რომელ თაროზე აღმოჩნდება გიორგი შაქარაშვილის საქმე

120
(განახლებულია 20:10 26.06.2020)
19 წლის ფეხბურთელს 70-მდე მაშველი და მყვინთავი ოთხი დღის განმავლობაში ეძებდა – შაქარაშვილის ცხედარი მდინარე არაგვში იპოვეს.

თბილისი, 26 ივნისი — Sputnik. 19 წლის ფეხბურთელის გიორგი შაქარაშვილის გარდაცვალების საქმე ჯერ გახსნილი არ არის, თუმცა შინაგან საქმეთა სამინისტრომ 18 ივნისს მომხდარი ფაქტის სურათის აღდგენა შეძლო და სხვადასხვა ბრალდებით 17 ადამიანი დააკავა, განაცხადა შინაგან საქმეთა მინისტრის მოადგილემ ვლადიმერ ბორცვაძემ ბრიფინგზე. 

„ამ ეტაპზე ჩატარებული ოპერატიული და საგამოძიებო მოქმედებების შედეგად დგინდება, რომ დაკავებულებმა ჩაიდინეს ჯგუფური ძალადობის ორგანიზება, ასევე თავისუფლების უკანონო აღკვეთა და განახორციელეს ძალადობა ორი ან მეტი პირის მიმართ“, – განაცხადა ბორცვაძემ.

ამავე დროს მან აღნიშნა, რომ შაქარაშვილის გარდაცვალების მიზეზი ჯერ დადგენილი არ არის, ამიტომაც საქმის გახსნაზე საუბარი არ მიდის.

„ვინაიდან სასამართლო-სამედიცინო ექსპერტიზა დასრულებული არ არის და, შესაბამისად, უცნობია გიორგი შაქარაშვილის გარდაცვალების მიზეზი. გრძელდება საგამოძიებო მოქმედებები. ყველა შესაძლო ვერსია მუშავდება. მომავალში, შესაძლოა, შეიცვალოს საქმის კვალიფიკაცია და დამძიმდეს ბრალდება“, – განაცხადა ბორცვაძემ.

17 ახალგაზრდიდან სამი ძალადობის, ოთხი – ძალადობის ორგანიზების, ხელმძღვანელობისა და ჯგუფურ ძალადობაში მონაწილეობის, ერთი – ორგანიზების, ხელმძღვანელობისა და ჯგუფურ ძალადობაში მონაწილეობისა და თავისუფლების უკანონო აღკვეთის, ოთხი – ჯგუფურ ძალადობაში მონაწილეობის, ხუთი კი ჯგუფური ძალადობის ორგანიზებისა და ხელმძღვანელობის და თავისუფლების უკანონო აღკვეთის ბრალდებითაა დაკავებული. 

გამოძიების ვერსიით, მიმდინარე წლის 18 ივნისს მცხეთაში სტუმრად მყოფ ახალგაზრდების ორ ჯგუფს შორის კონფლიქტი მოხდა, რომელიც ჩხუბში გადაიზარდა.

ჩხუბის შემდეგ კონფლიქტში მონაწილე ერთ-ერთი ჯგუფი თბილისში დაბრუნდა, ჯგუფური ძალადობის ორგანიზება მოახდინა და ავტომობილებით მცხეთაში გაემგზავრა.

თბილისი-სენაკი-ლესელიძის საავტომობილო გზაზე, სოფელ ნარეკვავთან ორგანიზებული ჯგუფის წევრები თავს დაესხნენ გზაზე მიმავალ ახალგაზრდებს და მათ ფიზიკური შეურაცხყოფა მიაყენეს. თავდასხმის დროს გიორგი შაქარაშვილი და მისი მეგობარი მდინარე არაგვის მიმართულებით გაიქცნენ. ახალგაზრდებმა შაქარაშვილის მეგობრის დაჭერა მოახერხეს, გიორგი კი მათ ხელიდან დაუსხლტა. ამის შემდეგ მისი კვალი ქრება.

19 წლის ფეხბურთელს 70-მდე მაშველი და მყვინთავი ოთხი დღის განმავლობაში ეძებდა. შაქარაშვილის ცხედარი მდინარე არაგვში იპოვეს.

120
თემები:
კრიმინალი საქართველოში (990)
სახანძრო მანქანა

რუსთავში ხანძრის შედეგად მამაკაცი დაიღუპა

38
ხანძრის ლიკვიდაციის შემდეგ მაშველებმა ბინაში შუახნის მამაკაცის ცხედარი აღმოაჩინეს, სხვა დაშავებული არავინაა

თბილისი, 9 ივლისი – Sputnik. რუსთავში საცხოვრებელი კორპუსის ბინაში ხანძრის შედეგად შუახნის მამაკაცი დაიღუპა, განუცხადეს Sputnik-საქართველოს საგანგებო სიტუაციების მართვის სამსახურში.

ხანძარი ხუთშაბათს საღამოს რუსთავის მე-12 მიკრორაიონში გაჩნდა.

„ხანძრის ლიკვიდაციის შემდეგ მაშველებმა ბინაში შუახნის მამაკაცის ცხედარი აღმოაჩინეს. მოსახლეობის დროული ევაკუაციის შედეგად სხვა დაშავებულები არ არიან“, - განაცხადა საგანგებო სიტუაციების მართვის სამსახურის თანამშრომელმა.

ადგილზე მობილიზებული იყო მეხანძრე-მაშველების ოთხი ბრიგადა. ხანძრის ლიკვიდირების მიუხედავად, მათ ტერიტორია ჯერ არ დაუტოვებიათ.

საგანგებო სამსახურში აცხადებენ, რომ ხანძრის გამომწვევი მიზეზების დადგენა მიმდინარეობს.

ცოტა ხნის წინ პირველმა არხმა გაავრცელა ინფორმაცია, რომ სავარაუდოდ ხანძარი გააჩინა ფსიქიური პრობლემების მქონე მამაკაცმა, რომელიც ეტლით მოსარგებლეა. სავარაუდოდ მან ბინიდან გამოსვლა ვერ მოახერხა. ამის შესახებ მაუწყებელს მისმა ძმამ განუცხადა.

38
თემები:
შემთხვევები საქართველოში
მეხანძრე-მაშველები

რუსთავში საცხოვრებელ კორპუსში ხანძარია - მიმდინარეობს მოსახლეობის ევაკუაცია

77
ერთ-ერთი დაზარალებულის ვერსიით, ხანძარი გააჩინა ფსიქიკური პრობლემების მქონე მისმა ძმამ, რომელიც ეტლით მოსარგებლეა

თბილისი, 9 ივლისი – Sputnik. რუსთავის მე-12 მიკრორაიონში საცხოვრებელ კორპუსში ბინა იწვის, მიმდინარეობს მოსახლეობის ევაკუაცია, იუწყება პირველი არხი.

ერთ-ერთმა დაზარალებულმა, რომლის ბინაშიც ცეცხლი გაჩნდა, განაცხადა, რომ ხანძარი სავარაუდოდ მისმა ძმამ გააჩინა, რომელსაც ფსიქიკური პრობლემები აქვს და ბოლო პერიოდში სახლის გადაწვით იმუქრებოდა. მისივე თქმით, ცეცხლის გაჩენის მომენტში ბინაში მისი ძმა და დედა იმყოფებოდნენ, დედამ გამოსვლა მოახერხა, თუმცა არაფერი იცის ძმის შესახებ, რომელიც ეტლით მოსარგებლეა.

დაზარალებულის თქმით, ბოლო რამდენიმე თვის განმავლობაში არაერთ ფსიქიატრიულ კლინიკას მიმართა, თუმცა, ვინაიდან მისი ძმა ეტლით მოსარგებლეა, მის მიღებაზე ყველა კლინიკამ უარი უთხრა.

ადგილზე ხანძარი ლოკალიზებულია, თუმცა ძლიერი დაკვამლიანებაა, რის გამოც მოქალაქეთა ნაწილს ჟანგბადი დასჭირდა. ადგილზე მუშაობენ სახანძრო-სამაშველო ჯგუფები.

 

77
თემები:
შემთხვევები საქართველოში
მყიდველები ბაზარში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/10 ივლისი

86394
საქართველოში საგანგებო მდგომარეობა ერთი თვის წინ მოიხსნა, მაგრამ მთავრობამ შეზღუდვების ნაწილი ძალაში დატოვა.

თბილისი, 10 ივლისი – Sputnik. საქართველოს მთავრობა აგრძელებს კორონავირუსის პანდემიის გამო დაწესებული შეზღუდვების მოხსნას, მაგრამ ამავე დროს მთავრობა და ეპიდემიოლოგები მოუწოდებენ მოქალაქეებს გამოიჩინონ სიფრთხილე და დაიცვან ჯანდაცვის სამინისტროს რეკომენდაციები.

ქვეყნის ტერიტორიაზე მოქმედებს შემდეგი შეზღუდვები:

  • დახურულ სივრცეებში, საჯარო დაწესებულებებში, საზოგადოებრივ ტრანსპორტში, ოფისებსა და მაღაზიებში სავალდებულოა პირბადის ტარება და სოციალური დისტანციის დაცვა;
  • საზოგადოებრივ ტრანსპორტში დაუშვებელია პირბადის გარეშე ყოფნა და კონდიციონერების ჩართვა;

  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე;
  • დახურულ სივრცეებში აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;
  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • უნივერსიტეტებში სასწავლო პროცესი კვლავ დისტანციურად განხორციელდება;
  • ადამიანების თავშეყრის ადგილებში აკრძალულია სპლიტ-სისტემის კონდიციონერების გამოყენება, რომლებიც ჰაერს იღებენ შენობიდან, აგრილებენ და ისევ აბრუნებენ. დაშვებულია სამრეწველო კონდიციონერების გამოყენება, რომლებიც კონდიცირება-ვენტილაციის სისტემებს მოიცავს (ჰაერი შენობაში გარედან შეაქვს).

ამ მომენტისათვის ინფიცირებულთა რაოდენობა 968 ადამიანს შეადგენს, აქედან 844 გამოჯანმრთელდა, 15 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

15 ივნისიდან აღდგა შიდა ტურიზმი, ხოლო 1 ივლისიდან საქართველო საზღვრებს უცხოელი ტურისტებისთვის გახსნის.

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 4851, სტაციონარებში მეთვალყურეობის ქვეშ კი 231 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე stopcov.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
86394
თემები:
COVID-19 საქართველოში