ხანძარი ვარკეთილის ბაზრობაზე

ხანძარი ვარკეთილში: მოვაჭრეები ხელისუფლებას დახმარებას სთხოვენ

92
(განახლებულია 16:06 16.06.2020)
ხანძრის შედეგად დაზარალებულმა მოვაჭრეებმა ბაზრობასთან შეკრება დილიდან დაიწყეს იმის იმედით, რომ მათი საქონლის ნაწილი მაინც გადარჩა, მაგრამ ტერიტორიაზე ჯერჯერობით არავის უშვებენ.

თბილისი, 16 ივნისი – Sputnik. ზარალის დათვლა, რომელიც ვარკეთილის ე.წ. თათრების ბაზრობაზე გაჩენილმა ხანძარმა მოვაჭრეებს მიაყენა, დღეიდან დაიწყება. დაზარალებულები ტერიტორიაზე დილიდან იკრიბებიან.

ორშაბათს, ღამით გაჩენილ ხანძარს ბაზრობაზე 130 მეხანძრე–მაშველი აქრობდა, მობილიზებული იყო 25 სახანძრო მანქანა. ცეცხლი 4 ათას კვადრატულ მეტრ ფართობზე გავრცელდა. სიტუაციას ართულებდა ის, რომ ბაზრობის გვერდით ბენზინგასამართი სადგურია. ხანძარს რამდენიმე საათის განმავლობაში აქრობდნენ. დილისთვის ის მთლიანად ჩამქრალი იყო.

დიდი ხანძარი თბილისის გარეუბნის სასურსათო და ტანსაცმლის ბაზარში - ვიდეო>>

ხანძრის მიზეზებს ადგენენ – ადგილზე ექსპერტები მუშაობენ. გამოძიება მიმდინარეობს სსკ-ის 187-ე მუხლის მეორე ნაწილით, რაც ცეცხლის წაკიდებით ნივთის დაზიანებას ან განადგურებას გულისხმობს. დანაშაული ისჯება სამიდან ხუთ წლამდე პატიმრობით, აღნიშნულია შსს-ს ვებ-გვერდზე განთავსებულ განცხადებაში.

უსაფრთხოების მიზნით ამჟამად პერიმეტრს პოლიციელების ჯაჭვი იცავს. წინასწარი ინფორმაციით, ცეცხლი საწყობებზე გავრცელდა, დაიწვა გასაყიდად გამზადებული ტანსაცმელი და სხვადასხვა ნივთები.

მოვაჭრეები თავიანთი დახლების დათვალიერებას მხოლოდ მას შემდეგ შეძლებენ, რაც ექსპერტები მუშაობას დაასრულებენ. ბევრი მათგანი ცდილობდა ხანძრისგან თავისი საქონლის დაცვას. ისინი აცხადებენ, რომ ეს მათი შემოსავლის ერთადერთი წყაროა, ხოლო ქონება დაზღვეული არ ჰქონდათ. მოვაჭრეები დახმარებას მთავრობას სთხოვენ.

ინფორმაცია მსხვერპლის შესახებ არ ვრცელდება. ჯანდაცვის სამინისტროს ინფორმაციით, ხანძრის შედეგად მსუბუქად დაშავდა პოლიციის ერთი თანამშრომელი, ხოლო ერთი მოქალაქე გადაიყვანეს საავადმყოფოში. პოლიციელმა ჰოსპიტალიზაციაზე უარი განაცხადა.

ვარკეთილის ბაზრობა კორონავირუსის პანდემიის გამო დაწესებული შეზღუდვების დროს არ მუშაობდა. მაღაზიების მფლობელებმა და მოვაჭრეებმა მუშაობის განახლება მხოლოდ ორი კვირის წინ შეძლეს.

92
თემები:
შემთხვევები საქართველოში (1539)
სახანძრო მანქანა

რუსთავში ხანძრის შედეგად მამაკაცი დაიღუპა

70
ხანძრის ლიკვიდაციის შემდეგ მაშველებმა ბინაში შუახნის მამაკაცის ცხედარი აღმოაჩინეს, სხვა დაშავებული არავინაა

თბილისი, 9 ივლისი – Sputnik. რუსთავში საცხოვრებელი კორპუსის ბინაში ხანძრის შედეგად შუახნის მამაკაცი დაიღუპა, განუცხადეს Sputnik-საქართველოს საგანგებო სიტუაციების მართვის სამსახურში.

ხანძარი ხუთშაბათს საღამოს რუსთავის მე-12 მიკრორაიონში გაჩნდა.

„ხანძრის ლიკვიდაციის შემდეგ მაშველებმა ბინაში შუახნის მამაკაცის ცხედარი აღმოაჩინეს. მოსახლეობის დროული ევაკუაციის შედეგად სხვა დაშავებულები არ არიან“, - განაცხადა საგანგებო სიტუაციების მართვის სამსახურის თანამშრომელმა.

ადგილზე მობილიზებული იყო მეხანძრე-მაშველების ოთხი ბრიგადა. ხანძრის ლიკვიდირების მიუხედავად, მათ ტერიტორია ჯერ არ დაუტოვებიათ.

საგანგებო სამსახურში აცხადებენ, რომ ხანძრის გამომწვევი მიზეზების დადგენა მიმდინარეობს.

ცოტა ხნის წინ პირველმა არხმა გაავრცელა ინფორმაცია, რომ სავარაუდოდ ხანძარი გააჩინა ფსიქიური პრობლემების მქონე მამაკაცმა, რომელიც ეტლით მოსარგებლეა. სავარაუდოდ მან ბინიდან გამოსვლა ვერ მოახერხა. ამის შესახებ მაუწყებელს მისმა ძმამ განუცხადა.

70
თემები:
შემთხვევები საქართველოში (1539)
მეხანძრე-მაშველები

რუსთავში საცხოვრებელ კორპუსში ხანძარია - მიმდინარეობს მოსახლეობის ევაკუაცია

95
ერთ-ერთი დაზარალებულის ვერსიით, ხანძარი გააჩინა ფსიქიკური პრობლემების მქონე მისმა ძმამ, რომელიც ეტლით მოსარგებლეა

თბილისი, 9 ივლისი – Sputnik. რუსთავის მე-12 მიკრორაიონში საცხოვრებელ კორპუსში ბინა იწვის, მიმდინარეობს მოსახლეობის ევაკუაცია, იუწყება პირველი არხი.

ერთ-ერთმა დაზარალებულმა, რომლის ბინაშიც ცეცხლი გაჩნდა, განაცხადა, რომ ხანძარი სავარაუდოდ მისმა ძმამ გააჩინა, რომელსაც ფსიქიკური პრობლემები აქვს და ბოლო პერიოდში სახლის გადაწვით იმუქრებოდა. მისივე თქმით, ცეცხლის გაჩენის მომენტში ბინაში მისი ძმა და დედა იმყოფებოდნენ, დედამ გამოსვლა მოახერხა, თუმცა არაფერი იცის ძმის შესახებ, რომელიც ეტლით მოსარგებლეა.

დაზარალებულის თქმით, ბოლო რამდენიმე თვის განმავლობაში არაერთ ფსიქიატრიულ კლინიკას მიმართა, თუმცა, ვინაიდან მისი ძმა ეტლით მოსარგებლეა, მის მიღებაზე ყველა კლინიკამ უარი უთხრა.

ადგილზე ხანძარი ლოკალიზებულია, თუმცა ძლიერი დაკვამლიანებაა, რის გამოც მოქალაქეთა ნაწილს ჟანგბადი დასჭირდა. ადგილზე მუშაობენ სახანძრო-სამაშველო ჯგუფები.

 

95
თემები:
შემთხვევები საქართველოში (1539)
გორის სამხედრო ჰოსპიტალი

ქართველ სამხედროებს ავღანეთში კორონავირუსი დაუდგინდა

0
(განახლებულია 10:52 10.07.2020)
სამხედრო მოსამსახურეები, რომლებიც როტაციის შედეგად ავღანეთიდან სამშობლოში დაბრუნდებიან, ორკვირიან კარანტინში განთავსდებიან

თბილისი, 10 ივლისი – Sputnik. ავღანეთიდან თბილისში სპეცრეისით 28 ქართველი სამხედრო მოსამსახურე ჩამოიყვანს. მათ კორონავირუსი აღმოაჩნდა.

ქართული მასმედიის ინფორმაციით, სამხედროები, რომლებიც სამშვიდობო მისიაში „მტკიცე მხარდაჭერა“ მონაწილეობდნენ, გერმანიის საჰაერო ძალების სამხედრო თვითმფრინავით გამოიყვანეს. ბორტზე მაათან ერთად იმყოფებოდა ბუნდესვერის მედპერსონალი.

„სამხედროების სამედიცინო მდგომარეობა დამაკმაყოფილებელია. რაც შეეხება სიმპტომატიკას, ის გართულებებისა და ჩივილების გარეშე მიმდინარეობს. ხოლო ინფიცირების წყარო, უკავშირდება ადგილობრივ ავღანელ პერსონალს“, – აღნიშნულია თავდაცვის სამინისტროს განცხადებაში.

საქართველოში გამოფრენამდე ინფიცირებულები სპეციალურ იზოლატორში მოათავსეს. შესაბამისა, მისიაში მონაწილე სხვა ქართველ ჯარისკაცებს ინფიცირების საფრთხე არ ემუქრება.

ინფიცირებული სამხედროები მკურნალობას გორის სამხედრო ჰოსპიტალში განაგრძობენ. რაც შეეხება დანარჩენ სამხედროებს, ისინი სამშობლოში დაბრუნების შემდეგ ორკვირიან სავალდებულო კარანტინს გაივლიან.

ნატოს მისია „მტკიცე მხარდაჭერა“ (Resolute Support), რომელიც არასაბრძოლო სტატუსის მატარებელია, ავღანეთში 2015 წლის 1 იანვრიდან იმყოფება. ნატოსა და ავღანეთს შორის ორმხრივი შეთანხმების თანახმად, ქვეყანაში 13 ათასამდე სამხედრო მოსამსახურეა, რომელთა ფუნქციებსაც ავღანეთის ძალოვანი სტრუქტურების სწავლება და მათთვის კონსულტაციების გაწევა წარმოადგენს.

საქართველოს მხრიდან მისიაში მონაწილეობს 870-ზე მეტი ჯარისკაცი. ისინი ბაგრამის საავიაციო ბაზაზე, ქაბულსა და მაზარი-შარიფში არიან დისლოცირებული.

0
თემები:
COVID-19 საქართველოში