თბილისი, 5 აპრილი - Sputnik. შინაგან საქმეთა სამინისტროს თანამშრომლებმა მოქალაქე ე.წ. კომენდანტის საათის დარღვევისთვის 3 000 ლარით დააჯარიმეს, ჩამოართვეს მართვის მოწმობა და შემდეგ პოლიციელებისთვის წინააღმდეგობის გაწევისთვის დააკავეს.
შესაბამისი ვიდეო უწყების „ფეისბუქის“ ოფიციალურ გვერდზე ვრცელდება. სამართალდამცველებმა, მონიტორინგის შედეგად, ბოლო 24 საათის განმავლობაში, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევის 238 ახალი ფაქტი გამოავლინეს.
შინაგან საქმეთა სამინისტროს თანამშრომლებმა, 4 აპრილის 21 საათიდან 5 აპრილის დილის 6 საათამდე, ე.წ. კომენდანტის საათის დარღვევის ფაქტზე, მთელი ქვეყნის მასშტაბით, 113 მოქალაქე დააჯარიმეს.
საქართველოში ახალი კორონავირუსით ინფიცირებულთა რიცხვმა 174-ს მიაღწია.
საგანგებო მდგომარეობა კორონავირუსის პანდემიასთან დაკავშირებით საქართველოში 21 მარტს გამოცხადდა და 21 აპრილამდე გაგრძელდება.
31 მარტიდან კი ქვეყნის მთელ ტერიტორიაზე კარანტინის რეჟიმი მოქმედებს. შემოღებულია ასევე კომენდანტის საათი 21:00 საათიდან დილის 06:00 საათამდე.
