პოლიცია

თურქეთის მოქალაქე ყალბი ფულის გასაღების ბრალდებით დააკავეს

53
(განახლებულია 15:46 05.11.2019)
საქართველოს სამართალდამცველები დაკავებულ თურქეთის მოქალაქეს ყალბი 15 000 ლირის გასაღების ფაქტს ედავებიან.

თბილისი, 5 ნოემბერი — Sputnik. სამართალდამცველებმა დიდი ოდენობით ყალბი ფულის გასაღების ფაქტზე თურქეთის მოქალაქე დააკავეს, იუწყება საქართველოს ფინანსთა სამინისტროს საგამოძიებო სამსახური.

გამოძიებით დადგინდა, რომ ბრალდებულმა თურქეთის რესპუბლიკიდან შემოიტანა და გაასაღა 15 ათასი ყალბი თურქული ლირა. საგამოძიებო მოქმედებების შედეგად დამატებით ამოღებულია კიდევ 5 ათასი ყალბი თურქული ლირა.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით.

53
თემები:
კრიმინალი საქართველოში (915)
პოლიცია ბათუმში

შსს-მ ბათუმში მომხდარ არეულობასთან დაკავშირებით ინციდენტის ვიდეოჩანაწერი გაავრცელა

139
(განახლებულია 20:54 27.05.2020)
რევაზ წულუკიძისა და ელდარ ანთაძის გათავისუფლების მოთხოვნით გამართულ აქციაზე ბათუმში პოლიციამ 30 პირი დააკავა

თბილისი, 27 მაისი - Sputnik. შინაგან საქმეთა სამინისტრო ასაჯაროებს კადრებს, სადაც ასახულია ხულიგნობის ფაქტი, რის საფუძველზეც ბათუმში სამართალდამცველებმა ორი პირი დააკავეს, ხოლო ოთხ პირს წარედგინა ბრალდება, ნათქვამია უწყების მიერ გავრცელებულ განცხადებაში.

არსებული ინფორმაციით, მიმდინარე წლის შვიდ მაისს, აჭარის პოლიციის დეპარტამენტის თანამშრომლებმა ბათუმში ორი პირი დააკავეს, ხოლო ოთხ პირს წარედგინა ბრალდება, სსკ-ის 239-ე მუხლით. დაკავებულები ამ დროისთვის იმყოფებიან წინასწარ პატიმრობაში.

საუბარია რევაზ წულუკიძესა და ელდარ ანთაძეზე, სწორედ მათ გათავისუფლებას ითხოვდნენ დღეს გამართულ საპროტესტო აქციაზე.

დაკავებულების ოჯახის წევრებმა და ახლობლებმა, ბრალდებულების გათავისუფლების მოთხოვნით, ბათუმში საპროტესტო აქცია გამართეს და ცენტრალური გზის გადაკეტვა სცადეს. პოლიციის არაერთი კანონიერი მოთხოვნის მიუხედავად, აქციის მონაწილეებმა განაგრძეს საზოგადოებრივი წესრიგის დაარღვევა და ძალადობრივი მეთოდებით შეეცადნენ გზის გადაკეტვას.

ბათუმში მიმდინარე აქციის დროს, ადმინისტრაციულ სამართალდარღვევათა კოდექსის 173-ე და 166-ე მუხლებით გათვალისწინებული სამართალდარღვევებისთვის სულ დაკავებულია 30 პირი, რაც გულისხმობს სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას და წვრილმან ხულიგნობას.

რეზო წულუკიძისა და ელდარ ანთაძის ოჯახის წევრები მიიჩნევენ, რომ ისინი უკანონოდ არიან დაკავებულები და მათ გათავისუფლებას მოითხოვენ. ამავე მოთხოვნით ისინი 8 მაისსაც შეიკრიბნენ აჭარის მთავრობის სახლთან და აქცია გამართეს, სადაც პოლიციისთვის წინააღმდეგობის გაწევის გამო ოთხი პირი ადმინისტრაციული წესით დააკავეს. წულუკიძესა და ანთაძეს ბრალი ჯგუფურ ხულიგნობაში ედებათ.

139
თემები:
შემთხვევები საქართველოში
პოლიცია ბათუმში

არეულობა ბათუმში: საპროტესტო აქციაზე რამდენიმე ადამიანი დააკავეს

54
(განახლებულია 21:20 27.05.2020)
აქციის მონაწილეები წინასწარ პატიმრობაში მყოფი რევაზ წულუკიძისა და ელდარ ანთაძის გათავისუფლებას ითხოვენ.

თბილისი, 27 მაისი – Sputnik. ბათუმში, აჭარის მთავრობის შენობის წინ საპროტესტო აქცია გაიმართა, რომლის მონაწილეები პატიმრობაში მყოფი რევაზ წულუკიძისა და ელდარ ანთაძის გათავისუფლებას ითხოვენ.

ადგილზე მობილიზებული არიან პოლიციის თანამშრომლები.

აქციის მონაწილეების ნაწილს აჭარის მთავრობის ადმინისტრაციაში შეხვდნენ. თუმცა, მათი თქმით, შეხვედრა უშედეგო იყო. დაკავებულების ოჯახის წევრების თქმით, მთავრობის წარმომადგენლებისგან მათ კონკრეტული პასუხი ვერ მიიღეს და აპირებენ აქციების გაგრძელებას.

პოლიციასთან შეხლა-შემოხლა მოხდა, რის გამოც დააკავეს 10-ზე მეტი აქციის მონაწილე.

რეზო წულუკიძე და ელდარ ანთაძე ხულიგნობის მუხლით 5 მაისს დააკავეს. დაკავების მიზეზი კონფლიქტი გახდა, რა დროსაც რამდენიმე პირი ცივი იარაღით დაჭრეს.

წულუკიძისა და ანთაძის ოჯახის წევრები მიიჩნევენ, რომ ისინი უკანონოდ არიან დაკავებული და მათ გათავისუფლებას მოითხოვენ. ამავე მოთხოვნით ისინი 8 მაისსაც შეიკრიბნენ აჭარის მთავრობის სახლთან და აქცია გამართეს, სადაც პოლიციისთვის წინააღმდეგობის გაწევის გამო ოთხი პირი ადმინისტრაციული წესით დააკავეს.

წულუკიძისა და ანთაძის საქმეზე გამოძიება საქართველოს სსკ-ის 239-ე მუხლით მიმდინარეობს, რაც ჯგუფურ ხულიგნობას გულისხმობს. 9 მაისს სასამართლომ ისინი წინასწარ პატიმრობაში დატოვა.

54
თემები:
შემთხვევები საქართველოში
თბილისის ინფექციური საავადმყოფო

კორონავირუსის ახალი შემთხვევებიდან ერთ–ერთი ტრაილერის მძღოლს უკავშირდება

0
(განახლებულია 14:44 28.05.2020)
ამ დროისთვის COVID-19–ის სამკურნალოდ საქართველოს კლინიკებში იმყოფება 153 პაციენტი. გამოჯანმრთელებულთა რაოდენობა ქვეყანაში თითქმის ოთხჯერ აღემატება გამოვლენილ შემთხვევებს.

თბილისი, 28 მაისი — Sputnik. კორონავირუსის სამი ახალი შემთხვევიდან ერთი სატვირთო ავტომობილის მძღოლს უკავშირდება, ხოლო ორი – ინფიცირებულებთან კონტაქტს, განუცხადა ჟურნალისტებს თბილისის ინფექციური საავადმყოფოს სამედიცინო დირექტორმა მარინა ეზუგბაიამ.

ფოთში სატვირთო ავტომობილების მძღოლების უმეტესობას კორონავირუსი არ დაუდასტურდა>>

ეზუგბაიას თქმით, ტრაილერის მძღოლი კარანტინში იმყოფებოდა.

თვითონ ინფექციურ საავადმყოფოში კორონავირუსის მქონე ახალი პაციენტები არ არიან. ამჟამად კლინიკაში 32 ადამიანი მკურნალობს. ორი პაციენტი გამოჯანმრთელდა და უკვე დატოვა საავადმყოფო.

რაც შეეხება სამ მძიმე პაციენტს, მათი მდგომარეობა დინამიკაში გაუმჯობესდა.

აზეგბაიამ აღნიშნა, რომ კორონავირუსის გავრცელების მხრივ ქვეყანაში სტაბილური ვითარებაა.

ვახტანგ ბოჭორშვილის სახელობის თბილისის კლინიკაში 32 ინფიცირებული პაციენტია, აქედან 11 ბავშვია. მათი მდგომარეობა ფასდება, როგორც საშუალო სიმძიმის.

„ბავშვების მდგომარეობა საკმაოდ მსუბუქია ყოველთვის. საბედნიეროდ, ყველა ბავშვის მდგომარეობა მიმდინარეობდა მსუბუქად. უმრავლესობაში გამოხატული იყო პნევმონია, მაგრამ მათი სუბიექტური შეგრძნებები იყო საკმაოდ მსუბუქი. პნევმონია მკურნალობას საკმაოდ კარგად ექვემდებარებოდა ყველა ბავშვის შემთხვევაში და გვყავდა ყველანაირი ასაკის ბავშვი“, – განაცხადა კლინიკის სამეთვალყურეო საბჭოს თავმჯდომარე მაკა სოლოღაშვილმა.

მისი თქმით კლინიკაში კორონავირუსით ინფიცირებული პაციენტების მკურნალობის ხანგრძლივობა 42–43 დღე დაფიქსირდა.

პირველ საუნივერსიტეტო კლინიკაში ამ დროისთვის კორონავირუსის მქონე შვიდი პაციენტი იმყოფება, რეანიმაციულ განყოფლებაში ერთი ადამიანია განთავსებული.

საქართველოში კორონავირუსისგან გამოჯანმრთელებული ადამიანების რაოდენობა ბოლო დღე-ღამეში 16-ით გაიზარდა.

ამჟამად კორონავირუსი დადასტურებული აქვს 738 ადამიანს. გამოჯანმრთელებულთა რაოდენობამ 573-ს (77,95%) მიაღწია. კარანტინის რეჟიმში იმყოფება 3076, ხოლო სტაციონარებში დაკვირვების ქვეშ 250 პაციენტია. გარდაიცვალა 12 ადამიანი.

ამ დროისათვის კორონავირუსის დიაგნოზით კლინიკებში 153 პაციენტი მკურნალობს, ხოლო გამოჯანმრთელებულთა რიცხვმა უკვე სამჯერ და მეტად გადააჭარბა ინფიცირებულთა რაოდენობას. 

საქართველოში კორონავირუსის სამი ახალი შემთხვევა გამოვლინდა>>

საქართველოში კორონავირუსის პირველი შემთხვევა 26 თებერვალს დაფიქსირდა, გარდაცვალების ბოლო შემთხვევა – 14 მაისს.

0
თემები:
COVID-19 საქართველოში