თბილისი, 3 ოქტომბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა სექტემბერში უაქციზო სიგარეტის უკანონო შენახვა-გადაზიდვის 11 ფაქტი გამოავლინეს, ნათქვამია უწყების მიერ გავრცელებულ განცხადებაში.
სამართალდამცველებმა სამეგრელოსა და ქვემო ქართლში ჯამში 35 ათას კოლოფზე მეტი კონტრაბანდული სიგარეტი ამოიღეს, რომლის საერთო თანხა 136 ათას ლარს აჭარბებს.
აღნიშნულ ფაქტზე 13 პირი ამხილეს, რომელთაგან შვიდი დაკავებულია.
გამოძიება სსკ-ის მე-200 მუხლის პირველი, მეორე და მესამე ნაწილებით მიმდინარეობს, რაც ექვსიდან რვა წლამდე ვადით თავისუფლების აღკვეთას ითვალისწინებს.
