დაკავება

თბილისში მშობლები შვილების პორნოსესიებით ფულს აკეთებდნენ: დაკავების კადრები

1683
(განახლებულია 17:19 19.09.2019)
ბრალის დამტკიცების შემთხვევაში ბრალდებულებს 17-დან 20 წლამდე ან უვადო თავისუფლების აღკვეთა ემუქრებათ.

თბილისი, 19 სექტემბერი — Sputnik. საქართველოს, აშშ-ის, ავსტრალიისა და ევროპოლის წარმომადგენლებმა არასრულწლოვნით ვაჭრობისა და არასრულწლოვნის გამოსახულების შემცველი პორნოგრაფიული ნაწარმოების დამზადება-გასაღების ქსელი გამოავლინეს, ნათქვამია შსს-ს განცხადებაში.

ოპერაცია რამდენიმე თვე გრძელდებოდა. შედეგად 11 ადამიანი დააკავეს – ერთი აშშ-ის, ერთი ავსტრალიის და ცხრა საქართველოს მოქალაქე.

დაკავებულთა შორის აღმოჩნდნენ არასრულწლოვანთა მშობლები, ნათესავები და ახლობლები.

გამოძიებით დადგინდა, რომ ავსტრალიისა და აშშ-ის მოქალაქეებმა თბილისში ნაქირავებ ბინებში არალეგალური ფოტოსალონები გახსნეს, სადაც შემდგომი რეალიზების მიზნით პორნოგრაფიულ მასალებს იღებდნენ.

შსს-ს ინფორმაციით, მშობლების თანხმობით გადაღებებში მონაწილეობდა 8-დან 14 წლამდე ასაკის დაახლოებით ათი გოგონა.

ბოროტმოქმედები პორნოსესიის სანაცვლოდ 500-დან 3000 ლარამდე თანხას იხდიდნენ. ანგარიშსწორება ხორციელდებოდა როგორც ნაღდი ანგარიშსწორებით, ისე ბანკის მეშვეობით. ამასთან, აშშ-ის მოქალაქე დანაშაულით მოპოვებულ თანხას თბილისში განლაგებული კრიპტომატებიდან ხსნიდა.

პოლიციამ არალეგალურ ფოტოსალონებში ჩატარებული ჩხრეკის შედეგად ნივთმტკიცებად ამოიღო ძვირადღირებული ფოტოაპარატები, განათების საშუალებები, რეკვიზიტები და კომპიუტერული ტექნიკა. გარდა აღნიშნულისა, ასევე ამოღებულია კომპიუტერულ ტექნიკაში, დისკებსა და ფოტოაპარატებში მოთავსებულ მეხსიერების ბარათებზე არსებული არასრულწლოვანთა პორნოგრაფიული ფოტო- და ვიდეომასალები.

გამოძიება გრძელდება საქართველოს სსკ-ის 255-ე მუხლის მე-3 ნაწილით, 143 პრიმა-2 მუხლის მე-2 ნაწილის „ბ“ ქვეპუნქტით, მე-3 ნაწილის „გ“ ქვეპუნქტით და ამავე მუხლის მე-4 ნაწილის „ა“ ქვეპუნქტით, რაც წინასწარი შეცნობით არასრულწლოვნის გამოსახულების შემცველი პორნოგრაფიული ნაწარმოების დამზადება-გასაღებას, ასევე ორგანიზებული ჯგუფის მიერ ორი ან მეტი არასრულწლოვნის მიმართ განხორციელებულ ტრეფიკინგს გულისხმობს.

ბრალის დამტკიცების შემთხვევაში დაკავებულებს 17-დან 20 წლამდე ან უვადო თავისუფლების აღკვეთა ემუქრებათ.

 

1683
თემები:
კრიმინალი საქართველოში (916)
სახანძრო მანქანა

ნუცუბიძის პლატოზე აფეთქება მოხდა

125
არსებული ინფორმაციით, აფეთქება გაზგასამართ სადგურზე მოხდა. მომხდარის შედეგად ერთი ადამიანი დაშავდა.

თბილისი, 1 ივნისი - Sputnik. თბილისში, ნუცუბიძის პლატოზე, ელგუჯა ამაშუკელის ქუჩაზე აფეთქება მოხდა.

არსებული ინფორმაციით, აფეთქება გაზგასამართ სადგურზე მოხდა.

მომხდარის შედეგად ერთი ადამიანი დაშავდა.

ხანძარი უკვე ლოკალიზებულია. ადგილზე ხუთი სახანძრო-სამაშველო ჯგუფი მუშაობს.

ადგილზე მობილიზებულია სამართალდამცველები, სასწრაფო დახმარების ეკიპაჟები და საგანგებო სიტუაციების სამსახურის წარმომადგენლები.

125
თუშეთში პოლონელი ტურისტი დაშავდა: ქალი თბილისში ვერტმფრენით გადაიყვანეს

თუშეთში პოლონელი ტურისტი დაშავდა: ქალი თბილისში ვერტმფრენით გადაიყვანეს

70
(განახლებულია 20:45 31.05.2020)
პოლონეთის მოქალაქე სოფელ ომალოში ცხენიდან გადმოვარდა და მიღებული დაზიანებების გამო, სპეციალური საშუალებებით სასწრაფოდ თბილისში გადაყვანა სჭირდებოდა.

თბილისი, 31 მაისი - Sputnik. თუშეთში დაშავებული პოლონელი ტურისტი ქალი ომალოდან თბილისში სასაზღვრო პოლიციის ვერტმფრენით მეხანძრე-მაშველებმა გადაიყვანეს, იუწყება შინაგან საქმეთა სამინისტროს საგანგებო სიტუაციების მართვის სამსახური.

მათი ცნობით, შინაგან საქმეთა სამინისტროს საზოგადოებრივი უსაფრთხოების მართვის ცენტრ „112“-ში შესული ინფორმაციის თანახმად, პოლონეთის მოქალაქე სოფელ ომალოში ცხენიდან გადმოვარდა და მიღებული დაზიანებების გამო, სპეციალური საშუალებებით სასწრაფოდ თბილისში გადაყვანა სჭირდებოდა.

„ომალოს მიმართულებით, უმოკლეს დროში გაფრინდა შინაგან საქმეთა სამინისტროს სასაზღვრო პოლიციის ვერტმფრენი, საგანგებო სიტუაციების მართვის სამსახურის განსაკუთრებულ სიტუაციებზე რეაგირების სამმართველოს სამაშველო და სასწრაფო სამედიცინო დახმარების ჯგუფების შემადგენლობით“, - აღნიშნულია საგანგებო სიტუაციების მართვის სამსახურის ინფორმაციაში.

დაშავებული ქალი გადმოყვანილია თბილისში, ღუდუშაურის სახელობის კლინიკაში და შესაბამისი სამედიცინო დახმარება უტარდება. პოლონელი ტურისტის სიცოცხლეს საფრთხე არ ემუქრება.

70
თემები:
შემთხვევები საქართველოში
რთველი

კორონავირუსი რთველს ვერ შეაფერხებს საქართველოს მთავრობა მეღვინეობის სფეროს დაეხმარება

0
(განახლებულია 09:14 02.06.2020)
ხელისუფლება მზადაა, ანტიკრიზისული გეგმის ფარგლებში მევენახეობისა და მეღვინეობის დარგებს დაეხმაროს

თბილისი, 2 ივნისი – Sputnik. საქართველოს მთავრობა კორონავირუსის პანდემიის გამო გამოწვეული კრიზისის პირობებში მეღვინეობის სფეროს დაეხმარება და ყურძნის მოსალოდნელი უხვი მოსავლისთვის მოემზადება, განაცხადა საქართველოს პრემიერ–მინისტრმა გიორგი გახარიამ.

იმისთვის, რომ პანდემიის გამო გამოწვეული ეკონომიკური კრიზისი რთვლეზე არ აისახოს, საქართველოს ხელისუფლება მეღვინეობის დარგზე ანტიკრიზისული გეგმის ფარგლებში იზრუნებს. ეს გადაწყვეტილება გახარიას სოფლის მეურნეობის სამინისტროსა და შესაბამისი უწყებების წარმომადგენლებთან სამუშაო შეხვედრაზე მიიღეს.

შეხვედრაზე განიხილეს გლობალურ პანდემიასთან დაკავშირებით მეღვინეობის დარგში არსებული ვითარება და ზარალი, რომელიც დარგმა ტურიზმის შემცირების პირობებში მიიღო.

პრემიერის დავალებით სოფლის მეურნეობის სამინისტრო სხვა უწყებებთან ერთად გააგრძელებს ინტენსიურ მუშაობას, რათა ყურძნის ჩაბარების პროცესში არ შეიქმნას პრობლემები და სახელმწიფოცა და კერძო სექტორიც რთვლის სეზონს მაქსიმალურად მომზადებული შეხვდეს.

სოფლის მეურნეობა და ფერმერების დახმარება პრიორიტეტია

მთავრობამ უკვე განაცხადა იმპირტჩანაცვლების ამბიციური გეგმების შესახებ, ამიტომ სოფლის მეურნეობისა და ფერმერების დახმარება პრიორიტეტულია.

სოფლის განვითარების პროგრამა მიმართულია დარეგისტრირებული მიწების მფლობელთა ფერმერული მეურნეობების განვითარებისკენ. დაიწყო ფერმერებისთვის აგრობარათების გაცემა. აგრობარათებზე დაირიცხება როგორც ფულადი სახსრები, ისე ქულები, რომლებითაც ფერმერები სასუქებისა და მცენარეთა დამცავი პრეპარატების, ქიმიური და ბიოლოგიური საშუალებების, თესლისა და ნერგების შეძენას, ასევე აგროტექნიკის მომსახურების საფასურის გადახდას შეძლებენ.

ყველა ფერმერი, რომელიც 0,25-დან 10 ჰექტრამდე რეგისტრირებულ მიწის ნაკვეთს ფლობს, აგროტექნიკური სამუშაოებისთვის აუცილებელ საწვავს საბაზრო ღირებულებაზე იაფად შეიძენს. წლიური ლიმიტი იქნება 150 ლიტრი ერთ ჰექტარ მიწის ნაკვეთზე.

კრიზისთან დაკავშირებით ასევე შეიცვალა აგროკრედიტის პროგრამაც, რომელიც ქვეყანაში 2012 წლიდან მოქმედებს.

სახელმწიფო სრულად გადაიხდის ერთწლოვანი კულტურების წარმოების გასავითარებლად აღებული 5 ათასიდან 100 ათას ლარამდე მოცულობის სესხის პროცენტებს. სესხი ნახევარი წლის განმავლობაში გაიცემა.

„შეღავათიანი აგროკრედიტის“ ძირითადი საშუალებების კომპონენტში იზრდება თანადაფინანსების პროცენტი. არსებული წლიური 8 პროცენტის ნაცვლად სახელმწიფო ფერმერს 48 თვის განმავლობაში დაუფინანსებს 11 პროცენტს. იზრდება ლიზინგის თანადაფინანსების პროცენტიც - ნაცვლად არსებული 9 პროცენტისა, იქნება 12 პროცენტი.

9 მილიონის გრანტები სოფლად ბიზნესის განვითარებისთვის – როგორ მოვიპოვოთ>>

პროგრამის ფარგლებში ფერმერებისთვის გაცემული კრედიტების საერთო მოცულობა 2020 წელს 25 მილიონ ლარს შეადგენს.

გარდა ამისა, მთავრობის გადაწყვეტილებით, „შეღავათიანი აგროკრედიტის“ პროგრამა გაფართოვდა და ახლა ის მოიცავს მეღვინეობის დარგს, რომელიც მეღვინეობის კომპანიებს პანდემიისგან გამოწვეული პრობლემების გადალახვაში დაეხმარება.

0
თემები:
საქართველოს სოფლის მეურნეობა