თბილისი, 13 სექტემბერი — Sputnik. გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა აგვისტოს თვეში ხეტყის უკანონო მოპოვებისა და ტრანსპორტირების 257 ფაქტი გამოავლინეს, ნათქვამია უწყების განცხადებაში.
ხეტყის უკანონო მოპოვების ყველაზე მეტი ფაქტი გამოვლინდა კახეთის ტერიტორიაზე. გამოვლენილ ფაქტებს შორის ათ შემთხვევაზე სისხლის სამართლის საქმე აღიძრა.
როგორც დეპარტამენტში აცხადებენ, ხეტყის უკანონო მოპოვებისა და ტრანსპორტირების ყველაზე მეტი – 116 ფაქტი გამოვლინდა კახეთის რეგიონული სამმართველოს სამოქმედო ტერიტორიაზე.
ქვემო ქართლის ტერიტორიაზე 31 სამართალდარღვევა გამოვლინდა, აჭარის რეგიონული სამმართველოს მასშტაბით დაფიქსირდა 29 ფაქტი, იმერეთში – 23, სამცხე-ჯავახეთის რეგიონული სამმართველოს სამოქმედო ტერიტორიაზე – 17, შიდა ქართლში – ასევე 17, მცხეთა-მთიანეთში – 9, გურიასა და სამეგრელო-ზემო სვანეთში – 6-6, რაჭა-ლეჩხუმი ქვემო სვანეთში კი 2 ფაქტი დაფიქსირდა.
არსებული ინფორმაციით, სამართალდამცველებმა ჯამში უკანონოდ მოპოვებული 970 კუბური მეტრი ხეტყე ამოიღეს.
საქართველოს სატყეო ფონდი 2,9 მილიონი ჰექტარის ფართობს იკავებს, საიდანაც 2,7 მილიონი ჰექტარი დაფარულია ტყეებით, რაც ქვეყნის ტერიტორიის 40%-ს შეადგენს.
