ხელბორკილები

გამოძალვისა და ძალადობის ბრალდებით კახეთში პოლიციამ ორი პირი დააკავა

93
(განახლებულია 16:05 30.08.2019)
ბრალდებულები ფიზიკური ანგარიშსწორებისა და სიცოცხლის მოსპობის მუქარით ძმებს ფულს სძალავდნენ.

თბილისი, 30 აგვისტო — Sputnik. შინაგან საქმეთა სამინისტროს თანამშრომლებმა კახეთში ორი მამაკაცი დააკავეს გამოძალვისა და ძალადობის ბრალდებით, ნათქვამია უწყების მიერ გავრცელებულ განცხადებაში.

საქმის მასალებიდან ირკვევა, რომ ბრალდებულები თელავის რაიონის ერთ-ერთ სოფელში ფიზიკური ანგარიშსწორებისა და სიცოცხლის მოსპობის მუქარით ძმებს ფულს სძალავდნენ.

ბრალდებულები 30 და 32 წლის არიან.

პოლიციამ ერთ-ერთი დაკავებულის საცხოვრებელი სახლის ჩხრეკისას ნიღაბი, ხელთათმანები და პისტოლეტი ნივთმტკიცებად ამოიღო.

გამოძიება დაწყებულია სსკ-ის 181-ე მუხლის მეორე და 126-ე პირველი პრიმა მუხლით, რაც ქონების მიღების მიზნით ჯგუფურად ჩადენილ გამოძალვას და ჯგუფურად ორი ან მეტი პირის მიმართ ჩადენილ ძალადობას გულისხმობს და ითვალისწინებს ოთხიდან შვიდ წლამდე ვადით თავისუფლების აღკვეთას.

93
თემები:
კრიმინალი საქართველოში (447)