თბილისი, 10 ივლისი — Sputnik. ვარკეთილის „სამხედრო დასახლებაში" უცნობმა პირმა საცხოვრებელი სახლის სადარბაზოში ხელყუმბარა შეაგდო. შედეგად სამი ადამიანი დაშავდა, იუწყება პირველი არხი.
წინასწარი მონაცემებით, დანაშაულის მოტივი შურისძიება იყო.
„დაზიანებული იყო მხოლოდ რბილი ქსოვილები. ჩვენ კლინიკაში პაციენტს აღმოუჩინეს სამედიცინო დახმარება; კონკრეტულად, დამუშავდა ჭრილობები, გაეწია ვიწრო სპეციალისტების კონსულტაციები, გამოკვლევები ჩატარდა და გადაყვანილია შემდგომი მკურნალობისთვის სტაციონარულ განყოფილებაში", – განაცხადა საავადმყოფოს ექიმმა მანანა ლობჟანიძემ ჟურნალისტებთან საუბრისას.
სისხლის სამართლის საქმე აღძრულია სსკ-ის მუხლით „განზრახ მკვლელობის მცდელობა". შსს-ს ინფორმაციით, ეჭვმიტანილის ვინაობა უკვე დადგენილია და ამჟამად მისი დაკავების სამუშაოები მიმდინარეობს.